1. Zimbula kintu kimo kyaalengiizie paange Yesu apalanie basambi bakue na mikooko.

 YESU waapalaniizie bukibuza bwakue pamo ni basambi bakue ni bukibuza bwa peepi buli bwasaangua pakati ka musuungi ni mikooko yakue. (Yoan. 10:14) Kooko kupalania kupalile. Mikooko ili yasaangua yamanine musuungi wabo, kabili ili yakoonka beelia bili byalanda musuungi wabo. Muntu umo, waaimweneene kaako kantu. Waalandile eevi: “Bantu baali mu kikundi kyetu, baali batonene kuikwata ma foto mikooko paleepale kabili baaeziizie kuikuuta eevi itupalame. Inzi yaakeene kutupalama paantu te yaainikile mazui etu. Inzi mulumendo umo waali waisuunga waaizile ni kuikuuta, kisia yaakonkelemo.”

2-3. (a) Basambi bakue Yesu bali balangilila siani nangue bali batuilizia lizui lyakue? (b) Ni kiki kilondolwelue mu leeli lyasi ni leelia likoonkelepo?

² Kintu kyaaimweneene ozo muntu, kyatulangulusia milandu yakue Yesu palua mikooko yakue, i kulanda basambi bakue. Yesu waalandile eevi: ‘Yakaba yaunvua lizui lyane.’ (Yoan. 10:16) Inzi, Yesu ali ku muulu. Kunti twamutuilizia siani? Tuli twamutuilizia musita utuli twakita bintu byaatusambiliziizie.​—Mat. 7:24, 25.

³ Mu leeli lyasi ni mu leelia likoonkelepo mu londolwelue masambilizio paleepale akue Yesu. Nga vituli kumona, Yesu waatusambiliziizie nangue kuli bintu binge bitupalile kulekela kukita ni binge bitupalile kukita. Tuli kulondoluelanke bintu bibili bitwaalandilue na musuungi aweeme nangue tupalile kulekela kukita.

4. Nga vilandile Luka 12:29, “kwema saana” kunti kwalengiiwa na ki?

⁴ Soma Luka 12:29 *. Yesu waabasokele basambi bakue ‘balekele kwema saana’ palua bintu bya kimubili bibaali bakabiile. Tumanine nangue masoke akue Yesu lyonse ali asaangua ali a mulangue  kabili apalile. Tutonene kubombia masoke azo, inzi nsita inge kunti twamona kyakolele kuabombia. Juu ya ki?

5. Juu ya ki bange kunti baema saana palua bintu byabo bya kimubili bibakabiile?

 ⁵ Bange kunti baya baema palua bintu bya kimubili bibakabiile nga evelia byakulia, maubo ni mwakwikala. Kunti baya baikeele mu kyalo muli bantu bengi bapabi kabili mwakolele kupata miilo. Kunti kyabakolela kupata nfalanga ya kukwasia kusuunga lupua lwabo. Ao paange kunti bafwilua na muntu wakiba wabakwasia kupata nfalanga mu lupua lwabo, kisia baalia bakifwilua basiala bila bali na nfalanga ya kubakwasia kupata bintu bibakabiile. Kabili paange bange bakizeezia miilo yabo juu ya aali yakileetua na buluele bwa korona (COVID-19). (Kas. 9:11) Kine tuli mukusaakaana ni buavia bumo pakati ka maavia azo, kunti twakoonka siani musoko wakue Yesu wa kulekela kwema?

6. Londolola bintu byaamusaangile mutumua Petro mu lwendo lumo.

⁶ Mu lwendo lumo, mutumua Petro pamo ni batumua bange babanga baali mu buato, mu lyezi lya Galilaya. Ozo musita, kubanga kwali mwela lubaamumwene Yesu wali mukwenda pa menda. Petro waalandile eevi: “We Mulopue, kine i weewe, nghane ngize kooko kuuli nali mukwenda pa menda.” Kisia Yesu waamwanine eevi: “iza.” Petro waafumine mu buato “waya waenda pa menda wali mukuya kuli Yesu.” Ale mona kintu kyaakitikile kisia paapo. “Lwaamwene mwela wakila, waaunvuile muenzo mpaka watendeka kwibila mu menda, waasamwine walanda: ‘We Likolo, mpususie!’” Yesu waaoluele kuboko kwakue ni kumupususia. Ni kintu kya mana kulanguluka nangue Petro waaviindile kwenda pa menda musita lwabanga waamukentele Yesu. Inzi, musita Petro lwaakentele ku muela, waaunvuile muenzo ni kutendeka kwibila mu menda.​—Mat. 14:24-31.

