1. ¿Jesusca imamantataj ñuca discipulocunaca ovejacuna shinami can nirca?

JESUSCA: ‘Ovejacunaca paicunata michijta uyashpaca cazuncunami. Chashnallataj ñuca discipulocunapish ñuca ima yachachishcata uyashpaca cazuncunami’ nircami (Juan 10:14). Ashtahuancarin ovejacunaca michijtaca allimi rijsin. Michij ima nishcatapish cazuncunami. Shuj cꞌarica: “Ñucaca shuj jovencitopaj ovejacunatami grabasha nircani. Chaimantami ovejacuna ñucapajman cꞌuchuyachun munarcani. Pero ovejacunaca ñucata mana rijsishcamantami paicunata cayajpipish mana cazurcacuna. Ashtahuancarin michij jovencito ricurijpica pai cayancami ovejacunaca paita catircacuna” ninmi.

2, 3. a) ¿Jesuspaj discipulocunaca ima shinataj Jesús yachachishcata uyashcata ricuchincuna? b) ¿Cai yachaipi, catij yachaipica imatataj ricushun?

² Cai cꞌarihuan ima tucushcata yachashpaca Jesús paipaj discipulocunamanta ima nishcatami yuyarinchij. Jesusca: “Paicunapish ñuca rimaitami uyangacuna” nircami (Juan 10:16). Cunanca Jesusca jahua pachapimi can. ¿Shinapish paitaca ima shinataj uyai tucunchij? Paipaj yachachishcacunata pajtachishpami paitaca uyai tucunchij (Mateo 7:24, 25).

³ Cai yachaipi, catij yachaipica Jesús yachachishca huaquin yuyaicunatami yachashun. Shinallataj Jesús yachachishca shina imacunata mana rurana cashcata, imacunata rurana cashcatami yachashun. Pero puntaca mana yallitaj preocuparinamanta, shujtajcunata mana juzganamantami yachashun.

4. Lucas 12:29-pi nishca shinaca ¿huaquinpica imacunamantataj yallitaj preocuparinchij?

⁴ (Lucas 12:29-ta liyipai). Jesusca paipaj discipulocunataca: ‘Micunamanta, imalla minishtirishca cosascunamanta ama yallitaj preocuparinguichij’ nishpami consejarca. Cai consejota pajtachinaca valishcami can. Pero maipica chaita cazunaca mana facilchu can.

5. ¿Huaquin huauqui panicunaca imamantataj yallitaj preocuparincuna?

⁵ Maijan huauqui panicunaca micunamanta, ropamanta o maipi causanata mana charishcamantami yallitaj preocuparincuna. Tal vez paicuna causan llajtapi yallitaj pobreza tiyashcamanta, trabajo mana tiyashcamantami familiata mantiningapajca cullquita mana tanto charincuna. Mana cashpaca familiata mantinij huañushcamantachari familiacunaca minishtirishca cosascuna illaj saquirincuna. COVID-19 ungüi tiyajpicarin achcacunami trabajo illaj saquirishcacuna. Chaimantami minishtirishca cosascunata mana tanto charincuna (Eclesiastés 9:11). ¿Cashna llaquicunata, shujtaj llaquicunata charishpapish ima shinataj Jesús ama yallitaj preocuparinguichij nishpa consejashcata pajtachi tucuncuna?

6. Apóstol Pedrohuan ima tucushcata parlai.

⁶ Shuj cutinca apóstol Pedro, Jesuspaj caishuj apostolcunaca barcopimi Galilea yacupi carcacuna. Ñapish jatun tamya, acapana jatarijpica paicunaca Jesús yacu jahuata purishpa shamucujtami ricurcacuna. Chaimi Pedroca: “Amito, cantaj cashpaca yacu jahuata cambajman shamuchun ñucata cayai” nirca. Shina nijpi Jesusca: “Shamui” nijpi, Pedroca barcomanta llujshishpami, Jesuspajman cꞌuchuyangapaj yacu jahuata puricurca. Ashtahuanpish achca huaira yacuta  cuyuchicujta ricushpami, mancharishpa yacupi ñalla millpurigrishpaca: “¡Amito, quishpichihuai!” nishpa caparirca. Chaimi Jesusca paitaca maquimanta japishpa ayudarca. Pedroca Jesusta ricushpa, achca huaira yacuta cuyuchijpipish chai jahuapi purishpaca mana pambarircachu. Pero ñapish achca huairata, acapanata ricushpaca mancharishpami paica yacupi pambari callarirca (Mateo 14:24-31).

