လေ့လာရန် ဆောင်းပါး ၅၀
သိုးထိန်းကောင်းရဲ့ စကားသံကို နားထောင်ပါ
“သူတို့က ကျွန်တော့်အသံကို နားထောင်တယ်။”—ယော. ၁၀:၁၆။
သီချင်း ၃ တို့မျှော်လင့်ကိုးစားရာ
အကြိုသုံးသပ်ချက် *
၁။ တပည့်တွေကို သိုးတွေနဲ့ ယေရှု ဘာကြောင့် နှိုင်းယှဉ်တာလဲ။
ယေရှုက တပည့်တွေနဲ့ ရင်းနှီးတဲ့ ဆက်ဆံရေး ရှိတာကို သိုးထိန်းနဲ့ သိုးတွေကြားက ရင်းနှီးမှုနဲ့ နှိုင်းယှဉ်ခဲ့တယ်။ (ယော. ၁၀:၁၄) အဲဒီလို နှိုင်းယှဉ်တာ သင့်တော်တယ်။ သိုးတွေဟာ သိုးထိန်းရဲ့ အသံကို သိပြီး နားထောင်ကြတယ်။ အဲဒါကို ခရီးသွားတစ်ယောက် ကိုယ်တွေ့ ကြုံခဲ့တယ်။ “သိုးတချို့ကို ဓာတ်ပုံရိုက်ချင်လို့ အနားလာအောင် လုပ်ပေမဲ့ ကျွန်တော်တို့ အသံကို မသိတော့ မလာကြဘူး။ သိုးထိန်း ကောင်လေး ရောက်လာပြီး ခေါ်တဲ့အခါမှာတော့ အားလုံး သူ့နောက်ကို လိုက်ကြတယ်” လို့ ပြောတယ်။
၂-၃။ (က) ယေရှုရဲ့ စကားကို နားထောင်ကြောင်း နောက်လိုက်တွေ ဘယ်လို ပြနေသလဲ။ (ခ) ဒီဆောင်းပါးနဲ့ နောက်ဆောင်းပါးမှာ ဘာအကြောင်း ဆွေးနွေးကြမလဲ။
၂ အဲဒီခရီးသွားရဲ့ အတွေ့အကြုံက တပည့်တွေကို သိုးနဲ့ ခိုင်းနှိုင်းတဲ့ ယေရှုရဲ့ စကားကို သတိရစေတယ်။ “သူတို့က ကျွန်တော့်အသံကို နားထောင်တယ်” လို့ ယေရှု ပြောတယ်။ (ယော. ၁၀:၁၆) ဒါပေမဲ့ ယေရှုက ကောင်းကင်မှာ ရှိနေတော့ သူ့စကားသံကို ကျွန်တော်တို့ ဘယ်လို ကြားနိုင်မလဲ။ ယေရှုရဲ့ သွန်သင်ချက်တွေကို လေ့လာခြင်းအားဖြင့် ကြားနိုင်တယ်။ ဘဝမှာ လက်တွေ့ကျင့်သုံးခြင်းအားဖြင့် နားထောင်နိုင်တယ်။—မ. ၇:၂၄၊ ၂၅။
၃ ဒီဆောင်းပါးနဲ့ နောက်ဆောင်းပါးမှာ ယေရှုရဲ့ သွန်သင်ချက် တချို့ကို သုံးသပ်ကြပါမယ်။ မလုပ်ရမယ့်အရာတွေနဲ့ လုပ်ရမယ့်အရာတွေကို ယေရှု သင်ပေးမှန်း သိရပါမယ်။ မလုပ်ရမယ့်အရာ နှစ်ခုကို အရင်ဆုံး ဆွေးနွေးကြရအောင်။
“အစိုးရိမ်လွန်တာမျိုး မဖြစ်ကြနဲ့တော့”
၄။ လုကာ ၁၂:၂၉ အရ ဘာတွေကြောင့် “အစိုးရိမ်လွန်တာမျိုး” ဖြစ်တတ်သလဲ။
