1. ¿Imanasqataq Jesusqa qatiqninkunata tupachirqa ovejakunawan?

JESUSMI tupachikurqa michiqwan, qatiqninkunatañataqmi ovejakunawan (Juan 10:14). Ovejakuna michiqninpa econta riqsisqankuraykum Jesuspa chayna nisqanqa ancha allin karqa. Ovejakuna imayna kasqanmantam huk runa nirqa: “Ovejachakunata grabayta munaspaykum asuykamuwanankupaq tukuyta ruwarqaniku, ichaqa ecoykuta mana riqsisqanraykum mana asuykamuwarqakuchu. Chayna kachkaptiykum michiqnin warmacha rikuriykamuspan ovejakunata qayamurqa, hinaptinmi chaylla kasurqa”, nispa.

2, 3. (1) ¿Imaynatam Jesuspa econta uyarichwan? (2) ¿Imamantam rimasun kay yachachikuypiwan qatiqnin yachachikuypi?

² Rimamusqanchik runata ima pasasqanmi yuyarichiwanchik Jesuspa qatiqninkuna chay ovejachakuna hina imayna kanankuta. Jesusmi nirqa: ‘Ecoytam uyarinqaku’, nispa (Juan 10:16). Kunanqa hanaq pachapim Jesusqa kachkan. Chaynaqa, ¿imaynatam econta uyarichwan? Yachachisqankunata kasukuspam (Mat. 7:24, 25).

³ Kay yachachikuypiwan qatiqnin yachachikuypim rimasun Jesuspa yachachisqankunamanta. Paymi yachachirqa imayna mana kanamanta hinaspa imayna kanamanta. Puntatayá yachaykusun imayna mana kananchikpaq allin michiqninchik Jesuspa yachachisqanmanta.

4. Lucas 12:29 nisqanman hinaqa, ¿imamantataq ‘llakisqallaña’ kachwan?

⁴ (Leey Lucas 12:29). Jesusmi qatiqninkunata nirqa faltapuqninkuta tarinankumanta ‘ama ancha llakisqallaña’ kanankupaq.  Chayna nisqanqa allinninchikpaqmi. Ichaqa kasukuyta munaptinchikpas wakinpiqa sasam. ¿Imanasqa?

5. ¿Imakunawantaq wakin iñiqmasinchikkuna llakisqallaña kachkanku?

 ⁵ Yaqapaschá wakin iñiqmasinchikkunaqa llakisqallaña kachkanku imata mikunankumanta, imawan pachakunankumanta hinaspa maypi yachanankumanta. Ichapas familiankuta mantienenankupaq qullqi tariyqa nacionninkupi sasa kachkan. Utaq ichapas familianta mantieneq wañukuptin mana qullqinku kanchu. Chaymantapas coronavirus unquy kasqanraykum achka iñiqmasinchikkuna mana qullqiyuq hinaspa mana llamkayniyuq kachkanku (Ecl. 9:11). Ñuqanchikpas chayna sasachakuypi utaq huk sasachakuykunapi tarikuptinchikqa, ¿imaynatam Jesuspa nisqan yanapawachwan mana ancha llakisqallaña kanapaq?

6. Willarimuy huk kutipi apostol Pedrowan ima pasasqanmanta.

⁶ Huk kutipim Pedrowan wakin apostolkuna llumpayllaña wayrapi botewan kachkarqaku Galilea lamar quchapi. Chaypim yaku hawanta Jesus hamuchkaqta rikuruptinku Pedro nirqa: “Señorlláy qam kaspaykiqa, kamachiwayá yakupa hawanta qanman hamunaypaq”, nispa. Chaymi Jesusñataq nirqa: “Hamuy”, nispa. “Hinaptinmi Pedroqa botemanta uraykuspan yakupa hawanta puriyta qallaykurqa Jesuspa kasqanman. Ichaqa manchakuyllapaqña wayramusqanta qawarispanmi mancharikurqa, hinaspam yakuman chinkaykuyta qallaykuspan qaparirqa: ‘¡Señorlláy salvaykullawayyá!’”, nispan. “Hinaptinmi Jesusqa makinta  chaylla haywariykuspan hapirurqa”. Pedroqa llumpayllataña wayramuptinpas Jesusta qawastinqa yaku hawantam ichiyta qallaykurqa. Ichaqa llumpayllataña wayramusqanta qawarispanmi manchakuywan iskayrayaspan yakuman chinkaykuyta qallaykurqa (Mat. 14:24-31).

