1. Aˬ htoꞈ ma te Yeˍsuˆ yawˇ ve awˬ laꞈ gʼawˇ yawˬ htaꞈ tehˆ taˍ ve le?

 Yeˍsuˆ yawˇ awˬ to leh awˬ laꞈ gʼawˇ hui htaꞈ yawˬ hawˉ shehˍ hpaˇ leh yawˬ htaꞈ tehˆ taˍ ve yoˬ. (Yoˇhanˬ 10:14) Yawˬ lehˬ awˬ shehˍ hpaˇ htaꞈ shiˍ leh awˬ shehˍ hpaˇ hkawˇ na ve pa taw, chi hkʼe tehˆ daꞈ ve keunˍ jaˇ. Guiˇ toˇ ve chaw teˇ gʼaˇ kʼoˆ ve, “teˇ pawˆ htaˇ ngaˬ yawˬ htaꞈ awˬ han htawˍ gaˇ ve yoˬ. Yawˬ awˬ paˇ lo laˬ tuˬ kuˬ piˇ ve yoˬ. Yaꞈ hkʼaˇ, yawˬ ngaˬ ve hkawˇ htaꞈ maˇ shiˍ ve pa taw, ngaˬ paˇ lo maˇ laˬ. Leh yawˬ hawˉ shehˍ hpaˇ teˇ gʼaˇ laˬ htaˇ yawˬ htaꞈ kuˬ piˇ ve teˇ yanˇ yawˬ oˇ ve teˇ hpaˍ kaꞈ yawˇ geh laꞈ haˉ kʼai ve yoˬ.”

2-3. (a) Yeˍsuˆ ve awˬ laꞈ gʼawˇ yawˇ ve hkawˇ hkʼaˬ hkʼe te na yuˬ gʼa tuˬ le? (b) Awˬ lawn chi ve hkʼaw leh gʼuˇ suhˍ teˇ lawn hkʼaw ngaˬ hui aˬ htoꞈ ma htaꞈ henˇ tuˬ le?

² Guiˇ toˇ ve chaw oˇ ve teˇ gʼaˇ gʼa hpuˇ ve awˬ ceuˬ ngaˬ hui Yeˍsuˆ ve tawˇ hkawˇ htaꞈ dawˇ nyi tuˬ te laˇ ve yoˬ. Yeˍsuˆ yawˇ ve awˬ laꞈ gʼawˇ yawˬ htaꞈ shuˍ ve tehꞈ kʼoˆ ve yoˬ. Oˇ kaˬ lo kʼoˆ ve, ‘yawˬ oˇ ve teˇ hpaˍ ngaˬ ve hkawˇ htaꞈ na yuˬ tuˬ yoˬ.’ (Yoˇhanˬ 10:16) Yaꞈ hkʼaˇ, chi teˇ hkui Yeˍsuˆ mvuhˇ naw ma hkʼoˆ chehˇ ve yoˬ. Ngaˬ hui hkʼaˬ hkʼe te yawˇ ve tawˇ hkawˇ na yuˬ gʼa tuˬ le? Ngaˬ hui yawˇ ve tawˇ hkawˇ na yuˬ gʼa tuˬ ve lehˬ, yawˇ maˍ ve awˬ ceuˬ htaꞈ gʼaꞈ te ve yoˬ.—Maꞈhtehˍ 7:24, 25.

³ Chi ve teˇ lawn leh gʼuˇ suhˍ teˇ lawn hkʼaw Yeˍsuˆ maˍ ve teˇ lawn lawn htaꞈ ngaˬ hui teˇ geh henˇ tuˬ yoˬ. Yeˍsuˆ ngaˬ hui htaꞈ aˬ htoꞈ ma te tcuh laˇ ve leh maˇ te tcuh laˇ ve teˇ geh henˇ tuˬ yoˬ. Awˉ lawˉ htaˇ daꞈ ve yawˬ hawˉ shehˍ hpaˇ ngaˬ hui htaꞈ maˇ te tcuh laˇ ve htaꞈ caˉ daꞈ ve 2 lawn htaꞈ teˇ geh henˇ tuˬ yoˬ.

4. Luˉkaꞈ liꞈ 12:29 hkʼaw kʼoˆ taˍ ve hkʼe, ngaˬ hui “dawˇ hkiˉ” tuˬ aˬ htoꞈ ma te laˇ ve le?

⁴ Luˉkaꞈ liꞈ 12:29 gʼaw sheˍ. Yeˍsuˆ yawˇ ve awˬ laꞈ gʼawˇ htaꞈ kʼoˆ  piˇ ve, a shaꞈ teꞈ kuiˬ hkʼaw loˍ ve awˬ ceuˬ htaꞈ “dawˇ hkiˉ ve nyi ma kaꞈ taˇ cawˬ piˇ.” Yeˍsuˆ beˆ maˍ laˇ ve awˬ ceuˬ lehˬ, cuˇ yiˍ cawˬ leh hkʼaˬ htaˆ kaꞈ cawˇ ve tehꞈ ngaˬ hui shiˍ ve yoˬ. Leh ngaˬ hui kaꞈ yawˇ beˆ maˍ laˇ ve htaꞈ gʼaꞈ te gaˇ ve yoˬ. Yaꞈ hkʼaˇ, teˇ pawˆ pawˆ sha ve maˇ heˆ. Aˬ htoꞈ ma htaꞈ pa taw le?

