1. Mu bungu dia nti Yezu kafwanakasa milongoki miandi na bimeme?

YEZU wafwanakasa tindiku tiandi na milongoki miandi, na mpila yi bêlaka muvungi na bimeme biandi. (Za 10:14) Tifwani tio tia delakana tiena. Bimeme mbo bizabaka muvungi’awu, mpe mbo bihanaka mvutu bu biwâka zu diandi. Muntu wumosi wukwe se nzietolo wamona wo mu mbala’andi ya ntete. Watâ ti: “Weri neto tabaka bio foto, mpe tayêla mu sa ti bizi kwe beto. Kâ, ka biatulanda ko mu bungu ti ka biazaba mazu meto ko. Ha manima, mwana wumosi wa fioti weri muvungi wayiza; buna kwa bu katâ bio mbila, biamulanda.”

2-3. a) Bwe milongoki mia Yezu misongelaka ti zu diandi miwirikilaka? b) Nti tutaluzula mu timoko ti na mu tio tita landa?

² Musamu watâ muntu wô weri kwe se nzietolo, mbo wuta tu bambula misamu mia tâ Yezu mu bungu dia bimeme biandi​—milongoki miandi. Watâ ti: “Mbo biwâ zu diani.” (Za 10:16) Kâ Yezu ku mazulu kena. Bwe tulendi têla ti zu diandi tuta wirikila? Mpila ya mfunu yi tulendi songela ti Mfumu’eto tuta wirikila, ni mu sarila ndongosolo zandi mu luzingu lweto.​—Mat. 7:24, 25.

³ Mu timoko ti na mu timoko tita landa, mbo tutaluzula ndongosolo zakaka za Yezu. Ntiana bu tumona wo, Yezu watulongesa misamu mi tufweti bika mu yirika na mi tufweti yirika. Mbo tubatikila mu taluzula bima biole bia tu yimina muvungi wa mbote.

4. Tintwari na Like 12:29, nti bilendi sa ti tapupa?

⁴ Tanga Like 12:29. Yezu watêla milongoki miandi ti ka bendandi pupi mu bungu dia bima bia tinsuni. Tuzebi ti ntangu zazansoni malongi ma Yezu ma ndwenga mpe ma delakana kwa mabâka. Mbo tuzoloko mu sarila mo, kâ ntangu zakaka mbo wubâka musamu wa mpasi. Mu bungu dia nti?

5. Mu bungu dia nti bantu bakaka bakwe pupi mu bungu dia nsatu zawu za tinsuni?

 ⁵ Bantu bakaka balendi bâ na lwaka mu bungu dia nsatu zawu za tinsuni​—bidia, binkuti na tibuka tia bêla. Kampe bakaka ku nsi zilembolo na bimvwama biabingi babêlaka. Wulendi bâ musamu wa mpasi mu baka mbongo mu kipa makanda mawu. Peleko mfumu-kanda yafwiri, mpe kanda ka diasiri’â na mbongo zazingi ko mu kipa nsatu zawu za tinsuni. Babingi bahombese Bisalu biawu mu bungu dia mpasi za neti COVID-19. (Ekl. 9:11) Tala ti misamu mia mpasi mia mpila yo tuta bwabana na mio, bwe tulendi landila lutwalusu lwa Yezu mu lembo kwe pupi?

6. Zonzela musamu waturila ntumwa Piere lumbu timosi.

⁶ Lumbu timosi, bu kweri titembo tia ngolo, ntumwa Piere na ntumwa zakaka bu beri mu bato mu mubu wa Galile, bamona Yezu weri kwe yende ha mukanda-mamba. Piere watâ ti: ‘Mfumu, tala ti ni nge, tâ ndiyizi meno mpe ha mukanda-mamba tii hô ha wena.’ Ha manima Yezu wamutikisa mpe wamutêla kiza; Piere wakôka mu bato mpe wabatika mu diata ha mukanda-mamba mu kwenda kwe Yezu. Taleno ka nti biayôka ha manima. ‘Bu kamona ti titembo ngolo zingi tieri, bunkuta bwamubaka; ni kabatika mpe mu diama, watâ ti: “Mfumu, kumvukisa.”’ Yezu walambula koko  kwandi mpe wamuvukisa. Musamu wa mbote wena mu bambuka ti Piere wabâ na lenda dia diata ha mukanda-mamba bu keri kwe tari kwa Yezu. Kâ, bu kabatika mu tala titembo, wayizi bâ na bunkuta mpe na ntembe mpe wabatika mu diama.​—Mat. 14:24-31.

