1. Samu na yinki Yesu zonzá ti bilandi ya yandi ke faso mameme?

YESU lakisá ti kindiku ya yandi na bilandi ya yandi vandá faso kindiku ya ntwadisi ya mameme na mameme ya yandi. (Yoa. 10:14) Kifwani yayi ke mbote samu mameme zaba ntwadisi ya bawu, ba ke kuwá ndinga ya yandi mpe ba ke landak’ yandi. Bakala mosi yina kwendá na bwala mosi mpe talá mameme kuna me zonza: “Beto vandá na nsatu ya kubaka mameme foto. Na yawu, beto vandá bokila ba kwiza kote yina beto vandá. Kasi ba kwizá ve samu ba zabá ve ndinga ya beto. Na manima, mwana mosi ya bakala yina vandá ntwadisi ya mameme kwizá, mpe bokilá bawu. Na mbala mosi, ba bandá kulanda yandi.”

2-3. a) Wa’ faso bilandi ya Yesu ke kuwá ndinga ya yandi? b) Yinki beto ke zonzila na artikle yayi mpe yina ke landa?

² Bamambu yina bakala yina zonzá samu na mameme, ke na natá beto na kukanisa na yina Yesu zonzá samu na bilandi ya yandi. Yandi zonzá: “Bawu ke kuwa ndinga ya munu.” (Yoa. 10:16) Kasi Yesu ke na zulu. Wa’ faso beto lenda kuwa ndinga ya yandi? Beto ke kuwá ndinga ya Mfumu ya beto na ntangu beto ke sadilá malongi ya yandi na luzingu ya beto.—Mat. 7:24, 25.

³ Na artikle yayi mpe yina ke landa, beto ke tala mwa bamambu yina Yesu longá. Beto ke tala yina yandi zonzá na beto na kubika kusala, mpe yina yandi zonzá na beto na kusala. Beto zonzila ntete bima zole yina Ntwadisi ya beto ya mbote zonzá na beto na kubika kusala.

4. Faso me zonza Luke 12:29, yinki lenda sala ti beto tala “ntima mpasi”?

⁴ Tanga Luke 12:29. Yesu zonzá na bilandi ya yandi na kubika “[kutala] ntima mpasi “ samu na bima yina ba ke na yawu nsatu na luzingu. Beto zaba ti malongi ya Yesu ke vandá ntangu  nyonso mbote mpe mayela. Beto ke zolá kusadila yawu, kasi bantangu ya nkaka ya ke vandá mpasi. Samu na yinki?

5. Samu na yinki bantu ya nkaka ke kumá na basusi ya kulutila samu na bima yina ba ke na yawu nsatu na luzingu?

 ⁵ Bantu ya nkaka ke vandá na basusi ya kulutila samu na madya, bilele mpe kisika ya kuvanda. Ntangu ya nkaka ba ke vandá na bwala yina ya ke mpasi na kuzwa mbongo. Na yawu, ba lenda vanda ve na mbongo ya kulunga samu na kukipe bansatu ya bawu mosi, to ya dikanda ya bawu. To ntangu ya nkaka muntu yina vandá natá mbongo na yinzo me kufwa. Na yawu, dikanda ke dyaka ve na mbongo. Dyaka, na kati ya bantangu yayi, bantu mingi ke dyaka ve na bisalu samu na maladi ya Coronavirus (COVID- 19). (Lon. 9:11) Si mosi ya bamambu yayi to mambu ya nkaka me kumina beto, wa’ faso beto lenda bika kuvanda na basusi ya kulutila faso Yesu zonzak’ yawu?

6. Zonzila yinki kuminá apotre Piere.

⁶ Kilumbu mosi, apotre Piere na ba-apotre ya nkaka vandá na kati ya bwatu na zulu ya maza ya nene ya Galile mpe mupepe ya ngolo vandá bulá. Ntangu ba talá Yesu kutambula na zulu ya maza, Piere zonzá: “Mfumu, kana ya kele nge, pesa munu muswa ya kukwiza sika ya nge na kutambula na zulu ya maza.” Ntangu Yesu zonzá na yandi na ‘kukwiza,’ Piere basiká na bwatu mpe “bandaka na kutambula na zulu ya maza samu na kukwenda sika ya Yesu.” Tala yinki salama na manima: “Ntangu yandi talaka ti kitembo [mupepe] vandaka ngolo, yandi kumaka na boma, mpe mutindu yandi bandaka na kudyama, yandi lookaka [zonzá na ndinga ya ngolo] : ‘Mfumu! Vuukisa munu!’” Yesu pesak’ yandi diboko mpe vuukisak’ yandi. Kima  ya kusimba ni yayi: ntangu nyonso yina Piere vandá tala kaka Yesu, yandi lendá kutambula na zulu ya maza. Kasi ntangu yandi bandá kutala mupepe, yandi fuluká na boma mpe ntembe. Yandi bandá kudyama.—Mat. 14:24-31.

