1. Ni nzumwa yahi nguma eyangabya iy’eyaleka Yesu inialinganisya abigha biwe n’esyombuli?

YESU mwalinganisya obughuma obw’awithe n’abigha biwe n’obughuma obo omulisya awithe n’esyombuli siwe. (Yn. 10:14) Erilinganisya eryo litholere. Esyombuli sikaminya omulisya wasyo n’omulenge wiwe. Omulhume mughuma mwayilhangirira eki. Mwabugha athi: “Muthwanza erihamba esyombuli sy’ebisasani n’erianza syase hakuhi nethu. Aliwe musithasa kundi sisyabya syasi emirenge yethu. Neryo akalhwana kalere akalisya mukasa; kabere kakanasibirikira musyalhuaho isyakakwama.”

2-3. (a) Abigha ba Yesu bakakanganaya bathi ku bakowa omulenge wiwe? (b) Thukendi kania okuki omo mwatsi ono n’ow’akakwamako?

² Ebya mulhume oyo ayilhangirira bikathwibukaya ebinywe bya Yesu ebihambire okwa syombuli siwe​—abigha biwe. Mwabugha athi: “Syasyowa omulenge waghe.” (Yn. 10:16) Aliwe Yesu ane elhubulha. Busana naki ithwabugha thuthi thunemumwowa? Enzira ngulhu eya thukakanganirayamo ku thukowa omulenge w’Omukama wethu ly’erighendera okwa syangangirirya siwe.​—Mt. 7:24, 25.

³ Omo mwatsi ono n’ow’akakwamako, thukendi kania okwa bighuma by’okwa ebya Yesu akangiriraya. Ngoku thukendi lhangira, Yesu mwathukangirirya athi thutholere ithwaleka erikolha bindu birebe kandi athi thutholere ithwakolha ebindi. Kutsibu-tsibu thukendi tsuka erikania okwa bindu bibiri ebya omulisya mubuya akathubwira athi thuleke erikolha.

4. Ngoku kiri omu Luka 12:29, ni kyahi ekyangaletha ‘erihangya-hangya emithima’?

⁴ Soma Luka 12:29. Yesu mwabwira abigha biwe athi ‘sibahanga-hangaye emithima’ yabu busana n’ebiyithawa byabu by’ekinyamubiri. Thunasi ngoku erihabulha lya Yesu mughulhu wosi ni ly’amenge kandi lihikire. Thwanzire ithwalighenderako, aliwe hanganayira ikyathukalira erikolha ekyo. Busana naki?

5. Busana naki abandi bangana hangya-hangya busana n’ebiyithawa byabu by’ekinyamubiri?

 ⁵ Abandi bangana hangya-hangya busana n’ebiyithawa byabu by’ekinyamubiri​—ebyalya, eby’eryambalha, n’ah’erikalha. Banganabya ib’ikere omwa kihugho ekiri mw’obunakwa. Kyangana bakalira eribana esyosente esikaghunza esy’eritsomaniramo ab’eka yabu. Kutse oyulhue akabanira eka y’eky’erirya angana holha, iniabasigha isibakiwithe obuwathikya omwa by’esyosente. Ekihunzo ky’ekorona [COVID-19] kyanganabya ekyabirileka abandi ibaherya emibiiri yabu n’erileka emingirirye iyakalha. (Omu. 9:11) Ekighuma ky’okw’ebi kutse ebindi bitsibu byamabya ibyabirithuhikako, thwanga ghendera thuthi okw’ihabulha lya Yesu erikabugha lithi sithuhanga-hangaye emithima?

6. Soborera ekyabya okwa mukwenda Petero buthuku bughuma.

⁶ Buthuku bughuma, omukwenda Petero n’abandi bakwenda byabya ibane omwa bwathu okwa Ngetse Galilaya erihunga irinemuhitha omughulhu balhangira Yesu akathandayira okwa maghetse. Petero mwabugha athi: “Mukama, wamabya ininawe, wunyihamule nyiye aho wuli okw’amaghetse.” Yesu abere abirimubwira athi ‘asa,’ Petero mwalhua omwa bwathu ‘n’erithandayira okwa maghetse erilholya ahali Yesu.’ Lebaya ekyakwamako.  Abere “alhangira erihunga, mubaha, n’eritsuka erithobera mwalhaka athi, Mukama, wunyilhamaye.” Yesu mwakakya ebyalha biwe n’erimulhamya. Petero kw’ahira amalengekania wiwe oku Yesu angathokire erilholha embere erithandayira okwa maghetse awabiriyiddunga. Aliwe Petero abere alhangira erihunga, mwakwa obuba neryo amasamo erithika-thika n’eritsuka erithobera.​—Mt. 14:24-31.

