1. Konda musinke zimwe nampo zeyi Jesus ga hetakanesere varongwa vendi kononzwi?

JESUS kwa hetakanesere elikwatakano eli ga kara nalyo novarongwa vendi kelikwatakano eli lya kara pokatji komusita nononzwi dendi. (Joh. 10:14) Olyo kuna kara ehetakaneso lyewa. Nonzwi da diva musita gwado ntani ado kupurakena kezwi lyendi. Mudinguli gumwe ga yi limonena eyi. Age kwa tanta asi: “Name novakwetu kwa here kufaneka nonzwi dimwe nokuhetekera ko kudininka di wize pepi. Nye ado kapi da wizire kwetu, morwa kapi da divire mazwi getu. Ano konyima yiyo pwa wizire musita gomumatigona. Tupu ga di zigidire, makura ta di mu kwama.”

2-3. (a) Ngapi omu varongwa vaJesus ava yi likida asi kuna kupurakena kezwi lyendi? (b) Yisinke natu ka konakona mosirongwa esi nesi sokukwama ko?

² Sihonena somudinguli ogu tuna zogere, kutudiworokesa nonkango edi ga uyungire Jesus kuhamena nonzwi dendi edi da fanekesa varongwa vendi. Age kwa uyungire asi: “Ado ngadi purakena kezwi lyange.” (Joh. 10:16) Nye Jesus ngesi kuna kara meguru. Ngapi nye omu natu purakena kwendi? Nkedi zimwe atu likida asi ose kuna kupurakena kwa Jesus kuna kara pokutura pasirugana meparu lyetu eyi a tu rongo.—Mat. 7:24, 25.

³ Mosirongwa esi nesi sokukwama ko, tatu ka zogera yininke yimwe eyi ga rongere Jesus. Natu ka dimburura asi Jesus kwa rongere asi twa hepa kunyokera po yininke yimwe ntani noyininke yimwe eyi twa hepa kurugana. Pomuhowo tatu ka zogera yininke yivali eyi Musita gwetu atu tantere tu nyokera po kurugana.

4. Kuliza naRukasa 12:29, yisinke nayi vhura kuretesa po “sinka”?

⁴ Resa Rukasa 12:29. Jesus kwa tanterere varongwa vendi va ‘hageke kukara nosinka’ soyihepwa yawo yopanyama. Ose twa yi diva asi epukururo lyaJesus alyo nkenye apa uhunga  ntani ewa. Ose tuna hara kulitura pasirugana, nye poyiruwo yimwe kuvhura kutukarera udigu kuyirugana ngoso. Morwasinke?

5. Yisinke nampo ayi ninkisa vamwe va kare nosinka soyihepwa yawo yopanyama?

 ⁵ Vamwe nampo kuvhura va kare nosinka soyihepwa yawo yopanyama. Pasihonena ngwendi oku nava gwana nondya, yidwara ntani noku nava vhura kutunga. Awo nampo kwa tunga mosirongo omu mwa kara vantu wovanzi woruhepo ntani udigu kugwana yirugana. Ayo nampo kuvadigopera kugwana yimaliwa yokugwanena po yipo va rerese ko mapata gawo. Ndi nampo gumwe ogu nga gwana yimaliwa mokureresa ko epata lyawo ga fa, ano ngesi epata lyawo kapi lina kugwana yimaliwa eyi vana hepa yipo va lirerese ko. Ntani nampo sinzi sovantu kwa zumbanesa yirugana yawo morwa uvera woCorona. (Muud. 9:11) Nsene asi twa ligwanekera nomaudigu ogo ndi gamwe hena, ngapi natu kwama epukururo lyaJesus pokuhageka kukara nosinka?

6. Faturura eyi ya horokerere Peturusa sikando simwe.

⁶ Sikando simwe, mupositoli Peturusa novapositoli vakwawo kwa kere mowato mEfuta lyaGalireya. Ako kwa kere ko ekundungu lyenene apa va mwene Jesus kuna kugenda pomema. Peturusa yipo ga uyungire asi: “Hompa, nsene asi nyove, ninka nge name ni gende pomema, ni wize koge.” Konyima zapa Jesus ga mu tanterere asi “wiza,” Peturusa makura ta tundu mo mowato, “ta gendi pomema, a ze kwaJesus.” Tu tareni eyi ya kweme ko. “Apa ga mwene emumpepo kuna kudida, ta tukuka unene. Apa ga tamekere kudama, ta zigire asi: ‘Hompa, popera nge!’” makura Jesus ta gonona kuwoko kwendi a mu popere. Ayo ya kara nomulyo tu diworoke asi Peturusa ngano ya mu tompokere kugenda pomema, nsene ngano ga twikilire kutara kwaJesus. Nye  apa Peturusa ga tere kemumpepo, age kwa tukukire unene ntani ga kere nomasinganyeko, makura yipo ga tamekere kudama.—Mat. 14:24-31.

