1. Ino nceebonshi comwi cakapa kwaamba ayi Yesu akoshanishe bashikwiiya bakwe ku mbelele?

YESU wakakoshanisha bushicibusa bwakwe abashikwiiya bakwe kubushicibusa bwa mweembeshi a mbelele shakwe. (Joni 10:14) Uku nkweelanisha kweelela. Mbelele shilishi liswi lya mweembeshi wanshisho alimwi shilamunyumfwila. Musankwa umwi wakacibonaawo cancine ici. Wakaamba ayi: “Bamwi mbotwakalingaabo bakalinga kusuni kukopa mbelele shimwi aboobo bakalinga kweelesha kushibiinga kwaamba ayi shisene pafwiifwi. Sombi tashikwe kutukonkela mukwiinga tashakalinga kulishiiwo liswi lyesu. Lyalo mweembeshi musankwa wacanike ndyaakesabo akushiita shakamukonkela.”

2-3. (a) Ino bashikwiiya bakwe Yesu balatondesha buyani ayi balamunyumfwila? (b) Ino nshiinshi nsheshi twiiye mumutwi uyu autokonkelaawo?

² Musankwa ngotwaambawo nshaakabona shilatwiibalusha maswi Yesu ngakaamba pa mbelele shakwe na bashikwiiya bakwe ayi: “Shilaakunyumfwa liswi lyangu.” (Joni 10:16) Ano Yesu ali kwiculu, ino inga twamunyumfwila buyani? Tulatondesha ayi tulamunyumfwila na katucita shintu nshaakatwiisha.—Mate. 7:24, 25.

³ Mumutwi uyu alimwi autokonkelaawo, tulaakubandika makani amwi Yesu ngaakalinga kwiisha. Kweelana ambweshi twiiye, Yesu wakatwiisha ayi kuli shintu shimwi nshotweelete kucileka kucita ashimwi nshotweelete kucita. Cakutaanguna tutoobandika pashintu shobilo mweembeshi wesu mubotu nshaakatulwiita kucileka kucita.

4. Kweelana a Luka 12:29, ino nshiinshi sheenga shatupa ‘kunoolisukama’?

⁴ Amubelenge Luka 12:29. Yesu wakayuminisha bashikwiiya bakwe ayi “mutanoolisukama” pamakani akucana shintu nshemuyandika mubuumi. Tulishi kwaamba ayi Yesu lyoonse alaamba makani abusongo alimwi eelete. Tulisuni kukonkela nshaamba, sombi cimwi ciindi cilaba ciyumu kucita boobo. Ino nceebonshi?

5. Ino nciinshi ceenga capa bamwi kulisukama pamakani akucana shiyandika?

  ⁵ Bamwi inga balisukama ceebo cakuyeeya mbweenga bacana shintu shiyandika mbuli—shakulya, shakufwala, alimwi amusena kwakukala. Mpashi kucishi nkobakala bantu baanji mbapenshi alimwi nciyumu kucana ncito. Mpashi teshi cuubu kucana maali akwene kabotu kwaamba ayi balame mukwashi wabo. Na mpashi muntu wakalinga kucana maali akuula shiyandika mukwashi, wakafwa, aboobo mukwashi toocitewo maali akuula shintu shiyandika. Alimwi bantu baanji incito shakamana ceebo ca lipenshi lya bulwashi bwa COVID-19. (Shiku. 9:11) Ino maswi Yesu ngaakaamba ayi mutanoolisukama inga twaakonkela buyani na tutokwiinda mumapensho ali woonse paaya ngotwaambawo?

