1. Mwahaya bwaddi Yesu adhe aaliganihege anamahara aye ni mambila?

YESU aliganihe wandana anniyena ni anamahara aye, nuudhivela anna namakukula ni mambila aye. (João 10:14) Nladdaniho nna, nnowoneleyamo pama. Mwaha nimbila nihinona ndhu na namakukula aye. Mowindala ninga mambila, anamahara ehinona ndhu na namakukula ewa. Turista dhaala onowoona eyo epadduwaga. Oliye wera: “Iyo nafuna nafilimari mambila wihina enaaddamele mburo naarigihuvo. Mbwenye kananna makalelo, aliwa kiyandile onaaddamela. Nuwindo ofiya mwanamuzombwe dhaala aakukula, wawithana vang’ono mambila ale omuharaga.”

2-3. a) Iyo nnovuruwana ndhu na Yesu, neeraga ddi? b) Musolo ola ni musolo onaharela nnaasuze ddi?

² Yopadduwa ela, enonubusedha Yesu asorihiliye wodhela anamaharaye. Oliye wera: ‘Aliwa enerege ovuruwana ndhu naaga.’ (João 10:16) Woona wi Yesu ari odhulu, nnande addi ovuruwana ndhu naaye? Iyo nnowanda ovuruwana ndhu nanamakukula ehu, neragana dhithu anihudhihiye.​—Mat. 7:24, 25.

³ Musolo ola ni musolo onaharela, iyo nnere owoga dhithu dhimodha Yesu anihudhihiye. Yesu ohuwoga dhithu dhinahoowela iyo oselela werana ni dhithu dhinahoowela iyo weragana. Voobajha nnafuna noone dhithu biili, Yesu namakukula ehu anaddeliye wihina niselele werana.

4. Mowiwanana ni Lucas 12:29, ethu baani enanthukulele othabwaga othuwathuwa?

⁴ Omwileri Lucas 12:29. Yesu wawaddela anamaharaye wihina ehithabwege othuwathuwela dhithu dhomwilini. Iyo nihinona wi dholaga dha Yesu dhinonikavihera. Mwebaribarene, nnafuna niparihedhe mabasa mwigumini mwehu.  Mbwenye malabo mamodha podi okala yorusa oparihedha mabasa mwigumini mwehu. Mwahaya bwaddi?

5. Mwahaya bwaddi athu owinjhiva ehikannaga yojha ya kadda labo?

 ⁵ Athu owinjhiva enathabwa othuwathuwela dhego dha kadda labo, ethu enafuniwa ojha, yowara, ni mburo enafuniwa okala. Athu amodhaya enakala elabo yoohawa, winarusa ofwanya ganyo, elabo yowindo, winorusa osapela murala. Ethu emodhaya yoorusa, podi wera muthuya asapela muralaya ohukwa, eyo podi othukulela murala watene woona goyi. Teto mwaha wa Koronaviru, athu owinjhiva ehiyelela ganyo ni kinafwanya yojha ya kadda labo. (Ecl. 9:11) Akala we onoofwanyiwa makathamiho mamodhave, onere ddi wihina ohare yolaga ya Yesu ni ohiye othuwathuwa?

6. Yapadduwege ddi ni murumiwi Peduru?

⁶ Nlabo dhala murumiwi Peduru ni arumiwi amodha, yahifwanyiwa nipevo ninlubale vaari va niya yo Galileya. Nuwindo, aliwa omoona Yesu eeddaga vadhulu va manjhe. Peduru wera: ‘Nabwiya girumeni nimiyoya geeddege vadhulu va manjhe wihina gidhe gigumane ni nyu.’ Yesu wera: ‘Kadha wuno,’ Peduru okumamo mmwanddeyani weddaga vadhulu va manjhe adhowaga warigi Yesu.’ Mbwenye kasugwa yapadduwe osogolowa. ‘Peduru asugwaga nipevo, oliye wambela woova. Nuwambela oddadda oliye okuwa ‘Nabwiya, givuluseni!’’ Yesu omparela nlada wihina oliye ahiddadde. Eyo enotikiniha woona wihina Peduru, andile weedda vadhulu va manjhe wula amusugwaga Yesu. Mbwenye Peduru nuusugwa nipevo, wambela woova, oliye wambela oddadda.​—Mat. 14:24-31.

