1. ¿Kenke Jesús kiijtok itokilijkauaj elij kej pilborregojtsitsij?

JESÚS kiixnextik kej mouika ika itokilijkauaj eli sanse kej se tlapialmokuitlauijketl kema kitokiliaj iborregojuaj (Juan 10:14). Nopa neskayotl kuali kinamiki pampa pilborregojtsitsij kuali kiixmatij itoskak katli kinmokuitlauia. Se tlakatl katli paxaloto seyok altepetl kiitak nelia kiampa pano. Ya kiijtoua: “Tijnekiyayaj tikinixkopinasej se keskij borregojmej uan tijnejkej ma monechkauikaj kampa tiitstoyaj. Amo monechkauijkej pampa amo kiixmatiyayaj totoskak. Teipa, kema kikajkej itoskak katli kinmokuitlauiyaya, nima kitokilijkej”.

2, 3. 1) ¿Kenijkatsa tijnextiaj tijtlakakiliaj Jesús? 2) ¿Tlake tikitasej ipan ni tlamachtili uan ipan seyok?

² Tlen kiitak nopa tlakatl techilnamikilia tlen Jesús kiijtok kichiuaskiaj itokilijkauaj. Ya kiijtok: “Nechtoskakisej” (Juan 10:16). ¿Kenijkatsa tijkakiskiaj Jesús itoskak tlaj ya itstok iluikak? Uelis tijkakisej itoskak tlaj tijchiuaj tlen ya tlamachtik (Mat. 7:24, 25).

³ Ipan ni tlamachtili uan ipan tlamachtili 51 moixtomas se keski tlamantli tlen Jesús tlamachtik. Tikitasej Jesús kiijtok tlake ayokmo kinamiki tijchiuasej uan tlake kena. Achtoui ma tikitakaj ome tlamantli tlen amo kinamiki tijchiuasej.

4. Kej kiijtoua Lucas 12:29, ¿tlake ueliskia kichiuas tlauel ma timotekipachokaj?

⁴ (Xijpoua Lucas 12:29). Jesús kiniljuik itokilijkauaj amo ma motekipachokaj ika tlen kinpolouayaya. Uan  nochi tijmatij tlauel techpaleuia tlen Jesús kiijtok. Maske tijnekij kiampa tijchiuasej, kemantika tijmatij ouij. ¿Kenke?

5. ¿Kenke se keskij toikniuaj tlauel motekipachouaj?

⁵ Sekij toikniuaj tlauel motekipachouaj pampa amo kipiaj tlen kikuasej, tlen mokentisej uan kampa itstosej. Uelis kampa itstokej amo onka miak tomij, yeka amo kinaxilia tlen ika kinpanoltisej ininchampoyouaj. Nojkia, uelis mijki katli kinpanoltiyaya, yeka amo kipiaj tlen moneki. Uan nopa ueyi kokolistli COVID-19 nojkia kichijtok miakej ma kipolokaj ininteki uan amo ma kipiakaj tomij (Ecl. 9:11). Tlaj techpanotok se tlen ni tlamantli o tijpiaj sekinok tlaouijkayotl, ¿tlake techpaleuis amo tlauel ma timotekipachokaj?

6. Xikixtoma tlake kipanok Pedro se tonali.

⁶ Se tonali, apóstol Pedro uan sekinok apóstoles itstoyaj ipan se barco ipan ueyi atl Galilea kema chikauak uetski atl. Teipa, kiitakej Jesús nejnemiyaya aixko. Yeka, Pedro kiiljuik: “NoTeko, intla nelia ta, uajka xijchiua ma ninejnemi aixko hasta kampa tiitstok”. Uan kema Jesús kiiljuik “xiuala”, “Pedro kiski ipan kuakanaua uan nejnenki aixko para asis kampa Jesús. Pero kema kikajki nopa ajakatl tlen ualayaya chikauak, nelia momajmatik uan pejki atsonpoliui, uan tsajtsik: ‘NoTeko xinechmanaui’”. Jesús nima kimaitskik uan kimanauik. Kej tikitaj, Pedro uelki nejnemi aixko kema san kitlachilijtoya Jesús, uan kema tlachixki sejkanok, momajmatik uan amo kimatki tlake kichiuas, yeka pejki atsonpoliui (Mat. 14:24-31).