7. ¿Imatam yachachwan Pedrota pasasqanmanta?

⁷ Yaku hawanta Pedro ichiyta qallaykuspanqa manam piensarqachu mancharikuspan yakuman chinkakuykunantaqa. Payqa Jesuspa kasqanmanmi chayayta munarqa, ichaqa huklawta qawariruspanmi yakuman chinkaykuyta qallaykurqa. Ñuqanchikqa manamá yaku hawanta puriytaqa atichwanchu. Ichaqa tukuy ima sasachakuykunawanmi Dios serviyninchikpi hukmanyayta qallaykuchwan. Jehova Diospi manaña tukuy sunqunchikwan hapipakuspaqa hinaspa prometewasqanchikkunamanta iskayrayayta qallaykuspaqa yakuman chinkakuykuchkaq hinam kachwan. Ima sasachakuyña kaptinpas Jehova Dios yanapawananchikmantaqa manam iskayrayananchikchu.

8. ¿Imataq yanapawasun mikunanchikmantawan pachakunanchikmanta mana ancha llakisqallaña kanapaq?

⁸ ¿Imataq yanapawachwan Jehova Dios cuidawananchikmanta mana iskayrayanapaq? Imamantapas llakikunamantaqa paypim hapipakunanchik. Prometewasqanchiktayá yuyarisun: Paypa munayninta puntapi churaptinchikqa manam imamantapas usuchiwasunchu (Mat. 6:32, 33). Diosqa cumplinmi nisqankunataqa haykapipas (Deut. 8:4, 15, 16; Sal. 37:25). Alton pawaqkunatawan purunpi waytakunata Jehova Dios cuidachkaspanqa, ¿manachu ñuqanchikmanpas mikunanchikpaqwan pachakunanchikpaq quwasun? (Mat. 6:26-30; Filip. 4:6, 7). Imaynam taytapas churinkunata anchata kuyasqanrayku imatapas qun, chaynam taytanchik Jehova Diospas anchata kuyawasqanchikrayku imamantapas mana usuchiwasunchu. Chaynaqa, manamá iskayrayachwanchu Jehova Dios cuidawananchikmantaqa.

9. ¿Imatam yachachisunki casarasqa iñiqmasinchikkunata ima pasasqan?

⁹ Dios imayna cuidawasqanchikmanta yachanapaq rimarisun casarasqa iñiqmasinchikkunamanta. Paykunam carronkuwan yaqa iskay horata rirqaku huñunakuypaq iñiqmasinchikkunata huqariq. Qusanmi willakurqa: “Huñunakuy tukuytam chay iñiqmasinchikkunata nirqaniku wasiykuman rispa imallatapas mikuykunaykupaq. Chaymantam ichaqa yuyarirurqaniku mikuykachinaykupaq mana imaykupas kasqanta”, nispa. Ima pasasqanmantam nirqa: “Chayaruptiykum wasi punkupi iskay bolsakunapi hunta mikuy kachkasqa. Pi churasqanta mana yachaspaykupas Jehova Dios cuidawasqankumantam mana iskayrayarqanikuchu”, nispa. Chaymanta qipatam carronku malograkururqa. Chay carrochankuwanmi Diosmanta willakuq maytapas riqku, ichaqa manam qullqinku karqachu allichachinankupaq. Chaymi mecanicoman aparurqaku haykamanta allichananta yachanankupaq. Chaypi kachkaptinkum huk runa hamururqa, hinaspanmi nirqa: “¿Pipa carrochantaq kay?”, nispan. Hinaptinmi iñiqmasinchikqa nirqa: “Ñuqapam, ichaqa allichanapaqmi kachkan”, nispa. Chaymi chay runañataq nirqa: “¡Haykataq, rantikuway! Señoraymi munachkan kayna carrochata hinaspa kayna colorchayuqta”, nispan. Hinaptinmi iñiqmasinchikqa rantikuruspan huk carrochata  rantinanpaq achka qullqiyuqña kutikurqa. Paymi nirqa: “Chay punchawmi ancha-anchata kusikurqaniku. Manamá iskayrayarqanikuchu Jehova Dios yanapawasqankumantaqa”, nispa.

