1. Chuma muka chalingishile Yesu afwanyise vaka-kumukavangiza kumikoko?

 YESU afwanyishile usoko wenyi navaka-kumukavangiza kuli kafunga namikoko jenyi. (Yowa. 10:14) Chuma kana chakutamo, mwomwo mikoko vatachikiza kafunga kavo nakulinga vyuma mwavalweza. Lunga umwe ahanjikile ngwenyi mazu kana amuchano, ambile ngwenyi: “Twasakile kukopa mikoko ngocho twesekele kuvasanyika vezenga mwakamwihi oloze kavejileko, mwomwo kavatachikijile mazu etuko. Jino kwejile kanyike walunga uze apwile kafunga kavo, avasanyikile kaha hahaze vene vamukavangijile.”

2-3. (a) Uno vaka-kukavangiza Yesu veji kusololanga ngachilihi ngwavo vanakwivwilila kulizu lyenyi? (b) Vyuma muka natushimutwila muchihande chino nechi nachikavangizaho?

² Chuma chasolokele kuli uze lunga cheji kutwanukisanga mazu ahanjikile Yesu kutalisa kumikoko chipwe ngwetu kutumbaji twenyi. Ambile ngwenyi: “Navevwililanga kulizu lyami.” (Yowa. 10:16) Oloze oholyapwa Yesu ali mwilu, kaha tunahase kumwivwilila ngachilihi? Tweji kwivwililanga Mwata wetu hakukavangiza vyuma vize eji kutunangulanga.—Mateu 7:24, 25.

³ Muchihande chino nechi nachikavangizaho natushimutwila havyuma vimwe vize anangwilenga Yesu. Yesu atulwezele vyuma vize twatela kulitwamina kulinga navize twatela kulinga. Chatete, natushimutwila havyuma vivali vize kafunga wamwenemwene atukanyisa kulinga.

4. Kweseka namazu ahali Luka 12:29, vyuma muka vinahase kulingisa mutu ‘alizakamine’?

⁴ Tangenu Luka 12:29. Yesu alwezele vaka-kumukavangiza ngwenyi “litwaminenu kulizakaminanga” havyuma vyakulikafwa navyo mukuyoya. Twatachikiza ngwetu vyuma eji kuhanjikanga  Yesu vyapwa vyakwoloka shimbu yosena. Twafwila kukavangiza vyuma kana, oloze shimbu jimwe chapwa chachikalu kulinga vyuma kana. Mwomwo ika?

5. Vyuma muka vinahase kulingisa vatu vamwe valizakamine havyuma vyakulikafwa navyo mukuyoya?

 ⁵ Vatu vamwe vanahase kulizakamina havyuma vyakulikafwa navyo mukuyoya vyakufwana nge vyakulya, navyakuvwala, nazuvo. Vatu kana pamo vatwama mulifuchi muze mwatwama chikuma vatu vakuhutwa, kaha nawa chapwa chachikalu kuwana milimo. Chinahase kuvakaluhwila kuwana jimbongo jakutamo jakulikafwa najo natanga. Chipwe pamo mutu azakaminenga tanga nafu, ngocho tanga jino yili muukalu. Vatu vavavulu nawa vanavafumisanga hamilimo mwomwo yamusongo wachihita waCOVID-19. (Kwambu. 9:11) Kachi nge ukalu kanou chipwe ukalu weka unamisolokela, kaha munahase kukavangiza ngachilihi mazu ahanjikile Yesu akwamba ngwenyi litwaminenu kulizakamina?

6. Lumbununenu vyuma vyasolokele kuli kaposetolo Petulu halwola lumwe.

⁶ Halwola lumwe kaposetolo Petulu navakwavo vaposetolo vapwile muwato haKalungalwiji waNgalileya, halwola kana kwapwile peho yanyamanganda kaha vamwene Yesu ali nakutambuka hameya. Petulu ambile ngwenyi: “Ove Mwata, kachi nge yove vene, ngulweze ngwizenga kuli ove hameya.” Omu Yesu amwitavishile, Petulu afumine muwato “atambukile hameya nakuya kuli Yesu.” Talenu vyuma vyakavangijileho. “Hakumona peho yanyamanganda evwile woma. Kahomu aputukile kulondomana, atambakanyine ngwenyi: ‘Ove Mwata, ngulwile.’” Yesu olwele livoko lyenyi nakumulwila. Anukenu ngwenu, Petulu atambukile hameya omu ashishikile hali Yesu. Oloze omu atalile nyamanganda evwile woma  nakuhuhwasana ngocho aputukile kulondomana.—Mateu 14:24-31.

