1. Thangwi yanji Yezu alandanisa atowereri ace na mabira?

YEZU alandanisa uxamwali wace na atowereri ace ninga nkumbizi na mabira ace. (Juwau 10:14) Citsandzo ceneci cisabveka mwadidi. Mabira asadziwa nkumbizi wawo, pontho asabvera fala yace. Mamuna unango wakuti asacita ulendo toera kuona mbuto zakusiyana-siyana aona pyenepi. Iye alonga: “Ife tikhafuna kubulusa mafoto mabira anango, natenepa tikhayesera kuacemera abwere dhuzi. Mbwenye iwo nee abwera kuna ife thangwi nee akhadziwa mafala athu. Buluka penepo, m’phale m’bodzi wakuti akhali nkumbizi abwera, pidaacemera iye, iwo abwera mwakucimbiza mbantowera.”

2-3. (a) Atowereri a Yezu anapangiza tani kuti asabva fala yace? (b) Tinapfundzanji mu nsolo uno na unatowera?

² Pidacitikira mamuna unoyu pisatikumbusa mafala a Yezu analonga pya mabira ace peno anyakupfundza ace. Iye alonga: “Iwo anadzabva fala yanga.” (Juwau 10:16) Nakuti Yezu ali kudzulu, mphapo tinakwanisa tani kubva fala yace? Ife tinapangiza kuti tisabva fala yace tingaphatisira pinatipanga iye.—Mat. 7:24, 25.

³ Mu nsolo uno na unatowera, ife tinaona pinthu pidapfundzisa Yezu. Ninga taona, Yezu atipfundzisa pinthu pyakuti nee tisafunika kupicita na pinafunika ife kucita. Pakutoma, ife tinaona pinthu piwiri pidatipanga nkumbizi wadidi toera tikhonde kupicita.

4. Mwakubverana na Luka 12:29, ninji pinacitisa munthu “kudzudzumika kakamwe”?

⁴ Lerini Luka 12:29. Yezu acenjeza atowereri ace toera ‘akhonde kudzudzumika kakamwe’ na pinthu pyakumanungo. Ife tisadziwa kuti ndzidzi onsene uphungu wa Yezu ndi wadidi.  Ife tisafuna kuuphatisira, mbwenye midzidzi inango kucita pyenepi kusanentsa. Thangwi yanji?

5. Thangwi yanji anthu anango asadzudzumika thangwi ya pinthu pyakumanungo?

 ⁵ Panango anango anadzudzumika kuti anagumana tani cakudya, cakubvala na mbuto yakukhala. Panango iwo akukhala mu dziko yakuti anthu azinji ndi akutcerenga, pontho mphyakunentsa kugumana basa. Pyenepi pinacitisa kukhala pyakunentsa kuna iwo kugumana kobiri toera kutsalakana banja yawo. Peno munthu anaphata basa m’banja mwawo afa, natenepa banja yonsene nee isagumana kobiri toera kutsalakanika. Kusiyapo pyenepi, anthu azinji aluza mabasa awo thangwi ya utenda wa COVID-19. (Koel. 9:11) Khala ife tikuthimbana na nyatwa zenezi peno zinango, tinatowezera tani uphungu wa Yezu unalonga kuti lekani kukhala akudzudzumika kakamwe?

6. Fokotozani pidacitikira mpostolo Pedhru ntsiku inango.

⁶ Ntsiku inango, mpostolo Pedhru na apostolo anango akhali m’mwadiya m’bara ya ku Galileya, mbaona Yezu mbakafamba padzulu pa madzi mu ndzidzi ukhacitika condzi. Pedhru alonga: “Mbuya, khala ndimwe, nditawiriseni ndibwere kuna imwe na padzulu pa madzi.” Buluka penepo Yezu ampanga: “Bwera.” Pedhru abuluka m’mwadiya “mbafamba padzulu pa madzi kuenda kuna Yezu.” Onani pidacitika. “Pidayang’ana iye condzi, Pedhru agopa. Pidatoma iye kulirima akhuwa: ‘Mbuya, ndipulumuseni!’” Yezu afuthula nkono wace mbampulumusa. Onani kuti Pedhru afamba padzulu pa madzi mu ndzidzi ukhapitiriza iye kuyang’ana Yezu. Mbwenye Pedhru pidayang’ana iye condzi, iye agopa mbapenula, buluka penepo atoma kulirima.—Mat. 14:24-31.

