1. Mambo ka Yesu o aesakenyejile baana banji ba bwanga ku mikooko?

 YESU waesakenye bulunda bo ajinga nabo na baana banji ba bwanga na bulunda bwikala pa kafunga na mikooko yanji. (Yoa. 10:14) Ino ngesakenyo yayilamo bingi. Mikooko yayuka kafunga wayo kabiji yumvwina byo amba. Kañenda umo wimwenejile kino kishinka. Waambile’mba: “Twakebelenga kukopa mikooko kabiji twakebelenga’mba iiye kubwipi na ko twajinga. Bino kechi yaishile kotwajinga ne, mambo kechi yayukile mawi etu ne. Bino nsongwalume wajinga kafunga wayo byo aishile ne kwiita, yamulondejile.”

2-3. (a) Baana ba bwanga ba kwa Yesu bamwesha byepi amba babena kumvwa jiwi janji? (b) Tusakwisamba pa ka mu uno mutwe ne walondelapo?

² Kyamwekejile uno kañenda kituvululamo byambo byaambile Yesu pa mikooko yanji, ko kuba’mba baana banji ba bwanga. Waambile’mba: “Ikomvwa jiwi jami.” (Yoa. 10:16) Bino Yesu uji mwiulu. Pano twakonsha kumvwa byepi jiwi janji? Jishinda jimo jo tumvwinamo jiwi ja Nkambo yetu ke kupichila mu kwingijisha mafunjisho anji mu bwikalo bwetu.—Mat. 7:24, 25.

³ Mu uno mutwe ne walondelapo tusakwisamba pa mafunjisho amo a kwa Yesu. Byonka byo tusakufunda, Yesu witufunjishe kuba’mba twafwainwa kuleka kuba bintu bimo kabiji amba twafwainwa kuba bintu bikwabo. Tusakutendekelapo kwisamba pa bintu bibiji kafunga wawama byo etubuula kuleka kuba.

4. Kwesakana na byaamba Luka 12:29, ki ka kyakonsha kulengela “kukizhamo kwakamwa”?

⁴ Tangai Luka 12:29. Yesu watundaikile baana banji ba bwanga  ‘kuleka kukizhamo kwakamwa’ na mambo a bintu bya mu bwikalo. Twayuka kuba’mba lujimuno lwa kwa Yesu kimye kyonse lwawama. Tukeba kwilulondela, pano bino, kimye kimo kitukatazha. Mambo ka?

5. Mambo ka bamo o bakonsha kwakaminwa na mambo a bintu bikebewa mu bwikalo?

 ⁵ Bamo bakonsha kwakamwa na mambo a bintu bikebewa mu bwikalo nabiji kajo, bivwalo ne pa kwikala. Kampe bekala mu kyalo muji bantu bavula bayanda kabiji mo kyakatazha kutana nkito. Kyakonsha kwibakatazha kwikala na mali a kwingijisha kulaminamo kisemi. Nangwa kampe wa mu kisemi wamonanga mali wafwa ne kusha kisemi mu buyanji. Kabiji kampe bavula makito apwa na mambo a mwalo wa COVID-19. (Sapwi. 9:11) Umvwe tubena kupita mu ano makatazho o twaambapo nangwa akwabotu, twakonsha kulondela byepi byambo byaambile Yesu bya kuba’mba kilekai kukizhamo kwakamwa?

6. Lumbululai kyamwekejile mutumwa Petelo pa kimye kimo.

⁶ Pa kimye kimo, mutumwa Petelo ne batumwa bakwabo bajinga mu bwato pa Kalunga ka Ngalilea. Kwaishile luvula kabiji bamwene Yesu saka abena kwenda pa mema. Petelo waambile’mba: “Nkambo, umvwe yenu iye, ñambilai ngiye ko muji saka ñenda pa mema.” Yesu byo amwambijile’mba “iya,” ponkapo Petelo wafumine mu bwato ne “kwenda pa mema kuya kwajinga Yesu.” Monai kyamwekele. “Byo amwene luvula, waumvwine moyo. Kabiji byo atendekele kwibila, wabijikile’mba: ‘Nkambo, mpulushai!’” Yesu watanyikile kuboko kwanji ne kumupulusha. Kyanema bingi kuvuluka kuba’mba Petelo waendele pa mema byo atwajijile kutala kwi Yesu. Bino Petelo byo atajile ku luvula, waumvwine moyo ne kutendeka kwibila.—Mat. 14:24-31.