7. Kunti twasambilila ki kupitila mufuano wakue Petro?

 ⁷ Kunti twasambilila kupitila mufuano wakue Petro. Musita Petro lwaakookele mu buato ni kuya pa menda, taali watontonkania nangue kunti waunvua muenzo wa muela ni kutendeka kwibila. Waali watonene aye mpaka kuli Yesu wali mukwenda pa menda. Inzi, kuliko kutwalilila kupooza maano kuli Yesu, weene waaunvuile muenzo wa muela. Kakiine, tetuviinda kwenda pa menda, inzi tuli twasaakaana ni meezio mu kiketekelo kyetu. Kine te tutwaliliile kumuswapila kabili Yehova pamo ni bulayo bwakue, kiketekelo kyetu kili kutopa nga evelia fwe bali mukubunda na muenzo. Anzia kine kunti twasaakaana ni buavia bukata saana mu buikazi bwetu, tupalile kutwalilila kupooza maano etu kuli Yehova ni ku buviinde bwakue bwa kutukwasia. Kunti twaviinda siani kukita evio?

8. Ni kiki kili kuviinda kutukwasia te kunti tuye twaema saana palua bintu bya kimubili bitukabiile?

⁸ Kuliko kwema saana palua maavia etu, tupalile kumuswapila Yehova. Languluka nangue Baba weetu wantono Yehova watulaya nangue wakaba kutupeela bintu bya kimubili bitukabiile, kine twabiika bintu bya kimupasi pa ntaanzi. (Mat. 6:32, 33) Lyonse ali wafikilizia bobo bulayo. (Mal Miz. 8:4, 15, 16; Malum. 37:25) Kine Yehova ali waemena tooni ni maluba, kakiine te tupalile kwema juu ya beelia bitwakaba kulia ao kuvuala! (Mat. 6:26-30; Baf. 4:6, 7) Nga evelia ntono viili yabakinkizia baviazi kubakebela baana babo bintu bibakabiile, ntono ili ya mukinkizia Baba weetu wa ku muulu abapeele bantu bakue bintu bya kimubili bibakabiile. Kakiine kunti twaya twali ni kisinka nangue Yehova wakaba kutwemena!

9. Weewe kunti wasambilila ki kupitila bintu byaaimweneene ba mulume ni mukazi bamo?

⁹ Mona ozu mufuano ulangiliile Yehova vyali waemena bintu byetu bya kimubili. Ba mulume ni mukazi bamo bali mu miilo ya nsita yonse, baaendele nsa imo lwa motoka wabo wa kale eevi baye babatwame bankazi bamo babanga baikala mu nkambi ya bambutusi, ni kuya naabo ku kulonghaana kwa Kikristu. Lupua walondolola eevi: “Kisia kulonghaana twaabakupile babo bankazi eevi tuye tulie naabo kyakulia, inzi twaalangulukile nangue te tukwete ata kyakulia kyakubapeela.” Kisia kwaalukile ki? Lupua waatwaliliile eevi: “Lutwaafikile pa nsesi, twaamwene pa muliango weetu pali bifunda bibili bikata byalimo byakulia. Te twaamanine kine naani waasiilepo bebio bifunda. Yehova waatwemeene.” Musita uniini kisia paapo, motoka wa babo ba mulume ni mukazi waainoonekele. Baali bakabiile saana ozo motoka mu miilo yabo ya kusimikila, inzi te baali na nfalanga ya kutengeneziiziako. Baatwele motoka pa fuasi ya kutengeneziizia, eevi bamane kine kunti yatwama nfalanga inga pa kunti motoka wabo ukose. Kisia mwalalume umo waaile paapo ni kwipuzia eevi: “Ozu motoka wakue ni?” Lupua waalandile nangue motoka ozo ni wakue, kabili upalile kutengeneziiwa. Ozo mwalalume waamwasukile eevi: “Te kuli buavia. Mukazi wane ali watona motoka wa eevi, kabili wa eezi yenka rangi. Kunti watona kusisia mu bei ki?” Ozo lupua, waasisiizie motoka kuli ozo mwalalume. Kupuako, ozo lupua waapatile nfalanga itosiizie ya kusita motoka unge. Ozo lupua waalandile eevi: “Twaaunvuile nsaansa ikata ku mpela ya bobo busiku. Twaamwene nangue leelio te libanga lyalisie lisyuko. Yehova i waatukwasiizie.”

