1. I kabingil kaay kalongel bwa Yeez afwanyikij biiyij bindiy ni mikook?

YEEZ waakady mufwanyikij bulund bwindiy ni bayiij bindiy ni budy hakacy ha mulamy a mikook ni mikook yindiy. (Jah 10:14) Kufwanyikij ook, i kukumban. Mikook i yimanyik mulamy a yiy ni yumvumvw diiy dindiy. Mulong a lwend mukwaabw utadil bwaal oobw. Uleejel neey: “Twaakady tukaam kukwaat yimw mikook fotoh ni tuteetel bwa kwiiyibiikan bwa yiy kwiiy kutudy. Ki yilekelel bwa kwiiy kutudy bwaal kayaakadyobw bend yimanyik may miitut. Haanyim, natadil mwaan mutofw mwaan-mulum waakady wiiyilam wiiy kwaakady mikook; wiiyibiikeen ni yiiy kutwaadij kumulond.”

2-3. a) I mushind kaay udy biiyij ba Yeez baleej neey: bakuukun diiy dindiy mat? b) I biny bitwiiyiiy kulong mu ciin bwaal eecy ni mu ciiyiiy?

² Cileejel cya mulong a lwend oow cituvuvulwiij may ma Yeez habitaatal mikook yindiy—i bwiin kuleeb neey: biiyij bindiy. Uleebel neey: “Yiiyiiy kumvw diiy dya mim.” (Jah 10:16) Ki Yeez udy mu diiwul. Nook, i mushind kaay utudy mwa kumvw diiy dindiy? Tumvumvw diiy dya Fumw iitut hatukuukun malongweesh mindiy mat ni twiimakooyel mu shikacil iitut.​—Mat. 7:24, 25.

³ Mu ciin bwaal eecy ni mu ciloolond, twiiyiiy kutal mamw malongweesh ma Yeez. Teng mutwiiyiiy kwiibital, Yeez waakady mwiitulongweesh neey: tudy mwa kulek kulong myand kaahand ni kulong yikwaabw. Twiiyiiy kutal myand yibidy, yidy mulamy mulengel wa mikook wiitulongweesh mwa kulek kulong.

4. Bilondeshel Luuk 12:29, i biny bidy mwa kulong bwa ‘twiikal teng twiitacish’?

⁴ Bal Luuk 12:29. Yeez wambiil biiyij bindiy neey: “lekaay kwiitacishaay” bwiinun kukaam teng kukaam biinun kudy ni biinun kunw. Tudy bamanyik neey: mubel a Yeez ucidy teng mulengel ni  wa meej. Tudy bakat kumulond, ki misang yikwaabw bidy mwa kwiikal bitukasakeen bwa kulong nook. Bwabiny?

5. Bwabiny baat bakwaabw bady mwa kwiitacish bikasan bwa biit bikaakaamobw?

 ⁵ bamw baat bady mwa kwiikal bitacish bwa biit bikaakaamobw bu mudy—byakudy, bizang ni cyaab cya kulaal. Bady mwa kwiikal bashikacil mu cibunj mudy baat biikal balam-lam ni biikal bikasakan bwa kuhet mudimw. Bidy mwa kwiibakasakeen bwa kuhet fwalang yidy mwa kwiibambulwiish bwa kudiish cisak cyaababw. Eecy muut udy mwa kwiikal wambulwiish cisak ni fwalang udy mwa kufw, nook, biin mu cisak aab kabakwiikaloh bend ni fwalang yidy mwa kwiibambulwiish. Baat bavul i bajimbaj midimw bwa cihuh cya KOVID-19 ni biit byaababw. (Mul. 9:11) Tut bahet makab ma bwiin nook eecy makwaabw, i mushind kaay utudy mwa kukooyel mubel a Yeez wa kulek kwiitacish?

