1. Elonga kɛmɔtshi kɛkɔnge Yeso ndɛdjɛ ambeki wande l’ɛnkɔkɔ?

YESO ɛdjɛka djokanelo djɛnde nya ambeki wande la djokanelo djɛ ma ma djelekɔ l’onami w’ɛnkɔkɔ l’ɛnkɔkɔ wɛnde. (Dj. 10:14) Wɛdjɛlɔ wɔsɔ wɛlama. Ɛnkɔkɔ ndjewaka onami wɔwɔ la nanghaka kɛnɛ k’ashimelande. Ɔnkɛndji ɔmɔtshi wɔ nkɛndɔ ɛnaka nsɔsɔlɔ kɛ nkambo djɛsɔ. Nde akɔndɔla ante: “Tɔkɔpaka mfilimɛ ɛnkɔkɔ ɛmɔtshi ko tɔsɛsaka djɛ ndaweta nsuke laso. Koko watatokilika ladjikɛnde wapewe wayi waso. Masɔ, wɔna mpame ɔmɔtshi ayɛka, ko ngo mbala kɛkɔ kɛmɔ kɛ ndaawete iwɔ wokilikaka.”

2-3. a) Wopo wɔkɔnge ambeki wa Yeso iyɔnghɛnyɛ ambɔ iwɔ ndjekameyɛka djoyi djɛnde? b) Kɛkɔnge k’ɛnaso lɔ lá djamba djɛnɛ edjinge lá djamba djeyaye?

² Nkambo djɛnisa onanghi wɔ nkɛndɔ wɔsɔ ntovungulaka etepela wɛ Yeso wɛ ndatepela lá nkambo dj’ɛnkɔkɔ wɛnde ntepela ente ambeki wande. Nde atepelaka ante: ‘Iwɔ wangekameyɛ djoyi djɛmi.’ (Dj. 10:16) Koko Yeso alekɔ l’olongo. Wopo wɔkɔnge w’okokaso nyɛnyɛ ente towekameyɛ? Yopo ngo imɔ yɛnyɛso ente iso ndjekameyɛka djoyi dj’Owandji wɔso nde, má nkamba l’elekanyelo wɛnde lá mbiko yɛso.—Mat. 7:24, 25.

³ Lá djamba djɛnɛ la djɛwɔlama, tongoshishima elakanyelo ɛmɔtshi wɛ Yeso. Etengo isɔngɛna, Yeso atolakanyɛka ante iso ladjɛ ntshika nangha akambo amɔtshi la iso ladjɛ nangha akambo ankina. Tongowanga nshishima akambo ape wa onami w’ɛnkɔkɔ wɔ wɔlɔ ndatolakanyɛ dj’ipa iso nangha.

4. Lá nkilika Luka 12:29 akambo wakɔnge wakoka ntoyakala ‘okiyano’?

⁴ Wala Luka 12:29. Yeso ashimelaka ambeki wande dj’iwɔ ‘ntshika ndakiyanyɛ’ lá nkambo dj’ehomba wɛwɔ welá demba. Iso ndjewaka ente alako wa Yeso ndjalaka winá onkfumɔ ngo wa balo la wa wɔlɔ. Iso nkɔpaka nkamba l’alako wasɔ, koko lá winá ɛmɔtshi iso ndjalaka l’okakasano wɔ nangha nkambo djɛsɔ. Lamo?

