1. Le sabu yɛɛ Chiisu tuu yɛ buɛiyaa nduaa a saa?

MI CHIISU tuu chaŋyɛi cho ndu tɛɛŋ a buɛiyaa nduaa ve, a chaŋyɛi wa wana mandaa lasaa tɛɛŋ nda saa nduaa ve. (Chɔŋ 10:​14) Tamasi kɛndɔɔ pila Chiisu soliŋ hoo kpeku ni. Mi saa tuei wana nda mandaa diom, nduyɛ ma tosa nyɛ o dimul nda wo. Mi po pilɛ kela o lɛŋnde niŋndo cha mɛɛ hei cho tonya yɛ. Mbo dimi aa: “Naŋ yeema mi naŋ toosiaa vidueiyo a saa okɔɔ, kɛ mɛɛ naŋ wa kindiŋndo le nda sɔɔŋguu wo ikɛi, ma wa naa nyaanɔŋndo kanifuule, ndaa sina diomnda naalaŋ te. Kɛ mɛɛ poombɔ pɔmbɔ wa nda mandaa wo veelu dɔɔ nda, ma tual ndu kɔɔli.”

2-3. (a) Vɛɛ buɛiyaa Chiisu wa chɔm yɛ maa a cho ndu diomndo tueiyɔɔ? (b) Yɛɛ naŋ cho yɛ yaasiaa o buŋgɛi hei niŋ a i cho lachi ve?

² Nyɛ yɔŋnuŋ poo hoo wo loonuŋ naa a diomnda Chiisu dimi a buɛiyaa nduaa okɔɔ laŋ. Mbo dimi aa: ‘A cho ya diomndo tueiyɔɔ.’ (Chɔŋ 10:​16) Kɛ o choo choo niŋ Chiisu cho ni. Lelaŋ, vɛɛ naŋ tiu yɛ ba miŋ tuei ndu diom? Nɛiyo opilɛ o naŋ chɔm maa ŋ cho Masanɔ naa diomndo tueiyɔɔ wo cho nyɛ o dimul naa wo pɛɛkoo, nduyɛ miŋ dɔu nyɛ naŋ pɛɛku wo o wali niŋ ni.—Maa. 7:​24, 25.

³ O buŋgɛi hei niŋ a i cho lachi ve, ŋ cho yaasiaa pɛɛkula Chiisulaŋ latiŋ. A mɛɛ naŋ cho chɔ yɛ, mi Chiisu pɛɛku naa maa ŋ nɔ mi pɛŋgi sɔɔŋ ŋpum tosaa, nduyɛ maa ŋ nɔ miŋ tosa sɔɔŋ cheleŋ. Ŋ yaasiaŋndɔ fɛŋ sɔɔŋ ŋmuuŋ ŋ wana mandaa lasaa kɛndɔɔ dimul naa le miŋ pɛŋgi tosaa woŋ.

4. A mɛɛ Luku 12:​29 dimi yɛ, yɛɛ tosa yɛ miŋ ‘buulaŋ tau’?

⁴ Nuawɔ Luku 12:​29. Mi Chiisu dimul buɛiyaa nduaa maa a nɔ ma ‘pɛŋgi buulaŋ bɛndoo’ a nyɛm nda hauba woŋ okɔɔ. Ŋ sina maa taasioo wa teleŋ o teleŋ o sila Chiisu ke naa wo niŋ,  nduyɛ o nɛi bɛnda wo choo o ke naa ndu ni. Le hei, miŋ yeema ndu dɔwɔɔ o wali niŋ. Kɛ lepum, mbo wa ikala kpoke le ndu dɔwɔɔ o wali niŋ. Le yɛɛ?