10. Lileembo lya Malumbo 37:5 lyatukinkizia siani kulekela kwema palua bintu bya kimubili bitukabiile?

¹⁰ Kine twamutuilizia musuungi aweeme, ni kulekela kwema saana juu ya bintu bya kimubili bitukabiile, tuli kuya twali ni kisinka nangue Yehova wakaba kutupeela bintu bitukabiile. (Soma Malumbo 37:5; 1 Pet. 5:7) Tontonkania palua maavia aazimbuluanga mu  lifungu lya 5. Paange loonu, Yehova kunti waya  wabombia mutue wa nsesi yeetu ao muntu emaniine miilo eevi kutukwasia kupata bintu bya kimubili bitukabiile kila busiku. Kine mutue wa nsesi takili na buviinde bwa kukita evio, ao kine twakizeezia miilo yeetu, Yehova wakaba kutwemena mu nzila inge. Kunti twasininkizia evio. Loonu, tumone kintu kinge kitwaalandilue na musuungi weetu aweeme kulekela kukita.

11. Nga vilandile Mateo 7:1, 2, Yesu waatulandile tulekele kukita ki, kabili juu ya ki kukita evio kunti kwakola?

¹¹ Soma Mateo 7:1, 2 *. Yesu waali wamanine nangue bantu te bapuililikile, kabili lingi bali bapooza saana maano ku bilubo bya bange. Keekio i kyaalengele alande eevi: “Lekele kupingula.” Kunti twakita maka eevi te kunti tuye twabapingula bazumizi neetu. Inzi, nsita inge kunti twaandua kukita evio. Inzi, tupalile kukita siani kine twainika nangue nsita inge tuli twapooza saana maano ku bilubo bya bange? Mutuilizie Yesu kabili kita maka obe onse eevi ulekele kupingula.

12-13. Kutontonkania Yehova vyaamumwene Likolo Daudi kunti kwatukwasia siani kulekela kubapingula bange?

¹² Kunti twanoonkelamo kupitila kutontonkania mufuano wakue Yehova. Ali wapooza maano ku bintu biweeme bili byakita bantu. Tontonkania Yehova vyaakitile musita Likolo Daudi lwaakitile bilubo bikata. Kwa mufuano, Daudi waakitile bukende ni Bat-sheba, ni kulengia mulume wakue epaiwe. (2 Sam. 11:2-4, 14, 15, 24) Bintu byaakitile Daudi byaalengiizie weene pamo ni lupua lwakue baaluke mu maavia, kubiika mukati ni bakazi bange babanga wali naabo. (2 Sam. 12:10, 11) Lunge kabili, Daudi waandilue kumuswapila saana Yehova lwaapendele balalume ba mu kisepe kya Baisraeli, kintu kyaasyali walandilue na Yehova kukita. Paange, Daudi waakitile evio paantu abanga waakinkiziiziwe na kibuli kya kumona kutana kwa kisepe kyakue kya balukale, kabili paantu waali waswapiile kisepe keekio kimusuunge. Keekio kyaalengiizie kwaluke ki? Baisreli elufu makumi saba (70 000) eevi, baafuile na kimina kya buluele!​—2 Sam. 24:1-4, 10-15.

¹³ Ubenge wali mu Israeli mu ezio nsita, weewe waasiile kumumona siani Daudi? Eba, waasiile kupingula nangue tapalile kweleelua na Yehova? Yehova taatontonkaniizie evio. Waakentele saana bukisinka bwaalangiliile Daudi mu buikazi bwakue, ni kumona nangue waalapiile kisinka. Keekio kyaalengiizie Yehova amweleele Daudi azo mazaambi akata. Yehova waali wamanine nangue Daudi waali wamutonene saana weene, kabili waali watonene kukita bintu biweeme. Kakiine, tuli twatasia saana paantu Yehova ali wapooza maano ku mibeele ni ku lwendo lwetu luweeme!​—1 Mak. 9:4; 1 Mil Nsi. 29:10, 17.

14. Ni kiki kili kyabakwasia Bakristu kulekela kupingula bange?

¹⁴ Paantu Yehova teezi kukeba bantu baye bapuililikile, ni fwefue te tupalile kuya twaswapiile bange baye bapuililikile, kabili tupalile kukeba bintu biweeme bili byakita bange. Lingi kili kyasaangua kyaleengele kupooza maano ku bilubo bya bange, ni kutendeka kulondolola palua bilubo bebio. Inzi muntu ali wamupala Yehova, ali wabomba buino pamo ni bange anzia kine ali kuya wamanine bilubo byabo. Libue lya diama lya makakala-makakala lisifwaniine kunti lyamoneka bila lyapalile, inzi muntu amanine buino leelio libue, taviinda kukentasie vilimonekele pa muulu, inzi ali kumona vyakaba kukindama leelio libue kine lyateetua ni kuwamiiwa. Nga evelia vili vyakita Yehova ni Yesu, te tupalile kupooza maano etu ku bilubo bya  bantu, inzi, tupooze maano ku mibeele yabo iweeme.