6. Amusansulule shakacitikila mutumwi Pita paciindi cimwi.

⁶ Paciindi cimwi, mutumwi Pita alimwi abatumwi bamwi bakalinga mu bwaato pa Lweenge lwa Galili ciindi ndyekwakesa cipuupu cinene. Lyalo bakabona Yesu kaeenda pamaanshi. Pita wakaamba ayi: “Nkambo, na ncakwiila ndimwe, amuŋambile ayi nse kuli ndimwe keensa ceenda pamaanshi.” Pesule lyakumulwiita ayi “kosa,” Pita wakaswa mubwaato “akutalika kweenda pamaanshi kuya kuli Yesu.” Ano amunyumfwe shakakonkelaawo. “Ono ndyaakabona maaba wakaloonda. Alimwi ndyaakatalika kuya bupila, wakoolobesha ayi: ‘Nkambo amumpulushe!’” Aboobo Yesu wakamucata kulyaansa akumupulusha. Ncintu ciyandika abuumbi kwiibaluka kwaamba ayi Pita wakacikonsha kweenda pamaanshi ndyaakatolelela kubikila maano kulanga kuli Yesu. Ano ndyaakatalikabo kulanga pamaaba, wakaloonda akutalika kuya bupila.—Mate. 14:24-31.

7. Ino nshiinshi nsheenga tweeya kucakubonenaako cakwe Pita?

⁷ Ino nshiinshi nsheenga tweeya kuswa kucakubonenaako cakwe Pita? Pita ndyaakalinga  kuswa mubwaato taakwe kuyeeyawo ayi inga walisukama ceebo cakubona maaba lyalo akutalika kuya bupila. Wakalinga kusuni kutolelela kweenda pamaanshi kuya kuli Yesu. Ano muciindi cakutolelela kubikila maano kulanga kuli Yesu, wakatalika kulisukama. Bweenka Pita mbwakalinga kuyandika lushomo kwaamba ayi atolelele kweenda pamaanshi, aswebo munshiku shino tulayandika lushomo kwaamba ayi tucikoonshe kuliyumya mumapensho. Na twacileka kubikila maano kuli Yehova alimwi ashishomesho shakwe, lushomo lwesu inga lwaboolela panshi, akutalika kuya bupila lwakumushimu. Aboobo nabi twiinde mumapensho anene buyani, tulyeelete kutolelela kubikila maano kuli Yehova alimwi akushoma munkusu shakwe shakutucafwa. Ino inga twacita buyani ubo?

8. Ino nciinshi ceenga catucafwa kutalisukama bunene pashintu nshetuyandika lwakumubili?

⁸ Muciindi cakulisukama ceebo camapensho ngotutokwiindaamo, tulyeelete kucinka manungo muli Yehova. Mutaluubi kwaamba ayi Ishiwesu shilusuno Yehova, watushomesha ayi alaakutupa nshetuyandika lwakumubili na katubika panembo shintu shakumushimu. (Mate. 6:32, 33) Yehova lyoonse alakumanisha shishomesho shakwe. (Duto. 8:4, 15, 16; Kulu. 37:25) Na Yehova alasanina tuyuni alimwi amaluba, nkokwaamba ayi tatweelete kulisukama pamakani ansheshi tulye na kufwala! (Mate. 6:26-30; Filip. 4:6, 7) Bweenka lusuno mbolupa kwaamba ayi mushali ubikila maano alangwete bana bakwe nshebayandika lwakumubili, lusuno lulalengesha kwaamba ayi Ishiwesu wakwiculu ape bantu bakwe nshebayandika lwakumubili. Ncakwiila inga twashoma cakutatoonsha kwaamba ayi Yehova alaakutulama!