7. Yisinke natu lirongera ko kosihonena saPeturusa?

⁷ Ose kuvhura kulirongera ko kosihonena saPeturusa. Apa Peturusa ga tundire mowato nokugenda pomema mefuta, age kapi ga gazarere asi kuvhura a kare nosinka semumpepo ntani nokudama. Age kwa here kugenda ngorooro pontunda zomema dogoro a ka sike kwaJesus. Nye mevango lyokutara kwaJesus, age kwa kere nosinka semumpepo. Twa yi diva asi ose kapi tatu vhuru kugenda pomema, nye ose kuligwanekera nomaudigu aga aga heteke epuro lyetu. Nsene tu dira kuhuguvara mwaJehova nomomatumbwidiro gendi, epuro lyetu ngali sesupa. Yi kare asi maudigu musinke ngatu ligwanekera nago meparu, twa hepa kuhuguvara mwaJehova asi ngatu vatera. Ngapi omu natu yi rugana?

8. Yisinke nayi tu vatera tu nyokere po kukara nosinka soyihepwa yetu yopanyama?

⁸ Mevango lyokukara nosinka somaudigu getu, twa hepa kuhuguvara mwaJehova. Diworokeni asi Guhyetu geharo Jehova kwa tu tumbwidira asi nga pakera mbili yihepwa yetu yopanyama nsene tu mu tura muhowo meparu lyetu. (Mat. 6:32, 33) Pwa kara maumbangi gomanzi aga aga likida asi age kusikisa mo etumbwidiro olyo. (Deut. 8:4, 15, 16; Epis. 37:25) Nsene asi Jehova kupakera mbili yidira nonombya, eyi kutupa ehuguvaro asi kapisi tu kare nosinka seyi natu lya ndi eyi natu dwara. (Mat. 6:26-30; Fil. 4:6, 7) Ngwendi moomu tupu eharo ali tumangeda vakurona va pakere mbili yihepwa yovana vawo, eharo kutumangeda Guhyetu gemeguru a pakere mbili yihepwa yovantu vendi. Yosili ose twa kara nehuguvaro asi Jehova nga tu pakera mbili.

9. Yisinke no lirongera ko kweyi ya horokerere valikwali vamwe?

⁹ Tu tareni sihonena esi asi likida omu Jehova a pakere mbili yihepwa yetu yopanyama. Valikwali ava ava rugana uzuvhisi wokukarerera kwa singire ure wovili zimwe yipo va ka simbe vanavazinyetu wovakadi vamwe ava va tungire mokamba zovanayirongo, va va tware kepongo. Munazinyetu gomugara ogo kwa uyunga asi: “Konyima zepongo, ose kwa zigidire vanavazinyetu wovakadi owo yipo tu ka lye kumwe nawo, nye konyima tatu ya dimburura asi kapi twa kere nonondya dokuvapa.” Yisinke va vhulire kurugana valikwali owo? Munazinyetu ogo gomugara kwa tanta asi: “Apa twa ka sikire kembo, ose kwa ka gwene nondjato mbali dononene donondya edi da kere pevero lyetu. Kapi twa divire asi yilye ga di tulire po. Jehova kwa tu pakerere mbili.” Ano konyima, etuwa lyovalikwali owo kwa zonaukire. Awo va hepere etuwa olyo yipo va ruganese ko mokuzuvhisa. Nye nampili ngoso, awo kapi va kere noyimaliwa yokuliwapekesa. Awo kwa twere etuwa lyawo kongarase yipo va ka tare asi yingapi nava vhura kufuta yipo va li wapaike. Makura yiyo pwa wizire mugara gumwe ogu ga pulire asi: “Etuwa lyalye lina?” Makura munazinyetu gomugara yipo ga limbwilire asi alyo etuwa lyendi ntani kwa here kuliwapekesa. Mugara ogo yipo ga uyungire asi: “Oyo kapi yina kara udigu. Mukadange kwa hara etuwa lyorudi oru ntani nondombo zokufana ngorooro ngoso. Yingapi ono hara kulirandesa?” Munazinyetu ogo kwa randesere etuwa lyendi komugara gwina, ogu ga mu futire yimaliwa yokugwanena po yipo a ka rande ko lyapeke. Munazinyetu gomugara ogo kwa tente asi: “Ose kwa hefe sili unene ezuva olyo. Twa yi divire asi ayo kapi ya horokere tupu pwayene. Jehova yige ga tu vaterere.”

