1. Cirhumire cihi ciguma carhumaga Yezu ashushanya abanafunzi bage n’ebibuzi?

YEZU ashushanyize obwîra agwerhe haguma n’abanafunzi bage n’olushangi luba egarhi ka lungere n’ebibuzi byage. (Yn. 10:14) Oko kushushanya kwa ntyo kushinganine. Ebibuzi biyishi lungere wabyo binanayumvirhize izu lyage. Muntu muguma obalama bwenene adesire ebi acibwinire. Adesire ntya: “Rhwakagilonza okufilmé bibuzi biguma na biguma rhwanakalonza okubiyegera. Cikone birhakagirhukulira bulya birhalimanyire izu lirhu. Buzinda hyana higuma hyali hilungere hyabyo hyayisha; ho n’aho hyabihamagala byanahikulikira.”

2-3. (a) Gurhi abanafunzi ba Yezu bayerekanamwo oku bali bayumvirhiza izu lyage? (b) Bici rhwaganirira mw’eci cigabi n’omu cigabi cikulikire?

² Ebyabwinwe n’oyo mulume obalama birhukengezize enderho za Yezu lugenda ebibuzi byage erhi banafunzi bage. Aderha ntya: “Byayumva izu lyani.” (Yn. 10:16) Cikone Yezu ali empingu. Gurhi rhwakaderhamwo oku rhuli rhwayumva izu lyage? Enjira rhwakayerekanamwo oku rhuli rhwayumvirhiza izu lya Nnawirhu kuli kukolesa enyigirizo zage omu kalamo kirhu.​—Mt. 7:24, 25.

³ Mw’eci cigabi n’omu cigabi cikulikire, rhwaganirira nyigirizo nguma na nguma za Yezu. Nk’oku rhwayishibona, hali bintu biguma na biguma Yezu arhubwizire rhushinganine rhuleke okujira n’ebindi rhushinganine rhujire. Burhangiriza rhwaganirira bintu bibirhi lungere mwinja arhuyigirizize oku rhuleke okujira.

4. Nk’oku biyerekinwe omu Luka 12:29, bici byakarhuma ‘rhwacihira omu ntanya’ okurhalusire olugero?

⁴ Osome Luka 12:29. Yezu abwira abanafunzi bage oku ‘bamanye barhacihiraga omu ntanya’ okurhalusire olugero okubiyerekire amalagirire gabo g’omubiri. Rhumanyire oku er’ihano  lya Yezu liba lya bwenge na linja ensiku zoshi. Rhulonzize okulirhumikira, cikone hali mango maguma na maguma rhwakarhimanana n’amazibu g’okujira ntyo. Bulya gurhi?

5. Bulya gurhi bantu baguma na baguma bahikira aha bacihira omu ntanya okurhalusire olugero lugenda amalagirire gabo g’omubiri?

 ⁵ Bantu baguma na baguma banacihira omu ntanya okurhalusire olugero lugenda amalagirire g’omubiri, kwa lwiganyo, okubona ebiryo, emishangi n’enyumpa. Nkaba baba balamire omu cihugo cirimo ehali y’obukenyi bwenene. Ciru kwanaba kuzibu kulibo okubona ensaranga z’okuhikiriza amalagirire g’omulala gwabo. Erhi nkaba owakagishibirira omulala afîre, na buzinda omulala gwanabêra buzira nsaranga zakahikiriza amalagirire gago. Na kandi obulwala bw’Ekorona bwarhumire bantu banji baheza akazi kabo. (Muh. 9:11) Erhi akaba kantu kaguma ka muli ebyo karhuhikire, gurhi rhwakagendekera rhwakulikira ihano lya Yezu ly’okurhacihira omu ntanya?

6. Oganirire ebyahikire entumwa Petro mango maguma.

⁶ Mango maguma, entumwa Petro n’ezindi ntumwa bali omu bwarho omu Nyanja y’e Galilaya, ago mango hali omulaba erhi babona Yezu ali alambagira oku mishi. Petro aderha ntya: “Nyamwagirwa, akaba we, orhegekage ndambagire oku mishi, nje emunda oli.” Buzinda Yezu amubwira erhi “yishaga,” Petro arhenga omu bwarho “alambagira oku mishi mpu aj’emunda Yezu âli.” Ololage ebyabire enyuma z’aho. “Erhi acibona empusi erhakalindwa, ayoboha; n’erhi arhangira okuzika ayâma, anaderha, erhi: ‘Muciza, kufa kuno, nyokola!’” Yezu alambûla okuboko amugwarha anamuyokola. Biyumvikine oku Petro agwerhe obuhashe bw’okulambagira oku mishi galimo omulaba erhi akagendekire asezako Yezu amasu. Cikone erhi Petro asegeza amasu  gage oku mulaba ayoboha anaba n’akarhinda; arhondera okuzika.​—Mt. 14:24-31.