5. Le yɛɛ waŋnda apum buulaŋ yɛ tau le nyɛdiaa, nyɛ chuɛɛnaŋndo a naa lɔlaa sɔlaa?

⁵ Mi waŋnda apum buulaŋ tau le nyɛdiaa, nyɛ chuɛɛnaŋndo, a naa lɔlaa. Naapum bahawɛi nyɛsɔlaa cho tau o lɛŋnde nda cho leŋ niŋ. Le hei, mii wa ikala kpoke le kaniei sɔlaa okoŋ ma ke yuŋgula ndalaŋ nyɛm nda hauba woŋ. Ɔɔ naapum, mbo wa maa wana wa wallo le yuŋgoo tooloo wo sɔla piɔmndo. Le hei, wanaa lo o yuŋgu koŋ niŋnda sɔla lɛ nyɛsɔlaa le nyɛm nda hauba woŋ piondɔɔ le. O faŋaŋndɔ okoŋ kɔɔli, naa Kolonaa tosa niŋ, mi waltaŋ la hialuŋ wanaa bɔɔbɔɔ. (Ikili. 9:​11) Te sɔɔŋ muŋ ɔɔ ŋ cheleŋ komal naa pɛ, vɛɛ naŋ hiau yɛ lachi a nyɛ Chiisu dimul naa le miŋ pɛŋgi buulaŋ bɛndoo wo dɔwɔɔ o wali niŋ?

6. Tɛɛsiaawɔ nyɛ yɔŋnuŋ kiilanɔɔ Pitɛ a teleŋ pilɛ wo.

⁶ A teleŋ pilɛ, kiilanɔɔ Pitɛ nda chaaŋaa nduaa wa o dɛndɔɔ niŋ o pioo Kalili choo. Okoŋ, mi hueiyii bɛndu bɛnduei kandu hɔŋndo, kɛ ma cha Chiisu hunɔɔ nda o ibuŋ o mɛŋndaŋ choo. Mi Pitɛ dimi aa: “Masanɔɔ, te num lekɛndɛi ni, mɛɛ dimullɔ ya le mi kuɛ naa num chua o mɛŋndaŋ choo.” Okoŋ mi Chiisu dimul ndu aa “huŋ.” Mi Pitɛ fula o dɛndɔɔ niŋ mbo kandu kɔlaŋ naa Chiisu chua “o mɛŋndaŋ choo.” Kɛ tofawɔ nyɛ yɔŋnuŋ okoŋ kɔɔli wo. “Mɛɛ o che mɛɛ hueiye wa hɔŋ bɛndoo yɛ, mi siooŋnde bii ndu. Nduyɛ mɛɛ o kandu mɔɔwaa, mbo mal yioo kpeleŋ aa: ‘Masanɔɔ, piŋi ya fɔ!’” Mi Chiisu siɛndi baa mbo saa Pitɛ okoŋ mbo piŋi ndu. I cho kpendekele maa te Pitɛ ndoo wa pɛ Chiisu tofaa, o wa hiouwɔɔ lachi a kɔlaŋ o mɛŋndaŋ choo. Kɛ mɛɛ o tofa dɔɔ hueiye, mi siooŋnde bii ndu nduyɛ mi kiisaŋndo luɛi  ndu o kɔl, okoŋ mbo kandu mɔɔwaa.—Maa. 14:​24-31.