6. Lond bwaal bwaakady bulongekel mupostol Pyeel.

⁶ Cileejel, mupostol Pyeel ni bapostol bakwaabw baakady mu bwaat bwaakadyobw bend bakokakany kudy ciheeh cikasakan ha kaabuk-koony ka Kalileh, ni kutalobw Yeez wend wendel hiiwul a mwanz. Pyeel uleebel neey: “Awiikal uw biin-biin, a Fumweet, tuminaany diiy niiy kuwudy aakw nendel hiiwul ha mwanz.” Yeez umwambiil neey: “yaak!” Pyeel uhatukil mu bwaat “waay wendel hiiwul ha mwanz mutal kwaakady Yeez.” Talaayaak bwaal bulongekel. “Ki hatadiley ney ciheeh cyaakady cikasakan, ni bu mwaakadyey ki wend ni kutukin, umvwiil mooy ni umb watang kusok ney: ‘A Fumweet, kuulanyoh!’” Yeez utandabwiil kubok, wamukwaat. Byumvumvwiij neey: Pyeel waakady mwa kwendel ha mwanz yiy mwiikal mulam diitabij dikasakan kudy Yeez. Ki haakady Pyeel mutal ciheeh cikasakan, umvwiil mooy bikasakan; ni utwaadijil kutukin.​—Mat. 14:24-31.

7. I biny bitudy mwa kulongel ku cileejel cya mupostol Pyeel?

 ⁷ Tudy mwa kuhetel dilongweesh ku cileejel cya mupostol Pyeel. Ahatukil mupostol Pyeel mu bwaat, bwindiy kwendel hiiwul a kaabuk-koony, kaakadyoh bend mumanyik neey: waakady mwa kwiiy kumvw mooy bwa ciheeh cikasakan ni kutukin. Waakady mwa kutungunuk ni kwendel teng hiiwul ha mwanz aah teng ni haakadyey mwa kufik kwaakady Fumwend. Ki ukaakeel bwa kukumbaj kiihacil aak. Leeloow, katwiin mwa kwendel hiiwul ha mwanz, ki bikaakaam twiikal ni diitabij dikasakan bwa kutaatameen makab, teng bu mwaakadyeby bilomb Pyeel bwa kwiikal ni diitabij dikasakan bwa kwendel hiiwul ha mwanz. Tut balek kuteekel Yehow ni milay yindiy micim, twiiyiiy kutang kutukin mu myand ya mu spirit. Nook, ning tut tukab bikasakan, bikaam tutungunuk ni kweeyelel Yehow ni bukash bwindiy budyey mwa kwiitwambulwiish naabw. I mushind kaay utudy mwa kulong nook?

8. I biny bidy mwa kwiitwambulwiish bwa kulek kutungunuk teng ni kukabakan bikasakan bwa biit bitukaakaam?

⁸ Hamut iitut kwiitacish menmen bwa myand yitumoomon. Tuvuluk neey: Taat iitut udy ni lukat, Yehow, wiitulaalay neey: wiiyiiy kwiitwambulwiish ni biit bitukaakaam teng tut bateek myand ya mu spirit ha cyaab cya kuuhal. (Mat. 6:32, 33) I muvuluk mulay oow ni wiiyiiy kumukumbaj. (Mmu. 8:4, 15, 16; Mis. 37:25) Hiikal Yehow udiish toony ni uviik bilong, katwaakukabakanoh bend bwa bitwiikal mwa kudy ni kuvwaal! (Mat. 6:26-30; Fil 4:6, 7) Teng mudyaakal lukat lusak balel bwa kwaakish baan baababw bikaakaamobw, ki mudy lukat lusak Taat iitut a mu diiwul bwa kwaakish baat bindiy bikaakaamobw. Cya biin, twiikal batwiishiibw neey: Yehow wiikaakal teng wiitacish bwiitut!

