1. Kuyini okungabe kwenza uJesu wafanisa abalandeli bakhe lezimvu?

UJESU wafanisa ubudlelwano ayelabo labalandeli bakhe lobudlelwano obukhona phakathi kukamelusi lezimvu zakhe. (Joh. 10:14) Kwakuqondile ukuthi enze njalo ngoba izimvu ziyamazi umelusi wazo futhi ziyalilalela ilizwi lakhe. Enye indoda yakubona ngawayo lokho, yathi: “Mina labanye engangihamba labo sasifuna ukuthatha ezinye izimvu amapikitsha futhi sasizibiza ukuthi zisondele eduze. Kodwa azizange zibuye ngoba zazingawazi amazwi ethu. Kuthe kusenjalo kwafika umfanyana ozelusayo futhi wathi esanda nje ukuzibiza zahle zamlandela.”

2-3. (a) Abalandeli bakaJesu batshengisa njani ukuthi bayalilalela ilizwi lakhe? (b) Sizaxoxa ngani esihlokweni lesi lakwesilandelayo?

² Okwabonwa yindoda le kusikhumbuza amazwi kaJesu amayelana lezimvu zakhe kumbe abafundi bakhe. Wathi: “Zizalilalela ilizwi lami.” (Joh. 10:16) Kodwa uJesu usezulwini. Pho singalizwa njani ilizwi lakhe? Silizwa nxa sitaditsha lokho asifundisa khona futhi sililalela ngokwenza izinto asifundisa zona.—Mat. 7:24, 25.

³ Esihlokweni lesi lakwesilandelayo sizaxoxa ngezinye izinto uJesu asifundisa zona. Njengoba sizabona, kulezinto athi siyekele ukuzenza lezinye athi sizenze. Sizaqala sixoxe ngezinto ezimbili umelusi omuhle athi siyekele ukuzenza.

4. Ngokwalokho okutshiwo kuLukha 12:29, kuyini okungabangela ukuthi ‘sikhathazeke kakhulu’?

⁴ Bala uLukha 12:29. UJesu watshela abalandeli bakhe ukuthi ‘bayekele ukukhathazeka kakhulu’ ngokuthi bazazithola njani izinto abazidingayo ekuphileni. Siyakwazi ukuthi lokho esikutshelwa nguJesu kuhlala kuqondile futhi kunceda. Siyafuna sibili ukukwenza kodwa ngezinye izikhathi kungaba nzima ukuthi sikwenze. Kuyini okungabangela lokho?

5. Kuyini okungenza abanye bakhathazeke ngokuthi bazazithola njani izinto abazidingayo empilweni?

 ⁵ Abanye bangakhathazeka ngokuthi bazakuthola njani ukudla, izigqoko lendawo yokuhlala. Mhlawumbe bahlala elizweni elingamanga kuhle kwezomnotho futhi okunzima khona ukuthola umsebenzi. Yikho bangabe bethwala nzima ukuthi bathole imali eyeneleyo yokunakekela izimuli zabo. Kwesinye isikhathi umuntu obesebenza ukuze anakekele imuli angabe esetshonile futhi lokhu kungenza imuli isale ingelamali yokuthenga izinto ezidingayo. Kanti njalo abanengi bangabe bephelelwe yimisebenzi ngenxa yomkhuhlane we-COVID-19. (UmTshu. 9:11, NWT) Nxa sehlelwe ngokunye kwalokho esikhulume ngakho kumbe ngobunye ubunzima, singasilandela njani iseluleko sikaJesu sokuthi siyekele ukukhathazeka?

6. Chasisa okwenzakala kumphostoli uPhetro.

⁶ Ngelinye ilanga umphostoli uPhetro labanye abaphostoli babesesikepeni elwandle lwaseGalile ngesikhathi kulesiphepho futhi babona uJesu ehamba phezu kwamanzi. UPhetro wathi: “Nkosi, nxa kunguwe, wothi ngize kuwe ngihamba phezu kwamanzi.” UJesu esethe kuye “Woza,” uPhetro waphuma esikepeni “wahamba phezu kwamanzi eqonde kuJesu.” Kwasekusenzakalani ngemva kwalokho? “Wathi ekhangela isiphepho wesaba. Uthe esecwila, wamemeza wathi: ‘Nkosi, ngisindisa bo!’” UJesu welula isandla sakhe wambamba. Okwenza uPhetro wenelisa ukuhamba phezu kwamanzi yikukhangela uJesu. Kodwa wathi ekhangela isiphepho wakhulelwa yikwesaba lokuthandabuza, yikho waqalisa ukucwila.—Mat. 14:24-31.

