1. Hana wa iʼamaedolagö ndra nifahaʼönia Yesu simane ngawawa mbiri-biri?

IʼAMAEDOLAGÖ ia Yesu simane samösa kubalo, ba ira nifahaʼönia simane ngawawa mbiri-biri. (Yoh. 10:14) Tefaudu sibai gamaedola andrö börö me laʼila gubalora ngawawa mbiri-biri ba laʼoʼö hadia niwaʼönia. No irai iʼila daʼö si samösa ira matua. Imane, ”Me luo daʼö, omasiga makoda ngawawa mbiri-biri. Börö daʼö, makaoni mbiri-biri andrö enaʼö lahatöʼö ira khöma. Hizaʼi, lö omasi ira börö me lö latöngöni lima. Aefa daʼö, tohare nono side-ide sokubaloi yaʼira. Me ikaoni ngawawa mbiri-biri andrö, iʼanemaiʼö laʼoʼö ia.”

2-3. (a) Hewisa lala ndra nifahaʼö Yesu ba wamondrondrongo linia? (b) Hadia nitutunöda ba artikel daʼa hegöi ba artikel aefa daʼa?

² Salua khö ndra matua andrö zamasugi ba dödöda fehede Yesu sanandrösa ba mbiri-birinia, yaʼia daʼö ira nifahaʼönia. Imane Yesu, ”Lafondrondrongo ligu dania.” (Yoh. 10:16) Hizaʼi, ba zorugo so Yesu iadaʼa. Hewisa wa tola tafondrondrongo linia? No tafondrondrongo linia na tafalua fefu zi no ifahaʼö khöda.—Mat. 7:24, 25.

³ Ba artikel daʼa hegöi ba artikel aefa daʼa, tatutunö ösa wamahaʼö nifaʼema Yesu, kubaloda si sökhi. Itutunö khöda Yesu hadia manö zi tebai saʼae tafalua. Ifatunö göi hadia manö zinangea tafalua. Ba artikel daʼa, so dombua nitutunöda si tebai saʼae tafalua.

4. Moloʼö Luka 12:29, hadia mbörö wa tola ’abu dödöda’?

⁴ Baso Luka 12:29. Iʼamenesi ndra nifahaʼönia Yesu enaʼö lö saʼae talafo laʼabusi tödö zoguna khöra. Aboto ba dödöda wa atulö fefu mene-mene nibeʼe Yesu ba moguna ia khöda. Tatu omasi ita tafalua mene-menenia andrö. Hizaʼi itaria, abua khöda wamalua daʼö. Hadia mbörö?

5. Hana wa so ösa ndra nifahaʼö Yesu soʼabusi tödö soguna khöra?

  ⁵ So ösa ndra nifahaʼö Yesu soʼabusi tödö soguna khöra, simane ö, nukha, hegöi nahia waʼatoröi. Tola manö toröi ira ba soi si numana irege abua khöra wangalui kefe ba wombönökhi soguna ba nösi nomora. Mazui, börö me no mate zi samösa niha sangalui soguna ba nösi nomora, tola manö moʼamböta gefera ba wowöli soguna khöra. Baero daʼö, so ösa niha niheta moroi ba halöwöra börö pandemi COVID-19. (Sango. 9:11) Na alua khöda gabula dödö simane daʼö mazui abula dödö tanö böʼö, hewisa lalada wamalua mene-mene Yesu enaʼö lö saʼae talafo taʼabusi tödö zoguna khöda?

