1. Nanino Jesosy ro nampitovy ty mpianatsiny amy aondry?

 NAMPITOVIZINI-JESOSY amy fifandrambesa misy amy mpiaraky aondry noho ty aondriny ty fifandrambesany amy mpianatsiny reo. (Jaona 10:14) Tena mety soa fampitahà io. Ty aondry mahay ty mpiaraky azy sady mijanjy ty feony. Zay mihintsy ty raha nihitani-lahilahy raiky toy. Hoy ty asany: “Ta ho nangalaky sary aondry vitsivitsy rezay zahay ka nataonay ze hahavy an-drozy hihariniky anay. Fe tsy nimety rozy satria tsy hain-drozy ty feonay. Bakeo niavy mpamaraky niaraky an-drozy iny, le avy le nikaiky an-drozy. Nanaraky azy amy zay rozy.”

2-3. a) Akory ty ampisehoani-mpianatsini-Jesosy hoe mijanjy ty feony rozy? b) Ino ty hodinihintsika amy lahatsoratsy toy ato noho amy lahatsoratsy manaraky ao?

² Mampitiaro antsika ani-raha nivolanini-Jesosy mikasiky ty aondriny, zany hoe mpianatsiny rey ty raha nihitani-lahilahy io. Nivola Jesosy hoe: “Hijanjy ty feoko [rozy].” (Jaona 10:16) Fe Jesosy an-danitsy any. Ka manao akory zany ty ahafahantsika mijanjy azy? Mijanjy ty feoni-Tompontsika io tsika laha manoriky ze raha nampianariny antsika.​—Mat. 7:24, 25.

³ Handiniky ty raha sisany nampianarini-Jesosy tsika amy lahatsoratsy toy noho amy lahatsoratsy manaraky ao. Ho hitantsika fa nampianatsy Jesosy hoe misy raha sisany tsy tokony hataontsika sasy, le misy raha tokony hataontsika. Hohenteantsika tse ty raha roe nivolanini-mpiaraky aondry tena soa iny hoe tsy tokony hataontsika sasy.

4. Laha hentea ty Lioka 12:29, ino ty mety hahavy antsika ‘hiasa loha marè’?

⁴ Vakio Lioka 12:29. Nanoro hevitsy ty mpanori-dia azy Jesosy mba ‘tsy hiasa loha marè sasy’ mikasiky ty raha ilàn-drozy amy fiaina. Haintsika fa mahasoa sady marina avao ty torohevitsini-Jesosy.  Teantsika ty hanoriky azy, fe mety ho sarotsy amintsika ty hanao ani-zay kindraiky. Ino ty antony?

5. Manino ty olo sisany ro lasa miasa loha mikasiky ty raha ilàn-drozy?

 ⁵ Miasa loha, ohatsy, ty olo sisany hoe akory ty hahazoan-drozy hany, siky, noho trano hipetraha. Mety mipetraky amy tany mahantra rozy ka sarotsy ty mahita asa. Mety ho sarotsy amin-drozy amy zay ty mahita drala ampy mba hikarakarà ty fianakaviany. Na mety nimaty ty olo niantoky ani-fianakavia iny, farany tsy manan-drala rozy mba hahazoa ze raha ilàn-drozy. Maro koa ty mety nivery asa vokatsini-arety miparitaky COVID-19 toy. (Mpito. 9:11) Laha mahazo antsika ty raiky amy raha reo na ty raha manahira hafa, akory ty ahafahantsika manaraky ani-torohevitsini-Jesosy iny hoe ka miasa loha sasy?

6. Tantarao hoe ino ty raha niseho tamy apostoly Petera ndraiky andro.

⁶ Nandeha an-tsambo tamy Riakini-Galilia iny apostoly Petera miaraky amy apostoly sasany rey ndraiky zay. Nitsioky marè ty andro tamy zay, le nihitan-drozy Jesosy nandeha tanabo rano eny. Hoy Petera: “Laha iha vatany io Tompo, le volano aho hamonjy anao anabo rano eny.” Le hoy Jesosy: “Avia moa!” Nijotso baka anaty sambo ao amy zay Petera ka “nandeha tanabo rano eo sady namonjy ani-Jesosy.” Henteo moa hoe ino ty raha niseho tafarani-zay. “Natahotsy ie lafa nahita ani-tsioky be iny. Nanomboky nilentiky amy zay ie, farany nikaikaiky hoe: ‘Tompo, vonjeo aho!’ ” Namparini-Jesosy tanany iny ka navotany ie. Soa hotiarovy hoe nahavita nandeha tamy riaky miavotsavotsy iny tse Petera tamy ie mbo nifantoky tamy Jesosy. Fa lafa ie nanenty ani-tsioky be iny, le lasa natahotsy noho  nisalasala ka nanomboky nilentiky.—Mat. 14:24-31.