7. Nnahudhera ddi ni ele yampadduwele murumiwi Peduru?

 ⁷ Iyo podi ohudhera ethu yathima ni ele yapadduwe ni murumiwi Peduru. Peduru nuukuma mmwanddeyani mune, nuwambela weedda vadhulu va manjhe, newene kubuwele wihina oliye erege othuwathuwela dhithu dhimodha ni wambela oddadda. Oliye afuna agumane ni Yesu wula eeddaga vadhulu va manjhe. Mbwenye oliye othuwathuwelaga dhithu dhimodha, osugwaga nipevo. Mwamakalelo mamodhave Peduru ahoweliye nroromelo wihina eedde vadhulu va manjhe, iyo peeno nnohowela nroromelo wihina naagonjhihe makathamiho enanifwanya. Iyo nahiya omusugwa Yehova, ni mpaganyo dhaye, nihiyoya podi ofiyedha oddadda, obe nere, epaddiihu yomuzimuni podi othembwa. Bumwahaya, iyo nnohowela omusugwa pamadhene Yehova, ni omuroromela wihina podi onikavihera wagonjhiha makathamiho ehu. Ki nnande addi?

8. Mwahaya bwaddi kannahowela othabwa othuwathuwela ni dhithu dhomwilini?

⁸ Kuddiwale wihina babihu Yehova onopaganya onikabelela epaddi yehu yomwilini, neeka mburo wobajha dhego dhomuzimuni. Bumwahaya, ohiya othabwaga wawunlana makathamiho enanifwanya, nnohowela omuroromela Yehova. (Mat. 6:32, 33) Yehova apaganye ethu anowerana. (Deut. 8:4, 15, 16; Sal. 37:25) Mowindo, kala Yehova anokabelela anabalame ni folori, kanaanganyedhege wihina anere onikabelela, anivahaga yojha nnahowelihu ni yoowara. Kanthabwege othuwathuwela dhithu dhendha! (Mat. 6:26-30; Fil. 4:6, 7) Mowindala ninga ababi enakabeleliwa aniiwa epaddi yomwilini, ni yeragana ndo nuudhivela. Yehova anonidhivela vanlubale, anere onikabelela epaddi yomwilini. Kanaanganyedhege wihina Yehova anere onikabelela!

9. Ohudhere ddi ni yopadduwa ya anamatelana ala yaari apiyonero?

⁹ Kasugwa yopadduwa enoniha wi Yehova podi onikabelela epaddi yomwilini. Anamatelana enalaba mudhidhi wamutene yera weddiha karo yewa yakale, olenddo wowakwana mawora nimodha wihina yaathukule arogola dhaala wakalesa athu enathawa koddo, aliwa yera wadhowela wihina yoone mutugumano. Ddibila dhaala wera: “Mutugumano nuumala, iyo wawithanela vaadevihu arogola ale wihina yajhe vamodha ni iyo, mbwenye nuwindo, iyo wubuwela wihina vade kananna ethu yowavaha.” Vano anamatelana ala yere ddi? Ddibila dhaala wera: “Nufiya vaade iyo ofwanya sextu biili vamulago vehu mugadhanle dhoojha. Ofiyera peeno, kanimunonne muthu ahiyilevo. Yehova ahinikabelela.” Mudhidhi nuuvira, karo yewa ogujhuwa. Aliwa yohowela karo ele wihina edhowegena mmalaleyelo, mbwenye kayanna korowa yosasanyihana. Karo ele egaari omekaniku ewomihedhiwaga, mulobwana dhaala odha onikoha: “Karo ela mwinnya baani?” Ddibila ole wera, saaga, mbwenye kinna mabasa ehimala ogujhuwa. Vano mulobwana ole wera: “Kaviri muladdu. Mwaraga ohukanna karo yooligana ni yela, koreya emodhave. Onafuna ogule avi?” Ddibila ole omuhara aganna korowa dhowakwana ogulana karo emodha. Oliye onosoriha egi: “Miyo kaginanda owogawa makalelo nahagalaligihu labo nenne. Iyo nahinona wi dhithu ndhe kadhereye moliganyedha. Mwebaribarene Yehova danikabelela.”

