1. Киристе ӕ ахуркӕнуйнӕгти фусти хӕццӕ цӕмӕн рабарста?

 КИРИСТЕ ӕхе рабарста фиййауи хӕццӕ, ӕ фӕдбӕлдзӕугути ба – фусти хӕццӕ, уомӕн ӕма фустӕ сӕ фиййаубӕл куд ӕхцул ӕнцӕ, уотӕ ибӕл ӕ фӕдбӕлдзӕугутӕ дӕр ӕхцул ӕнцӕ (Иоан. 10:14). Е хуарз цӕветтон ӕй, уомӕн ӕма фустӕ сӕ фиййауи фӕззонунцӕ ӕма имӕ фегъосунцӕ. Е бӕрӕг ӕй, еу бӕлццон ци хабар радзурдта, уомӕй. «Фӕндадтӕй нӕ фусти хузӕ исесун. Дзурдтан сӕмӕ, цӕмӕй нӕмӕ хӕстӕгдӕр ӕрбацудайуонцӕ, фал нӕ гъуди дӕр нӕ кодтонцӕ, уомӕн ӕма мах нӕ зудтонцӕ. Уӕдмӕ дин минкъий фусгӕс фелвӕстӕй ӕма сӕмӕ куддӕр исдзурдта, уотӕ ӕ фӕдбӕл ранӕхстӕр ӕнцӕ».

2, 3. а) Киристей фӕдбӕлдзӕугутӕ ин ӕ дзурдмӕ куд игъосунцӕ? б) Аци ӕма иннӕ статьяй цӕмӕ ӕркӕсдзиан?

² Аци хабарӕй хуарз зиннуй, Киристей дзурдтӕ, «етӕ игъосдзӕнцӕ мӕ дзурдмӕ», зӕгъгӕ, цӕбӕл дзорӕг ӕнцӕ, е (Иоан. 10:16). Фал нӕ бон куд ӕй Киристемӕ игъосун, кӕд ӕма уӕлӕрвти ӕй? Ӕ дзурдмӕ ин ке игъосӕн, е бӕрӕг уодзӕй, ӕ фӕдзӕхститӕмӕ гӕсгӕ ин ку цӕрӕн, уӕд (Матф. 7:24, 25).

³ Аци ӕма иннӕ статьяй ӕркӕсдзиан, Киристе цӕбӕл ахур кодта, еци гъуддӕгтӕй цалдӕремӕ. Киристе дзурдта, цӕхуӕндӕр гъуддӕгтӕ ке гъӕуама мабал кӕнӕн, цӕхуӕндӕр гъуддӕгтӕ ба ке гъӕуама кӕнӕн. Аци статьяй ӕркӕсдзиан, нӕхе кӕмӕй гъӕуама хезӕн, еци гъуддӕгтӕй дууемӕ.

4. Лукай 12:29 финст дзурдтӕмӕ гӕсгӕ еуӕй-еухатт цӕй туххӕй фӕммӕтӕ кӕнӕн?

⁴ Бакӕсӕ Лукай 12:29. Киристе ӕ фӕдбӕлдзӕугутӕн загъта, цӕмӕй мабал мӕтӕ кӕнонцӕ, цӕрунмӕ сӕ ӕнӕмӕнгӕй ка гъӕуй, еци гъуддӕгтӕбӕл. Мах ӕй зонӕн, Киристей унаффитӕ нин пайдайӕй ӕндӕр зӕран ке не ’рхӕсдзӕнцӕ. Фал нин уӕддӕр еуӕй-еухатт зин фӕууй Киристемӕ байгъосун. Цума цӕмӕн?

5. Беретӕ цӕмӕн фӕммӕтӕ кӕнунцӕ, цӕрунмӕ сӕ ка гъӕуй, еци гъуддӕгтӕбӕл?

