مطالعے دا مضمون نمبر 50
چنگے چرواہے یسوع دی آواز سنو
اوہ میری آواز سُنن گیاں۔—یوحنا 10:16۔
گیت نمبر 3 (خوشی نال گاؤ): تُوں ساڈا سہارا، تُوں ساڈی امید
مضمون تے اِک نظر *
1. یسوع مسیح نے شاید کیس وجہ توں کہیا کہ اوہدے پیروکار بھیڈاں وانگوں نیں؟
یسوع مسیح نے دَسیا کہ اوہدا اپنے پیروکاراں نال رشتہ اُنج دا ای اے جیویں اِک چرواہے دا اپنیاں بھیڈاں نال ہوندا اے۔ (یوحنا 10:14) تے یسوع دا ایہہ کہنا بالکل صحی وی اے۔ بھیڈ اپنے چرواہے نُوں پچھاندی اے تے اوہدی آواز سُن دی اے۔ اِک بندے نے سیر کردے ویلے ایہی گل ویکھی۔ اوہنے کہیا: ”اَسی کجھ بھیڈاں دی ویڈیو بنانا چاہنے ساں۔ ایس لئی اَسی اوہناں دے نیڑے جان دی کوشش کیتی، پر اوہ ساڈے توں دُور بھج گئیاں کیونکہ اوہ ساڈی آواز نئیں پچھان دِیاں سن۔ فیر اِک چھوٹا جیہا منڈا آیا جیہڑا اوہناں دا چرواہا سی۔ جیویں ای اوہنے اوہناں نُوں بلایا، اوہ اوہدے پچھے پچھے ٹُرن لگ پئیاں۔“
2، 3. (الف) یسوع دے پیروکار ایہہ کیویں ظاہر کردے نیں کہ اوہ اوہدی آواز سن رہے نیں؟ (ب) ایس مضمون تے اگلے مضمون چ اَسی کیہڑیاں گلاں تے غور کراں گے؟
2 سیر کرن والے اوس بندے نُوں جیہڑا تجربہ ہویا اوہدے توں سانوں یسوع مسیح دی اوہ گل یاد آندی اے جیہڑی اوہنے اپنیاں بھیڈاں یعنی پیروکاراں بارے کہی سی۔ اوہنے کہیا: میریاں بھیڈاں میری آواز سُنن گیاں۔ (یوحنا 10:16) پر یسوع مسیح تے ہُن اسمان تے وے تے فیر اَسی اوہدی آواز کیویں سُن سکنے آں؟ اِنج کرن دا اِک طریقہ ایہہ وے کہ اَسی اوہدی تلیم تے عمل کرئیے۔—متی 7:24، 25۔
3 ایس مضمون تے اگلے مضمون چ اَسی یسوع مسیح دِیاں کجھ شاندار گلاں تے غور کراں گے جیہڑیاں اوہنے سکھائیاں سن۔ اَسی غور کراں گے کہ یسوع مسیح نے سانوں کیہہ کرن توں منع کیتا اے تے کیہہ کرن دا حکم دِتا اے۔ سب توں پہلاں اَسی دو ایہو جہیاں گلاں تے غور کراں گے جنہاں توں ساڈے چنگے چرواہے یسوع نے سانوں منع کیتا اے۔
حدوں ودھ پریشان نہ ہووو
4. لُوقا 12:29 دے مطابق کیہڑی چیز سانوں حدوں ودھ پریشان کر سکدی اے؟
4 لُوقا 12:29 نُوں پڑھو۔ یسوع مسیح نے اپنے پیروکاراں نُوں ایہہ ہدیت دِتی کہ اوہ اپنیاں بنیادی ضرورتاں نُوں پورا کرن بارے حدوں ودھ پریشان نہ ہون۔ اَسی جاننے آں کہ یسوع مسیح جیہڑیاں ہدیتاں دیندا اے، اوہ ہمیشاں صحی ہوندیاں نیں تے ایہناں تے عمل کرن نال سانوں فائدہ ہوندا اے۔ اَسی دلوں ایہناں ہدیتاں تے عمل کرنا چاہنے آں۔ پر اِنج کرنا کدی کدار مشکل ہو سکدا اے۔ کیوں؟