7. Eky’erileberyako kya Petero kyanga thweghesyaki?

⁷ Thwangan’ighira okwa ky’erileberyako kya Petero. Petero abere akathalhua omwa bwathu n’erilyatha okwa maghetse, syabya akalengekania athi inialengemeribwa n’eritsuka erithobera. Aby’anzire erithandayira okwa maghetse erihika aho akendihikira oku Mukama wiwe. Aliwe mwalemwa erisighalha inianamakirire ekilhubirirwa ekyo. Ni kwenene, sithwanga thandayira okwa maghetse, aliwe erikirirya lyethu likabya irinemulengwako. Thwamalemwa erihira amalengekania wethu w’oku Yehova n’emilhaghe yiwe ithukendi thobera bunyakirimu. Nomuthwangabana ebihunga ebiri bithi, thutholere ithwalholha embere erihwerya amalengekania w’oku Yehova n’amaaka wiwe w’erithuwathikya. Ekyo thwangakikolha thuthi?

8. Ni kyahi ekyanga thuwathikya eriyihighulha okw’ihangya-hangya kutsibu busana n’ebiyithawa byethu by’ekinyamubiri?

⁸ Ithukendi ghasirwa thwamasubya omo mwanya w’erihangya-hangya mw’eriyikethera Yehova. W’ibuke ngoku Thatha wethu w’olhwanzo, Yehova, abiriyilhagha erithutsomana kinyamubiri thwamahira eby’obunyakirimu by’embere. (Mt. 6:32, 33) Asibwe ng’oyukaberereraya ndeke-ndeke eriyilhagha eryo. (Ebi. 8:4, 15, 16; Esy. 37:25) Yehova amabya inianemutsomana ebinyonyi n’ebimole, omo kwenene sithutholere thukahangya-hangya busana n’eky’erirya kutse eky’eryambalha! (Mt. 6:26-30; Fil. 4:6, 7) Ngoku olhwanzo lhukanaleka ababuthi abatsomene ibaha abaana babu ebya bakayithagha kinyamubiri, olhwanzo lhukaleka Thatha wethu w’elhubulha iniatsomana abandu biwe kinyamubiri. Neryo kwesi, thwangana yikethera ngoku Yehova akendi thutsomana!

9. Ekyalholirweko ky’abathahenie baghuma kyanga kweghesyaki?

⁹ Thalengekania okwa kyalholirweko ekikakanganaya ngoku Yehova angana thutsomana kinyamubiri. Abathahenie abali omwa mubiiri w’omughulhu wosi mubafugha ematoka yabu ngulhu habw’esaha nguma eriyenda bali bethu omwa kambu y’abathibithi eribathwalha okwa mihindano. Mughalha wethu akabugha athi: “Emihindano yabere yikahwa, muthwakokya bali bethu abo okwa ky’erirya, aliwe enyuma waho muthwaminya ngoku sithuwithe n’eky’eribaha.” Abathahenie aba banga kolireki? Mughalha wethu ak’ongerako athi: “Thwabere thukahika eka, muthwasanga okwa lhukyo ikune ehisaho hibiri ehiri mw’ebyalya. Muthuthaminya oyulyahithekaho. Yehova mwathutsomana.” Enyuma w’obuthuku bulebe, ematoka eya bathahenie abo muyakwa. Ibakayithaghayo omw’ithulira; aliwe sibabya bawithe esyosente sy’erikanikayo. Ematoka yabere iyine omwa garaji eyiri hakuhi, omulhume mwasa n’eribulya athi: “Ematoka erya ni yandi?” Mughalha wethu mwabugha athi ni yiwe kandi athi yikayithagha erikanikwa. Omulhume mwasubirya athi: “Ekyo siki. Mukali waghe akayithagha ematoka eyiri ng’eyi kandi erangyi iyan’eyo eyonyine-nyine. Ngakuhe mwa singahi?” Mughalha wethu mwathunga esyosente esikaghunza esyangaghulha eyindi. Akaghunzerera athi: “Sindiyithagha erisoborera nga muthwayowa thuthi ekiro ekyo. Muthwaminya ngoku eki sikyasa bwase. Bwabya buwathikya bwa Yehova.”