7. ¿Tlake tijyekouaj tlen Pedro kipanok?

 ⁷ Ma tikitakaj tlake tijyekouaj tlen Pedro kipanok. Kema temok tlen nopa barco uan pejki nejnemi aixko, amo moiljuik tlaj nopa ajakatl kichiuaskia ma atsonpoliui. Maske ya kinekiyaya asiti kampa Jesús, amo uelki pampa pejki kitlachilia nopa chikauak ajakatl. Maske tojuantij amo tinejnemij aixko, kena uelis tikixnamikisej se keski tlaouijkayotl kampa kinextis tlaj kuali titlaneltokaj. Tlaj amo timotemachiaj ipan Jehová uan tlen ipan techtenkauilijtok, uelis kejuak atsonpoliuis totlaneltokilis. Yeka, maske tikixnamikisej uejueyi tlaouijkayotl, ma timotemachikaj Jehová kena uelis techpaleuis. ¿Tlake techpaleuis amo ma timotekipachokaj?

8. ¿Tlake techpaleuis amo tlauel timotekipachosej ika tlen techpoloua?

⁸ Tlaj timotemachiaj ipan Jehová, techpaleuis amo timotekipachosej. Ma tikilnamikikaj toTata, katli tlauel teiknelia, kitenkajtok tlaj tikachtouitlaliaj tijtekipanosej, ya techmakas tlen techpoloua (Mat. 6:32, 33). Uan ya nochipa kiampa kichijtok (Deut. 8:4, 15, 16; Sal. 37:25). Jehová kuali kinmokuitlauia totomej uan xochitl, yeka amo kinamiki timotekipachosej tlaj amo tijpiaj tlen tijkuasej o tlen timokentisej (Mat. 6:26-30; Filip. 4:6, 7). Kej se tetaj kitemoua tlen kikuasej ikoneuaj pampa tlauel kiniknelia, Jehová nojkia kinmakas itekipanojkauaj tlen kinpoloua. Yeka, uelis timotemachisej ya nojkia techmokuitlauis.

9. ¿Tlake tijyekoua tlen kinpanok toikniuaj?

⁹ Ma tikitakaj kenijkatsa Jehová kena uelis techmakas tlen moneki. Se toikni iuaya isiua katli senkistok tlatekipanouaj, yajkej se hora ipan inincarro kampa momanauiaj maseualmej, pampa nopaya itstoyaj se keskij tosiuaikniuaj katli yaskiaj tlanechikoli. Toikni kiijtoua: “Tikiniljuijkej tosiuaikniuaj ma tlakuatij tochaj, uan teipa tikilnamijkej amo tleno tijpixtoyaj”. ¿Tlake panok? Toikni nojua kiijtoua: “Kema tiasitoj tochaj, kalixpa kikajtoyaj ome uejueyi bolsas tlen kipixtoya tlakualistli. Maske amo tijmatiyayaj ajkia kikajtoya, Jehová techmakak tlen techpolouayaya”. Teipa, inincarro tlen kitekiuiyayaj kema tlajtolmoyauayayaj sosolijki, uan amo kipixtoyaj tomij tlen ika kikualchijchiuasej. Yeka, yajkej kampa kikualchijchiuaj carros uan tlatsintokakej keski kininamaskiaj. Teipa, se tlakatl tlatsintokak ajkia iaxka nopa carro, uan toikni kiiljuik iaxka uan sosolijtoya. Nopa tlakatl kiiljuik: “Amo kenijki. Nimitskouilis pampa nosiua kineki se carro sanse kej ni”. Toikni kinamakak icarro, kiampa kipixki tomij tlen ika ueliskia sampa kikouas seyok carro. Toikni kiijtoua: “Amo nijmati kenijkatsa nikijtos tlen tijyolmatkej ika tlen techpanotoya. Timotemachiaj Jehová techpaleuik”.

10. ¿Kenijkatsa Salmo 37:5 techpaleuia amo ma timotekipachokaj ika tlen techpoloua?