10. Ngapi omu Episarome 37:5 ali tu korangeda tu dire kukara nosinka soyihepwa yetu yopanyama?

 ¹⁰ Nsene tu purakena komusita gwetu ntani nokunyokera po kukara nosinka unene koyihepwa yetu yopanyama, ose ngatu kara nehuguvaro asi Jehova nga tu pakera mbili. (Resa Episarome 37:5; 1 Pet. 5:7) Gazadareni ko kuhamena maudigu aga vana tumbura  moparagarafu zautano. Dogoro ngesi, Jehova kuvhura kuruganesa nturagumbo ndi muhona yipo a tu vatere tu pakere mbili yihepwa yetu yankenye ezuva. Nsene nturagumbo kapi ana kuyirugana oyo ndi nsene tu zumbanesa yirugana yetu, Jehova nga tu pakera mbili monkedi zapeke. Ose kuvhura kuyipura nawa-nawa asi nga tu pakera mbili. Ngesi tu zeni tu ka tare yininke yimwe eyi a tu tantere musita gwetu tu hageke kurugana.

11. Kuliza naMateusa 7:1, 2, yisinke ga tu tantera Jesus tuhageka kurugana ntani morwasinke nayi tu karerera udigu kuyirugana?

¹¹ Resa Mateusa 7:1, 2. Jesus ga yi divire asi vantu kapi va sikilira mo ntani poyiruwo yimwe awo kudemenena komapuko govakwawo. Eyi yiyo ga uyungilire asi: “Hagekeni kupangura.” Ose kuvhura ngatu hetekere ko kudira kupangura vapuli vakwetu. Nye oyo kapi ayi tu tompoka nkenye apa morwa natuvenye kapi twa sikilira mo. Yisinke ngatu rugana nsene tu dimburura asi ose kudemenena komapuko govakwetu poyiruwo yimwe? Purakena kwaJesus ntani rugana paapa wa hulira yipo o hageke kupangura wopeke.

12-13. Ngapi omu kuteda ko monkedi omu Jehova ga tere Ndafita nayi tu vatera tu nyokere po kupangura vakwetu?

¹² Ose kuvhura kugwanena mo mauwa pokuteda ko kosihonena saJehova. Age kudemenena koyininke yoyiwa eyi ava rugana vantu. Gazadareni ko eyi ga rugene Ndafita apa ga tulire mapuko gomanene. Pasihonena, Ndafita kwa honderere naBateseba ntani kwa dipagere mugara gwendi. (2 Sam. 11:2-4, 14, 15, 24) Ngoyitundwamo, Ndafita nepata lyendi kwa ya ligwanekerere nomaudigu kukwatera mo novakadi vendi vamwe. (2 Sam. 12:10, 11) Sikando simwe, Ndafita kapi ga huguvarere Jehova apa ga rugene yininke eyi ga dilire kumutantera Jehova pokuvarura vakwayita woVaisraeli. Ndafita nampo kwa yi rugene eyi morwa age kwa linenepekere kweyi ga kere novakwayita wovanzi ava ga huguvarere mokumupopera. Yitundwamo musinke ya ya kere? Vaisraeli wokusika po 70 000 kwa fire kehamba.—2 Sam. 24:1-4, 10-15.

¹³ Ngano nove gumwe ogu wa parukire mosiruwo soVaisraeli, ngapi ngano wa tere Ndafita? Ove ngano wa mu pangwire nokuuyunga asi Jehova ngano kapisi a mu gusire po ndi? Jehova kapi ga gazarere ngoso. Nye Jehova age kwa demenene koulimburukwi ou ga kere nawo Ndafita meparu lyendi nalinye ntani nelitezururo lyendi. Ngoyitundwamo, Jehova kwa gusilire po Ndafita kononzo dendi dononene. Jehova ga yi divire asi Ndafita ga mu hara unene ntani age kwa here kurugana youhunga. Ayo kutuhafesa pokudiva asi Jehova kudemenena koyikara yetu yoyiwa ntani konkareso zetu.—1 Vah. 9:4; 1 Hist. 29:10, 17.

14. Yisinke ya vatera Vakriste va hageke kupangura wopeke?

¹⁴ Mokumona asi Jehova kapi a ndindire ko kwetu tu sikilire mo, nose kapisi tu ndindire wopeke va sikilire mo, nye twa hepa kudemenena koyirugana yawo yoyiwa. Ayo ureru kumona mapuko govakwetu nokuvapangura. Nye nampili ngoso, muntu ogu ga kura pampepo kuvhura kumona mapuko govakwawo, nye age simpe kutwikira kuruganena kumwe nawo. Diamande ezi vana dili kuteta kuvhura zi dire kumoneka nawa. Nye muntu gonondunge ga yi  diva asi diamande ozo kumoneka nawa konyima zapa ava zi tete nokuziputja. Ngwendi Jehova naJesus, ngano kapisi tu demenene komapuko govakwetu, nye twa hepa kudemenena koyikara yawo yoyiwa.

