1. Antoy sakey a rason akin et inkompara nen Jesus iray papatumbok to ed saray karnero?

IMBAGA nen Jesus ya sikato so “maong a managpastol” tan saray papatumbok to et singa ra karnero. (Juan 10:14) Dugaruga itan ya imbaga to, ta saray karnero et asingger so liknaan da ed managpastol da. Sakey ni, talagan dedengelen tan kabkabat na saray karnero so boses na managpastol da. Naobserbaan itan na sakey a turista. Oniay imbaga to: “Nen wala ray anengneng min karnero, labay mi ra komon ya piktyuran, kanian papaasinggeren mi ra. Pero ag-ira onasingger ta agda kabat so boses mi. Nen nitan la balet may ugaw ya manpapastol ed sikara tan tinawag to ra, tinmumbok iran tampol.”

2-3. (a) Panon ya nibagan ondedengel tayo ed boses nen Jesus? (b) Antoy aralen tayo ed sayan artikulo tan ed ontumbok?

² Ipanonot na satan ya obserbasyon na turista imay imbaga nen Jesus tungkol ed saray karnero to—saray disipulo to. Imbaga to: “Dengelen day boses ko.” (Juan 10:16) Pero wala lad tawen si Jesus. Panon tayon nibaga ya ondedengel tayod boses to? Dedengelen tayoy boses na managpastol tayo no uunoren tayo ray bangat to.—Mat. 7:24, 25.

³ Diad sayan artikulo tan diad ontumbok, aralen tayo so pigaran bangat nen Jesus. Wala ray imbaga to ya agtayo nepeg ya gawaen tan wala met iray imbaga to ya nepeg tayon gawaen. Pantongtongan tayo natan so duara ya imbaga ton agtayo nepeg ya gawaen.

4. Base ed Lucas 12:29, anto ray sengegan na ‘alablabas ya panaburido’ tayo?

⁴ Basaen so Lucas 12:29. Binilin nen Jesus iray papatumbok  to ya agla ra “alablabas a manaaburido” ed saray materyal ya pankaukolan da. Amta tayo ya saray bilin nen Jesus et lanang ya duga tan parad pankaabigan tayo lanlamang. Labay tayon unoren imay imbaga to ya, “Agkayo la alablabas a manaaburido.” Pero no maminsan, aliwa itan ya mainomay. Akin ey?

5. Akin et panaaburidoan na arum so materyal iran pankaukolan da?

 ⁵ Panaaburidoan na arum so materyal iran pankaukolan da—singa say naakan, kawes, tan panayaman da. Ompan bagsak so ekonomiya ed bansa ra tan mairap so mananap na trabaho. Say arum et walan tuay trabaho ra, pero kulang so aalmoen da parad pamilya ra. Odino ompan naandid bilay so alenleneg kalamor ya onaanap parad pamilya, kanian agda la amta no iner so pangalaan day pambilay da. Legan na COVID-19 pandemic, dakel so nakal ed trabaho. (Ecl. 9:11) No agawad sika so anggan dinan ed saraya, panon mon niyaplika imay bilin nen Jesus ya, “Agkayo la alablabas a manaaburido”?

6. Antoy aminsan ya agawa ed si apostol Pedro diad Dayat na Galilea?

⁶ Aminsan, si apostol Pedro tan saray arum nin apostol et nabetan na maksil a bagyo diad pegley na Dayat na Galilea. Insan bigla dan anengneng si Jesus ya manaakar ed tapew na dayat. Kanian oniay imbaga nen Pedro: “Katawan, no sika itan, paasingger mo ak, a manakar ak diad tapew na saray danum.” Nen imbaga nen Jesus ya, “Gala,” inmepas si Pedro ed baloto tan “nanakar ed tapew na danum tan dinmagod si Jesus.” Pero niay sinmublay ya agawa: “Lapud inimano [nen Pedro so] maksil a dagem, sikatoy tinmakot. Tan sanen onlelereg la et sikatoy inmeyag: ‘Katawan, isalba mo ak!’” Inyunat a tampol nen Jesus so lima to tan insalba toy Pedro. Imanoen ya  nen si Jesus labat so sankanengneng nen Pedro, akapanakar ed tapew na danum anggano madaluyon. Pero nen say ninengneng to et say maksil a dagem, tinmakot tan nanduaruwa, kanian ginmapon linmereg.—Mat. 14:24-31.

