1. Mukunda natshi Yesu wafuanesele alandudi enji nu imeme?

YESU wafuanesele ufuta wenji nu alandudi enji nu ufuta wakhala nawo mubambi wa imeme nu imeme yenji. (Yone 10:14) Gifezegeselo giene gidi diago giatagana. Imeme yana jiya mubambi wayo nu yana tegelela dijui dienji. Muthu mumoshi wana wenda ha gutala mafundo a ha mavu wamonele nji ndaga yene. Wazuelele egi: “Tuakhalele mutshigina gukuata imeme foto nu guyitamega hagula isuene hehi nu esue. Uvi yatunyine gutulandula handaga yakhalelego mujiya majui etu. Gungima mona mumoshi wa yala wajile, wayitamegele, yayile nu gumulandula handaga muene wakhalele mubambi wayo.”

2-3. (a) Luholo lutshi alandudi a Yesu ana monesa egi ana tegelela dijui dienji? (b) Itshi tuza mutadila mu longo edi nu mu longo dialandula?

² Ndaga jiatagenele najio muthu tuakatuga guzuelela, jidi gutuwunguluisa ndaga jiazuelele Yesu mukunda nu imeme yenji, yakotelesa egi alandudi enji. Wazuelele egi: ‘Yene mbayivua dijui diami.’ (Yone 10:16) Uvi Yesu udi mu dilu. Luholo lutshi giwa tuajiya gutegelela dijui dienji? Tuana tegelela dijui dia Fumu wetu tangua tuana kalegela malongo enji mu monyo wetu.—Mat. 7:24, 25.

³ Mulongo edi nu mu longo dialandula tuza mutadila malongo ako alongesele Yesu. Tuza mumona egi Yesu walongesele egi gudi nu ndaga jiko tudi naye gutshita uvi jiko tushigo naye gutshita. Thomo, tuza mutadila ndaga mbadi tushigo naye gutshita gifua luholo mubambi wabonga udi gutulongesa.

4. Itshi yajiya gututuma ha ‘gudisagesa muavula’? (Luka 12:29)

⁴ Tanga Luka 12:29. Yesu wawambelele alandudi enji ha ‘gubemba gudisagesa muavula’ mukunda nu ima akhalele nayo funu. Tudi mujiya egi longo edi dia Yesu diakhala nu ndando tangua diagasue nu didi diatagana. Tuana tshingina gudikalegela, uvi matangua ako yajiya gukhala lamba ha guyitshita. Mukunda natshi?

5. Mukunda natshi athu ako ana gudisagesa mukunda nu ima adi nayo funu?

 ⁵ Athu ako ajiya gudisagesa mukunda nu ima ya gudia, milele nu fundo dia gubanda. Yajiya gukhala egi ana jinga mu gifutshi ginyi athu avula adi phutu, nga ndo yakhala lamba ha guheta mudimo. Yajiya gukhala lamba ha guheta mbongo jia gutagenesa nzala jia enya fami jiawo. Yajiya nji gukhala egi muthu wakhalele nu mbongo ha gukuatesa fami wafuile gale. Ngenyi yajiya gubata malamba mu fami yene. Yajiya nji gukhala egi athu avula atotesa midimo mukunda nu misongo ya corona virus. (Mulo. 9:11) Gula tudi mutagana nu malamba a luholo elu nga malamba ako, luholo lutshi tuajiya gulandula longo dia Yesu dia gubemba gudisagesa muavula?

6. Ndaga itshi yabuidile mupostolo Phetelo?

⁶ Lusugu lumoshi mupostolo Phetelo nu apostolo ako akhalele mu wato mu Kianga gia Galilea. Mu tangua diene funji yakola yabundile. Gungima amonele Yesu muwenda holu dia meya. Phetelo wazuelele egi: ‘Fumu, gula idi aye, nguwambele nguwende holu dia meya.’ Yesu wamuwambelele egi “Iza.” Phetelo wazogele mu wato, “wawendele holu dia meya ha guya gudi Yesu.” Tutalenu ndaga yabuile gungima. “Tangua diamonele muene funji yakola, wavile woma. Wasendesele gushiwuga  mu meya, wakalugile egi: ‘Fumu, nguhuluise!’” Yesu wasunuine koko dienji, wamuhuluishile. Phetelo wakhalele naye guwenda holu dia meya gula nga walanduile gutala Yesu. Uvi tangua diatalele muene funji yakola, wavuile woma, gakhalelego luko nu gutshigina; wasendesele gushiwuga.—Mat. 14:24-31.