9. I biny bitudy mwa kulongel ku cileejel cya biin maluw aab?

⁹ Twangat cileejel cileeleej mudy Yehow wiitacish bwa biit bitukaakaam. Biin maluw bady mu mudimw a ku diib ni ku diib, baloolong lwend diib dyumw ni mashiny maababw ma kal bwa kafik cyaab cya biin cimwang cyaakady biin-kweet baan-bakaj bashikacil ni bwa kwiibangat ni kuy naab mu cisangil cya biin Krist. Mwaaneet mwaan-mulum uleeleeb neey: “Haanyim a cisangil, twaakady tubiikan biin-kweet baan-bakaj bwa kudy neet bidyaaj, ki tutadil neey: katwaakadyoh bend ni ciit cya buseeb cya kwiibakish.” I biny bilongel biin maluw aab? Mwiin-kweet mwaan-mulum, uleeleeb cikwaabw neey: “Hatufikil ku cibel, tusangeenok mifuk yitam yibidy yiikal ni byaakudy yituul teng mu cibel cya nzubw iitut. Katwaakadyoh bend bamanyik muut waakady mwiiy kwiibishiy. Nook, Yehow wiitutaatacil.” Haanyim a mafuk, kamashiny ka biin maluw aak, kanyangukil. Kaakady kibambulwiish mu mudimw aababw a bukajaady; nook, kabaakadyoh bend ni makut ma kwiikalongolweesh naam. Hacyaakadyobw bakalongolweesh kamashiny aak habwiih ni cyaab cidyobw balongolweel mashiny, muut mukwaabw wiiyil ni kwiibiihangujey neey: “Kamashiny aak i ka ngany?” Mwiin-kweet mwaan-mulum umwaalabwiil neey: i kindiy ni waakady ukaam biikalongolol. Muut aaw uleebel cikwaabw neey: “Kakwiinoh bend bwaal. Ki mashiny makaakaam mukaj aam, ma diikal dya nook. Udy mukat kwiimasumbish ku mushing kaay?” Mwiin-kweet mwaan-mulum uhanyishil muut aaw kamashiny kindiy ni makut makumban maakady mwa kumwambulwiish bwa kusumbey kamashiny kakwaabw. Uleebel neey: “Ciin mwa kwiinumvwiij mutwaakady bumvw hawiil diifuk aady. Tutadil neey: bwaal aabw kabwaakadyoh bend bwiilongekel. Bwaakady dyambulwiish dya kudy Yehow.”

¹⁰Hatukuukun mulamy mulengel mat ni tulek kukabakan bikasakan bwa biit bya ku nyeet bitukaakaam, twiikakal batwiishiibw neey: Yehow wiiyiiy wiitwaakish biit bitukaakaam. (Bal Musambw 37:5; 1 Py. 5:7) Langil ha cileejel cidyobw balond mu  cikos 5. Ciisang eecy, Yehow udy mwa kukal mudimw ni fumw a cisak eecy fumw a mudimw bwa kwiitwambulwiish ni biit bitukaakaam mafuk moos. Iikal fumw a cisak kay ni mushind a kulong nook, eecy tut bajimbaj mudimw iitut, Yehow wiiyiiy kwiitwambulwiish mu mushind mukwaabw. Tudy batwiishiibw neey: wiiyiiy kwiitulongel nook. Tutalaayaak mushind mukwaabw udy mulamy mulangel mwa kwiitwambil bwa kulek kulong naak.

11. Bilondeshel Matewus 7:1, 2, Yeez i mwiitwambil bwa tulek kulong biny, ni bwabiny katwiin mwa kukumbaj bwaal oobw?

¹¹ Bal Matewus 7:1, 2. Yeez waakady mumanyik neey: baat boos baakady bamukun mat, kabaakadyoh bend bawaakan bwaal boos i bamulong a bibiih. Ki bwabiny uleebel neey: “Kanulumbulwiish bend bakween.” Katwiinoh bend mwa kulumbulwiish biin kwiitabij neet ni diis dikasakan. Bwaal tut boos tudy bamulong a bibiih. Tut batal neey: twaakady tuleeb bakwaabw bibiih biisang bikwaabw, tudy mwa kulong bicy? Kun Yeez mat, ni long mwiibuh moos bwa kulek kulumbulwiishangan.

12-13. I mushind kaay udy kulangil ha mushind waakady Yehow mulongel Mukaleng Davih kwiitwambulwiish bwa kulek kulumbulwiish bakwaabw?