5. Lamo anto amɔtshi okokawɔ ndakiyanyɛ lá nkambo dj’ehomba wɛwɔ welá demba?

 ⁵ Anto amɔtshi nkoka ndakiyanyɛ lá nkambo dj’ehomba wɛwɔ welá demba, ntepela ente wopo wɔ mba kɛ ndɛ, kɛ ndɔta la mvulu kɛ ndjetama. Nkoka ndjala wawika l’ewila w’ɛnvɔ edjinge alekɔ okakasano djɛ mba olemo. Nkoka ndjala okakasano lewɔ djɛ mba lofalanga lɔ nseeyɛ ehomba w’ase nkfumbo yɛwɔ. Kana mbala imɔtshi kanga lolesɛ nkfumbo nkoka mvɔ, ko ntshika ase nkfumbo ankina ipa l’okotshɔ. Lonkina opela wɔ COVID-19 wɔnɛ wokokaka ntshutsheyɛ anto efula elemo wɛwɔ la nkete nkina dj’onanghawɔ djɛ mba wopo wɔ mbika. (Los. 9:11) Ntsha topomanaka lá nkambo mɔtshi djɛ nghɔsɔ kana l’ekakasano enkina, wopo wɔkɔnge w’okokaso nkilika dako djɛ Yeso djɛ ntshika ndakiyanyɛ?

6. Kɔkɔndɔla kɛnɛ kekomelisa ɔpɔstɔlɔ Pɛtɛlɔ lá mbamba kɛmɔtshi.

⁶ Lá mbamba kɛmɔtshi, ɔpɔstɔlɔ Pɛtɛlɔ nya apɔstɔlɔ ankina wayalaka lá wato lá ndjale kɛ Ngalileya winá wɔ lompopo, ko wɛnaka Yeso ayakɛndɛ lá djiko djɛ washi. Pɛtɛlɔ atepelaka ante: ‘Nkfumi, ntsha wɛ ndeke loyaye, onshimele djɛ lemi ndjɛ lewɛ lá djiko djɛ washi.’ Masɔ Yeso owetaka ante ‘yɛka,’ Pɛtɛlɔ aposaka má wato ko ‘akɛndaka lá djiko djɛ washi ko atshɔka te Yeso.’ Kolenda kɛnɛ keposisa m’ɔkɔngɔ. ‘Winá wɔ ndalende lompopo lɔ wolo lopopaki, nde okaka wɔma. Ko winá wɔ  ndatateyɛ ndjinda, nde awelaka la djoyi djɛ wolo ante: ‘Nkfumi, ombikɛ!’’ Yeso ɔlɔpaka lɔwɔ ko owikɛka. Alekɔ djonyi, dj’iso mvungɔ ente Pɛtɛlɔ ayalaka l’akoka wa nkɛnda lá washi l’ilá kenkfumɔ kɛ ndapike wiso te Yeso. Koko, winá wɔ Pɛtɛlɔ ndoolendaka lompopo, nde okaka wɔma, ilaka ehamo ko atateyɛka ndjinda.—Mat. 14:24-31.

7. Olakanyelo wɔkɔnge w’owaso má ndjɔmbɔmba kɛ Pɛtɛlɔ?

⁷ Iso nkoka mba olakanyelo má ndjɔmbɔmba k’ɔpɔstɔlɔ Pɛtɛlɔ. Winá wɔ Pɛtɛlɔ ndotaposaka má wato tá ndjale, nde atakanelaki ante angoka lompopo wɔma ko ndjinda. Nde akombolaka nkɛnda djɛ washi tii nkoma te Owandji wɔnde. Koko l’edjena kɛ nde nkindjɛ ndenda Yeso nde okaka lompopo wɔma. Lɔɔko kɛnɛ, tolekɔ la djonyi djɛ djawo djɛ nkfulumeyɛ ekakasano ngo ngete Pɛtɛlɔ ndayale la djonyi djɛ djawo djɛ nkindjɛ nkɛnda lá djiko djɛ washi. Ntsha topapikisa wiso waso te Yehova la t’alaka wande, tongowanga ndjinda lá nyuma. Ayale ehemba wɛ nkekete wɛkɔnge w’opomanaso lá mbiko yɛso, iso ladjɛ ndjila yimba yɛso ngo le Yehova la l’akoka wokotshɛnde wa ntokotshɛ. Okokaso nangha nkambo djɛsɔ ngete mo?