7. Tisapfundzanji na citsandzo ca Pedhru?

 ⁷ Ife tinakwanisa kupfundza kubulukira mu citsandzo ca Pedhru. Pidabuluka Pedhru m’mwadiya mbaenda m’madzi, nee akhadikhira kuti mbadadzudzumika mbatoma kulirima. Iye akhafuna kufamba padzulu pa madzi mpaka kufika kuna Yezu. Mbwenye iye acimwana kupitiriza kuyang’ana Yezu mbadzudzumika na condzi. Ninga Pedhru wakuti akhafunika kukhala na cikhulupiro toera afambe padzulu pa madzi, lero ife tisafunikambo kukhala na cikhulupiro toera tikwanise kupirira nyatwa. Tingakhonda kupitiriza kunyindira Yahova na mapikiro ace, cikhulupiro cathu cinafewa mbatikhala ninga tikulirima thangwi ya nyatwa zathu. Maseze tithimbane na nyatwa zizinji, tisafunika kupitiriza kukumbuka kuti Yahova anatiphedza. Tinacita tani pyenepi?

8. Ninji pinafuna kutiphedza toera tikhonde kudzudzumika kakamwe na pinthu pyakumanungo?

⁸ M’mbuto mwakudzudzumika na nyatwa zathu, ife tisafunika kunyindira Yahova. Kumbukani kuti Babathu waufuni Yahova, asapikira kuti anadzatipasa pinafuna ife tingaikha pinthu pyauzimu pa mbuto yakutoma. (Mat. 6:32, 33) Iye asakwanirisa pikiro ineyi ndzidzi onsene. (Deut. 8:4, 15, 16; Masal. 37:25) Khala Yahova asatsalakana mbalame na maluwa, ife nee tisafunika kukhala akudzudzumika kuti tinadyanji peno tinabvalanji! (Mat. 6:26-30; Afil. 4:6, 7) Ninga ufuni usakulumiza anyakubala toera kupasa anapiana awo pinafuna iwo kuti apitirize kukhala na umaso, ufuni usakulumizambo Babathu wakudzulu toera kupasa atumiki ace pyonsene pinafuna iwo. Natenepa tinakwanisa kukhala na cinyindiro cakuti Yahova anatitsalakana!

9. Musapfundzanji na pidacitikira banja ibodzi?

⁹ Onani citsandzo cinapangiza kuti Yahova asatipasa tani pinthu pinafuna ife. Banja ibodzi yakuti isatumikira ninga apainiya, yakwata karu yawo yakale, mbaenda kakwata alongo akuti akhali pa mbuto ikhakhala anthu adathawa nkhondo toera kuenda nawo ku misonkhano Yacikristu. M’bale alonga: “Pidamala misonkhano, ife taaphemba toera kuenda kadya, mbwenye tadzindikira kuti nee tikhali na cakudya toera kuapasa.” Kodi banja ineyi yacitanji? M’bale apitiriza kulonga: “Pidafika ife panyumba, tagumana mapasta mawiri makulu a pyakudya pansuwo pathu. Ife nee tikhadziwa kuti mbani adaasiya. Yahova atiphedza.” Mukupita kwa ndzidzi, karu ya banja ineyi yagudjuka. Iwo akhafuna karu ineyi toera kuiphatisira m’basa yakumwaza mphangwa, mbwenye nee akhali na kobiri toera kuisasanyisa. Iwo akwata karu ineyi mbaenda nayo kwa mesiri toera kuona kuti anaphatisira kobiri zingasi toera kuisasanyisa. Buluka penepo, mamuna unango abwera mbabvundza: “Karu iyi ndi yani?” M’bale atawira kuti karu ndi yace, pontho akhafuna kuisasanyisa. Mamuna antawira: “Leka kudzudzumika. Nkazanga asafuna kakamwe ntundu unoyu wa karu. Munaigulisa kontanji?” M’bale agulisira mamuna unoyu karu yace, mbakwata kobiri ineyi mbagula karu inango. Iye alonga: “Ife tiri akutsandzaya kakamwe lero. Tisadziwa kuti pyenepi nee pyacitika mwasusudeu. Ndi Yahova adatiphedza.”