5. Aˬ htoꞈ ma te chaw teˇ hpaˍ hpaˍ a shaꞈ teꞈ kuiˬ hkʼaw loˍ ve awˬ ceuˬ htaꞈ dawˇ hkiˉ ve le?

 ⁵ Chaw teˇ hpaˍ hpaˍ a shaꞈ teꞈ kuiˬ hkʼaw loˍ ve awˬ ceuˬ, caˇ tuˬ, veuꞈ kʼaˇ, leh chehˇ kuiˬ, chi ve teˇ hpaˍ cawˬ tuˬ laˇ tehꞈ dawˇ hkiˉ ve yoˬ. Chi hkʼe dawˇ hkiˉ ve lehˬ yawˇ hui haˍ gʼawˇ ve mvuhˇ miˬ lo chehˇ leh yawˇ awˬ to leh yehˬ kʼa htaꞈ hu tuˬ hpu maˇ lawꞈ ve pa taw yoˬ. Yehˬ kʼa teˇ hpaˍ hpaˍ hkʼaw kʼo, hpu teˇ gʼaˇ tiˉ ca ve yoˬ. Yehˬ kʼa hkʼaw hpu ca ve chaw suh˗e ve kʼo, hpu gʼa hkʼaˇ maˇ cawˬ˗oˬ. Leh a naˍ 19 ve awˬ yanˇ htaˇ laiˉ gʼaˇ kanˉ maˇ gʼa te˗o leh hpu kaꞈ maˇ gʼa˗o. (Cuˇ yiˍ piˇ ve 9:11) Chaw chi teˇ hpaˍ hkʼa shuˍ leh awˬ nu ve shoꞈ shaꞈ ve ngaˬ hui gʼa hpuˇ ve kʼo, Yeˍsuˆ beˆ maˍ laˇ ve dawˇ hkiˉ ve nyi ma kaꞈ taˇ cawˬ piˇ tehꞈ kʼoˆ ve htaꞈ ngaˬ hui hkʼaˬ hkʼe gʼaꞈ te gʼa tuˬ le?

6. Peˍtruˆ aˬ htoꞈ ma gʼa hpuˇ ve le?

⁶ Teˇ pawˆ htaˇ Peˍtruˆ leh awˬ nu ve tcuh yaˇ hui Gaˍliˍlehˇ gʼuiˬ po lo haw loꞈ kʼoˍ gʼawˆ kʼai chehˇ htaˇ, mvuhˇ haw lonˉ laˬ ve yoˬ. Yawˇ hui nyi peuˬ htaˇ, Yeˍsuˆ iˉ kaˆ hkʼoˆ lo juˇ laˬ chehˇ ve htaꞈ gʼa mawˬ ve yoˬ. Peˍtruˆ kʼoˆ ve, “Jawˇmawˇ˗oˬ, nawˬ yoˬ kʼo, iˉ kaˆ awˬ hkʼoˆ ngaˬ htaꞈ nawˬ geh laˬ tcuh laˇ˗oˆ.” Leh Yeˍsuˆ kʼoˆ piˇ ve “laˬ˗oꞈ.” Peˍtruˆ haw loꞈ kʼoˍ hkʼaw tawˆ˗e leh iˉ kaˆ hkʼoˆ Yeˍsuˆ geh juˇ kʼai ve yoˬ. Yaꞈ hkʼaˇ, peuˬ hkʼawꞈ nawˉ hkʼaˬ hkʼe hpehꞈ la ve le? Peˍtruˆ “mvuhˇ haw hehnˇ jaˇ ve htaꞈ yawˇ gʼa mawˬ htaˇ, kawˆ jaˇ ve yoˬ. Yawˇ iˉ kaˆ awˬ hkʼaw lo tuˍ loꞈ˗e chehˇ ve teˇ yanˇ, Jawˇmawˇ˗oˬ, htaiˍ hkʼawꞈ laˇ˗oˆ” tehꞈ kʼoˆ ve yoˬ. Hkʼe te leh, Yeˍsuˆ Peˍtruˆ ve laꞈ sheh htaꞈ gʼawˬ leh ga piˇ ve yoˬ. Peˍtruˆ Yeˍsuˆ htaꞈ nyi peuˬ leh yawˇ iˉ kaˆ hkʼoˆ juˇ kʼai gʼa ve tehꞈ ngaˬ hui hkʼa tawˍ lehˆ gʼa mawˬ ve yoˬ. Yaꞈ hkʼaˇ, yawˇ mvuhˇ  haw htaꞈ gʼa mawˬ htaˇ, kawˆ leh iˉ kaˆ hkʼaw tuˍ loꞈ˗e ve yoˬ.—Maꞈhtehˍ 14:24-31.