6. Tutunö hadia zalua khö zinenge sotöi Fetero ba Nasi Galilaia.

⁶ Samuza inötö, alua mbade sabölö-bölö ba Nasi Galilaia me so Wetero hegöi ira sinenge tanö böʼö ba dundraha. Tokea ira me laʼila mowaö-waö Yesu ba dete nidanö. Imane Fetero, ”He Soʼaya, na sindruhu yaʼugö daʼö, waʼö khögu enaʼö möido khöu ba dete nidanö.” Imane khönia Yesu, ”Aine.” Iʼanemaiʼö möi tou Wetero moroi ba dundraha ba ”mowaö-waö ia ba dete nidanö iʼondrasi Yesu”. Nehegö hadia zalua aefa daʼö. ”Ataʼu [Wetero] me iʼila mbade, ibörögö ahöndrö ia. Ilau muʼao, ’He Soʼaya, tolodo!’” Iʼanemaiʼö iʼoroʼö dangania Yesu ba wanolo Fetero. Törö tödöu, me iʼosambuaʼö dödönia khö Yesu, tola mowaö-waö Wetero ba dete nidanö. Hizaʼi, me iʼila mbade, ibörögö ataʼu ba ahöndrö ia.—Mat. 14:24-31.

7. Hadia wamahaʼö si tola tahalö moroi ba zalua khö Wetero?

⁷ Tola tafahaʼö ita ba zalua khö Wetero. Me möi tou Wetero moroi ba dundraha ba mowaö-waö ia ba dete nidanö, lö idöna-döna wa so khönia waʼataʼu me iʼila mbade ba ibörögö ahöndrö ia. Tatu omasi Wetero enaʼö lö  tebulö mowaö-waö ia ba dete nidanö ba iʼondrasi Yesu. Hizaʼi, tebai ifalua daʼö börö me lö iʼosambuaʼö dödönia khö Yesu. Moguna mamati Wetero enaʼö lö tebulö mowaö-waö ia ba dete nidanö. Simanö göi, moguna khöda wamati enaʼö tola anau gölöda ba wanaögö abula dödö. Na lö saʼae taʼosambuaʼö dödöda khö Yehowa hegöi ba mbuʼusa linia, tola ibörögö ahöndrö ita ba wamati. Börö daʼö, hewaʼae na alua khöda ngawalö gabula dödö si no amaedola mbade ba waʼaurida, böi tebulö taʼosambuaʼö dödöda khö Yehowa ba böi olifu ita wa so khönia waʼabölö ba wanolo yaʼita. Hewisa enaʼö tola tafalua daʼö?

8. Hadia zinangea tatörö tödöda enaʼö lö talafo taʼabusi tödö zoguna khöda?

⁸ Na alua khöda ngawalö gabula dödö, böi talafo taʼabusi tödö. Hizaʼi, moguna tafaduhusi tödö Yehowa. Böi tebulö tatörö tödöda wa no ifabuʼu Yehowa, Amada sebua faʼomasi, wa hasambalö ibönökhi zoguna khöda na taʼofönaiʼö ia ba waʼaurida. (Mat. 6:32, 33) Oya dandra sangoromaʼö wa lö tebulö ifalua hadia zi no ifabuʼu andrö. (5 Mo. 8:4, 15, 16; Si. 37:25) Na fofo manö ba dalu mbanua hegöi bunga si tumbu ba mbenua, irorogö ira Yehowa, mendrua manö ita. Börö daʼö, lö moguna talafo taʼabusi tödö hadia niʼa mazui niʼonukha. (Mat. 6:26-30; Fil. 4:6, 7) Simane satua sebua faʼomasi, ibönökhi zoguna ba nono mbanuania Amada si so ba zorugo börö me iʼomasiʼö ira. Tola faduhu dödöda wa hasambalö ibönökhi zoguna khöda Yehowa ba irorogö ita.