8. Kɛkɔnge kekoka ntokotshɛ dj’ipa ndakiyanyɛ efula lá nkambo dj’ehomba wɛso welá demba?

⁸ L’edjena k’iso ndakiyanyɛ lá nkambo dj’ekakasano wɛso, angoyala djonyi dj’iso ndawɛkɛ te Yehova. Tovungɔ ente Papa kɛso kɛ ngandji, Yehova, alakaka ante angotoseeyɛ ehomba wɛso welá demba ntsha tombohetshɛ ehomba welá nyuma l’edjena kɛ ntondo. (Mat. 6:32, 33) Nde angokotshɛke daka djɛsɔ winá enkfumɔ. (Mvu. 8:4, 15, 16; Yee. 37:25) Ntsha Yehova nkotsheyɛka tofulu l’ansoso ehomba wɛwɔ, mbɔ topalekɔ la djonyi djɛ ndakiyanyɛ lá nkambo djɛ kɛnɛ kɛ sɔngɔlɛ la sɔngɔlɔta! (Mat. 6:26-30; Flp. 4:6, 7) Ngo ngete ngandji otshindakande ambotshi djɛ nseeyɛ waana wawɔ ehomba welá demba, ngandji ntshindaka Papa kɛso kel’olongo djɛ nseeyɛ enkambi wɛnde ehomba wɛwɔ welá demba. Ee, toyashikikɛ ente Yehova angotila yimba!

9. Olakanyelo wɔkɔnge w’okokɛ mba má kɛnɛ kekomelisa wadji la wome ɔmɔtshi?

⁹ Tokolenda ndjɔmbɔmba kɛmɔtshi k’ɛnyɛ wopo wɔ Yehova otoseeyɛnde ehomba wɛso welá demba. Wadji la wome ɔmɔtshi wangotshɔke l’otuka wɔwɔ w’obusu l’ilá kɛ winá wɔ ntango djɛ ntɔsa ankaana imɔtshi yintasɛ l’edjena kolamawɔ wanɛ wambolota olotshi, ko ndayakala lá losanghanyɛ l’Akristo. Wɔnanyɔ asipisoyɛ ante: “M’ɔkɔngɔ wɔ losanghanyɛ, tetaka ankaana yɛkɔ djɛ ntɔlɛ lawɔ, ko masɔ toyɛka ndosipisoyɛ ente totayala la nkete djɛ ndɛ djɛ ndaapɛyɛ.” Kɛkɔnge kɛ wadji la wome wɔsɔ yananghe? Wɔnanyɔ akindjɛ ntepela ante: “Winá w’isakome lá mbandja, totanaka kartɔ ipe yɛ nkekete lá wiso wɔ mvulu kɛso, ko nkete djɛndɛ l’eteyi kfuu. Totewa kanga loyisa ndototshikela nkete djɛsɔ. Yehova atoseeyɛka ehomba wɛso.” Mbala kenkina, otuka wɔ wadji la wome wɔsɔ wotshitanaka. Otuka wɔsɔ wakotshɛki djɛ ntopoposanyɛ, koko iwɔ watayala la mfalanga yɛ ndɔngɔsɔla. Winá wɔ yatɔlɛ otuka wɔsɔ entshupa l’edjena k’ɔlɔngɔsɔlawɔ etuka, djɛ ntewa oshinga w’okokawɔ ndapika djɛ ndɔngɔsɔla, mpame kɛmɔtshi ayɛka ko awopolaka ante: “Kanga otuka wɔnɛ na?” Wɔnanyɔ atepelaka ante otuka wɔmi, koko wɔlɔmbama ndɔngɔsɔla. Mpame kɛsɔ okadjimolaka ante: “Lako nkambo laasɔ. Wadjɛmi angɔkɔpake yopo y’otuka yɛnɛ edjinge ngo kulɛrɛ k’oyɛwɔ kɛnɛ. Mfalanga imangha ɔkɔpɛ nkɔpɛyɛ?” Wɔnanyɔ asadjɛka otuka wɔsɔ le mpame kɛsɔ k’ɔpɛyisa mfalanga yɛnde nsomba otuka wɔ bango. Nde ntepelaka ante: “Topewe osasa wɔ soke l’ekomo kɛ lofu lɔsɔ. Tewaka ente ɔsɔ atayala ngo nkambo djɛ mpomana toko. Koko yayalende lɔwɔ lɔ Yehova.”