၄ လုကာ ၁၂:၂၉ ကို ဖတ်ပါ။ ရုပ်ပစ္စည်း လိုအပ်ရာတွေအတွက် “အစိုးရိမ်လွန်တာမျိုး မဖြစ်ကြနဲ့တော့” လို့ နောက်လိုက်တွေကို ယေရှု ပြောတယ်။ ယေရှုရဲ့ သွန်သင်ချက် အမြဲ မှန်ပြီး ပညာရှိကြောင်း သိလို့ ကျွန်တော်တို့ လိုက်နာချင်ပေမဲ့ တစ်ခါတလေတော့ ခက်တယ်။ ဘာကြောင့်လဲ။
၅။ ရုပ်ပစ္စည်း လိုအပ်ရာတွေအတွက် တချို့ ဘာကြောင့် စိုးရိမ်ပူပန်မိနိုင်သလဲ။
၅ တချို့က စားဝတ်နေရေးအတွက် စိုးရိမ်ပူပန်မိနိုင်တယ်။ ဆင်းရဲတဲ့ နိုင်ငံမှာ နေလို့၊ မိသားစုကို ထောက်ပံ့ဖို့ ငွေ လုံလုံလောက်လောက် မရှာနိုင်လို့ ဖြစ်နိုင်တယ်။ မိသားစုကို အဓိက ရှာဖွေကျွေးမွေးနေသူ သေဆုံးသွားလို့ ကျန်ရစ်သူ မိသားစုမှာ ငွေကြေး ခက်ခဲနေတာ ဖြစ်နိုင်တယ်။ ကိုဗစ်-၁၉ ကပ်ရောဂါကြောင့် အလုပ်ပြုတ်ပြီး ဝင်ငွေ မရှိတော့တာ ဖြစ်နိုင်တယ်။ (ဒေ. ၉:၁၁) ဒီလို အခက်အခဲတွေ ဒါမှမဟုတ် တခြားအခက်အခဲတွေ ကြုံနေရချိန်မှာ အစိုးရိမ်လွန်တာမျိုး မဖြစ်ကြနဲ့တော့ ဆိုတဲ့ ယေရှုရဲ့ စကားကို ဘယ်လို လိုက်နာနိုင်မလဲ။
၆။ တစ်ကြိမ်မှာ တမန်တော် ပေတရု ဘာဖြစ်ခဲ့သလဲဆိုတာ ရှင်းပြပါ။
၆ တစ်ကြိမ်မှာ တမန်တော် ပေတရုနဲ့ တခြားတမန်တော်တွေ ဂါလိလဲပင်လယ်မှာ မုန်တိုင်းမိတယ်။ အဲဒီအချိန် ယေရှု ရေပေါ် လမ်းလျှောက်လာတယ်။ ပေတရုက “သခင်၊ တကယ်ပဲ သခင် ဟုတ်တယ်ဆိုရင် ကျွန်တော်လည်း ရေပေါ် လမ်းလျှောက်ပြီး သခင့်ဆီ လာဖို့ အမိန့်ရှိပါ” လို့ ပြောတယ်။ “လာခဲ့လေ” လို့ ယေရှု ခေါ်တဲ့အခါ ပေတရု လှေပေါ်ကနေ ဆင်းပြီး “ရေပေါ် လမ်းလျှောက်လာတယ်။” နောက်ဘာဆက်ဖြစ်သလဲ သတိပြုကြည့်ပါ။ “မုန်တိုင်း ထန်နေတာကို မြင်တော့ ကြောက်စိတ်ဝင်ပြီး နစ်တော့မလို ဖြစ်သွားတယ်။” ဒါနဲ့ “‘သခင်၊ ကယ်ပါဦး’ လို့ အော်တဲ့အခါ” ယေရှု လက်ဆန့်ပြီး ကယ်လိုက်တယ်။ ယေရှုကို အာရုံစိုက်နေသရွေ့ မုန်တိုင်းထန်တဲ့ ရေပြင်ပေါ် ပေတရု လမ်းလျှောက်နိုင်ခဲ့တာ သတိပြုပါ။ ဒါပေမဲ့ မုန်တိုင်းကို အာရုံစိုက်မိတဲ့အခါမှာတော့ ကြောက်စိတ်၊ သံသယစိတ် ဝင်လာပြီး ရေနစ်သွားတယ်။—မ. ၁၄:၂၄-၃၁။