7. Peˍtruˆ ve awˬ lawn ngaˬ hui htaꞈ aˬ htoꞈ ma maˍ laˇ ve le?

⁷ Peˍtruˆ haw loꞈ kʼoˍ hkʼaw juˇ tawˆ˗e htaˇ, yawˇ mvuhˇ haw lonˉ htaꞈ maˇ kawˆ leh iˉ kaˆ hkʼaw tuˍ loꞈ˗e tuˬ yoˬ tehꞈ maˇ dawˇ. Yawˇ Yeˍsuˆ geh juˇ kʼai gaˇ ve yoˬ. Yaꞈ hkʼaˇ, yawˇ Yeˍsuˆ htaꞈ tiˉ maˇ nyi. Chi beuꞈ teˇ co˗e ngaˬ hui iˉ kaˆ hkʼoˆ juˇ kʼai maˇ gʼa ve htawˇ, ngaˬ hui ve yonˍ hkʼaˇ htaꞈ lawˇ nyi laˇ ve gʼa hpuˇ ve yoˬ. Yaˬhoˉvaˬ leh yawˇ ka tiꞈ te taˍ laˇ ve htaꞈ ngaˬ hui hkʼaˬ htaˆ kaꞈ maˇ nyi ve kʼo, ngaˬ hui ve dawˇ haˍ dawˇ hkiˉ ve htaꞈ tiˉ dawˇ nyi chehˇ ve yoˬ. Chi htaꞈ pa taw, ngaˬ hui ve a shaꞈ teꞈ kuiˬ hkʼaw shoꞈ shaꞈ ve hkʼaˬ hkʼe taw gʼa hpuˇ ve htawˇ, Yaˬhoˉvaˬ htaꞈ hkʼaˬ htaˆ kaꞈ nyi leh yawˇ ngaˬ hui htaꞈ ga laˇ gʼa ve tehꞈ yonˍ gʼa ve yoˬ. Yaꞈ hkʼaˇ, chi hkʼe ve ngaˬ hui hkʼaˬ hkʼe te gʼa tuˬ le?

8. A shaꞈ teꞈ kuiˬ hkʼaw ngaˬ hui loˍ ve awˬ ceuˬ htaꞈ maˇ dawˇ haˍ jaˇ tuˬ aˬ htoꞈ ma ga laˇ gʼa ve le?

⁸ Ngaˬ hui shoꞈ shaꞈ ve htaꞈ dawˇ haˍ ve aꞈ kehˉ Yaˬhoˉvaˬ htaꞈ gʼaˇ hkʼa dehꞈ va sheˍ. Ngaˬ hui a shaꞈ teꞈ kuiˬ hkʼaw Yaˬhoˉvaˬ htaꞈ a yeˇ uiˍ jaˇ tehꞈ shawˍ ve kʼo, Yaˬhoˉvaˬ lehˬ ngaˬ hui loˍ ve awˬ ceuˬ htaꞈ peꞈ laˇ tuˬ yoˬ tehꞈ ka tiꞈ te taˍ laˇ ve htaꞈ tawnˇ taˍ sheˍ. (Maꞈhtehˍ 6:32, 33) Yaˬhoˉvaˬ lehˬ ka tiꞈ te taˍ ve hkʼe gʼaꞈ te ve yoˬ. (Bon maˍ ve 8:4, 15, 16; Chiˇ mvuh ve 37:25) Yaˬhoˉvaˬ lehˬ ngaˆ leh suhˉ veˆ htaꞈ nyi haꞈ shaˉ piˇ ve kʼo, ngaˬ hui veuꞈ kʼaˇ leh caˇ tuˬ cawˬ tuˬ Yaˬhoˉvaˬ nyi haꞈ shaˉ laˇ gʼa ve tehꞈ yonˍ gʼa ve yoˬ. (Maꞈhtehˍ 6:26-30; Hpiˇliˇpiˆ 4:6, 7) Awˬ pa awˬ e yaˇ htaꞈ haꞈ leh yaˇ a shaꞈ teꞈ kuiˬ hkʼaw loˍ ve awˬ ceuˬ nyi haꞈ shaˉ piˇ ve hkʼe, Yaˬhoˉvaˬ ngaˬ hui htaꞈ haꞈ leh ngaˬ hui a shaꞈ teꞈ kuiˬ hkʼaw loˍ ve awˬ ceuˬ hkʼaˬ htaˆ kaꞈ yawˇ nyi haꞈ shaˉ laˇ tuˬ yoˬ tehꞈ yonˍ gʼa ve yoˬ.