7. Yinki mambu yina kuminá Piere ke na longá beto?

⁷ Yinki beto lenda longoka na yina kuminá Piere? Ntangu Piere katuká na bwatu mpe kotá na maza, yandi vandá kanisa ve ti mupepe zolá pesa yandi boma mpe yandi zolá banda kudyama. Yandi vandá na nsatu ya kutambula tii kisika yina Yesu vandá. Kasi yandi lendá ve kulungisa dikanisi ya yandi. Bubu yayi, beto ke na nsatu ya kiminu samu na kukanga ntima na mantwala ya bampasi, kaka faso Piere vandá na nsatu ya kiminu samu na kutambula na zulu ya maza. Si beto bika kutala kaka Yehova na bapromese ya yandi, beto lenda banda kudyama na kimpeve. Mambu ni mambu yina lenda vanda na beto, beto zolá tula kaka meso na Yehova mpe na ngolo ya yandi ya kusadisa beto. Wa’ faso beto lenda sala yawu?

8. Yinki lenda sadisa beto na kuvanda ve na basusi ya kulutila samu na bima yina beto ke na yawu nsatu na luzingu?

⁸ Na kisika ya kuvanda na basusi ya kulutila samu na bamambu yina ke na beto, beto tula ntima na Yehova. Kuzimbana ve ti Tata ya beto ya luzolo Yehova, zonzá ti yandi ke kipe bansatu ya beto si beto tula bamambu ya kimpeve na kisika ya ntete. (Mat. 6:32, 33) Promese yayi, yandi ke lungisá kaka yawu. (Kul. 8:4, 15, 16; Nku. 37:25) Si Yehova ke kipeke bandeke mpe bafololo, beto zolá vanda ve na basusi ya kulutila samu na yina beto ke kudya mpe ke lwata! (Mat. 6:26-30; Flp. 4:6, 7) Samu ba ke zolá bana ya bawu, bibuti ke pesá bawu bima yina ba ke na yawu nsatu. Luzolo mpe ke natá Yehova, Tata ya beto ya zulu, na kupesa bana ya yandi bima yina ba ke na yawu nsatu. Ntembe ve, Yehova ke kipe bansatu ya beto!

9. Yinki beto ke na longoká na yina kuminá bampangi zole ya kukwela?

⁹ Beto tala disolo mosi yina ke na lakisá ti Yehova ke kipeke bansatu ya bisadi ya yandi. Kilumbu mosi, bampangi zole ya kukwela yina vandá bapionye, lutisá heure mosi na kaminion ya bawu yina vandá dyaka ve na ngolo, samu na kwenda baka bampangi zole ya kento yina vandá vanda kisika yina guvernema tulá ba yina kimá bwala ya bawu. Ba kwendá baka bawu samu ba kwenda na lukutakanu. Mpangi ya bakala me zonza: “Na manima ya lukutakanu, beto bokilá bampangi ya kento yayi na kudya mwa kima na yinzo. Kasi beto kwizá tala ti beto vandá ve na madya.” Yinki ba zolá sala? Mpangi ya bakala me bwela: “Ntangu beto kumá na yinzo, beto talá basaki zole ya madya na mantwala ya porte. Beto zabá ve nani kwizá bikila beto yawu. Yehova kipeke bansatu ya beto.” Mwa bantangu na manima, kaminion ya bawu kuzwá panne. Ya vandá sadisá bawu mingi na kisalu ya predikasion. Kasi ba vandá ve na mbongo ya kuyidika yawu. Ba kwendá na kisika yina ba ke yidiká bakaminion samu na kuzaba yikwa ba ke lomba na bawu. Ntangu ba vandá kuna, bakala mosi kwizá mpe yufulá bawu: “Kaminion yayi ke ya nani?” Mpangi ya beto zonzá ti ya vandá ya yandi mpe yandi vandá na nsatu ba yidika yawu. Bakala yina vutulá: “Mambu ve. Kento ya munu ke na sosá kaminion ya faso yayi mpe kaka kulere yayi. Yikwa beno lenda tekisa yawu?” Na manima, mpangi ya beto vutuká na mbongo ya kulunga samu na kusumba kaminion ya malu-malu. Yandi zonzá: “Beto vandá na kilengi ya kulutila na nsuka ya kilumbu yina. Beto zabá ti ya salamá ve kaka faso yina. Ya vandá diboko ya Yehova.”

10. Wa’ faso Nkunga 37:5 ke na sadisá beto na kuvanda ve na basusi ya kulutila samu na bima yina beto ke na yawu nsatu na luzingu?

