1. Eaa tetai tumu i akaaite ei a Iesu i tana au pipi ki te mamoe?

AKAAITE a Iesu i tona pirianga ki tana au pipi ki te pirianga i rotopu i tetai tiaki e tana au mamoe. (Ioa. 10:14) E akatutuanga tau meitaki teia. Kua kite te au mamoe i to ratou tiaki e ka akarongo ki tona reo. Kua kite mata tetai tangata turoto i teia. Karanga aia: “Kua inangaro matou i te nenei tutu no te au mamoe e kua kapiki ia ratou kia aere mai. Inara, kare te au mamoe i akavaitata mai no te mea kare ratou i kite i to matou reo. E oti, kua aere mai tetai manga tamaiti tiaki; e i te kapiki anga aia ia ratou, kua aru ratou iaia.”

2-3. (a) Akapeea te au pipi a Iesu me akaari e te akarongo nei ratou ki tona reo? (e) Eaa ta tatou ka uriuri i teia atikara e te atikara ka aru mai?

² Tei tupu ki te tangata turoto, te akamaara ra ia tatou i ta Iesu i tuatua no runga i tana au mamoe—tana au pipi. Karanga aia: “E akarongo mai oki ratou i toku nei reo.” (Ioa. 10:16) Inara tei runga a Iesu i te rangi. No reira, akapeea tatou me akarongo kiaia? Tetai mataara puapinga ka akaari tatou e te akarongo ra tatou ki te reo o te Atu, me taangaanga i tana apiianga i roto i to tatou oraanga.—Mata. 7:24, 25.

³ I teia atikara e te atikara ka aru mai, ka uriuri tatou i tetai pae o ta Iesu au apiianga. Ka kite mai tatou e kua apii a Iesu i tetai au mea auraka tatou kia rave e tetai au mea kia rave tatou. Ei akamataanga, ka uriuri tatou e rua apinga ta te tiaki meitaki i apii mai auraka tatou e rave.

4. Ia Luka 12:29, eaa te ka akatupu ia tatou kia “noo ma te apiapi”?

⁴ E tatau ia Luka 12:29. Akamaroiroi a Iesu i tana au pipi “auraka oki e noo ma te apiapi” i to ratou au anoano pae materia. Kua kite tatou e tuatua mou e te pakari te akoanga  a Iesu. Ka inangaro tatou i te taangaanga i te reira inara, i tetai taime e ngata i te rave i te reira. No teaa ra?

5. Eaa te tumu ka apiapi tetai pae i to ratou au anoano i te pae materia?

 ⁵ Penei ka apiapi tetai pae i to ratou au anoano pae materia—te kai, kakau e te ngai nooanga. Penei te noo ra ratou i tetai enua e maata te aronga putaua e e ngata i te kimi ngai angaanga. E ngata ia ratou kia rauka mai te moni no te akono i to ratou ngutuare tangata. Me kore, penei kua mate te tangata angaanga moni o te ngutuare e kare e rauka mai te moni no te au mea ta te ngutuare i anoano. Penei no te maki COVID-19, kua akanooia tetai pae mei to ratou ngai angaanga e kare e moni. (Kohe. 9:11) Me tupu teia kia tatou me kore tetai manamanata ke atu, akapeea tatou me aru i ta Iesu akoanga auraka kia apiapi?

6. Akataka mai eaa tei tupu ki te apotetoro ko Petero i tetai atianga.

⁶ I tetai atianga, tei roto te apotetoro ko Petero e te au apotetoro i te paī i runga i te Tai Galilea e kua pupuʼi te matangi viviki. E oti, kite ratou ia Iesu e aaere ra na runga i te kiriatai. Karanga a Petero: “E te Atu, ko koe tika ra, e tuatua mai koe kiaku kia aere atu ia koe na runga katoa i te kare.” Te pau anga a Iesu “ka aere mai,” kua akaruke atura a Petero i te paī e kua “aere ua atura kia Iesu na runga i te kare.” Akamanako ana eaa tei tupu i muri mai. “Kia kite ra aia i te viviki anga o te matangi, mataku akera; e te maremoia ra, kapiki atura, na ko atura, E te Atu, kia ora au.” Akatika a Iesu i tona rima e kua opu iaia. Te mea umere, kua rauka ia Petero i te aaere na runga i te tai me akamou ua i tona manako ki runga ia Iesu. Inara i te akara anga a Petero i te uriia,  kua ō mai te mataku e te manako ekoko e kua akamata aia i te maremoia.—Mata. 14:24-31.