7. Ntia malongi tuta baka mu tifwani tia Piere?

⁷ Tulendi baka malongi mu tifwani tia Piere. Mu ntangu Piere yi kaduka mu bato, mpe yi kabatika mu diata ha mukanda-mamba, keri’â zabaka ko ti mbo kaketi bâ na mabanza yeko-yeko, mpe mbo kaketi batika mu diama. Weri nandi katatamana mu bâ ha mukanda-mamba tii bu kaketi tula kwe Mfumu’andi. Kâ ka tatamana ko mu tûla mabanza mandi mu kani dio. Wa matieleka, ka tulendi’â twe yende ha mukanda-mamba ko, kâ misamu mikotesaka timinu tieto mu ntontolo tubwabanaka na mio. Tamana lembo tûla mabanza meto mu Yehova na mu makani mandi, mbo tubatika mu diama mu timpeve. Mu musamu ni musamu wututurila mu luzingu lweto, tufweti tatamana mu tûla mabanza meto mu Yehova na mu lenda diandi diatubakisa. Ngano bwe tulendi bwa sila?

8. Nti bitubakisa mu lembo bâ na lwaka lwalwingi mu bungu dia bima bia tinsuni?

⁸ Mbo tubaka ndandu zazingi, tamana yingasa lukwikulu mu Yehova ha mbuka yi twena na lwaka. Tabambukaka ti Yehova, Tata’eto dia luzolo tu kanisini ti mbo kakipa nsatu zeto za tinsuni, tala ti tutûriri bima bia timpeve ha tibuka tia ntete. (Mat. 6:32, 33) Yehova walungisa kani dio mbala zazingi. (Lub. 8:4, 15, 16; Mik. 37:25) Tala ti Yehova mbo kakipaka nuni na bifulu, buna ka tufweti’â tabâ na lwaka ko mu bungu dia bima bia dia peleko bia lwata! (Mat. 6:26-30; Flp. 4:6, 7) Luzolo mbo lutumaka bibuti bia mbote mu kipa nsatu za tinsuni za bala bawu, mpila mosi mpe, luzolo mbo lutumaka Tata’eto dia ku mazulu mu kipa nsatu za tinsuni za kanda diandi. Wa matieleka, tulendi bâ na lukwikulu ti Yehova mbo katukipa!

9. Nti lendi longoka mu tifwani tia bantu bole ba kwelana?

⁹ Tazonzeleno tifwani timosi tita songela ka bwe Yehova kakipilaka nsatu zeto za tinsuni. Mpangi zole za kwelana zeri mu tisalu tia ntangu zazansoni zayôkesa heure yimosi mu kaminio’awu ya ntama mu kwe bonga mpangi za zikento zeri ku mbuka ya baréfugié mu nata zo ku lukutakanu lwa timvuka. Mpangi ya yibakala yitêle ti: “Ha manima ma lukutakanu, tatikisa mpangi zo mu kwe dia tintwari, kâ tayizi bakula ti ka tabâ na tima tia dia ko.” Ngano bantu bo ba kwelana nti basa? Mpangi ya yibakala vutulu tâ ti: “Bu tatula ku nzo, tamona sake zole za zinene za bidia ha mwelo. Ka tazaba ko ka nani wasisa zo. Yehova watukipa.” Ha manima, kaminio’awu yafwa. Ni yo yeri ba bakisaka mu samuna; kâ ka beri’â na mbongo ko mu yirikisa yo. Bu banata yo ku garage yeri penepene na nzo’awu, bakala dimosi diakota kô mpe wayula: “Ngano kaminio yi ya nani yena?” Watâ ti ya yandi yena, mpe wafwanakana bayirika yo. Bakala dio wavutu tâ: “Ka wena musamu ko. Mukento’ani kaminio ya mpila yi kata dinga mpe ye na couleur yi. Kwa nikuhana mu kuntekela yo?” Mpangi yo wakâla na mbongo za fwanana mu sumba kaminio yakaka. Watâ ti: “Ku nsuka ya tilumbu, tatomo bâ mu nsayi. Tazaba ti ka weri’â musamu wa mpamba-mpamba ko. Kâ koko kwa Yehova kweri.”