9. Awˬ viˉ awˬ nyi teˇ ca Gʼuiˬ sha ve kanˉ awˬ yanˇ hkʼa biˇ te ve awˬ lawn nawˬ htaꞈ hkʼaˬ hkʼe maˍ laˇ ve le?

⁹ Yaˬhoˉvaˬ lehˬ ngaˬ hui loˍ ve awˬ ceuˬ teˇ hpaˍ htaꞈ peꞈ laˇ tuˬ yoˬ tehꞈ awˬ lawn teˇ lawn htaꞈ teˇ geh nyi sheˍ. Awˬ viˉ awˬ nyi Gʼuiˬ sha ve kanˉ awˬ yanˇ hkʼa biˇ te ve teˇ ca yawˇ hui kaˇ awˬ piˍ teˇ hkeh cawˬ ve yoˬ. Awˬ viˉ awˬ nyi yaˇ miˇ teˇ hpaˍ chaw hpaw hkʼoˇ chehˇ kuiˬ lo chehˇ ve hpawnˬ daꞈ kuiˬ lo laˬ tuˬ, yawˇ hui ca gʼawˬ˗e ve kaˇ teˇ naˍ riˍ hpaˆ gʼa gʼaꞈ kʼai ve yoˬ. Awˬ hpawˇ kʼoˆ ve, “hpawnˬ daꞈ ve peuˬ hkʼawꞈ nawˉ awˬ viˉ awˬ nyi yaˇ miˇ ngaˬ hui ve aˉ hkʼaw lo awˍ caˇ la tuˬ jehˬ piˇ ve yoˬ. Yaꞈ hkʼaˇ, ngaˬ hui yawˇ hui htaꞈ caˍ piˇ tuˬ teꞈ chiˉ maˇ cawˬ tehꞈ dawˇ nawˇ la ve yoˬ. Leh ngaˬ hui hkʼaˬ hkʼe te tuˬ le?” Awˬ hpawˇ kʼawꞈ kʼoˆ ve, “ngaˬ hui aˉ hkʼaw lo gaˬ˗e htaˇ yehˬ gʼuˇ suhˍ lo caˇ tuˬ teh taˍ laˇ ve htaꞈ gʼa mawˬ ve yoˬ. A shu teh˗aˉ laˇ ve naˍ ngaˬ hui maˇ shiˍ. Yaꞈ hkʼaˇ, ngaˬ hui shiˍ ve lehˬ Yaˬhoˉvaˬ nyi haꞈ shaˉ laˇ ve yoˬ.” Peuˬ hkʼawꞈ nawˉ yawˇ hui ve kaˇ paˆ˗e ve yoˬ. Kaˇ chi yehˇ leh yawˇ hui Gʼuiˬ sha ve kanˉ te ve yoˬ. Kaˇ chi gʼa gu cawˇ ve tehꞈ yawˇ hui shiˍ ve htawˇ, gu tuˬ hpu maˇ lawꞈ. Kaˇ chi gu tuˬ awˬ hpfuhˇ hkʼaˬ hkʼe ma peuˬ tuˬ yawˇ hui ve yehˬ awˬ paˇ lo kaˇ gu kuiˬ ca na nyi tuˬ, awˬ viˉ awˬ nyi hawˉ hkʼaˆ dawˇ cheˆ ve yoˬ. Hawˉ hkʼaˆ teˇ gʼaˇ yawˇ geh laˬ leh na laˇ ve, “kaˇ chi a shu ve le?” Awˬ hpawˇ kʼawꞈ kʼoˆ ve, “chi ngaˬ ve kaˇ yoˬ.” Yaꞈ hkʼaˇ, gʼa gu cawˇ ve yoˬ. Hawˉ hkʼaˆ oˇ ve teˇ gʼaˇ kʼoˆ ve, “teꞈ chiˉ maˇ heˆ. Kaˇ chi hkʼe ve leh awˬ sheuˉ chi hkʼe ve htaꞈ ngaˬ miˇ ma dawˇ cawˇ ve yoˬ. Kaˇ chi ve nawˬ hkʼaˬ ma hawˇ gaˇ ve le?” Awˬ viˉ awˬ nyi Gʼuiˬ sha ve kanˉ te tuˬ kaˇ kʼawꞈ vuiˬ tuˬ hpu lawꞈ ve yoˬ. Awˬ viˉ awˬ nyi hawˉ hkʼaˆ kʼoˆ ve, “chi ve ngaˬ ha lehˬ jaˇ leh hkʼaˬ hkʼe kʼoˆ tuˬ maˇ shiˍ. Yaꞈ hkʼaˇ, chi ve maˇ dawˇ maˇ gaˇ ve hkʼaw hpehꞈ la ve maˇ heˆ. Yaˬhoˉvaˬ ngaˬ hui htaꞈ awˬ tehˬ awˬ na nyi haꞈ shaˉ laˇ ve yoˬ.”

10. Chiˇ mvuh ve liꞈ 37:5 hkʼaw ngaˬ hui a shaꞈ teꞈ kuiˬ hkʼaw loˍ ve awˬ ceuˬ htaꞈ maˇ dawˇ haˍ dawˇ hkiˉ jaˇ tuˬ hkʼaˬ hkʼe ga laˇ ve le?