9. Ino nshiinshi nsheenga tweeya kushakacitikila beebene bamwi?

⁹ Amuyeeye pacakucitika citokonkelaawo citondesha Yehova mbwaatulama lwakumubili. Beebene bamwi bakalinga muncito yaciindi coonse, bakeenda woola lyomwi amotoka yabo yakale kale kuya mukubwesa benankashi bakalinga kukala kumusena nkobasungila bantu bakacica kucishi cinemishaabo. Bakaya mukubwesa benankashi aba kwaamba ayi baye abo kumabungano. Mukwesu wakaamba ayi: “Pesule lyakubungana, twakeeta benankashi aba kucakulya, sombi twakesa mukwiibaluka kwaamba ayi tatucitewo shakulya shakubapa.” Ano ino beebene aba bakacita buyani? Mukwesu wakatolelela akwaamba ayi: “Ndyetwakashika kuŋanda twakacana shoola shobilo pamulyaango shiswite shakulya. Tatuna kushibawo na mbaani bakashileta. Yehova wakatulama.” Paciindi cimwi motoka ya beebene aba yakafwa. Njobakalinga kusebensesha muncito yakushimikila; nacibi boobo, tabakalinga kuciteewo maali akwilungishisha. Bakaitola kubeshikulungisha kwaamba ayi bashibe na inga kwayandika maali ongaye akubapa. Lyalo musankwa umwi wakesa mukwiipusha ayi: “Ino motoka iyi njabaani?” Lyalo mukwesu wakakumbula ayi njaakwe alimwi itoyandika kulungishikwa. Musankwa uyo wakaamba ayi: “Taapuwo lipenshi. Bakaangu balisuni motoka ya mushobo uyu alimwi icite mubala weenka mbuli wooyu. Inga mwangulisha shongaye?” Mukwesu wakoolisha motoka yakwe kumusankwa uyo maali akwene kuula motoka imwi. Mukwesu wakaamba ayi: “Twakakondwa abuumbi bushiku bulya. Twakeshiba kwaamba ayi ici tacakalinga coolwebo. Yehova ngowakatucafwa.”

10. Ino Kulumbaisha 37:5 ilatucafwa buyani kutalisukama pamakani anshetuyandika lwakumubili?

¹⁰ Na katunyumfwila mweembeshi wesu mubotu akucileka kulisukama abuumbi pashintu nshetuyandika lwakumubili, inga twashoma cakutatoonsha kwaamba ayi Yehova alaakutupa nshetuyandika. (Amubelenge Kulumbaisha 37:5; 1 Pit. 5:7) Amuyeeye pamapensho aambwa mu  palagilafu 5. Mpashi kushika apacecino ciindi, Yehova inga watucafwa kwiinda mukusebensesha mutwi wa mukwashi na munene wancito kwaamba ayi atucaafwe anshetuyandika bushiku abushiku. Na caba ayi mutwi wa mukwashi  atokwaalilwa kucana shiyandika mpashi ceebo ca ncito kumana, inga twashoma cakutatoonsha kwaamba ayi Yehova alaakucana nshila mbweenga watupa nshetuyandika. Amuleke tubandike cimwi mweembeshi wesu mubotu ncaakaamba ayi tatweelete kucita.

11. Kweelana a Mateyo 7:1, 2, ino Yesu wakaamba ayi tulyeelete kucileka kucita nshi, alimwi ino nceebonshi kucita boobo teshi cuubu?

¹¹ Amubelenge Mateyo 7:1, 2. Yesu wakalinga kucishi kwaamba ayi bantu tabamaninite alimwi liinji balisuni kubikila maano kushilubo sha bamwi. Nceceeco ncakaambila ayi: ‘Amucileeke koombolosha bamwi.’ Nabi tweelesha cankusu kwaamba ayi tutanobikila maano kushilubo sha bashominyinesu, liinji tulaalilwa. Ino nciinshi ncotweelete kucita na cimwi ciindi tulaamba shibiibi pabamwi? Nkunyumfwila Yesu, akusebensa cankusu kwaamba ayi tucileeke koombolosha bamwi.

12-13. Ino kukutumana kuyeeya Yehova mbwakalinga kubona Mwaami Defedi inga kwatucafwa buyani kutabikila maano kushilubo sha bamwi?

