1. Chumanyi chaletesheli Yesu yayesekeji atumbanji twindi nanyikoku?

YESU wesekejeli wubwambu wukwetiyi nawatumbanji twindi nachadikundañayi kabiña nanyikoku yindi. (Yow. 10:14) Ichi chakutalilahu chinateleli. Nyikoku yeluka izu dakabiña kawu nawa yatiyililaña izu dindi. Dichuma chamweniyi nimuntu wumu. Wahosheli nindi: “Twakeñeleña kukwata nyevulu yanyikoku nawa twafwilileña kuyileta kukamwihi. Ilaña yenjili wanyi muloña yelukili wanyi mazu etu. Nkumininaku kwenjili kabiña wakansi; chayitambikiliyi hohu, enza nikwinza.”

2-3. (a) Atumbanji twaYesu amwekeshaña ñahi nawu atiyililaña kwizu dindi? (b) Yumanyi yitukuhanjekahu muchinu chibaaba nichinalondelihu?

² Chuma chamweniyi iwu muntu chatwanukishaña mazu aYesu ahosheliyi hadi anyikoku jindi hela netu atumbanji twindi. Wahosheli nindi: “Akatiya izu dami.” (Yow. 10:16) Yesu wudi mwiwulu. Hanu tunateli kutiya ñahi izu dindi? Njila yimu mutwamwekeshelaña netu tunakutiya izu daNkaaka yetu hikuzatisha yuma yatudizishiliyi muchihandilu chetu.—Mat. 7:24, 25.

³ Muchinu chibaaba nichinalondelihu, tukuhanjeka hayuma yikwawu yatañishiliyi Yesu. Neyi chitukumona, Yesu watulejeli yuma yitwatela kwila niyuma yikwawu yitwatela kubula kwila. Tukuhanjeka ntahi yuma yiyedi yatulejeliyi kabiña muwahi yitwatela kubula kwila.

4. Kwesekeja naLuka 12:29, chumanyi chinateli kutuletesha “kusweja kwakama”?

⁴ Tañenu Luka 12:29. Yesu wayilejeli atumbanji twindi “kuleka  kusweja kwakama” hayuma yakumujimba. Tweluka netu kufumba kwaYesu kwekala kwakuwahi. Tunakukeña kukuzatisha, ilaña mpinji yikwawu chatukalilaña kukuzatisha. Muloñadi?

5. Muloñadi antu amakwawu chinateli kwakamenawu hayuma yakumujimba?

 ⁵ Antu amakwawu anateli kwakama chinateli kuwanawu yakuda, yakuvwala niitala. Hadaha ashakamaña mwituña mwasweja wuzweñi nawa mwakala kuwana nyidimu. Chinateli kuyikalila kuwana mali akuhemba nachu chisaka chawu, indi kwiji muntu wayihembeleña nafwi chisaka hichinateli kwikala namali amavulu akulandamu yuma yakudikwashamu nachuku. Cheñi, antu amavulu nyidimu yinayimani muloña wachipupu chaCOVID-19. (Mukwa. 9:11) Neyi dikukala kutunakumona hela tunakumona kukala kukwawu, tunateli kwovwahila ñahi kufumba kwaYesu kwakuleka kwakama?

6. Lumbululenu chuma chamumwekeneni kapostolu Petulu hampinji yimu.

⁶ Mpinji yimu, kapostolu Petulu niapostolu amakwawu adiña muwatu hakaluñalwiji kaÑaliliya hampinji yikwenjili mpepela yeneni. Dichi amumweni Yesu nakwenda hewulu damenji. Petulu wamwilili nindi: “Mwanta, neyi yeyi, nleji ninzi kudi eyi hamenji.” Kuhiñahu Yesu wamwilili nindi: “Inzaña!” Talenu chuma chahiñiluhu. “Dichi Petulu wafumini muwatu nawa wendeli hamenji nakuya kwadiñayi Yesu.” Ilaña “chamweniyi mpepela yeneni, watiyili woma. Nawa chatachikiliyi kunekama, wabidikili nindi: ‘Mwanta, ñamwini!’” Yesu wolweli chikasa chindi nakumwamwina. Petulu wendeli hamenji hampinji yamushinshikileñayi Yesu. Ilaña chamweniyi mpepela  yeneni watiyili woma nawa watachikili kujinooka, nkumininaku watachikili kunekama.—Mat. 14:24-31.