 ¹⁰ Si beto kuwa Yesu mpe beto bika kuvanda na basusi ya kulutila samu na bima yina beto ke na yawu nsatu, beto lenda ndima ti Yehova ke kipe beto. (Tanga Nkunga 37:5; 1 Pi. 5:7) Na  paragrafe 5 beto me zonzila bamambu ya mpasi yina lenda kumina beto. Tii bubu yayi, ntangu ya nkaka Yehova me sadilá muntu ya famiye ya nge to kisalu ya nge samu na kukipe bansatu ya nge. Si muntu ya famiye yina vandá kipe bansatu ya nge ke dyaka ve to ba me katula nge na kisalu, zaba ti Yehova ke kuzwa nzila ya nkaka ya kukipe bansatu ya nge. Beto zonzila kima ya nkaka yina Yesu zonzá na beto na kubika kusala.

11. Faso me zonza Matayi 7:1, 2, yinki Yesu zonzá na beto na kubika kusala, mpe samu na yinki ya lenda vanda mpasi?

¹¹ Tanga Matayi 7:1, 2, nwt-MK. Yesu zabá ti bantu ya masumu ke na kifu ya kutalá kaka yimbi ya bampangi. Tala yinki yandi zonzá: “Beno bika kusambisa.” Beto lenda sala bangolo samu na kujuje ve bampangi ya beto ya kimvuka. Kasi, bantangu ya nkaka beto ke kubwá na mutambu yayi. Si beto me kwiza tala ti beto ke na kifu ya kutalá kaka yimbi ya bampangi, yinki beto lenda sala? Landa yina Yesu ke na zonzá na nge mpe bika kifu ya kusambisá bampangi.

12-13. Wa’ faso kukanisa na mutindu Yehova bakilá mfumu David ke sadisa beto na kubika kifu ya kutalá kaka yimbi ya bampangi?

¹² Beto lenda longoka mingi si beto kanisa na kifwani ya Yehova. Yandi ke sosá kutala mingi bima ya mbote yina bantu ke salá. Beto lenda tala yawu na faso yandi bakilá mfumu David, ata masumu ya nene yina yandi salá. Na kifwani, yandi basiká na Bethsabée kento ya ngana, mpe yandi kufwá bakala ya yandi. (2 Sa. 11:2-4, 14, 15, 24) Mambu yina David salá natiná kaka yandi mosi ve bampasi. Ya natiná mpe bampasi na dikanda ya yandi mpe bakento ya nkaka yina vandá na yandi. (2 Sa. 12:10, 11) Kilumbu ya nkaka David lakisá ve ti yandi vandá tula ntima na Yehova, ntangu yandi zonzá na bantu na kusosa kuzaba basoda yikwa vandá na Izraele. Ntangu ya nkaka ni lulendo natá David na kusala yawu mpe yandi bandá kutula ntima na basoda mingi yina vandá na yandi samu na kubumba yandi. Yinki ya natá? Bana ya Izraele 70 000 kufwá na maladi mosi ya ngolo!—2 Sa. 24:1-4, 10-15.

¹³ Si nge vandá na Izraele na ntangu yina, wa’ faso nge zolá tadila David? Nge zolá kanisa kwandi ti ya lungá ve Yehova lemvokila yandi? Yehova vandá tadila ve bamambu faso yina. Yandi talá faso David kangamá na yandi luzingu ya yandi nyonso mpe faso yandi balulá ntima. Na yawu Yehova lemvokilá David samu na masumu ya ngolo yina yandi salá. Yehova zabá ti David zolak’ yandi mingi mpe vandá na nsatu ya kusala bamambu ya mbote. Nge ke na sepelá ve na kutala ti Nzambi ke sosá bima ya mbote yina ke na kati ya beto?—1 Mf. 9:4; 1 Ns. 29:10, 17.

14. Yinki lenda sadisa bakristo na kubika kujuje bampangi?

¹⁴ Yehova ke vingilá ve ti beto bantu ya masumu, sala ntangu nyonso bamambu ya mbote. Beto mpe zolá vingila ve ti bampangi ya beto sala ntangu nyonso bamambu ya mbote. Ya ke ve mpasi na kutala mwa bifu ya yimbi yina ke na bampangi mpe kubanda kuzonzila yawu. Kasi, muntu yina ke landá kifwani ya Yehova, ke salá kintwandi na bampangi ata yandi ke na talá mwa bifu ya bawu ya yimbi. Diamant, ntangu ya ke vandá na ntoto, ya ke ngengá ve. Kasi muntu ya mayela zaba valere ya yawu. Yandi zaba ti ntangu ba ke sukula yawu mpe ba ke  yidika yawu, kitoko ya yawu ke basika. Faso Yehova na Yesu, beto suka ve kaka na kutala mwa bifu ya yimbi yina ke na bampangi. Beto sosa kuzaba bifu ya mbote yina ke na bawu.