9. Hadia wamahaʼö si tola öhalö moroi ba zalua khö zi sambua fongambatö?

⁹ Nehegö hadia zi no irai alua sangoromaʼö wa tola ibönökhi zoguna khöda Yehowa. Sambua fongambatö zangai halöwö safönu inötö, omasi ira lafaondragö ndra talifusöda ira alawe si so ba nahia pengungsian enaʼö tola möi ira ba gangowuloa. Ba weʼamöi ba nahia pengungsian andrö, latörö moto satua ba zi töra sambua za faʼara. Imane talifusöda ira matua, ”Me no aefa mufalua gangowuloa, makaoni ndra talifusöda andrö weʼamöi manga ba nomoma. Hizaʼi, awena itörö tödöma ba gafuriata wa lö hadöi ö saʼae ba nomoma.” Hadia zalua aefa daʼö? Itohugö wanutunö, ”Me no marugi nomoma, maʼila gö si no labeʼe ba zi dombua karate segebua föna mbawandruhö nomoma. Lö maʼila haʼökhö moroi gö daʼö. Sindruhu-ndruhu ibönökhi zoguna khöma Yehowa.” Lö ara aefa daʼö, tekiko motora. Moguna khöra moto andrö börö me daʼö lalara weʼamöi manuriaigö. Hizaʼi, ambö gefera ba wangehaogö mangawuli. Laʼohe motora ba bengkel enaʼö laʼila hawaʼebua gefe sinangea labuʼa ba wangehaogö yaʼia. Ba zi lö ladöna-döna, tohare samösa ndra matua ba manofu ia, ”Haniha zokhö moto daʼö?” Itutunö khönia talifusöda no mege wa yaʼia zokhö moto si no tekiko andrö. Imane ira matua daʼö, ”Lö salania. Simane daʼa sibai moto niʼalu-alui woʼomogu. Hauga öfamawa moto daʼa?” Ifamawa motonia talifusöda andrö irege ibönö gefenia ba wowöli moto tanö böʼö. Imane, ”Omuso sibai dödöma me luo daʼö. Aboto ba dödöma wa tola alua daʼö börö wanolo moroi khö Yehowa.”

10. Moloʼö Sinunö 37:5, hadia zinangea tafalua enaʼö lö talafo taʼabusi tödö zoguna khöda?

¹⁰ Na tafondrondrongo gubaloda si sökhi ba lö saʼae talafo taʼabusi tödö zoguna khöda, hasambalö ibönökhi zoguna khöda Yehowa. (Baso Zinunö 37:5; 1 Fe. 5:7) Angeragö atö gabula dödö nitutunö ba  ngenoli si 5. Irugi maʼökhö, lö tebulö ibönökhi zoguna khöda Yehowa, tola manö iʼodela zatuada ira matua mazui kafaloda ba nahia wohalöwö. Hizaʼi, na tebai saʼae ifalua daʼö satuada yomo ba nomo mazui laheta ita ba halöwöda, hasambalö iʼogunaʼö  lala tanö böʼö Yehowa ba wombönökhi soguna khöda. Tola tafaduhusi tödö daʼö. Iadaʼa, datatutunö mene-mene tanö böʼö nifaʼema Yesu sanandrösa ba zi tebai saʼae tafalua.

11. Moloʼö Mataiʼo 7:1, 2, hadia mene-mene nibeʼe Yesu khöda, ba hana wa abua wamalua daʼö?

¹¹ Baso Mataiʼo 7:1, 2. Aboto ba dödö Yesu wa lö moʼahonoa niha gulidanö ba asese laʼosambuaʼö dödöra ba zala niha böʼö. Nehegö hadia niwaʼö Yesu, ”Böi mihuku nawömi.” Tola manö no taforege enaʼö lö tahuku ndra talifusöda. Hizaʼi, itaria lö mofozu ita wamalua daʼö. Na tarasoi wa taʼalu-alui sibai zala niha böʼö, hadia zinangea tafalua? Moguna tafondrondrongo niwaʼö Yesu ba böi saʼae tahuku niha böʼö.

12-13. Hewisa wa tola möi fanoloda duma-duma Yehowa enaʼö lö saʼae tahuku niha böʼö?

