1. Nkabingilo kinyi kamune kabadi katakule Yesu bua kupuandikisha balongi baye na mikooko?

YESU badi mupuandikishe kipuano ki pankatshi pa balongi baye na kipuano akikala pankatshi pa mulami a mikooko na mikooko yaye. (Yo. 10:14) Ki no kipuandikisho nkilombane. Mikooko ayiuku mulami ayo na ayitemesha eyi diaye. Mungi muntu muina nyendo tadi mumone uno muanda. Atentekiesha’shi: “Nadi akiebe ku filme kingi kisaka kia mikooko, natompele kuiyikaka bua’shi ifikie pepi. Anka tanyitulonde nya muanda tayibadi ayiuku mayi etu nya. Anka pabafikile kangi kasongualume kabadi mulami ayo; eyitamina ibamulondele nka paapa yoso.”

2-3. (a) Balongi ba Yesu bekulesha naminyi’shi bakuete abatemesha eyi diaye? (b) Nkinyi kiatukesambila mu muisambo aulondo?

² Muanda ubakuile uno muntu muina nyendo awitutentekiesha mayi a Yesu abakuile pabitale mikooko yaye​—kuamba’shi balondi baye. Bambile’shi: “Ayikateemesha eyi diande.” (Yo. 10:16, Kilombeeno Kipya 2014) Anka Yesu e muiyilu. Tui kuamba naminyi’shi atumutemesha? Mushindo wi buwa watudi balombene kulesha’shi tukuete kutemesha eyi dia Mfumu etu, mpa kutumikila malongiesha aye mu nshalelo etu.​—Mat. 7:24, 25.

³ Mu uno muisambo na aulondo, atukataluula amo akumalongiesha a Yesu. Anka bu biatukebimono, Yesu etulungula mianda yatudi balombene kukita na yatushi balombene kukita. Kia kumpala, atukamono mianda ibidi ina muulo ukata yabetupelasha kui mulami etu’shi tulekie kuiyikita.

4. Muyile Luuka 12:29, nkinyi kilombene kuitutuma bua’shi “tuikalakashe”?

⁴ Badika Luuka 12:29. Yesu balunguile balongi baye’shi “tanwikalakashanga” pabitale bintu bia ku mbidi. Atuuku’shi misusa yoso elango diaye adikala nka dibuwa na dilulame. Atukumiina kuiditumikila, anka ingi nsaa atumona bu bi bukopo kuibikita. Buakinyi biabia?

5. Buakinyi bangi mbalombene kuikalakasha bua nkalo yabo ya bintu bia ku mbidi?

  ⁵ Bangi mbalombene kuikalakasha pabitale nkalo ya bintu bia ku mbidi​—bu bidibua, bilamba, na mbalo ya kulaala. Bangi bekuikala bashale muiumbo mui bantu bebungi balanda na mushi mushindo wa kupeta mudimo. Bi kuibakalakasha buabadia kupeta makuta akupua nkalo ya bifuko biabo. Pangi winyi muntu ayikalanga na makuta a kupua nkalo ya mu kifuko kiabo tafuile, kifuko kiashala kushi muntu akuibakuatshishena. Bebungi mbashimishe mudimo wabo na makuta abo pa muanda wa kipupa kia Corona-virus. (Mul. 9:11) Su tuibafumankane na lumune lua ku ino nkalakashi, sunga ingi, mushindo kinyi watudi balombene kulonda elango, dia Yesu dia kuleka kuikalakasha?

6. Patuula kibadi kifikile Mpyele mutumibua ungi mususa.

⁶ Ungi mususa Mpyele mutumibua, na bangi balongi babadi mu buato mu kalunga ka Galileya pa belele kipapi ki bukopo, nsaa ibabamuene Yesu atambuka kunundu a mema. Mpyele bakuile’shi: “Mfumu, su n’obe, ntumine eyi nfikye kodi natambuka panundu pa meema.” Kunyima Yesu bamuambile’shi ‘fika,’ Mpyele pabatukile mu buato “batambukile panundu pa meema bwa kwenda kwi Yesu.” Tutale muanda ubakitshikile kunyima kua paapa. “Pabamwene’shi lupunga lwi bukopo, bapushiishe moo. Na babangile kuiyina, belele musase’shi: ‘Mfumu, mpaashe!’” Yesu badi mole mboko yaye na kumupasha. Mpyele badi na mushindo wa kutambuka pa mema su badia kuikala mutule binangu biaye nka penda kui Yesu. Anka Mpyele pa batadile bi kipapi bukoko babangile kupusha moo na mpaka, nyi aye kubanga kuiyina.​—Mat. 14:24-31, Kilombeeno Kipya 2014.

