1. Ntakhara heeni Yesu ohaalikanyiha oomuchara awe ni ipucepuche?

YESU oolikanyiha onthamwene aareiyeno ni oomuchara awe ni opwacha onakhalavo variyari va mukukhula ni ipucepuche sawe. (Yoh. 10:14) Olikanyiha yoola ti woophwanelela. Nthowa nawi ipucepuche sinnasuwela nsu na mukukhula aya. Hiihaa ntoko ipucepuche, oomuchara a Yesu annasuwela phaama nsu na mukukhula aya. Mulipa a weecelela mapuro mmoha ohoona yeela yeereyaka chiryene. Owo ooloca: “Naachuna okumiha iruku sa ipucepuche nave naaheererya wiichana wi iho ikhale vakhiviru va hiyaano. Nyenya hiyaano hinaawenrye woona wi iho hisaanaacamenleru vaavaa niichanaahu. Ohoolo waya aaphiya mmiravo yoowo aari mukukhula aya nave vaavaa iichanneiye iho saamuchara oculi.”

2-3. (1) Ti mwawiihai oomuchara a Yesu anooniheryaaya wi annawiriyana nsu nawe? (2) Tiheeni nnahaalaahu othokororya mmwaha yoola ni onacharela?

² Yaweereya yeela ennanuupuxerya yeeyo Yesu aalonceiye wa oohuserya awe. Owo aaloca: “Inarwa siiwa nsu naka.” (Yoh. 10:16) Nyenya Yesu ori wirimu. Nni niwerye hai owiriyana nsu nawe? Hiyaano ninnawiriyana nsu na Yesu vaavaa nnapharihelaahu seiho owo onihusinheiye.—Mat. 7:24, 25.

³ Mmwaha yoola ni onacharela, nnahaala othokororya ichu ikina seiho Yesu onihusinheiye. Ntoko nnahaalaahu woona, Yesu ooloca ichu seiho nnaphwanelaahu ohiya opaka ni ichu seiho nnaphwanelaahu opaka. Woopaceryani nnahaala othokororya ichu piili seiho mukukhula ahu aphaama Yesu olonceiye wi nihiye weera.

4. Mwawiiwanana ni Luka 12:29, tiheeni enahaala oneeriha okhala ‘awuukhuwa’?

⁴ Mwaalakhanye Luka 12:29. Yesu aahaaleela oomuchara awe wi ‘ehuukhuweke’ vooloca sa ichu soomwiilini. Noosuwela  wi ikano sa Yesu ilukuluku soothene ti saphaama wa hiyaano. Mweeparipari hiyaano ninnachuna opharihela seiho mu okumi ahu, nyenya ilukuluku ikina onanwerya okhala woovila weerano yeeyo. Ntakhara heeni?

5. Ntakhara heeni ancipale annakhala awuukhuwa vooloca sa soothowa saya soomwiilini?

 ⁵ Achu ancipale annakhala awuukhuwa vooloca sa ichu sa nihiku ti nihiku ntoko yoolya, soowara ni nipuro nookhalavo. Ancipale anakhala mu elapo yeeyo eri yoohaawa nave onakhala woovila ophwanya muteko. Onnakhala woovila wa yaawo ophwanya ikhorowa wi evakulele imusi saya. Naari muchu yoowo aaphwanya ikhorowa ntakhara emusi akhweya ookhwa nave henawerya ophwanya ikhorowa wi ethumeno ichu seiho anachunaaya. Nave tho ancipale aayeleela miteko saya nthowa na epahu ya Koronaviru. (Ekle. 9:11) Waakhanle wi munnahoolela makacamiho ntoko yaala naari makina, ti mwawiihai muneeraanyu mucharihe ohoolela wa Yesu vooloca sa ohiya okhala awuukhuwa?

6. Mutharihe tiheeni yeeren’ye ni murummwa Pedro mu ekwaha emoha.

⁶ Mu ekwaha emoha, murummwa Pedro ni arummwa akina yaari mmwaaceyani mu Eniya yo Kalileya variyari va macumuxa vaavaa yaamonnaaya Yesu eecaka vasulu va maahi. Pedro aaloca: “Mwaari nyuwo Pwiya, kirumeeni kirwe wa nyuwo keecaka vasulu va maahi.” Voocharela Yesu aanwopa owo ii “orweeke,” Pedro, aakhuruwa mmwaaceyani nave “aaheeca tho vasulu va maahi, ayaaka waariwo Yesu.” Moone yeeyo yeeren’ye voocharela. “Onneiye echeku, aahoova, apacerya opwina, akhuwela ariki: ‘Pwiya, kivulusheeni!’” Yesu aahookola ntata nawe nave aahimvuluxa. Mweeparipari, Pedro aanwerya weeca mmacumuxa yaale waakhanle wi owo aatitelela onweha Yesu. Nyenya  vaavaa Pedro aawenheiye echeku, owo aahoova vancipale ni okhwa minikwa; nave apacerya opwina.—Mat. 14:24-31.

