1. Ania ti maysa a rason nga inyarig ni Jesus dagiti pasurotna kadagiti karnero?

INYARIG ni Jesus ti relasionna kadagiti pasurotna iti nasinged a relasion ti maysa a pastor kadagiti karnerona. (Juan 10:14) Umiso dayta a panangyarig. Am-ammo dagiti karnero ti pastorda ken agtulnogda iti timekna. Napadasan a mismo dayta ti maysa a turista. Inreportna: “Kayatmi a piktiuran ti dadduma a karnero isu a pinadasmi nga ayaban ida. Ngem saanda nga immasideg gapu ta dida am-ammo ti timekmi. Idi kuan, adda bassit nga ubing a pastor nga immay, ket idi inayabanna ida, dagus a simmurotda kenkuana.”

2-3. (a) Kasano nga ipakpakita dagiti pasurot ni Jesus a dumdumngegda iti timekna? (b) Ania ti usigentayo iti daytoy nga artikulo ken iti sumaruno?

² Ipalagip ti kapadasan dayta a turista ti imbaga ni Jesus maipapan kadagiti karnerona​—dagiti adalanna. Imbagana: “Denggendanto ti timekko.” (Juan 10:16) Ngem adda ni Jesus idiay langit. Kasanotayo ngarud a maibaga a dumdumngegtayo kenkuana? Ti maysa a kangrunaan a pamay-an a maipakitatayo a dumdumngegtayo iti timek ti Apotayo ket no iyaplikartayo iti biagtayo dagiti pannursurona.​—Mat. 7:24, 25.

³ Iti daytoy nga artikulo ken iti sumaruno, usigentayo ti dadduma a pannursuro ni Jesus. Kas maammuantayo, insuro ni Jesus kadatayo nga adda dagiti banag a masapul nga isardengtayo nga aramiden ken adda dagiti masapul nga aramidentayo. Usigentayo nga umuna ti dua a banag nga imbilin ti nasayaat a pastor nga isardengtayo nga aramiden.

4. Sigun iti Lucas 12:29, ania ti makagapu nga “agdanag unay” ti maysa a tao?

⁴ Basaen ti Lucas 12:29. Imbalakad ni Jesus kadagiti pasurotna a ‘saandan nga agdanag unay’ maipapan kadagiti material a kasapulanda. Ammotayo a kanayon a nainsiriban ken umiso dayta a balakad ni Jesus. Kayattayo nga iyaplikar dayta. Ngem no dadduma, mabalin a marigatantayo a mangaramid iti dayta. Apay?

5. Apay a madanagan ti dadduma maipapan iti material a kasapulanda?

 ⁵ Mabalin a madanagan ti dadduma maipapan kadagiti material a kasapulanda​—taraon, bado, ken pagtaengan. Mabalin a napanglaw ti pagilian a pagnanaedanda. Baka marigatanda nga agbirok iti kuarta nga umdas nga usaren ti pamiliada. Wenno baka natay ti kapamiliada a parasapul iti pagbiagda, isu nga awanen ti mangipaay iti pinansial a suporta ti pamilia. Mabalin nga adu ti naawanan iti trabaho ken pamastrekan gapu iti COVID-19 pandemic. (Ecl. 9:11) No mapasarantayo ti maysa kadagitoy, wenno ti dadduma pay a problema, kasanotayo a masurot ti bilin ni Jesus a saantayon nga agdanag?

6. Deskribirem ti napasamak ken apostol Pedro iti maysa a gundaway.

⁶ Iti maysa a gundaway, adda idiay Baybay ti Galilea ni apostol Pedro ken ti dadduma pay nga apostol a nakalugan iti bangka. Bayat a pimmigsa ti angin, nakitada a magmagna ni Jesus iti rabaw ti danum. Imbaga ni Pedro: “Apo, no sika dayta, papagnaennak iti rabaw ti danum a mapan dita ayanmo.” Idi imbaga ni Jesus ken Pedro nga “umayka,” dimsaag ni Pedro iti bangka ket “nagna iti danum nga agturong ken Jesus.” Ania ti simmaruno a napasamak? “Nagbuteng gapu iti napigsa nga  angin, ket nangrugi a lumned sa impukkawna: ‘Arayatennak, Apo!’” Inyawat ni Jesus ti imana ket insalakanna ni Pedro. Laglagipentayo a nakapagna ni Pedro iti nadawel a danum bayat a nakapokus ken Jesus. Ngem idi kimmita ni Pedro iti napigsa nga angin, nagbuteng ken nagduadua ket nangrugi a lumned.​—Mat. 14:24-31.