7. Yɛɛ naŋ pɛɛku yɛ o tamasi Pitɛ wo niŋ?

⁷ Ŋ tiuba miŋ pɛɛku nyɛ o tamasi Pitɛ wo niŋ. Mɛɛ Pitɛ fula o dɛndɔɔ niŋ, nduyɛ mbo kandu kɔlaŋ o mɛŋndaŋ choo, o ve kɔl maa nyɛ cho yɔŋnɔŋ, o tosa niŋ mbo kɛɛ Chiisu tofaa okoŋ mbo kandu mɔɔwaa wo le. Ndoo yeema mbo hiou lachi a kɔlaŋ o mɛŋndaŋ choo haaa mi ndoo fuuluu naa Masanɔ ndɔɔ wa wa. Kɛ o hiu lachi a keŋ tosaa le. Mi che bɛɛ ŋ kue o mɛŋndaŋ choo le, kɛ lepum mi sɔɔŋ luei laalaŋ naa o tofaa bɛŋgu woŋ komal naa. Te ŋ kɛɛ pɛ tiindaŋndo dɔwɔɔ o Chɛhowa a o mɛɛla ndɔlaŋ niŋ, keŋ tosa miŋ yɔŋnuŋ pɔmbɔlɔsɔɔ o ndu piɛiyo niŋ. Lelaŋ, o yɔŋ bɛɛ mi bahawɛila kala kalalaŋ la komal naa, ŋ nɔ miŋ hiou lachi a kɔllo handɔɔ o Chɛhowa choo vɛlɛ a kpaaya o nɔ le naa malaa wo. Vɛɛ naŋ tosa yɛ keŋ?

8. Yɛɛ mala yɛ naa ŋ buulaŋ tau le nyɛm naŋ hauba woŋ sɔlaa le?

⁸ Ŋ nɔ miŋ dɔu tiindaŋ naa o Chɛhowa niŋ, okoŋ miŋ mal buulaŋ bɛndoo a bahawɛila naalaŋ okɔɔ. Loonuŋ maa Finya naa kaalaa Chɛhowa mɛi lediom maa, o cho naa nyɛm naŋ hauba woŋ ke, te ŋ kɛsi pɛ sɔɔŋ cho a ndu okɔɔ woŋ nyɛ tase o yoomula naalaŋ niŋ. (Maa. 6:​32, 33) Chɔŋ o sindɔɔ niŋ huŋ bii a hau, Chɛhowa cho diomnde o mɛi leŋ ndeŋ peeloo. (Ditɔnɔ. 8:​4, 15, 16; Sam 37:​25) Te o buulaŋ pɛ a youwa vɛlɛ a bilta peeŋgelaŋ, mɛɛ ŋ nɔ miŋ buulaŋ tau a nyɛ naŋ dia wo ɔɔ a nyɛ naŋ wounuŋndo okɔɔ le. (Maa. 6:​26-30; Filipi. 4:​6, 7) Mi kaalaa nyindu kalaŋ chuauwa le ma tosa nyɛ o nyɛ nda tiuba, le chuauwaa ndaa nyɛm nda hauba woŋ kioo. O nɛi pilɛ koŋ choo, mi kaalaa nyindu Finya naa cho o choo choo niŋndo, le naa nyɛm naŋ hauba woŋ kioo. A tonya, ŋ nɔ miŋ nɔ tiindaŋndo maa Chɛhowa cho naa nyɛm naa hauba woŋ ke!