7. Malongo atshi tuazula mu gifezegeselo gia Phetelo?

⁷ Malongo atshi tuajiya guheta mu gifezegeselo gia Phetelo. Tangua diazogele muene mu wato, gakhalelego mutangiza egi wajiya guvua woma wa funji nga ndo wajiya gusendesa gushiwuga. Wakhalele mutshigina guwanda holu dia meya ha guya gudi Fumu wenji. Uvi ha fundo dia gulandula gutala Yesu, wavile woma wa funji. Mangino tuanago guwenda holu dia meya, uvi tuana tagana nu ndaga jiana toga egi tumonese gutshigina guakola. Gula tushigo musha mutshima gudi Yehowa nu mu ndaga jialayile muene, gutshigina guetu guajiya guleba. Hene tudi naye gulandula gushila Yehowa mutshima, ikhale tudi mutagana nu malamba adi gifua funji yakola. Tudi naye nji gujiya egi muene mbawutukuatesa. Luholo lutshi tuajiya gushila Yehowa mutshima?

8. Itshi yajiya gutukuatesa ha gutuna gudisagesa muavula mukunda nu ima tudi nayo funu?

⁸ Tudi naye gushila Yehowa mutshima ha fundo dia gudisagesa muavula mukunda nu malamba adi gutubuila. Yehowa Tata wetu wa guzumba watulayile egi gula tuasha Ufumu wenji ha fundo dia thomo, mbawutuhana ima tudi nayo funu. (Mat. 6:32, 33) Yehowa wana tagenesa ndaga jiana zuela muene. (Mikh. 8:4, 15, 16; Ngi. 37:25) Yadiago tushigo naye gudisagesa muavula mukunda nu ima mbatudia nga milele mbatusudiga, handaga Yehowa wana disa tunjila nu wana sudigisa iyaji. (Mat. 6:26-30; Fili. 4:6, 7) Mvuaji jiana hana an’awo ima adi nawo funu handaga ana guazumba. Luholo lumoshi nji, Yehowa wana hana akombeledi enji ima adi nayo funu handaga wana guazumba. Yadiago tudi naye gusha mutshima egi Yehowa mbawutukuatesa!

9. Longo ditshi wazula mu gifezegeselo gia phangi mumoshi wa yala nu mukaji’enji?

⁹ Tutadilenu gifezegeselo gimoshi ha gujiya luholo Yehowa wana gutukuatesa. Phangi mumoshi nu mukaji’enji akhalele mu mudimo wa tangua diagasue, ayile mu gamiyo gayo gakulu gu camp ya barefije ha guzangula aphangi a akhetu hagula aye nawo mu gudibungisa gua mu hungu. Akalegele tangua dimoshi mu njila. Phangi wa yala udi muzuela egi: “Gungima dia gudibungisa, tuatamegele aphangi ene gumbo dietu ha gudia, uvi gungima tuakotelesele egi tuakhalelego nu gima gia guahana.” Itshi phangi muene nu mukaji’enji akalegele? Udi muzuela egi: “Tangua tuahetele gu inzo, tuasangele makuba mbadi akoma a ima ya gudia ha mufulo. Tuajiyilego muthu wabembele ima yene. Yehowa watuhanele ima tuakhalele nayo funu.” Gungima gamiyo ga phangi muene gabolele. Gene gakhalele guakuatesa ha guya mu mudimo wa gulongesa, uvi akhalelego nu mbongo jia gugalondesa. Ayile nago fundo ana londa tumiyo, muthu mumoshi wahudile egi: “Gaga gamiyo ga nanyi?” Phangi wazuelele egi gamiyo gami, gadi naye gulondewa. Muthu muene wazuelele egi: “Gushigo mulonga. Mukaji’ami wana tshigina gamiyo ga luholo elu, nu mukubu owu. Udi gugasumbisa mu gutshi?” Gungima phangi wadigile gamiyo gene, wahetele makuta a gusumba gamiyo gako. Udi muzuele egi: “Tuasuangulugile diago muavula lusugu luene. Tuakotelesele egi yakhalele diago koko dia Yehowa.”