7. Bici rhwakaciyigiriza kugerera olwiganyo lwa Petro?

⁷ Rhwanaciyigiriza kugerera olwiganyo lwa Petro. Erhi Petro arhenga omu bwarho n’okuja omu nyanja, arhalilangalire oku ayishibula kuba masu na buzinda arhondere azika. Alilonzize agendekere alambagira enyanya z’amishi kuhika ahikeko Nnawabo. Cikone ayabirwa okuhikiriza ogo muhigo gwage. Kobinali, rhurhakalambagira oku mishi, cikone rhuli rhwalwisa amarhungulo g’obuyemere. Erhi rhwakaleka okulangalira Yehova n’ebiragane byage, rhwanarhondera okuzika kiroho. Ciru rhwakahikirwa na mulaba guhi gw’olwiganyo omu kalamo kirhu, rhushinganine rhusegeze obwenge bwirhu kuli Yehova n’obuhashe bwage bw’okurhurhabala. Gurhi rhwakajiramwo ntyo?

8. Bici byakarhurhabala lyo rhurhagibula kuba masu erhi kushibirira ebintu by’omubiri kurhuma?

⁸ Rhwanayunguka erhi rhwakahira okulangalira Yehova oku nafasi y’okurhanya okurhalusire olugero. Okengere oku Larha wirhu w’obuzigire, Yehova, arhulaganyize oku agendekera arhushibirira erhi rhwakahira ebintu by’ekiroho oku nafasi ntanzi. (Mt. 6:32, 33) Ngasi mango anahikirize eco ciragane. (Lush. 8:4, 15, 16; Enna. 37:25) Erhi akaba Yehova anahikirize amalagirire g’orhunyunyi n’amauwa, buzira karhinda rhurhakarhanya okurhalusire olugero lugenda ebi rhwalya erhi ebi rhwayambala! (Mt. 6:26-30; Fl. 4:6, 7) Nka kula obuzigire bushumya b’ishe w’omulala bagwerhe entanya nyinja bashibirire amalagirire g’abana babo, obuzigire bunashumye Larha wirhu w’omu mpingu ashibirire amalagirire g’abakozi bage. Rhwanayemera n’obwalagale oku Yehova agendekera arhushibirira!

9. Bici wakaciyigiriza kugerera ebi mulume muguma na mukage bacibwinire?

⁹ Olole olwiganyo lw’ebyabwinwe luyerekine gurhi Yehova ashibirira amalagirire girhu g’omubiri. Mulume muguma na mukage baba omu mukolo gw’akasanzi koshi banayuse nsa nguma bali omu mutuga gwabo gukola gukoyire lyo bajirhôla bali birhu baba balamire omu ikambi ly’ababunga na buzinda babalerhe oku ntimanano z’Ecikristu. Mwene wirhu ahugwîre ntya: “Enyuma z’entimanano rhwalalika bali birhu aku bayishe balye ebiryo emwirhu, cikone buzinda rhwabona oku nta biryo byakubaha rhwagwerhe.” Gurhi oyo mulume na mukage bakajijire? Mwene wirhu acibir’iderha ntya: “Erhi rhuhika aha ka, rhwabona aha mbere z’omulango hali masaki abirhi ga biryo. Rhurhamanyaga indi wagadwirhe aho. Yehova arhushibirire.” Mango maguma enyuma z’aho ogo mutuga gwabo gwafa. Bal’igulagirireko lyo gukabaheka omu mahubiri; cikone nta nsaranga bagwerhe z’okugutengeneza. Baheka ogo mutuga omu garage ly’abafundi bababwira inga bagutengenegeza, buzinda mulume muguma aja omo garage anadosa ntya: “Gwandi ogu mutuga?” Mwene wirhu aderha oku gwage analonzize bagutengeneze. Oyo mulume aderha erhi: “Ntakadali. Mukanie anakalonza omutuga gwa ntya gugwerhe n’irangi lya ntya. Inga olonzize okuguguza?” Mwene wirhu agaluka emwage erhi anakola agwerhe ensaranga ajigula ogundi mutuga. Ashwinjire ntya: “Ntakahashihugûla kunganaci rhwashagalusire muli olo lusiku. Rhumanyire oku oko kurhahikiraga ntya-ntya kone. Obo bwali burhabale kurhenga emwa Yehova.”

