1. Omolwashike tashi dulika Jesus a yelekanifa ovashikuli vaye needi?

JESUS okwa yelekanifa ekwatafano laye novashikuli vaye, nekwatafano lopofingo olo hali kala pokati komufita needi daye. (Joh. 10:14) Eyelekanifo la tya ngaho otali wapalele. Eedi odi shii omufita wado nohadi pwilikine kondaka yaye. Omutalelipo umwe omweendi okwa mona oushili woshinima osho. Okwa ti: “Otwa li twa hala okufaneka eedi dimwe notwa li twa hala di ehene popepi nafye. Ashike kada li de tu shikula, molwaashi kadi shii eendaka detu. Opo nee ope uya okamati kanini kokafita, naashi ke di ifana, ode ka shikula.

2-3. (a) Ovashikuli vaJesus ohava ulike ngahelipi kutya otava pwilikine kondaka yaye? (b) Oshike hatu ka kundafana moshitukulwa eshi, nomwaashi tashi shikula ko?

² Oshimoniwa osho shomutalelipo omweendi otashi tu dimbulukifa eendjovo daJesus di na sha needi daye, ovahongwa vaye. Okwa ti: ‘Otadi ka uda ondaka yange.’ (Joh. 10:16) Ndele Jesus oku li meulu. Ongahelipi hatu dulu okupwilikina kondaka yaye? Onghedi ya denga mbada omo hatu ulike kutya ohatu pwilikine kondaka yOmwene wetu, omokutula moilonga omahongo aye. — Mat. 7:24, 25.

³ Moshitukulwa eshi, nomwaashi tashi shikula ko ohatu ka kundafana omahongo amwe aJesus. Ngaashi hatu ke shi mona, Jesus okwe tu honga oinima yonhumba oyo tu na okweefa po okuninga nosho yo oyo tu na okuninga. Tete ohatu ka kundafana oinima ivali yokondadalunde, oyo omufita wetu muwa e tu lombwela tu efe po okuninga.

4. Metwokumwe naLukas 12:29, oshike tashi dulu okweetifa “oshisho sha pitilila”?

⁴ Lesha Lukas 12:29. Jesus okwa lombwela ovashikuli vaye ‘vaha kale ve na oshisho sha pitilila’ shi na sha noipumbiwa yakeshe fiku. Otu shii kutya omayele aJesus alushe ohaa kala pandunge nokwa yuka. Ohatu kala twa hala okutula moilonga omayele oo, ndele omafimbo amwe ohashi kala shidjuu oku shi ninga. Omolwashike mbela?

5. Omolwashike tashi dulika vamwe hava kala ve na oshisho shoipumbiwa yakeshe fiku?

 ⁵ Vamwe otashi dulika hava kala ve na oshisho shoipumbiwa yakeshe fiku, ngaashi oikulya, oikutu nosho yo onhele yokukala. Otashi dulika ve li moshilongo omo mu na vahapu va hepa noshidjuu okumona oilonga. Otashi dulika shi kale shidjuu kuvo okumona oimaliwa ya wana, opo va file oshisho omaukwaneumbo avo. Ile otashi dulika omunhu a fya, oo a li ha eta omboloto meumbo. Otashi dulika a fiya oukwaneumbo pomutenya, molwaashi kape na vali ou te u yambidida pashimaliwa. Natango, ovanhu vahapu otashi dulika va kanifa oilonga, omolwomukifi wekomba wo-COVID-19. (Omuud. 9:11) Ngeenge otwa shakeneka onghalo imwe yomeenghalo odo, ile omashongo vali amwe, ongahelipi hatu dulu okutula moilonga eendjovo daJesus di na sha nokuhakala noshisho?

6. Hokolola osho sha li sha ningilwa omuyapostoli Petrus pomhito imwe.

⁶ Pomhito imwe, omuyapostoli Petrus nosho yo ovayapostoli vakwao ova li mowato mEfuta laGalilea pefimbo loshikungulu shomhepo. Ova li va mona Jesus ta ende kombada yomeva. Opo nee Petrus okwa ti: “Omwene, ngeenge oove, lombwele nge ndi uye kwoove handi ende kombada yomeva.” Konima eshi Jesus a ti “ila,” Petrus okwa dja mowato, ndele “ta ende kombada yomeva a finda kuye.” Didilika osho sha ningwa po lwanima. “Eshi a tala koshikungulu shomhepo, okwa kwatwa koumbada. Naashi a hovela okuningina, okwa ingida ta ti: “Omwene, xupife nge!” Jesus okwa nana eke laye, ndele te mu xupifa. Shididilikwedi, Petrus okwa li a dula okweenda  kombada yomeva, molwaashi okwa li ta yandje elitulemo kuJesus. Ashike eshi Petrus a tala koshikungulu, okwa kwatwa koumbada nokomalimbililo, ndele ta hovele okuningina. — Mat. 14:24-31.