7. Twakonsha kufunjilako ka ku kyamwekejile Petelo?

 ⁷ Twakonsha kufunjilako ku byapichilemo Petelo. Kimye Petelo kyo afumine mu bwato ne kuya pa kalunga ka mema, kechi walangulukilepo’mba usa kumvwa moyo pa kumona luvula ne kutendeka kwibila ne. Wakebelenga kutwajijila kwenda pa mema kuya na kufika kwajinga Nkambo yanji. Pano bino, walekele kutala kwi Yesu ne kwakamwa na mambo a luvula. Lelo jino, kechi twakonsha kwenda pa mema byonka byaubile Petelo ne, bino twafwainwa kwikala na lwitabilo pa kuba’mba tuchinchike makatazho. Umvwe twabula kuketekela mwi Yehoba ne mu milaye yanji, lwitabilo lwetu lukakookatu nobe tubena kwibila mu mema. Onkao mambo, inge ketupite mu makatazho aji nobe luvula, twafwainwa kuketekela mwi Yehoba ne mu bulume bwanji kuba’mba uketukwasha. Twakonsha kuba byepi bino?

8. Ki ka kyakonsha kwitukwasha kubula kukizhamo kwakamwa na bintu bya mu bwikalo?

⁸ Twafwainwa kuketekela mwi Yehoba kechi kwakamwa pa makatazho etu ne. Yukai kuba’mba Shetu wa butemwe aye Yehoba witulaya kuba’mba uketupa bikebewa mu bwikalo inge twatangizhako kuba kyaswa muchima wanji. (Mat. 6:32, 33) Aye kimye kyonse ufikizha milaye yanji. (Mpitu. 8:4, 15, 16; Sala. 37:25) Umvwe kya kuba Yehoba ulama bulongo tuñonyi ne maluba, ko kuba’mba kechi twakonsha kwakamwa pa byo tukaja nangwa byo tukavwala ne. (Mat. 6:26-30; Fili. 4:6, 7) Byonkatu butemwe byo bulengela bansemi kukebela baana babo bikebewa mu bwikalo, ne Shetu wa mwiulu naye butemwe bumulengela kupa bantu banji bikebewa mu bwikalo. Kwa kubula nangwa kuzhinaukatu ne, Yehoba uketulama.

9. Mwakonsha kufunjilako ka ku kyamwekejile ba mulume ne mukazhi bamo?

⁹ Langulukai pa kino kyamwekejile bamo kimwesha Yehoba byo akonsha kwitupa bikebewa mu bwikalo. Ba mulume ne mukazhi baji mu mwingilo wa kimye kyonse bayile na motoka wabo wa kala na kusenda banyenga bamo baikalanga mu kampu wa bipuluka kuba’mba batanwe ku kupwila. Pa kuba’mba bakafike kuno baendele kukila pa jiola jimo. Mulongo walumbulwile’mba: “Kupwila byo kwapwile, twabuujile bano banyenga kuya ku nzubo yetu amba bakajepo bya kuja, bino kyataainwe kuba’mba kechi twajinga na bya kuja bya kwibapa ne.” Nga bano ba mulume ne mukazhi baubile byepi? Mulongo watwajijile kushimikizha’mba: “Byo twafikile pa nzubo, twataaine mifuko ibiji ya kajo pa kibelo. Kechi twayukile ko yafumine ne. Kinetu Yehoba witupele byo twakebelenga.” Kabiji byo papichile kimye, motoka wa bano ba mulume ne mukazhi wafwile. Uno motoka bakebelenga kumwingijisha mu mwingilo wa kusapwila, bino kechi bajinga na mali a kumulungishisha ne. Batwajile uno motoka ko balungisha myotoka pa kuba’mba bayuke kana mali anga a kumulungishisha. Kepo kwaishile mwanamulume umo ne kwipuzha’mba: “Nga awe motoka wa bañanyi?” Mulongo wakumbwile’mba wanji kabiji wakebewenga kumulungisha. Uno mwanamulume waambile’mba: “Alo kechi lukatazho ne. Bakazhi bami babena kukeba motoka wa yenka uno mutundu kabiji ne musombelo yenkawe. Mwakonsha kwitupotesha pa inga?” Mulongo wapoteshe motoka wanji ku uno mwanamulume, wamupele mali a kukonsha kupota motoka mukwabo. Mulongo wapezhezheko kwamba’mba: “Aja juba twasangalele bingi. Twayukile’mba kino kechi kyaubiwatu ne, Yehoba ye witukwasha.”