10. Ebiri omwa Esyonyimbo 37:5 bikathuhiramo bithi omuhwa w’erithendi hangya-hangya busana n’ebiyithawa byethu by’ekinyamubiri?

 ¹⁰ Thwamahulikirira omulisya wethu mubuya n’erileka erihangya-hangya kutsibu busana n’eby’ekinyamubiri, ithwangana yikethera ngoku Yehova akendi thutsomana. (Soma Esyonyimbo 37:5; 1 Pet. 5:7) Thalengekania okwa bikanibweko omwa  nungu ya 5. Erihika na lino, Yehova angabya iniabirikolesya omuthwe w’eka kutse oyuthuhere omubiiri erithuwathikya eribana ebiyithawa byethu bya buli kiro. Omuthwe w’eka amabya isyakithoka erikolha ekyo kutse thwamabya isithukiwithe mubiiri, Yehova iniakendi thutsomana omwa sindi nzira. Thwangana yikethera ekyo. Lino thulebaye ekindi kindu ekya omulisya mubuya akabugha athi thuleke erikolha.

11. Ngoku kiri omu Matayo 7:1, 2, ni kyahi ekya Yesu athubwira athi thuleke erikolha, kandi busana naki eki kyangana kalha erikolha?

¹¹ Soma Matayo 7:1, 2. Yesu abya inianasi ngoku abakamuhulikirira abathahikene bawithe omubere w’eritsweba-tsweba abandi. Ky’ekyaleka iniabugha athi: ‘Simutswere.’ Thwangana lengaho kutsibu erithenditswera abikirirya balikyethu. Nomwabine, ithwe bosi sithuhikene. Okwa bundi buthuku thwamayisanga ithuli ku tsweba-tsweba abandi, thutholere ithwakolhaki? Hulikirira Yesu, kandi lengaho erileka eritswera.

12-13. Erighanirya okwa malengekania agho Yehova aby’awithe oku Mwami Dawudi kyanga thuwathikya kithi erileka eritswera abandi?

¹² Thwangana ghasirwa omw’ighanirya okwa ky’erileberyako kya Yehova. Akasondekanaya omwa bandu mw’ebibuya. Eki thukakilhangira omwa mibere akolonganiramo n’Omwami Dawudi, omulhume oyuwakolha amalholho aw’akalire. Ng’eky’erileberyako, mwasingira na Batiseba, kandi nibya mw’ithisya mwira wiwe. (2 Sam. 11:2-4, 14, 15, 24) Busana n’ekya Dawudi akolha, iyo n’eka yiwe mubaghalhwa, imwamune n’abandi bakali biwe. (2 Sam. 12:10, 11) Okwa bundi buthuku, Dawudi mwalemwa eriyikethera Yehova ya ndeke omughulhu omw’iyikangirira ahamulha athi amahe we Israeli aghanzawe. Angabya iniakolha ekyo busana n’emiyiheko n’eriyikethera obunene bw’amahe wiwe. Mumwalhwiririraki? Abaisraeli nga 70,000 mubaholha omwa kihunzo!​—2 Sam. 24:2-4, 10-15.

¹³ Ku wabya omwa Israeli okwa buthuku obo, wangathungire malengekaniaki oku Dawudi? Mbwino wangamutswere wuthi syatholere erighanyira lya Yehova? Yehova mwathakolha ekyo. Mwahira amalengekania wiwe okwa buthaleghulha bwa Dawudi obo abya inianemukangania n’okw’iyisubamu liwe omo kwenene. Busana n’ekyo, Yehova mwaghanyira Dawudi amalholho wiwe awakalire aya. Yehova mwaminya ngoku Dawudi amwanzire kutsibu kandi kw’anzire erikolha ekihikire. Mbwino siwulisima wukaminya ngoku Nyamuhanga wethu akathusondekanaya mw’ebibuya?​—1 Bam. 9:4; 1 Emy. 29:10, 17.

14. Ni byahi ebyabiriwathikya Abakristayo erileka eritswera abandi?

¹⁴ Yehova amathabya inianasi ngoku abandu sibahikene, kwesi nethu ithutholere ithwaminya ngoku abandi sibahikene neryo ithwabasondya mw’ebibuya. Mughulhu mungyi ni kyolho erilhangira ebisobyo by’abandi n’eribatsweba. Aliwe, omundu w’obunyakirimu anganalhangira ebisobyo ebyo kandi iniabya inianemukolongana ndeke n’abandi. Edayamonde eyithakolirweko yanganaghana erilhangirika, aliwe ow’amenge akaminya ngoku iyikendibya y’obughuli yamakolhwako. Nga Yehova na Yesu, sithutholere thukasamalira  emisosere y’abandu ey’eyihya aliwe emibere yabu mibuya.