 ⁵ Беретӕ ни фӕттухсунцӕ, цардамӕлттӕ кӕнун зин ке ӕй, уой туххӕй. Кадӕртӕ мӕгур бӕстити цӕрунцӕ ӕма син къӕбӕри фагӕ бакосун дӕр зин ӕй. Иннетӕ ба коронавируси пандемийи туххӕй ӕнӕ кустӕй байзадӕнцӕ ӕма сӕ ӕнӕмӕнгӕй ци гъӕуй, уой фагӕ дӕр ӕхца нӕ хъӕртуй. Кӕцидӕр бийнонтӕ ба ӕнӕ дарӕгӕй байзадӕнцӕ (Еккл. 9:11). Кӕд сумах дӕр уӕхӕн зиндзийнӕдтӕбӕл ӕмбӕлетӕ, уӕд уӕ бон куд ӕй Киристей фӕдзӕхстмӕ гӕсгӕ архайун, «мабал мӕтӕ кӕнтӕ», зӕгъгӕ?

6. Еухатт апостол Петурбӕл ци ’рцудӕй?

⁶ Еухатт Петур ӕма иннӕ апостолтӕ Галилеи денгизи ку адтӕнцӕ, уӕд тухдунгӕ исистадӕй. Уӕдмӕ дин фӕууидтонцӕ, Киристе сӕмӕ донбӕл куд цӕуй. Петур ин загъта: «Хецау, кӕд е ду дӕ, уӕд зӕгъӕ, ӕма дӕмӕ ӕз дӕр донбӕл бацӕуон». Йесо ин загъта: «Рацо!» Ӕма уӕд «Петур дӕр бӕлӕгъӕй рахизтӕй ӕма донбӕл Йесой ӕрдӕмӕ рараст ӕй. Фал ӕ алливарс ку ракастӕй ӕма, куд хъӕбӕр дунгӕ кӕнуй, уой ку фӕууидта, уӕд фӕттарстӕй ӕма нихъулун райдӕдта». Киристе имӕ ӕ къох бадардта ӕма ’й фӕййервӕзун кодта. Расагъӕс кӕнайтӕ, цалинмӕ Петур Киристемӕ кастӕй,  уӕдмӕти ӕ бон адтӕй донбӕл цӕун. Фал ӕ алливарс ци адтӕй, уомӕ куддӕр ракастӕй, уотӕ ба нихъулун райдӕдта (Матф. 14:24–31).

7. Петури хабарӕй цӕбӕл ахур кӕнӕн?

⁷ Петурбӕл ци хабар ӕрцудӕй, уомӕй еу цӕбӕлдӕр ахур кӕнӕн. Бӕлӕгъӕй ку рахизтӕй ӕма донбӕл цӕун ку райдӕдта, уӕд уой ӕнгъӕл н’ адтӕй, ӕма тухдунгӕй фӕттӕрсдзӕй ӕма нихъулун райдайдзӕй. Фал, гъигагӕн, е ’нгас Киристейӕй тухдунгӕмӕ фӕцӕй. Абони мах донбӕл цӕун нӕ гъӕуй. Фал царди аллихузи зиндзийнӕдтӕбӕл исӕмбӕлӕн, ӕма уӕд рабӕрӕг уй, не ’ууӕндундзийнадӕ федар ӕй ӕви нӕ. Не ’нгас Йеговӕй ӕма ӕ зӕрдӕвӕрдтӕй ку рахатӕн, уӕд, зӕгъӕн ес, ӕма нихъулун райдайдзиан. Нӕ царди цийфӕнди тухдунгитӕ ма уа, уӕддӕр гъӕуама ма гурусхӕ кӕнӕн, Йеговӕ нӕ ке нӕ ниууадздзӕй ӕма нӕбӕл ке батухсдзӕй. Гъӕйдӕ уобӕл фулдӕр радзорӕн.

8. Ци нин банхус кӕндзӕй, цӕмӕй ӕгӕр ма мӕтӕ кӕнӕн?