5. کجھ لوک شاید کیس وجہ توں اپنیاں بنیادی ضرورتاں پوریاں کرن بارے پریشان ہو جاندے نیں؟
5 کجھ لوک شاید ایس وجہ توں پریشان ہو جان کہ اوہ کیہہ کھان گے، کیہہ پان گے تے کتھے رہن گے۔ شاید اوہ اِک غریب ملک چ رہ رہے نیں تے اوہناں لئی اینے پیسے کمانا مشکل اے جنہاں نال اوہناں دے گھر والیاں دِیاں ضرورتاں پوریاں ہو سکن۔ یاں شاید اوہ بندہ فوت ہو گیا اے جدی تنخواہ نال گھر چلدا سی تے ہُن اوہدے گھر والیاں کول اپنیاں ضرورتاں پوریاں کرن لئی وی پیسے نئیں نیں۔ ایہدے علاوہ کورونا وائرس دی وبا دی وجہ توں بوہت سارے لوکاں دِیاں نوکریاں چلیاں گئیاں نیں۔ (واعظ 9:11) جے اَسی وی کسے ایہو جہی مشکل چوں لنگھ رہے آں تے اَسی یسوع مسیح دی ایس ہدیت تے کیویں عمل کر سکنے آں کہ حدوں ودھ پریشان نہ ہووو؟
ایس پریشانی چ ڈُبن دی بجائے کہ تُسی اپنیاں ضرورتاں کیویں پوریاں کرو گے، یہوواہ تے اپنا بھروسا مضبوط کردے رہوو۔ (پیراگراف نمبر 6-8 نُوں ویکھو۔) *
6. دَسو کہ اِک موقعے تے پطرس رسول نال کیہہ ہویا؟
6 پطرس تے باقی رسول کشتی چ بیٹھ کے گلیل دی جھیل نُوں پار کر رہے سن۔ بڑی تیز ہوا چل رہی سی تے چھلاں بوہت ای اُچیاں سن۔ فیر اوہناں نے یسوع نُوں پانی تے ٹردیاں ویکھیا۔ پطرس نے کہیا: مالک جے واقعی ایہہ توں ای ایں تے مینوں حکم دے کہ میں پانی تے ٹر کے تیرے کول آواں۔ یسوع نے اوہنوں کہیا: آ جا۔ پطرس نے کشتی توں اُتر کے یسوع وَل ٹرنا شروع کیتا۔ پر فیر کیہہ ہویا؟ جدوں پطرس نے ویکھیا کہ طوفان کِنّاں تیز اے تے اوہ ڈر گیا تے ڈُبن لگ پیا۔ فیر اوہنے اُچی ساری کہیا: مالک مینوں بچا۔ یسوع نے فوراً ہتھ ودھا کے اوہنوں پھڑ لیا۔ ایتھے غور کرن والی گل ایہہ وے کہ جدوں تک پطرس نے اپنا دھیان یسوع تے رکھیا، اوہ پانی تے ٹردا رہیا۔ پر جیویں ای اوہدا دھیان طوفان وَل گیا، اوہ ڈر گیا تے ڈُبن لگ پیا۔—متی 14:24-31۔
7. اَسی پطرس کولوں کیہہ سکھ سکنے آں؟
7 جدوں پطرس کشتی توں اُتر کے ٹرن لگ پیا تے اوہنوں طوفان دی پرواہ نئیں سی تے نہ ای اوہ ایہہ سوچ کے پریشان سی کہ اوہ ڈُب جائے گا۔ اوہ تے بس پانی تے ٹر کے اپنے مالک یسوع کول پونچنا چاہندا سی۔ پر اوہ اِنج نئیں کر پایا کیونکہ اوہدا دھیان اپنے مالک توں ہٹ کے طوفان وَل چلا گیا۔ ایہہ سچ اے کہ اَج اَسی پانی تے نئیں ٹر سکدے۔ پر مشکلاں دا سامنا کردے ویلے سانوں ایہو جہے ایمان دی ضرورت ہوندی اے جیہو جہے ایمان دی ضرورت پطرس نُوں اوہدوں سی جدوں اوہنے پانی تے ٹرنا سی۔ جے اَسی اپنا پورا دھیان یہوواہ تے اوہدے وعدیاں تے نئیں رکھاں گے تے ساڈا ایمان کمزور ہو جائے گا تے اَسی پریشانیاں چ ڈُب جاواں گے۔ بھانویں ساڈے تے مشکلاں دا کوئی وی طوفان آ جائے، سانوں اپنا پورا دھیان یہوواہ تے رکھنا چاہی دا اے تے ایس گل تے بھروسا کرنا چاہی دا اے کہ اوہدے کول ساڈی مدد کرن دی طاقت ہے وے۔ اَسی اِنج کیویں کر سکنے آں؟