15. Erilengekania okwa mibere eyo abandu balimu kyangaleka kithi ithuthabatsweba-tsweba?

¹⁵ Eryongera okw’ihwerya amalengekania w’okwa mibere mibuya y’abandi, ni byahi ebyanga thuwathikya eriyihighulha okw’ibatsweba-tsweba? Lengaho erilengekania okwa mibere eyo balimu. Lengekanaya okwa ky’erileberyako kino. Kiro kighuma okwa hekalu, Yesu mwalhangira omukwakali mwera akathogherya ehinusu hibiri hy’obughuli buke hy’omwa kasanduku. Mwathabugha athi: “Busana naki mwathethahira mwa bingyi?” Omwakanya k’erilengekania okwa bya mukwakali ahayo, Yesu mwalengekania okwa kilhubirirwa n’emibere ey’abyamu n’erimupipa busana n’ebyosi akolha.​—Lk. 21:1-4.

16. Ekyalholirweko kya Veronica kyanga kweghesyaki?

¹⁶ Thwanganaha eky’erileberyako ekikakanganaya omughaso w’erilengekania okwa mibere eyo abandu balimu omw’ilebya ekyalholirweko kya mwali wethu Veronica. Omwa kithunga ekyo abyamu mwabya mama na mughalha wiwe. Veronica akabugha athi: “Okw’ingye iningalhangira nga sibali sangira ndeke omwa mibiiri y’ekithunga. Busana n’ekyo ingabawitheko amalengekania awathatholere. Aliwe munaghenda omw’ithulira na mama oyo. Mwanyisoborera ebitsibu eby’akalhabamu busana na mughalha wiwe omutsingo. Abya inianemukolha ngoku angathoka  eritsomana ebiyithawa byabu by’ekinyamubiri n’eby’obunyakirimu. Okwa bundi buthuku, busana n’amaghalha wa mughalha wiwe, iniakanalhangira ikitholere eriyahindanira omwa kindi kithunga.” Veronica akaghunzerera athi: “Sinabya ngasi kw’awithe ekitsibu kingaha n’eki. Lino ngasima n’erisikya mwali wethu oyu ya kutsibu busana n’ebyosi eby’akakolera Yehova.”

17. Ebiri omu Yakobo 2:8 bikathuhiramu omuhwa w’erikolhaki, kandi ekyo thwangakikolha thuthi?

¹⁷ Thutholere ithwakolhaki thwamaminya ngoku thwabiritswera mulikyethu? Thutholere ithw’ibuka ngoku thuli b’erianza balikyethu. (Soma Yakobo 2:8.) Kandi thutholere ithwasaba Yehova erilhua okwa muthima, erimulemba-lemba thuthi athuwathikaye thuleke eritswera abandi. Thutholere ithwakolha erikwamana n’erisaba lyethu omw’iyakania n’oyo thulyatsweba-tsweba. Ekyo ikyangana leka ithwamuminya ndeke. Ithwangana musaba erikolha nethu omw’ithulira kutse erimukokya okwa ky’erirya. Thukendibya thunemuminya mulikyethu ya ndeke, thukendi lengaho erikwama eky’erileberyako kya Yehova na Yesu omw’imusondekaniamu ebibuya. Omwa nzira eyi, thukakanganaya ku thukaghendera okwa kihano ky’omulisya mubuya ekya simutswere.

18. Thwanga kangania thuthi ngoku thukowa omulenge w’omulisya mubuya?

¹⁸ Ngoku esyombuli esyonyine-nyine sikanowa omulenge w’omulisya wasyo, abigha ba Yesu bakowa omulenge wiwe. Thwamalengaho erileka erihangya-hangya busana n’ebiyithawa byethu by’ekinyamubiri n’erileka eritswera abandi, Yehova na Yesu ibakendi tsumulha akaghalha kethu. Mbulha thuli b’okwa “kihyo kike” kutse okwa “sindi mbuli,” ambi ithwalholha embere eriowa n’erighendera okwa mulenge w’omulisya mubuya. (Lk. 12:32; Yn. 10:11, 14, 16) Omo mwatsi ow’akakwamako, thukendi syakania okwa bindu bibiri ebya Yesu abwira abigha biwe athi batholere ibakolha.