10. Lemba ya Masalmo 37:5, isatiphedza tani toera tikhonde kudzudzumika na pinthu pyakumanungo?

¹⁰ Tingabvera nkumbizi wadidi mbatikhonda kudzudzumika kakamwe na pinthu pyakumanungo, tinakhala na cinyindiro cakuti Yahova anadzatipasa pinafuna ife. (Lerini Masalmo 37:5; 1 Ped. 5:7) Onani nyatwa zidalongwa mu  ndima 5. Mpaka lero, Yahova asaphatisira nsolo wa banja peno patrau toera  kutipasa pinafuna ife ntsiku na ntsiku. Khala nsolo wa banja nee anakwanisa kucita pyenepi peno aluza basa, Yahova anatitsalakana munjira inango. Ife tisafunika kukhala na cinyindiro cakuti iye anatiphedza. Cincino tendeni tione cinthu cinango cakuti nkumbizi wathu wadidi asatipanga toera tikhonde kucicita.

11. Mwakubverana na Mateu 7:1, 2, Yezu atipanga toera tikhonde kucitanji, pontho thangwi yanji pyenepi midzidzi inango mphyakunentsa?

¹¹ Lerini Mateu 7:1, 2. Yezu akhadziwa kuti anthu akusowa ungwiro ali na cipendamiro cakutonga anango. Na thangwi ineyi iye alonga: “Lekani kutonga andzanu.” Ife tisafunika kuwangisira toera tikhonde kutonga Akristu andzathu. Mbwenye midzidzi inango pyenepi pisakhala pyakunentsa. Tingaona kuti midzidzi inango tisatonga anango, tisafunika kucitanji? Bverani Yezu, pontho wangisirani toera kusiya kutonga anango.

12-13. Citsandzo ca Yahova cinatiphedza tani toera tikhonde kutonga anango?

¹² Ife tinaphedzeka kakamwe tinganyerezera citsandzo ca Yahova. Iye asaona pinthu pyadidi pinacita anthu. Ife tisaona pyenepi thangwi ya pidacitikira Mambo Dhavidhi, wakuti akhadacita madawo makulu kakamwe. Mwacitsandzo, iye acita upombo na Bhatisebha, pontho iye acitisa kuti mamunace aphiwe. (2 Sam. 11:2-4, 14, 15, 24) Pyenepi pyabweresa nyatwa, tayu basi kuna Dhavidhi, mbwenye kuna banja yace kuphatanizambo akazace anango. (2 Sam. 12:10, 11) Ntsiku inango Dhavidhi apangiza kuti nee akhanyindira kakamwe Yahova pidalengesa iye nsoka wa anyankhondo mu Izraeli, pinthu pyakuti nee apangwa na Yahova toera kupicita. Panango iye acita pyenepi thangwi yakudzikuza, peno thangwi yakunyindira kunjipa kwa anyankhondo ace. Ninji pidacitika? Aizraeli cifupi na 70.000 afa na utenda!—2 Sam. 24:1-4, 10-15.

¹³ Mbidakhala kuti imwe mukhali mu Izraeli mu ndzidzi unoyu, mbamudaona tani Dhavidhi? Kodi imwe mbamudanyerezera kuti Yahova nee akhafunika kumulekerera? Mbwenye Yahova nee anyerezera tenepo. Iye anyerezera kukhulupirika kudacita Dhavidhi mu umaso wace na kutcunyuka kwace. Na thangwi ineyi, Yahova alekerera madawo makulu a Dhavidhi. Yahova akhadziwa kuti Dhavidhi akhanfuna kakamwe, pontho akhafuna kucita pinthu pyadidi. Ife tisapereka takhuta kakamwe kuna Yahova thangwi iye asaona pinthu pyadidi pinacita ife.—1 Ama. 9:4; 1 Pya dziko. 29:10, 17.

14. Ninji pinafuna kuphedza Akristu toera akhonde kutonga anango?

¹⁴ Nakuti Yahova nee asadikhira kuti tikhale aungwiro, ifembo nee tisafunika kudikhira kuti anango akhale aungwiro, pontho tisafunika kuona pinthu pyadidi pinacita anango. Mphyakukhonda nentsa kuona madodo a anango mbatiatonga. Mbwenye munthu anatowezera Yahova, asaphata basa mwadidi na anango ngakhale iye asadziwa kuti iwo ndi akusowa ungwiro. Dhiyamante yakuti idzati kupukutwa nee isabalika, mbwenye munthu waudziwisi asadziwa kuti ingamala kupukutwa inakhala yakubalika na yakufunika kakamwe. Ninga Yahova na Yezu, ife nee tisafunika kuona basi ene madodo a anango mbwenye tisafunika kuona pinthu pyadidi pinacita iwo.