¹⁰ Daꞈ ve yawˬ hawˉ shehˍ hpaˇ hkawˇ ngaˬ hui na leh a shaꞈ teꞈ kuiˬ hkʼaw loˍ ve awˬ ceuˬ htaꞈ maˇ dawˇ haˍ dawˇ hkiˉ ve kʼo, Yaˬhoˉvaˬ ngaˬ hui htaꞈ nyi haꞈ shaˉ laˇ tuˬ yoˬ tehꞈ yonˍ gʼa ve yoˬ. Ponˬ laˬ htaˇ Yaˬhoˉvaˬ lehˬ, yehˬ shehˍ hpaˇ maˇ heˆ leh paw leˍ htaꞈ cuˇ leh ngaˬ hui a shaꞈ teꞈ kuiˬ hkʼaw loˍ ve awˬ ceuˬ ga laˇ tcuh ve yoˬ. (Chiˇ mvuh ve 37:5 gʼaw sheˍ; 1 Peˍtruˆ 5:7) Awˬ gʼuˇ suhˍ hpawˇ ngaˬ hui kaꞈ  awˬ tawn 5 hkʼaw kʼoˆ ve hkʼe gʼa hpuˇ ve kʼo, yehˬ  shehˍ hpaˇ yehˬ kʼa hkʼaw loˍ ve awˬ ceuˬ maˇ nyi haꞈ shaˉ piˇ gʼa ve maˇ heˆ leh ngaˬ hui kanˉ maˇ gʼa te˗o htaˇ, Yaˬhoˉvaˬ awˬ nu ve awˬ hkʼaˇ htaꞈ yehˇ leh ngaˬ hui htaꞈ nyi haꞈ shaˉ laˇ tuˬ yoˬ. Yaˬhoˉvaˬ ngaˬ hui htaꞈ awˬ tehˬ awˬ na nyi haꞈ shaˉ laˇ tuˬ yoˬ tehꞈ yonˍ gʼa ve yoˬ. Daꞈ ve yawˬ hawˉ shehˍ hpaˇ lehˬ, ngaˬ hui htaꞈ aˬ htoꞈ ma maˇ te tcuh gaˇ ve teˇ geh kʼawꞈ henˇ tuˬ yoˬ.

11. Maꞈhtehˍ liꞈ 7:1, 2 hkʼaw kʼoˆ taˍ ve hkʼe, Yeˍsuˆ ngaˬ hui htaꞈ aˬ htoꞈ ma maˇ te tuˬ kʼoˆ laˇ ve le? Leh aˬ htoꞈ ma te chi hkʼe maˇ te tuˬ maˇ sha ve le?

¹¹ Maꞈhtehˍ liꞈ 7:1, 2 gʼaw sheˍ. Ngaˬ hui maˇ biˇ ve chaw hpehꞈ ve tehꞈ Yeˍsuˆ shiˍ ve yoˬ. Ngaˬ hui shu ve yaꞈ kuiˬ htaꞈ tiˉ nyi ve yoˬ. Chi htaꞈ pa taw Yeˍsuˆ kʼoˆ ve, “shu htaꞈ venˇ baˆ taˇ taˍ.” Yaꞈ hkʼaˇ, ngaˬ hui chi hkʼe maˇ te tuˬ sha ve maˇ heˆ tehꞈ shiˍ ve yoˬ. Chi htaꞈ pa taw, teˇ pawˆ pawˆ awˬ viˉ awˬ nyi htaꞈ maˇ daꞈ ve hpawˇ kʼoˆ ve kʼo, ngaˬ hui hkʼaˬ hkʼe te cawˇ ve le? Ngaˬ hui Yeˍsuˆ hkawˇ na leh shu htaꞈ venˇ baˆ maˇ gʼa taˍ tuˬ gʼa coˇ caˇ ve yoˬ.

12-13. Yaˬhoˉvaˬ Daˍviˆ htaꞈ te piˇ ve awˬ hkʼaˇ ngaˬ hui shu htaꞈ venˇ baˆ maˇ gʼa taˍ tuˬ hkʼaˬ hkʼe ga laˇ ve le?