10. Bwe verse ya Mikunga 37:5 yitutindisilaka mu lembo vulu kwe pupi mu bungu dia nsatu za tinsuni?

¹⁰ Bu tuwirikilaka muvungi wa mbote, mpe bu tulembo bâka na lwaka lwalwingi mu nsatu zeto za tinsuni, tulendi bâ na lukwikulu ti Yehova mbo katulungisila zo. (Tanga Mikunga  37:5; 1 Pi. 5:7) Dimbitila mu misamu mia mpasi mi tuzonzele mu  paragrafe 5. Tii lumbu ti, Yehova lendi sarila mfumu-kanda peleko mfumu ya ku tisalu mu tu bakisa mu kipa nsatu zeto za bilumbu biabiansoni. Tala ti mfumu-kanda ka siri’â na lenda dio ko peleko ka tusiri’â na tisalu ko, Yehova mbo kasarila mpila zakaka mu tu kipa. Tulendi bâ na lukwikulu mu musamu wo. Tataluzuleno musamu wakaka wu ta tu lomba muvungi wa mbote mu bika.

11. Tintwari na Matie 7:1, 2, ngano Yezu nti katulomba mu lembo sa, mpe mu bungu dia nti wulendi bâ musamu wa mpasi kwe beto?

¹¹ Tanga Matie 7:1, 2. Yezu wazaba ti bantu beri mu wirikilaka masumu meri nawu, mpe mbo beri tûlaka mabanza mawu mu misamu mia mbi mi yirikaka bantu bakaka. Ntiangu katâ ti: “Ka lufundisakandi.” Wulendi bâ musamu wa mpasi kwe beto mu lembo fundisa mpangi zakaka. Kâ beto bansoni, bankwa-masumu twena. Tamana bakula ti ntangu zakaka mbo tutsâlaka bantu bakaka, nti tufweti sa? Tawirikila Yezu, mpe tasarila ngolo mu lembo fundisa.

12-13. Bwe dimbitila mu mpila Yehova yi kabongela Davide kulendi tu bakisila mu bika mu fundisaka bantu bakaka?

¹² Tulendi baka ndandu bu tudimbitila mu tifwani tia Yehova. Mbo katûlaka mabanza mandi mu misamu mia mbote mi yirikaka bantu ba kanda diandi. Mbo wumonekaka mu mpila yi kabongela mutinu Davide wayirika misamu mia nkatika mia mbi. Mu tifwani, wasa bunsuza na Bateseba, mpe wahondesa bakala diandi. (2 Sam. 11:2-4, 14, 15, 24) Mu bungu dia misamu mi kayirika, Davide na kanda diandi bamona mpasi, mu kati na bakento bandi bakaka. (2 Sam. 12:10, 11) Lumbu timosi, Davide wakondo lukwikulu mu Yehova bu katuma bantu mu konta binwani bia Israele, ni bu sa ti Yehova ka mu tuma wo ko. Kampe lukuta na lutangu lwa binwani biandi lwamutuma mu sila bo. Ngano ntia musamu wayôka? Bala ba Israele 70 000 bayizi fwa mu timbevo!​—2 Sam. 24:1-4, 10-15.

¹³ Tala ti mu ntangu yîna ku Israele weri bêlaka, ngano bwe waketi mwina Davide? Ngano mbo waketi banza ti ka fwanakana ko mu baka mulemvo wa Yehova? Yehova ka bandila wo bo ko. Watûla mabanza mandi mu tifu tia kwikama tia Davide na mu nsobolo ya mabanza mandi ya matieleka. Buna, Yehova walemvokela masumu ma manene ma yirika Davide. Yehova wazaba ti Davide Yandi keri tomo zoloko, mpe wazolo mu yirika misamu mia mbote. Ngano kutondaka ko mu zaba ti Nzambi bifu bieto bia mbote kwa kakipaka?​—1 Mit. 9:4; 1 Nta. 29:10, 17.

14. Nti biabakisa Bakristo mu bika mu fundisaka bantu bakaka?

¹⁴ Mu bungu ti Yehova ka kêlaka ko ti beto tabâ ba lunga, beto mpe ka tufweti’â takêlaka ko ti bampwana’eto babâ ba lunga, tufweti talaka kwa bifu biawu bia mbote. Vula-vula musamu wa fioti wubâka mu talaka kwa misamu mia mbi mi yirikaka bantu bakaka, mpe mu ba tsâla. Kâ, muntu wulandaka tifwani tia Yehova, lendi tatamana mu sala na bantu bakaka ni bu sa ti misamu mia mbi bayirikaka. Diamant ye mu mutoto yilendi bâ mvindu, kâ muntu we na ndwenga za bakula ka mona kwa mvindu yo ko, kâ mbo kamona ntalu yi yifwa bu batsemesa yo. Ntiana Yehova na Yezu tufweti tûlaka mabanza meto mu bifu bia mbote bia bantu, kani tatûlaka mo mu bifu biawu bia mbi.