၇။ ပေတရုရဲ့ အဖြစ်ကနေ ဘာသင်ယူနိုင်သလဲ။
၇ ပေတရုရဲ့ အဖြစ်ကနေ သင်ယူနိုင်ပါတယ်။ လှေထဲကနေ ဆင်းပြီး ရေပေါ် စလမ်းလျှောက်ချိန်မှာ စိုးရိမ်စိတ်ကြောင့် နစ်သွားမယ်လို့ ပေတရု ထင်မှာ မဟုတ်ဘူး။ သခင့်ဆီ ရောက်တဲ့အထိ ရေပေါ်မှာ ဆက်လျှောက်သွားချင်တာ။ ဒါပေမဲ့ ယေရှုကို ဆက်အာရုံမစိုက်တဲ့အတွက် အဲဒီလို မလျှောက်နိုင်ခဲ့ဘူး။ ပေတရုလိုပဲ ကျွန်တော်တို့လည်း စမ်းသပ်မှုတွေကို ခံရပ်နိုင်ဖို့ ယုံကြည်ခြင်း လိုတယ်။ ယေဟောဝါနဲ့ ကတိတော်တွေကို အာရုံမစိုက်တော့ဘူးဆိုရင် ယုံကြည်ခြင်း အားနည်းလာပြီး စိုးရိမ်ပူပန်မှုတွေထဲ နစ်မြုပ်သွားနိုင်တယ်။ မုန်တိုင်းနဲ့ တူတဲ့ ဘယ်လို ပြဿနာမျိုးပဲ ကြုံရပါစေ ယေဟောဝါနဲ့ ဘုရားရဲ့ ကူညီနိုင်စွမ်းကို ဆက်အာရုံစိုက်နေရမယ်။ ဘယ်လို လုပ်နိုင်မလဲ။
၈။ ရုပ်ပိုင်း လိုအပ်ရာတွေအတွက် အစိုးရိမ်လွန်တာမျိုး မဖြစ်ဖို့ ဘာက ကူညီပေးမလဲ။
၈ ပြဿနာတွေအတွက် စိုးရိမ်ပူပန်နေမယ့်အစား ယေဟောဝါကို ယုံကြည်ကိုးစားဖို့ လိုတယ်။ ဘုရားရေးရာကို ဦးစားထားမယ်ဆိုရင် ရုပ်ပိုင်း လိုအပ်ရာတွေကို ဖြည့်ဆည်းပေးမယ်လို့ မေတ္တာရှင် ဖခင် ယေဟောဝါ ကတိပေးထားတာ သတိရပါ။ (မ. ၆:၃၂၊ ၃၃) အဲဒီကတိအတိုင်းလည်း အမြဲ ဖြည့်ဆည်းပေးတယ်။ (တရား. ၈:၄၊ ၁၅၊ ၁၆။ ဆာ. ၃၇:၂၅) ငှက်တွေ၊ ပန်းတွေကိုတောင် ယေဟောဝါ ပစ်မထားဘူးဆိုရင် ကျွန်တော်တို့ စားဖို့၊ ဝတ်ဖို့ စိုးရိမ်ပူပန် မနေသင့်ဘူး။ (မ. ၆:၂၆-၃၀။ ဖိ. ၄:၆၊ ၇) မိဘတွေဟာ သားသမီးတွေကို ချစ်လို့ လိုအပ်ရာတွေ ထောက်ပံ့ပေးသလို ကောင်းကင်ဖခင်လည်း မိမိလူတွေကို ချစ်လို့ လိုအပ်ရာတွေ ထောက်ပံ့ပေးတယ်။ ဒါကြောင့် ကျွန်တော်တို့ကို ကြည့်ရှုထောက်မပေးမယ်ဆိုတာ စိတ်ချနိုင်တယ်။
၉။ မောင်နှံတစ်စုံရဲ့ တွေ့ကြုံမှုကနေ ဘာသိရသလဲ။