¹² Yaˬhoˉvaˬ ve awˬ lawn htaꞈ ngaˬ hui dawˇ nyi htaˇ awˬ bon gʼa ve yoˬ. Yaˬhoˉvaˬ ngaˬ hui ve daꞈ ve awˬ ceuˬ htaꞈ hkʼaˬ htaˆ kaꞈ nyi ve yoˬ. Jawˇmawˇ Daˍviˆ ve awˬ lawn htaꞈ ngaˬ hui mawˬ gʼa ve yoˬ. Daˍviˆ venˇ baˆ uiˍ jaˇ ve laiˉ ceuˬ htaꞈ te yaꞈ ve yoˬ. Oˇ ve lehˬ yawˇ Baˍtaˍsheˍbaˆ htaꞈ haˉ chawˇ te leh yawˇ ve awˬ hpawˇ htaꞈ maꞈ bawˆ kuiˬ hkʼaw suh˗e tcuh ve yoˬ. (2 Saˍmo˗eˍlaˆ 11:2-4, 14, 15, 24) Daˍviˆ yawˇ awˬ to ceh tiˉ nyi ma naˬ tuˬ te ve maˇ heˆ. Yawˇ ve awˬ miˇ ma teˇ hpaˍ, leh yehˬ kʼa hkʼaw ve chaw kaꞈ nyi ma naˬ tuˬ te piˇ ve yoˬ. (2 Saˍmo˗eˍlaˆ 12:10, 11) Teˇ pawˆ htaˇ Daˍviˆ yawˇ Yaˬhoˉvaˬ htaꞈ gʼaˇ hkʼa dehꞈ maˇ va ve tehꞈ hpeuꞈ maw laˇ ve yoˬ. Yawˇ maꞈ yaˇ hkʼa peu˗eˬ htaꞈ gʼaw nyi tuˬ tawˇ piˇ ve yoˬ. Daˍviˆ chi hkʼe te ve lehˬ, yawˇ maꞈ moˍ lonˉ cawˬ ve htaꞈ nyi hkʼaˇ suh ve pa taw yoˬ. Yawˇ chi hkʼe te ve lehˬ Iˉsaˍreˍlaˆ chaw aˬ laˬ hkʼe 70,000 gʼaˇ naˬ beuˬ htaꞈ pa taw gʼa suh˗e ve yoˬ!—2 Saˍmo˗eˍlaˆ 24:1-4, 10-15.

¹³ Nawˬ oˇ htaˇ teˇ co˗e Iˉsaˍreˍlaˆ chaw ve awˬ moˍ hkʼaw chehˇ ve kʼo, jawˇ mawˇ Daˍviˆ htaꞈ hkʼaˬ hkʼe dawˇ tuˬ le? Daˍviˆ lehˬ Yaˬhoˉvaˬ ha kʼaˉ piˇ ve htaꞈ maˇ gʼa keunˍ ve tehꞈ nawˬ dawˇ˗aw laˇ? Yaꞈ hkʼaˇ, Yaˬhoˉvaˬ chi hkʼe maˇ dawˇ. Ponˬ laˬ htaˇ Daˍviˆ hkʼaˬ htaˆ kaꞈ ka tiꞈ yeˬ ve tehꞈ Yaˬhoˉvaˬ a yeˇ yuˬ piˇ leh yawˇ awˬ tehˬ awˬ na venˇ baˆ dawˇ hpfuhˆ ve tehꞈ gʼa mawˬ ve yoˬ. Hkʼe te leh, Daˍviˆ venˇ baˆ uiˍ jaˇ ve nyiˇ pawˆ te yaꞈ ve htaꞈ Yaˬhoˉvaˬ venˇ baˆ hpehˇ piˇ ve yoˬ. Daˍviˆ Yaˬhoˉvaˬ htaꞈ haꞈ leh cawˇ ve htaꞈ te gaˇ ve tehꞈ Yaˬhoˉvaˬ shiˍ ve yoˬ. Yaˬhoˉvaˬ lehˬ ngaˬ hui awˬ to hkʼaw daꞈ ve awˬ ceuˬ htaꞈ ceh tiˉ nyi ve awˬ bon uiˍ jaˇ.—1 Jawˇmawˇ 9:4; 1 Raˍsaˍvanˍ 29:10, 17.

14. Hkriꞈ yaˇ shu htaꞈ venˇ baˆ maˇ gʼa taˍ tuˬ aˬ htoꞈ ma ga laˇ ve le?

¹⁴ Ngaˬ hui biˇ ve chaw hpehꞈ ve tehꞈ Yaˬhoˉvaˬ maˇ dawˇ law. Hkʼe te leh, awˬ nu ve chaw kaꞈ biˇ ve chaw hpehꞈ ve tehꞈ ngaˬ hui maˇ dawˇ law cawˇ. Yawˇ daꞈ ve awˬ ceuˬ htaꞈ ngaˬ hui nyi cawˇ ve yoˬ. Maˇ˗awˍ ve kʼo, awˬ nu ve chaw maˇ daꞈ ve awˬ ceuˬ htaꞈ ngaˬ hui nyi leh maˇ daꞈ ve hpawˇ kʼoˆ tuˬ sha jaˇ. Yaˬhoˉvaˬ htaꞈ henˇ yuˬ ve chaw lehˬ, awˬ nu ve chaw yaꞈ kuiˬ cawˬ ve htaꞈ shiˍ ve htawˇ awˬ chawˇ te gʼa ve yoˬ. Shehnˉ shiˍ maˇ htu baˬ sheˍ htaˇ lehˬ nyi˗a kʼo, maˇ daꞈ. Yaꞈ hkʼaˇ, awˬ hpfuhˇ htaꞈ shiˍ ve chaw lehˬ chi hkʼe maˇ nyi. Shehnˉ shiˍ oˇ ve htu baˬ peuˬ hkʼawꞈ nawˉ, daꞈ jaˇ leh awˬ hpfuhˇ hkʼaˆ jaˇ ve tehꞈ yawˇ shiˍ ve yoˬ. Chi ve hkʼa shuˍ shuˍ, ngaˬ hui Yaˬhoˉvaˬ leh Yeˍsuˆ htaꞈ henˇ yuˬ ve kʼo, awˬ nu ve chaw hkʼaˬ hkʼe hpehꞈ ve htaꞈ ngaˬ hui mawˬ ve awˬ ceuˬ htaꞈ ceh tiˉ maˇ dawˇ cheˆ piˇ. Yaꞈ hkʼaˇ, yawˇ daꞈ ve awˬ ceuˬ htaꞈ ngaˬ hui nyi ve yoˬ.