7. Tiheeni nnahuseryaahu orweela wa yootakiherya ya Pedro?

⁷ Nnanwerya ohuserya orweela wa yootakiherya ya Pedro. Vaavaa Pedro aakintheiye mmwaaceyani nave amorela muniya, owo haaweherya wi aahaala okhala awuukhuwa ni macumuxa nave apacerye opwina. Owo aachuna otitelela weeca mmaahini ophiyerya amphwannye Yesu. Nyenya ohiya otitelela onweha Yesu, owo aakhala awuukhuwa ni echeku. Olelo, ninnachuna nroromelo wi nivilele makacamiho, hiihaa ntoko Pedro aachuneiye nroromelo wi eece vasulu va maahi. Wakhala wi noohiya onweha Yehova ni soolaiherya sawe, nnahaala opacerya opwina omunepani. Mwawiihiiha, naamwi nihoolelaka makacamiho matokweene, nnanwerya otitelela otikitheryeya mwa Yehova ni mavyakelo awe a onikhaviherya. Nni neereno hai yeela?

8. Tiheeni enahaala onikhaviherya osepa okhala awuukhuwaxa vooloca sa soothowa sahu soomwiilini?

⁸ Ohiya okhala awuukhuwa vooloca sa makacamiho ahu, nnaphwanela omuroromela Yehova. Muupuwele wi Tiithi ahu oosivela Yehova, onnaroromeliha wi owo onahaala otitelela onivahererya soothowa sahu soomwiilini wakhala wi ninnakuha ichu soomunepani mu nipuro noopacerya. (Mat. 6:32, 33) Ilukuluku soothene owo onnuupuwela yoororomeliha awe. (Malam. 8:4, 15, 16; Sal. 37:25) Waakhanle wi Yehova onnakhapelela ipalame ni ithutu, mweeparipari hannaphwanela okhala awuukhuwa vooloca sa yeeyo nnahaalaahu olya naari owara! (Mat. 6:26-30; Fil. 4:6, 7) Hiihaa ntoko osivela onaaceenyeryaaya asitiithi ovahererya soothowa soomwiilini wa anaaya, osivela onnamuceenyerya Tiithi ahu a wirimu ovahererya soothowa soomwiilini wa achu awe. Chiryene, nnaphwanela ororomela wi Yehova onahaala othokororya soothowa sahu soomwiilini!

9. Tiheeni nnaweryaahu ohuserya orweela wa yaweereya ya mutheli mmoha?

⁹ Muthokororye yaweereya enooniherya mukhalelo Yehova onakhapeleleiye soothowa sahu soomwiilini. Mutheli mmoha yoowo ori mmuteko wa elukuluku yoothene yaaheeciha ekaaro aya yakhalai waacamela ewora emoha wi yaakuxe arokora yaawo yaari onipuro na alipa oochawa owannyaya wi eye mmithukumano Seekristu. Munna oothariha: “Imanle mithukumano, naahaawopa arokora awo wi nalye owaani, nyenya naahoona wi hinaarino yoolya wi naavahe yaawo.” Tiheeni yeeren’ye voocharela? Munna onnatitelela: “Vaavaa naaphin’yaahu owaani, naahoona mirupa miili sa soolya ihiyiwe vamulako vahu. Hinaamusuwenle taani aahin’yevo. Yehova aanikhapelela.” Elukuluku ekina ohoolo waya, ekaaro ya mutheli yoola yaananara. Awo yaanachuna ekaaro yeela wi eye mmuteko woolaleerya; nyenya, hiyaarino ikhorowa wi ereherihe. Vaavaa ekaaro yaaryaaya ofisina, mulopwana aarwa nave akoha: “Ekaaro ela ti yawani?” Munna aahaakhula wi yaari yawawe nave aachuna wi ereheryiwe. Mulopwana owo aahaakhula: “Ohuukhuwe. Amwaaraka ennachuna ekaaro ntoko yeela nave tho ekoore ene yawi si yeela. Waahaala otumiha kavi?” Munna aatumiha ekaaro eyo nave ikhorowa sene saari sawaakhwana othumano ekaaro ekina. Owo ooloca: “Nkinawerya othariha mukhalelo noonnaahu omakuchuwelo wa nihiku nenle. Naahisuwela wi ela hiyaarimulikanela. Yehova aanikhaviherya.”