8. کیہڑی چیز ساڈی مدد کرے گی تاکہ اَسی حدوں ودھ پریشان نہ ہوئیے؟
8 جے اَسی اپنیاں مشکلاں چ حدوں ودھ پریشان ہون دی بجائے اپنا پورا بھروسا یہوواہ تے رکھاں گے تے سانوں بوہت فائدہ ہوئے گا۔ یاد رکھو کہ یہوواہ نے ساڈے نال ایہہ وعدہ کیتا اے کہ جے اَسی اپنی زندگی چ سب توں زیادہ اہمیت اوہنوں دَواں گے تے اوہ ساڈیاں ضرورتاں پوریاں کرے گا۔ (متی 6:32، 33) اوہنے ہمیشاں اپنا ایہہ وعدہ پورا کیتا اے۔ (اِستثنا 8:4، 15، 16؛ زبور 37:25) جے یہوواہ خدا پرندیاں تے پُھلاں دا خیال رکھدا اے تے فیر ساڈے کول ایس گل لئی پریشان ہون دی کوئی وجہ نئیں رہندی کہ اَسی کیہہ کھانواں گے یاں کیہہ پانواں گے۔ (متی 6:26-30؛ فِلپّیوں 4:6، 7) جیویں ماں پیو محبت دی وجہ توں اپنے بچیاں دِیاں ضرورتاں پوریاں کردے نیں، اوسے طرحاں ساڈا اسمانی باپ یہوواہ ساڈیاں ضرورتاں پوریاں کردا اے۔ اَسی ایس گل تے پورا یقین رکھ سکنے آں کہ یہوواہ ساڈا خیال رکھے گا۔
9. تُسی اِک میاں بیوی دی مثال توں کیہہ سکھیا اے؟
9 آؤ اِک مثال تے غور کرئیے جدے توں پتہ چلدا اے کہ یہوواہ ساڈیاں ضرورتاں نُوں کیہڑے کیہڑے طریقے نال پورا کردا اے۔ ایہہ مثال اِک ایہو جہے شادیشُدہ جوڑے دی اے جیہڑا کل وقتی طور تے یہوواہ دی خدمت کر رہیا اے۔ اوہناں کول اِک پرانی جہی گڈی سی جدے چ اوہ اِک گھنٹے دا سفر کر کے کجھ بھیناں کول گئے تاکہ اوہناں نُوں اپنے نال عبادت تے لجا سکن۔ ایہہ بھیناں اِک ایہو جہی جگہ تے رہندیاں سن جیہڑی پناہ لئی آئے ہوئے لوکاں لئی سی۔ بھرا نے دَسیا: ”عبادت توں بعد اَسی اوہناں بھیناں نُوں اپنے گھر کھانے تے بلایا۔ پر فیر اَسی سوچیا کہ اَسی اوہناں نُوں کیہہ دَواں گے؟ ساڈے کول کھان نُوں تے کجھ ہے ای نئیں۔“ ایہدے بعد کیہہ ہویا؟ بھرا نے دَسیا: ”جدوں اَسی گھر پونچے تے ساڈے گھر دے باہر دو وڈے بیگ پئے ہوئے سن جنہاں چ کھان پین دِیاں چیزاں سن۔ سانوں ایہہ تے نئیں پتہ کہ اوہ بیگ اوتھے کنہے رکھے سن پر اَسی ایہہ ضرور جاننے آں کہ یہوواہ نے ساڈا خیال رکھیا۔“ بعد چ اوس میاں بیوی دی گڈی خراب ہو گئی۔ مُنادی کرن لئی اوہناں نُوں ایس گڈی دی بڑی ضرورت سی پر ایہنوں ٹھیک کران لئی اوہناں کول پیسے نئیں سن۔ جدوں اوہ ایہنوں مکینک کول لے کے گئے تاکہ ایہہ ویکھ سکن کہ ایہنوں ٹھیک کران لئی کِنّاں خرچہ آئے گا تے اوتھے اِک آدمی آیا تے اوہنے پچھیا: ”ایہہ گڈی کدی اے؟“ بھرا نے کہیا ”اے گڈی میری اے تے خراب ہو گئی اے۔“ اوس آدمی نے کہیا: ”تُسی ایہہ گڈی کِنّے چ ویچو گے؟ کوئی گل نئیں جے ایہہ خراب اے۔ اصل چ میری بیوی نُوں ایہو جہی تے ایسے رنگ دی گڈی چاہی دی اے۔“ اوس آدمی نے بھرا نُوں اینے پیسے دِتے کہ بھرا کوئی ہور گڈی خرید سکے۔ بھرا نے کہیا: ”میں دَس نئیں سکدا کہ اَسی کِنّے خوش ہوئے۔ سانوں پورا یقین سی کہ ایہہ کوئی اِتفاق نئیں اے سگوں یہوواہ نے ساڈی مدد کیتی اے۔“
10. زبور 37:5 توں سانوں کیہہ کرن دی ہلاشیری مِلدی اے؟
10 جدوں اَسی اپنے چرواہے دی گل سننے آں تے اَسی حدوں ودھ پریشان نئیں ہوندے سگوں ایس گل تے پورا یقین رکھنے آں کہ یہوواہ ساڈیاں ضرورتاں پوریاں کرے گا۔ (زبور 37:5 نُوں پڑھو؛ 1-پطرس 5:7) ذرا فیر توں اوہناں مشکلاں تے غور کرو جنہاں دا ذکر پیراگراف نمبر 5 چ ہویا سی۔ ہُن تک یہوواہ نے شاید ساڈے گھر دے سربراہ یاں فیر ساڈے باس دے ذریعے ساڈیاں ہر دن دِیاں ضرورتاں نُوں پورا کیتا ہوئے۔ پر جے ساڈے گھر دا سربراہ کم نئیں کر سکدا یاں ساڈی نوکری چلی گئی اے تے فیر وی اَسی پکا یقین رکھ سکنے آں کہ یہوواہ کسے ہور طریقے نال ساڈا خیال ضرور رکھے گا۔ آؤ ہُن ویکھنے آں کہ ساڈے چنگے چرواہے نے سانوں ہور کیس کم توں منع کیتا اے۔
دُوجیاں چوں نُقص کڈھنا چھڈ دَوو
دُوجیاں دِیاں خوبیاں تے دھیان دین نال اَسی اوہناں چوں نُقص کڈھن توں بچ سکنے آں۔ (پیراگراف نمبر 11، 14-16 نُوں ویکھو۔) *
11. متی 7:1، 2 چ یسوع مسیح نے سانوں کیس گل توں منع کیتا اے تے اوہدی ہدیت تے عمل کرنا ساڈے لئی مشکل کیوں ہو سکدا اے؟
11 متی 7:1، 2 نُوں پڑھو۔ یسوع مسیح نُوں پتہ سی کہ انسان عیبدار نیں تے اوہ اکثر دُوجیاں دِیاں خامیاں تے دھیان دیندے نیں۔ ایسے لئی اوہنے کہیا: دُوجیاں چوں نُقص کڈھنا چھڈ دَوو۔ شاید اَسی اپنے وَلّوں تے پوری کوشش کرئیے کہ اَسی اپنے ہمایماناں چوں نُقص نہ کڈھئے۔ پر اَسی سارے عیبدار آں۔ سو جدوں سانوں لگدا اے کہ اَسی دُوجیاں چوں نُقص کڈھ رہے آں تے سانوں کیہہ کرنا چاہی دا اے؟ یسوع مسیح دی گل سنوُ تے پوری کوشش کرو کہ دُوجیاں چوں نُقص نہ کڈھو۔
12، 13. یہوواہ نے دُوجیاں چوں نُقص نہ کڈھن بارے کیہو جہی مثال قائم کیتی؟
