1. Why nao Jesus sei olketa disaepol olsem olketa sheepsheep?

JESUS and olketa disaepol savve gud lo each other, olsem wanfala shepherd and olketa sheepsheep blo hem. (John 10:14) Disfala tokpiksa hem fitim bikos olketa sheepsheep savve lo shepherd blo olketa and followim wanem hem talem. Wanfala tourist lukim olketa sheepsheep duim datwan. Hem sei: “Mifala laek tek photo lo samfala sheepsheep, so mifala trae for kolem olketa kam. Bat olketa no kam bikos olketa no heresavve lo voice blo mifala. Then wanfala young shepherd boy kolem olketa, and semtaem nomoa olketa kam lo hem.”

2-3. (a) Hao nao olketa disaepol blo Jesus showimaot olketa herem voice blo hem? (b) Wanem nao bae iumi storyim lo disfala article and lo next wan?

² Wanem hem happen lo datfala tourist mekem iumi tingim toktok blo Jesus abaotem olketa follower blo hem. Hem sei: “Bae olketa herem toktok bilong mi.” (John 10:16) Bat Jesus stap lo heven, so hao nao iumi savve herem toktok blo hem? Main wei for showimaot iumi herem toktok blo Jesus hem for followim olketa teaching blo hem.​—Matt. 7:24, 25.

³ Lo disfala article and lo next wan, iumi bae storyim samfala lo olketa teaching blo Jesus. Lo next article, bae iumi storyim tufala samting wea Jesus teachim iumi for mas duim. And lo disfala article, bae iumi storyim tufala samting wea Jesus talem iumi for mas no duim.

4. Olsem Luke 12:29 storyim, wanem nao samfala samting wea iumi savve “wari tumas” abaotem?

⁴ Readim Luke 12:29. Jesus talem olketa disaepol for “no gohed for wari tumas” abaotem olketa samting wea olketa needim. Iumi savve Jesus hem evritaem givim best  advaes. Iumi laek for followim advaes blo hem, bat samfala taem maet hem no isi for iumi duim datwan. Why nao olsem?

5. Wanem nao mekem samfala pipol for wari tumas abaotem samting wea olketa needim?

⁵ Samfala maet wari tumas abaotem wanem olketa needim olsem kaikai, kaleko, and ples for stap. Maet olketa stap lo kantri wea staka pipol poor. Datwan mekem hem hard for faendem waka or for kasem inaf selen for lukaftarem famili. Or dadi or mami wea waka for selen for sapotim famili hem dae, and famili no garem selen for peim wanem olketa needim. And tu, staka lusim waka blo olketa bikos lo disfala sik coronavirus. (Eklesiastes 9:11) Sapos olketa samting hia or eni nara samting happen lo iumi, hao nao iumi savve herem and followim toktok blo Jesus for no wari tumas?

6. Storyim samting wea happen lo Peter.

⁶ Wantaem, aposol Peter and olketa nara aposol insaed boat lo Sea blo Galilee, and wind hem big tumas. Lo datfala taem, olketa lukim Jesus wakabaot kam antap lo sea. Peter sei lo Jesus for ‘talem hem for wakabaot kam long Jesus antap lo sea.’ Bihaen Jesus talem hem for “kam,” Peter lusim boat and “wakabaot go antap long wata” for kasem Jesus. Tingim next samting wea happen. Bible sei: “Taem [Peter] lukim strongfala wind hia hem fraet nao, and hem start for sink daon. Hem singaot olsem: ‘Lord, sevem mi!’” Jesus holem hand blo Peter and sevem hem. Tingim, Peter savve wakabaot antap lo sea taem hem gohed for lukluk lo Jesus. Bat taem Peter luk lo datfala raf sea, datwan mekem hem for daot and fraet tumas, so hem start for sink nao.​—Matt. 14:24-31.

7. Wanem nao iumi savve lanem from example blo Peter?

 ⁷ Iumi savve lanem samting from example blo Peter. Taem Peter go aot from boat and step antap lo sea, hem no tingse bae hem fraet. Hem tingim nomoa for wakabaot go lo Jesus. Bat gogo hem start for fraet, hem lusim faith blo hem, and hem start for sink daon. Olsem Peter, iumi needim faith taem iumi deal witim olketa problem. Sapos iumi no trustim Jehovah and olketa promis blo hem, datwan savve spoelem faith blo iumi and iumi savve start for wikdaon lo spiritual wei. So nomata iumi feisim eni big problem, iumi mas gohed trustim Jehovah for helpem iumi. Hao nao iumi savve duim datwan?