10. Mowiwanana ni Salmos 37:5, ethu baani nihinanganyedhihu?

¹⁰ Nilibiheraga wawiwelela madhu a Yesu, nihithabwaga othuwathuwela dhithu dhomwilini, Yehova anere onikavihera ni dhithu nnahowelihu. (Omwileri Sal 37:5; 1 Ped. 5:7) Kawubuwele makathamiho nawoonilihu  ddima 5. Podi wera malabo yala, Yehova onna omulabihedha mmudhaawo, wihina aajhihege murala weenyu, obe podi wera ohukanna ganyu, enukavihera ojhiha murala wawo. Naarive oyelele ganyo yawo, muthu anakabelela murala wawo obe ahandaga wukabelelani, ni makalelo yawo obe mamodha, Yehova kanadha wuhiya wukabelelani. We podi okanna ebaribari wodhela yeyo. Vano nnafuna noone ethu emodha Yesu anaddeliye wihina nselele werana.

11. Mowiwanana ni Mateus 7:1, 2, Yesu enre nihiye wera ddi, ki mwahaya bwaddi eyo ekala ethu yorusa?

¹¹ Omwileri Mateus 7:1, 2. Yesu ahinona wi athu kilogomane ni ehikanna elamalelo yosugwa baahi dhoviriganiha dhaathu amodha. Bumwahaya adhe erege: ‘Muselele otoriha.’ Iyo nnowilibihera wihina nihatorihege addibilihu. Mbwenye malabo, mamodha kahi ethu yokweya werana ndo, mwaha wohilogomana. Nnere ddi noona wi nnothabwa watoriha athu amodha dhineriwana? Nnohowela ovuruwana ndhu Yesu, nilibihere ohatoriha athu amodha.

12-13. Yotajhiha ya Yehova enanikavihera addi oselela watoriha amodha?

¹² Iyo podi ohudhera vanlubale, nubuwela makalelo Yehova aweddihiye athu. Oliye anathabwa osugwa epaddi yewa yapama. Iyo podi woona eyo, makalelo amweddihiye mwene Davidi, mulobwana enrena dhothega dhowopiha. Motajhiha, oliye omukumiha mba Bateseba, teto vadhuluva oliye ompiha mamuneya. (2 Sam. 11:2-4, 14, 15, 24) Mwaha wa yeyo, Davidi ni amudhaaye atene wonela goyi yothega yaye, naamwariye amodhaya. (2 Sam. 12:10, 11) Nlabo nimodha, Davidi werana ethu Yehova aamukoddihiye. Oliye oruma wihina alobwana atene ekontariwe, yaari anyakoddo amwaana Ezarayeli. Eyo woniha wi kaamuroromela Yehova. Bibliya kanasoriha mwahaya bwaddi Davidi adhe eeregena ndo. Mbwenye podi wera adhe eeregena ndo, mwaha owithukula, woona wi anyakoddo ala yahinjhiva ni makalelo yambareliwa. Mwaha wa yeyo, Yehova otota dhiredda dhapile amwaana Izarayeli owakwana 70,000!​—2 Sam. 24:1-4, 10-15.

¹³ Mudhidhi yole wahakalevo dhithu ndha dhereyaga, wamubuwelege avi Davidi? Wonelemo wihina Davidi onohowela osinyusiwa? Yehova konelamo ndo. Yehova aathambwe osugwa dhego dhapama Davidi eriliyena, ni makalelo aathwaruwiliye. Bumwahaya Yehova adhe amukurumuwelege dhothega dhaye dhatedhene. Davidi omudhivela vanlubale Yehova ni oofuna werana ethu yapama. Yehova ahinona yeyo. Sapama onona wi Yehova anathabwa osugwa epaddi yehu yapama.​—1 Reis 9:4; 1 Cró. 29:10, 17.

14. Enaanikavihere ddi oselela watoriha athu amodha?

¹⁴ Akala Yehova kanajhehera wi nikale athu oologomana, iyo kanunlelege wi athu amodha ekale oologomana. Dhoviriganiha dhakwawo kadhinarusa woneya, mbwenye muthu amutajhiha Yehova anowilibihera weedda pama naakwaye. Naarive aganonne wi akwaye enoviriganiha. Diyamanti podi ohuwoma akala ahinasuwiwe, mbwenye muthu amunonne pamadhene, ohunona wi diyamanti ola asuwiwa pama anere osadduwa akale ethu yathima. Iyo nimutajhihege Yehova ni Yesu, nsugwege opitha epaddi ya muthu yole woona epaddi yapama anniyena.