¹² Tola tatema mbua na taʼangerönusi duma-duma Yehowa. Lö tebulö iʼosambuaʼö dödönia Yehowa ba gamuata si sökhi niʼokhögö niha gulidanö. Tola taʼila daʼö moroi ba nifalua Yehowa khö Razo Dawido si no hauga kali mamalua horö sebua. Duma-dumania, mohorö Dawido khö Mbaseba, ba iʼalui lala enaʼö mate woʼomo Mbaseba ba wasuwöta. (2 Sa. 11:2-4, 14, 15, 24) Lua-luania, alua ngawalö gabula dödö khö Dawido hegöi ba nösi nomonia, tefarahu ba daʼö woʼomonia tanö böʼö. (2 Sa. 12:10, 11) Ba ginötö tanö böʼö, iʼoroisi Dawido enaʼö laʼerai waʼato zaradadunia, hewaʼae na lö niʼandrö Yehowa khönia wamalua daʼö. Tola manö ifalua daʼö Dawido börö me omuso dödönia me ato sibai ndra saradadunia, ba faduhu dödönia wa tola lalumöʼö nono mbanuania. Daʼö zangoromaʼö wa lö iʼodaligö Yehowa Dawido. Hadia lua-luania? So 70.000 ndraono Gizaraʼeli si mate börö wökhö waba!—2 Sa. 24:1-4, 10-15.

¹³ Na duma-dumania so ndraʼugö ba gotalua ndraono Gizaraʼeli me luo daʼö, hewisa wamaigimö Dawido? Hadia öwaʼö tödöu wa tenga sinangea iʼefaʼö zalania Yehowa? Lö irai so ba dödö Yehowa zimane daʼö. Iʼosambuaʼö dödönia ba waʼalöfaröi niforomaʼö Dawido sandrohu faʼaurinia hegöi famalalini era-era nifaluania soroi ba dödö. Daʼö mbörö wa omasi Yehowa ba wangefaʼö horö sebua nifalua Dawido. Aboto ba dödö Yehowa wa iʼomasiʼö ia Dawido ba edöna ia wamalua satulö. Tatu taʼandrö sibai saohagölö börö me iʼosambuaʼö dödönia Lowalangida ba gamuata si sökhi niʼokhögöda.—1 Ra. 9:4; 1 Ng. 29:10, 17.

14. Hadia zinangea lafalua ira niha Keriso enaʼö lö saʼae lahuku niha böʼö?

¹⁴ Lö itötöna Yehowa enaʼö moʼahonoa ita. Börö daʼö, böi tatötöna enaʼö moʼahonoa niha böʼö. Ba moguna taʼosambuaʼö dödöda ba gamuata si sökhi niʼokhögöra. Si toʼölönia, aoha khöda wonehegö sala nifalua niha böʼö hegöi ba wamato-matou yaʼira. Hizaʼi, na taʼoʼö duma-duma Yehowa, tola falulu fohalöwö ita ba niha böʼö hewaʼae lö moʼahonoa ira. Angeragö atö duma-duma andre: Tola manö lö adöni dödöda wamaigi berlian si lö mudekha. Hizaʼi, na lö taʼosambuaʼö dödöda ba zoroma moroi baero, awena taʼila wa sökhi sibai berlian andrö ba ebua sibai mbölinia na no muhaogö mutaba ba mudekha ia irege takile. Börö daʼö, simane Yehowa hegöi Yesu, böi taʼosambuaʼö dödöda ba walömoʼahonoa niha böʼö, hizaʼi moguna tanehegö gamuatara si sökhi.

15. Hadia nasa zanolo yaʼita enaʼö lö taʼalu-alui zala niha böʼö?

¹⁵ Baero ba wonehegö amuata si sökhi niʼokhögöra, hadia nasa zanolo yaʼita enaʼö lö taʼalu-alui zala niha böʼö? Moguna ökhalaigö hadia zalua ba waʼaurira. Nehegö atö duma-duma nibeʼe Yesu. Samuza inötö me so  Yesu ba gosali, iʼila samösa lakha mbanua si numana sameʼe si dombua kefe loga side-ide ba naha dolo-tolo. Lö imane tödönia Yesu, ”Hana wa lö ibeʼe zabölö oya moroi ba daʼö?” Lö iʼosambuaʼö dödönia Yesu ba waʼebua dolo-tolo nibeʼe lakha mbanua andrö. Hizaʼi, iʼangeragö hadia mbörö wa ibeʼe dolo-tolo lakha mbanua andrö ba hewisa zalua ba waʼaurinia. Isuno ia Yesu börö me no ibeʼe wondrege zi sökhi.—Luk. 21:1-4.