9. Yɛɛ naŋ pɛɛku yɛ o suɛi yɔŋnaŋii pɔnɔɔ a lanɔ pilɛ niŋ?

⁹ Ŋ tofaŋndɔ suɛi yɔŋnaŋnde le chɔmndo mɛɛ Chɛhowa ke naa nyɛm naŋ hauba woŋ yɛ. Paale pilɛ, mi pɔnɔɔ a lanɔ cho kɔɔfaleŋ tosaa wo luɛi o mɔmbil nda paandoo niŋ le kɔlaŋ ndepiliaa wa o kampiiyo niŋnda chuaa, le ma kuɛ o bɔŋaŋndo. Mi puaapilɛnɔɔ dimi aa: “Mɛɛ bɔŋaŋndo chuu, miŋ dimul ndepiliaa kaŋ le ma kuɛ o naa lo bɛɛ le miŋ de nyɛdiaa pɔmbɔ. Kɛ miŋ loonuŋ maa, naŋ nɔ nyɛdiaa o bɛɛ le.” Yɛɛ yɔŋnuŋ yɛ okoŋ kɔɔli? Mi puaapilɛnɔɔ hiau lachi a suɛi aa: “Mɛɛ naŋ fuuluu o bɛɛ, miŋ cha bɔlɔlaŋ la tiɔɔŋ o dio naa la piaa cha a nyɛdiaa leniŋ. Ŋ sina wana kpeekpei ndoo kɛsi laŋ ndo le. Kɛ miŋ sina maa Chɛhowa wa naa kioo nyɛm naŋ hauba woŋ ni.” Mɛɛ teleŋ tiŋ hiou, mi mɔmbil ndaa tambu vɛlɛ. Mɔmbil koŋ ndaa soliŋ kpeku ni le kɔlaŋ o wali pollo niŋ. Nduyɛ ndaa nɔ nyɛsɔlaa le ndu miŋgi toosiaa le. Le hei, ma kua a ndu ma kɔ kɛsi naa nda toosiaa nyɛm nyaanaŋndoŋ nda. Mi po pum nyuna nda aa: “Nɛɛnɛ nɔ yɛ mɔmbillo hoo?” Mi puaapilɛnɔɔ dimi maa ndu nɔ ni, kɛ o cho o tambɛiyo. Mi po koŋ dimi aa: “Keŋ cho isɔɔ le, mɔmbil suu wo hoo kpeekpei laa nuu yeema ni, nduyɛ a kɔɔleŋ ndeŋ. Vɛɛ ŋ yeema yɛ mi paawa le ndu?” Mi puaapilɛnɔɔ hoo sɔla nyɛsɔlaa tau. Nduyɛ ndoo tiuba mbo pendu mɔmbil cheleŋ. Mbo mɛɛlu dimi aa: “I nɔla pɛŋ mi chɔm mɛɛ ya wa sinaŋndo paaleleŋ yɛ le. Kɔndɔfili bii ya le hei le kanifuule, Chɛhowa kɛsɛ wa naa malaa ni.”

10. O nɛi kuɛɛ choo Sam 37:​5 dɛɛniaa yɛ naa le miŋ mal buulaŋ bɛndoo le nyɛm naŋ hauba woŋ sɔlaa?

¹⁰ Te o yɔŋ pɛ miŋ yaŋ wana mandaa lasaa kɛndɔɔ nilaŋ, miŋ pɛŋgi buulaŋndo le nyɛm naŋ hauba woŋ sɔlaa, keŋ cho naa mala miŋ laalaŋ kɛsɛ maa Chɛhowa cho naa muŋ ke.  (Nuawɔ Sam 37:​5; 1 Pitɛ 5:​7) Ŋ yaasiaŋndɔ sɔɔŋ naŋ soo a muŋ okɔɔ o pɛl 5 niŋndo. Mi Chɛhowa soliŋ yuŋgu lebollo a wana nɔ fondaŋ wallo wo kpeku, le ma mala naa miŋ sɔla nyɛm naŋ hauba woŋ. Ŋ nɔ laalaŋndo maa, te o yɔŋ pɛ mi wallo hɛluŋ yuŋgu lebollo ɔɔ mbo nɔla lɛ nyɛ o nyɛ tosa le yuŋgu ndɔɔ malaa le, mi Chɛhowa soliŋ nɛila cheleŋ kpeku le nda malaa. Ŋ tofaŋndɔ nyɛ cheleŋ wana mandaa lasaa kɛndɔɔ dimul naa le miŋ pɛŋgi tosaa wo.