⁸ Мӕтӕ кӕнуни бӕсти хуӕздӕр уайдӕ нӕ зӕрдӕ нӕ уӕларвон Фидӕбӕл дарун. Е ба нин зӕрдӕ ӕвӕруй, ӕ гъуддӕгтӕ ин нӕ царди фиццаг бунати ку ӕвӕрӕн, уӕд нӕ цӕрунмӕ ци гъӕуй, уобӕл ӕнӕмӕнгӕй ке батухсдзӕй (Матф. 6:32, 33). Уой дӕ гъудий алкӕддӕр дарӕ. Йеговӕ ӕ зӕрдӕвӕрдтӕ алкӕддӕр исӕнхӕст кӕнуй. Уомӕй имӕ фау ӕрхӕссӕн некӕд адтӕй (Дук. з. 8:4, 15, 16; Пс. 37:25). Кӕд Йеговӕ цъеути ӕфсадуй ӕма дидингутӕ рӕсугъд исаразуй, гӕрр, уӕд махбӕл ба нӕ батухсдзӕй? (Матф. 6:26–30; Фил. 4:6, 7). Ниййергутӕ сӕ сувӕллӕнтти фӕууарзунцӕ, ӕма сӕ фӕффӕндуй, цӕмӕй маци гъӕуагӕ уонцӕ. Нӕ уӕларвон Фидӕ дӕр нӕ берӕ уарзуй ӕма нӕ цӕрунмӕ ӕнӕмӕнгӕй ци гъӕуй, уомӕй нӕ цох некӕд уадзуй. Мадта нӕ бон ӕй федарӕй ӕууӕндун, Йеговӕ нӕ зин уавӕри ке некӕд ниууадздзӕй!

9. Еу бийнонти хабар нин цӕбӕл дзорӕг ӕй?

⁹ Еу бийнонти хабарӕй бӕрӕг ӕй, Йегови къох цубур ке нӕй. Еу хатт сӕ зӕронд машинӕбӕл сахатти бӕрцӕ фӕццудӕнцӕ ӕрледзӕггӕгти лагермӕ, цӕмӕй си ци хуӕртӕ цардӕй, уони ӕмбурдмӕ ӕрбаластайуонцӕ. Ӕнсувӕр радзурдта: «Еци хуӕрти ӕмбурди фӕсте нӕхемӕ фӕххудтан. Фал ӕй удта балӕдӕрдтан, фингӕбӕл син ци ӕрӕвӕрӕн, е нӕмӕ ке нӕййес». Цума ци бацӕнцӕ? Ӕнсувӕр зӕгъуй: «Нӕхемӕ ку ӕрбахъӕрдтан, уӕд нӕ дуармӕ лӕудтӕнцӕ дууӕ устур пакетти аллихузи хуӕруйнӕгти хӕццӕ. Ка нин сӕ ӕрбахаста, уой нур дӕр нӕма зонӕн. Фал еу цидӕр ба федарӕй зонӕн: е Йегови къох адтӕй!» Цӕйбӕрцӕдӕр рӕстӕги фӕсте еци бийнонтӕн сӕ машинӕ басастӕй. Еци машинӕ сӕ гъудӕй Йеговӕн лӕггадӕ кӕнунмӕ. Фал сӕмӕ барӕвдзӕ кӕнунмӕ ба ӕхца н’ адтӕй. Ремонтмӕ ’й батардтонцӕ, цӕмӕй ӕй базудтайуонцӕ, ӕ кӕнуйнаг цӕйбӕрцӕбӕл ниллӕудзӕй, уой. Уӕд дин ӕнсувӕрмӕ еу нӕлгоймаг бацудӕй ӕма ’й бафарста: «Айӕ ке машинӕ ӕй?» Ӕнсувӕр ин загъта: «Мӕн. Фал рӕвдзӕ кӕнуйнаг ӕй». Нӕлгоймаг ба ин уотӕ: «Неци мин си уӕлдай ес. Мӕ уоси раст ауӕхӕн машинӕ гъудӕй. Цӕйбӕрцӕбӕл мин ӕй ратдзӕнӕ?» Цӕбӕл ӕй рауӕйӕ кодтонцӕ, е син ӕндӕр машинӕ балхӕнуни фагӕ иссӕй. Ӕнсувӕр загъта: «Еци изӕр куд цийнӕ кодтан, уой, ӕвӕдзи, дзорун дӕр нӕ гъӕуй. Мах ӕй федарӕй зонӕн, уӕхӕн лӕвар нин Йеговӕ ке искодта!»