10. Ti mwawiihai Salumu 37:5 onanceenyeryeiye ohiya okhala awuukhuwa vooloca sa soothowa sahu soomwiilini?

¹⁰ Vaavaa nnawiriyanaahu mukukhula ahu  aphaama ni ohiya okhala awuukhuwaxa vooloca sa soothowa soomwiilini, hiyaano nnaphwanela ororomela wi Yehova onahaala onikhapelela. (Mwaalakhanye Salumu 37:5; 1 Ped. 5:7) Muupuwele makacamiho yaawo aromoliwe mu  eparakrafo 5. Akhweya mu elukuluku yeela, Yehova onnapharihela muru wa echoko naari nookhalano muteko yoowo onanikhaviherya okhalano soothowa sahu sa nihiku ti nihiku. Naamwi muyelenle muteko anyu naari muru wa echoko ohiweryaka ovakulela emusi, Yehova onahaala ovahererya soothowa sanyu mmukhalelo mukina. Nnaphwanela ororomela yeela. Vano nthokororye echu ekina yeeyo mukukhula ahu aphaama onanceenyeryeiye ohiya opaka.

11. Mwawiiwanana ni Mateu 7:1, 2, tiheeni Yesu onlenleiye wi nihiye opaka, nave ntakhara heeni nnanwerya okhala nikacamiho?

¹¹ Mwaalakhanye Mateu 7:1, 2, BNM. Yesu aanasuwela wi ohiphaameya wa oowiriyana awe waahaala oweerihaka akina otikitheryeya mu soohesa sa akina. Moone yeeyo owo aalonceiye: “Muhithoriheke.” Hiyaano nnaphwanela opaka owetha wahu wi nihaathoriheke akhwiihu a munroromeloni. Mweeparipari, oothene ahu naachu oohiphaameya. Hanka waakhanle wi ilukuluku ikina ninnaathoriha akina, tiheeni nnaphwanelaahu weera? Munwiriyane Yesu nave mwiilipixerye wi muhiye othoriha.

12-13. Ti mwawiihai wuupuwelela mukhalelo Yehova aamukhalinheiye Mwene Tavite onahaalaaya onikhaviherya ohiya waathoriha akina?

¹² Nnanwerya ophura orweela wa wuupuwelela yootakiherya ya Yehova. Owo onatikitheryeya mu ichu saphaama mwa achu. Ninnoona yeela mmukhalelo owo aamukhalinheiye Mwene Tavite, muchu yoowo aapanke soocheka itokweene. Ntoko yootakiherya, owo aahipaka mararuwo ni Patesepa, nave ophiyerya wi aahimwiipha iyawe. (2 Sam. 11:2-4, 14, 15, 24) Ntoko yookhumelela, Tavite haahooxen’ye mukhateiye pahiru nyenya tho emusi awe, ophitaanyerya asaariye akina. (2 Sam. 12:10, 11) Mu ekwaha ekina, Tavite hoonihenrye omuroromela Yehova moomalela, vaavaa aawaalakhannyeiye anakhoco a Aisarayeli, echu yeeyo Yehova aahimulamulenleiye weera. Owo akhweya aaceenyeryiwe ni wiirumiha nave aroromela waaca wa anakhoco awe. Tiivi yaari yookhumelela? Aisarayeli waacamela 70.000 yaakhwa nthowa na epahu!—2 Sam. 24:1-4, 10-15.

¹³ Waakhanle wi mwaakhala mu Aisarayeli mu elukuluku yeele, ti mwawiihai mwaahaalaanyu omoonaka Tavite? Apwanne mwaahaala omuthoriha owo muupuwelaka wi Yehova haahaala omulevelela? Nyenya Yehova huupuwenle hiiha. Owo aatikitheren’ye mmukhalelo Tavite aareiye oororomeleya mu okumi awe ni mmukhalelo owo aacharunweiye. Mwawiihiiha, Yehova aakhurumuwela soocheka seiha itokweene sa Tavite. Yehova aanasuwela wi Tavite aanamusivela yoowo vancipale nave aanachuna weera yeeyo yaari yawookololowa. Apwanne nyuwaano hamunathamalela wi Muluku ahu onnoona saphaama mwa hiyo?—1 Mam. 9:4; 1 Math. 29:10, 17.

14. Tiheeni enahaala onikhaviherya ohiya waathoriha akina?

¹⁴ Woona wi Yehova hanaweherya wi nikhale oophaameya, hiyaano tho hannaphwanela oweherya ophaameya wa akina nave nnaphwanela woonaka saphaama mwa akina. Ti wookhweya woona soohesa sa akina ni waathoriha yaawo. Nyenya muchu yoowo onamutakiherya Yehova onniilipixerya okhala phaama ni akina naamwi asuwelaka soohesa saya. Nluku nasisapo noowalalamelaxa nnanwerya wooneya ntoko noohiphwanelela wakhala wi  hanrehereryiwe, nyenya muchu yoowo onasuwelano onnasuwela wi nnahaala okhala nooreera nimanle orehereryiwa. Moolikana ni Yehova ni Yesu, nnaphwanela woonaka ohiya pahiru mukhalelo wa achu nyenya mikhalelo saya saphaama.