7. ¿Pedropaj ejemplomantaca imatataj yachanchij?

⁷ Pedroca barcomanta uriyashpaca yacu jahuapimi puri callarirca. Paica pambarinataca mana yuyarcachu. Paipaj munaica Jesús maipi cashcaman chayanami carca. Shinapish achca yacuta, acapanata ricushcamantami yacupi pambari callarirca. Ñucanchijca mama cucha yacu jahuapica mana puri tucunchijchu. Pero ima shinami Pedro yacu jahuapi puringapaj feta minishtirca, cunan punllacunapish ñucanchijca chashnallatajmi problemacunata chꞌimbapurangapajca feta minishtinchij. Jehová Diospi, pai cusha nishcacunapi mana confiashpaca yacupi pambaricuj shinami ñucanchij feca chiriyanga. Chaimanta ima laya llaquicunata charishpapish Dios ñucanchijta ayudanapi confiashunchij. ¿Ima shinataj chaitaca rurai tucunchij?

8. ¿Minishtirishca cosascunamanta ama yallitaj preocuparingapajca imatataj rurana canchij?

⁸ Yallitaj preocuparinapaj randica Jehová Diospimi confiana canchij. Paita punta lugarpi churajpica paillatajmi ñucanchijmanca minishtirishca cosascunata cusha nin (Mateo 6:32, 33). Yayitu Diosca pai imata pajtachisha nishcataca pajtachintajmi (Deuteronomio 8:4, 15, 16; Salmo 37:25). Diosca pajarocunata, sisacunata cuidanataca manataj saquinchu. Chaimanta ñucanchijca ¿imatataj micushun, imatataj churashun? nishpaca mana preocuparinachu canchij (Mateo 6:26-30; Filipenses 4:6, 7). Ima shinami yaya mamacunaca paicunapaj huahuacuna minishtirishca cosascunata charichun preocuparin, chashnallatajmi Jehová Diospish paita sirvijcunaman minishtirishca cosascunata cushpa cuidanga. Chaimanta Yayitu Dios ñucanchijta cuidanata amataj cungarishunchij.

9. ¿Shuj cusa huarmipaj experienciamantaca imatataj yachanchij?

⁹ Jehová Dios ñucanchijta minishtirishca cosascunahuan ima shina cuidashcata yachangapajca shuj experienciamanta ricushun. Shuj cusa huarmica Diostaca tiempo completopimi sirvicurcacuna. Paicunaca propio carropi casi shuj horata viajashpami maipimi miticuna lugarpi caj panicunata tandanacuiman apangapaj rircacuna. Cai huauquica: “Tandanacui tucurishca qꞌuipaca cai panicunataca ñucanchij huasiman ringapaj nishpami ñuca huarmihuan invitarcanchij. Ñanta ricushpaca huasipi mana tanto micunata charishcatami cuentata curcanchij. Pero ña huasiman chayashpaca huasi pungupimi ishqui bolsacuna junda micunata japircanchij. Mana yacharcanchijchu pi saquishcata. Pero Jehová Diosca chashnami ñucanchijtaca cuidarca” ninmi. Asha tiempo qꞌuipaca cai cusa huarmipaj carromi dañarirca. Paicunaca huillangapajmi carrotaca minishtircacuna. Shinapish carrota allichingapaj cullquitaca mana tanto charircacunachu. Chaimi cai huauquica shuj tallerpi carrota allichinaman rirca. Ñapish chaiman chayajpica shuj runaca: “¿Cai carropaj dueñoca pitaj can?” nishpami tapurca. Chaimi cai huauquica: “Cai carroca ñucapajmi can. Maucayashcamantami allichingapaj caipi cani” nirca. Cai runaca: “Ama sustarichu. Ñuca huarmica cai laya carrotami munan. ¿Mashnatataj mañacungui?” nishpami tapurca. Cai huauquica chai carrota cꞌatushpaca shujtaj carrota randingapajpish suficiente cullquitami charirca. Paica: “Jehová Dios ñucanchijta  cashna ayudacushcata cuentata cushpami cushilla sintirircanchij” ninmi.