7. Ino ty ianarantsika baka amy ty raha nahazo ani-Petera?

⁷ Azontsika andrambesa fianara ty raha nahazo ani-Petera. Lafa nijotso baka anaty sambo ao noho nandeha tanabo riaky eny Petera, le tsy nieritseritsy mihintsy hoe hampatahotsy azy tsioky be iny ka hanomboky hilentiky ie. Nainany aza ie ho nandeha teny avao zisiky niaviany tamy Jesosy eny. Fe tsy nahavita nifantoky tamy raha nikendrèny zay ie. Tena nila finoa Petera. Mila mana finoa koa tsika henanizao mba hiatreha raha sarotsy. Laha tsy mifantoky amy Jehovah noho ty raha ampitamaniny tsika, le mety hihamalemy ty finoantsika, ka sahala hoe milentiky anatini-fiasan-dohantsika any tsika. Ndre sarotsy manao akory zany ty raha mahazo antsika, le tokony hifantoky amy Jehovah avao tsika sady hitiaro avao hoe mahay manampy antsika ie. Akory ty hanaovantsika ani-zay?

8. Ino ty hanampy antsika tsy hiasa loha marè mikasiky ty raha ilàntsika?

⁸ Tokony hosoloantsika fatokisa ty fiasan-dohantsika. Tiarovo fa mampitamà Jehovah, azy Babantsika be fitiava iny hoe hanome ze raha ilàntsika ie laha ataontsika voaloha lista ty fanompoa azy. (Mat. 6:32, 33) Nanatanteraky ani-raha nampitamanany zay avao ie. (Deot. 8:4, 15, 16; Sal. 37:25) Laha ty voro noho folera aza karakarani-Jehovah, le tsy tokony hiasa loha mikasiky ty raha hohanintsika na ty siky hisikinantsika tsika! (Mat. 6:26-30; Fil. 4:6, 7) Fitiava ro mandrisiky ty ray aman-dreny hanome ze raha ilàni-anany. Manahaky ani-zay koa Babantsika an-danitsy any iny. Tea antsika mpanompony ie ka zay ro mahavy azy manome ze raha ilàntsika. Afaky matoky zany tsika fa hikarakara antsika avao Jehovah!

9. Ino ty ianaranao baka amy tantarani-mpivaly raiky toy?

⁹ Toy misy tantara mampiseho hoe tena mikarakara ze raha ilàntsika Jehovah. Ndraiky andro mpivaly mpisava lala retoa, nandeha tamy tomabilin-drozy fa ratiraty zay, le nangalaky ranabavy maromaro tamy toby fialokalofa zay tany rozy mba hamonjy fivoria. Nivola rahalahy iny hoe: “Lafa nirava fivoria iny, le nasànay hisakafo taminay any ranabavy rey. Bakeon’iny zahay vo nahatiaro hoe kay tsy misy raha haroso an-drozy zahay an-trano any.” Ino amy zay ty niseho? Hoy rahalahy iny: “Lafa niavy tan-trano any zahay, nahita paniè roe bevata feno hany rezay tam-baravaranay teo. Tsy hainay hoe ia ty nametraky ani-raha rey teo. Tena nikarakara anay Jehovah.” Tafara atoy, nisimba tomabilini-mpivaly rey. Raha iny amin’io nilan-drozy tamy fanompoa, fe rozy tsy nanan-drala hanamboara azy. Nandesin-drozy tamy garazy zay teny raha iny mba hahaiza hoe hotrino ty hanamboara azy. Bakeo nisy lahilahy zay namonjy teo, le nanontany hoe: “Tomabilin’ia tia io?” Nivola rahalahy iny hoe an’azy raha iny fe nila namboary. Hoy lahilahy iny: “Tsy problemo zay. Manahaky ani-toy mihintsy tomabily teani-valiko o, ndre lokony toy aza. Hotrino ty amarotanao azy?” Navilini-rahalahy iny tamy lahilahy iny tomabiliny iny, ka afaky nivily tomabily hafa ie. Hoy ty asany: “Tena nifalifaly biby zahay tamy andro iny. Hainay fa tsy fifanandrifian-draha avao raha iny. Nanampy anay Jehovah.”