15. Kunyerezera makhaliro a anthu kunatiphedza tani toera tikhonde kuatonga?

¹⁵ Kuona pinthu pyadidi pinacita anango, kunatiphedza toera tikhonde kuatonga. Yeserani kunyerezera kuti umaso wawo uli tani.  Onani citsandzo ici. Ntsiku inango mu templo, Yezu aona nzice m’bodzi wakutcerenga wakuti akhaikha kobiri zace ziwiri za ntengo wakucepa m’bokosi ya pyakupereka. Iye nee abvundza: “Thangwi yanji nkazi unoyu nee akuikha kobiri izinji?” M’mbuto mwakuyang’ana kucepa kwa kobiri idaikha nkazi unoyu wa nzice, Yezu anyerezera kuti thangwi yanji iye acita pyenepi, anyerezerambo pya makhaliro ace, buluka penepo ansimba thangwi yakuwangisira kwace.—Luka 21:1-4.

16. Mwapfundzanji na pidacitikira Veronica?

¹⁶ Citsandzo ca Veronica cisapangiza kuti thangwi yanji tisafunika kunyerezera pya makhaliro a anthu anango. Mu mpingo ukhatumikira iye mukhali na nkazi wa nzice na mwanace. Veronica alonga: “Ndikhaona kuti iye nee akhagumanika pa misonkhano na m’basa ya m’munda ndzidzi onsene. Ndikhali na maonero akuphonyeka thangwi ya iwo. Mbwenye ine ndaenda kamwaza mphangwa na mulongo unoyu. Iye andipanga kuti mwanace akhali na utenda wa munsolo. Iye akhacita pyonsene pinakwanisa iye toera kupasa mwanace pyonsene pinafunika iye toera apitirize kukhala na umaso na kum’phedza toera apitirize kukhala na uxamwali wakuwanga na Yahova. Nakuti mwanace akhaduwala, midzidzi inango iye akhagumanika pa misonkhano na mpingo unango.” Pakumalisa Veronica alonga: “Nee ndikhadziwa kuti iye akhathimbana na nyatwa zenezi. Cincino ndisapereka takhuta kuna mulongo unoyu thangwi ya pyonsene pinacita iye toera kutumikira Yahova.”

17. Lemba ya Tiyago 2:8 isatipanga toera ticitenji, pontho tinacita tani pyenepi?

 ¹⁷ Tisafunika kucitanji tingadzindikira kuti tisatonga Akristu andzathu? Tisafunika kukumbuka kuti ife tisafunika kufuna abale athu. (Lerini Tiyago 2:8.) Pontho tisafunika kucita phembero kuna Yahova, mbatim’phemba toera tisiye kutonga anango. Ife tinakwanisa kucita pinthu mwakubverana na maphembero anthu, tingakhala na ndzidzi wakucedza na munthu adatonga ife. Panango pyenepi pinatiphedza toera kundziwa. Panango tinam’phemba toera kuenda kamwaza naye mphangwa peno kuncemera toera kudya naye pabodzi. Tingadziwa mwadidi m’bale wathu, tinakwanisa kutowezera citsandzo ca Yahova na Yezu akuti asaona pinthu pyadidi pinacita anango. Tingacita pyenepi, ife tinapangiza kuti tisabvera pidatipanga nkumbizi wadidi kuti lekani kutonga andzanu.

18. Tinapangiza tani kuti tisabva fala ya nkumbizi wadidi?

¹⁸ Ninga mabira asabva fala ya nkumbizi wawo, atowereri a Yezu asabva fala yace. Ife tingawangisira toera kusiya kudzudzumika na pinthu pyakumanungo, mbatisiya kutonga anango, Yahova na Yezu anadzatipasa nkhombo thangwi ya kuwangisira kwathu. Mwakukhonda tsalakana khala ndife “nkumbi ung’ono” peno “mabira anango,” ife tinapitiriza kubva fala ya nkumbizi wadidi. (Luka 12:32; Juwau 10:11, 14, 16) Mu nsolo unatowera, tinadzaona pinthu piwiri pidalonga Yezu kuti atowereri ace asafunika kupicita.