10. Salmo 37:5-pi nishca shinaca ¿imamantataj minishtirishca cosascunamantaca mana yallitaj preocuparina canchij?

¹⁰ Jesús yachachishcata uyashpaca imalla minishtirishca cosascunamantaca mana yallitaj preocuparinachu canchij. Ashtahuanpish Jehová Dios ñucanchijta ayudanapimi confiana canchij (Salmo 37:5-ta liyipai; 1 Pedro 5:7). Tal vez Diosca ñucanchijta cuidangapajca familiata pushajcunahuan o trabajopi jefecunahuanmi minishtirishcacunata cushpa catinga. Pero familiata pushaj mantiningapaj mana ayudai tucujpi, trabajo illaj saquirijpica Jehová Diosllatajmi ñucanchijta cuidanga. Cunanca Jesús shujtajcunata ama juzganguichij nishca yuyaimantami yachashun.

11. a) ¿Mateo 7:1, 2-pica Jesusca imata rurachuntaj mandarca? b) ¿Maipica chaita pajtachinaca imamantataj sinchi can?

¹¹ (Mateo 7:1, 2-ta liyipai). * Jesusca gentecuna juchayuj cashcamanta shujtajcuna pandarishcallata ricushpa juzgashcataca allimi yacharca. Chaimantami Jesusca shujtajcunata ama juzgaichijchu nirca. Huauqui panicunata ama juzgangapaj esforzarishpapish maipica chaitaca mana pajtachinchijchu. ¿Ama juzgangapajca imatataj rurana canchij? Jesús yachachishcata uyashpami shujtajcunata ama juzgangapaj esforzarina canchij.

12, 13. ¿Jehová Diospaj ejemplomanta yachashpaca imamantataj shujtajcunataca mana juzgana canchij?

¹² Jehová Diosca shujtajcunapaj alli ruraicunatami ricurca. Ñucanchijpish paipaj ejemplota catishpaca shujtajcunapaj alli ruraicunatami ricushun. Rey David jatun juchata rurajpi Jehová Dios paita ima shina tratashcata ricushun. Por ejemplo, Davidca Betsabehuan huainayashpami chai huarmipaj cusatapish huañuchirca (2 Samuel 11:2-4, 14, 15, 24). Chaita rurashpaca Davidca paillataj, paipaj familiata, shujtajcunatami llaquichirca (2 Samuel 12:10, 11). Shinallataj shuj cutincarin Davidca Israel llajtapi mashna soldadocuna tiyashcata cuentachunmi mandarca. Pero Diosca chaita rurachunca mana mandashcachu carca. Tal vez paica jatun tucushcamantami soldadocunapi confianata decidishcanga. Chaita rurashcamantaca 70.000 israelitacunami shuj millai ungüimanta huañurcacuna (2 Samuel 24:1-4, 10-15).

¹³ ¿Ñucanchijpish Israel llajtapi causacushca cashpaca Davidmantaca imatataj yuyanchijman carca? Tal vez paita juzgashpaca “Diosca paitaca mana perdonanachu can” nishpami yuyanchijman carca. Pero Jehová Diosca mana chashna yuyarcachu. Ashtahuanpish paica tucui causaipi paita sirvishcata, shungumanta arrepentido cashcatami ricurca. Chaimanta David jatun juchata rurashca cajpipish paitaca perdonarcami. Diosca David paita achcata cꞌuyashcata, allita rurangapaj esforzarishcatami ricurca. Yayitu Dios ñucanchij alli ruraicunata ricushcata yachashpaca cushillami sintirinchij (1 Reyes 9:4; 1 Crónicas 29:10, 17).

14. ¿Shujtajcunata ama juzgangapajca picunapaj ejemplotataj catina canchij?

¹⁴ Jehová Diosca gentecuna jucha illaj cachunca mana shuyanchu. Ñucanchijpish chashnallatajmi shujtajcuna jucha illaj cachunca mana shuyana canchij. Ashtahuanpish paicunapaj alli ruraitami ricuna canchij. Maipica shujtajcunapaj pandarishcacunata ricushpa paicunata juzganaca facilmi can. Pero Diospaj ejemplota catijcunaca shujtajcunapaj pandarishcata  ricunapaj randica paicunapaj alli ruraicunata ricushpami alli apanacuncuna. Por ejemplo, shuj diamante rumica mana pꞌichajpi, mana allichijpica fiero layami can. Pero yachajcunaca diamante rumita allichijpi, pꞌichajpi alaja achij nicuj canataca allimi yachancuna. Chashnallatajmi ñucanchijpish shujtajcunapaj pandarishcacunallataca mana ricuna canchij. Chaipaj randica Jehová, Jesús shinami shujtajcunapaj alli ruraicunata ricuna canchij.

