1. ¿Tleka Jesús okijto ika inomachtijkauan kentla borreguitos?

JESÚS okijto ika inomachtijkauan kitenkakiskiaj ijkon ken borreguitos kitenkakij intlajpixkauj (Juan 10:14). Melak kinamiki tlen okijto, pampa borreguitos san kixmatij niman kitenkakij intlajpixkauj. Se tlakatl okitak ika yejon melauak. Yejua okijto: “Tiknekiyaj tikinkixtiliskej se video sekimej borregos niman otikyejyekojkej matechnisiuikan. San ika, xotechnisiuijkej pampa xtechtenkakiyaj. Sakin oyejkok se telpokatsin, yejua akin kintlajpixtoya yejon borregos. Ijkuak yejua okominnots, nimantsin okuajnisiuijkej”.

2, 3. a) ¿Kenon kiteititiaj inomachtijkauan Jesús ika kitenkakij? b) ¿Tlenon tikitaskej ipan yejuin tlamachtijli niman ipan okse?

² Tlen ipan onochiuj yejuin tlakatl techilnamiktia tlen okijto Jesús ika kichiuaskiaj iborreguitos noso inomachtijkauan. Okijto: “Yejuamej kuajli kitenkakiskej notlajtol” (Juan 10:16). San ika, Jesús nemi iluikak. Kuakon, ¿kenon uelis tiktenkakiskej? Tla tikchiuaj tlen otechmachti (Mat. 7:24, 25).

³ Ipan yejuin tlamachtijli niman ipan okse tikitaskej tlen Jesús otechmachti. Ken tikitaskej, Jesús otechmachti tlen xok noneki tikchiuaskej niman tlen noneki tikchiuaskej. Kachtopa tikitaskej ome tlemach tlen Jesús okijto ika xok noneki tikchiuaskej.

4. Itech tlen kijtoua Lucas 12:29, ¿tlenon uelis kichiuas sajnoye matajmanakan?

⁴ (Xpoua Lucas 12:29). Jesús okimijli inomachtijkauan ika maka sajnoye manajmanakan ipampa tlen ika nopanoltiskej. Niman kuajli tikmatij ika tlen okijto ok techpaleuiya. Maski tiknekij ijkon tikchiuaskej, kemantika ouijtika tikitaj. ¿Tleka?

5. ¿Tleka sekimej tokniuan sajnoye najmanaj?

 ⁵ Kanaj sekimej tokniuan sajnoye najmanaj ipampa tlen kikuaskej, tlen ika notlakentiskej niman kampa chantiskej. Kanaj ipan inpaís miyekej xkipiyaj tomin niman ouijtika kitaj kinextiskej se tekitl. Sekimej ouijtika kitaj kitlaniskej tomin tlen ika kintlakualtiskej inchanejkauan. Kanaj pampa akin kinmakaya tlen kinpolouaya yomik, aman xok yakaj kinpaleuiya. Niman ipampa kokolistli COVID-19 miyekej xok kipiyaj tekitl niman xok ueli kitlanij tomin (Ecl. 9:11). Tla tejuamej ijkon topan yonochiuj, ¿kenon uelis xok sajnoye tajmanaskej ijkon ken Jesús otechnauati?

6. Xkijto tlenon ipan onochiuj apóstol Pedro.

⁶ Sejpatipan, apóstol Pedro niman oksekimej apóstoles nemiyaj ipan se barco ne mar de Galilea niman melak ajakakiyaujtoya. Ijkuak okitakej ika Jesús uajnejnentiaya ipan atl, Pedro okijli: “NoTEKO, tla tejua, xchiua ma niuiya ixko on atl hasta kampa tinemi. Jesús okijlij: ‘Xuajla’. Ijkuakon, Pedro okis ipan on barco, niman opeu nejnemi ipan on mar para oyaj kampa nemi Jesús. Pero ijkuak okitak on temojtij ajakatl, onomojtij niman opeu apolaki. Kemaj ijkin otsajtsik: ‘¡Xnechmakixti, noTEKO!’. Nimantsin Jesús okiktsij ipan ima” niman okimakixti. Tla tikitaj, Pedro ouel onejnen ipan mar chika konitstoya  Jesús. San ika, ijkuak okitak ajakakiyaujtli, opeuj nomojtia niman ometlamati, yejua ika, opeuj apolaki (Mat. 14:24-31).

7. ¿Tlenon techmachtia tlen ipan onochiuj Pedro?