7. Nkinyi kiatudi balombene kulongiela ku kileshesho kia Mpyele?

⁷ Tui kulongiela ku kileshesho kia Mpyele. Mpyele pabatukile mu buato ela etabula abanga  kutambuka kunundu kua mema, tabadi apuandikasha’shi kui kintu kilombene kumukatusha binangu kui Yesu na kubanga kuiyina nya. Badi mulombene kushaala kunundu a mema mpa na pabadia nkafika kui Mfumu aye. Anka bayidilue akatusha binangu ku kepatshila kaye kakankafika kui Yesu. Atue namu lelo uno, tuina lukalo na lukumino buatudia kunyingila nkalakashi, nka bibadi Mpyele na lukalo na lukumino bua’shi atambukie panundu pa mema. Su tuakutua kutuula lukulupilo luetu mui Yehowa na mu milayilo yaye, lukumino luetu lui kubanga kubofula na tui kubanga kubofula mu kikudi. Sunga mu nshalelo etu tuapeta nkalakashi i naminyi tui balombene kutuula binangu bietu bioso nka kui Yehowa na ku bukome buaye bua kuitukuasha. Tui kukita bino naminyi?

8. Nkinyi kilombene kuitukuasha buatudia kuleka kuikalakasha bikilekile pabitale nkalo yetu ya bintu bia ku mbidi?

⁸ Pamutue pa kuikalakasha pabitale mianda yetu. Abitungu tukulupile mui Yehowa, tutentekieshe’shi Nshetu sha kifulo Yehowa etushinkamisha’shi aketupasukila ku nkalo yetu ya bintu bia ku mbidi su tuatula mianda ya mu kikudi pa mbalo ya kumpala. (Mat. 6:32, 33) Aye alombasha nka milayilo yaye. (Miy. 8:4, 15, 16; Mis. 37:25) Su Yehowa adishaa tonyi na bilongo, tatui balombene kuikalakasha pabitale kia kudia na kia kufuala nya! (Mat. 6:26-30; Fid. 4:6, 7) Nka bu nshe bana shaa kalolo apasukila nkalo ya ku mbidi ya bana baye, kifulo akitakula Nshetu e muiyilu buadia kupasukila nkalo ya ku mbidi ya muilo waye. Mu binyibinyi tui balombene kushinkamisha’shi Yehowa aketukitshina biabia bibashala!

9. Nkinyi kibatulongiela ku uno muanda wa uno mulume na mukashi?

⁹ Tutale muanda wabadi bamone aulesha mushindo ulombene Yehowa kupasukila nkalo yetu ya bintu bia ku mbidi. Ungi mulume na mukashi babadi mu mudimo wa nsaa yoso babadi abende na motoka wabo, ubapu kukula kintu kia nsaa mushima mu kukimba ungi mukuetu mukashi badi mushale mu mbalo ayishalaa bantu bafilukie bua kumutuala ku bisangilo. Mukuetu mulume apatula’shi: “Kunyima kua bisangilo atuitanyina bakuetu bakashi ku nshibo bua kudia nabo kidibua, anka atusangana’shi ta tuina kidibua su kimune kiatudi balombene kuibapa.” Uno mulume na mukashi babadi balombene kukita kinyi? Mukuetu mulume atungunuka na kuakula’shi: “Pabatufikile ku nshibo tubasangene tumifuko tubidi tua bidibua ntutule pakibelo kietu. Tatubadi baukie badi muibilekie paapa nya. Yehowa badi muitupasukile.” Kunyima kua mafuku apela mutoka wa uno mulume na mukashi ubaluikile. Babadi nao lukalo bua kulungula mukandu wibuwa, anka tababadi na makuta akuiulumbuluisha nya. Anka pababafikile mbalo ya balumbuula motoka, yawa alumbuula babangile kuiutaluula, ungi muntu bafikile ayipusha’shi: “Auno motoka ngua nanyi?” Mukuetu bakuile’shi motoka nguaye, amba dingi’shi atukiebe kuiulumbulusha. Yawa muntu bakuile dimo’shi: “Biabia biondungula tabina muulo. Mukashi ande ena lukalo na motoka wi bino na akumina wina elangi nka di bino. Wewele muulo kinyi?” Mukuetu baudishe motoka waye kui yawa muntu na, aye kuula ungi motoka. Mukuetu afudisha’shi: “Ntanguku bia kupatuula bukata bua muloo ubatudi bapushe diadia efuku dioso dishima. Tubadi baukie’shi uno ta muanda ubakitshika mu kimpulunkamba nya. Nyi mboko ya Yehowa.”