10. Псалом 37:5 финст дзурдтӕ нин куд банхус кӕндзӕнцӕ, цӕмӕй ӕгӕр ма мӕтӕ кӕнӕн?

¹⁰ Кӕд Киристемӕ игъосӕн ӕма ӕгӕр нӕ мӕтӕ кӕнӕн, уӕд нӕ бон ӕй федарӕй ӕууӕндун,  Йеговӕ нӕбӕл ке батухсдзӕй. (Бакӕсӕ Псалом 37:5; 1 Пет. 5:7.)  5 абзацци ци зиндзийнӕдти кой кодтан, уонӕмӕ ма раздӕхӕн. Кӕд уӕ бийнонтӕ ӕнӕ дарӕгӕй байзадӕнцӕ кенӕ ӕнӕ кустӕй байзадайтӕ, уӕд дӕр е уобӕл дзорӕг нӕй, ӕма уӕбӕл Йеговӕ нӕ батухсдзӕй. Йеговӕ уин куд банхус кӕна, уомӕн ӕндӕр мадзал дӕр иссердзӕй. Ӕнӕмӕнгӕй иссердзӕй! Гъӕйдӕ нур ба радзорӕн, ке гъӕуама мабал кӕнӕн, еци гъуддӕгтӕй иннебӕл.

11. Матфеййи 7:1, 2 финст дзурдтӕмӕ гӕсгӕ ци гъӕуама мабал кӕнӕн, фал е зин цӕмӕн фӕууй?

¹¹ Бакӕсӕ Матфеййи 7:1, 2. Киристе ӕй лӕдӕрдтӕй, адӕн ӕнӕнхӕст ке ’нцӕ ӕма се ’ргом иннети гъӕндзийнӕдтӕмӕ ке фездахунцӕ. Ӕма уомӕ гӕсгӕ загъта: «Иннетӕн мабал тӕрхон кӕнтӕ». Алкедӕр ни архайуй, цӕмӕй е ’ргом хуӕртӕ ӕма ӕнсувӕрти хуарз менеугутӕмӕ ’здӕхт уа. Фал ӕнӕнхӕст ке ан, уой туххӕй нин е алкӕд нӕ фӕууайуй. Цума нин еци гъуддаги ци банхус кӕндзӕй? Гъӕуама Киристемӕ игъосӕн ӕма ӕгас хъауритӕй архайӕн, цӕмӕй иннетӕн мабал тӕрхон кӕнӕн.

12, 13. Йеговӕ Давидмӕ цӕхуӕн зӕрдӕ дардта, уобӕл расагъӕс кӕнун хуарз цӕмӕн уайдӕ?

¹² Иннетӕмӕ цӕхуӕн зӕрдӕ дарун гъӕуй, уомӕй нин Йеговӕ ӕхуӕдӕг ӕй фӕнзуйнаг. Е нин фиццагидӕр нӕ хуарз менеугутӕмӕ фӕккӕсуй, ӕма е бӕрӕг ӕй, паддзах Давиди хабарӕй. Давид цалдӕр уӕззау тӕрегъӕди искодта, зӕгъӕн, Вирсавий хӕццӕ ӕмуат ӕрцудӕй, уой фӕсте ба ин ӕ лӕги дӕр рамарун кодта (2 Сам. 11:2–4, 14, 15, 24). Уӕхӕн рӕдудтитӕ ке искодта, е зиан ӕрхаста ӕхецӕн дӕр ӕма е ’гас бийнонтӕн дӕр (2 Сам. 12:10, 11). Иннӕ хатт ба Давид е ’фсӕддонти банимайун кодта, Йеговӕ ин нӕ загъта, уотемӕй. Уомӕй бавдиста, ӕ зӕрдӕ Йеговӕбӕл ке нӕ даруй. Ӕвӕдзи, Давид ӕгӕр иссӕрбӕрзонд ӕй ӕма ӕ зӕрдӕ е ’фсадбӕл дарун райдӕдта. Еци рӕдуди туххӕй 70 000 израилаги фуднезӕй рамардӕнцӕ (2 Сам. 24:1–4, 10–15).