7. Eaa ta tatou ka apii mei te akaraanga o Petero?

⁷ Ka apii tatou mei te akaraanga o Petero. Te eke anga a Petero mei runga i te paī e kua takaʼi ki runga i te tai, kare aia i manako ana e ka apiapi aia i te uriia e ka maremo atu. Inangaro aia kia aaere ua na runga i te tai e tae ua atu ki tona Atu. Inara kare aia i akamou ana i tona manako ki runga ia Iesu mari ra, kua apiapi aia i te uriia. I teia tuatau, ka anoanoia te akarongo ei akakoromaki i te au manamanata, mei ia Petero rai tei anoano i te akarongo kia aere na runga i te tai. Me kare tatou e akamou i to tatou manako ki runga ia Iehova e tana i taputou mai, ka paruparu to tatou akarongo e ka maremoia tatou e te apiapi. Noatu ka riro tetai au manamanata mei te uriia rai, ka anoanoia kia akamou i to tatou manako ki runga ia Iehova e i tona inangaro i te tauturu mai ia tatou. Akapeea tatou me rave i te reira?

8. Eaa te ka tauturu ia tatou auraka kia apiapi maata i to tatou au anoano pae materia?

⁸ Ka puapingaia tatou me irinaki ia Iehova, e auraka e apiapi. E akamaara, kua taputou mai to tatou Metua aroa ko Iehova i te akono ia tatou i te pae materia me tuku tatou i te au mea pae vaerua na mua. (Mata. 6:32, 33) E akatupu ua ana aia i tana i taputou. (Deu. 8:4, 15, 16; Sala. 37:25) Me ka akono a Iehova i te au manu o te rangi e te tiare, e mea papu kare tatou e anoanoia kia apiapi e eaa ta tatou ka kai e ka aao! (Mata. 6:26-30; Phili. 4:6, 7) Me ka akakeu te aroa i te nga metua meitaki kia akono i ta raua tamariki i te pae materia, ka akakeu katoa te aroa i to tatou Metua i te rangi kia akono i tona iti tangata. Ae, ka irinaki pu tikai tatou e ka akono mai a Iehova ia tatou!

9. Eaa ta tatou ka apii mei tei tupu ki tetai nga tokorua?

⁹ Akamanako ana i tetai tupuanga tei akaari mai e ka akono a Iehova i to tatou au anoano pae materia. Kua aere tetai nga tokorua i roto i te angaanga tavini tamou na roto i to raua motoka takere ki te ngai tuitarere, tere atu e tai ora te mamao, ei tiki i te au tuaine no te uipaanga Kerititiano. Akamārama te taeake: “I muri ake i te uipaanga, kua pati maua i te au tuaine no tetai kai manga, inara kua maara ia maua e kare e kai i te kainga.” Eaa tei tupu? Akakite te taeake: “Te tae anga matou ki te kainga, kua kite matou e rua pia kai i mua i te ngutupa. Kare matou i kite e naai i kave mai i te reira. Kua akono a Iehova ia matou.” I muri mai, kua kino te motoka o te nga tokorua. Ka anoanoia te reira no ta raua angaanga tutu aere inara, kare a raua moni no te maani i te motoka. Te apai anga raua i te reira ki te ngai maani motoka, kua aere mai tetai tangata e kua ui: “Noai tera motoka?” Pau te taeake e nona, e kua karanga aia e kua kino te reira. Pau mai te tangata: “Kare e kino. Ka inangaro taku vaine i tera motoka e i tera kara. Eia moni ei oko i te reira?” Kua rava te moni a te taeake i te oko i tetai akaou motoka. Karanga aia: “Mataora tikai maua i tera rā. Kite mai maua e kare teia i te mea tupu ua, mari ra, ko to Iehova rima tauturu.”