8. Wanem nao savve helpem iumi for no wari tumas abaotem olketa samting wea iumi needim?

⁸ Samting wea bae helpem iumi for no wari tumas hem for trustim Jehovah. Tingim hao Jehovah hem promis for provaedem olketa samting wea iumi needim sapos Kingdom hem first samting lo laef blo iumi. (Matt. 6:32, 33) Evritaem hem lukaftarem pipol blo hem. (Diutronomi 8:4, 15, 16; Sams 37:25) Iumi savve Jehovah provaedem kaikai for olketa bird and hem mekem olketa flaoa for luk naes, so iumi no need for wari tumas abaotem wanem iumi bae kaikaim or werem! (Matt. 6:26-30; Phil. 4:6, 7) From dadi and mami lovem olketa pikinini, olketa mek sure olketa pikinini garem wanem olketa needim. Olsem tu, from Jehovah lovem iumi, bae hem provaedem wanem iumi needim. So iumi savve sure Jehovah bae lukaftarem iumi!

9. Wanem nao iumi savve lanem from experience blo wanfala hasband and waef?

⁹ Tingim wanfala experience wea showimaot Jehovah savve provaedem wanem iumi needim. Wanfala hasband and waef wea pioneer, draev for winim wan hour for pikim samfala sista wea refugee, for tekem olketa lo meeting. Hasband hem sei: “Bihaen lo meeting, mifala talem olketa for kam lo haos for lelebet kaikai, bat then mifala tingim mifala no garem inaf kaikai for sharem witim olketa.” So wanem nao happen? Hasband sei: “Taem mifala kasem haos, mifala lukim tufala big basket kaikai stap front lo door. Mifala no savve hu nao kam putim lo there, bat mifala savve Jehovah nao lukaftarem mifala.” Narataem, car blo tufala pioneer hia brekdaon. Tufala needim car for duim ministry blo tufala, bat tufala no garem inaf selen for fixim. Tufala tekem go lo workshop for fixim, and wanfala man kam askem tufala: “Diswan car blo hu?” Brata hem sei: “Hem car blo mitufala, bat hem brekdaon.” Man hia sei: “Nomata hem brekdaon, waef blo mi talem mi hem laek for garem car wea model and kala olsem disfala car blo iu. Mi savve peim distaem?” Man hia givim inaf selen lo brata for baem nara car. Brata hem sei: “Bihaen datwan mitufala hapi tumas. Mifala luksavve Jehovah nao helpem mitufala.”

10. Wanem nao Sams 37:5 sei bae mekem iumi for no wari tumas abaotem wanem iumi needim?

¹⁰ Taem iumi followim toktok blo Jesus for no wari tumas abaotem wanem iumi needim, iumi savve sure Jehovah bae provaedem datwan for iumi. (Readim Sams 37:5; 1 Pet. 5:7) Tingim olketa samting wea iumi storyim lo paragraf 5 wea pipol savve warim. Kam kasem distaem, maet dadi or mami, or iumiseleva, waka for kasem selen for wanem iumi needim. Sapos dadi or mami no stap  for provaedem wanem famili needim, or iumi lusim waka, Jehovah bae lukaftarem iumi. Iumi savve sure lo datwan. Distaem bae iumi storyim nara samting wea Jesus talem iumi for mas stop for duim.

11. Olsem Matthew 7:1, 2 storyim, wanem nao Jesus sei for stop for duim, and why nao diswan no isi?

¹¹ Readim Matthew 7:1, 2 and footnote. Jesus savve from pipol no perfect olketa bae judgem narawan. Dastawe Jesus sei for “stop for” judgem narawan. Maet iumi traem best for no judgem olketa brata and sista, bat samfala taem iumi savve duim datwan. Sapos iumi savve judgem narawan samfala taem, wanem nao iumi shud duim? Herem and followim toktok blo Jesus, and waka hard for stop for judgem narawan.

12-13. Taem iumi ting raonem hao Jehovah deal witim King David, hao nao bae datwan helpem iumi for stop for judgem narawan?

¹² Hem gud for ting raonem example blo Jehovah for tingim gud saed blo pipol. Tingim hao Jehovah deal witim King David, nomata hem duim olketa barava nogud samting. Olsem example, hem durong witim Bath-sheba, and hem killim dae tu hasband blo hem. (Mektu Samuel 11:2-4, 14, 15, 23, 24) From David duim datwan, hem and famili blo hem kasem nogud samting. (Mektu Samuel 12:10, 11) Lo narataem, David showimaot hem no trustim Jehovah taem hem askem Joab for kaontem haomas soldia lo army blo hem, nomata Jehovah no talem hem for duim datwan. Maet hem duim datwan bikos hem praod lo army blo hem and trustim olketa for protectim hem. From hem duim olsem, 70,000 Israelite dae from wanfala sik!​—2 Sam. 24:1-4, 10-15, NW.

¹³ Sapos iu stap lo Israel lo datfala taem, hao nao bae iu ting lo David? Maet iu tingse Jehovah shud no forgivim hem. Bat Jehovah showimaot mercy and forgivim David bikos Jehovah tingim hao David hem wanfala faithful man and hem barava repent from olketa sin hia. Jehovah savve David lovem hem tumas and laek for duim stret samting. Iumi barava tinghae lo hao Jehovah tingim gud saed blo iumi.​—Fas King 9:4; Fas Kronikols 29:10, 17.

14. Wanem nao bae helpem olketa Christian for no judgem olketa narawan?

¹⁴ Jehovah luksavve iumi savve mekem mistek, so iumi tu shud garem sem tingting abaotem olketa narawan and tingim gud saed blo olketa. Hem isi tumas for lukim wik point blo olketa narawan and judgem olketa. Bat man wea followim example blo Jehovah bae gohed waka gud witim olketa narawan nomata hem lukim wik point blo olketa. Olsem example, man wea no savve abaotem olketa diamond maet lukim wanfala diamond wea olketa no katem and polishim yet and sei hem no luk naes. Bat man wea savve abaotem olketa diamond bae tingim hao datfala diamond bae luk naes tumas bihaen olketa katem and polishim. Olsem Jehovah and Jesus, iumi shud no gohed tingim wik point blo olketa narawan bat tingim gud saed blo olketa.

15. Taem iumi ting raonem laef blo pipol, hao nao datwan bae helpem iumi for no judgem olketa?

¹⁵ Wanem nao nara samting wea savve helpem iumi for no judgem olketa narawan? Hem gud for iumi tingim hao nao laef blo olketa. Tingim disfala example. Wanday lo temple, Jesus lukim wanfala poor widow woman putim tufala coin nomoa insaed lo contribution box. Jesus  no askem olsem: “Why nao hem no givim samfala selen moa?” Jesus no tingim amount wea widow woman hia givim, bat Jesus luksavve hem duim best blo hem nomata hem poor tumas, and Jesus praisem hem for duim datwan.​—Luke 21:1-4.

16. Wanem nao iumi savve lanem from experience blo Veronica?

¹⁶ Experience blo Veronica showimaot hem important for tingim hao nao laef blo pipol. Wanfala singol mami and son blo hem stap lo kongregeson blo hem. Veronica sei: “Mi no hapi lo tufala bikos mi lukim hao staka taem tufala no savve kam lo meeting or go preaching witim kongregeson. Bat wanday mi go preaching witim datfala sista. Hem talem mi son blo hem garem problem lo brain. Sista hia mas waka hard for kasem wanem tufala needim and for lukaftarem spiritual saed blo tufala. Bikos lo problem blo son blo hem, samfala taem hem mas go meeting lo nara kongregeson.” Veronica sei moa: “Bifor mitufala story, mi nating savve hem deal witim hard taem olsem. Distaem mi tinghae tumas lo disfala sista from hem duim best blo hem for worshipim Jehovah.”

17. Wanem nao James 2:8 talem iumi for duim, and hao nao iumi savve duim datwan?

¹⁷ Sapos iumi luksavve iumi judgem samwan lo kongregeson, wanem nao iumi shud duim? Hem gud for tingim hao iumi  mas lovem olketa brata and sista. (Readim James 2:8.) And tu, iumi shud prea strong lo Jehovah, and askem hem for helpem iumi for stop for judgem narawan. Then duim samting followim prea blo iu and go story witim datfala brata or sista. Datwan bae helpem iumi for savve moa abaotem laef blo hem. Maet hem gud for askem hem for iutufala waka tugeta lo ministry or for kam kaikai lo haos. Taem iumi start for minim datfala brata or sista, datwan bae helpem iumi for tingim gud saed blo hem, olsem Jehovah and Jesus duim. Taem iumi duim olketa samting hia, iumi showimaot iumi herem and followim toktok blo Jesus for stop for judgem narawan.

18. Hao nao iumi savve showimaot iumi herem toktok blo shepherd blo iumi, Jesus?

¹⁸ Olsem olketa sheepsheep herem voice blo shepherd and followim hem, iumi olketa follower blo Jesus laek for herem and followim toktok blo hem. Taem iumi no wari tumas abaotem wanem iumi needim and stop for judgem narawan, Jehovah and Jesus bae blessim iumi. Nomata iumi insaed lo “smol sekson bilong olketa sheepsheep” or iumi “olketa nara sheepsheep,” iumi laek for gohed for herem and obeyim toktok blo shepherd blo iumi, Jesus. (Luke 12:32; John 10:11, 14, 16) Lo next article, bae iumi storyim tufala samting wea Jesus talem olketa follower blo hem for mas duim.