⁷ Tlen ipan onochiuj Pedro itlaj techititia. Ijkuak ouajtemok itech barco niman opeuj nejnemi ipan atl, yejua xokinemili oksekan ontlachiaskia niman ika peuaskia apolakiskia. Yejua kinekiya ajsis hasta kampa Jesús nemiya. San ika, xouel pampa opeuj kita kenon chikauak ajakakiyaujtoya. Melauak, tejuamej xueli tinejnemij ipan atl, san ika, kema tikixnamikij miyek tlemach tlen kitlatlata totlaneltok. Tla tejuamej peua tikilkauaj Jehová niman tikilkauaj tlen yokijto techmakas ika tlayekapan, peuas ijtlakauis totlaneltok. Maski san tlenon tikixnamikiskej, nochipa matitlanemilikan itech Jehová niman matikilnamikikan ika yejua uelis techpaleuis. ¿Kenon uelis tikchiuaskej?

8. ¿Tlenon techpaleuis maka sajnoye matajmanakan ipampa tlen techpoloua?

⁸ Tla tikneltokaj ika Jehová techpaleuis, xsajnoye tajmanaskej. Matikilnamikikan ika toTajtsin techijlia ika, tla kachtopa tikchiuaj tlen yejua kineki, yejua techmakas nochi tlen techpoloua (Mat. 6:32, 33). Yejua nochipa kichiua tlen kijtoua (Deut. 8:4, 15, 16; Sal. 37:25). Tla Jehová kintlajpiya totomej niman xochimej, uelis kuajli tikmatstoskej ika yejua techmakas tlen tikuaskej noso tlen ika totlakentiskej (Mat. 6:26-30; Filip. 4:6, 7). Ijkon ken se tajtli kinmaka tlen kinpoloua ikoneuan pampa kintlasojtla, toTajtsin noijki kinmakas tlen kinpoloua itekipanojkauan pampa kintlasojtla. Kuajli matikmatstokan ika Jehová techtlajpiyas.

9. ¿Tlenon tiueli itech tlen ipan onochiuj se tokniuj iuan isiuauj?

⁹ Matikitakan tlenon inpan onochiuj sekimej tokniuan akin chikauak kitekichiuiliaj toTajtsin niman ijkon tikitaskej ika Jehová kema uelis techmakas tlen techpoloua. Se tokniuj niman isiuauj ouejkaujkej ipantsin se hora ipan incarro tlen yososoliujka para komonanaskej sekimej tokniuan siuamej niman ijkon kinuikaskiaj tlanechikojli. Yejuin tokniuan siuamej chantiyaj kampa nopaleuiyaj akin xchanejkej. Tokniuj tlakatl, okijto: “Sakin ika yotlanka totlanechikol otikimijlikej tokniuan touan matlakuatij tochan. San ika, sakin otikilnamijkej ika xtikpiayaj tlen tijkuaskej”. ¿Tlenon kichiuaskiaj? Tokniuj tlakatl, noijki okijto: “Ijkuak otajsikej tochan, itenko topuerta onkatkaj ome uejueyimej bolsas ika tlakuajli. Xtikmatij akinon ompa okinkauato. Jehová otechtlajpix”. San xuejkaujtipan, incarro yejuin tokniuan oijtlakauj. Yejuamej kitekitiltiayaj yejuin carro para tenojnotsaskej, san ika, xkipiayaj tomin tlen ika kiyektlaliskej. Maski ijkon, okuikakej kampa kinyektlaliaj carros niman otetlajtoltijkej kech ika kinyektlaliliskiaj. Kuakon, ompa oajsik se tlakatl niman otetlajtolti akinon itlatki katka yejon carro. Tokniuj okijli ika yejua itlatki niman ika nonekiya kiyektlaliskej. Yejon tlakatl okinankili: “Xtlaj tlenon. Nosiuauj kineki se carro ken yejuin niman de yejuin color. ¿Kech tikneki ipampa mocarro?”. Tokniuj okinemakilti icarro niman tomin tlen okimakakej okajxili para kikouas okse carro. Tokniuj okijto: “Melak otiyolpajkej ipan yejon tonajli. Kuajli tikmatstokej ika yejuin okichiuj toTajtsin Jehová”.

10. ¿Kenon techpaleuiya Salmo 37:5 maka sajnoye matajmanakan ipampa tlen techpoloua?