၉ ရုပ်ပိုင်း လိုအပ်ရာတွေကို ယေဟောဝါ ထောက်မပေးနိုင်ကြောင်း ဖော်ပြတဲ့ တွေ့ကြုံမှုတစ်ခု သုံးသပ်ကြည့်ပါ။ ရှေ့ဆောင် မောင်နှံတစ်စုံဟာ ကားဟောင်းလေးနဲ့ တစ်နာရီကျော် မောင်းပြီး ဒုက္ခသည်စခန်းမှာ နေတဲ့ ညီအစ်မတချို့ကို အစည်းအဝေး သွားကြိုတယ်။ “အစည်းအဝေး ပြီးနောက် အိမ်မှာ တစ်ခုခု လိုက်စားဖို့ ဖိတ်လိုက်တယ်။ ဒါပေမဲ့ ဖိတ်ပြီးမှ ကျွေးဖို့ ဘာမှ မရှိမှန်း သတိရလိုက်တယ်” လို့ ညီအစ်ကို ပြောတယ်။ ဘာဆက်ဖြစ်သလဲ။ “အိမ်ကိုလည်း ရောက်ရော တံခါးရှေ့မှာ စျေးဝယ်အိတ် နှစ်လုံး အပြည့် အစားအစာတွေ ရောက်နေတယ်။ ဘယ်သူ ထားသွားမှန်း မသိဘူး။ ကျွန်တော်တို့ကို ယေဟောဝါ တကယ် ဂရုစိုက်တယ်” လို့ ညီအစ်ကို ပြောတယ်။ နောက်ပိုင်း၊ သူတို့ရဲ့ ကားလေး ပျက်သွားတယ်။ ဒီကားကို အမှုဆောင်အတွက် သုံးနေရတာ။ ဒါပေမဲ့ ပြန်ပြင်ဖို့ ပိုက်ဆံ မရှိဘူး။ ကားပြင်ရင် ဘယ်လောက် ကျမလဲ သိရအောင် အနီးက ဝပ်ရှော့မှာ မေးနေတုန်း အမျိုးသားတစ်ယောက် ရောက်လာပြီး “ဒါ ဘယ်သူ့ ကားလဲ” လို့ မေးတယ်။ ညီအစ်ကိုက သူ့ကား ဖြစ်ကြောင်း၊ ပြင်ဖို့ လိုနေကြောင်း ပြောတဲ့အခါ “ကိစ္စ မရှိဘူး။ ဒီလိုကားမျိုး ကျွန်တော့်ဇနီး လိုချင်နေတာ။ အရောင်ကလည်း ကွက်တိပဲ။ ဘယ်လောက်နဲ့ ရောင်းမလဲ” လို့ မေးတယ်။ ညီအစ်ကိုလည်း ရောင်းလိုက်တယ်။ နောက်တစ်စီး ဝယ်ဖို့ ငွေအလုံအလောက် ရသွားတယ်။ “ကျွန်တော်တို့ ပြောမပြတတ်အောင် ဝမ်းသာသွားတယ်။ ဒါ မတော်တဆ မဟုတ်ဘူး။ ယေဟောဝါ ကူညီပေးတာ” လို့ ညီအစ်ကို ပြောတယ်။
၁၀။ ရုပ်ပိုင်း လိုအပ်ရာတွေအတွက် မစိုးရိမ်ဖို့ ဆာလံ ၃၇:၅ က ဘယ်လို ကူညီပေးသလဲ။
၁၀ သိုးထိန်းကောင်းရဲ့ စကားကို နားထောင်ပြီး ရုပ်ပိုင်း လိုအပ်ရာတွေအတွက် အစိုးရိမ် မလွန်ဘူးဆိုရင် ကျွန်တော်တို့ကို ယေဟောဝါ ထောက်မပေးမယ်ဆိုတာ စိတ်ချနိုင်ပါတယ်။ (ဆာလံ ၃၇:၅ ကို ဖတ်ပါ။ ၁ ပေ. ၅:၇) စာပိုဒ် ၅ မှာ ဖော်ပြထားတဲ့ အခြေအနေတွေကို စဉ်းစားကြည့်ပါ။ အခုအချိန်ထိ အိမ်ထောင်ဦးစီး ဒါမှမဟုတ် အလုပ်ရှင် တစ်ယောက်ယောက်ကို သုံးပြီး ကျွန်တော်တို့ရဲ့ နေ့စဉ်လိုအပ်ရာတွေကို ယေဟောဝါ ထောက်မပေးနေတာ ဖြစ်နိုင်တယ်။ ဒါပေမဲ့ အိမ်ထောင်ဦးစီး မထောက်ပံ့နိုင်တော့တဲ့အခါ ဒါမှမဟုတ် ကျွန်တော်တို့ အလုပ် ပြုတ်သွားတဲ့အခါ ယေဟောဝါ တစ်နည်းနည်းနဲ့ ဂရုစိုက်စောင့်ရှောက်မယ်၊ ထောက်မပေးမယ်ဆိုတာ စိတ်ချနိုင်တယ်။ မလုပ်နဲ့တော့လို့ သိုးထိန်းကောင်း ပြောတဲ့ နောက်တစ်ခုကို ဆက်သုံးသပ်ကြည့်ရအောင်။
“ဝေဖန်အကဲဖြတ်တာမျိုး မလုပ်ပါနဲ့တော့”
၁၁။ မဿဲ ၇:၁၊ ၂ အရ ဘာမလုပ်တော့ဖို့ ယေရှု ပြောသလဲ။ လိုက်နာဖို့ ဘာကြောင့် ခက်နိုင်သလဲ။
၁၁ မဿဲ ၇:၁၊ ၂ ကို ဖတ်ပါ။ မစုံလင်သူတွေအနေနဲ့ တခြားသူတွေကို ကျွန်တော်တို့ ဝေဖန်အကဲဖြတ်တတ်မှန်း ယေရှု သိတယ်။ ဒါကြောင့် “ဝေဖန်အကဲဖြတ်တာမျိုး မလုပ်ပါနဲ့တော့” လို့ ပြောတယ်။ ယုံကြည်သူချင်းတွေကို မဝေဖန်မိဖို့ အတတ်နိုင်ဆုံး ကြိုးစားပေမဲ့ မစုံလင်သူတွေ ဖြစ်လို့ အမြဲတော့ မအောင်မြင်ဘူး။ တစ်ခါတလေ ကိုယ်တိုင် ဝေဖန်ခံရတဲ့အခါမျိုးတွေ ရှိနိုင်တယ်။ အဲဒီအခါ ဘယ်လို တုံ့ပြန်မလဲ။ ဝေဖန်အကဲဖြတ်တာမျိုး မလုပ်ပါနဲ့တော့ဆိုတဲ့ ယေရှုရဲ့ စကားကို နားထောင်ဖို့ ကြိုးစားရမယ်။
၁၂-၁၃။ တခြားသူတွေကို အကဲမဖြတ်ဖို့ ယေဟောဝါရဲ့ ပုံသက်သေက ဘယ်လို ကူညီပေးသလဲ။
၁၂ ယေဟောဝါရဲ့ ပုံသက်သေကို တွေးတောဆင်ခြင်ခြင်းကနေ အကျိုးရနိုင်တယ်။ လူတွေရဲ့ ကောင်းကွက်ကို ဘုရား အာရုံစိုက်တယ်။ ကြီးလေးတဲ့ အမှားတွေ ကျူးလွန်ခဲ့တဲ့ ဘုရင် ဒါဝိဒ်နဲ့ ဆက်ဆံရာမှာ အဲဒီအချက်ကို တွေ့နိုင်တယ်။ ဥပမာ၊ ဒါဝိဒ်ဟာ ဗာသရှေဘနဲ့ ဖောက်ပြန်ပြီး သူ့ယောက်ျားကိုတောင် သတ်ခဲ့တယ်။ (၂ ရှ. ၁၁:၂-၄၊ ၁၄၊ ၁၅၊ ၂၄) ဒါကြောင့် ကိုယ်တိုင်သာမက တခြားဇနီးမယားတွေ အပါအဝင် တစ်မိသားစုလုံး ဒုက္ခရောက်ရတယ်။ (၂ ရှ. ၁၂:၁၀၊ ၁၁) နောက်တစ်ကြိမ်မှာလည်း စစ်သည်အင်အားကို ရေတွက်ခဲ့တယ်။ ယေဟောဝါကို အပြည့်အဝ အားမကိုးတဲ့ လုပ်ရပ်ပဲ။ စစ်တပ်အင်အားကို အားကိုးစိတ်၊ မာနစိတ်ကြောင့် လုပ်ခဲ့တာ ဖြစ်နိုင်တယ်။ ရလဒ်အနေနဲ့ ကပ်ရောဂါကြောင့် အစ္စရေးလူမျိုး ၇၀၀၀၀ လောက် သေဆုံးခဲ့ရတယ်။—၂ ရှ. ၂၄:၁-၄၊ ၁၀-၁၅။