10. Luholo lutshi Ngimbo 37:5 idi gutukuatesa ha gubemba gudisagesa muavula mukunda nu ima tudi nayo funu?

¹⁰ Tuajiya gusha mutshima egi Yehowa mbawutuhana ima tudi nayo funu gula tudi mutegelela  mubambi wabonga nu tuabemba nji gudisagesa muavula. (Tanga Ngimbo 37:5; 1 Phet. 5:7) Tutadilenu ndaga jia lamba tuazuelela mu  paragrafe 5. Tuakotelesa egi Yehowa wajiya gukalegela fumu wa fami nga fumu wa mudimo ha gutukuatesa nu ima tudi nayo funu. Gula fumu wa fami gashigo nu makuta agutagenesa nzala jia enya fami yenji nga ndo mudimo wetu wafua, tudi naye gusha mutshima egi Yehowa mbawutukuatesa mu maluholo ako. Tudi naye gusha diago mutshima egi Yehowa mbawutagenesa ndaga yene. Tutadilenu ndaga iko mubambi wabonga udi gututoga ha gumbemba gutshita.

11. Mu Matayo 7:1, 2 itshi idi gutuwambela Yesu ha gutshita? Mukunda natshi yajiya gukhala lamba ha guyitshita?

¹¹ Tanga Matayo 7:1, 2. Yesu wakhalele mujiya egi luholo athu ashigo atagana, matangua ako ana gumona phamba gubola gua athu ako. Hene wazuelele egi: “Bembenu gusophesa athu.” Tuajiya gutshita ngolo ha gubemba khadilo dia gusophesa aphangi’etu Aklisto. Tudi mujiya egi mukut’etu agasue tushigo athu atagana. Uvi itshi tudi naye gutshita gula tuakotelesa egi matangua ako tuakhala nu khadilo dia gufeta aphangi ako? Tudi naye gutegelela Yesu, nu gutshita ngolo ha gubemba gusophesa athu.

12-13. Luholo lutshi gifezegeselo gia Yehowa giajiya gutukuatesa ha gubemba gusophesa athu ako?

¹² Gutangigiza gifezegeselo gia Yehowa guajiya gutukuatesa. Yehowa wana mona makalegelo abonga a athu. Tangiza ndaga yakalegele muene tangua Fumu Davidi wakalegele gubola guakoma. Ha gufezegesa, wakalegele uthambi nu Batesheba, washiyile nji mulumi’enji. (2 Sam. 11:2-4, 14, 15, 24) Ndaga yene yabatele Davidi nu fami yenji nu akaji’enji ako malamba. (2 Sam. 12:10, 11) Lusugu luko nji Davidi gashilego mutshima gudi Yehowa, tangua diakambele muene gujiya mutango wa masuta gu Isalele. Uvi Yehowa gamuwambelelego ha guyitshita. Yajiya gukhala egi lulendo luamutumine ha gutshita ngenyi. Washile nji mutshima gu mutango wa masuta enji. Ndaga itshi yabuile gungima? Enya Isalele 70 000 afuile gu misongo!—2 Sam. 24:1-4, 10-15.

¹³ Gula nga wakhalele gu Isalele mu tangua diene, luholo lutshi wakhalele naye gutadila Davidi? Wakhalele naye gutangiza egi Yehowa gakhalelego naye gumutotesela ba? Yehowa gatangijilego ngenyi. Uvi wakhalele mutadila ndaga jiabonga jiakalegele Davidi mu monyo wenji, nu luholo luabalumuine muene diago mutshima. Yehowa watotesele Davidi gubola guenji. Wakhalele mujiya egi Davidi wana gumuzumba muavula nu wakhalele mutshigina gukalagala ndaga jiabonga. Tudi nu gusuanguluga luholo Yehowa wana tala phamba makalegelo etu abonga.—1 Maf. 9:4; 1 Gudi. 29:10, 17.

14. Itshi yajiya gukuatesa Aklisto ha gutuna gutala phamba gubola gua athu ako?

¹⁴ Yehowa ganago gututoga egi tukalagale ndaga gifua athu atagana. Esue nji tushigo naye gukamba egi athu ako atukalegele ndaga gifua athu atagana. Uvi tudi naye gutala makalegelo awo abonga. Matangua avula tuana mona phamba gubola gua athu ako nu tuana zuela ndaga jiabola mukunda nu ene. Uvi muthu wana landula gifezegeselo gia Yehowa, wana tshita ngolo ha gumona ndaga jiabonga athu ako ana kalagala.Tuzangulenu gifezegeselo gia diama. Gula diama dishigo diagulonda, dianago gumonega gifua didi nu ndando. Uvi muthu wana jiya diama muabonga, wana jiya egi gula adilonda, mbadikhala nu ndando yavula. Yehowa nu Yesu adi nji gifua muthu wana jiya diama muabonga, handaga anago gutala phamba gubola guetu, uvi ana tala makalegelo etu abonga. Esue nji tudi naye gulandula gifezegeselo giawo.