7. Sifundani kulokho okwenzakala kuPhetro?

 ⁷ Kukhona esingakufunda kulokho okwenzakala kuPhetro. Ngesikhathi ephuma esikepeni ehamba phezu kwamanzi kazange akucabange ukuthi uzakhathazeka ngesiphepho aqalise ukucwila. Wayefuna sibili ukuqhubeka ehamba phezu kwamanzi aze ayefika kuJesu. Kodwa kulokuthi aqhubeke ekhangele uJesu, yena waqalisa ukukhathazeka ngesiphepho. Lathi lamuhla kumele sibe lokholo ukuze siqinisele nxa siphakathi kwenhlupho njengoba nje uPhetro kwakumele abe lokholo ukuze ahambe phezu kwamanzi. Nxa singayekela ukuthemba uJehova futhi siqalise ukuthandabuza ukuthi uzazigcwalisa izithembiso zakhe, ukholo lwethu luzaxega, besekungani siyacwila phakathi kwenhlupho zethu. Ngakho kungelani lokuthi sehlelwa zinhlupho ezinkulu kangakanani kumele siqhubeke sithemba uJehova futhi singathandabuzi ukuthi uzasincedisa. Singakwenza njani lokho?

8. Kuyini okuzasinceda ukuthi singakhathazeki kakhulu ngezinto esizidingayo empilweni?

⁸ Kumele simthembe uJehova kulokuthi sikhathazeke kakhulu ngenhlupho zethu. Akumelanga sikhohlwe ukuthi uBaba wethu osithandayo uJehova uthembisa ukuthi uzasinakekela nxa singafaka izinto zokukhonza kuqala. (Mat. 6:32, 33) Kakaze asibambise ilitshe. Uhlala esigcina isithembiso lesi. (Dute. 8:4, 15, 16; Hubo. 37:25) Nxa uJehova enakekela izinyoni lamaluba, akumelanga sikhathazeke ngokuthi sizakudlani kumbe sizagqokani. (Mat. 6:26-30; Flp. 4:6, 7) Abazali bayabathanda abantwababo, yikho bebanakekela. LoBaba wethu osezulwini uyabathanda abantu bakhe, yikho ebanakekela. Akumelanga sithandabuze lakancane ukuthi uJehova uzasinakekela.

9. Ufundani kulokho okwenzakala komunye umfowethu lomkakhe?

⁹ Ake sixoxe ngokunye okwake kwenzakala okutshengisa ukuthi uJehova uyasinakekela sibili. Omunye umfowethu lomkakhe abangamaphayona bahamba okwesikhathi esedlula ihola ngemota yabo endala besiyathatha abanye odade ababehlala lapho okugcinwa khona iziphepheli. Babefuna ukuhamba labo emhlanganweni webandla. Umfowethu lo uthi: “Ngemva komhlangano sanxusa odade laba ukuthi bazokudla lathi emzini wethu kodwa sakhumbula ukuthi sasingelakudla.” Manje babezakwenzani? Uqhubeka esithi: “Sathi sifika endlini sathola emnyango kulamaphephabheki amabili amakhulu agcwele ukudla. Asikwazi ukuthi ngubani owayewatshiye khonapho. UJehova wasinika sibili esasikudinga.” Ngemva kwesikhathi, imota yemuli le yafa. Yiyo ababeyisebenzisa ukuthi bahambe ngayo ekutshumayeleni kodwa babengelamali yokuyilungisisa. Bayihambisa egarajini ukuze bayekuzwa ukuthi kungaba yimalini ukuyilungisisa. Kwasekufika enye indoda yabuza yathi: “Ngekabani imota le?” Umfowethu wamphendula wathi ngeyakhe, wasesithi ifuna ukulungiswa. Indoda le yamphendula yathi: “Akulandaba ukuthi ifile. Umkami ufuna umhlobo wemota le futhi elombala onje. Ungangithengisela ngemalini?” Umfowethu wahle wayithengisela indoda le futhi wathola imali eyeneleyo yokuthi athenge enye. Uthi: “Ngiyehluleka ukuchasisa intokozo esaba layo mhlalokho. Sasala singathandabuzi ukuthi nguJehova owayesincedisile.”