7. Ania ti masursurotayo iti napasamak ken Pedro?

⁷ Adda masursurotayo iti napasamak ken Pedro. Idi dimsaag ni Pedro iti bangka ken nagna iti baybay, dina ekspektaren nga agdanag ken mangrugi a lumned. Kayatna ti magna iti rabaw ti danum agingga a makadanon iti Apona. Ngem imbes nga agpokus ken Jesus, nadanagan iti napigsa nga angin. Siempre, saantay a kaya ti magna iti rabaw ti danum, ngem adda dagiti pakasubokan ti pammatitayo. No saantayo nga agpokus ken Jehova ken kadagiti karina, mangrugitayo a lumned iti naespirituan. Aniaman a simboliko a bagyo ti dumteng iti biagtayo, masapul a kanayon nga agpokustayo ken Jehova ken iti pannakabalinna a tumulong kadatayo. Kasano?

8. Ania ti makatulong kadatayo tapno saan a sobra ti panagdanagtayo kadagiti material a kasapulantayo?

⁸ Pagsayaatantayo no agtalektayo ken Jehova imbes a madanagantayo kadagiti problematayo. Laglagipentayo nga ipaspasigurado ti naayat nga Amatayo a ni Jehova nga ipaayna dagiti material a kasapulantayo no iyun-unatayo ti naespirituan a bambanag. (Mat. 6:32, 33) Kanayon a tungtungpalenna dayta a karina. (Deut. 8:4, 15, 16; Sal. 37:25) No ipapaay ni Jehova ti kasapulan dagiti billit ken dagiti sabong, masapul ngarud a saantayo a madanagan no ania ti kanen wenno pagbadotayo! (Mat. 6:26-30; Fil. 4:6, 7) No kasano nga ayat ti makagapu nga ipapaay dagiti nadungngo a nagannak ti material a kasapulan dagiti annakda, ayat met ti makagapu nga ipapaay ti nailangitan nga Amatayo dagiti material a kasapulan dagiti adipenna. Wen, siguradotayo a dinatayo pulos baybay-an ni Jehova!

9. Ania ti masursurom iti kapadasan ti maysa nga agassawa?

⁹ Usigentayo ti kapadasan a mangipakita a kabaelan ni Jehova nga ipaay dagiti material a kasapulantayo. Adda agassawa a payunir a nagbiahe iti nasurok a maysa nga oras babaen ti daan a luganda tapno dagasenda ti dadduma a sister iti maysa a refugee center tapno makigimongda. Inlawlawag ti brother: “Kalpasan ti gimong, inawismi dagiti sister a mangankami idiay balay. Ngem napanunotmi nga awan met gayam ti pagsasanguanmi.” Ania ti inaramid ti agassawa? Intuloy ti brother: “Idi nakadanonkami idiay balay, adda dua a dadakkel a bag a napno iti taraon iti sango ti ridawmi. Dimi ammo no asino ti nangibati kadagita. Inaywanannakami ni Jehova.” Di nagbayag kalpasan dayta, nadadael ti luganda. Kasapulanda dayta iti ministerio. Ngem awan ti kuarta a pagpatarimaanda. Impanda ti lugan iti asideg a pagpatarimaanan tapno ammuenda no mano ti magastos. Idi kuan, adda lalaki nga immay ken insaludsodna: “Makinlugan dayta?” Imbaga ti brother a kukuana dayta ken masapul a maipatarimaan. Imbaga ti lalaki: “Awan problema. Kasta a modelo ken eksakto a kolor ti lugan ti kayat ni baketko. Mano ti panglakom?” Inlako ti brother ti luganna ket immanay ti naglakuanna a panggatang iti sabali a lugan. Kinunana: “Permi ti ragsakmi iti dayta nga aldaw. Ammomi a saan a naiparparna dayta. Tinulongannakami ni Jehova.”