¹⁰ Ijkuak tiktenkakij totlajpixkauj niman xok sajnoye tajmanaj ipampa tlen techpoloua, kuajli tikasikamatij ika Jehová techmakas tlen noneki (xpoua Salmo 37:5;  1 Ped. 5:7). San matikilnamikikan tlen otikteneujkej ipan  párrafo 5. Kanaj Jehová yokitekitilti akin kinyekana tochanejkauan noso yakaj akin itech titekitij para techmakas tlen techpoloua. San ika, tla akin kinyekana tochanejkauan xok ueli techmaka tlen techpoloua noso kanaj xok tikpiyaj totekiyo, Jehová kitas kenon techtlajpiyas. Yejua techmakas tlen techpoloua. Aman matikitakan tlenon más techijlia totlajpixkauj ika xok noneki tikchiuaskej.

11. Itech tlen kijtoua Mateo 7:1, 2, ¿tlenon okijto Jesús ika xok noneki tikchiuaskej, niman tleka kemantika ouijtika tikitaj?

¹¹ (Xpoua Mateo 7:1, 2). Jesús kimatstoya ika pampa titlajtlakolejkej san tikitstokej tlen xkuajli kichiuaj oksekimej. Yejua ika, okijto: “Maka [...] xkintlajtlakolmakakan oksekimej”. Niman, maski tokojtiliaj xtikintlajtlakolmakaskej tokniuan, kemantika ouijtika tikitaj. ¿Tlenon uelis tikchiuaskej? Matiktenkakikan Jesús niman matokojtilikan maka sa matitetlajtlakolmakakan.

12, 13. ¿Kenon tlen kichiua Jehová techpaleuiya maka sa matitetlajtlakolmakakan?

¹² Melak techpaleuis tla titlanemiliaj itech tlen Jehová kichiua, pampa yejua kita tlen kuajli kichiuaj oksekimej. Ijkon okichiuj iuan tekiuaj David, akin sajnoye otlajtlako. David oauilnen iuan Bat-Seba niman hasta okichiuj makimiktikan iueuentsin (2 Sam. 11:2-4, 14, 15, 24). Yejuin xsan yejua okijtlako, noijki okimijtlako oksekimej ichanejkauan, hasta okseki isiuauan (2 Sam. 12:10, 11). Noijki, ijkuak otlanauati makinpouatij kech soldados nemiyaj ipan nochi Israel, okiteititi ika xtlaneltokaya itech Jehová. Kanaj pampa David onoueyimat san otlaneltokak intech isoldados, akin melak miyekej katkaj. ¿Tlenon opanok ipampa tlen okichiuj? Kanaj 70,000 israelitas omijkej ipampa se kokolistli tlen nosemoyaua (2 Sam. 24:1-4, 10-15).

¹³ ¿Tlenon tiknemiliskiaj itech David tla tinemiskiaj ipan yejon tonaltin? ¿Tiktlajtlakolmakaskiaj niman tikijtoskiaj ika xkinamiki toTajtsin makitlapopolui? Jehová xijkon okinemili. Yejua okitak ika David itech yoyolmelajkanenka niman ika yonoyolkuepka ipampa nochi tlen xkuajli yokichiujka. Ika yejon, okitlapopolui maski yokichiujka tlen melak xkuajli. Jehová kimatstoya ika David melak kitlasojtlaya niman ika kinekiya kichiuas tlen kuajli. ¿Xmelak ika tiktlasojkamatij pampa toTajtsin kita tlen kuajli tikchiuaj? (1 Rey. 9:4; 1 Crón. 29:10, 17).

14. ¿Tlenon yokinpaleui sekimej tokniuan maka sa makintlajtlakolmakakan oksekimej?

¹⁴ Tla Jehová techasikamati maski titlajtlakolejkej, tejuamej noijki noneki tikimasikamatiskej oksekimej niman tikitaskej tlen kuajli kichiuaj. Melak nimantsin tikitaj ijkuak yakaj kichiua itlaj tlen xtikuelitaj niman peua tiktejteneuaj. San ika, akin tikchiuaj ijkon ken Jehová, kuajli touikaj imiuan oksekimej maski kichiuaj itlaj tlen tejuamej xtikuelitaj. Se diamante tlen ok xkiyektlaliaj xkuajli nesi, san ika, akin tlamachilise xsan kita tlen pani onka, yejua kimatstika ika ijkuak kiyektlaliaj yejuin diamante melak kuajli nokaua. Ijkon ken Jehová niman Jesús, tejuamej noneki tikitaskej tlen kipiyaj ipan inyojlo oksekimej niman tlen kuajli kichiuaj.