10. Gurhi olwandiko lw’Ennanga 37:5 lurhuhire omurhima lugenda okurhakarhanya okurhalusire olugero kuyerekera amalagirire girhu g’omubiri?

¹⁰ Erhi rhwakayumvirhiza lungere mwinja n’okuleka okukarhanya okurhalusire olugero lugenda amalagirire g’omubiri, rhwanayemera n’obwalagale oku Yehova arhuha ebirhulagirireko. (Osome Ennanga 37:5; 1 Pet. 5:7) Olole  akanga kaganirirwe omu  cifungo ca 5. Muli gano mango, Yehova anakolesa ecirhwe c’omulala erhi bose mulebe ly’arhuhikirigiza amalagirire girhu ga ngasi lusiku. Erhi akaba ecirhwe c’omulala cirhacigwerhi obuhashe bw’okujira ntyo erhi nkaba rhwahezize akazi kirhu, Yehova anakolesa eyindi njira ly’arhushibirira. Rhwanayemera oku ajira ntyo. Rhuganirirage akandi kantu lungere mwinja arhuhanzize oku rhuleke okukajira.

11. Nk’oku biyerekinwe omu Mateyo 7:1, 2, bici Yezu arhubwizire oku rhuleke okujira, na bulya gurhi kwanaba nka kuzibu okujira ntyo?

¹¹ Osome Mateyo 7:1, 2. Yezu alimanyire oku bene bantu barhali bimana bajira enkomêdu y’okuderha abandi kubi. Oyumve gurhi adesire: “Murhakazag’itwa oluli omu mwabene.” Rhwanajira okwirhu koshi lyo rhurhagikatwa oluli omu mwa bene wirhu erhi kubatwira olubanja. Cikoki hali amango okujira ntyo kurhuyabira bulya rhurhaba bimana. Bici rhushinganine rhujire erhi rhwakabona oku mango maguma na maguma rhukola rhukaderha abandi kubi? Rhwanayumvirhiza Yezu, n’okujira okwirhu koshi lyo rhurhakazig’itwa oluli omu mwabene.

12-13. Gurhi okurhanya okubiyerekire oku Yehova akagibona Mwami Daudi kwakarhurhabala lyo rhurhakagitwira abandi olubanja?

¹² Rhwanayunguka omu kurhanya oku lwiganyo lwa Yehova. Anakasegeza obwenge oku bintu binja biba omu murhima gw’abakozi bage. Rhubwine ntyo kugerera olushangi agwerhe haguma na Mwami Daudi, mulume wajiraga ebyaha bizibu. Kwa lwiganyo, ajira obugonyi haguma na Batisheba, ciru ayirhisa n’iba. (2 Sam. 11:2-4, 14, 15, 24) Arhali Daudi yene oko kwadwirhire amazibu, cikone kwagalerhera n’abandi bakage. (2 Sam. 12:10, 11) Omu gandi mango, Daudi abula kulangalira Yehova erhi aganja omubalè gw’abasoda b’omu Israheli. Nkaba bucibone n’okulangalira obunji bw’abasoda bage kwamushumagya. Bici oko kwalesire? Hofi ba Israheli 70 000 bafâ n’ecahira!​—2 Sam. 24:1-4, 10-15.

¹³ Erhi akaba walilamire omu Israheli ago mango, gurhi wakajire wabona Daudi? Ka waliwamutwira olubanja oku arhashinganini obwonjo bwa Yehova? Arhali ntyo ko Yehova ajijire. Asegeza obwenge bwage oku bwishwekerezi bwa Daudi boshi n’oku kuciyunjuza kw’okurhenga oku murhima aciyunjuzagya. N’oko kwarhuma Yehova ababalira Daudi ebyo byaha bizibu ajiraga. Yehova alimanyire oku Daudi alimuzigire bwenene ananalilonzize ajire ebintu binja. K’orhavuziri omunkwa okubona Nnâmahanga wirhu anasegeze obwenge oku bintu binja birhuli omu murhima?​—1 Bam. 9:4; 1 Nga. 29:10, 17.

14. Bici Abakristu bakakabona byakabarhabala barhakagitwira abandi olubanja?

¹⁴ Erhi akaba Yehova anababalire abantu barhali bimana, kobinali nirhu rhushinganine rhukababalirana rhwene na nnene n’okusegeza obwenge oku binja abandi bali bajira. Kanji-kanji kuba kulembu okubona obuzamba bw’abandi n’okuba wakuderha kubi. Cikone, omuntu okuzire kiroho anabona obuzamba bw’abandi na buzinda anagendekere akola haguma nabo. Ediama erhacikubulwa yanabonekana nka eri ya busha-busha, cikone omuntu ogwerhe obwenge analola binji kulusha okw’iyosire embuga na buzinda anabona obulagirire bwayo nka yamakubulwa bwinja-bwinja. Aka Yehova na Yezu, rhushinganine rhukasegeza obwenge oku morhere minja g’abandi ci arhali buzamba bwabo erhi oku bali babonekana.

