1. Andi bi sa dë wan soni di mbei Jesosi bi tei dee bakama fëën maaka ku sikapu?

 JESOSI bi tei di fasi fa hën ku dee bakama fëën ta libi, maaka ku di fasi fa wan sikapuma ta libi ku dee sikapu fëën (Joh. 10:14). Di soni dë bi fiti seei, u di dee sikapu ta sabi di töngö u di sikapuma u de, nöö de ta haikëën. Wan womi bi taki taa sö di soni aki dë tuu. A bi taki taa: „U bi kë puu footoo u wantu sikapu, nöö u bi kë u de ko zuntu ku u. Ma dee sikapu an bi ko a u, u di de an sabi u töngö. Hën wan piki womi mii di ta tja dee sikapu ko dou. Di a kai dee sikapu, hën wantewante de bigi waka nëën baka.”

2-3. (a) Unfa dee bakama u Jesosi ta lei taa de ta haikëën? (b) Fuun soni woo taki a di woto aki, söseei a di woto baka disi?

² Di woto u di womi ta mbei u mëni di soni di Jesosi bi taki u dee bakama fëën. A bi taki taa: „De o jei di töngö u mi, nöö te de jei ën nöö de o piki ko a mi” (Joh. 10:16). Ma unfa u sa taki taa u ta haika Jesosi hii fa a dë a liba ala? Wë u ta haika Jesosi te u ta du dee soni dee a bi taki taa u musu du.​—Mat. 7:24, 25.

³ A di woto aki, söseei a di woto di ta ko baka disi, woo taki u wantu soni di Jesosi bi lei sëmbë. Woo si taa Jesosi bi lei u taa u musu du so soni, ma a bi lei u tu taa wa musu du so soni möön. Woo taki u tu soni di Jesosi bi piki u taa wa musu du möön.

4. Andi sa mbei u ta „booko u hedi”, te u luku Lukasi 12:29?

⁴ Lesi Lukasi 12:29. Jesosi bi piki dee bakama fëën taa ’de an musu ta booko de hedi möön’ ku dee soni di de abi fanöudu. U sabi taa dee soni dee Jesosi taki da bumbuu  soni, söseei u ta kë du dee soni di Jesosi taki. Ma so juu a sa ta taanga da u fuu du de. Faandi mbei?

5. Faandi mbei so sëmbë ta booko de hedi ku dee soni di de abi fanöudu?

 ⁵ So sëmbë sa ta booko de hedi ku soni u njan, soni u bisi, ku kamian u libi. Kandë de ta libi a wan köndë ka sömëni pooti sëmbë dë, söseei ka a taanga u feni wooko. Kandë a ta taanga da de u de feni wan wooko di sa heepi de u de sölugu dee sëmbë u de. Nasö kandë di sëmbë di bi ta wooko ta sölugu dee sëmbë u wan wosudendu ko lasi libi, nöö dee sëmbë dee fika a baka an ko abi sëmbë möön u sölugu de. Kandë di kolona siki mbei sömëni sëmbë lasi wooko (Peleik. 9:11). Kandë dee lö soni aki miti u. Wë unfa u sa du di soni di Jesosi bi taki, di a bi taki taa wa musu ta booko u hedi möön?

6. Konda andi bi miti apösutu Petuisi.

⁶ Wan daka, apösutu Petuisi ku dee woto apösutu bi dë a wan boto a di ze u Galilea, hën wan gaan ventu bi bigi ta böö. Hën de si Jesosi ta waka a di wata liba ta ko miti de. Petuisi bi taki taa: „Masa, ju nö? Wë ee ju di dë tuutuu, nöö i piki mi be mi waka a di wata liba tu ko a i.” Di Jesosi piki ën faa ko, hën Petuisi kumutu a di boto, „hën a ta waka a di wata liba nango a Masa Jesosi”. Luku andi ko pasa. „Te wan pisi hën [Petuisi] ko ta luku fa di ventu ta böö ku fa di wata ta seki tjika, nöö hën a panta te na soni, hati fëën latja, nöö hën a ta saka nango a basuwata zuuu. Nöö hën a bai kai wolo taa: ’Masa, heepi mi o. Heepi mi!’” Jesosi bi tëndë maun panjëën. A dë fanöudu fuu hoi a pakisei taa Petuisi bi sa waka a di wata liba di a bi ta buta hii hën pakisei  a Jesosi. Ma di Petuisi bi bigi ta luku fa di ventu ta bi böö ku fa di wata bi ta seki tjika, hën a bi bigi ta fëëë seei, nöö hën a bigi ta saka nango a basuwata.​—Mat. 14:24-31.