15. ¿Shujtajcunapaj alli ruraicunata ricushpapish paicunata ama juzgangapajca imatataj rurana canchij?

¹⁵ ¿Shujtajcunapaj alli ruraicunata ricushpapish paicunata ama juzgangapajca imatataj rurana canchij? Paicunapaj causaipimi yuyana canchij. Por ejemplo, shuj punllaca Jesusca Diospaj templopimi carca. Chaipimi shuj mayorlla viuda huarmi ishqui quillu cullquita Diosman cuna cajapi churajta ricurca. Jesusca chai cullquillata cushcapica mana yuyarcachu. Ashtahuanpish cai huarmipaj causai ima shina cashcapimi yuyarca. Chaimantami cai huarmitaca cullquita cungapaj tucui pudishcata rurashcamanta felicitarca (Lucas 21:1-4).

16. ¿Pani Verónica parlashca experienciamantaca imatataj yachanchij?

¹⁶ Pani Veronicapaj experienciamanta yachashpami shujtajcunapaj causaipi yuyana importante cashcata yachanchij. Pani Verónica tandanacun congregacionpica shuj mamaca paipaj churillahuanmi tandanacuj carca. Verónica shuti panica: “Cai mamaca tandanacuicunaman,  huillanamanca casi mana siempre rijchu carca. Chaimantami shujtajcunaca paimantaca mana alli yuyajcuna carca. Pero shuj punllaca ñucaca cai mamahuanmi predicanaman llujshircani. Paica, paipaj churi umapi ungüita charishcatami parlarca. Paipaj churita cuidana cashcamanta, Yayitu Diosmanta paiman yachachingapajmi maipica shujtaj congregacionpi tiyaj tandanacuicunaman rina carca. Chaimanta paica tucui tandanacuicunaman mana ri tucushcata, huillanapi mana apoyai tucushcatami parlarca. Ñucaca paipaj causai chashna sinchi canataca mana yuyarcanichu. Jehová Diosta pai sirvingapaj sinchita esforzarishcata yachashpaca cunanca paitaca achcatami valorani” ninmi.

17. ¿Santiago 2:8-pi mandashcataca ima shinataj pajtachina canchij?

¹⁷ Shujtaj huauqui panicunata juzgacushcata cuentata cushpaca paicunata cꞌuyana cashcatami yuyarina canchij (Santiago 2:8-ta liyipai). Ama juzgangapajpish Jehová Diostaca ayudachunmi mañana canchij. Mañashcata pajtachingapajca chai huauquihuan panihuan parlangapajmi esforzarina canchij. Chashnami paicunataca ashtahuan rijsishun. Mana cashpaca paicunataca huillanaman llujshingapaj, micungapajmi invitai tucunchij. Paicunata ashtahuan rijsishpaca paicunapaj alli ruraicunata ricushpami Jehová Dios shina, Jesús shina alli tratashun. Shujtajcunata ama juzganguichij nishpa Jesús mandashcatapishmi pajtachishun.

18. ¿Jesús ima yachachishcata uyacushcataca ima shinataj ricuchinchij?

¹⁸ Ima shinami ovejacunaca michij ima nishcata uyashpa cazuncuna, chashnallatajmi Jesuspaj discipulocunapish Jesús yachachishcata uyashpa cazuncuna. Ama yallitaj preocuparingapaj esforzarijpi, shujtajcunata ama juzgangapaj esforzarijpica Jehová Diospish, Jesuspishmi bendicianga. ‘Ashalla ovejamanta’ cashpapish o ‘shujtaj ovejamanta’ cashpapish Jesús yachachishcata uyashpa, cazushpa catishunchij (Lucas 12:32; Juan 10:11, 14, 16). Catij yachaipica Jesús paipaj discipulocunaman imata rurachun mandashcatami ashtahuan yachashun.