¹⁰ Kema tijtlakakiliaj Jesús uan ayokmo tlauel timotekipachouaj ika tlen techpoloua, uelis timotemachisej Jehová techmakas tlen moneki (xijpoua Salmo 37:5; 1 Ped. 5:7). Ma tikilnamikikaj tlen tikijtojkej ipan párrafo 5 tlen miakej toikniuaj kiixnamikij. Uelis Jehová kichijtok se tlakatl katli kinyakana ichampoyouaj o se katli kintekimaka sekinok  ma kinpaleuikaj uan kiampa kipiasej tlen moneki. Yeka, tlaj nopa tlakatl ayokmo ueli kinmaka ichampoyouaj tlen ika mopanoltisej o ayokmo kipia tekitl, Jehová nojua kinmakatos ichampoyouaj tlen kinpoloua. Nama ma tikitakaj seyok tlamantli tlen Jesús kiijtok ayokmo ma tijchiuakaj.

11. Kej kiijtoua Mateo 7:1, 2, ¿tlake kiijtok Jesús ayokmo ma tijchiuakaj, uan kenke tijmatij ouij?

¹¹ (Xijpoua Mateo 7:1, 2). Jesús kimajtoya pampa titlajtlakolejkej, nochipa san tijtlachiliaj kema se akajya mokuapoloua, yeka kiijtok: “[Ayokmo] xikintlajtolsenkauakaj sekinok”. Uan maske amo tijnekiskiaj kiampa tijchiuasej kema toikniuaj mokuapolouaj, kemantika tijmatij ouij. Uajka, ¿tlake techpaleuis? Moneki tijtlakakilisej Jesús uan tijchiuasej kampeka ayokmo san tijtlachilisej kema mokuapolouaj.

12, 13. ¿Kenijkatsa techpaleuia pampa Jehová amo san kitlachilia kema timokuapolouaj?

¹² Tlauel techpaleuia timoyoliljuisej Jehová san kiita nopa kuali tlamantli tlen kichiuaj itekipanojkauaj. Kiampa kichijki ika tlanauatijketl David, katli tlauel tlajtlakolchijki. Se neskayotl, momekatik ika Betsabé uan tlanauatik ma kimiktikaj iueue (2 Sam. 11:2-4, 14, 15, 24). ¿Tlake panok kema kiampa kichijki? Tlauel moyolkokok uan ichampoyouaj nojkia tlauel tlaijiyouijkej (2 Sam. 12:10, 11). Teipa, nojkia amo motemachik ipan Jehová kema tlanauatik ma kinpouakaj tlateuianij tlen Israel. Uelis pampa moueyimatki, san motemachik ipan itlateuijkauaj. ¿Tlake panok teipa? 70,000 israeleuanij mijkej ika se ueyi kokolistli (2 Sam. 24:1-4, 10-15).

¹³ Tlaj ipan nopa tonali tiitstoskiaj nopaya, ¿kenijkatsa tikitaskiaj tlen David kichijki? ¿Timoiljuijtoskiaj Jehová amo kinamikiyaya kitlasojtlas? Jehová amo kiampa kichijki. Ya mosentlalik kenijkatsa tlauel kuali kitekipanojtoya uan nojkia pampa moyolkueptoya ika nochi iyolo. Yeka, kitlapojpoljuik maske tlauel tlajtlakolchijtoya. Jehová kimatiyaya David tlauel kiikneliyaya uan kinekiyaya kichiuas tlen xitlauak. Tlauel tijtlaskamatij Jehová pampa ya san mosentlalia kiitas kema tijchiuaj tlen kuali (1 Rey. 9:4; 1 Crón. 29:10, 17).

14. ¿Tlake kinpaleuijtok se keskij toikniuaj ayokmo san kiitasej kema sekinok mokuapolouaj?

¹⁴ Kej tikitaj, Jehová amo mosentlalia kema timokuapolouaj, yeka nojkia kiampa moneki tijchiuasej ika sekinok uan san tikitasej nopa kuali tlamantli tlen kinextiaj. Kemantika nima tikitaj kema se akajya mokuapoloua uan tikijtojtiuetsij tlen amo kinamiki. Tlaj tijchiuaj kej Jehová, kuali timouikasej ininuaya sekinok maske tijmatij mokuapolouaj. Maske nopa piltetsi diamante kema ayamo kiyejyekchiuaj amo nesi tlauel yejyektsi, se katli tlalnamiki kimati kema kiyejyekchiuasej, tlauel kuali nesis uan kipias miak ipati. Kej Jehová uan Jesús, ma timosentlalikaj ipan nopa kuajkuali tlamantli tlen kinextia se akajya uan amo san ma tikitakaj kema mokuapoloua.