၁၃ အဲဒီအချိန်မှာ သင်သာ အစ္စရေးနိုင်ငံမှာ ရှိနေတယ်ဆိုရင် ဒါဝိဒ်ကို ဘယ်လို မြင်မလဲ။ ဘုရားရဲ့ ကရုဏာ မခံစားထိုက်ဘူးလို့ မြင်မလား။ ယေဟောဝါကတော့ အဲဒီလို မမြင်ဘူး။ ဘဝတစ်လျှောက်လုံး ဒါဝိဒ် သစ္စာရှိခဲ့တာကို ခြုံငုံကြည့်ပြီး စစ်မှန်တဲ့ နောင်တကို အာရုံစိုက်တယ်။ ဒါကြောင့် ကြီးလေးတဲ့ အပြစ်တွေကို ခွင့်လွှတ်ပေးတယ်။ မိမိကို ဒါဝိဒ် သိပ်ချစ်မှန်း၊ မှန်ရာကို လုပ်ချင်စိတ် ရှိမှန်း သိတယ်။ ကျွန်တော်တို့ရဲ့ ကောင်းကွက်ကို ဘုရား ကြည့်ပေးတဲ့အတွက် ကျေးဇူးတင်စရာပဲ မဟုတ်လား။—၁ ဘု. ၉:၄။ ၁ ရာ. ၂၉:၁၀၊ ၁၇။
၁၄။ တခြားသူတွေကို မဝေဖန်မိဖို့ ဘာက ကူညီပေးသလဲ။
၁၄ မစုံလင်တဲ့ လူသားတွေဆီက ပြည့်ဝစုံလင်မှုကို ယေဟောဝါ မမျှော်လင့်ဘူးဆိုရင် မစုံလင်သူ အချင်းချင်း ပြည့်ဝစုံလင်ဖို့ မမျှော်လင့်ဘဲ ကောင်းကွက်ကို ရှာသင့်တယ်။ တခြားသူရဲ့ အားနည်းချက်ကို မြင်ပြီး ဝေဖန်အကဲဖြတ်ဖို့ သိပ်လွယ်တယ်။ ဒါပေမဲ့ ယေဟောဝါကို တုပသူကတော့ တခြားသူရဲ့ အားနည်းချက်တွေကို မြင်ရင်တောင် အဆင်ပြေပြေ ရှေ့ဆက်နိုင်တယ်။ စိန်ရိုင်းတစ်ပွင့်ဟာ မလှပေမဲ့ စိန်အကြောင်း နားလည်သူကတော့ အပေါ်ယံကိုသာ မကြည့်ဘဲ သွေးလိုက်ရင် ဘယ်လောက် လှပြီး တန်ဖိုးရှိလာမလဲဆိုတာ မြင်တယ်။ ယေဟောဝါနဲ့ ယေရှုလိုပဲ ကျွန်တော်တို့လည်း တခြားသူရဲ့ အားနည်းချက်တွေကို မဟုတ်ဘဲ ကောင်းကွက်တွေကို မြင်တတ်ဖို့ လိုတယ်။
၁၅။ တခြားသူတွေကို မဝေဖန်မိဖို့ ဘာက ကူညီပေးနိုင်သေးသလဲ။
၁၅ ကောင်းကွက်ကို မြင်တတ်ဖို့အပြင် နောက်ထပ် ဘယ်အချက်က တခြားသူတွေကို မဝေဖန်မိဖို့ ကူညီပေးနိုင်သလဲ။ သူတို့ရဲ့ ဘဝကို စာနာနားလည်ပေးခြင်းပါပဲ။ ဥပမာတစ်ခု သုံးသပ်ကြည့်ပါ။ တစ်နေ့၊ ဗိမာန်တော်မှာ ဆင်းရဲတဲ့ မုဆိုးမ တစ်ယောက် တန်ဖိုးနည်းတဲ့ ဒင်္ဂါးငယ်နှစ်ပြား အလှူငွေပုံးထဲ လု. ၂၁:၁-၄။