7. Vyuma muka natulinangula kuli Petulu?

⁷ Tunahase kulinangula vyuma vimwe kuli Petulu. Omu Petulu afumine muwato nakwingila mumeya, kashinganyekele ngwenyi mwalizakamina mwomwo yanyamanganda nakuputuka kulondomanako. Asakile kutwalaho lika kutambuka hameya nomu mwaheta kuli Mwata wenyi. Oloze kahashile kuheta kuli Yesuko. Makumbi ano katweshi kutambuka hameyako, oloze twasakiwa kupwa nalufwelelo numba tumike muvyeseko ngana muze Petulu asakiwile kupwa nalufwelelo mangana atambuke hameya. Kachi nge katweshi kufwelela Yehova najishiko jenyiko, kaha tunahase kuzeya kushipilitu kwijiva nge tunakulondomana mumeya. Chamokomoko nanyamanganda wachifwanyisa natulitalasana nenyi mukuyoya, twatela kufwelela Yehova nakufwelela nawa ngwetu atwama nangolo jakutukafwa. Tunahase kulinga ngachilihi ngocho?

8. Vyuma muka navitukafwa tuhone kulizakamina chikuma havyuma vyakulikafwa navyo?

⁸ Muchishishisa chakulizakamina haukalu wetu twatela kufwelela Yehova. Anukenu ngwenu, Setu wazangi Yehova atushika ngwenyi mwatuhana vyuma vyakulikafwa navyo mukuyoya kachi nge natuhaka vyuma vyakushipilitu kulutwe. (Mateu 6:32, 33) Kuli unjiho wasolola nge natesangamo jishiko jenyi. (Lushi. 8:4, 15, 16; Samu 37:25) Hakuwana nge Yehova eji kuzakamanga tujila najitemo, echi chatela kutulingisa tuhone kulizakamina havyuma natulya chipwe natuvwala. (Mateu 6:26-30; Fwili. 4:6, 7) Ngana muze zangi yeji kulingisanga visemi vazangi vahane vana vavo vyuma vyakulikafwa navyo mukuyoya, ngocho zangi yeji kulingisanga naSetu wamwilu ahane vatu jenyi vyuma vyakulikafwa navyo mukuyoya. Twafwelela chikupu ngwetu Yehova mwatuzakama.

9. Vyuma muka munalinangula kuvyuma vyasolokele kuli ndumbwetu napuwenyi?

⁹ Tutalenu chakutalilaho chize nachisolola omwo Yehova nahase kutuhana vyuma vyakulikafwa navyo mukuyoya. Ndumbwetu walunga napuwenyi vaze vapwa vapayiniya, vatambukile naminyau yavo yamwaka haola yimwe nakumbata vandumbwetu vamapwevo hachilombo chamatunduke mangana vayenga hamwe kukukunguluka. Ndumbwetu walunga alumbunwine ngwenyi: “Hanyima yakukunguluka, twalwezele vaze vandumbwetu tuyenga hamwe kuzuvo tukalye navo vyakulya, oloze katwapwile navyakulya vyakuvahanako.” Uno valingile ngachilihi? Ndumbwetu walunga ahanjikile nawa ngwenyi: “Omu twahetele hembo twamwene jingonga javyakulya jivali kuchikolo chazuvo yetu. Katwejivile owo ajihakileko. Yehova atuzakamine.” Mukuhita chalwola, minyau yava vandumbwetu yafwile. Yikiko vapwile nakuzachisanga hakuya mumulimo wakwambulula oloze kavapwile najimbongo jakuyiwahishisako. Chipwe ngocho, vatwalile minyau yavo kuchitanda chakuwahishila jiminyau mangana vatachikize jimbongo najisakiwa hakuyiwahisa. Kaha kwejile lunga umwe uze ahulishile ngwenyi: “Minyau yeya eyi?” Ndumbwetu walunga akumbulwile ngwenyi yenyi, yinakusakiwa kuyiwahisa. Uze lunga ambile ngwenyi: “Kaheshi ukaluko, puwami ali nakusaka minyau yakufwana vene ngana muulombo vene ou. Namungulanjisayo chingahi?” Ou ndumbwetu alanjishile minyau yenyi, kaha apwile najimbongo jakutamo jakulanda minyau yeka. Akukulwile ngwenyi: “Twawahililile chikuma halikumbi kana. Twatachikijile ngwetu vyuma kana kavyalisolokelelele viveneko, Yehova ikiye atukafwile.”