15. ¿Kenke tlaj timoiljuisej tlen sekinok kinpanotok techpaleuis amo ma tikinijilnamikikaj?

¹⁵ Maske timosentlalisej ipan nopa kuajkuali tlamantli tlen se akajya kinextia,  ¿tlake techpaleuis amo ma tikijilnamikikaj? Moneki timoiljuisej kenijkatsa itstok. Ma tikitakaj se neskayotl. Se tonali kema Jesús itstoya teokali kiitak se siuatl teikneltsi, katli ayokmo kipixtoya iueue, kitlaliyaya ipan pilkuakajontsi ome piltomintsitsij tlen amo tlauel ipati. Jesús amo tlatsintokak kenke nopa siuatl amo temakatoya miak tomij. Ya kimajtoya kenijkatsa itstoya uan kenke san ya nopa temakak, yeka kiijtok kuali tlen kichijtoya (Luc. 21:1-4).

16. ¿Tlake tijyekoua tlen kipanok Verónica?

¹⁶ Tlen kipanok Verónica techmachtia tlauel ipati timoiljuisej kej itstokej sekinok. Ipan itlanechikol, itstoya se tosiuaikni katli iselti kiiskaltiyaya ikone. Verónica kiijtoua: “Nimoiljuiyaya amo kuali tlaneltokayayaj pampa amo tlauel tlapaleuiyayaj ipan tlanechikoli, yeka amo kuali nikinitayaya. Se tonali nitlajtolmoyajki iuaya tosiuaikni, uan nechiljuik ikone kipixtoya se kokolistli katli itoka autismo. Yeka, monekiyaya kuali kimokuitlauis uan kipaleuis kuali ma tlaneltoka. Uan kema ikone amo kuali kiyolmatiyaya, yauiyayaj ipan seyok tlanechikoli”. Verónica nojkia kiijtoua: “Amo kema nimoiljuik tlaj tosiuaikni tlauel ouij kej itstoya. Nama tlauel nijpatiita uan nijtlepanita pampa kichiua se ueyi kampeka kitekipanos Jehová”.

17. ¿Tlake techtlajtolmaka Santiago 2:8, uan kenijkatsa tijchiuasej?

 ¹⁷ ¿Tlake moneki tijchiuasej tlaj tikitaj san tijtlachiliaj kema mokuapoloua se toikni? Ma tikilnamikikaj moneki tikiniknelisej nochi toikniuaj (xijpoua Santiago 2:8). Nojkia, moneki tikiljuisej Jehová ma techpaleui ayokmo san tikitasej kema mokuapoloua se toikni, uan ma tijchiuakaj kampeka tikamanaltisej iuaya. Nopa techpaleuis kuali tikixmatisej. Nojkia, uelis titlajtolmoyauasej iuaya o tijtlaneuisej ma tlakuati tochaj. Kema kuali tikixmajtiasej toikni tijchiuasej kej Jehová uan Jesús, katli san kiitaj nopa kuali tlamantli tlen se akajya kinextia. Nojkia, tijnextisej tijchiuaj tlen Jesús kiijtok uan ayokmo tikinijilnamikisej sekinok.

18. ¿Kenijkatsa tijnextia tijtlakakilia “nopa kuali tlamokuitlauijketl”?

¹⁸ Sanse kej nopa borregojmej kitlakakiliaj kema ininteko kinnotsa, tojuantij moneki tijtlakakilisej Jesús itoskak. Tlaj tijchiuaj kampeka amo tlauel timotekipachosej ika tlen techpoloua uan amo san tikitaj kema sekinok mokuapolouaj, Jehová uan Jesús tlauel techteochiuasej. Tlaj timotemachiaj tiasej iluikak o tiitstosej ipan Tlaltipaktli, moneki tijtlakakilisej uan tijchiuasej tlen “nopa kuali tlamokuitlauijketl” Jesús technauatia (Luc. 12:32; Juan 10:11, 14, 16). Ipan nopa seyok tlamachtili tikitasej ome tlamantli tlen Jesús kiijtok moneki tijchiuasej.