15. Awˬ nu ve chaw a shaꞈ teꞈ hkʼaˇ hkʼaˬ hkʼe hpehꞈ ve htaꞈ ngaˬ hui shiˍ htaˇ, yawˇ htaꞈ maˇ dawˇ cheˆ piˇ leh maˇ daꞈ ve hpawˇ maˇ kʼoˆ tuˬ hkʼaˬ hkʼe ga laˇ ve le?

¹⁵ Awˬ nu ve chaw ve daꞈ ve awˬ ceuˬ htaꞈ nyi ve awˬ hkʼoˆ kaꞈ, yawˇ htaꞈ maˇ dawˇ cheˆ piˇ leh maˇ daꞈ ve hpawˇ maˇ kʼoˆ tuˬ ngaˬ hui htaꞈ hkʼaˬ hkʼe ga laˇ gʼa sheˍ ve le? Yawˇ ve a shaꞈ teꞈ hkʼaˇ hkʼaˬ  hkʼe hpehꞈ ve htaꞈ ngaˬ hui dawˇ nyi sheˍ. Yeˍsuˆ bon yehˬ lonˉ hkʼaw kʼai htaˇ, haˍ gʼawˇ jaˇ ve mehˇ chawˇ ma pehꞈ shanˍ ehˉ nyiˇ pehꞈ hpu tanˇ keu kuiˬ hkʼaw keu chehˇ ve Yeˍsuˆ gʼa mawˬ ve htaꞈ dawˇ nyi sheˍ. Aˬ htoꞈ ma te mehˇ chawˇ ma chi teˇ gʼaˇ hpu chi aꞈ kehˉ keu cawˇ ve le tehꞈ Yeˍsuˆ maˇ gʼa kʼoˆ. Mehˇ chawˇ ma hpu tanˇ hkʼaˬ hkʼe ma keu ve htaꞈ yawˇ a yeˇ maˇ te. Mehˇ chawˇ ma ve nyi ma leh a shaꞈ teꞈ hkʼaˇ hkʼaˬ hkʼe hpehꞈ ve htaꞈ yawˇ nyi ve yoˬ.—Luˉkaꞈ 21:1-4.

16. Ve˗lo˗ne˗kaˇ ve awˬ lawn htaꞈ nawˬ aˬ htoꞈ ma henˇ yuˬ gʼa ve le?

¹⁶ Shu ve a shaꞈ teꞈ hkʼaˇ hkʼaˬ hkʼe hpehꞈ ve htaꞈ ngaˬ hui na gʼa tuˬ a yeˇ uiˍ jaˇ ve tehꞈ Ve˗lo˗ne˗kaˇ ve awˬ lawn htaꞈ teˇ geh nyi sheˍ. Ve˗lo˗ne˗kaˇ chehˇ ve Hkriꞈ yaˇ awˬ moˍ hkʼaw mehˇ chawˇ ma cawˬ leh yawˇ yaˇ paˍ teˇ gʼaˇ cawˬ ve yoˬ. Ve˗lo˗ne˗kaˇ kʼoˆ ve, “awˉ lawˉ htaˇ awˬ viˉ awˬ nyi yaˇ miˇ chi teˇ gʼaˇ htaꞈ ngaˬ maˇ daꞈ ve hpawˇ dawˇ ve yoˬ. Awˬ lawn kʼo, yawˇ leh yawˇ ve yaˇ paˍ hpawnˬ daꞈ ve leh hto toˇ ve hkʼa dehꞈ maˇ laˬ. Yaꞈ hkʼaˇ, teˇ nyi htaˇ ngaˬ yawˇ geh teˇ geh hto toˇ˗e leh yawˇ ve yaˇ paˍ awˬ nu ve yaˇ htaꞈ maˇ shuˍ ve tehꞈ kʼoˆ maˍ laˇ ve yoˬ. Yawˇ ve yaˇ paˍ htaꞈ nyi haꞈ shaˉ leh yawˇ huiˉ maˬ Yaˬhoˉvaˬ geh meuˆ daꞈ tuˬ gʼa coˇ caˇ jaˇ. Yawˇ maˇ gʼa hpawnˬ daꞈ la ve lehˬ, yaˇ paˍ maˇ chehˇ sha ve pa taw yoˬ. Teˇ pawˆ pawˆ awˬ nu ve Hkriꞈ yaˇ awˬ moˍ hkʼaw hpawnˬ daꞈ˗e ve yoˬ.” Ve˗lo˗ne˗kaˇ kʼoˆ ve, “awˬ viˉ awˬ nyi chi teˇ gʼaˇ chi hkʼe taw taw tuꞈ ve ngaˬ maˇ dawˇ nyi jaw. Chi teˇ hkui ngaˬ yawˇ htaꞈ haꞈ leh yawˆ yan ve yoˬ. Yawˇ Yaˬhoˉvaˬ ve kanˉ te gʼa ve hkʼe te ve yoˬ.”