10. Vyuma muka vahanjika hali Samu 37:5 vize vyatela kutulingisa tuhone kulizakamina havyuma vyakulikafwa navyo?

 ¹⁰ Nge natwivwilila kuli kafunga wamwenemwene nakulitwamina kulizakamina chikuma havyuma vyakulikafwa navyo mukuyoya, kaha Yehova mwatuzakama. (Tangenu Samu 37:5; Petu. 1, 5:7) Achishinganyekenu haukalu tunavuluka  mupalangalafu 5. Halwola luze twapwile muukalu kana, pamo Yehova azachishile mutwe watanga chipwe muka-kwingisa milimo mangana atuzakame. Kachi nge mutwe watanga keshi nakuhasa kulinga ngochoko chipwe nge navatufumisa hamilimo, twatela kufwelela ngwetu Yehova mwatuzakama mujila yeka. Tushimutwilenu havyuma vyeka vize kafunga wamwenemwene atulweza tulitwamine kulinga.

11. Kweseka naMateu 7:1, 2, vyuma muka atulwezele Yesu tulitwamine kulinga, kaha mwomwo ika chinahase kupwila chachikalu?

¹¹ Tangenu Mateu 7:1, 2. Yesu atachikijile ngwenyi vatu kavakupukako ngocho vasaka kutokomenya hatutenga twavakwavo. Shikaho ahanjikilile ngwenyi: “Litwaminenu kusopesanga vakwenu.” Tunahase kuzata nangolo mangana tuhone kusopesanga vakwetu vaka-Kulishitu, oloze tuvosena katwakupukako. Nge tunamono ngwetu lwola lumwe tweji kutokomenyanga hatutenga twavakwetu, vyuma muka twatela kulinga? Twatela kukavangiza mazu atulweza Yesu ngwenyi litwaminenu kusopesanga vakwenu.

12-13. Uno chakutalilaho chaYehova nachitukafwa ngachilihi tulitwamine kusopesanga vakwetu?

¹² Tunahase kunganyala kachi nge natushinganyeka hachakutalilaho chaYehova. Eji kutalanga havyuma vyamwaza muli vatu. Omu mukiko alingile kuli Mwangana Ndavichi omu alingile jishili jajinene. Chakutalilaho, alingile ukoji naMbate-sheva, kaha nawa ajihile lunga lyenyi. (Samwe. 2, 11:2-4, 14, 15, 24) Chuma alingile Ndavichi chanehele ukalu hatanga yenyi kuhakilako namapwevo jenyi veka. (Samwe. 2, 12:10, 11) Halwola lukwavo nawa, Ndavichi alavile maswalale chakuzeneka kumulweza kuli Yehova, kahechi chasolwele nge kafwelelele muli Yehovako. Ndavichi alingile chuma kana pamo mwomwo yakulivwimba nakushinganyeka ngwenyi ali namaswalale vavavulu, kaha navamukinga. Vyuma muka vyafuminemo? VaIsalele vakuheta ku 70,000 vafwile namusongo wachihita.—Samwe. 2, 24:1-4, 10-15.

¹³ Nge kumwapwile halwola kana, kachi Ndavichi mwamumwene kupwa mutu wakufwana ngachilihi? Kutala kachi mwashinganyekele ngwenu Yehova katela kumukonekelako tahi? Oloze Yehova kalingile ngochoko. Amukonekelele hajishili jajinene jize alingile mwomwo apwile wakushishika mukuyoya chenyi, kaha nawa apihililile nakwalumuka. Yehova atachikijile ngwenyi Ndavichi amuzangile chikuma kaha asakile kulinga vyuma vyakwoloka. Twawahilila chikuma hakutachikiza ngwetu Yehova eji kutalanga havyuma vyamwaza muli etu.—Vamya. 1, 9:4; Miji. 1, 29:10, 17.

14. Chuma muka chinakafwe vaka-Kulishitu valitwamine kusopesanga vakwavo?

¹⁴ Hakuwana nge Yehova atachikiza ngwenyi vatu vanahase kulimbenja mwomwo yakuhona kukupuka, nayetu nawa twatela kutachikiza ngocho, nakutala kaha havyuma vyamwaza muli vakiko. Chapwa chachashi kumona tutenga twavakwetu nakutokomenyaho. Oloze mutu wakuhya kushipilitu eji kuzatanga kanawa navakwavo numba tuhu atachikiza tutenga twavo. Lilolwa lyandayamonde nge kanda vachiliwahise kalyakejimako kaha nawa kalyasoloka kanawako, oloze mutu wakunangakana nahase kutachikiza ngwenyi nalipwa lyamwaza chikuma nge vanaliwahisa.  Ngana mwaYehova naYesu, nayetu katwatela kutala hatutenga twavakwetuko, oloze twatela kutala kaha havilinga vyavo vyamwaza.