12 سانوں یہوواہ خدا دی مثال تے سوچوچار کرن نال بوہت فائدہ ہو سکدا اے۔ اوہ ہمیشاں دُوجیاں دِیاں اچھائیاں تے دھیان دیندا اے۔ ذرا غور کرو کہ اوہ اوس ویلے بادشاہ داؤد نال کیویں پیش آیا جدوں داؤد نے وڈے گناہ کیتے۔ اوہنے بتسبع نال زِناکاری کیتی تے اوہدے شوہر نُوں وی قتل کروا دِتا۔ (2-سموئیل 11:2-4، 14، 15، 24) داؤد نے جو کجھ کیتا اوہدے توں نہ صرف اوہنوں آپ تکلیف پونچی سگوں اوہدیاں دُوجیاں بیویاں تے باقی گھر والیاں نُوں وی تکلیف چوں لنگھنا پیا۔ (2-سموئیل 12:10، 11) اِک ہور موقعے تے وی داؤد نے یہوواہ تے پورا بھروسا ظاہر نئیں کیتا۔ اوہنے اِسرائیلی فوج دی گنتی کرائی جدا حکم یہوواہ نے نئیں دِتا سی۔ اوہنے شاید ایہہ ایس لئی کیتا کیونکہ اوہنوں اپنی فوج دی تعداد تے بڑا بھروسا تے مان سی۔ پر ایہدا کیہہ نتیجہ نکلیا؟ تقریباً 70 ہزار اِسرائیلی اِک وبا دی وجہ توں مارے گئے۔—2-سموئیل 24:1-4، 10-15۔
13 جے تُسی اوس ویلے اِسرائیل چ رہ رہے ہوندے تے تُسی داؤد بارے کیہہ سوچدے؟ کیہہ تُسی ایہہ سوچدے کہ داؤد یہوواہ دے رحم دے لائق نئیں۔ پر یہوواہ نے اِنج نئیں سوچیا سگوں اوہنے ایس گل تے دھیان دِتا کہ داؤد اپنی پوری زندگی اوہدا وفادار رہیا اے تے اوہنے دلوں اپنے گناہواں توں توبہ کیتی اے۔ ایسے لئی یہوواہ نے داؤد دے وڈے گناہواں نُوں معاف کر دِتا۔ اوہنوں پتہ سی کہ داؤد اوہنوں بوہت پیار کردا اے تے صحی کم کرنا چاہندا اے۔ اَسی ایس گلوں یہوواہ دے شکرگزار آں کہ اوہ ساڈیاں خوبیاں تے چنگے کماں تے دھیان دیندا اے۔—1-سلاطین 9:4؛ 1-تواریخ 29:10، 17۔
14. کیہڑی گل اِک مسیحی دی مدد کر سکدی اے تاکہ اوہ دُوجیاں چوں نُقص نہ کڈھے؟
14 جیویں یہوواہ ساڈے توں ایہہ توقع نئیں کردا کہ اَسی کدی کوئی غلطی نئیں کراں گے اوسے طرحاں سانوں وی دُوجیاں توں ایس گل دی توقع نئیں کرنی چاہی دی کہ اوہ کدی کوئی غلطی نئیں کرن گے۔ یہوواہ وانگوں سانوں وی دُوجیاں دِیاں خوبیاں تے دھیان دینا چاہی دا اے۔ دُوجیاں چ نُقص کڈھنا تے اوہناں دی نکتہچینی کرنا تے بڑا اسان ہوندا اے پر جیہڑا بندہ یہوواہ دی مثال تے عمل کردا اے اوہ دُوجیاں دِیاں خامیاں دے باوجود اوہناں نال مِل کے کم کردا اے۔ جدوں ہیرا تراشیا نئیں ہوندا تے اوہ ایناں سوہنا نئیں لگدا۔ پر اِک سمجھدار بندہ جان دا اے کہ جدوں ایہنوں تراشیا جائے گا تے اوہ کِنّاں سوہنا تے قیمتی بن جائے گا۔ یہوواہ خدا تے یسوع مسیح وانگوں سانوں اپنا دھیان دُوجیاں دِیاں خامیاں تے نئیں سگوں اوہناں دِیاں خوبیاں تے رکھنا چاہی دا اے۔
15. دُوجیاں دے حالاتاں نُوں ذہن چ رکھن نال اَسی اوہناں چوں نُقص کڈھن توں کیویں بچ سکنے آں؟