7. Oshike hatu lihongo moshihopaenenwa shaPetrus?

⁷ Ohatu dulu okulihonga mo sha moshihopaenenwa shaPetrus. Eshi Petrus a dja mo mowato nokulyata mefuta, ka li ta diladila ngeenge ota ka piyaanekwa koshikungulu nokuningina. Okwa li a hala okweenda kombada yomeva fiyo osheshi a fika kOmwene waye. Ndele okwa li a dopa okukala ta yandje elitulemo kuye. Kunena, nafye otwa pumbwa eitavelo, opo tu lididimikile omaupyakadi, ngaashi ashike Petrus a li a pumbwa eitavelo, opo a ende kombada yomeva. Ngeenge otwa dopa okuyandja elitulemo kuJehova nosho yo komaudaneko aye, eitavelo letu otali ka nghundipala. Kashi na nee mbudi kutya ohatu ka shakeneka oikungulu yopafaneko ya fa peni, otu na okukala hatu yandje elitulemo kuJehova nokeenghono daye doku tu kwafela. Ongahelipi hatu dulu okuninga ngaho?

8. Oshike tashi dulu oku tu kwafela tuha piyaanekwe unene koipumbiwa yetu yakeshe fiku?

⁸ Ponhele yokukala tu na oshisho shi na sha noipumbiwa, otwa pumbwa okukala twe lineekela muJehova. Dimbuluka kutya Tate yetu omunahole, Jehova, okwa udaneka kutya ota ka wanifa po eemhumbwe detu dakeshe fiku, ngeenge otwa pitifa komesho oinima yopamhepo. (Mat. 6:32, 33) Okwa kala alushe ta wanifa po eudaneko olo. (Deut. 8:4, 15, 16; Eps. 37:25) Ngeenge Jehova oha file oshisho oudila neengala, osha yela kutya katu na okukala hatu lipula unene shi na sha naasho hatu ka lya, ile hatu djala. (Mat. 6:26-30; Fil. 4:6, 7) Ngaashi ashike ohole hai linyengifa ovadali ovanahole va wanife po eemhumbwe dovana, ohole ohai linyengifa Tate yetu womeulu a wanife po eemhumbwe doshiwana shaye. Onghee hano, ohatu dulu okukala noushili kutya Jehova ote ke tu fila oshisho.

9. Oshike hatu lihongo moshimoniwa shovalihomboli vamwe?

⁹ Diladila koshimoniwa osho tashi ulike kutya Jehova ota dulu okuwanifa po eemhumbwe detu dakeshe fiku. Ovalihomboli vamwe, ovo ve li moilonga yefimbo li yadi, ova li va shinga oule wovili, opo va ka pitule ovamwameme vamwe, ovo hava kala mokamba yeenhauki, va ye navo kokwoongala kwopaKriste. Omumwatate okwa yelifa a ti: “Konima yokwoongala, otwa li twa shiva ovamwameme ovo keumbo letu tu ka lye pamwe navo. Ndele otwa ka mona kutya katu na oikulya ya wana.” Ovalihomboli ovo ova li tava ka ninga po shike? Omumwatate okwa twikila ko a ti: “Eshi twa fika keumbo, otwa li twa hanga eendjato mbali doikulya di li poshivelo sheumbo letu. Katwa li tu shii kutya oda etwa po kulyelye. Jehova okwa li e tu fila oshisho.” Lwanima, otuwa yovalihomboli ovo oya ka nyanauka. Oyo ya li hai va kwafele moukalele. Ashike kava li ve na oimaliwa yoku i pangelifa. Ofimbo va twala otuwa yavo kongalashe, opo va mone kutya otai pangelifwa kwiingapi, ope uya omulumenhu umwe, ndele te va pula ta ti: “Olye mwene wotuwa ei?” Omumwatate okwa ti kutya oyaye, ashike oya pumbwa okupangelwa. Opo nee omulumenhu oo okwa nyamukula a ti: “Kashi na mbudi. Omukulukadi wange okwa hala otuwa yoludi eli, noi na oluvala li li ngaha filufilu. Otai kosho ingapi?” Omumwatate okwa landifa po otuwa yaye komulumenhu oo nokwa pewa oimaliwa ya wana oku ka landa otuwa imwe. Omumwatate okwa ti: “Otwa li twa hafa neenghono pexulilo lefiku olo. Otwa li tu shii kutya osho inashi ningwa ashike oshitwe lipuma. Jehova oye a li e tu kwafela.”