10. Misambo 37:5, etunyingisha bua kuleka kuikalakasha pabitale nkalo yetu ya bintu bia ku mbidi mushindo kinyi?

¹⁰ Su tuatemesha mulami etu e buwa, na kuleka kuikalakasha bikilekile pabitale nkalo yetu ya bintu bia ku mbidi, tui balombene kushinkamisha’shi Yehowa aketupa bintu biatudi nabio lukalo. (Badika Misambo 37:5; 1 Mp. 5:7) Tubande  kunangushena pabitale lukalakashi luabadi batemune mu  kikoso kia 5. Mpa na binobino Yehowa mulombene kufubisha mfumu a kifuko sunga mukata a mudimo kampanda buadia kupua nkalo yetu ya kuifuku dioso. Su mfumu a kifuko te na mushindo wa kulombasha nkalo yetu, sunga’shi tui bashimishe mudimo, Yehowa aketupasukila mu ungi mushindo. Aketupa kioso kiatudi nakio lukalo. Bua binobino tutaleyi muanda wabetupelesha kui mulami etu ebuwa, watusha kukita.

11. Muyile Mateo 7:1, 2, etulungula buatudia kuleka kukita kinyi, na buakinyi bi kuituelela bukopo?

¹¹ Badika Mateo 7:1, 2. Yesu badi muukie’shi bantu mbakutue kupuidika, na bena muikelo wa kuakulanga bangi mianda ibubi. Nyi buakinyi bakuile’shi: “Totshibilanga bangi kiimu.” Tui balombene kuikitshisha bua kuleka kutshibila bakuetu bena Kidishitu kiimu. Muanda, atue boso tui bakutue kupuidika. Kadi su ingi nsaa tuasangana’shi tuina muikelo wakuakulanga bangi bi bubi, tui balombene kukita kinyi? Temesha Yesu, na wekitshishe bua kuleka kutshibila bangi kiimu.

12-13. Kunangushena ku mueneno a Yehowa pabitale Mfumu Davide nkulombene kuitukuasha bua kuleka kutshibila bangi kiimu mushindo kinyi?

¹² Tui balombene kukuashibua patunangushena ku kileshesho kia Yehowa. Atala nka penda nyikashi i buwa i mui bantu. Atuuku bino pabibadi bikite Yehowa nsaa ibadi Mfumu Davide mukite muluisho ukata. Bu kileshesho, badi mutambukie masandi na Betesabee, na aye kuipayisha mpa na mulume aye. (2 Sam. 11:2-4, 14, 15, 24) Bu kipeta, mfumu Davide tabadi muiluishishe anka penda aye nabene nya nka badi muluishishe kifuko kiaye, mpa na bangi bakashi baye. (2 Sam. 12:10, 11) Ungi mususa, Davide bakutshilue kukulupila mui Yehowa, nsaa ibadi abadika basalayi ba bena Isaleele. Aku namu muiya taubadi awakula biabia, Davide badi mukite uno muanda badi na kuitatula na badi mukulupile mu kisaka kikata kia basalayi kibadi nakio’shi akimukaluila. Nkipeta kinyi kibatukile? Bangi basalayi 70 000 bena Isaleele babafuile ku kipupa kibadi Yehowa mufuishe!​—2 Sam. 24:1-4, 10-15.

¹³ Su bodia kuikala mushale mu Isaleele mu aa mafuku, mueneno kinyi obodia kuikala naye pabitale Davide? Bodia kunangushena’shi Yehowa ta mulombene kufuila Davide lusa su? Yehowa ta mukite bino nya. Yehowa badi atala penda lulamato lua Davide na kuilanga kuaye kua kuishimba kua binyibinyi. Bu kipeta, Yehowa badi mufuile Davide lusa ku ino miluisho ikata. Yehowa badi muukie’shi Davide mumufule ngofu na dingi akumina kukita mianda i buwa. Tomono’shi bi muloo ukata pakumona’shi Yehowa akimba nka mianda i buwa i muatudi su?​—1 Bf. 9:4; 1 Mya. 29:10, 17.

14. Nkinyi kilombene kukuasha bena Kidishitu bua kuleka kutshibila bangi kiimu?

¹⁴ Yehowa tatengiela’shi tuikale bapuidikie nya, n’atue namu tatutengielanga’shi bangi bekale bapuidikie, abitungu tutale mianda ibuwa i muabadi. Muanda kuatudi abikalaa bibofule bua kutala nka penda kukutua kua kupuidika kua bangi na kubanga kui bakula bi bubi. Anka, muntu a mu kikudi sunga amona kukutua kua kupuidika atungunuka na kufuba nka na bangi bantu. Diama difita, tabakamba kuiditala kalolo nya, anka muntu muidiukie kalolo tatala penda pasha pa diama nya, kadi anangushenaa muulo wadidi dilombene kuikala nadio kunyima kua kui dilumbuula. Nka bu Yehowa na Yesu, abitungu tulekie kutala bantu penda biabamueneka ku meso, kadi tutale nyikashi yabo i buwa.