15. ¿Kenon techpaleuis maka matitetlajtlakolmakakan tla titlanemiliaj itech tlen oksekimej kixnamiktokej?

¹⁵ Yotikitakej ika melak noneki matikitakan tlen kuajli kichiuaj oksekimej. San ika ¿tlenon más techpaleuis maka sa matikintlajtlakolmakakan oksekimej? Tla tontlanemiliaj  itech tlen kixnamiktokej. Matikitakan kenon Jesús ijkon okichiuj. Se tonajli, ijkuak Jesús nemiya ipan teopan, okitak ika se siuakaualtsintli akin mayanki okontlajkal ome tomintsin tlen xpatioj ipan on cajas kampa notlalia tomin. Yejua xotetlajtolti tleka san ome tomintsin okontlajkal yejon siuakaualtsintli nion xsan okitak kech tomin okonxini, yej okitak tleka okitemakak itomin niman tlen ipan nochiujtoya. Niman okijto ika melak kuajli tlen okichiuj pampa okitemakak nochi tlen ueliya (Luc. 21:1-4).

16. ¿Tlenon mitsititia tlen ipan onochiuj Verónica?

¹⁶ Tlen ipan onochiuj Verónica kuajli techititia ika melak noneki matitlanemilikan itech tlen oksekimej kixnamiktokej. Ipan itlanechikol nemiya se tokniuj siuatl akin san iselti kiskaltijtoya itelpokauj. Verónica kijtoua: “Nejua xmás kuajli nitlanemiliaya itech yejuin tokniuj pampa yejua xnochipa yaya tlanechikoltin niman xnochipa tenojnotsaya. San ika, se tonajli onitenojnots iuan yejuin tokniuj. Onechijli nochi tlen kixnamiktika pampa itelpokauj kipiya se ueyi kokolistli. Yejua nokojtilijtoya kipaleuis itelpokauj makichikaua itlaneltok niman noijki kipaleuiaya ika tlen xueliya kichiuaya. Kemantika, yejua xiaya totlanechikol pampa ikoneuj xkuajli nomachiliaya, ika yejon, yaya ipan okse tlanechikojli”. Sa ika tlami, Verónica kijtoua: “Xkeman oniknemili ika kixnamiktoya tlen melak ouijtika. Aman nikpatiojkaita niman niktlakaita ipampa  nochi tlen kichiua para kitekichiuilis Jehová”.

17. ¿Tlenon technauatia Santiago 2:8, niman kenon uelis ijkon tikchiuaskej?

¹⁷ ¿Tlenon noneki tikchiuaskej tla tikitaj ika yopeuj tiktlajtlakolmakaj se tokniuj? Matikilnamikikan ika noneki tikintlasojtlaskej tokniuan (xpoua Santiago 2:8). Noneki tikchiuiliskej teoyotl Jehová niman tiktlajtlaniliskej matechpaleui maka sa matitetlajtlakolmakakan. Niman uelis tikchiuaskej ijkon ken tiktlajtlaniliaj, tla tokojtiliaj titlajtoskej iuan yejon tokniuj. Ijkon peuas más kuajli tikixmatiskej. Uelis tikijliskej touan matenojnotsati noso touan matlakuati. Ijkuak más tikixmatstiaskej yejuin tokniuj, matokojtilikan tikitaskej tlen kuajli kichiua, ijkon ken Jehová niman Jesús kichiuaj. Ijkon xok titetlajtlakolmakaskej niman tiktlakamatstoskej tlen otechnauati totlajpixkauj Jesús.

18. ¿Kenon tikteititiaj ika tiktenkakij itlajtol totlajpixkauj?

¹⁸ Ijkon ken borreguitos kitenkakij itlajtol intlajpixkauj, akin tiinomachtijkauan Jesús noijki tiktenkakij itlajtol. Tla tokojtiliaj xsajnoye tajmanaskej ipampa tlen techpoloua niman xok tikintlajtlakolmakaj oksekimej, Jehová niman Jesús techteochiuaskej. Maski tla titlapejpeniltin noso ka, tinochimej noneki tokojtiliskej tiktenkakiskej niman tiktlakamatiskej itlajtol totlajpixkauj Jesús (Luc. 12:32; Juan 10:11, 14, 16). Ipan okse tlamachtijli, tikitaskej ome tlemach tlen Jesús okimijli inomachtijkauan ika noneki kichiuaskej.