7. Andi u sa lei a di woto u Petuisi?

⁷ U sa lei soni a di woto u apösutu Petuisi. Di Petuisi bi kumutu a di boto ta bigi waka a di wata, an bi mëni taa a bi o fëëë di gaan ventu di bi ta böö, söseei an bi mëni taa a bi o saka go a basuwata. A bi kë waka a di wata liba u te a dou a Jesosi. Ma ka faa bi buta hii hën pakisei a Jesosi, hën a bigi ta fëëë di gaan ventu. An dë u taki taa wa sa waka a wata liba, ma soni sa miti u ka u musu lei ee u abi biibi tuutuu. Ee wa buta pakisei a Jehovah, söseei ee wa buta pakisei a dee soni dee a paamusi u, nöö di biibi fuu sa ko suwaki. A o dë kuma u ta da pasi u dee fuka fuu mbei u ta saka nango a basuwata. Fëën mbei aluwasi ee dee fuka fuu bigi, tökuseei u musu buta hii u pakisei a Jehovah, söseei u musu hoi a pakisei taa Jehovah sa heepi u. Unfa u sa du di soni aki?

8. Andi sa heepi u fuu wa booko u hedi poi ku dee soni dee u abi fanöudu?

⁸ Woo feni wini te wa ta booko u hedi ku dee fuka fuu, ma te u ta futoou Jehovah. Hoi a pakisei taa Jehovah, di Tata fuu di dë a liba ala, ta paamusi u taa a o heepi u fuu feni dee soni dee u abi fanöudu ee u buta dee soni fëën a di fosu kamian (Mat. 6:32, 33). Jehovah bi du di soni aki sömëni pasi kaa (Deto. 8:4, 15, 16; Ps. 37:25). Jehovah ta sölugu dee fou ku dee folo. Fëën mbei wa kë ta booko u hedi ku soni u njan ku soni u bisi! (Mat. 6:26-30; Fil. 4:6, 7) Leti kumafa lobi ta mbei gaansëmbë ta sölugu dee mii u de, sö nöö lobi ta mbei di Tata fuu di dë a liba ala ta da dee sëmbë fëën dee soni di de abi fanöudu!

9. Andi u sa lei a di woto u wan baaa ku hën mujëë?

⁹ Boo luku wan woto di ta lei unfa Jehovah sa da u dee soni dee u abi fanöudu. Wan baaa ku hën mujëë ta du di hii-ten diniwooko, nöö de abi wan gaandi wagi. De bi lëi pasa wan juu longi u de go tei wantu sisa di ta libi a wan lowema kampu, sö taa de sa tja de go a komakandi. Di baaa bi taki taa: „Baka di komakandi u kai dee sisa u de ko njan wan soni a u pisi. Ma te wan pisi hën u mëni baka taa wa abi soni u njan a u pisi.” Wë andi di baaa ku hën mujëë bi du? Di baaa bi taki taa: „Di u dou a wosu, hën u si tu gaan saku fuufuu ku soni u njan a u dööbuka. Wa bi sabi ambë bi tja de ko dë. Ma Jehovah bi sölugu u.” Wan pisiten baka di dë, hën di wagi u di baaa ku di sisa aki bi ko booko. De bi abi ën fanöudu u de bi sa du di peleikiwooko, ma de an bi abi möni u seekëën. De tja di wagi go a wan kamian di dë zuntu ku ka de ta libi, u de luku un mëni de o abi u paka u seekëën. Di de bi dë a di kamian, hën wan womi hakisi taa: „Ambë abi di wagi dë?” Di baaa bi piki taa hën abi di wagi, söseei taa di wagi booko. Di womi bi piki ën taa: „Aan toobi. Mi mujëë kë sö wan wagi, nöö di seei kulölu aki a kë. Un mëni joo sei ën da mi?” Di baaa bi sei di wagi fëën da di womi, nöö a bi feni möni tjika faa bi sa bai wan woto wagi. Di baaa bi taki taa: „Di daka dë u bi wai seei. U sabi taa Jehovah hën bi mbei soni waka a sö wan fasi.”