7. Antoy naaralan tayo ed samay agawad si Pedro?

⁷ Makaaral tayo ed sayan agawa ed si Pedro. Nen inmepas si Pedro ed baloto tan dinmakat ed danum, mataletalek ya ag-onlereg ya anggad makaasingger ed si Jesus. Pero ag-itan agawa ta abalang so pokus to. No panon ya kaukolan nen Pedro so pananisia pian tuloytuloy ya makapanakar ed tapew na danum, kaukolan tayo met natan so pananisia pian nasarag tayo ray singa bagyon problema. No agtayo la akapokus ed si Jehova tan ed saray sipan to, onkapuy so pananisia tayo ya anggad singa tayo la onlelereg lapud saray problema tayo. Kanian anggan anto ni tay onsabin problema, si Jehova dapat so pampokusan tayo. Tandaan tayo ya sarasarag to tayon tulongan. Antoy gawaen tayo balet pian si Jehova so akapokusan tayo?

8. Antoy nepeg tayon gawaen pian agtayo masyadon panaburidoan iray materyal a pankaukolan tayo?

⁸ Mantiwala tayo ed si Jehova pian agtayo masyadon aburido. Tandaan tayo ya maar-aron Ama si Jehova. Insipan to ya agto tayon balot paulyanan, basta iyuna tayod bilay tayo iray espiritual a bengatla. (Mat. 6:32, 33) Lanang ton totooren iray sipan to. (Deu. 8:4, 15, 16; Sal. 37:25) No anggan saray manok tan tanaman et aasikasoen nen Jehova, di nagkalalo la ed sikatayo ran lingkor to. Kanian agtayo dapat mapagpaga ed no antoy kanen o isulong tayo! (Mat. 6:26-30; Fil. 4:6, 7) Di ba say ateng, agto nitepel ya ag-iter so pankaukolan na ananak to ta inar-aro to ra? Ontan met so Ama tayo ed tawen. Agto nitepel ya ag-iter so pankaukolan tayo ta inar-aro to itayo. On, makapantiwala tayo ya ag-itayon balon paulyanan nen Jehova!

9. Antoy naaralan mo ed eksperiensya na sanasawan payunir?

⁹ Imanoen so sakey ya eksperiensya ya prueba ya talagan iiter nen Jehova iray materyal ya pankaukolan na saray lingkor to. Walay sanasawan payunir ya nambiahe na masulok ya sakey oras gamit so daan ya luganan da, ta inabet da so pigaran sister ya manaayam ed refugee center pian makapiaral ira. Oniay inistorya to may brother: “Kayari na aral, intagar mi ran mangan ed abung mi. Pero nen wala kami lad dalan, naisip mi ya anggapo manayay ipakan mi.” Antoy agawa ey? Oniay imbaga na brother: “Kasabi mid abung, walay asabian min duaran angkabaleg ya bag na grocery diad puerta. Agmi amta no siopay angitilak diman. Talagan amta nen Jehova so kaukolan mi.” Ag-abayag, aderal imay luganan da. Atan so uusaren dad ministeryo, pero say problema, anggapoy pampaapiger da. Inyakar dad talyer ta tinepet da no pigaray nagastos. Insan nagunoyan, walay sinmabin laki ya nantepet: “Siopay akanggawad saya?” Imbaga to may brother ya gawa to, tan walay deral to may luganan. Oniay inyebat to may laki: “Anggapoy problema. Saliwen ko la, ta onia may modelo tan kolor ya labay nen asawak. Ibagam labat no sampiga.” Kanian alako na brother may luganan to tan akasaliw na arum ya luganan. Oniay imbaga na brother ya alikna dan sanasawa: “Agaylay liket mi ed saman ya agew. Amta mi ya ag-iman nibanbana. Tinulongan kami nen Jehova.”