10. Wopo wɔkɔnge Yeembo 37:5 otokembɛnde dj’ipa iso ndakiyanyɛ lá nkambo dj’ehomba wɛso welá demba?

 ¹⁰ Winá w’ekameyɛso onami w’ɛnkɔkɔ wɔ wɔlɔ la otshikaso ndakiyanyɛ efula lá nkambo dj’ehomba wɛso welá demba, tongoyala l’eshikikelo ente Yehova angotoseeyɛ ehomba wɛso. (Wala Yeembo 37:5; 1 Pɛ. 5:7) Tokokanela lá nkambo dj’ekakasano ɛmɔtshi wɛ yowalaki  l’itenyi 5. Tii winá wɔsɔ, Yehova nkoka nkamba l’ewandji wɛ nkfumbo kana l’ewandji w’elemo djɛ ntokotshɛ djɛ nseeyɛ ehomba wɛso wɛ lofu la lofu. Ntsha owandji wɔ nkfumbo apalekɔ l’akoka wa nangha nkambo djɛsɔ kana tombotshutshɛ elemo wɛso, Yehova angotokotshɛ lá yopo inkina. Toyale l’eshikikelo ente nde angotoseeyɛ ehomba wɛso. Winá wɔsɔ nyontshɔ tolendake nkambo djɛ onami w’ɛnkɔkɔ wɔ wɔlɔ ndotokembɛ dj’ipa iso nanghaka.

11. Lá nkilika Mateo 7:1, 2, kɛkɔnge kɛ Yeso ndotoshimela djɛ nanghaka, ko lamo nkambo djɛsɔ okokawɔ ndjala okakasano leso?

¹¹ Wala Mateo 7:1, 2. Yeso ewaki ante anto walekɔ ase ntshamba djɛ djɔ la mbala efula wangopikake wiso ngo l’evunga w’anto ankina. Djɛkondeke ndatepela ante: ‘Nyotshike ndomboyɛ.’ Iso nkoka nangha la wolo dj’ipa ndomboyɛ winaso andjawodji. Koko, ladjikɛnde tolekɔ anto wa ntshamba djɛ djɔ, topalongaka winá enkfumɔ. Ya ntsha tombisola ente lá winá ɛmɔtshi tongokanelake winaso nyɛtshi, kɛkɔnge k’oyɛso ladjɛ nangha? Tekameyɛ Yeso, la tonanghe la wolo djɛ ntshika ndomboyɛ.

12-13. Wopo wɔkɔnge ntɔnɔla lá wopo wɔ Yehova ndananghela Nkfumi Davidɛ akambo okokawɔ ntokotshɛ dj’ipa ndomboyɛ anto ankina?

¹² Alekɔ wɔlɔ iso ntɔnɔlaka lá ndjɔmbɔmba kɛ Yehova. Nde angopikake wiso ngo l’akambo wa wɔlɔ wanangha enkambi wɛnde. Iso nyɛnaka nsɔsɔlɔ kɛ nkambo djɛsɔ má wopo wɔ ndananghela Nkfumi Davidɛ, mpame kenanghisa evunga wɛ nkekete. Ndjɔmbɔmba, nde ananghaka loseka nya Batɛ-Sheba, ko ayakaka ngole womɛnde. (2 Sa. 11:2-4, 14, 15, 24) Eposelo wɛ nyɛtshi wemá ovunga wɔ Davidɛ, wetakoma ngo lende toko koko wekomaka tii le nkfumbo kɛnde ndjila edjinge le wadji wande ankina. (2 Sa. 12:10, 11) Lá mbamba kenkina, Davidɛ atayawɛkɛ te Yehova lá wopo wɔ ndapɛyɛ lotshungɔ dj’iwɔ mbala lofulo l’angala w’ase Isariyɛlɛ. Mbala imɔtshi otako ndeke lotshindisa djɛ nangha nkambo djɛsɔ la nde ayawɛkɛka lá lofulo l’angala wande. Eposelo wɛkɔnge weyalisa lá nkambo djɛsɔ? Ase Isariyɛlɛ 70 000 wavɔka l’opela!—2 Sa. 24:1-4, 10-15.