10. Unfa Psalöm 37:5 ta da u taanga fu wa booko u hedi ku dee soni di u abi fanöudu?

 ¹⁰ Te u ta haika di bumbuu sikapuma fuu, u di wa o ta booko u hedi poi ku dee soni dee u abi fanöudu, nöö u sa dë seiki taa Jehovah o heepi u fuu feni dee soni dee u abi fanöudu. (Lesi Psalöm 37:5; 1 Pet. 5:7) Pakisei dee fuka dee u bi kai a  palaklafu 5. Kandë Jehovah bi ta mbei di hedima u di wosudendu fuu sölugu u, nasö kandë a bi heepi u feni wan wooko. Ee di hedima u di wosudendu an sa sölugu u möön, nasö ee u ko lasi wooko, tökuseei Jehovah o suku wan fasi u heepi u fuu feni dee soni dee u abi fanöudu. U sa dë seiki taa a o sölugu u tuutuu. Boo luku wan woto soni di di bumbuu sikapuma ta piki u taa wa musu du möön.

11. Andi Jesosi bi taki a Mateosi 7:1, 2 taa wa musu du möön, nöö faandi mbei di soni dë sa dë wan taanga soni u du?

¹¹ Lesi Mateosi 7:1, 2. Jesosi bi sabi taa libisëmbë abi zöndu, söseei taa a lo’ u pasa taa de ta buta pakisei a dee föutu di wotowan ta mbei. A bi taki taa: „Na kuutu sëmbë möön.” Kandë u ta mbei taanga möiti fu wa kuutu dee baaa ku dee sisa fuu. Ma hii u tuu da zöndu libisëmbë. Andi u musu du te u si taa so juu u ta kë kuutu dee baaa ku dee sisa fuu? U musu haika Jesosi, nöö u musu mbei taanga möiti fu wa kuutu de möön.

12-13. Unfa di pakisei di u ta pakisei di fasi fa Jehovah bi si Könu Dafiti sa heepi u fu wa kuutu woto sëmbë möön?

¹² U sa feni wini te u ta pakisei unfa Jehovah ta du soni. A ta luku dee bunu soni di libisëmbë ta du. U ta si di soni aki a di fasi fa a bi libi ku Könu Dafiti. Dafiti bi mbei wantu gaan föutu nëën libi. A bi duumi ku Batiseiba, nöö a bi mbei sëmbë kii Batiseiba manu (2 Sam. 11:2-4, 14, 15, 24). Di soni di Dafiti bi du, bi hati hën ku dee sëmbë fëën wosudendu tuu. A bi hati dee woto mujëë fëën tu (2 Sam. 12:10, 11). Wan woto pasi Dafiti an bi lei taa a ta futoou Jehovah. A bi konda dee sodati u Isaëli, hii fa Jehovah an bi piki ën faa du di soni dë. Kandë Dafiti bi du di soni aki, u di a bi ta djula fa dee sodati fëën hia, nasö u di a bi ta langi a de u de tjubi ën. Andi bi ko pasa? Söwan 70.000 Isaëli sëmbë bi lasi de libi!​—2 Sam. 24:1-4, 10-15.

¹³ Unfa i bi o si Dafiti ee i bi dë a Isaëli a di ten dë? I bi o si kuma Jehovah an musu dëën paadon u? Wë Jehovah an bi ta si ën sö. Jehovah bi luku di fasi fa Dafiti bi ta hoi hënseei nëën, söseei a bi luku unfa Dafiti bi ta lei taa a ta tjali u dee zöndu dee a bi du. Di soni aki bi mbei Jehovah da Dafiti paadon u dee zöndu dee a du. A bi sabi taa Dafiti lobi ën gaanfa, söseei taa a bi kë du soni a wan bunu fasi. U ta tei ën u bigi seei taa Jehovah ta buta pakisei a dee bunu fasi dee u abi, söseei a di bunu fasi fa u ta tja useei.​—1 Kön. 9:4; 1 Klon. 29:10, 17.

14. Andi ta heepi Keesitu sëmbë u de an kuutu woto sëmbë möön?

¹⁴ Jehovah an ta suku fuu du soni söndö u mbei föutu. Fëën mbei useei an musu dë ku di mëni taa woto sëmbë musu ta du soni söndö u de mbei föutu. Ma u musu buta pakisei a dee bunu fasi di de abi. An ta dë wan taanga soni fuu si dee suwakifasi u woto sëmbë, söseei fuu kuutu de. Ma wan sëmbë di ta djeesi Jehovah, ta wooko makandi ku wotowan hii fa a ta si dee suwakifasi u de. Wan  djamati sitonu di de an koti seeka an ta hanse. Ma wan köni sëmbë ta sabi taa a o waiti seei, söseei taa a o dë wan gaan dii soni baka te de koti ën seeka. U musu mbei möiti fuu dë kuma Jehovah ku Jesosi. Wa musu buta pakisei a dee suwakifasi u woto sëmbë.