¹³ Ду ба еци рӕстӕг Израили ку цардайсӕ, уӕд Давиди туххӕй ци загътайсӕ? Уотӕ дӕмӕ нӕ кастайдӕ, ӕма Давид уой аккаг нӕй, цӕмӕй ин Йеговӕ ниххатир кӕна? Фал ин Йеговӕ ниххатир кодта. Цӕмӕн? Уомӕн ӕма си нӕ феронх ӕй, Давид ин берӕ ӕнзти дӕргъи еузӕрдонӕй ке лӕггадӕ кодта, удта ’й уидта, Давид зӕрдӕй ке ӕрфӕсмон кодта, уой дӕр. Йеговӕ ’й зудта, Давид ӕй берӕ ке уарзта, удта ’й рӕстӕй архайун дӕр ке фӕндадтӕй. Мадта нин Йеговӕ е ’ргом нӕ хуарз менеугутӕмӕ ке ӕздахуй, е нин уодӕнцойнӕ куд нӕ хӕссуй (1 Пад. 9:4; 1 Анз. 29:10, 17).

14. Ци нин банхус кӕндзӕй, цӕмӕй иннетӕн мабал тӕрхон кӕнӕн?

¹⁴ Йеговӕ ни некӕмӕй агоруй, цӕмӕй ӕнхӕст уӕн, ӕма мах дӕр гъӕуама уой иннетӕй ма агорӕн, фал сӕмӕ хуарзӕй ци ес, уой уинӕн. Раст зӕгъгӕй, иннети гъӕндзийнӕдтӕ фӕууинунбӕл архайун дӕр нӕ фӕгъгъӕуй. Фал Йегови ка фӕнзуй, уӕхӕн адӕймаг иннети гъӕндзийнӕдтӕмӕ нӕ никкомкоммӕ уй. Е адӕни хӕццӕ фӕрнӕй фӕццӕруй. Зӕгъӕн, алмаз неци уотӕ рӕсугъд фӕууй, фал лӕдӕргӕ адӕймаг зонуй, дӕсни косӕг алмазбӕл ку ракоса, уӕд си рӕсугъд бриллиант ке рауайдзӕй. Мадта гъӕйдӕ Йеговӕ ӕма Киристей фӕнзӕн ӕма иннетӕн сӕ гъӕндзийнӕдтӕ нӕ, фал сӕмӕ хуарзӕй ци ес, уой уинӕн.

15. Иннетӕ цӕхуӕн уавӕрти ’нцӕ, уобӕл сагъӕс кӕнун ӕхсидзгӕ цӕмӕн ӕй?

¹⁵ Ци ма нин банхус кӕндзӕй, цӕмӕй иннетӕй ӕгӕр берӕ ма агорӕн? Ци уавӕрти  ӕнцӕ, уобӕл ку сагъӕс кӕнӕн, уӕд. Гъӕйдӕ нӕ зӕрдӕбӕл ӕрлӕуун кӕнӕн Киристей цардӕй еу хабар. Еу бон ковӕндони фӕууидта, мӕгур идӕдзӕ силгоймаг нисайнагӕн дууӕ листӕг ӕхцай ке ниггӕлста. Йесо си уотӕ нӕ загъта: «Ци минкъий равардта». Е уотӕ ӕхсидзгӕ н’ адтӕй. Киристе фиццагидӕр сагъӕс кодта, нисайнаг цӕмӕн равардта ӕма цӕхуӕн уавӕрти адтӕй, уобӕл, ӕма ’й уомӕ гӕсгӕ ӕ рӕдаудзийнади туххӕй растудта (Лук. 21:1–4).

16. Вероникӕ ци хабар радзурдта, уомӕй цӕбӕл ахур кӕнӕн?