7. Chumanyi chitunakudizila kudi Petulu?

⁷ Tunateli kudizila kudi Petulu. Hafuminiyi muwatu nakwenda hakaluñalwiji, hatoñojokelihu nindi kudi yuma yikumuluwañesha nakutachika kunekamaku. Wakeñeleña kutwalekahu kwenda hamenji sampu nashiki kudi Yesu. Ilaña walekeli kushinshika hadi Yesu. Makonu, twatela kwikala nachikuhwelelu hakwila nawu tuumiki kukala neyi chochakeñeleñayi Petulu chikuhwelelu hakwila nawu yendi hamenji. Neyi tuleka kumukuhwelela Yehova niyikaninu yindi, chikuhwelelu chetu chikuzeya. Hichikweti muloña nakukala kutunateli kumona muchihandilu chetuku, twatela kumukuhwelela Yehova netu wukutukwashaña. Tunateli kumukuhwelela ñahi Yehova?

8. Chumanyi chikutukwasha kulonda tubuleña kwakama nayuma yitwakeñaña?

⁸ Chatela twakameneña hakukala kutukweti, twatela kumukuhwelela Yehova. Anukenu nenu Tata yetu wukweti kukeña Yehova, watukana nindi wukutwalekahu kutwakamena neyi tumutwamijaku. (Mat. 6:32, 33) Washikijaña ichi chikaninu chindi. (Kuhit. 8:4, 15, 16; Mas. 37:25) Neyi Yehova wakamenaña atujila ninkenu, hitwatela kwakama hayuma yitukuda hela yitukuvwalaku! (Mat. 6:26-30; Fwili. 4:6, 7) Neyi kukeña chikwasañumunaña anvwali kwakamena anyanawu, Tata yetu wamwiwulu niyena wayinkaña antu yuma yakeñañawu muloña wakwila wayikeña. Twatela kukuhwelela chikupu netu Yehova wukutwakamenaña!

9. Yumanyi yimukudizila kuyuma yayimwekeneni adisumbula?

⁹ Talenu chuma chamwekeni chinakumwekesha nawu Yehova nateli kutwinka yuma yitunakankili. Adisumbula amumudimu wampinji yejima ayili namotoka yawu nakusenda ahela amakwawu ashakamineña muchilombu chawamatunduka kulonda ayili hamu nakupompa. Manakwetu wahosheli nindi: “Chitwamanishili kupompa, twayitambikili awa ahela netu enzi kwitala detu kulonda tukadi nawu hamu yakuda. Nkumininaku twenjili nakwiluka netu twadiña wanyi nayakuda.” Chumanyi chamwekeni? Manakwetu watwalekelihu nindi: “Chitwashikili hohu hetala, twawanini anatushili yakuda muchiisu. Twelukili wanyi muntu watuleteleli iyi yakuda. Yehova watwakameneneni.” Chimwahitili mpinji, motoka yawu yafwili. Dimotoka yazatishileñawu mumudimu wakushimwina; ilaña hiyadiña namali akuyiloñesheshaku. Ayitwalili kwaloñeshelañawu nyotoka. Dichi kwenjili iyala wumu wehwili nindi: “Iyi motoka yawanyi?” Manakwetu wahosheli nindi yadiña motoka yindi nawa wayileteli kulonda ayiloñeshi. Iwu iyala wamwakwili nindi: “Hadi kukala wanyi. Ñodami nakukeña motoka yidi neyi iyi nawa yikweti wulombu wamuchidi yoweniwu. Wukuyila chiñahi?” Manakwetu walandishili motoka yindi namali amavulu akulandamu motoka yikwawu. Manakwetu wahosheli nindi: “Twazañaleli nankashi hadina ifuku. Twelukili netu bayi neyi ichi chuma chadimwekeneni hohuku. Yehova diyi watukwashili.”