10. IHubo 37:5 lithi senzeni ukuze singakhathazeki ngalokho esikudingayo?

¹⁰ Nxa singalalela umelusi omuhle siyekele ukukhathazeka kakhulu ngokuthi sizaphila ngani, sizaqiniseka ukuthi uJehova uzasinakekela. (Bala iHubo 37:5; 1 Phet.  5:7) Cabanga ngobunzima esike saxoxa ngabo kundima 5. Kuze kube khathesi kungenzeka uJehova ubesinika esikudingayo esebenzisa inhloko yemuli kumbe umsebenzi wethu wokuziphilisa. Nxa kuyikuthi inhloko yemuli ayisenelisi ukunakekela imuli yayo kumbe sesiphelelwe ngumsebenzi, siyaqiniseka ukuthi uJehova uzasebenzisa ezinye izindlela ukuthi asinakekele. Khathesi asixoxeni ngokunye umelusi omuhle athi siyekele ukukwenza.   

11. Ngokwalokho okutshiwo kuMathewu 7:1, 2, uJesu wathi siyekele ukwenzani futhi kungani lokho kunzima?

¹¹ Bala uMathewu 7:1, 2. UJesu wayekwazi ukuthi silesono lokuthi sijayele ukukhangela kakhulu amaphutha abanye. Yikho wathi: “Yekelani ukwahlulela.” Lanxa singazama sibili ukuthi singabahluleli abafowethu labodadewethu, kwezinye izikhathi singehluleka. Manje kumele senzeni? Kumele silalele uJesu futhi senze konke okusemandleni ethu ukuthi siyekele ukwahlulela.

12-13. Ukucabangisisa ngendlela uJehova ayebona ngayo uDavida kungasinceda njani ukuthi siyekele ukwahlulela abanye?

¹² Ukucabangisisa ngesibonelo sikaJehova kuzasinceda. Ukhangela okuhle okwenziwa ngabantu. Lokhu sikubona endleleni aphatha ngayo iNkosi uDavida, indoda eyenza izono ezinkulu kakhulu. Ngokwesibonelo, uDavida walala loBhathishebha umka-Uriya waphinda wabulalisa u-Uriya. (2 Sam. 11:2-4, 14, 15, 24) Lokho akwenzayo kwabangela ukuthi yena lemuli yakhe eyayigoqela lamanye amakhosikazi akhe bahlupheke kakhulu. (2 Sam. 12:10, 11) Ngesinye isikhathi uDavida watshengisa ukuthi wayengamthembi ngenhliziyo yonke uJehova lapho esithi kubalwe amadoda ebutho lako-Israyeli. UJehova wayengazange athi akwenze lokho. Mhlawumbe okwabangela ukuthi enze njalo yikuthi wayezigqaja ngobukhulu bebutho lakhe njalo ethembela kulo ukuthi limvikele. Kwaphetha ngani? Ama-Israyeli angu-70 000 afa ebulawa yisifo.—2 Sam. 24:2-4, 10-15.

¹³ Aluba wawuphila ko-Israyeli ngalesosikhathi wawuzambona njani uDavida? Wawuzamahlulela yini uthi kasifanelanga isihawu sikaJehova? UJehova kazange amahlulele ngaleyondlela, akukhangela kakhulu yikuthi uDavida wayengumuntu othembekileyo lokuthi wayesephendukile sibili. Yikho wamthethelela izono ayezenzile lanxa zazizinkulu. UJehova wayekwazi ukuthi uDavida wayemthanda lokuthi wayefuna ukwenza okulungileyo. Siyambonga sibili uJehova ngoba ukhangela okuhle esikwenzayo.—1 AmaKho. 9:4; 1 ImiLan. 29:10, 17.

14. Kuyini okunceda amaKhristu ukuthi ayekele ukwahlulela abanye?

¹⁴ UJehova kakhangelelanga ukuthi singaphambanisi. Lathi akumelanga sikhangelele ukuthi abanye bangaphambanisi futhi kumele sibone okuhle abakwenzayo. Phela kulula ukubona amaphutha abanye besesisola. Kodwa umuntu olingisela uJehova uba lobudlelwano obuhle labanye lanxa ewabona amaphutha abawenzayo. I-diamond elingakalungiswa alibukeki kodwa umuntu ohlakaniphileyo uyakwazi ukuthi nxa selilungisiwe liyabe selilihle kakhulu futhi seliligugu. Lathi kumele silingisele uJehova loJesu, singakhangeli kakhulu amaphutha abanye kodwa sibone okuhle abakwenzayo.