11. A mɛɛ Maatiu 7:​1, 2 dimi yɛ, yɛɛ Chiisu dimullɛ naa le miŋ pɛŋgi tosaa, nduyɛ le yɛɛ hei wa yɛ simullo?

¹¹ Nuawɔ Maatiu 7:​1, 2. Chiisu sina maa wanaa lahakiaa naŋ cho ni, nduyɛ maa miŋ handu kɔllo o biondɔŋnda acheleŋnda choo. Le saboo hoo, mbo dimi aa: “La pɛŋgi waŋnda yamaŋ kilullo.” Mi che bɛɛ ŋ cho wanaa lahaki, kɛ ŋ nɔ miŋ kindiŋ kpoke le miŋ pɛŋgi chaaŋaa naa laalaŋnda yamaŋ kilullo. Te ŋ sina pɛ maa ŋ nɔ ŋgɛbɛ ŋgɛbɛlaŋ, yɛɛ naŋ nɔ yɛ miŋ tosa? Yaŋ Chiisu nilaŋ, nduyɛ ma kindiŋ o nɛi o nɛi niŋ le ma pɛŋgi acheleŋnda yamaŋ kilullo.

12-13. Mi Chɛhowa mal Masaa Deeve haki le sɔɔŋ wɔɔŋ o tosa woŋ. Vɛɛ tamasi ndɔɔ mala yɛ naa miŋ pɛŋgi acheleŋnda yamaŋ kilullo?

¹² Miŋ sɔla tɔnɔɔ tau te ŋ yiyaŋ pɛ a tamasi Chɛhowa wo okɔɔ. O sɔɔŋ naŋ kɛndɔŋ choo o handu kɔllo ni. Ŋ che hei kpendekele a mɛɛ o bii Masaa Deeve yɛ, teleŋ o tosa haki wɔɔŋ wɔɔŋndo wo. Le tamaseliiyo, mbo suunda a Baasiɛba, nduyɛ mbo dii vɛlɛ pɔnɔ ndɔ. (2 Saam. 11:​2-4, 14, 15, 24) Fulamakɔɔlioo wa ni, mi Deeve, yuŋgu ndɔɔ, a laandaa nduaa a piliaa kpou saŋga. (2 Saam. 12:​10, 11) A teleŋ cheleŋ, mi Deeve kɛɛ vɛlɛ tiindaŋndo dɔwɔɔ o Chɛhowa niŋ, nduyɛ mbo dimi le ma chɔm puaa chɔuwa kpou o Isɔluɛi niŋ. Heelɔŋndo tosa ni mi Deeve duau tiindaŋndo o puaa nduaa chɔuwa niŋ, nduyɛ mbo yiyaŋ maa a nɔla ma manda nda. Yɛɛ wa yɛ fulamakɔɔlioo? Mi naa wɔɔŋ wɔɔŋndo dii Isɔluɛiya 70,000.—2 Saam. 24:​1-4, 10-15.

¹³ Te num oo wa pɛ Isɔluɛi a teleŋ koŋ, yiyaŋ yɛɛ ŋ wa yɛ nɔ a Deeve okɔɔ? Baa a wa pa yiyaŋ maa Chɛhowa nɔ mbo mal ndu haki le? Chɛhowa ndu yiyaŋ lende le. Mbo handu kɔl ndɔɔ o tiindaŋ Deeve ndoo dɔu o ndu niŋndo choo, vɛlɛ a mɛɛ ndoo mal yɔŋndɔ wɔɔŋndo a kɔllo kpou yɛ. Nduyɛ mbo mal Deeve haki le sɔɔŋ wɔɔŋ o tosa woŋ. Chɛhowa ndoo sina maa Deeve ndoo kaala ndu tau, nduyɛ maa ndoo yeema nyɛ cho o kɛndɔɔ wo tosaa. Ŋ nɔ bɔɔ balika melaa le mɛɛ Chɛhowa handu kɔllo o suliŋnda naala kɛndɛlaŋ choo yɛ.—1 Masaa. 9:​4; 1 Kolo. 29:​10, 17.