10. Salamo 37:5 witutundaika byepi kubula kwakamwa na bikebewa mu bwikalo?

¹⁰ Umvwe ke tumvwine kafunga wawama ne kuleka kukizhamo kwakamwa na mambo a bikebewa mu bwikalo, twakonsha kuketekela kuba’mba Yehoba uketupa byo tukeba. (Tangai Salamo 37:5; 1 Pe. 5:7) Langulukai pa makatazho atongolwa mu  jifuka 5. Ne lelo jino, Yehoba  wakonsha kwingijisha mutwe wa kisemi nangwa mukulumpe wa nkito kwitukwasha na bintu byo tukeba pa juba pa juba. Umvwe kya kuba mutwe wa kisemi ubena kukankalwa kuba bino, nangwa inge nkito yapwa, Yehoba uketukwasha kutaana mashinda akwabo a kwikwashishamo. Twafwainwa kushiinwa kino. Pano twayai twisambe pa kintu kikwabo kafunga wetu wawama kyo etukambizha kuleka kuba.

11. Kwesakana na byaamba Mateo 7:1, 2, Yesu witubuujile kuleka kuba ka, kabiji mambo ka kino o kyakonsha kukatezha?

¹¹ Tangai Mateo 7:1, 2. Yesu wayukile’mba bantu bambulwa kulumbuluka, kabiji javula bata muchima pa bilubankanya bakwabo. O ene mambo o aambijile’mba: “Kilekai kuzhachisha bakwenu.” Twakonsha kwibikako kubula kuzhachisha bakwetu ba mu lwitabilo. Bino na mambo a bumbulwa kulumbuluka, bimye bimo tukankalwa. Twakonsha kuba byepi inge bimye bimo tuta muchima pa bilubo bya bakwetu? Umvwinainga Yesu, ne kwibikako kuleka kuzhachisha bakwetu.

12-13. Kulanguluka pe Yehoba byo amonanga Mfumu Davida kwitukwasha byepi kuleka kuzhachisha bakwetu?

¹² Twakonsha kumwenamo mu kulanguluka languluka pa byuba Yehoba. Aye utatu muchima pa byawama byuba bantu. Langulukai pa byo aubile kimye Mfumu Davida kyo alengele mambo akatampe. Waubile bukende na Batesheba, ne kunengezha kuba’mba mwatawanji bamwipaye. (2 Sam. 11:2-4, 14, 15, 24) Na mambo a kintu kyaubile Davida, aye mwine ne kisemi kyanji bamanamine bingi. (2 Sam. 12:10, 11) Kabiji pa kimye kikwabo, Davida wakankelwe kuketekela mwi Yehoba na muchima wanji yense kimye kyo abajile banabalume bajinga bashilikale mu Isalela, kintu kyo babujile kumubuula kwi Yehoba ne. Kyamweka bwitote ne kuketekela mu kuvula kwa bashilikale banji byo byamulengejile kuba bino. Ñanyi kintu kyafuminemo? Bena Isalela 70,000 bafwile na mwalo.—2 Sam. 24:1-4, 10-15.

¹³ Inge kya kuba mwaikalanga mu Isalela pa kyo kya kimye, Davida inge mwamumwenenga byepi? Nanchi inge mwalangulukile’mba Yehoba kechi wafwainwe kumulekelako mambo nenyi? Yehoba kechi byo byo alangulukile ne. Aye watele muchima pa myaka Davida yo ajinga wa kishinka ne pa kishinka kya kuba’mba walapijile kya kine. Kyafuminemo, Yehoba walekejileko Davida mambo akatampe o alengele. Yehoba wayukile’mba Davida wamutemenwe bingi kabiji wakebanga kuba kyawama. Tusanta bingi pa kuyuka kuba’mba Lesa wetu uta muchima pa byubilo byetu byawama.—1 Mfu. 9:4; 1 Moba 29:10, 17.

14. Ki ka kyakwasha bena Kilishitu kuleka kuzhachisha bakwabo?

¹⁴ Na mambo a kuba’mba Yehoba witulekelako mambo atweba bantu bambulwa kulumbuluka, ne atweba twafwainwa kwilekelangako mambo atweba bene na bene ne kutatu muchima pa byubilo bya bakwetu byawama. Kyapela bingi kumona bilubankanya bakwetu ne kwibazhachisha. Bino muntu ulondela byuba Lesa utwajijila kwingijila pamo na bakwabo bulongo nangwa kya kuba wayuka byo balubankanya. Jibwe ja daimani jiji na biko jakonsha kumweka kutama pa kwijimona, bino muntu wa milangwe wayuka’mba inge wijiwamisha jakonsha kumweka bingi bulongo kabiji janema bingi. Byonka byuba Yehoba ne Yesu, ne atweba twafwainwa kuta muchima pa byubilo byawama bya bakwetu.