17. Yaˍkoˆ liꞈ 2:8 hkʼaw ngaˬ hui htaꞈ aˬ htoꞈ ma te tuˬ kʼoˆ laˇ ve le? Leh chi ve ngaˬ hui hkʼaˬ hkʼe te gʼa tuˬ le?

 ¹⁷ Awˬ viˉ awˬ nyi teˇ gʼaˇ htaꞈ ngaˬ hui dawˇ cheˆ piˇ leh maˇ daꞈ ve hpawˇ kʼoˆ piˇ jaw ve kʼo, ngaˬ hui hkʼaˬ hkʼe te cawˇ ve le? Ngaˬ hui awˬ viˉ awˬ nyi htaꞈ gʼa haꞈ cawˇ ve tehꞈ tawnˇ taˍ sheˍ. (Yaˍkoˆ 2:8 gʼaw sheˍ.) Ngaˬ hui Yaˬhoˉvaˬ geh bon lawˬ leh shu htaꞈ maˇ gʼa dawˇ cheˆ piˇ tuˬ ga laˇ tcuh sheˍ. Ngaˬ hui bon lawˬ taˍ ve hkʼe leˇ, awˬ viˉ awˬ nyi oˇ ve teˇ gʼaˇ htaꞈ ngaˬ hui maˇ daꞈ ve awˬ lawn kʼoˆ piˇ jaw ve geh tawnˇ ca yaw daꞈ˗e sheˍ. Chi hkʼe te htaˇ ngaˬ hui yawˇ htaꞈ hkʼa dehꞈ shiˍ daꞈ tuˬ ga laˇ ve yoˬ. Chi hkʼoˆ kaꞈ, yawˇ htaꞈ jehˬ leh teˇ geh hto toˇ˗e ve maˇ heˆ leh awˍ teˇ geh ca caˇ˗e kaꞈ gʼa ve yoˬ. Ngaˬ hui yawˇ htaꞈ hkʼa dehꞈ shiˍ daꞈ ve kʼo, yawˇ htaꞈ daꞈ ve hpawˇ nyi tuˬ ngaˬ hui Yaˬhoˉvaˬ leh Yeˍsuˆ htaꞈ henˇ yuˬ gʼa ve yoˬ. Chi hkʼe te ve kʼo, daꞈ ve yawˬ hawˉ shehˍ hpaˇ shu htaꞈ taˇ dawˇ cheˆ piˇ tehꞈ kʼoˆ ve hkawˇ ngaˬ hui na yuˬ chehˇ ve yoˬ.

18. Ngaˬ hui daꞈ ve yawˬ hawˉ shehˍ hpaˇ hkawˇ na yuˬ chehˇ ve tehꞈ aˬ htoꞈ ma hpeuꞈ maw piˇ gʼa ve le?

¹⁸ Yawˬ lehˬ yawˬ hawˉ shehˍ hpaˇ hkawˇ na ve hkʼa shuˍ Yeˍsuˆ ve awˬ laꞈ gʼawˇ kaꞈ yawˇ ve hkawˇ na yuˬ ve yoˬ. Ngaˬ hui a shaꞈ teꞈ kuiˬ hkʼaw loˍ ve awˬ ceuˬ htaꞈ maˇ dawˇ haˍ dawˇ hkiˉ leh shu htaꞈ maˇ dawˇ cheˆ piˇ ve kʼo, Yaˬhoˉvaˬ leh Yeˍsuˆ ngaˬ hui htaꞈ awˬ bon naꞈ laˇ tuˬ yoˬ. Ngaˬ hui lehˬ “i ve yawˬ teˇ moˍ” hpehꞈ ve maˇ heˆ leh “awˬ kaˍ awˬ nu ve yawˬ teˇ hpaˍ” hpehꞈ ve htawˇ daꞈ ve yawˬ hawˉ shehˍ hpaˇ hkawˇ na yuˬ leh yawˇ kʼoˆ ve hkʼe gʼaꞈ te sheˍ. (Luˉkaꞈ 12:32; Yoˇhanˬ 10:11, 14, 16) Gʼuˇ suhˍ teˇ lawn hkʼaw Yeˍsuˆ yawˇ ve awˬ laꞈ gʼawˇ htaꞈ kʼoˆ piˇ ve 2 lawn htaꞈ teˇ geh henˇ tuˬ yoˬ.