15. Gurhi okurhanya oku kanga k’abantu kwakarhurhabala rhurhakag’ibatwira olubanja buzibu-zibu?

¹⁵ Ahanyuma n’okusegeza obwenge bwirhu oku borhere bw’abandi, bici byakarhurhabala  rhurhakag’ibatwira olubanja buzibu-zibu. Rhukalonza okurhanya gurhi akalamo kabo kayosire. Orhanye kw’olu lwiganyo. Lusiku luguma erhi Yezu ali omu hekalu, abona mukana muguma wa buligo arhogeza bicere bibirhi bisungunu omu cibikiro (cibweta) c’omu hekalu. Yezu arhadosagya ntya: “Bulya gurhi arhahizirimo bicere binji?” Lubero n’okusegeza obwenge oku mubalè gw’ensaranga oyo mukana ahânyire, Yezu alabiriza ebyashumagya oyo mukana n’akanga kage na buzinda amuvuga omunkwa okubona anajijire kushimbana n’oku anakahashire.​—Lk. 21:1-4.

16. Bici wakaciyigiriza kugerera ebyabwinwe na Veronica?

¹⁶ Rhwanabona obulagirire bw’okusegeza obwenge bwirhu oku kanga abandi balimo omu kurhanya ebyabwinwe na mwali wirhu ohamagalwa Veronica. Omu cigamba akagikolera mwali muzire muguma n’omugala. Veronica adesire ntya: “Bakagibonekana nk’abarhacihâna omu mikolo y’ecigamba. Oko kwakarhuma ntabashagalukira. Cikone buzinda naja omu mahubiri haguma n’oyo muzire. Ampugulira amazibu akagilwisa haguma n’omugala walilwazire irhwe. Akagijira okwage koshi ly’ahikiriza amalagirire gabo g’omubiri n’ag’ekiroho. Hali amango, enyanya z’obo bulwala b’omugala, anahige okuja oku ntimanano omu cindi cigamba.” Veronica ashwinjire ntya: “Ntalimanyire oku ago mazibu go akagirhimanana nago. Nkola nkenga oyo mwali wirhu n’okumushagalukira enyanya z’ebintu byoshi ajira ly’akolera Yehova.”

17. Bici olwandiko lwa Yakobo 2:8 lurhuhûnyire rhujire, na gurhi rhwakabijiramwo?

 ¹⁷ Bici rhwakajira erhi rhwakabona oku rhwatwirire owirhu mwemezi olubanja? Rhushinganine rhukakengera oku rhukwanine rhukazigira bene wirhu. (Osome Yakobo 2:8.) Rhushinganine kandi rhushenge Yehova kurhenga oku murhima, rhumushenge arhurhabale rhuleke okukatwira abandi olubanja. Rhwanakola kushimbana n’amasala girhu omu kugend’iganiza oyo muntu rhuli rhwaderha kubi. Nkaba oko kwanarhuhashisa rhumumanye bwinja. Rhwanamuhûna rhuje naye omu mahubiri erhi rhumulalike lyo rhushangira haguma naye ebiryo. Omu kumanya mwene wirhu bwinja rhwanahikira aha rhwayiga olwiganyo lwa Yehova na Yezu lw’okulola ebinja biri omu murhima gwage. Muli eyo njira, rhwanayerekana oku rhuli rhwayumvirhiza irhegeko lya lungere mwinja liyerekine oku rhurhakazig’itwa oluli omu mwabene.

18. Gurhi rhwakayerekanwo oku rhuli rhwayumvirhiza izu lya lungere mwinja?

¹⁸ Nka kula ebibuzi biyumvirhiza izu lya lungere wabyo, ko n’abanafunzi ba Yezu bayumvirhiza izu lyage. Yehova na Yezu banagisha obushiru bwirhu, erhi rhwakacihangana okuleka okukarhanya okurhalusire olugero enyanya z’amalagirire girhu g’omubiri n’okuleka okutwira abandi olubanja. Rhube rhuli b’omu “buso busungunu” erhi b’omu “ebindi bibuzi,” rhugendekere rhwakenga n’okuyumvirhiza izu lya lungere mwinja. (Lk. 12:32; Yn. 10:11, 14, 16) Omu cigabi cikulikire, rhwayishiganirira bintu bibirhi Yezu abwiraga abanafunzi bage bashinganine bajire.