10. Masamu 37:5 yatukoleshaña ñahi kubula kwakama hansañu yayuma yitunakankili?

¹⁰ Neyi tumutiyilila kabiña wamuwahi nawa tuleka kwakama nayuma yakumujimba, tukukuhwelela chikupu netu Yehova wukutwakamenaña. (Tañenu Masamu 37:5; 1 Pet. 5:7) Toñojokenu hakukala kwashimunawu  muparagilafu 5. Nichayinu mpinji, hadaha Yehova nakuzatisha mutu wachisaka hela muntu watwiñija mudimu kulonda yatukwasheña  muyuma yitwakankilaña. Neyi mutu wachisaka nakukañanya kuwana mali hela mudimu wunamani, Yehova wukutwakamenaña munjila yikwawu. Twatela kukuhwelela netu wukutwakamenaña. Ichi tuhanjekenu hachuma chikwawu chatulejeliyi kabiña wamuwahi nindi tubuleña kuchila.

11. Kwesekeja naMatewu 7:1, 2, Yesu watukaanishili kwiladi, nawa muloñadi chichinateli kwikalila chakala?

¹¹ Tañenu Matewu 7:1, 2. Yesu welukili nindi antu abula kuwanina ashaña muchima hayiluwa yawakwawu. Dichahosheleliyi nindi: “Lekenu kusompesha akwenu.” Tunateli kuzata nañovu kulonda tubuleña kusompesha akwetu. Ilaña wejima wetu twawanina wanyi. Chumanyi chitwatela kwila neyi tumona netu mpinji yikwawu twawanaña nankashi yiluwa mudi akwetu? Mutiyililenu Yesu nawa zatenu nañovu kulonda muleki kusompesha akwenu.

12-13. Kutoñojoka hadi Yehova chamumweneñayi Mwanta Davidi kunateli kutukwasha ñahi kubula kusompesha akwetu?

¹² Neyi tutoñojokaña chekalayi Yehova chinateli kutukwasha. Wamonaña yuma yayiwahi mudi antu. Talenu cheliliyi naMwanta Davidi hampinji yakoñeliyi yiluwa yayivulu. Chakutalilahu, welili wuvumbi naBatisheba nawa wamujahishili ninfumwindi. (2 Sam. 11:2-4, 14, 15, 24) Muloña wachuma cheliliyi Davidi, yena nichisaka chindi akabakeni kushilahu niañodi jindi. (2 Sam. 12:10, 11) Mpinji yimu cheñi, Davidi wamwekesheli nindi hamukuhweleleli Yehova chikupuku, hampinji yachindiliyi amayala akwanjita muIsarela, chuma chabulili kumuleja kudi Yehova nawu yachili. Hadaha wadivwimbili nawa wakuhweleleli mukuvula kwawamashidika indi. Chumanyi chafuminimu? AIsarela 70,000 afwili nachipupu!—2 Sam. 24:1-4, 10-15.

¹³ Neyi mwashakamineña muIsarela hayina mpinji, mwadi kumumona ñahi Davidi? Komana mwadi kutoñojoka nenu chiña abulili kumwanakena kudi Yehova? Yehova dichatoñojokeliyi wanyi. Welukili nindi Davidi wadiña washinshika nawa wabalumukili mumuchima. Chafuminimu, Yehova wamwanakeneni Davidi nshidi jakoñeliyi. Yehova welukili nindi Davidi wamukeñeli nankashi nawa wafwilileña kwila yuma yaloña. Twatiyaña kuwaha hakwiluka netu Yehova wamonaña yilwilu yayiwahi mudi etu.—1 Anya. 9:4; 1 Kushi. 29:10, 17.

14. Chumanyi chayikwashaña akwaKristu kubula kusompesha akwawu?

¹⁴ Chineli Yehova washaña wanyi maana hayiluwa yetu, ninetu twatela kushaña wanyi maana hayiluwa yawakwetu. Nawa ninetu twatela kumonaña yuma yayiwahi mudi akwetu. Chekala chaswayi kumona yiluwa mudi akwetu nikuyidimbulula, ilaña muntu wamwimbujolaña Yehova wazataña chiwahi nanawa antu hela chakwila neluki yiluwa yawu. Ilola dayimondi neyi dakuwahisha wanyi damwekanaña neyi damukunkulwayi, ilaña muntu wamaana weluka nindi dadiwahi, dalema nankashi nawa dinateli kumwekana chiwahi neyi adiwahisha. Kufwana Yehova niYesu, ninetu twatela kumonaña yilwilu yayiwahi mudi akwetu.