16. Hadia wamahaʼö si tola öhalö moroi ba zi no irai alua khö Veronica?

¹⁶ Moroi ba zi no irai alua khö dalifusöda ira alawe sotöi Veronica, tola tafahaʼö ita wa moguna sibai taʼangeragö hewisa zalua ba waʼauri niha böʼö. Ba mbanua niha Keriso si farahu yaʼia, so samösa dalifusöda ira alawe hegöi ononia matua. Imane Veronica, ”Na ufaigi, lö owölö-ölö ira weʼamöi ba gangowuloa hegöi ba wanuriaigö. Lua-luania, ibörögö so khögu lala wangera-ngera si lö tefaudu sanandrösa khöra. Hizaʼi ba gafuriata, fao ndraʼo manuriaigö khö dalifusöda ira alawe andrö. Itutunö khögu wa no göna nononia fökhö autisme. No ifalua wondrege zi sökhi ba wombönökhi soguna khöra ba mboto hegöi ba wamati. Itaria, börö wökhö nononia, moguna iʼondrasi gangowuloa ba mbanua niha Keriso tanö böʼö.” Imane nasa Veronica, ”Ba zilalö, lö aboto ba dödögu wa oya sibai gabula dödö nitaögö dalifusöda andrö. Iadaʼa, sindruhu-ndruhu uʼomasiʼö ba ufosumange ia  börö me no ifalua wondrege zi sökhi ba wamosumange Yehowa.”

17. Hadia zinangea tafalua moloʼö Yakobo 2:8, ba hewisa enaʼö tola tafalua daʼö?

¹⁷ Na tarasoi wa taʼalu-alui sibai zala zi samösa talifusöda, hadia zinangea tafalua? Moguna tatörö tödöda wa no tebeʼe khöda goroisa ba wangomasiʼö ira talifusöda. (Baso Yakobo 2:8.) Baero daʼö, moguna mangandrö ita khö Yehowa soroi ba dödö ba taʼandrö khönia wanolo enaʼö lö saʼae tahuku dalifusöda andrö. Tefaudu simane si no taʼangandröi, moguna fariawö ita khönia enaʼö itugu aboto ba dödöda ia. Tola fao ita khönia ba wanuriaigö mazui takaoni ia wemanga. Na no aboto ba dödöda ia, moguna taʼoʼö duma-duma Yehowa hegöi Yesu ba wangosambuaʼö tödöda ba gamuata si sökhi niʼokhögönia. Na tafalua daʼö, no taʼoʼö mene-mene nibeʼe gubaloda si sökhi enaʼö böi saʼae tahuku niha böʼö.

18. Hewisa lalada ba wamondrondrongo li gubaloda si sökhi?

¹⁸ Simane ngawawa mbiri-biri samondrondrongo li gubalora, lafondrondrongo li Yesu ira nifahaʼönia. Na taforege enaʼö lö saʼae talafo taʼabusi tödö zoguna khöda ba lö tahuku niha böʼö, hasambalö ifahowuʼö wamorege nifaluada Yehowa hegöi Yesu. Gofu hezo farahu ita, he ba ”ngawawa si lö atoto” mazui ba ”mbiri-biri tanö böʼö”, yalötebulö tafondrondrongo ba taʼoʼö niwaʼö gubaloda si sökhi. (Luk. 12:32; Yoh. 10:11, 14, 16) Ba artikel aefa daʼa, tatutunö mene-mene nibeʼe Yesu sanandrösa ba zi dombua ngawalö sinangea lafalua ira nifahaʼönia.