15. Ngapi omu kugazadara ko kuhamena eparu lyovakwetu nayi tu vatera tu dire kuvapangura momudona?

¹⁵ Kugusa ko kudemenena koyikara yoyiwa yava wopeke, yisinke nayi tu vatera tu nyokere po kuvapangura momudona? Hetekera ko kugazara eparu lyawo. Tu tareni sihonena esi sina kukwama ko. Sikando simwe apa Jesus ga kere montembeli, age kwa mwene mufisayendi gomuhepwe ogu ga tulire tumaliwa tuvali mosikesa. Age kapi ga pulire asi: “Morwasinke ana dilire kutura mo yoyinzi?” Mevango lyokudemenena kweyi ga geve, Jesus kwa gazadarere ko eyi ya tumangedere mufisayendi a gave yimaliwa oyo ntani nomu lya kere eparu lyendi. Age kwa mu tangaukire kweyi ga vhulire kurugana.—Ruk. 21:1-4.

16. Yisinke ono lirongere ko kosihonena saVeronica?

¹⁶ Sihonena samunazinyetu gomukadi Veronica kulikida eyi ya karera nomulyo tu gazadare ko kuhamena omu lya kara eparu lyovakwetu. Mombungakriste ezi ga kere, kwa kere mo zinya gomudike ogu ga kere namunendi gomugara. Veronica kwa uyunga asi: “Ayo ngayi moneka kwange asi awo kapi ngava zi nkenye apa komapongo ntani mokuzuvhisa. Ano morwa konda zeyi, ayo kwa ninkisire nge ni va tare monkedi zepuko. Nye ezuva limwe  ame kwa pwege moyirugana yokuzuvhisa nozina womumati ogo. Munazinyetu ogo kwa tanterere nge asi munendi kwa kere nouvera womouruvi. Age kwa rugene paapa ga hulira mokugwana eyi nava lireresa ntani nokunkondopeka elikwatakano lyawo naJehova. Ukaro wamunendi ngau muninkisa poyiruwo yimwe a ka pongere kombungakriste zapeke.” Veronica kwa hagesa pokuuyunga asi: “Ame kapi na yi divire asi eparu lyendi kwa digopere unene. Ame ngesi nahara ntani na fumadeka munazinyetu ogu kwanayinye eyi ana kurugana mokukarera Jehova.”

17. Yisinke ali tu tumangeda etjangwa lyaJakopo 2:8 tu rugane ntani ngapi natu yi rugana?

¹⁷ Yisinke natu rugana nsene twa dimburura asi tuna pangura mupuli mukwetu? Ayo ya kara nomulyo tu diworoke asi twa hepa kuhara vanavazinyetu. (Resa Jakopo 2:8.) Twa hepa hena kukanderera nkenye apa kwaJehova nokumulikwambera yipo a tu vatere tu nyokere po kupangura wopeke. Twa hepa kurugana kuliza nomakanderero getu pokulitulira po siruwo sokuzogera nomuntu ogu tuna pangura. Ayo ngayi tu vatera tu dive nawa munazinyetu ogo. Kuvhura nampo tu mu pure tu pwage nage mokuzuvhisa ndi tu mu zigide tu ka lye kumwe. Ngomu tuna kudiva nawa munazinyetu momunene, ose ngatu hetekera ko kuhonena Jehova naJesus pokudemenena koyirugana yendi yoyiwa. Nsene tu yi rugana oyo, ayo ngayi likida asi ose kuna kupurakena kompangera zomusita gwetu gomuwa zokuhageka kupangura wopeke.

¹⁸ Ngwendi moomu tupu nonzwi adi purakene kezwi lyomusita gwado, varongwa vaJesus nawo kupurakena kezwi lyendi. Nsene tu kondja paapa twa hulira yipo tu dire kukara nosinka soyihepwa yetu yopanyama ntani nokuhageka kupangura wopeke, Jehova naJesus ngava tungika elituromo lyetu. Yi kare asi ose kwa hamena ‘kosiundagona’ ndi ‘kononzwi dapeke,’ tu twikire kupurakena nokulimburukwa komusita gwetu gomuwa. (Ruk. 12:32; Joh. 10:11, 14, 16) Mosirongwa sokukwama ko, ngatu ka zogera yininke yivali eyi Jesus ga tanterere varongwa vendi va rugane.