15. Uno kushinganyeka omu chili chiyoyelo chavakwetu nachitukafwa ngachilihi tuhone kuvamona mujila yayipi?

¹⁵ Vyuma muka nawa navitukafwa tuhone kumona vandumbwetu mujila yayipi? Twatela kushinganyekanga omwo chili chiyoyelo chavo. Tutalenu chakutalilaho. Likumbi limwe hatembele, Yesu amwene pwevo watuliwe muka-kukalikiza mwahaka tujimbongo twachichele tuvali twandando yayindende chikuma muchikasha chamawana. Yesu kahanjikile ngwenyi: “Mwomwo ika nahonena kuhakamo jimbongo jajivulu?” Oloze ashinganyekele hamuchima wenyi nachiyoyelo chenyi nakumwalisa hakuhana wana kweseka noho hakumina ngolo jenyi.—Luka 21:1-4.

16. Vyuma muka namulinangula kuli ndumbwetu Veronica?

¹⁶ Tutalenu vyuma aliwanyine navyo ndumbwetu Veronica mangana tumone ovyo chapwila chachilemu kushinganyeka omwo chili chiyoyelo chavakwetu. Muchikungulwilo apwile, mwapwile chisemi wapwevo wamujike namwanenyi walunga. Veronica ambile ngwenyi: “Kavayilenga kukukunguluka namumulimo wamuwande lwola lwosenako. Ngocho ngwavamwenenga kupwa vakuzeya. Oloze likumbi limwe ngwazachile nou ndumbwetu wapwevo muwande. Angulwezele ngwenyi mwanenyi apwile naukalu wakuwongo. Ngocho azachilenga  nangolo mangana azakame tanga yenyi kumujimba nakushipilitu. Shimbu jimwe kahashilenga kukunguluka nayetuko mwomwo yaukalu wamwanenyi, ngocho akungulukililenga kuchikungulwilo cheka.” Veronica akukulwile ngwenyi: “Kangwatachikijile ngwami ndumbwetu apwile naukalu kanako. Ngweji kumusakwililanga chikuma ou ndumbwetu hamilimo eji kuzachilanga Yehova.”

17. Uno mukanda WaYakova 2:8 watulweza kulinga vyuma muka, kaha tunahase kulinga ngachilihi ngocho?

¹⁷ Chuma muka twatela kulinga kachi nge tunamono ngwetu tunasopesa ndumbwetu? Twatela kwanuka ngwetu twatela kuzanganga vandumbwetu. (Tangenu WaYakova 2:8.) Twatela nawa kulembelela Yehova mangana atukafwe tulitwamine kusopesanga vakwetu. Kaha nawa twatela kulinga kweseka navyuma tunalombo hakuwanako lwola lwakupwa hamwe namutu uze tunasopesa. Echi nachitukafwa tumutachikize kanawa. Tunahase kumulweza tuzate hamwe mumulimo wakwambulula chipwe kumusanyika tulyenga nenyi vyakulya. Omu natutachikiza kanawa ndumbwetu, chinahase kutukafwa tukavangize chakutalilaho chaYehova naYesu nakutalanga kaha vyuma vyamwaza muli vakwetu. Nge natulinga ngocho, kaha natusolola ngwetu tunakwivwilila kafunga wamwenemwene uze atulweza ngwenyi litwaminenu kusopesanga vakwenu.

18. Tunahase kusolola ngachilihi ngwetu tunakwivwilila kulizu lyakafunga wamwenemwene?

¹⁸ Ngana muze mikoko veji kwivwililanga kulizu lyakafunga kavo, navaka-kukavangiza Yesu veji kwivwililanga kulizu lyakafunga kavo wamwenemwene. Kachi nge natuzata nangolo mangana tulitwamine kulizakaminanga havyuma vyakulikafwa navyo mukuyoya, nakulitwamina nawa kusopesanga vakwetu, kaha Yehova naYesu navatukisula. Numba nge twapwa halizavu ‘lyautanga wamikoko waundende’ chipwe ‘lyamikoko veka’ tutwalenuho kwivwilila nakwononoka kulizu lyakafunga wamwenemwene. (Luka 12:32; Yowa. 10:11, 14, 16) Muchihande nachikavangizaho natushimutwila havyuma vivali vize Yesu alwezele vaka-kumukavangiza ngwenyi vatela kulinganga.