10. Ongahelipi Epsalme 37:5 tali tu ladipike tuha kale noshisho shi na sha neemhumbwe detu dakeshe fiku?

¹⁰ Ngeenge otwa pwilikine komufita muwa nokuhenuka okukala noshisho sha pitilila shi na sha neemhumbwe detu, ohatu dulu okukala noushili kutya Jehova ote ke tu fila oshisho. (Lesha Epsalme 37:5; 1 Pet. 5:7) Diladila kombinga  yeenghalo odo da tumbulwa  mokatendo 5. Nokunena, Jehova opo a wanife po eemhumbwe detu dakeshe fiku otashi dulika a longife omutwe woukwaneumbo, ile omuyandji woilonga e tu kwafele. Ngeenge omutwe woukwaneumbo itau dulu vali okuninga ngaho, ile ngeenge otwa kanifa oilonga, Jehova ota ka wanifa po eemhumbwe detu ta longifa eenghedi dimwe. Ohatu dulu okukala noushili u na sha naasho. Paife natu ka kundafaneni oshinima shimwe vali, osho omufita muwa te tu kelele tuha ninge.

11. Metwokumwe naMateus 7:1, 2, Jesus okwe tu lombwela tu efe po okuninga shike, nomolwashike tashi dulu okukala shi li eshongo?

¹¹ Lesha Mateus 7:1, 2. Jesus oku shii kutya ovanhu inava wanenena ove na eamo lokukembaula vakwao. Nomolwaasho a ti: “Inamu tokola vakweni.” Otashi dulika tu kendabale okuhenuka okutokola ovaitaveli vakwetu. Ashike omafimbo amwe ohatu dopa okuninga ngaho. Oshike tu na okuninga, ngeenge otwa didilike kutya omafimbo amwe ohatu kembaula vamwe? Natu pwilikine kuJesus nokulonga noudiinini, opo tu efe po okutokola vakwetu.

12-13. Ongahelipi oshihopaenenwa shaJehova shanghee a li a tala ko ohamba David tashi tu kwafele tu efe po okutokola vakwetu?

¹² Ohatu dulu okumona ouwa mokudilonga koshihopaenenwa shaJehova. Oha yandje elitulemo komaukwatya mawa ovanhu. Osho otu shi liwetele e shi a li ta ungaunga nohamba David, omulumenhu oo a li a nyona omanyono a kwata moiti. Pashihopaenenwa, okwa li a ya moluhaelo naBatseba nokwa dipaifa nokuli omushamane waye. (2 Sam. 11:2-4, 14, 15, 24) Osho kasha li ashike sha ehameka David, ndele osha li yo sha ehameka oukwaneumbo waye, mwa kwatelwa novakulukadi vaye vakwao. (2 Sam. 12:10, 11) Pomhito vali imwe, David okwa li a ulika kutya ka li e lineekela filufilu muJehova e shi a li a valula ovalumenhu vometangakwaita laIsrael. Jehova ka li e mu lombwela a ninge oshinima sha tya ngaho. Otashi dulika a li a ninga ngaho omolwounhwa, ile molwaashi a li e lineekela metangakwaita laye linene. Osho osha li sha eta oidjemo ilipi? Ovaisrael 70 000 lwaapo ova li va fya kondjala. — 2 Sam. 24:1-4, 10-15.

¹³ Ngeno owa li muIsrael pefimbo olo, ngeno David owa kala we mu tala ko ngahelipi? Mbela ngeno owa diladila kutya ina wana okudiminwa po kuJehova? Jehova ka li a diladila ngaho. Okwa li a yandja elitulemo kunghee David a kala omudiinini nokwa li a mona kutya okwe livela ombedi shili. Onghee, Jehova okwa li a dimina po David, omolwomanyono oo a kwata moiti. Jehova okwa li e shii kutya David oku mu hole neenghono nokwa hala okulonga osho sha yuka. Otwa pandula unene, eshi Jehova ha tale komaukwatya mawa nokelihumbato letu liwa. — 1 Eeh. 9:4; 1 Omaf. 29:10, 17.

14. Oshike tashi dulu okukwafela Ovakriste va efe po okutokola ovanhu vakwao?

¹⁴ Molwaashi Jehova ina teelela tu kale twa wanenena, nafye katu na okuteelela ovanhu vakwetu va kale va wanenena. Otu na okukala hatu yandje elitulemo komaukwatya avo mawa. Ashike ohashi kala shipu okumona okuhawanenena kwavamwe noku va kembaula. Omunhu oo ha hopaenene Jehova oha ungaunga nawa novanhu vakwao, nokuli nonande oku shii okuhawanenena kwavo. Okawe oko inaka kwewa ihaka monika nawa, ashike omunaendunge oha kala e shii kutya otaka ka monika nawa notaka ka kala ke na ondilo, ngeenge oka kwewa nokuwapekwa nawa. Ngaashi Jehova naJesus, natu kale hatu yandje elitulemo komaukwatya mawa ovanhu vakwetu, ponhele yokuyandja elitulemo kokuhawanenena kwavo.