15. Ntakhara heeni othokororya yeeyo eneereya mookumini mwa achu oneeraaya onikhaviherye ohaathoriha yaawo?

¹⁵ Echu taani ekina enahaala onikhaviherya ohaathoriha akina ni ohiweheryaxa sincipale wa yaawo? Mweererye waanyiherya yeeyo eneereya ni muchu yoowo. Ntoko yootakiherya, ekwaha emoha, Yesu aamoona naamukhwele oohaawa ahelaka ikhorowa piili sa esisapo yavakhaani mu ekaaxa ya sooveleela mu empa ya Muluku. Owo hiikonhe: “Ntakhara heeni hahenlemo sawaaca?” Ohiya otikitheryeya wa yeeyo naamukhwele ole aavanheiye, Yesu aapwanche yeeyo yaamuceenyenrye ni mikhalelo sawe nave aathamalela yeeyo owo enreiye.—Luka 21:1-4.

16. Tiheeni nihusenryaahu orweela wa yaweereya ya Veronica?

¹⁶ Yaweereya ya Veronica ennooniherya ochuneya waya othokororya yeeyo eneereya mookumini wa achu akina. Owo aarumeela mmuloko yoowo waarimo murokora mmoha yoowo amphuwa mwanawe amwaamulopwana mukhateiye. Veronica ooloca: “Yaakhala ntoko wi awo hiyaaphiyaxa mmithukumano ni mmuteko woolaleerya. Nthowa na yeela, miyaano nkaawoona yaawo mmukhalelo woophwanelela. Nyenya ekwaha emoha kaaya  mmuteko woolaleerya ni murokora yoowo. Owo aakileela mukhalelo waaryaaya woovila omphuwa mwaana yoowo aarino makacamiho a mmuupuweloni. Owo aanapaka owetha wawe wi yiikhapelele makupa oomwiilini ni oomunepani. Nave ikwaha ikina, nthowa na makacamiho yaawo mwanawe aareiyeno, awo yaanaya othukumana mmuloko mukina.” Vookuchula Veronica ooloca: “Nkaantonko waanyiherya mukhalelo okumi awe waaryaaya woovila. Vano kinnamucicimiha murokora ole nave kinnavaha esisapo seiho onapakeiye wi amurumeele Yehova.”

17. Tiheeni Tiyako 2:8 onanleeleiye wi nipake, nave nni neereno mwawiihai?

¹⁷ Tiheeni munaphwanelaanyu weera wakhala wi muhoona wi moomuthoriha muchu mukina? Muupuwele wi nnaphwanela waasivelaka annihu. (Mwaalakhanye Tiyako 2:8.) Hiyaano tho nnaphwanela ovekela wa Yehova ni murima ahu woothene, nimvekaka wi anikhaviherye ohiya waathoriha akina. Ti woochuneya wuupuwela wi nnaphwanela opaka makupa ahu ni wiilipixerya omaliha elukuluku ni muchu yoowo nnamuthorihaahu. Neerano hiihaa nnanwerya omusuwela phaama muchu yoowo. Nnanwerya onwopa muchu owo wi nlape vamoha mmuteko woolaleerya naari olya vamoha. Vaavaa nnamusuwelaahu phaama muchu ni mikhalelo sawe sa okumi, nnanwerya omutakiherya Yehova ni Yesu ni otikitheryeya mmikhalelo sawe saphaama. Mmukhalelo yoola, nnahaala wooniherya wi ninnawiriyana mukukhula ahu aphaama yoowo onilamulenle ohiya othoriha.

18. Ti mwawiihai nneeraahu nooniherye wi ninnawiriyana nsu na mukukhula ahu aphaama?

¹⁸ Hiihaa ntoko ipucepuche iniiwaaya nsu na mukukhula aya, hiyaano tho nnaphwanela wiiwa nsu na Yesu. Wakhala wi noopaka owetha wahu wi nihikhaleke awuukhuwaxa ni soothowa sahu soomwiilini ni ohiya waathoriha akina, Yehova ni Yesu anahaala oreeliha wiilipixerya wahu. Oothene ahu moohipwacha waakhanle wi na a “muhuwo mukhaani” naari a “ipucepuche ikina,” nnanwerya otitelela owiriyana ni wiiwelela nsu na mukukhula ahu aphaama. (Luka 12:32; Yoh. 10:11, 14, 16, BNM) Mmwaha onacharela, nnahaala othokororya ichu piili Yesu aaleenleiye oomuchara awe wi anaphwanela weeraka.