¹³ Ntsha otayalɛnde l’Isariyɛlɛ l’etsho wɛsɔ, wopo wɔkɔnge w’otakokɛ ndɔsa Davidɛ? Otatepelɛnde ente nde apɛlama ndjokama nkɛtshi me Yehova? Yehova atakanela nghɔsɔ. Nde ilaka yimba lá wopo wɔ Davidɛ ndayale la nkɔmano l’ilá kɛ lowiko lɔnde la lá wopo wɔ ndayale la ndapɛla kɛ nsɔsɔlɔ. Eposelo weyalisa la nkambo djɛsɔ nde, Yehova imeyɛka Davidɛ m’evunga wɛnde wɛ nkekete. Yehova ewaki ante Davidɛ ndɔɔkɔpaka efula la ákombolaki nangha ngo kɛnɛ kelekɔ wɔlɔ. Opalekɔ l’osasa lá wopo wɔ Ndjambe kɛso ilakande wiso ngo lá wekeka la nanghedji djɛso djɛ wɔlɔ?—1 Nk. 9:4; 1 Ɛk. 29:10, 17.

14. Kɛkɔnge kekoka nkotshɛ Akristo dj’iwɔ ntshika ndomboyɛ anto ankina?

¹⁴ Ladjikɛnde Yehova apahone dj’iso ndjala djɔ, edjinge iso totahonake djɛ anto ankina ndjala djɔ, koko topikake wisonde lá nanghedji djɛwɔ djɛ wɔlɔ. Mbala efula angoyalake wɔdju djɛ mpika wiso ngo l’akambo wa ntshamba djɛ djɔ w’anto ankina la nkanelana nyɛtshi. Koko, onto wolekɔ la lonyuma lɔ wɔlɔ ndjalaka la djokanelo djɛ wɔlɔ l’anto ankina kaanga ɛnande nanghedji djɛwɔ djɛ ntshamba djɛ djɔ. Diama djɛ bango djetasolama lá mashinyi nyɛnamaka etengo mpalekɔ wɔlɔ, koko onto wolekɔ la balo  angewa ante djengoyala wɔlɔ edjinge la ntshina efula m’ɔkɔngɔ w’iwɔ ndosola lá mashinyi. Ngo ngete Yehova nya Yeso, totapikake wiso ngo l’evunga wɛ winaso anto koko tilende yimba lá nanghedji djɛwɔ djɛ wɔlɔ.

15. Wopo wɔkɔnge ndjewa ekakasano wepomana l’anto okokawɔ ntokotshɛ dj’ipa ndakanela nyɛtshi?

¹⁵ Má djiko djɛ ndjila yimba lá wekeka wa wɔlɔ w’anto ankina, kɛkɔnge kekoka ntokotshɛ lonkina dj’ipa ndakanela nyɛtshi? Tohone djɛ ndjewa mbiko yɛwɔ. Tokolenda ndjɔmbɔmba kɛnɛ. Lofu lɔmɔtshi lá tɛmpɛlɔ, Yeso ɛnaka wadj’odjo w’ɔmvɔ ila akfuta ape wapalekɔ la ntshó efula l’insesete y’epapɛyɛ. Nde lako ndjopola ante: ‘Lamo ndopilisa akfuta efula?’ L’edjena kɛ nde ndjila yimba lá lofulo l’akfuta wa wadj’odjo wɔsɔ ndapɛyɛ, Yeso ilaka yimba lá kɛnɛ k’otshindisá edjinge lá ekakasano weyalisa lande, ko nde owandolaka má wopo wɔ ndananghe kenkfumɔ kɛ ndayale l’akoka wa nangha.—Luka 21:1-4.