10. ¿Imaynatam Salmos 37:5 nisqan yanapawanchik imamantapas mana llumpayta llakikunapaq?

¹⁰ Allin michiqninchik Jesusta uyarispaqa hinaspa imamantapas mana llakisqallaña kaspaqa manam iskayrayasunchu Jehova Dios cuidawananchikmantaqa (leey Salmos 37:5; 1 Ped. 5:7). Piensarisun  5 parrafopi rimamusqanchik sasachakuykunapi. Yaqapaschá Jehova Diosqa kunankama cuidawarqanchik ayllunchikpi punta apaqwan utaq imapipas llamkapakusqanchikwan. Kunan ayllunchikpi punta apaq manaña yanapawaptinchikpas utaq mana llamkayniyuq kaptinchikpas Diosqa yanapawasunpunim. Kunanñataq yachaykusun imayna mana kananchikpaqwan Jesuspa yachachisqanmanta.

11. Mateo 7:1, 2 nisqanman hinaqa, ¿imayna mana kanapaqmi Jesus nirqa? ¿Imanasqataq sasa?

¹¹ (Leey Mateo 7:1, 2). Jesusqa yacharqam huchayuq kasqanchikrayku hukkunapa pantasqallankuta qawaq kasqanchikta. Chaymi nirqa: “Amayá hukkunata juzgaychikchu”, nispa. Wakinpiqa iñiqmasinchikkunatam juzganchik utaq imatapas nirunchik. Chayna pasawaptinchikqa, ¿imatam ruwachwan? Jesustam uyarinanchik, hinaspapas kallpanchakunanchikmi pitapas ama juzganapaq.

12, 13. ¿Imaynataq kasun Diosta qatipakuspaqa?

¹² Jehova Diospa imayna kasqanpi yuyaymanaymi anchata yanapawasun. Payqa hukkunapa allin ruwasqantam astawanqa qawan. Chaynatam kamachiq Davidwan ruwarqa hatun huchakunata ruwachkaptinpas. Payqa Betsabeywanmi huchapakururqa, hinaspapas qusan Uriasta wañurachinankupaqmi kamachirqa (2 Sam. 11:2-4, 14, 15, 24). Davidpa chayna ruwasqanwanmi familiankunapas chaynataq wakin warminkunapas sasachakuypi tarikurqaku (2 Sam. 12:10, 11). Huk kutipipas Jehova Dios mana kamachichkaptinmi Israel runakunata yuparachirqa. Chaytaqa ichapas ruwarurqa achkallaña soldadonkuna kasqanwan hatun tukuspan hinaspa kikillanpi confiakuspan. ¿Imataq pasarurqa? 70.000 Israel runakunam unquywan wañururqaku (2 Sam. 24:1-4, 10-15).

¹³ Chaypi kaspanchikqa, ¿imatam nichwan karqa Davidmanta? ¿Dios mana pampachananpaq kasqantachu piensachwan karqa? Jehova Diosqa manam chaynatachu piensarqa. Kawsakuyninpi payman sunqu kasqantawan sunqumanta wanakusqantam Diosqa qawarqa. Chayraykum huchanmanta pampachaykurqa. Diosqa yacharqam Davidpa ancha kuyasqanta hinaspa allin ruway munasqanta. ¿Manachu ñuqanchikpas kusikunchik Dios chayna kasqanmanta? (1 Rey. 9:4; 1 Cron. 29:10, 17).

14. ¿Imataq yanapawasun hukkunapa pantasqallankuta mana qawanapaq?

¹⁴ Diosqa pantaq kachkaptinchikpas allin ruwasqanchikkunatam qawan, chaynam ñuqanchikpas hukkunapa allin ruwasqankunata qawananchik. Hukkunapa mana allin ruwasqankunallata qawaspa mana allinta rimayqa facillam. Jehova Diosta qatipakuspam ichaqa hukkunawan allinlla kasun imapi pantaptinkupas. Chayllaraq tarirusqa alaqa rumiqa qachqam hinaspa millapam.  Riqsiqpaqmi ichaqa mana chaynachu tallaruptin sumaqcha kananta yachasqanrayku. Chaynaqa, Jehova Diostawan Jesusta qatipakuspam mana hukkunapa pantasqallankutachu qawananchik.