15. Mu ntia mpila tifu tia banzaka misamu mie na muntu tilendi tu bakisila mu lembo mu fundisa mu mpila ya mbi?

¹⁵ Bu tukatula tifu tia tûlaka mabanza mu bifu bia mbote bia bantu, nti biakaka bilendi  tu bakisa mu lembo ba fundisaka mu mpila ya yibi? Yêla mu banza ka ntia mpila luzingu lwe nawu. Tabongeno tifwani. Lumbu timosi ku Tempelo Yezu wamona mufwiri wa mukento wa mputu weri tûlaka mipata miole mia fioti mu kese. Ka tâ ko ti: “Mu bungu dia nti katûriri kwa mbongo za fioti?” Kani katûla mabanza mandi mu mbongo za tûla mufwiri wo, Yezu watûla mabanza mandi mu misamu miatuma mufwiri wo na mu luzingu lwandi, mpe wamusîka mu bungu dia misamu mi kayirika.​—Like 21:1-4.

16. Nti lendi longoka mu tifwani tia Veronica?

¹⁶ Mu nzila ya tifwani tia Veronica tulendi bakula nsasa ya kipaka misamu mi bwabanaka na mpangi zeto. Mu timvuka tiawu, mweri nguri yimosi yeri kipaka mwana’andi wa bakala yandi kaka. Veronica têle ti: “Mbo ndieri monaka ti ka beri’â vulu bâka ku tukutakanu ko, mpe ka beri’â vulu samunaka ko. Mu bungu dia musamu wo, mbo ndieri ba bongelaka mu mpila ya mbi. Kâ, lumbu timosi bu nasamuna na mpangi yo ya yikento, wakumbagurila misamu mia mpasi mi kabwabanaka na mio na mwana’andi wa bakala we na timbevo tia mutu. Miamiansoni keri saka mu lungisa nsatu zawu za tinsuni na za timpeve. Ntangu zakaka mu bungu dia timbevo tia mwana’andi, mbo keri landaka lukutakanu mu timvuka tiakaka.” Veronica vutulu tâ: “Ka nazaba ko ti mpasi ni zo zeri nandi. Bwawu bu mbo  nisîkaka, mpe mbo nitomo zitisaka mpangi yo mu ngolo zi kasarilaka mu sarila Yehova.”

17. Ngano Zaki 2:8 ntia musamu yitutumaka mu sa, mpe bwe tulendi wa sila?

¹⁷ Nti tufweti sa tala ti tubakuri ti mpangi zeto tufundisaka? Tufweti bambukaka ti tufweti zolo mpangi zeto. (Tanga Zaki 2:8.) Tufweti mpesambila Yehova na bunsungu bwabwansoni mu mu lomba katubakisa mu lembo fundisaka bampwana’eto. Tulendi sala tintwari na tusambulu tweto bu tubonga nzengolo ya yôkesa ntangu na muntu wu tutsâlaka. Bu tusila bo, mbo tutomo kwizi mu zaba. Tulendi mu lomba tasamuna nandi peleko takabana tima tia dia. Bu tudinga mu tomo zaba mpangi’eto, mbo tuyêla mu landa tifwani tia Yehova na tia Yezu mu tala kwa bifu biandi bia mbote. Bu tusila bo, mbo tusongela ti ntumunu ya muvungi wa mbote tuta landa yitâka ti tabika mu fundisa.

18. Bwe tulendi songela ti zu dia muvungi wa mbote tuta wirikila?

¹⁸ Ntiana kwa bimeme biwirikilaka zu dia muvungi’awu, milongoki mia Yezu mpe mbo miwâka zu diandi. Tamana sarilaka ngolo mu lembo bâka na lwaka mu bungu dia bima bia tinsuni na mu lembo fundisaka bantu bakaka, Yehova na Yezu mbo basakumuna ngolo zeto. Ni bu tubâ mu “twila dia fioti” peleko mu “bimeme biakaka,” tatatamaneno mu wirikila na mu tumamana zu dia muvungi wa mbote. (Like 12:32; Za 10:11, 14, 16) Mu timoko tita landa, mbo tutaluzula bima biole bia tuma Yezu kwe milongoki miandi bi bafweti yirika.