16. Olakanyelo wɔkɔnge w’okokɛ mba má kɛnɛ kekomelisa Veronica?

¹⁶ Kɛnɛ kekomelisa nkaana kɛmɔtshi k’etawɔ Veronica ntɛnyɛka lamo oyɛwɔ djonyi nshishima kɛnɛ kepomana l’anto amɔtshi lá mbiko. L’otshumano wɔ ndayalaka ndeke loyalaki nkaana kɛmɔtshi k’epolo nya wɔnande wɔ mpame. Veronica awola ante: “L’ɛnaki etengo nde nya wɔnande watayɛki lá nsanghanyɛ la watapoposanyɛki mbala la mbala. Lákanelaki nyɛtshi m’ɔtɛ wɔ nkambo djɛsɔ. Koko m’ɔkɔngɔ wɔ lasɔ, lofu lɔmɔtshi topoposanyɛka isa nkaana kɛkɔ. Nde anshimelaka ante wɔnande wɔ  mpame apalekɔ la yimba yɛ wɔlɔ. Ko ngo nde nyɔmɛlɛ ndeke lonanghaka la wolo djɛ nseeyɛ ehomba wɛwɔ welá demba la welá nyuma. Lá mbamba imɔtshi, m’olando wɔ wɔnande, angɛnake djonyi ndjingela l’otshumano wolekɔ entshupa.” Veronica atepela ante: “Ntakanelaki kaanga ndambo daambi ente ekakasano wɛ nghɔsɔ ndeke lopomana lande. Winá wɔsɔ lambotateyɛ nkɔpa la nɛmɛyɛ nkaana kɛsɔ efula lá welo w’onanghande wɛ nkambela Yehova.”

17. Kɛkɔnge kɛ Djakɔbɔ 2:8 otolakanyɛnde djɛ nangha, ko okokaso nangha nkambo djɛsɔ ngete mo?

¹⁷ Kɛkɔnge k’oyɛso ladjɛ nangha ntsha tombisola ente tombolomboyɛ winaso ndjawodji? Tovungɔ ente iso ladjɛ nkɔpa wananyɔ waso. (Wala Djakɔbɔ 2:8.) Iso ladjɛ ndɔmba Yehova lonkina l’oloko ɔmɔ, la ndɔwɔnda djɛ nde ntokotshɛ dj’iso ntshika ndomboyɛ. Iso nkoka mbika lá yopo y’okana la ndɔmbɔ yɛso má ndɔsa nonghanyi kɛ nsawolaka l’onto wokanelaso nyɛtshi. Kɛsɔ kengotokotshɛ djɛ ndowewa wɔlɔ. Iso nkoka ndɔlɔmba djɛ mposa lande t’olemo w’ipoposanyɛ kana ndosanga lande lɔwɔ lákaso. Winá w’ohonaso djɛ ndjewa wananyɔ waso wɔlɔ, iso nkoka nkilika ndjɔmbɔmba kɛ Yehova la Yeso má mponaka wekeka wa wɔlɔ wisama lewɔ. Má nangha nghɔsɔ, tɔngɛnyɛ ente iso nɛmɛyɛka dako dj’onami w’ɛnkɔkɔ wɔ wɔlɔ djɛ ntshika ndomboyɛ.

18. Wopo wɔkɔnge w’okokaso nyɛnyɛ ente iso ndjokaka djoyi dj’onami w’ɛnkɔkɔ wɔ wɔlɔ?

¹⁸ Ngo ngete ɛnkɔkɔ wɛ nsɔsɔlɔ ekameyɛkawɔ djoyi dj’onami wɔwɔ, ambeki wa Yeso ndjekameyɛka djoyi djɛnde. Ntsha iso ndjila welo dj’ipa ndakiyanyɛ lá nkambo dj’ehomba wɛso welá demba la dj’ipa ndomboyɛ anto ankina, Yehova nya Yeso wangɔtshɔkɔla welo w’ilaso. Kaanga ntsha tɔsa opiko ‘l’iloyi yɛ daambi y’ɛnkɔkɔ’ kana ‘l’ɛnkɔkɔ enkina,’ nyontshɔ tonkindjɛ ndjekameyɛ la nɛmɛyɛ djoyi dj’onami w’ɛnkɔkɔ wɔ wɔlɔ. (Luka 12:32; Dj. 10:11, 14, 16) Lá djamba djeyaye, tɔngɛna akambo ape wa Yeso ndashimela ambeki wande dj’iwɔ nanghanaka.