ထည့်တာကို ယေရှု မြင်တယ်။ “ဘာလို့ ဒီလောက်ပဲ ထည့်တာလဲ” လို့ ယေရှု မပြောဘူး။ မုဆိုးမ ထည့်တဲ့ ပမာဏကို မကြည့်ဘဲ သူ့စိတ်ရင်း၊ အခြေအနေကို ထည့်စဉ်းစားပြီး အတတ်နိုင်ဆုံး ပေးတာကို ချီးမွမ်းတယ်။—၁၆။ ဗရော်နီကာရဲ့ တွေ့ကြုံမှုကနေ ဘာသိရသလဲ။
၁၆ တခြားသူတွေရဲ့ အခြေအနေကို နားလည်ပေးဖို့ ဘယ်လောက် အရေးကြီးကြောင်း ညီအစ်မ ဗရော်နီကာရဲ့ တွေ့ကြုံမှုက ဖော်ပြတယ်။ အသင်းတော်မှာ သားအမိ နှစ်ယောက် ရှိတယ်။ မိခင်ဟာ ကြင်ဖော်မဲ့သူ ဖြစ်တယ်။ “အသင်းတော် လုပ်ဆောင်မှုတွေမှာ သူတို့ သိပ်မပါကြလို့ ကျွန်မ အမြင်စောင်းမိတယ်။ ဒါပေမဲ့ တစ်ရက်၊ အမှုဆောင်မှာ မိခင်ဖြစ်သူနဲ့ တွဲမိတော့ ဉာဏ်ရည် ချို့တဲ့တဲ့ သားကြောင့် ကြုံရတဲ့ အခက်အခဲတွေကို သူ ရှင်းပြတယ်။ ကိုယ်တိုင်နဲ့ သားဖြစ်သူရဲ့ ရုပ်ပိုင်း၊ ဘုရားရေးရာပိုင်း လိုအပ်ချက်တွေကို အတတ်နိုင်ဆုံး ဖြည့်ဆည်းပေးနေရတာ။ သားရဲ့ ကျန်းမာရေးကြောင့် တစ်ခါတလေ တခြားအသင်းတော်မှာ သွားတက်ရတာမျိုး ရှိတယ်။ ဒီလောက် အခက်အခဲ ကြုံနေမှန်း ကျွန်မ လုံးဝ မသိလိုက်ဘူး။ အခုတော့ ယေဟောဝါရဲ့ အမှုတော်မှာ ဒီညီအစ်မ အတတ်နိုင်ဆုံး ကြိုးစားနေတာတွေကို သိပ်တန်ဖိုးထားလေးမြတ်မိတယ်” လို့ ဗရော်နီကာ ပြောတယ်။
၁၇။ ယာကုပ် ၂:၈ မှာ ဘာလုပ်ဖို့ အားပေးထားသလဲ။ ဘယ်လို လုပ်နိုင်မလဲ။
၁၇ ယုံကြည်သူချင်းတွေကို ဝေဖန်အကဲဖြတ်တာမျိုး လုပ်တတ်ယာကုပ် ၂:၈ ကို ဖတ်ပါ။) တခြားသူတွေကို ဝေဖန်အကဲဖြတ်တာမျိုး မလုပ်မိအောင် ကူညီပေးဖို့ ယေဟောဝါဆီ စိတ်ထက်သန်စွာ ဆုတောင်းပါ။ ကိုယ်အပြစ်မြင်နေသူကို ကိုယ့်ဘက်က အစပြု စကားပြောခြင်းအားဖြင့် ဆုတောင်းတဲ့အတိုင်း လုပ်ဆောင်ပါ။ ဒီနည်းနဲ့ သူ့အကြောင်း ပိုသိလာမယ်။ အမှုဆောင်မှာ အတူတွဲဖို့ ကမ်းလှမ်းနိုင်တယ်။ ထမင်းစား ဖိတ်နိုင်တယ်။ သူ့အကြောင်း ပိုသိလာတဲ့အခါ ကောင်းကွက်တွေကို မြင်ဖို့ ကြိုးစားပါ။ ဒါဟာ ယေဟောဝါနဲ့ ယေရှုရဲ့ ပုံသက်သေကို လိုက်လျှောက်ရာ ရောက်တယ်။ ဒီနည်းအားဖြင့် တခြားသူတွေကို “ဝေဖန်အကဲဖြတ်တာမျိုး မလုပ်ပါနဲ့တော့” ဆိုတဲ့ သိုးထိန်းကောင်းရဲ့ စကားကို နားထောင်ကြောင်း ပြနိုင်တယ်။