15. ¿Imanasqataq hukkunapa imayna kawsakusqanpi yuyaymanayqa yanapawasun mana sientirachinapaq?

¹⁵ Hukkunapa allin ruwasqankuta qawaspanchikpas, ¿imatam ruwachwan mana juzganapaq utaq mana sientirachinapaq? Imayna kawsakusqanpim yuyaymanananchik. Chaypaq rimarisun Jesusmanta. Huk kutipim templopi kachkaspan wakcha viudata rikururqa qullqi churana cajaman iskay qullqichakuna churasqanta. Payqa manam nirqachu chaynachallata churasqantaqa. Hayka qullqi churasqanta qawananmantaqa chay wakcha viuda imayna tarikusqanpi piensaspanmi atisqanta churasqanmanta alabarqa (Luc. 21:1-4).

16. ¿Imatam yachanchik iñiqmasinchik Veronicapa willakusqanmanta?

¹⁶ Hukkunapa kawsakuyninpi yuyaymanay imanasqa ancha allin kasqanmanta yachanapaq rimarisun iñiqmasinchik Veronicamanta. Paypa huñunakusqanpim karqa wawanta sapallan uywaq iñiqmasinchik. Veronicam willakun: “Huñunakuykunapi mana ancha rikusqayraykum mana allinta piensarqani. Ichaqa huk punchawmi chay iñiqmasinchikwan Diosmanta willakuq lluqsirqani. Chaymi willawarqa unquq wawanwan anchata sasachakusqanmanta.  Wawan chayna unqusqanraykum cuidananpaq hinaspa Diosmanta yachachinanpaq tukuyta ruwasqa. Chaysi wakinpiqa huk iñiqmasinchikkunapa huñunakuyninmanña riq”, nispa. Veronicaqa willakuntaqmi: “Manam haykapipas piensarqanichu chayna kawsakusqantaqa. Chayna kachkaspanpas Jehova Diosta servinanpaq tukuyta ruwasqanmi anchata kallpanchawan”, nispa.

17. ¿Imatam Santiago 2:8 nisqan kamachiwanchik? ¿Imaynatam chay nisqanta kasukuchwan?

¹⁷ ¿Imatam ruwachwan mayqan iñiqmasinchiktapas juzgasqanchikta utaq pantasqallankuta qawasqanchikta cuentata qukuspaqa? Iñiqmasinchikkunata kuyanapaq bibliapa nisqantam yuyarinanchik (leey Santiago 2:8). Chaymantapas, mana juzganapaqmi Jehova Diosta tukuy sunqumanta mañakunanchik yanapawananchikpaq. Hinaspam mañakusqanchikman hina kallpanchakuchwan iñiqmasinchikwan rimanapaq. Chayta ruwaymi yanapawachwan iñiqmasinchikta riqsinapaq. Nichwantaqmi kuska Diosmanta willakuq utaq mikuq rinanchikpaqpas. Chaynapim allinta riqsispanchik Jehova Dioswan Jesus hina allin ruwasqankunata qawasun. Chaynata ruwaspanchikmi ama hukkunata juzganapaq Jesuspa nisqanta kasukusun.

18. ¿Imaynatam Jesuspa niwasqanchikta uyarichwan?

¹⁸ Imaynam ovejakunapas michiqninpa nisqanta kasukunku, chaynam ñuqanchikpas Jesuspa niwasqanchikta kasukunchik. Mikunanchikmantawan pachakunanchikmanta mana ancha llakisqallaña kaptinchikqa hinaspa hukkunata mana juzganapaq kallpanchakuptinchikqa Jehova Dioswan Jesusmi bendeciwasun. Chaynaqa, hanaq pachapaq utaq kay pachapaq kaspanchikpas allin michiqninchik Jesustam uyarinanchik hinaspa kasukunanchik (Luc. 12:32; Juan 10:11, 14, 16). Qatiqnin yachachikuypim yachasun imayna kanapaq Jesuspa nisqankunamanta.