15. Faandi mbei u sa taki taa te u ta pakisei unfa soni dë da sëmbë, nöö a sa heepi u fu wa kuutu de?

¹⁵ Woto soni dë di u sa du sö taa wa kuutu woto sëmbë möön, boiti di buta di u musu buta pakisei a dee bunu fasi di de abi ö? Wë aai. U sa mbei möiti u ko sabi unfa soni dë da de. Buta pakisei a di woto aki. Wan daka, di Jesosi bi dë a di wosu u Gadu, hën a si wan pooti mujëë, di manu fëën bi dëdë, buta tu piki möni go a di möni këdë. Jesosi an bi hakisi taa: „Faandi mbei di mujëë dë an buta möön hia möni?” Nönö, an bi buta pakisei a di un mëni möni di di mujëë buta, ma a bi buta pakisei a di soni mbei di mujëë buta di möni, söseei a di fa libi bi sa dë da di mujëë. A bi gafa di mujëë, u di di mujëë bi du hii soni di a bi sa du.​—Luk. 21:1-4.

16. Andi i sa lei a di woto u Sisa Veronica?

¹⁶ Woo konda wan woto u wan sisa de kai Veronica u lei unfa a dë fanöudu tjika u pakisei unfa soni dë da wan sëmbë. A di kemeente ka di sisa aki bi nango, i bi abi wan sisa ku wan womi mii fëën. Veronica  bi taki taa: „Mi bi ta si kuma de an bi nango a dee komakandi ku di peleikiwooko hii juu. Di soni aki bi mbei ma bi ta pakisei bunu u de. Ma wan daka hën mi ku di sisa peleiki makandi. A bi konda da mi taa di womi mii fëën abi wan suwaki di ta mbei taa fusutan fëën an ta wooko sö bunu. A bi ta du hii soni di a bi sa u sölugu hënseei ku di womi mii fëën, söseei a bi ta du hii soni u de sa dë mati u Jehovah go dou. Nöö so juu de nango a wan woto kemeente u di di womi mii ta suwaki.” Veronica bi taki tu taa: „Ma bi sabi taa sö soni bi ta taanga da di sisa. Nöunöu mi lobi di sisa aki, söseei mi ta lesipeki ën, u di a ta du hii soni di a sa du u dini Jehovah.”

17. Andi Jakobosi 2:8 ta piki u fuu du, nöö unfa u sa du di soni dë?

¹⁷ Andi u musu du ee u ko si taa u ta kuutu wan baaa nasö wan sisa? Wë u musu hoi a pakisei taa u musu lobi dee baaa ku dee sisa fuu. (Lesi Jakobosi 2:8.) Söseei u musu begi Jehovah faa heepi u fuu wa kuutu sëmbë möön. U sa ta suku okasi fuu sa dë makandi ku di sëmbë di u ta kuutu. A sa heepi u fuu ko sabi di sëmbë möön bunu. U sa hakisi di sëmbë faa wooko makandi ku u a di peleikiwooko, nasö u sa kai ën faa ko njan wan soni makandi ku u. Te u ta ko sabi ën möön bunu, nöö woo sa djeesi Jehovah ku Jesosi u di woo ta buta pakisei a dee bunu fasi di a abi. Te u ta du di soni aki, nöö u ta lei taa u ta haika di bumbuu sikapuma fuu. A bi taki taa wa musu kuutu sëmbë möön.

18. Unfa u sa lei taa u ta haika di bumbuu sikapuma?

¹⁸ Leti kumafa sikapu ta haika di töngö u di sikapuma u de, sö nöö dee bakama u Jesosi ta haikëën. Ee u ta mbei taanga möiti fu wa booko u hedi ku dee soni dee u abi fanöudu, söseei te wa ta kuutu sëmbë möön, nöö Jehovah ku Jesosi o mbei u feni gaan bunu. Aan toobi ee u dë a dee „biti” sëmbë dendu, nasö ee u dë a dee „woto sikafu” dendu, tökuseei u musu ta haika di bumbuu sikapuma fuu, söseei u musu ta piki hën buka (Luk. 12:32; Joh. 10:11, 14, 16). A di woto di ta ko, woo taki u tu soni di Jesosi bi piki dee bakama fëën u de du.