10. Mampirisiky antsika tsy hiasa loha mikasiky ty raha ilàntsika ty Salamo 37:5. Manao akory ty anaovany ani-zay?

¹⁰ Laha tsika mijanjy ani-mpiaraky aondry tena soa iny ka tsy miasa loha marè mikasiky ty raha ilàntsika, le afaky matoky tsika hoe hikarakara antsika Jehovah. (Vakio Salamo  37:5; 1 Pet. 5:7) Eritsereto raha sarotsy niresahintsika tamy  fehintsoratsy 5 teny rey. Mety nampiasa ty loham-pianakavia Jehovah zisiky henanizao, na nampiasa ty sefontsika mba hanampea antsika hahazo ze raha ilàntsika sanandro. Laha tsy afaky manao ani-zay ty loham-pianakavia na laha nivery asa tsika, le mbo mahita fomba hafa avao Jehovah. Afaky matoky ani-zay tsika. Ndao amy zay hodinihintsika azy raha faharoe nivolanini-mpiaraky aondry tena soa hoe tsy tokony hataontsika sasy iny.

11. Laha hentea ty Matio 7:1, 2, ino ty raha nivolanini-Jesosy hoe tsy tokony hataontsika sasy, le manino raha zay ro mety ho sarotsy?

¹¹ Vakio Matio 7:1, 2. Haini-Jesosy fa tsy lavorary ty olombelo ka matetiky ro mifantoky amy ty hadisoa ataoni-hafa. Zay ro nahavy azy nivola hoe: “Ka mitsara sasy.” Mety hiezaky mafy tsika mba tsy hitsara ty mpiara-manompo amintsika. Fe mety tsy hahavita ani-zay tsika kindraiky. Laha tsapantsika hoe misy fotoa tsika tea mikinokino, ino ty tokony hataontsika? Janjino Jesosy le miezaha marè mba tsy hitsaratsara sasy.

12-13. Manino ty fandinihantsika ty raha nataoni-Jehovah tamy Davida Mpanjaka ro manampy antsika tsy hitsaratsara ty hafa?

¹² Hanampy antsika ty fametsevetsea ty modelini-Jehovah. Mifantoky amy toetsy soan’olo ie. Ahitantsika ani-zay ty raha nataony lafa nanao fahotà bevata Davida Mpanjaka. Tsy vitani-hoe nijangajanga tamy Batseba Davida, fa mbo nivonoany koa valini-Batseba iny. (2 Sam. 11:2-4, 14, 15, 24) Nijalijaly Davida vokatsini-zay. Fe tsy ie raiky avao fa ty fianakaviany koa, anatini-zay valiny sasany rey. (2 Sam. 12:10, 11) Nisy fotoa koa Davida tsy natoky ani-Jehovah ka nanisaky ani-maramila israelita rey, kanefa tsy nampanao azy ani-zay Jehovah. Ty rengirengy ro mety nahavy ani-Davida nanao ani-zay. Natoky ie hoe afaky hiaro an-drozy maramila reo satria maro biby. Ino ty vokany? Israelita fito aly ro nimatini-arety mandripaky!​—2 Sam. 24:1-4, 10-15.

¹³ Laha nipetraky ta Israely any iha tamy fotoa zay, ho nanao akory ty fahitanao ani-Davida? Ho nanao ho zao va iha hoe tsy tokony hanenga ty hadisoany Jehovah? Tsy zay ty nataoni-Jehovah. Nifantoky tamy ty tsy fivalihani-Davida bakany bakany zay ie. Tena nibebaky koa Davida ka zay ro nihenteany. Farany ie nanenga ty hadisoani-Davida. Haini-Jehovah hoe tena tea azy Davida sady naniry hanao raha soa avao. Falifaly biby tsika fa mifantoky amy ty toetsy soantsika Jehovah.—1 Mpanj. 9:4; 1 Tan. 29:10, 17.

14. Ino ty hanampy ty Kristiana tsy hitsaratsara olo?

¹⁴ Tsy mitamà Jehovah hoe hahavita raha tsy misy handrany tsika. Tsy tokony hitamà koa zany tsika hoe ho lavorary ty olo hafa. Mora matetiky ty mahita ty raha tsy mety ataon’olo hafa noho mikinokino azy. Fe ndre mahita ani-zay ty olo manahaky ani-Jehovah, mbo miaraky miasa amin’olo hafa avao. Tsy de maninto maso tse ty vato lafovily laha mbo tsy vita tefy. Manahaky ani-zay, ohatsy, ty diamondra. Fe ty olo mandini-draha mahay hoe tena soasoa noho lafovily raha io lafa vita tefy. Tokony hanahaky ani-Jehovah noho Jesosy tsika, ka tsy hifantoky amy tsy fahalavorian’olo fa hifantoky amy ty toetsy soany.