15 دُوجیاں دِیاں خوبیاں تے دھیان دین دے علاوہ ہور کیہڑی چیز ساڈی مدد کر سکدی اے تاکہ اَسی اوہناں چ نُقص نہ کڈھئے؟ ایس گل دا تصور کرن دی کوشش کرو کہ اِک بندے دے حالات کیہو جہے نیں۔ ایس بارے ذرا یسوع مسیح دی زندگی دے اِک واقعے تے غور کرو۔ اِک دن جدوں یسوع ہیکل چ سی تے اوہنے اِک غریب بیوہ نُوں ویکھیا جنہے عطیے دے ڈبے چ دو چھوٹے سکے پائے سن جنہاں دی قیمت بوہت ای گھٹ سی۔ یسوع نے ایہہ نئیں کہیا کہ اوس عورت نے زیادہ پیسے کیوں نئیں پائے۔ سگوں اوہنے ایس گل تے غور کیتا کہ اوہنے کیس نیت نال عطیہ دِتا اے تے اوہدے حالات کیہو جہے نیں۔ یسوع نے ایس گل لئی اوہدی تعریف کیتی کہ اوہ جو کجھ کر سکدی سی اوہنے کیتا۔—لُوقا 21:1-4۔
16. تُسی بھین ویرونیکا دے تجربے توں کیہہ سکھیا اے؟
16 ذرا اِک بھین دی مثال تے غور کرو جدے توں اَسی ویکھ سکاں گے کہ دُوجیاں دے حالات نُوں ذہن چ رکھنا کِنّاں ضروری ہوندا اے۔ اوس بھین دا ناں ویرونیکا اے۔ بھین جیس کلیسیا چ سی اوتھے اِک ایہو جہی بھین وی سی جیہڑی کلّی اپنے پُتر نُوں پال رہی سی۔ بھین ویرونیکا نے دَسیا: ”مینوں اِنج لگدا سی جیویں اوہ ماں پُتر باقاعدگی نال عبادتاں تے نئیں جاندے تے مُنادی نئیں کردے۔ میں اوہناں بارے غلط رائے قائم کر لئی سی۔ پر فیر مینوں اوس بھین نال مُنادی کرن دا موقع ملیاِ۔ اوہنے مینوں دَسیا کہ اوہدا پُتر ذہنی طور تے معذور اے تے ایہدی وجہ توں اوہ بڑی مشکل چوں لنگھ رہی اے۔ اوہنوں اپنیاں تے اپنے پُتر دِیاں ضرورتاں پوریاں کرن تے یہوواہ دے نیڑے رہن لئی بڑی محنت کرنی پیندی اے۔ اپنے پُتر دی صحت دی وجہ توں اوہنوں کدی کدار دُوجی کلیسیا دی عبادت چ جانا پیندا اے۔“ بھین ویرونیکا نے ایہہ وی کہیا: ”مینوں تے اندازہ ای نئیں سی کہ اوس بھین نُوں کِنّیاں مشکلاں چوں لنگھنا پے رہیا اے۔ ہُن میرے دل چ اوس بھین لئی محبت تے عزت ودھ گئی اے کیونکہ اوہ یہوواہ دی خدمت لئی جو کجھ کر سکدی اے کر رہی اے۔“
17. یعقوب 2:8 چ سانوں کیہہ ہدیت دِتی گئی اے تے اَسی ایہدے تے کیویں عمل کر سکنے آں؟
17 جے سانوں احساس ہوندا اے کہ اَسی اپنے ہمایماناں چوں نُقص کڈھنے آں تے سانوں کیہہ کرنا چاہی دا اے؟ سانوں ایہہ یاد رکھنا چاہی دا اے کہ سانوں اپنے بھین بھراواں نُوں پیار کرن دا حکم دِتا گیا اے۔ (یعقوب 2:8 نُوں پڑھو۔) ایہدے علاوہ سانوں دلوں یہوواہ توں دُعا کرنی چاہی دی اے کہ اوہ ساڈی مدد کرے تاکہ اَسی دُوجیاں چوں نُقص نہ کڈھئے۔ فیر سانوں اپنی دُعا دے مطابق عمل کردے ہوئیاں اوس بندے نال گل کرن چ پہل کرنی چاہی دی اے جدے چ سانوں نُقص نظر آندے نیں۔ اِنج اَسی اوہنوں چنگی طرحاں جان پاواں گے۔ اَسی اوہدے نال مِل کے مُنادی کر سکنے آں یاں اوہنوں کھانے تے بلا سکنے آں۔ جدوں اَسی اپنے اوس بھین یاں بھرا نُوں چنگی طرحاں جاناں گے تے اَسی یہوواہ تے یسوع دی مثال تے عمل کر رہے ہوواں گے جیہڑے دُوجیاں چ خوبیاں لبھدے نیں خامیاں نئیں۔ اِنج اَسی ایہہ ظاہر کراں گے کہ اَسی اپنے چرواہے دی آواز سُن رہے آں تے اوہدے ایس حکم تے عمل کر رہے آں کہ دُوجیاں چوں نُقص نہ کڈھو۔
18. اَسی ایہہ کیویں ظاہر کر سکنے آں کہ اَسی چنگے چرواہے دی آواز سُن رہے آں؟
18 جیویں بھیڈاں اپنے چرواہے دی آواز سُن دِیاں نیں اوسے طرحاں یسوع دے پیروکار اوہدی آواز سُن دے نیں۔ جے اَسی اپنیاں بنیادی ضرورتاں بارے حدوں ودھ پریشان نئیں ہوواں گے تے دُوجیاں چوں نُقص نئیں کڈھاں گے تے یہوواہ خدا تے یسوع مسیح سانوں برکتاں دین گے۔ بھانویں اَسی چھوٹے گلے دا حصہ واں یاں مسیح دِیاں ہور وی بھیڈاں دا، آؤ اَسی اپنے چنگے چرواہے یسوع دی آواز سُن دے رہیے تے اوہدیاں گلاں تے عمل کردے رہیے۔ (لُوقا 12:32؛ یوحنا 10:11، 14، 16) اگلے مضمون چ اَسی دو ایہو جہیاں گلاں تے غور کراں گے جنہاں تے یسوع مسیح نے اپنے پیروکاراں نُوں عمل کرن لئی کہیا۔
گیت نمبر 107 (خوشی نال گاؤ): یہوواہ دے پیار دی مثال
^ پیراگراف 5 جدوں یسوع مسیح نے کہیا کہ اوہدیاں بھیڈاں اوہدی آواز سُنن گیاں تے اوہدا مطلب ایہہ سی کہ اوہدے شاگرد اوہدی تلیم نُوں سُنن گے تے اوہدے تے عمل کرن گے۔ ایس مضمون چ اَسی دو شاندار گلاں تے غور کراں گے جیہڑیاں یسوع نے سکھائیاں: (1) سانوں اپنیاں ضرورتاں پوریاں کرن لئی حدوں ودھ پریشان نئیں ہونا چاہی دا تے (2) سانوں دُوجیاں چ نُقص نئیں کڈھنے چاہی دے۔ اَسی ایس گل تے وی غور کراں گے کہ اَسی یسوع دِیاں ایہناں گلاں تے عمل کیویں کر سکنے آں۔
^ پیراگراف 51 تصویردی وضاحت: اِک بھرا دی نوکری چلی گئی اے، اوہدے کول اپنے گھر والیاں دِیاں ضرورتاں پوریاں کرن لئی بوہت گھٹ پیسے نیں تے اوہنے اوہناں دے رہن لئی اِک نواں گھر وی لبھنا اے۔ جے اوہ خبردار نئیں رہے گا تے اپنیاں پریشانیاں دی وجہ توں اوہ یہوواہ نُوں اپنی زندگی چ زیادہ اہمیت نئیں دے پائے گا۔
^ پیراگراف 53 تصویردی وضاحت: اِک بھرا عبادت تے دیر نال آیا اے پر اوہ عوامی تھانواں تے گواہی دین لئی، اِک وڈیری بھین دی مدد کردے ویلے تے عبادتگاہ دی دیکھبھال کردے ویلے بڑیاں چنگیاں خوبیاں ظاہر کر رہیا اے۔