10. Base ed Salmo 37:5, antoy nepeg tayon tandaan pian agtayo masyadon panaburidoan iray materyal a pankaukolan tayo?

¹⁰ No dengelen tayo imay bilin na managpastol  ya agtayo masyadon panaaburidoan iray materyal a pankaukolan tayo, makapanmatalek tayo ya taryaan itayo nen Jehova. (Basaen so Salmo 37:5; 1 Ped. 5:7) Isip yo pa iramay problema ya abitla ed  parapo 5. Ompan nalilikna yoy tulong nen Jehova ta makakalmo ni so ulo na pamilya yo. Odino anggan panon et walay sakey ed pamilya yo ya walay trabaho to. Pero panon to balet no agla makatrabaho so ulo na pamilya odino nakal ed trabaho imay alenleneg kalamor ya onaanap ed pamilya yo? Tandaan ya walan-walay gawaen nen Jehova pian naasikaso to tayo. Sikato lay akauley. Pantongtongan tayo so sakey nin imbaga na maong a managpastol tayo ya agtayo nepeg ya gawaen.

11. Base ed Mateo 7:1, 2, antoy imbaga nen Jesus ya agtayo la gagawaen, tan akin et aliwan mainomay itan?

¹¹ Basaen so Mateo 7:1, 2. Amta nen Jesus ya lapud agtayo perpekto, say nanengneng tayon tampol et say lingo na arum. Kanian oniay bilin to: “Agkayo la manguukom.” Ompan gagawaen tayo met lay anggaay nayarian tayo ya ag-ukomen odino husgaan iray agagi. Pero panon to no nalilikas tayon magmamaliw tayo lan makritiko? Pansagpotan tayon unoren imay bilin nen Jesus ya, “Agkayo la manguukom.”

12-13. Antoy naaralan tayo ed reaksion nen Jehova nen akagawa na ambelat iran kasalanan si Arin David?

¹² Makaaral tayo ed mismon alimbawa nen Aman Jehova. Say nenengnengen to et say kamaongan na kada too. Imanoen tayo pay reaksion nen Jehova nen akagawa na ambelat ya kasalanan si Arin David. Singa bilang, akagaway imoral si David nen inala toy Bat-sheba ya asawa nen Urias, tan impapatey to ni ingen si Urias. (2 Sam. 11:2-4, 14, 15, 24) Inani nen David so resulta na kasalanan to, tan adamay so interon pamilya to. Tan siempre, asakisakitan iray arum ya asawa to. (2 Sam. 12:10, 11) Wala met may panaon ya impabilang nen David no pigaray sundalo ed interon Israel anta ag-itan ingganggan nen Jehova. Imbes ya mantiwala ed Dios, nantiwala ed kabiskeg na puersa militar to. Antoy resulta ey? Manga 70,000 ya Israelita so inatey lapud salot!—2 Sam. 24:1-4, 10-15.

¹³ No sakey kan Israelita ed saman ya panaon, anto kasi pakanengneng mod si David? Kasin husgaan mo tan isipen mo ya agdapat kasian nen Jehova? Anto balet so reaksion nen Jehova ey? Ninonot toy abayag ya impanmatoor nen David tan say impanengneng ton impapuson panagbabawi. Atan so rason no akin ya kinasian tan pinerdona nen Jehova si David anggano akagawa na ambelat iran kasalanan. Amta nen Jehova ya sikatoy inar-aron maong nen David tan talagan labay nen David ya ipetek iray lingo to. Maong labat ta say nenengnengen na Dios tayo et saray kamaongan ya walad puso tayo!—1 Ara. 9:4; 1 Awa. 29:10, 17.

14. Antoy makatulong pian agtayo husgaan iray agagi?

¹⁴ No si Jehova ya Dios et papalampasen to iray lingo tayo tan say kamaongan tayo so nenengnengen to, di ontan met so dapat tayon gawaen ed arum. Maslak, say naiimano tayon tampol et say lingo na agagi tan mainomay tayoy manbalaw. Pero no maespiritual tayon too tan aligen tayoy Jehova, agtayo la pinunuyan so lingo tan kakapuyan na arum. No makanengneng kay diamond ya agni apino, ompan agka narakepan ya tampol. Pero antam ya mabmabli itan tan onkirlap lanlamang no apino la. Ontan met so nepeg tayon isipen ed saray agagi. Singa si Jehova tan Jesus, agtayo ra huhusgaan ya tampol noagta manpokus tayo ed saray balibalin ugali da.