15. Omolwashike okudiladila kombinga yeenghalo dovanhu tashi tu kwafele tuhe va tokole nonyanya?

¹⁵ Kakele kokuyandja elitulemo komaukwatya avamwe mawa, oshike tashi dulu oku tu kwafela tuhe va tokole nonyanya? Kendabala okudiladila  keenghalo omo ve li. Natu taleni koshihopaenenwa eshi. Efiku limwe, Jesus okwa li a mona omukainhu omufiyekadi motembeli, ta tula oumaliwa vavali vongushu inininini moshikefa shomayambidido. Jesus ka li a pula kutya: “Omolwashike ina tula mo oimaliwa ihapu?” Ponhele yokuyandja elitulemo komuvalu oo wa yandjwa komufiyekadi, Jesus okwa yandja elitulemo komalinyengotomheno nosho yo konghalo omo e li. Okwa li e mu pandula omolweenghendabala adishe odo a ninga. — Luk. 21:1-4.

16. Oshike hatu lihongo moshimoniwa shaVeronica?

¹⁶ Oshimoniwa shaVeronica otashi ulike kutya omolwashike sha fimana okukala hatu diladila shi na sha novanhu vakwetu. Meongalo lavo omwa li omukainhu ina hombolwa, oo ta tekula oye aeke omonamati waye. Veronica okwa ti: “Ova li tava monika va fa ihava kala pokwoongala noihava kufa ombinga moukalele pandjikilile. Onda li nde va talela mefano limwe lii, omolwoshinima osho. Opo nee onda ka longa moukalele pamwe nomukainhu oo. Omukainhu oo okwa lombwela nge kutya omonamati ota kondjo nomukifi wopamadiladilo. Oha ningi ngaashi ta dulu, opo a wanife po eemhumbwe davo dopalutu nodopamhepo. Omolwomaupyakadi omonamati, omafimbo amwe omukainhu oo okwa li ha mono shi li xwepo okwoongala keongalo likwao.” Veronica okwa ti: “Kanda li ndi shii ngeenge okwa taalela eshongo la tya ngaho. Paife ondi hole omumwameme oo nonde mu fimaneka neenghono, eshi ha ningi ngaashi ta dulu, opo a longele Jehova.”

17. Jakob 2:8 ote tu lombwele tu ninge shike, nongahelipi hatu dulu okuninga ngaho?

 ¹⁷ Oshike twa pumbwa okuninga, ngeenge otwa didilika kutya ohatu tokola ovaitaveli vakwetu? Otu na okudimbuluka kutya otu na okukala tu hole ovamwatate. (Lesha Jakob 2:8.) Natango, otu na okwiilikana kuJehova twa mana mo, hatu mu indile e tu kwafele tu efe po okutokola ovanhu vakwetu. Ohatu dulu okukala metwokumwe neilikano letu mokukatuka eenghatu, opo tu konge efimbo tu kale nomunhu oo twa kala hatu kembaula. Osho otashi dulika shi ke tu kwafele tu mu shiive nawa. Ohatu dulu oku mu pula tu ka longe pamwe naye moukalele, ile tu lye pamwe naye omusha. Ohatu ka kendabala okushikula oshihopaenenwa shaJehova naJesus mokutala komaukwatya mawa omumwatate, eshi hatu ende hatu mu shiiva nawa. Kungaho, ohatu ka ulika kutya ohatu pwilikine kelombwelo lomufita muwa li na sha nokweefa po okutokola vamwe.

18. Ongahelipi hatu dulu okuulika kutya ohatu pwilikine kondaka yomufita muwa?

¹⁸ Ngaashi ashike eedi do venevene hadi pwilikine kondaka yomufita wado, ovashikuli vaJesus navo ohava pwilikine kondaka yaye. Ngeenge otwa ningi eenghendabala tu henuke okukala noisho i na sha neemhumbwe detu dakeshe fiku nokuhenuka okutokola ovanhu vakwetu, Jehova naJesus otava ka punika eenghendabala detu. Kashi na nee mbudi kutya otu li oshitukulwa ‘shokangudu kanini,’ ile ‘osheedi dimwe,’ natu twikileni okupwilikina nokudulika kondaka yomufita wetu muwa. (Luk. 12:32; Joh. 10:11, 14, 16) Moshitukulwa tashi shikula ko, ohatu ka kundafana oinima ivali oyo Jesus a lombwela ovashikuli vaye va ninge.