¹² Kukutumana kuyeeya pacakubonenaako cakwe Yehova inga kwatucafwa. Alabikila maano kushibotu nshaabona mubantu. Amuyeeyebo Yehova nshaakacita, Mwaami Defedi ndyaakacita shilubo shinene. Kucakubonenaako, wakacita bulale a Batisheba, alimwi akupa kwaamba ayi ibaye acaikwe. (2 Samwe. 11:2-4, 14, 15, 24) Ceebo ca shilubo Defedi nshaakacita, lakwe amukwashi wakwe bakapenga abuumbi, kwiilikaawo abamakaakwe bamwi. (2 Samwe. 12:10, 11) Paciindi cimwi, Defedi wakaalilwa kucinka manungo muli Yehova cakumaninina, aboobo wakabelenga basankwa bakalinga mulikoto lya bashilumamba ba bene Isilaeli, cintu Yehova ncatakwe kumulwiita kucita. Cilyeelete Defedi wakacita boobo ceebo cakulisumpula pakukomena kwa likoto lyakwe lya bashilumamba alimwi aceebo cakushoma lushitilisho kuswa kulikoto lya bashilumamba. Ano ino nshiinshi shakaswaamo? Bashilumamba mpashi bashika kuma 70,000 bakafwa ku mwaalu!—2 Samwe. 24:1-4, 10-15.

¹³ Nimwakalinga kukala mu Isilaeli paciindi cilya, naakwiinga mwakamubona buyani Defedi? Sa naakwiinga mwakayeeya ayi Yehova taeelete kumulekelela? Yehova taakwe kuyeeya boobo. Wakabikila maano kukushomeka kwakwe Defedi alimwi ambwakaana kuswa panshi lya moyo. Aboobo Yehova wakamulekelela Defedi pashilubo shinene nshaakacita. Yehova wakalinga kucishi ayi Defedi wakalinga kumusuni abuumbi alimwi wakalinga kusuni kucita shiluleme. Tulalumba abuumbi kwaamba ayi Yehova alabikila maano kumibo yesu ibotu alimwi ashintu nshetucita kabotu.—1 Baam. 9:4; 1 Maka. 29:10, 17.

14. Ino nciinshi cicafwa Beneklistu kutoombolosha bamwi?

¹⁴ Mukwiinga Yehova taatulangili kuba bamaninite, aswebo tatweelete kulangila bamwi kuba bamaninite. Aboobo tulyeelete kubikila maano kusheesho nshobacita kabotu. Liinji cilaba cuubu kulanga pashilubo sha bamwi akutalika kwaamba shibiibi pali mbabo. Nacibi boobo, muntu ukonkela cakubonenaako cakwe Yehova alasebensa kabotu abamwi nabi kwaamba ayi alishi shilubo shabo. Libwe lya diamondi taliboneki kabotu na ndyebalikababo, aboobo muntu musongo alicishi kwaamba ayi na lyaboteshekwa akutimbulwa kabotu ndibwe lya muulo unene abuumbi. Bweenka mbuli Yehova a Yesu tatweelete kubikila maano kushilubo sha bamwi sombi tulyeelete kulanga pasheesho nshobacita kabotu.

15. Ino nceebonshi kuyeeya pabukaalo bwa bantu inga kwatucafwa kutaamba shibiibi pali mbabo?

¹⁵ Kwiilika pakubikila maano kushintu shibotu bamwi nshobacita, ino nciinshi ceenga catucafwa kutabikila maano kushilubo shabo? Amweeleshe kuyeeya nshebatokwiindaamo mubuumi bwabo. Amuyeeye pacakubonenaako ici. Bushiku bumwi Yesu ndyaakalinga ku  tempele wakabona mwanakashi mukalubinje mukandu kaabika tumaali twa mukuba tobilo mucakubikamo maali. Taakwe kuliipusha ayi: “Ino nceebonshi wabikaamobo tumaali tobilo?” Muciindi cakubikila maano ku maali mukalubinje ngakabikaamo, Yesu wakayeeya cakapa mukalubinje ulya kubikaamo tumaali tobilobo alimwi ashintu mboshakalinga mubuumi bwakwe. Aboobo wakamulumba ceebo cakucita nshaakalinga kucikonsha.—Luka 21:1-4.