15. Luholo lutshi gutangiza ndaga athu adi mutagana najio guajiya gutukuatesa ha gutuna guzuela ndaga jiabola mukunda nu ene?

 ¹⁵ Mu paragrafe jiabalega tuamonyi egi tushigo naye gutala phamba gubola gua athu ako, uvi tudi naye nji gutala makalegelo awo abonga. Itshi yajiya gutukuatesa ha gutuna guzuela ndaga jiabola mukunda nu ene? Tudi naye gukamba gujiya ndaga adi mutagana najio. Tutadilenu gifezegeselo gimoshi. Lusugu lumoshi mu tempelo, Yesu wamonele mukhetu mumoshi wa gafunda mumba mbongo mbadi jia utadi jia ndando yazonda mu mushete. Yesu gamuhudilego egi: “Mukunda natshi udi mumba mbongo jiazonda?” Uvi wasuangulugile nu ndaga yakalegele mukhetu muene, handaga gatalelego phamba guvula gua makuta enji. Uvi watangijile ndaga yamutumine ha gumba makuta ene nu wajiyile egi wakhalele mukhetu wa gafunda, wakhalele nji phutu.—Luka 21:1-4.

16. Gifezegeselo gia phangi Veronica gidi gugulongesa itshi?

¹⁶ Gifezegeselo gia phangi Veronica gidi gutukuatesa ha gujiya egi, idi nu ndando ha gutangiza ndaga athu ako adi mutagana najio. Mu hungu diawo guakhalele nu phangi mumoshi wa mukhetu wakhalele musansa mun’enji muene hakhenji. Phangi Veronica udi muzuela egi: “Phangi muene nu mun’enji akhelelego muza muavula mu gudibungisa gua mu hungu nga guya mu mudimo wa gulongesa. Ngakhalele guatangijila muabola. Uvi lusugu lumoshi tuayile  n’enji mu mudimo wa gulongesa. Wanguwambelele egi mun’enji wana kata misongo ya muto, ndaga yene yana gumusagesa muavula. Uvi wana kalagala ngolo ha guya mukamba ima ya gudia, nu ha gukhala nu ufuta wabonga nu Yehowa. Mukunda nu misongo ya mun’enji, masugu ako ana guya mu gudibungisa mu hungu diko.” Phangi Veronica udi muzuela egi: “Ngakhalelego mujiya egi phangi muene wana tagana nu malamba akola ngenyi. Henyaha ngana ngumuzumba nu ngana gumunemesa muavula handaga wana tshita ngolo ha gukombelela Yehowa.”

17. Yakoba 2:8 idi gututoga ha gukalagala itshi? Luholo lutshi tuajiya guyitshita?

¹⁷ Itshi tudi naye gutshita gula tuakotelesa egi tuakhala nu khadilo dia guzuela ndaga jiabola mukunda nu aphangi? Tudi naye gujiya egi tudi naye guzumba aphangi’etu. (Tanga Yakoba 2:8.) Tudi naye nji gukombelela Yehowa nu mutshima umoshi hagula atukuatese ha gubemba guzuela ndaga jiabola mukunda nu aphangi. Gungima, tudi naye gutshita yagasue ha gukuata ufuta nu phangi muene tuana feta. Mbayitukuatesa ha gumujiya muabonga. Tuajiya nji gumutoga ha guya n’enji mu mudimo wa gulongesa nga ha gudia n’enji hamoshi. Gula tuakamba gujiya aphangi muabonga, mbayitukuatesa ha gujiya makalegelo awo abonga gifua muana tshita Yehowa nu Yesu. Ngenyi mbatumonesa egi tudi mutumagela mukhuala watuhuile mubambi wabonga wa gubemba gusophesa athu.

18. Luholo lutshi tuajiya gumonesa egi tuana tegelela dijui dia mubambi wabonga?

¹⁸ Imeme yana tegelela dijui dia mubambi wayo. Luholo lumoshi nji alandudi a Yesu ana tegelela dijui dienji. Gula tuatshita ngolo ha gubemba gudisagesa muavula mukunda nu ima tudi nayo funu nu tuabemba gusophesa athu ako, Yehowa nu Yesu mbaatukuatesa. Ikhale tudi mukatshi dia “thundu yazonda” nga dia “imeme iko,” mukut’etu agasue tudi naye gulandula gutegelela dijui dia mubambi wabonga nu gumutumagela. (Luka 12:32; Yone 10:11, 14, 16) Mu longo dialandula, mbatumona ndaga mbadi jinyi Yesu wawambelele alandudi enji ha gukalagala.