¹² Kulangil ha cileejel cya Yehow kudy mwa kwiitwambulwiish. Utaatal myand yilengel yidy naay baat. Tulangil a myand yaakadyey mulongel Mukaleng Davih, muut waakady mulong bilem bibidy bitam. Cileejel, wendel masandy ni Bacyeebah, ni cikwaabw waakady muzuhish mbaayend. (2 Sam. 11:2-4, 14, 15, 24) Bu cihet, Davih kaakady mwiilongel teng yiy kayend bibiih, ki waakady mulongel cikwaabw cisak cindiy bibiih, kuteekelok ni bakaj bindiy bakwaabw. (2 Sam. 12:10, 11) Musang mukwaabw, Davih kaakady muleej mwaakadyey muteekel Yehow mucim indiy woos haakadyey mutum basalaay bwa kubalobw buuny bwa biin Izaleel bwaal bwaakady Yehow kay mumwambil bwa kulong. Bimweekel neey: waakady mulong nook bwa kwiiyumb kwindiy kwa mwiiwul ni muleej mwaakadyey mweeyeleel basalaay bindiy. I biny bilongekel ku bulekel kwa byoos? Biin Izaleel bat ku 70 000 bafwiil ku cihuh!​—2 Sam. 24:1-4, 10-15.

¹³ Bu uw mwiikalok ciisang aacy mu Izaleel, waakady mwa kutal Davih bicy? Waakady mwa kulumbulwiish neey: kabyaakadyoh bend bilengel bwa Yehow kumufwiil lus eey? Yehow kaakadyoh bend mwa kulong nook. Yehow waakady mutal myand yilengel yaakady naay Davih yaakady yileej mwaakadyey mumulamat ni mwaakadyey mwaalabul micim biin-biin. Bu cihet, Yehow waakady mufwiil Davih lus bwa mpekaat yitam yilongeley eey. Yehow waakady mumanyik neey Davih waakady mumukat bikasakan ni waakady mukat kulong myand yiwaakan. Kwiin wanyishok bwa myand yilengel yidy Mawej utal kutudy eeny?​—1 Bk. 9:4; 1 Cif. 29:10, 17.

14. I biny bidy byambulwiish biin Krist bwa kulek kulumbulwiish baat bakwaabw?

¹⁴ Bu mudy Yehow kay ukaam bwa twiikal teng baat bawaakan, katwiin mwa kukaam bwa bakwaabw balong teng myand yiwaakan, ki tutal teng myand yilengel yidyobw balongel bakwaabw. Bidyaakal teng biheehel bwa kwiimanyin teng ha bilem bya bakwaabw ni kutang kwiibaleeb bibiih. Ki, muut a mu spirit kadyaakal teng wiimanyin ha bilem bidy naaby baat, ki utaatal bilengel bidy bakwaabw balong. Dyamah dyengengelel didy mwa kumweek kadiy ni buseeb, ki muut udy ni meej kiin mwa kwiimanyin hamushind udyedy dimweek ki wiimamanyin ha buseeb bwiikal naabw diibw eedy hadyobw biiy kwiidilengej. Teng bu Yehow ni Yeez, katwiin mwa kwiimanyin teng ha mushind ututaatal baat, ki tutal teng biikadil bilengel bidy naaby baat.

15. Bwabiny kulang bwa shikacil udy nend baat kwiitwambulwiish bwa kulek kulumbulwiish bakwaabw?

¹⁵ Cikwaabw, hatutaatal teng biikadil bilengel bidy naaby baat, i biny bidy mwa kwiitwambulwiish bwa kulek teng kwiibalumbulwiish? Teet  kulang bwa shikacil udyobw mwa kwiikal nend. Tal cileejel eecy. Diifuk kahand ku tempel, Yeez waakady mutal mukaj a mulufwiil waakady ni tujanj twa fwalang tubidy twa buseeb bukeeh twa kumbey mu kasheet ka fwalang. Kaakadyoh bend mu mwiihanguj neey: “Bwabingany kaakadyoh bend mumb fwalang?” Hamut a kutal buuny bwa fwalang bwaakady mukaj a mulufwiil oow mwa kutwaal, Yeez waakady mwangat mucim indiy mulengel ni buseeb ni waakady muleeb bilengel bwa byoos bilongeley.​—Luuk 21:1-4.