15. Buakinyi kunangushena ku nshalelo a bantu akuitukuasha bua kupela kutshibila bantu kiimu?

¹⁵ Kukatusha kutala penda nyikashi ya bantu  ibuwa, kinyi kilombene kui tukuasha bua kulela kui batshibila kiimu, na kuibakula mianda i bubi? Tubande kutompa nshalelo abo biadi muikale. Tutaleyi kino kileshesho. Dingi efuku mu ntempelo, Yesu bamuene mungi mukashi kilele mulanda alambula tukuta tubidi tuina muulo upela mu kashete. Tamuipushe’shi: “Buakinyi uno mukashi kilele mulanda tamuela makuta e bungi?” Anka Yesu tamuimene pa bungi bua makuta bubadi bulombene kutusha uno muana mukashi nya. Badi mutale kibadi kimutakule na nshalelo abadi naye, na aye kumutumbula bua bino bioso bibakitshine.​—Luk. 21:1-4.

16. Muanda wabadi bamone kui Veronica awitulongiesha kinyi?

¹⁶ Muanda wabadi bamone kui mukuetu mukashi abetanyina bu Veronica awitulesha buakinyi bina muulo kunangushena pabitale nshalelo a bangi. Mu kakongie kaabo mubadi ungi mukuetu mukashi ebukupi badi akusha muan’aye mulume bupenka. Veronica atentekiesha’shi: “Nadi amono’shi tabafika mu bisangilo misusa yoso, na tabafuba midimo yoso ya mu kakongie. Pa muanda wa bino nabangile kuikala na mueneno e bubi buabo. Anka efuku dinayile mu bulungudi na yawa mukuetu mukashi. Badi mu mpatuluile’shi ena lukalakashi muanda, muan’aye mulume ena maladi a binangu akuete kukusha bupenka bi bukopo bua ku mukusha. Badi ekitshisha na muaye mooso bua kulombasha nkalo yaye ya ku mbidi na kulama kipuano kiaye kibuwa na Yehowa. Pa muanda wa maladi a muan’aye angi mafuku badi atuele mu kangi kakongie.” Veronica afudiisha’shi: “Ntshinadi nauku’shi nyi lukalakashi  luadi nalo lualua nya. Binobino ne mufule uno mukuetu mukashi na nkuete kumunemeka ngofu bua bioso biakuete kuikitshisha bua kufubila Yehowa.”

17. Elango kinyi di mu Shake 2:8, diatudi balombene kulonda, na mushindo kinyi watudi balombene kuibikita?

¹⁷ Tui balombene kukita kinyi su tuatundula’shi tuibatshibile muina Kidishitu netu kiimu? Abitungu tutentekieshe’shi tuina kitungo kia kufula bakuetu. (Badika Shake 2:8.) Abitungu tutekie Yehowa, tumuisendele etukuashe bua’shi tuimikie kutshibila bangi kiimu. Abitungu tukite mianda muyile luteko luetu, pa atue kuata npango ya kuenda mu kuisamba na yawa muntu atuikalanga bakule bi bubi. Bino abitupa mushindo watudia ku muiuka kalolo. Tui balombene kumuteka bua’shi tukite naye pamune mudimo wa bulungudi sunga buatudia kudia naye pamune. Nsaa yatuede na kuuka mukuetu kalolo, tui balombene kuikitshisha bua kulonda kileshesho kia Yehowa na kia Yesu pa kutala penda mianda ibuwa i muadi. Nsaa yatukitshi bino atulesha’shi tukuete kutemesha mulami ebuwa etutekie buatudia kuleka kutshibila bangi kiimu.

18. Tuikulesha naminyi’shi tukuete kutemesha eyi dia mulami etu ebuwa?

¹⁸ Nka bu mikooko biayitemesha eyi dia mulami ayo, balondi ba Yesu namu bakuete kutemesha eyi diaye. Su tuekitshisha bua kupela kuikalakasha pabitale nkalo yetu ya bintu bia ku mbidi na kuleka kutshibila bangi kiimu, Yehowa na Yesu abelela kuikitshisha kuetu miabi. Biatuikala ba mu “loombe lupeela” sunga mu “loombe lukata,” abitungu tutungunukie na kutemesha na kukokiela eyi dia mulami ebuwa. (Luk. 12:32; Yo. 10:11, 14, 16) Mu muisambo aulondo atukataluula mianda ibidi ibadi Yesu mulungule balondi baye buabadia kukita.