16. Ino nciinshi nceenga mweeya kushakacitikila nankashi Veronica?

¹⁶ Shakeendamo nankashi waliina lya Veronica shilatondesha kuyeeya bukaalo bamwi mbobatokwiindaamo ncokuyandikila. Wakalinga mulibungano mwakalinga mushali watakalinga kweebetwe, wakalinga kucite mwaana musankwa. Nankashi Veronica wakaamba ayi: “Kuli ndime cakalinga kuboneka anga liinji tabakalinga kucanika kumabungano alimwi akwaabanamo lubasu muncito yakushimikila. Ici cakapa kwaamba ayi ntanooyeeya shibotu pali mbabo. Ano bushiku bumwi ndakaya muncito yakushimikila a nankashi weenka uyu. Wakandwiita ayi mwanaakwe wakalinga kucite bulwashi bwa kuboongo. Wakalinga kweelesha kucita nsheenga wacikonsha kwaamba ayi acane shiyandika lwakumubili alimwi akutolelela kuyumya bushicibusa bwabo a Yehova. Cimwi ciindi wakalinga kubungana kulibungano limwi ceebo cabulwashi bwa mwanaakwe musankwa.” Mukweelaako nankashi Veronica wakaamba ayi: “Nshindakalinga kucishiwo mapensho ngobakalinga kwiindaamo. Aboobo pacecino ciindi ndimusuni alimwi ndamupa  bulemu nankashi uyu ceebo ca mbwaatosebensa cankusu kwaamba ayi acikoonshe kusebensela Yehova.”

17. Ino lilembo lyakwe Jemusi 2:8 lilatulwiita kucita nshi, alimwi ino inga twashikonkela buyani?

¹⁷ Ino nshiinshi nshotweelete kucita na twaboona kwaamba ayi tatwalinga kuyeeya shibotu pa mushominyineesu? Tulyeelete kwiibaluka kwaamba ayi tulyeelete kusuna bamakwesu. (Amubelenge Jemusi 2:8.) Alimwi cimwi ncotweelete kucita nkupaila camoyo woonse kuli Yehova kwaamba ayi atucaafwe kucileka kuyeeya shibiibi pabamwi. Inga twaciita kweelana akupaila kwesu kwiinda mukubandika amuntu ngotwalinga kuyeeyela shibiibi. Kucita boobo inga kwatupa coolwe cakumushiba kabotu. Inga twamusenga ayi tukasebense akwe muncito yakushimikila na kumwiitako kucakulya. Ndyetutooya cimushiba kabotu mukwesu, inga twakonkela cakubonenaako cakwe Yehova a Yesu kwiinda mukubikila maano kushintu nshaacita kabotu. Munshila iyi tulaakutondesha ayi tulanyumfwila nshaakatulwiita mweembeshi mubotu ayi amucileeke koombolosha bamwi.

18. Ino inga twatondesha buyani ayi tutoonyumfwila mweembeshi mubotu?

¹⁸ Bweenka mbuli mbelele mboshinyumfwila mweembeshi, bashikwiiya bakwe Yesu balamunyumfwila. Na katweelesha kutalisukama abuumbi pashintu nshetuyandika lwakumubili alimwi akucileka koombolosha bamwi, Yehova alimwi a Yesu balaakutupa shoolwe. Amuleke soonse tutolelele kukutika akunyumfwila mweembeshi mubotu. Inga caba ayi tuli lubasu lwa “litanga liniini” na “mbelele shimwi.” (Luka 12:32; Joni 10:11, 14, 16) Mumutwi utokonkelaawo, tulaakubandika shintu shobilo Yesu nshakaamba ayi bashikwiiya bakwe balyeelete kucita.