16. I biny bitudy mwa kulongel ku cileejel cya Veronica?

¹⁶ Tudy mwa kwangat cileejel cileeleej mutudy mwa kwangat bakwaabw ni buseeb ha kukontonon myand yilongel mwiin kweet Veronica. Mu cisumbw mwaakadyey ukadil mudimw, mwaakady maam waakady wiikashishil mwaan indiy mwaan-mulum. Veronica uleeleeb neey: “Bimweekel neey: kabaakadyoh bend bay mu bisangil ni kabaakadyoh bend bakal midimw ya mu spirit. Ki bwaal kaay naakady niibatal mu mushind mubiih. Ki hanayiil ni maam oow mu mudimw a kudiil baat musah. Waakady muuyambil neey: sangiilum indiy waakady ni lubeel lwa mut. Waakady wiikashishomw bwa kukaam byaakudy bwa makand ma nyeet ni bwa kukashishey bulund bwindiy ni Yehow. Hahicil mafuk, bu mucyaakady mwaan indiy ubeel, utadil neey: byaakady bilengel bwindiy kutweel mu cisangil cya cisumbw cikwaabw.” Veronica uleeleeb neey: “Cyaakadyoh bend mumanyik neey: baakady bakab bikasakan. Kabaak nady mukat ni naneeneemek bikasakan mwiin-kweet mwaan-mukaj oow bwa byoos biloolongey bwa kukadil Yehow mudimw.”

17. I biny bidy Jak 2:8 wiitwambil bwa kulong, ni i mu mushind kaay utudy mwa kulong naak?

 ¹⁷ I biny bitudy mwa kulong tut batal neey: tukaady tulumbulwiish mwiin kwiitabij neet? Bikaam tuvuluk neey: tudy ni diibanz dya kukat baan-beet. (Bal Jak 2:8.) Cikwaabw, bikaam tusambil Yehow ni mucim woos, kumulomb bwa i twambulwiish bwa tulek kulumbulwiish bakwaabw. Tudy mwa kulong myand yumvumvwangan ni masambil miitut, ha kwangat dihangadik dya kwiisamb ni muut utwaakady tuleeb bibiih. Bwaal oobw budy mwa kulong bwa tumumanyik bilengel. Tudy mwa kumulomb bwa kuhatuk nend mu mudimw a bukajaady eecy kumubiikan bwa iiy kudy neet bidyaaj. Ha twendend ni kumanyik mwiin-kweet bilengel, tudy mwa kwiidikij cileejel cya Yehow ni cya Yeez hatutaatal myand yilengel yidy naay muut aaw. Mu mushind oow, tuleeleej neey: tukuukun diiy dya mulamy mulengel mat dya kulek kulumbulwiish bakwaabw.

18. I mushind kaay utudy mwa kuleej neey: tukuukun diiy dya mulamy mulengel mat?

¹⁸ Teng bu mikook yikuukun diiy dya Mulamy aayiy mat, biiyij ba Yeez baloolond diiy dindiy. Tut biikashishomw bwa kulek kwiitacish bwa kukaam teng biit bya nyeet bitukaakaam, Yehow ni Yeez biiyiiy kwiitufwiil kis. Ning tut biikal ba mu “kasumbw kakeeh” eecy mu cisumbw cya “mikook yikwaabw,” tudy mwa kutungunuk ni kukun mat ni kukooyel diiy dya mulamy a mikook mulengel. (Luuk 12:32; Jah 10:11, 14, 16) Mu ciin bwaal ciloolond, twiiyiiy kukontonon myand yibidy yaakady Yeez mwambil biiyij bindiy mwa kulong.