15. Kutoñojoka hachidi chihandilu chawantu kunateli kutukwasha ñahi kubula kuyisompesha?

¹⁵ Kubombela hakusha maana hayilwilu yayiwahi yikwetiwu akwetu, chumanyi chinateli kutukwasha kubula kwikala akalisha nawakwetu? Toñojokenu chidi chihandilu chawu. Talenu ichi chakutalilahu. Ifuku dimu hadiñayi Yesu hatembeli, wamweni mumbanda nfwila nakumbila tumawayawaya tuyedi twapela wuseya muchikasha. Wehwili wanyi nindi: “Muloñadi chinabuliliyi kumbilamu mali  amavulu?” Chatela yashi muchima hakuvula kwamali ombililimu iwu mumbanda, Yesu watoñojokeli hachuma chaletesheli yombilimu nichadiña chihandilu chindi nawa wamuhamekeli nachazatiliyi nañovu.—Luka 21:1-4.

16. Chumanyi chimunadizili kudi muhela Veronica?

¹⁶ Tunateli kulumbulula chichalema kutoñojoka hachidi chihandilu chawantu kuhitila mukushinshika chuma chamumwekeneni muhela Veronica. Muchipompelu mwadiñayi, mwadiña muhela mujiki nimwanindi weyala. Wahosheli nindi: “Namweni nami enjileña wanyi nakupompa nikuya nakushimwina mpinji yejima. Ichi chuma chaletesheli niyitoñojokeli mwaluwa. Ilaña ifuku dimu nazatili namama yawantu mumudimu wakushimwina. Wanlejeli nindi mwanindi wadiña wakata nawa wazatileña nañovu kulonda yawaneña yuma yakuhanda nachu nikukolesha wubwambu wawu naYehova. Mpinji yikwawu, muloña wayikatu yadiña mwanindi, wayileña nakupompa nawamanakwetu kuchipompelu chikwawu.” Muhela Veronica wakunkulwili nindi: “Ichi namukeña nawa namulemesha muloña wazataña nañovu kulonda yamukalakeli Yehova.”

17. Yakoba 2:8 yatulejaña kwiladi nawa tunateli kwila ñahi mwenimu?

¹⁷ Chumanyi chitwatela kwila neyi twiluka netu tunamusompeshi mukwetu mukwakwitiya? Twatela kwanuka netu twatela kuyikeña amanakwetu. (Tañenu Yakoba 2:8.) Twatela  cheñi kumulomba Yehova nakumulembelela kulonda yatukwashi tubuleña kusompesha akwetu. Twatela kwila mutunakulomba kuhitila mukwikala nampinji yakuhanjeka namuntu itwatoñojokeleleña mwakutwamba. Ichi chikutukwasha kumwiluka chiwahi. Twatela kumulomba kulonda twakazati nindi mumudimu wakushimwina hela yakenzi tukadiili hamu. Chitukumwilukaña chiwahi manakwetu, twatela kumwimbujola Yehova niYesu kuhitila mukumona yilwilu yayiwahi mudi yena. Neyi twilaña iyi yuma, tukumwekesha netu tunakutiyilila lushimbi lwatulejeliyi kabiña wamuwahi nindi, lekenu kusompesha akwenu.

18. Tukumwekesha ñahi netu tunakutiyilila izu dakabiña wamuwahi?

¹⁸ Neyi chochatiyililaña nyikoku izu dakabiña kawu, atumbanji twaYesu niwena atiyililaña izu dindi. Neyi tuzataña nañovu kulonda tubuleña kwakama hayuma yakumujimba nikuleka kusompesha akwetu, Yehova niYesu akatukwasha. Hela chakwila tudi “mukanka wanyikoku wanyanya” hela “anyikoku amakwawu,” tutwalekihu kutiyilila nikwovwahila izu dakabiña wamuwahi. (Luka 12:32; Yow. 10:11, 14, 16) Muchibaaba chinalondelihu, tukahanjeka hayuma yiyedi yayilejeliyi Yesu atumbanji twindi nindi eleña.