14. Yɛɛ mala yɛ Kilisiɔŋnda le ma pɛŋgi acheleŋnda yamaŋ kilullo?

¹⁴ Chɛhowa ve naa kɔl le miŋ tosa sɔɔŋ o nɛi walaŋndo choo le. Lelaŋ, naa bɛɛ ŋ nɔ miŋ wa acheleŋnda kɔl le ma tosa sɔɔŋ o nɛi walaŋndo choo le. Nduyɛ ŋ nɔ miŋ handu kɔllo o sɔɔŋ kɛndɛŋ nda tosa woŋ choo. I wa tɛtɛlɛ le miŋ sina siɔwuŋ waŋndo, okoŋ miŋ kandu ŋgɛbɛ ŋgɛbɛlaŋ nɔɔ a ndu. Kɛ mi wana cho tamasi Chɛhowaa tolɔɔ kɔɔli wo, tosa wallo latulu a acheleŋnda o yɔŋ bɛɛ mbo sina siɔwuŋ ndaŋ. Le mɛɛ diamɔŋndoŋ ŋpum ve kpɔlɔkɔ le yɛ, o kendu ko mi waŋnda sina naŋɔɔ ndɔɔ. Kɛ wana sina a muŋ okɔɔ wo sina naŋɔɔ ndɔɔ, nduyɛ o sina maa ŋ cho ŋ sɔvɛ. Maa Chɛhowa nda Chiisu, ŋ nɔ miŋ handu kɔllo o suliŋnda kɛndɛla acheleŋnda choo. O cho o siɔwuŋ ndaŋ choo le.

15. Vɛɛ yiyaŋndo a mɛɛ sɔɔŋ cho acheleŋnda choo yɛ okɔɔ, mala yɛ naa miŋ pɛŋgi nda yamaŋ kilullo?

¹⁵ O faŋaŋndɔ o kɔllo handɔɔ o suliŋnda kɛndɛla acheleŋnda choo, yɛɛ cheleŋ mala  yɛ naa miŋ pɛŋgi acheleŋnda yamaŋ kilullo? Kindiŋ ma sina mɛɛ sɔɔŋ cho o yoomula acheleŋnda niŋ yɛ. Tofawɔ tamaseliiyo hoo. Paale pilɛ, mi Chiisu kua o maaŋndo niŋ, nduyɛ mbo cha wɛɛŋ ndoo vii pɔnɔɔ wo kapalaŋ la tiɔɔŋ dɔwɔɔ o kɔfula ndaa duau kanioŋ ndaŋ niŋ. O nyuna naa aa: “Le yɛɛ o dou kanioŋ tau le?” le. O hendu kɔllo o kaniŋ wɛɛŋ koŋ ndoo dɔu o kɔfu koŋ niŋndoŋ choo le. Kɛ mbo handu kɔllo o sabu wɛɛŋ koŋ ndoo tosa ndi wo choo a mɛɛ sɔɔŋ wa o yoomu ndɔɔ niŋ yɛ. Nduyɛ mbo chandu ndu le mɛɛ o wa tosaa nyɛ ndoo tiuba wo yɛ.—Luku 21:​1-4.

16. Yɛɛ naŋ pɛɛku yɛ o suɛi yɔŋnaŋii Vɛlonika ve niŋ?

¹⁶ Suɛi yɔŋnaŋii Vɛlonika ve chɔm naa maa, ŋ nɔ miŋ yiyaŋ a mɛɛ sɔɔŋ cho o yoomula acheleŋnda niŋ yɛ okɔɔ. Kala chua cho po ndɔɔ mandaa ndupilɛ kpe wo cho o kunda Vɛlonika wo niŋ. Mi Vɛlonika dimi aa: “A teleŋ pilɛ mi yiyaŋ maa, ndepilɛnɔɔ hoo nda po ndɔɔ kue ko o bɔŋaŋndaŋ a o wali pollo niŋ te. Le hei, mi kandu nda yamɛi kilullo. Kɛ paale pilɛ, mi kua o wali pollo niŋ a ndepilɛnɔɔ hoo, nduyɛ mbo dimulla maa po ndɔɔ nɔ naa mahullo, vɛlɛ maa o cho kindiŋndo o nɛi o nɛi niŋ le halikpeŋ mbo sɔla nyɛm nda hauba woŋ, nduyɛ ma nɔ chaŋyɛi kɛndɛi a Chɛhowa. Mbo dimi maa teleŋndaŋ lapum, le mɛɛ po ndɔɔ nɔ bahawɛi koŋ yɛ, mbo bii bɔŋaŋndaŋ o kundala cheleŋ niŋ.” Mi Vɛlonika mɛɛlu dimi aa: “Pesiŋ bɛɛ yaa sina maa sɔɔŋ muŋ te wa ndepilɛnɔɔ hoo choo le. I nɔ  niŋ balika melaa tau le nyɛ ndepilɛnɔɔ hoo cho tosaa le Chɛhowa wo, nduyɛ I nɔ bɛɛleŋ tau le ndu.”