15. Ukucabanga ngalokho okwenzakala empilweni zabanye kungasinceda njani ukuthi singabahluleli?

¹⁵ Ngaphandle kokukhangela okuhle okwenziwa ngabanye, kuyini okunye  okungasinceda ukuthi singabahluleli? Zama ukucabanga ukuthi kuyini okungabe kusenzakala empilweni zabo. Ngokwesibonelo, ngelinye ilanga uJesu esethempelini wabona umfelokazi oswelayo ephosela okuzinhlamvu kwemali okubili okungatsho lutho ebhokisini lomnikelo. Kazange athi: “Yindaba enikele ngokuyimali okungatsho lutho?” Kulokuthi uJesu azihluphe ngokuthi umfelokazi unikele ngemalini, yena wacabanga ngokwakumenze wanikela lokuthi kwakusenzakalani empilweni yakhe, wasemncoma ngokuthi wayeyenze konke ayesenelisa ukukwenza.—Luk. 21:1-4.

16. Ufundani kulokho okwenzakala kuVeronica?

¹⁶ Okwenzakala kudadewethu okuthiwa nguVeronica kutshengisa ukuthi kuqakathekile ukucabanga ngokuthi kungabe kusenzakalani empilweni zabanye. Ebandleni ayekulo kwakulodadewethu owayekhulisa indodana yakhe eyedwa. UVeronica uthi: “Ngangibona angani abakuqakathekisi ukungena imihlangano yebandla lokutshumayela ngoba babelova emihlanganweni futhi bengaphumi sonke isikhathi ekutshumayeleni. Ngangisola lokho ababekwenza. Kodwa ngelinye ilanga ngaphuma ekutshumayeleni lodadewethu lo, wangichasisela ukuthi indodana yakhe yayingaphilanga kuhle engqondweni. Wayesenza konke okusemandleni akhe ukuthi anakekele imuli yakhe futhi ayincedise ukuthi ihlale iseduze loJehova. Kwezinye  izikhathi wayecina engena imihlangano lelinye ibandla ngenxa yokugula kwendodana yakhe.” UVeronica waqhubeka esithi: “Ngangingakwazi ukuthi uthwele nzima kangaka. Khathesi sengimthanda kakhulu udadewethu lo futhi sengimhlonipha ngenxa yakho konke akwenzayo ukuze akhonze uJehova.”

17. UJakhobe 2:8 usitshela ukuthi senzeni futhi singakwenza njani lokho?

¹⁷ Kumele senzeni nxa singananzelela ukuthi sesahlulele umfowethu kumbe udadewethu? Kufanele sikhumbule ukuthi kumele sithande abafowethu labodadewethu. (Bala uJakhobe 2:8.) Kanti njalo kumele sithandaze kuJehova ngenhliziyo yonke simcela ukuthi asincedise siyekele ukwahlulela abanye. Ngemva kokuthandaza, singazinika isikhathi sokuba lomuntu lowo esiyabe simahlulele. Lokhu kungasinceda ukuthi simazi kuhle. Singamcela ukuthi ahambe lathi ekutshumayeleni kumbe simnxuse ukuthi azokudla lathi. Ngesikhathi sizama ukumazi kuhle umfowethu kumbe udadewethu kumele silingisele uJehova loJesu ngokudinga okuhle akwenzayo. Nxa singenza njalo siyabe silalela umlayo esiwuphiwa ngumelusi omuhle owokuthi siyekele ukwahlulela.   

18. Singatshengisa njani ukuthi siyalilalela ilizwi likamelusi omuhle?

¹⁸ Izimvu ziyalilalela ilizwi likamelusi wazo. Labalandeli bakaJesu bayalilalela ilizwi lakhe. Nxa singazimisela ukuyekela ukukhathazeka kakhulu ngalokho esikudingayo futhi sizimisele ukuyekela ukwahlulela abanye, uJehova loJesu bazasincedisa ukuthi sikwenze lokho. Kungelani lokuthi ‘singabomhlambi omncane’ kumbe ‘singabezinye izimvu,’ asiqhubekeni silalela ilizwi likamelusi omuhle. (Luk. 12:32; Joh. 10:11, 14, 16) Esihlokweni esilandelayo sizaxoxa ngezinto ezimbili uJesu atshela abalandeli bakhe ukuthi bazenze.