မှန်း သတိထားမိရင် ဘာလုပ်နိုင်သလဲ။ ညီအစ်ကို/မတွေကို ချစ်ရမယ်ဆိုတာ သတိရပါ။ (၁၈။ သိုးထိန်းကောင်းရဲ့ စကားကို နားထောင်ကြောင်း ဘယ်လို ပြနိုင်သလဲ။
၁၈ ပကတိသိုးတွေဟာ သိုးထိန်းရဲ့ စကားကို နားထောင်သလို နောက်လိုက်တွေလည်း ယေရှုရဲ့ စကားကို နားထောင်ကြတယ်။ ရုပ်ပိုင်း လိုအပ်ရာတွေအတွက် အစိုးရိမ် မလွန်ဖို့၊ တခြားသူတွေကို မဝေဖန်မိဖို့ ကြိုးစားမယ်ဆိုရင် ကျွန်တော်တို့ရဲ့ ကြိုးစားမှုကို ယေဟောဝါနဲ့ ယေရှု ကောင်းချီး ပေးပါလိမ့်မယ်။ ကျွန်တော်တို့ဟာ “သိုးစုငယ်” အဝင်ဖြစ်စေ၊ “တခြားသိုး” အဝင်ဖြစ်စေ သိုးထိန်းကောင်းရဲ့ စကားကို ဆက်နားထောင်၊ နာခံကြပါစို့။ (လု. ၁၂:၃၂။ ယော. ၁၀:၁၁၊ ၁၄၊ ၁၆) နောက်လိုက်တွေ လုပ်ဆောင်ဖို့ ယေရှု မှာခဲ့တဲ့ အရာနှစ်ခုအကြောင်း နောက်ဆောင်းပါးမှာ ဆွေးနွေးကြပါမယ်။
သီချင်း ၁၀၁ စည်းလုံးစွာ လုပ်ဆောင်ခြင်း
^ အပိုဒ်၊ 5 ယေရှုရဲ့ သိုးတွေ ယေရှုစကား နားထောင်မယ်လို့ ပြောတာဟာ မိမိသွန်သင်ချက်တွေကို တပည့်တွေ နားထောင်၊ ကျင့်သုံးမှာကို ဆိုလိုတယ်။ ရုပ်ပစ္စည်းတွေအတွက် အစိုးရိမ် မလွန်ဖို့၊ တခြားသူတွေကို ဝေဖန်အကဲဖြတ်တာမျိုး မလုပ်ဖို့ ဆိုတဲ့ ယေရှုရဲ့ သွန်သင်ချက် နှစ်ခုကို ဒီဆောင်းပါးမှာ ဆွေးနွေးကြပါမယ်။ ဘယ်လို ကျင့်သုံးနိုင်ကြောင်းကိုလည်း ဆွေးနွေးကြပါမယ်။
^ အပိုဒ်၊ 51 ပုံအညွှန်း– ညီအစ်ကိုတစ်ယောက် အလုပ်ပြုတ်သွားတယ်။ မိသားစုရဲ့ လိုအပ်ရာတွေ ဝယ်ဖို့ ငွေ လုံလုံလောက်လောက် မရှိတော့ဘူး။ အိမ်ပြောင်းဖို့လည်း လိုလာတယ်။ အဲဒီလို ပြဿနာတွေကြောင့် စိုးရိမ်ပူပန်ပြီး ဝတ်ပြုရေးကို ဦးစားမထားတော့တာမျိုး ဖြစ်နိုင်။
^ အပိုဒ်၊ 53 ပုံအညွှန်း– ညီအစ်ကိုတစ်ယောက် အစည်းအဝေး နောက်ကျပေမဲ့ တခြား ကောင်းကွက်တွေ ရှိ။ အလွတ်သဘော သက်သေခံနေ။ အသက်ကြီးသူကို ကူညီနေ။ နိုင်ငံတော်ခန်းမမှာ လုပ်အားပေးနေ။