10. Akapeea a Salamo 37:5 te tauturu anga ia tatou auraka kia apiapi i to tatou au anoano pae materia?

¹⁰ Me akarongo tatou ki te tiaki meitaki e auraka kia noo ma te apiapi i to tatou au anoano pae materia, ka papu ia tatou e ka akono mai a Iehova ia tatou. (E tatau ia Salamo 37:5; 1 Pete. 5:7) Akamanako ana i te au turanga ngata tei akatakaia mai i te   parakarapa 5. Tae mai ki teia taime, penei kua taangaanga a Iehova i te upoko o te ngutuare me kore tetai pu angaanga ei akono i to tatou au anoano i te pae materia. Me kare ra e rauka i te upoko o te ngutuare tetai ngai angaanga me kore kua akanooia aia mei te angaanga, ka akono rai a Iehova ia tatou na roto i te mataara ke atu. Papu ia tatou e ka akono mai a Iehova ia tatou. Teianei, ka uriuri tatou i tetai apinga ke atu ta te tiaki meitaki i karanga e auraka tatou kia rave.

11. Ia Mataio 7:1, 2, eaa ta Iesu i akakite mai auraka tatou kia rave, e eaa ra teia i ngata ai?

¹¹ E tatau ia Mataio 7:1, 2. Kua kite a Iesu e ka viviki ua te aronga apa tei akarongo iaia i te akaapa i tetai ke. No reira aia i karanga e: “Auraka e akakino atu.” Penei ka tauta pakari tatou auraka kia akakino atu i to tatou au taeake irinaki. Inara, e tu apa to tatou. Me kite mai tatou e te akaapa ra tatou i te au taeake, eaa ta tatou ka rave? E akarongo kia Iesu e kia angaanga pakari auraka kia akakino atu.

12-13. Akapeea te akamanako oonu anga i to Iehova manako i te Ariki ko Davida me tauturu ia tatou auraka kia akakino atu?

¹² Ka puapingaia tatou me akamanako oonu i te akaraanga o Iehova. Ka akamou ua aia ki runga i te meitaki i roto i te tangata. Ka kite tatou i teia mei tana i rave no te Ariki ko Davida, tei rave i te au tarevake kino tikai. Ei akaraanga, kua akaturi a Davida kia Bate-seba e kua tamate i tana tane. (2 Samu. 11:2-4, 14, 15, 24) No ta Davida i rave, kua mamae aia e tona ngutuare, kapiti mai tana au vaine ke. (2 Samu. 12:10, 11) E i tetai atianga, kare a Davida i irinaki pu tikai ana ia Iehova e kua akaue aia kia tare i te numero o te nuku vaeau o Iseraela. Penei no tona tu ngakau parau e te irinaki i te maatamaata o tona nuku vaeau i rave ei a Davida i teia. Eaa tei tupu? Mei te 70,000 aronga Iseraela tei mate no te maki mate!—2 Samu. 24:1-4, 10-15.

¹³ Naringa i noo ana koe i Iseraela i tera tuatau, eaa taau ka manako ia Davida? Ka manako ainei koe e kare a Iehova e tau kia akakore i tana ara? Kare a Iehova i manako akapera ana. Kua akamou aia ki runga i to Davida oraanga tiratiratu e tona tu tataraara ma te ngakau tae. Tei tupu, kua akakore a Iehova i ta Davida au ara kino. Kua kite a Iehova e te akaperepere ra a Davida iaia e tona inangaro i te rave i te mea tika. Kare ainei koe e inangaro i te akameitaki i te Atua no te akamou ki runga i to tatou tu meitaki?—1 Ari. 9:4; 1 Para. 29:10, 17.

14. Eaa te ka tauturu i te au Kerititiano auraka kia akakino atu i etai ke?

¹⁴ Me kare a Iehova e tapapa ia tatou kia apa kore, auraka i reira tatou e tapapa atu i tetai ke kia apa kore, mari ra kia akamou ki runga i to ratou tu meitaki. E mea māmā ua i te kite i te tu apa o tetai ke e te akaapa ia ratou. Inara te tangata tei aru ia Iehova, ka angaanga kapiti meitaki aia ma etai ke noatu kua kite aia i to ratou tu tarevake. Penei ka akara anga tungatunga tetai taimana tei kore i akamaneaia. Inara, kua kite te tangata pakari e ka manea tikai e te taurekareka te taimana me tamāia e me akamaneaia te reira. Mei ia Iehova e Iesu, auraka tatou e akamou ua ki runga i te tu apa o te tangata, mari ra e akamou ki runga i to ratou tu meitaki.