¹⁶ Иннети уавӕртӕбӕл сагъӕс кӕнун куд ӕхсидзгӕ ’й, е ма бӕрӕг ӕй еу хуӕрӕ Вероники хабарӕй. Се ’мбурди адтӕй, ӕ фурти еунӕгӕй ка хаста, уӕхӕн хуӕрӕ. Вероникӕ зӕгъуй: «Уотӕ мӕмӕ кастӕй, ӕма ӕмбурдтӕ ӕгӕр арӕх цох кӕнунцӕ, удта лӕггади дӕр неци уоййасӕ архайунцӕ. Уой туххӕй сӕмӕ, раст зӕгъгӕй, ӕнӕнвӕрсон цӕстӕй кастӕн. Фал еу уӕхӕни еци хуӕри хӕццӕ игъосун кӕнунмӕ рацудтӕн ӕма мин радзурдта, ӕ фуртмӕ аутизм ке ес. Алкӕд ин ӕнцон нӕ фӕууидӕ, фал уӕддӕр ӕгас хъауритӕй архайдта, цӕмӕй ӕ фурти хастайдӕ ӕма ин Йегови дӕр бауарзун кодтайдӕ. Удта ма ’й базудтон, ӕ фурти нези туххӕй арӕх не ’мбурдмӕ ке нӕ бахауиуонцӕ, ӕма син уӕд ӕндӕр ӕмбурдтӕмӕ цӕугӕ ке рауайидӕ». Гъема фӕстагмӕ Вероникӕ загъта: «Уӕхӕн тухст уавӕри ке ӕй, е мӕ сӕри къуми дӕр некӕд адтӕй. Нур еци хуӕрӕн хъӕбӕр аргъ кӕнун, уомӕн ӕма Йеговӕн берӕ кӕнуй».

17. Иакови 2:8 цӕхуӕн фӕдзӕхст финст ес ӕма ’й нӕ бон куд ӕй ӕнхӕст кӕнун?

 ¹⁷ Кӕцидӕр хуӕрӕ кенӕ ӕнсувӕр нӕ зӕрдӕмӕ ку нӕ цӕуа, уӕд нин куд кӕнгӕ ’й? Гъӕуама нӕ гъудий дарӕн, иннети уарзун нӕ ихӕс ке ӕй. (Бакӕсӕ Иакови 2:8.) Дӕ бон ӕй Йеговӕмӕ ковун, цӕмӕй дин банхус кӕна, ӕма иннетӕн мабал тӕрхон кӕнай. Удта дӕхуӕдӕг дӕр байархайӕ, цӕмӕй адӕймаги хуӕздӕр базонай. Уой туххӕй ӕ хӕццӕ фулдӕр рӕстӕг ӕрветӕ, зӕгъӕн, ӕ хӕццӕ игъосун кӕнунмӕ фӕццо кенӕ ба еумӕ ескӕми рабадетӕ. Гъӕйдӕ мадта Йеговӕ ӕма Йесой фӕнзӕн ӕма, иннетӕмӕ хуарзӕй ци ес, фиццагидӕр уомӕ кӕсӕн. Уотӕ ку кӕнӕн, уӕд бӕрӕг уодзӕй, хуарз фиййауи фӕдзӕхстмӕ, «иннетӕн мабал тӕрхон кӕнтӕ», зӕгъгӕ, уӕлӕнгай цӕстӕй ке нӕ кӕсӕн.

18. Хуарз фиййаумӕ ке игъосӕн, е цӕмӕй бӕрӕг уодзӕй?

¹⁸ Фустӕ сӕ фиййаумӕ куд игъосунцӕ, уотӕ киристӕнттӕ дӕр игъосунцӕ Киристемӕ. Кӕд ӕгас хъауритӕй архайӕн, цӕмӕй цӕрунмӕ нӕ ка гъӕуй, еци гъуддӕгтӕбӕл ӕгӕр ма мӕтӕ кӕнӕн, удта иннетӕн мабал тӕрхон кӕнӕн, уӕд нин Йеговӕ ӕма Йесо Киристе ӕнӕмӕнгӕй банхус кӕндзӕнцӕ. Гъӕйдӕ мадта не ’гас дӕр, фӕнди «минкъий дзогӕй» уӕн, фӕнди «ӕндӕр фустӕй», нӕ хуарз фиййаумӕ игъосӕн (Лук. 12:32; Иоан. 10:11, 14, 16). Иннӕ статьяй ӕркӕсдзиан, ке гъӕуама кӕнӕн, еци гъуддӕгтӕй дууемӕ.