15. Anto ni makatulong pian agtayo balawen o husgaan iray agagi?

 ¹⁵ Anto ni makatulong pian agtayo balawen o husgaan iray agagi? Maabig no isipen tayon maong so situasyon da. Makaaral tayod alimbawa nen Jesus. Aminsan, nen walad templo, walay anengneng ton pobrin balo ya angipelag na duaran angkelag a sinsilyo diad pananginan na donasyon. Agto inisip ya: “Akin et aman labat so impelag to?” Imbes, indayew to ni ingen so ginawa to may pobrin balo, ta anggano mair-irap so bilay to, ginawaan toy anggaay nayarian ton mandonasyon.—Luc. 21:1-4.

16. Antoy naaralan mo ed eksperiensya nen Veronica?

¹⁶ Pian mas natalosan tayo no akin ya importantin amta tayo so situasyon na saray agagi, imanoen tayoy eksperiensya nen Sister Veronica. Walay kakongregasyon ton sister ya bukor toy mamapabaleg ed anak to. Oniay inamin nen Veronica: “Lapud matalag iran miaral tan manpulong, say pakanengneng kod sikara et aliwa ran maseseg. Pero aminsan, aka-partner kod panagpulong imay nanay. Imbaga tod siak ya wala manayay autism to may anak to. Naiirapan ta siempre sikatoy manaanap na pambilay da, tan gagawaen to met so anggaay nayarian to pian agnapaulyan so espiritualidad dan sanina. Diad tua, no maminsan lapud kondisyon nen anak to, dia lad arum ya kongregasyon so pipiaralan da.” Oniay intuloy nen Veronica:  “Agko amta ya onman manayay dadalanen to may sister. Nen naamtaan koy situasyon to, diman ko a-realize ya matoor ed si Jehova, kanian naar-arok.”

17. Base ed Santiago 2:8, antoy nepeg tayon gawaen, tan panon tayo itan ya niyaplika?

¹⁷ Antoy gawaen tayo no nalikas tayon huhusgaan tayo la so sakey ya agi? Tandaan tayo imay ibabaga na Biblia ya aroen tayoy kapara tayon too. (Basaen so Santiago 2:8.) Tan ipikasi tayod si Jehova ya tulongan to tayo pian ag-itayo magmaliw ya mabalaw o makritiko. Pero kaukolan tayon tekepan na gawa so pikakasi tayo. Manggawa tayoy paraan pian nakabat tayon maong imay agi. Singa bilang, miistoryaan tayod sikato, miulop tayod sikato diad panagpulong, o itagar tayon mangan. Legan tayon mas nakakabat imay agi, aligen tayoy Jehova tan Jesus—say pampokusan tayo et saray maong ya ugali to. No ontan so gawaen tayo, ipapanengneng tayo ya dedengelen tayoy bilin na maong a managpastol tayo ya, “Agkayo la manguukom.”

18. Panon tayon nipanengneng ya dedengelen tayoy boses na maong a managpastol tayo?

¹⁸ No panon ya dedengelen na saray literal ya karnero so boses na managpastol da, dedengelen met na saray papatumbok nen Jesus so boses to. Bendisyonan itayo nen Jehova tan Jesus no agtayo alablabas ya manaburido ed saray materyal ya pankaukolan tayo tan no pansagpotan tayon ag-ukomen so arum. Balanglan kabiangan itayo na “melag a pulok” odino na ‘arum a karnero,’ komon ta tuloytuloy tayon dengelen tan unoren so boses na maong a managpastol tayo. (Luc. 12:32; Juan 10:11, 14, 16) Pantongtongan tayo ed ontumbok ya artikulo so duaran imbaga nen Jesus ya nepeg ya gawaen na saray papatumbok to.