15. Akapeea te akamanako anga i te turanga o te tangata me tauturu ia tatou auraka kia akaapa ia ratou?

¹⁵ Kapiti mai ki te akamou anga ki runga i te tu meitaki o tetai ke, eaa atu te  ka tauturu ia tatou auraka kia akaapa ia ratou? Tauta kia akamanako mei teaa rai to ratou tu oraanga. Akamanako ana i teia akaraanga. I tetai rā i ko i te iero, kua kite a Iesu i tetai vaine takaua apinga kore e tuku ra i nga moni meangiti ki roto i te pia moni. Kare a Iesu i karanga ana: “Eaa aia kare i tuku maata ai i te moni?” Kare aia i akamou ana ki runga i te maata o te moni ta te vaine takaua i oronga, mari ra kua akamanako aia i te tumu i oronga ai aia i te reira e tona turanga, e kua akameitaki iaia no te rave i tana ka rauka i te rave.—Luka 21:1-4.

16. Eaa taau ka apii mai mei ia Veronica?

¹⁶ Penei ka akatutu tatou i te puapinga kia akamanako i te turanga o tetai ke na te akamanako anga eaa tei tupu ki tetai tuaine ko Veronica. I roto i tana putuputuanga, e metua vaine tetai e tana tamaiti. Akakite a Veronica: “I te akara anga, kare raua e aere putuputu mai ana ki te au uipaanga e kare e rave ana i te angaanga tutu aere. Kua manako kino au ia raua no te reira. I reira, kua angaanga kapiti maua ko te metua vaine i te tutu aere. Akamārama mai aia i te au turanga ngata te tupu ra kiaia no te akono i tana tamaiti pakipakitai. Te tauta pakari ra aia i te akono ia raua i te pae kopapa e te pae vaerua. I tetai taime, no te turanga maki o tana tamaiti, ka anoanoia aia kia aere ki tetai uipaanga a te putuputuanga ke mai.”  Karanga a Veronica: “Kare au i kite ana e ngata tikai tona oraanga. I teianei, kua akaperepere e kua akangateitei maata au i teia tuaine no tana e rave ra kia tavini ia Iehova.”

17. Eaa ta Iakobo 2:8 e akaue maira ia tatou kia rave, e akapeea tatou me rave i te reira?

¹⁷ Eaa ta tatou ka rave me kite mai tatou e kua akakino atu tatou i tetai taeake irinaki? E akamaara, ka tauta tatou kia aroa atu i to tatou au taeake. (E tatau ia Iakobo 2:8.) E kia pure akatenga tatou kia Iehova ma te pati kiaia no te tauturu auraka kia akakino atu. Ka angaanga rotai tatou ki ta tatou pure me akapou i tetai taime no te tuatua ki te tangata ta tatou i akaapa. Penei ka tauturu teia ia tatou kia kite meitaki iaia. Penei e pati iaia kia angaanga kapiti mai kia tatou i te tutu aere me kore no te kai manga. Me kite meitaki atu i to tatou taeake, kia tauta tatou kia aru i te akaraanga o Iehova e Iesu na te akamou anga ki runga i tona tu meitaki. Na roto i teia mataara, te akarongo nei tatou ki te akauenga a te tiaki meitaki auraka kia akakino atu.

18. Akapeea tatou me akaari e te akarongo nei tatou ki te reo o te tiaki meitaki?

¹⁸ Mei te au mamoe rai tei akarongo ki te reo o to ratou tiaki, ka akarongo te au pipi a Iesu ki tona reo. Me tauta tatou auraka kia apiapi i to tatou au anoano pae materia e auraka kia akakino atu i tetai ke, ka akameitaki a Iehova e Iesu i ta tatou tautaanga. No reira, me ko tatou tetai o te “anana iti” me kore te “mamoe ke atu,” e akarongo tamou tatou ki te reo o te tiaki meitaki. (Luka 12:32; Ioa. 10:11, 14, 16) I te atikara ka aru mai, ka uriuri tatou e rua apinga ta Iesu i akakite ki tana au pipi kia rave ratou.