15. Samu na yinki kukanisa na faso ke luzingu ya bampangi lenda sadisa beto na kuzonzila ve yimbi ya bawu?

¹⁵ Na zulu ya yina beto me zonza, yinki dyaka lenda sadisa beto na kubika kifu ya kutalá yimbi ya bampangi? Sosa kuzaba faso ke luzingu ya bawu. Tala kifwani yayi. Kilumbu mosi na temple, Yesu talá kento mosi ya povre yina fwidilá bakala kutula bambongo zole ya kisengo ya fioti na kati ya bakesi ya makabu. Yesu yufulá ve: “Samu na yinki kaka ni mbongo yina yandi me tula?” Yesu suká ve kaka na kutala mbongo yina kento yina tulá. Yandi talá faso vandá luzingu ya kento yina, mpe kima yina vandá nata yandi na kupesa mbongo yina. Yesu kumisá kento yina samu yandi salá nyonso yina yandi lendá kusala.—Luke 21:1-4.

16. Yinki beto lenda longoka na mambu yina kuminá Veronica?

¹⁶ Mambu yina kuminá mpangi Veronica, ke sadisa beto na kuzaba samu na yinki beto zolá tadila mutindu ke luzingu ya bampangi. Na kimvuka yina yandi vandá, ya vandá na mpangi mosi ya kento yina vandá vanda yandi mosi na mwana ya yandi ya bakala. Veronica me zonza: “Mu vandá tala ti ba vandá kwiza ve ntangu nyonso na balukutakanu, mpe ba vandá precheke ve mingi. Samu na yawu, mu vandá tadila bawu na faso ya yimbi. Kasi kilumbu mosi,  mu precheke na mpangi ya kento yina. Yandi zabisá na munu ti mwana ya yandi ya bakala vandá na maladi ya yintu ya ngolo. Yandi vandá sala nyonso samu na kukipe kimpeve ya bawu zole mpe bansatu ya bawu. Bantangu ya nkaka, samu na maladi ya mwana ya yandi, yandi vandá kwendá na balukutakanu ya kimvuka ya nkaka.” Veronica me kwiza ndima: “Mu vandá zaba ve ti luzingu ya yandi vandá mpasi faso yina. Bubu yayi, mu ke zolá mpe mu ke pesá buzitu ya mingi na mpangi ya kento yayi samu na nyonso yina yandi ke salá samu na kusadila Yehova.”

17. Yinki Zaki 2:8 ke zonzá na beto na kusala, mpe wa’ faso beto lenda sala yawu?

¹⁷ Yinki beto lenda sala si beto me kwiza tala ti beto ke talá kaka yimbi ya mpangi mosi? Beto zolá zimbana ve ti beto me lunga kuzola bampangi ya beto. (Tanga Zaki 2:8.) Beto zolá sambila Yehova, kubondila yandi bambala mingi na kusadisa beto na kubika kifu yayi. Samu na kulakisa ti beto ke na nsatu ya kukwenda nzila mosi na bamambu beto me zonzila na balusambu, beto lenda sosa kulutisa ntangu na mpangi yina beto ke talá kaka yimbi. Ya lenda sadisa beto na kuzaba yandi. Beto lenda lomba na yandi na kubasika na beto na predikasion, to beto lenda bokila yandi na kudya na beto. Bantangu yina nge ke lutisa na yandi, sosa kutala mbote yina ke na ntima yandi, faso Yehova na Yesu ke salak’ yawu. Si beto sala yawu, beto ke lakisa ti beto ke wá Ntwadisi ya beto ya mbote ntangu yandi ke zonzá na beto na kubika kusambisa bampangi.

18. Wa’ faso beto lenda lakisa ti beto ke wá ndinga ya Ntwadisi ya mbote?

¹⁸ Kaka faso mameme ke wá ndinga ya ntwadisi, mameme ya Yesu mpe ke kuwá ndinga ya yandi. Si beto sala bangolo na kubika kuvanda na basusi ya kulutila samu na bima yina beto ke na yawu nsatu na luzingu, mpe beto bika kusambisa bampangi, Yehova na Yesu ke sakumuna bangolo ya beto. Beto vanda na kati ya “kimvuka ya fioti” to “mameme ya nkaka,” beto nyonso zolá kuwa mpe kulanda bamambu yina ke zonzá na beto Ntwadisi ya mameme ya mbote. (Luke 12:32, nwt-MK; Yoa. 10:11, 14, 16) Na artikle ke landa, beto ke zonzila bima zole yina Yesu zonzá na bilandi ya yandi na kusala.