15. Kulanguluka pa biji bwikalo bwa bantu kwakonsha kwitukwasha byepi kubula kwibazhachisha?

¹⁵ Kununga pa kuta muchima pa byubilo byawama bya bakwetu, ñanyi kintu kikwabo kyakonsha kwitukwasha kubula kwibazhachisha? Esekai kuyuka biji bwikalo bwabo. Langulukai pa kino. Juba jimo Yesu byo ajinga  pa nzubo ya Lesa, wamwene mwanamukazhi wafwilwa muyanji na kutayamo tumali tubiji twa muwayawaya mu kakilambwilo. Yesu kechi waipwizhe’mba: “Mambo ka o abujila kutayamo mali avula?” ne. Yesu kechi watele muchima pa kukepa kwa mali apaine uno mwanamukazhi wafwijilwe ne, bino aye walangulukile pa kyamulengejile kupana ano mali ne byajinga bwikalo bwanji, kabiji wamutakaikile pa kyo aubile.—Luka 21:1-4.

16. Mwakonsha kufunjilako ka kwi nyenga Veronica?

¹⁶ Byapichilemo nyenga wa jizhina ja Veronica bimwesha ene mambo o kyanemena kuyuka biji bwikalo bwa bakwetu. Mu kipwilo mo apwilanga mwajinga inetu umo muzhike ne mwananji wa mulume. Ba Veronica baambile’mba: “Namwenenga kuba’mba uno nsemi ne mwananji kechi bapwilanga kimye kyonse ne kuya mu mwingilo ne. Na mambo a kino, namwenenga’mba kechi batako muchima ku mingilo ya Lesa ne. Bino juba jimo twaingijile pamo mu mwingilo wa kusapwila na uno nsemi. Walumbulwile makatazho o apichilengamo na mambo a mwananji uji na kikola kya ku bongo. Uno nsemi waingijilenga papelela bulume bwanji kukeba bikebewa mu bwikalo ne kukosesha bulunda bwabo ne Lesa. Bimye bimo na mambo a kikola kya mwananji, wapwilanga ku kipwilo kikwabo.” Nyenga Veronica wapezhezheko kwamba’mba: “Kechi nayukile’mba o makatazho apichilengamo uno mwanamukazhi ne. Luno nsanchila bingi uno nyenga ne kumunemeka pa byo engijila Yehoba.”

17. Kinembelo kya Yakoba 2:8 kitukambizha kuba byepi, kabiji twakonsha kuba byepi bino?

 ¹⁷ Twakonsha kuba byepi inge twayuka’mba twazhachisha mukwetu wa mu lwitabilo? Twafwainwa kuvuluka kuba’mba twafwainwa kutemwa balongo betu. (Tangai Yakoba 2:8.) Kabiji twafwainwa kulomba kwi Yehoba na muchima yense, kumusashijila kuba’mba etukwashe kuleka kuzhachisha bakwetu. Twakonsha kuba byo twalomba kupichila mu kwikalangako na kimye kya kwisamba na muntu ye twazhachishe. Kuba bino kwakonsha kwitukwasha kumuyuka bulongo. Twakonsha kumwipuzha kwingila nanji mu mwingilo nangwa kumwita kwiya na kujiila pamo kajo. Inge twayuka bulongo bwikalo bwa mulongo, kiketukwasha kulondela Yehoba ne Yesu kupichila mu kuta muchima pa byubilo byanji byawama. Inge ketube bino, tumwesha kuba’mba tubena kumvwina mukambizho wa kafunga wetu wawama wa kuleka kuzhachisha bakwetu.

18. Twakonsha kumwesha byepi amba tubena kumvwa ku jiwi ja kafunga wawama?

¹⁸ Byonkatu mikooko byo yumvwa jiwi ja kafunga wayo, ne baana ba bwanga nabo bomvwa jiwi ja kwa Yesu. Umvwe twaleka kukizhamo kwakamwa na mambo a bya mu bwikalo ne kuleka kuzhachisha bakwetu, Yehoba ne Yesu baketupesha. Umvwe tuji mu “kajitanga kacheche” nangwa “mikooko ikwabo,” twayai tutwajijile kumvwa jiwi ja kafunga wawama ne kumukookela. (Luka 12:32; Yoa. 10:11, 14, 16) Mu mutwe walondelapo, tukesamba pa bintu bibiji Yesu byo abuujile baana banji ba bwanga amba byo byo bafwainwa kubanga.