17. Yɛɛ Chemisi 2:​8 dimullɛ naa le miŋ tosa, nduyɛ vɛɛ naŋ tosa yɛ ndi?

¹⁷ Yɛɛ naŋ nɔ yɛ miŋ tosa te ŋ sina pɛ maa ŋ kilul niŋ chaaŋ naa laalaŋndo yamɛi? Ŋ nɔ miŋ loonuŋ maa, ŋ nɔ miŋ chɔm puaapiliaa naa kaalaa. (Nuawɔ Chemisi 2:​8.) Ŋ nɔ vɛlɛ miŋ piɛi o Chɛhowa lo a kɔllo kpou, le mbo mala naa miŋ pɛŋgi acheleŋnda yamaŋ kilullo, nduyɛ miŋ tosa wallo o nyɛ naŋ piɛiyo choo. Ŋ tosa hei te ŋ chua pɛ teleŋndo a wana naŋ kilul koŋ yamɛiyo. Keŋ cho naa mala miŋ sina ndu nyɛkɛndɛi. Ŋ dimul ndu le mbo kuɛ a naa latulu o wali pollo niŋ ɔɔ le mbo hiŋ o naa lo bɛɛ le nyɛdiaa pɔmbɔ dioo. Te ŋ sina wana koŋ pɛ nyɛkɛndɛi, keŋ cho naa mala miŋ tol tamasi Chɛhowa nda Chiisu wo kɔɔli, le miŋ handu kɔllo o sɔɔŋ kɛndɛŋ o tosa woŋ choo. O nɛiyo hoo choo, ŋ cho chɔm kpendekele maa ŋ cho diom wana mandaa lasaa kɛndɔɔ tueiyɔɔ le miŋ pɛŋgi acheleŋnda yamaŋ kilullo.

18. Vɛɛ naŋ chɔm yɛ maa ŋ cho wana mandaa lasaa kɛndɔɔ diomndo tueiyɔɔ?

¹⁸ Mɛɛ saa yaŋ wana manda nda wo nilaŋ yɛ, lende koni buɛiyaa Chiisuaa yaŋ ndu nilaŋ ni. Te ŋ pɛŋgi pɛ buulaŋndo a nyɛm naŋ hauba woŋ okɔɔ, nduyɛ miŋ pɛŋgi acheleŋnda yamaŋ kilullo, Chɛhowa nda Chiisu cho sɛmbɛ naa dɔwɔɔ sala. O yɔŋ bɛɛ aa ŋ cho o kunda “saa pɔmbɔɔ” choo ɔɔ o kunda ‘saa acheleŋnda’ choo, maa naa kpou hiounuŋ lachi a wana mandaa lasaa kɛndɔɔ diomndo tueiyɔɔ vɛlɛ a ndu diikɔŋndo. (Luku 12:​32; Chɔŋ 10:​11, 14, 16) O buŋgɛi cho lachi ve niŋ, ŋ cho yaasiaa sɔɔŋ ŋmuuŋ ŋ Chiisu dimul buɛiyaa nduaa le ma tosa woŋ.