15. Woonelamo dhinereya mwigumini mwa muthu, dhinukavihere addi ohumutoriha?

¹⁵ Ethu emodha enaanikavihere ohatoriha  amodha ni wawoga obure ddi? Orajhihe onona dhithu dhinampadduwela muthu ole mwigumini mwaaye. Motajhiha, nlabo dhaala mutempulu, Yesu omoona maamukwele oohawa, avokedhaga korowa mu kofiri ya mutempulu anandalabwe abili. Oliye kiikohile egi: “Mwahaya bwaddi adhe ahekegemo korowa dhowinjhiva?” Ohiya othuwathuwa ni korowa avokendhiyemo, Yesu aathambwe osugwa epaddi yaye ya vati vamurima, oliye ahinona wi maamukwele ole doohaawa ni oliye omutamalela eriliyena.​—Lucas 21:1-4.

16. Yopadduwa ya murogola Veronika enanihudhiha ddi?

¹⁶ Yopadduwa ya murogola anithaniwa Veronika enonikavihera woona thima yonona dhinampadduwela muthu mwigumini mwaaye. Oliye akavihera mulogo dhaala, aalimo murogola dhaala amulela mwanaye yeka. Veronika wera: “Enakala ninga aliwa yojhombesa bure omutugumanoni ni omalaleyelo. Miyo dhogitakalela vanlubale. Mbwenye nlabo dhimodha iyo odhowa mmalaleyelo vamodha. Oliye wambela ogithakelamo makalelo enamurusa omulela mwanaye. Oliye era wilibihera vanlubale wihina oliye vamodha ni mwanayeya ekanne dhithu dhinahoweliwa epaddi yomwilini ni omuzimuni. Malabo mamodha mwaha oredda wa mwanaye, yokala woona mutugumano mulogo mmodha.” Omagomiherowa Veronika wera: “Miyo kagannone wi dhahikalawo dhithu dhahinamweddela pama mwigumini mwaaye. Vano, ginomuriha ni ginomuthithimiha  murogola ole mwadhatedhene aneriyena wihina amulabele Yehova.”

17. Yolebela ya Tiago 2:8 enanikongomedha wera ddi, ki nnande werana addi?

¹⁷ Woona wi onomutoriha muthu onohowela were ddi? Onaddiwale wihina nnofwanelela wadhivela addibilihu. (Omwileri Tiago 2:8.) Ohiya eyo, iyo podi olobela ni murima watene wa Yehova wihina anikavihera oselela watoriha athu amodha. Yathimaya, fuunona wihina nnofwanelela werana epaddiihu ni wilibihera ojha mudhidhi wowinjhivene naathu nnatorihihu. Nerana ndo nnere omunona pama muthuya. Iyo podi omwithana wihina nilabe vamodha omalelayelo obe njhe ethu siithu vamodha. Wula nimunonaga pama muthuule ni dhithu dhinereya mwigumini mwaaye, iyo podi omutajhiha Yehova ni Yesu, othabwa osugwa epaddi yaye yapama. Nerana ndo, nnere ovuruwana ndhu nanamakukula ehu Yesu, ananaddela wihina niselele watoriha amodha.

18. Nnonihe addi wihina nnovuruwana ndhu nanamakukula ehu Yesu Kiristu?

¹⁸ Mowindala ninga mambila enavuruwaniwa ndhu nanamakukula ewa, iyo nnowilibihera vanlubale ovuruwana ndhu na Yesu. Nahithabwaga othuwathuwela dhego dhomwilini ni naselela watoriha amodha, Yehova vamodha ni Yesu enere oreeliha wilibihera wehu. Naari nikale anikuru ninlubale obe anikuru ning’ono, nnofwanelela odhowagave nivuruwanaga ndhu nanamakukula ehu. (Lucas 12:32; João 10:11, 14, 16) Musolo onaharela, nnafuna noone dhithu biili Yesu anirummiye wihina neregena.