15. Manino ty fandiniha ty raha iainan’olo ro hanampy antsika tsy hitsaratsara azy?

¹⁵ Mbo misy raha hafa koa afaky manampy antsika tsy hitsaratsara olo, ankoatsini-hoe mifantoky amy toetsy soany. Ino zay? Miezaha handiniky ty raha mahazo azy. Toy misy ohatsy: Nandeha tamy tempoly tao Jesosy ndraiky zay, le nahita ampela raiky maty valy nandatsaky drala roe tena ambany vily  tanatini-vata famorian-drala ao. Tsy nanao ho zao ie hoe: “Nanino ampela tỳ tsy nanome maromaro o?” Tsy nifantoky tamy zay Jesosy, fa nandiniky ty antony nahavy ani-ampela iny nanome noho ty raha niainany. Bakeo Jesosy nidera azy satria nanao ze fara heriny ie.​—Lioka 21:1-4.

16. Ino ty ianaranao baka amy Veronica?

¹⁶ Ho hitantsika amy tantarani-Veronica toy hoe manino ro tena ilà ty mandiniky ty raha iainan’olo hafa. Misy ampela miteza raiky ty anany zay miharo fiangona aminy. Hoy Veronica: “Atao raha olo mpanapatapaky fivoria zay rozy sady tsy mazoto manompo. Nanjary nana fomba fanenty raty mikasiky an-drozy aho vokatsini-zay. Fe ndraiky andro, nandeha niaraky nitory tamy rahavavy iny aho. Nivola tamiko ie fa tsy tena salama say anakilahiny iny. Fe manao ze fara heriny ie mba hahazoan-drozy ze raha ilàn-drozy amy fiaina noho hahavy an-drozy hifandramby soa amy Jehovah avao. Tratsini-tsy fahasalamani-anakilahiny iny, le matetiky rozy manatriky fivoria amy fiangona hafa.” Hoy Veronica: “Tsy nihaiko mihintsy hoe miatriky raha tena sarotsy ie. Lasa teako noho hajàko rahavavy io henanizao satria manao ze azony atao ie mba hanompoa ani-Jehovah.”

17. Mampirisiky antsika hanao ino ty Jakoba 2:8, le akory ty hanaovantsika ani-zay?

¹⁷ Ino ty tokony hataontsika laha tsapantsika hoe tea mitsaratsara mpiara-manompo  tsika? Mila tiarovintsika hoe tokony ho tea ani-rahalahy noho anabavintsika reo tsika. (Vakio Jakoba 2:8.) Tokony hivavaky amy Jehovah koa tsika, le hisoloho azy mba hanampy antsika tsy hitsaratsara olo sasy. Mila manao raha mifanaraky amy ty vavaky ataontsika koa tsika ka manoka fotoa mba hiaraha amin’olo nikinokinoantsika iny. Hanampy antsika hahay azy soa raha zay. Azontsika atao, ohatsy, ty manasa azy hanompo na hisakafo miaraky amintsika. Laha mahay soa ani-rahalahintsika reo tsika, le afaky hiezaky hanaraky ty modelini-Jehovah noho Jesosy ka hifantoky amy ty toetsy soan-drozy. Asehontsika baka amy zay fa janjinintsika raha nivolanini-mpiaraky aondry tena soa iny hoe ka mitsara sasy.

18. Akory ty ampisehoantsika hoe mijanjy ty feoni-mpiaraky aondry tena soa iny tsika?

¹⁸ Mijanjy ty feoni-mpiaraky azy ty aondry ara-bakiteny. Manahaky ani-zay koa fa mijanjy ty feoni-Jesosy ty mpanori-dia azy. Laha tsika miezaky mafy mba tsy hiasa loha mikasiky ty raha ilàntsika noho tsy hitsaratsara olo sasy, le hitahy antsika Jehovah noho Jesosy. Ka ndre anisani-“aondry vitsy” tsika, ndre “aondry hafa”, loniky lahy tsika mba hanohy hijanjy ty feoni-mpiaraky aondry tena soa iny avao sady hanoriky ze raha volaniny. (Lioka 12:32; Jaona 10:11, 14, 16) Handiniky raha roe nivolanini-Jesosy hoe tokony hataoni-mpanori-dia azy tsika amy lahatsoratsy manaraky.