10. Kasano a makatulong ti Salmo 37:5 tapno saantayo a pakadanagan dagiti material a kasapulantayo?

¹⁰ No dumngegtayo iti nasayaat a pastor ken  isardengtayo ti sobra a panagdanag maipapan kadagiti material a kasapulantayo, masiguradotayo nga ipaay ni Jehova dagiti kasapulantayo. (Basaen ti Salmo 37:5; 1 Ped. 5:7) Panunotentayo dagiti narigat a situasion a nadakamat iti  parapo 5. Agingga ita, mabalin nga us-usaren ni Jehova ti maysa nga ulo ti pamilia wenno maysa nga amo a tumulong a mangipaay iti inaldaw a kasapulantayo. No saanen a kabaelan ti ulo ti pamilia nga aramiden dayta wenno no maawanantayo iti trabaho, adda sabali a pamay-an ni Jehova a mangaywan kadatayo. Ipaayna dagiti kasapulantayo. Usigentayo itan ti sabali pay nga imbilin ti nasayaat a pastor nga isardengtayo nga aramiden.

11. Sigun iti Mateo 7:1, 2, ania ti imbaga ni Jesus nga isardengtayo nga aramiden, ken apay a mabalin a narigat dayta?

¹¹ Basaen ti Mateo 7:1, 2. Ammo ni Jesus nga imperpekto dagiti tattao ket adda tendensiada a mangkritikar iti sabsabali, isu nga imbagana: “Isardengyo ti mangukom.” Mabalin nga ikagkagumaantayo a saan nga ukomen dagiti kapammatiantayo ngem imperpektotayo amin. No adda tiempo a manangkritikartayo, ania ti masapul nga aramidentayo? Dumngegtayo ken Jesus, ken ikagumaantayo nga isardeng ti mangukom.

12-13. Kasano a maisardengtayo nga ukomen ti sabsabali no utobentayo ti panangmatmat ni Jehova ken Ari David?

¹² Pagsayaatantayo no utobentayo ti ulidan ni Jehova. Kanayon a kitkitaenna dagiti nasayaat a kualidad dagiti tattao. Makitatayo dayta iti panangtratona ken Ari David, a nakaaramid kadagiti nadagsen a basol. Kas pagarigan, nakikamalala ken Bat-sheba, ken impapatayna pay ketdi ni lakayna. (2 Sam. 11:2-4, 14, 15, 24) Gapu iti dayta, nagsagaba ni David, kasta met ti pamiliana, a pakairamanan ti dadduma pay nga assawana. (2 Sam. 12:10, 11) Iti sabali a gundaway, saan a naan-anay a nagtalek ni David ken Jehova idi imbilinna ti illegal a pannakairehistro ti armada ti Israel. Mabalin a gapu dayta iti panagpannakkel ken iti panagtalekna iti kaadu dagiti soldadona. Ania ti nagbanaganna? Natay ti 70,000 nga Israelita gapu iti makapapatay a sakit!​—2 Sam. 24:1-4, 10-15.

¹³ No sibibiagka idiay Israel iti daydi a tiempo, ania koma ti panangmatmatmo ken David? Husgaram kadi a saan a maikari iti asi ni Jehova? Saan a kasta ni Jehova. Nagpokus iti rekord ti kinamatalek ni David ken iti naimpusuan a panagbabawina. Kas resultana, pinakawan ni Jehova dagitoy a nadagsen a basol ni David. Ammo ni Jehova ti kasta unay a panagayat kenkuana ni David ken kayatna nga aramiden ti umiso. Dika kadi agyaman ta dagiti kitkitaen ni Jehova kadatayo ket dagiti naimbag a kualidadtayo?​—1 Ar. 9:4; 1 Cron. 29:10, 17.

14. Ania ti nakatulong kadagiti Kristiano tapno maisardengda nga ukomen ti sabsabali?

¹⁴ No mangipapaay ni Jehova iti konsiderasion kadagiti imperpekto a tattao, masapul met nga aramidentayo dayta ken kitaentayo dagiti nasayaat a kualidad ti sabsabali. Gagangay a naglaka a makita ti kinaimperpekto ti sabsabali ken ti agbalin a manangkritikar. Nupay kasta, mabalin a makita ti naespirituan a tao ti kinaimperpekto ti sabsabali ngem makatunosanna latta ida. Nalabit saan a napintas ti saan pay a natabas a diamante. Ngem ammo ti masirib a tao a nakapimpintas ken napateg dayta inton matabas ken mapasileng. Kas ken Jehova ken Jesus, masapul a saantayo nga agpokus kadagiti pagkamkamalian dagiti tattao no di ket kadagiti nasayaat a kualidadda.

15. Kasano a ti panangikabilangan kadagiti kasasaad dagiti tattao matulongannatayo a saan a mangukom kadakuada?

 ¹⁵ Malaksid iti panagpokus kadagiti nasayaat a kualidad ti sabsabali, ania pay ti makatulong tapno saantayo ida nga ukomen? Panunotentayo no ania ti kasasaad ti panagbiagda. Usigentayo daytoy a pagarigan. Maysa nga aldaw, nakita ni Jesus iti templo ti maysa a napanglaw a balo a babai a nangitinnag iti dua a babassit a sinsilio a nakabasbassit ti pategna iti pagitinnagan iti kontribusion. Saanna nga insaludsod: “Apay a daydiay la ti intinnagna?” Imbes nga agpokus ni Jesus iti kabassit ti inted ti balo, inkabilanganna dagiti motibo ken kasasaadna ken dinayawna ti panangaramidna iti amin a kabaelanna.​—Luc. 21:1-4.

16. Ania ti masursurom iti kapadasan ni Veronica?

¹⁶ Ipakita ti kapadasan ti maysa a sister nga agnagan Veronica no apay a napateg nga ikabilangantayo ti kasasaad ti panagbiag ti sabsabali. Adda kakongregasionna a maysa nga agsolsolo nga ina nga adda anakna a lalaki. Inamin ni Veronica: “Nadlawko a saanda unay a makigimgimong ken mangaskasaba, isu a negatibo ti panangmatmatko kadakuada. Ngem naminsan, nakaduak iti ministerio dayta nga ina. Imbagana a marigrigatan a mangaywan iti autistic nga anakna. Ar-aramidenna ti amin a kabaelanna a mangipaay iti pisikal ken naespirituan a kasapulanda. No dadduma, gapu iti kondision ti anakna, kapilitan a makigimong iti sabali a kongregasion.”  Kastoy ti konklusion ni Veronica: “Diak impagarup a kasta gayam karigat ti situasionna. Ap-apresiarek ken resrespetuek unayen daytoy a sister gapu iti amin nga ar-aramidenna nga agserbi ken Jehova.”

17. Ania ti ibilin ti Santiago 2:8 nga aramidentayo, ken kasanotayo a maaramid dayta?

¹⁷ Ania ti masapul nga aramidentayo no nadlawtayo nga inukomtayo ti maysa a kapammatiantayo? Masapul a laglagipentayo a naibilin nga ayatentayo dagiti kakabsattayo. (Basaen ti Santiago 2:8.) Masapul met a sipapasnek nga ikararagtayo ken Jehova a tulongannatayo tapno maisardengtayo ti mangukom. Tapno maaramidtayo ti inkararagtayo, datayo ti umuna a makisarita iti tao a kritkritikarentayo. Iti kasta, maam-ammotayo isuna. Mabalin nga awisentayo a makikadua kadatayo iti panangasaba wenno iti maysa a pannangan. Bayat a maam-ammotayo dayta a kabsat, kitaentayo dagiti nasayaat a kualidadna tapno matuladtayo ti ulidan ni Jehova ken ni Jesus. Iti kasta a pamay-an, ipakpakitatayo a dumdumngegtayo iti bilin ti nasayaat a pastor nga isardengtayo ti mangukom.

18. Kasanotayo a maipakita a dumdumngegtayo iti timek ti nasayaat a pastor?

¹⁸ No kasano a dumdumngeg dagiti literal a karnero iti timek ti pastorda, dumdumngeg met dagiti pasurot ni Jesus iti timekna. No ikagumaantayo nga isardeng ti agdanag maipapan kadagiti material a kasapulantayo ken no isardengtayo nga ukomen ti sabsabali, bendisionanto ni Jehova ken ni Jesus dagiti panagreggettayo. Pasettayo man ti “bassit nga ipastoran” wenno ti ‘sabsabali a karnero,’ itultuloytayo koma ti dumngeg ken agtulnog iti timek ti nasayaat a pastor. (Luc. 12:32; Juan 10:11, 14, 16) Iti sumaruno nga artikulo, usigentayo ti dua nga imbaga ni Jesus a masapul nga aramiden dagiti pasurotna.