15. Kutoosia vili aali ya bange kunti kwatukwasia siani kutiina kubapingula?

¹⁵ Kukila pa kupooza maano ku mibeele iweeme ili na bange, ni kiki kinge kipalile kutukwasia te kunti tuye twabapingula bange ovio? Ezia kutoosia vili buikazi bwabo. Mona ozu mufuano. Busiku bumo lwaali mu ekalu, Yesu waamwene mukanfuilua umo waali wakabiile kukwasiiwa, wabiika bingolongolo bibili bya mutengo uniini mu kisanduku kya bulongio. Taaipuziizie eevi: “Juu ya ki tabiikilemo bingi?” Kuliko kupooza maano ku buingi bwa bingolongolo byaafumiizie mukanfuilua, Yesu waapoozele maano ku kintu kyaamukinkiziizie ozo mwanakazi ni aali yabanga walimo. Kisia waamutasiizie paantu waafumiizie kukoonkana ni buviinde bwakue bonse.​—Luk. 21:1-4.

16. Weewe, kunti wasambilila ki kupitila bintu byaaimweneene Veronica?

¹⁶ Bintu byaaimweneene Veronica, byatulangilila nangue ni kintu kya mana kutontonkania vili buikazi bwa bantu bange. Mu kilonghaano kyabanga wabombela, mubanga mwali nkazi umo asili na mulume ni muana wakue mwalalume. Veronica waalandile eevi: “Naali namwene nangue lingi te baali baiza ku kulonghaana ni mu miilo ya kusimikila. Keekio kyaalengele mbamone nangue te bali buino. Inzi, naaile kusimikila pamo ni ozo mama. Waambuilile nangue muana wakue abanga waali ni buavia mu maano. Abanga waikwinda saana eevi afikilizie bintu bya kimupasi ni bya kimubili bibaali  bakabiile. Nsita inge, juu ya aali ya bukose bwa muana wakue, waali wapingula kuya kulonghaana mu kilonghaano kinge.” Veronica waapuililiile eevi: “Nsyaali namanine nangue bobo i buavia bwakue. Kubambila paapo, naatendekele kumutona ni kumukindika saana ozo nkazi palua bintu byonse byali wakita juu ya kumubombela Yehova.”

17. Lileembo lya Yakobo 2:8 lyatukinkizia kukita ki, kabili kunti twaviinda siani kukita evio?

¹⁷ Tupalile kukita ki kine twainika nangue tuli twapingula balupua ni bankazi neetu? Tulanguluke nangue tupalile kubatona balupua ni bankazi betu. (Soma Yakobo 2:8.) Kabili tupalile kupepa saana kuli Yehova twamuloomba atukwasie kulekela kubapingula bange. Kunti twakita kukoonkana ni mapepo etu kupitila kulondolola ni muntu utwakiba twatoosia bilubo byakue. Keekio kunti kyatukwasia kumumana buino. Kunti twamulanda tusimikile pamo nakue, ao kumukupa eevi tulie nakue kyakulia. Kunti twaviinda kumumana buino lupua weetu, kine twamupala Yehova ni Yesu kupitila kukeba bintu biweeme bili byakita ozo lupua. Kine twakita evio, tuli kulangilila nangue tuli mukutuilizia malaizio akue musuungi weetu aweeme a kulekela kupingula.

18. Kunti twalangilila siani nangue tuli twatuilizia lizui lyakue musuungi aweeme?

¹⁸ Nga eveliasie mikooko viili yatuilizia lizui lyakue musuungi wabo, ni basambi bakue Yesu bali batuilizia lizui lyakue. Kine twaikwinda saana kulekela kwema palua bintu bya kimubili bitukabiile ni kulekela kupingula bange, Yehova ni Yesu bakaba kupaala kwikwinda kwetu. Ibe tuli mu seemu ya “libumba liniini” ao ya “mikooko inge,” tutwalilile kutuilizia ni kukindika lizui lyakue musuungi aweeme. (Luk. 12:32; Yoan. 10:11, 14, 16) Mu lyasi likoonkelepo, twakaba kulondoluela bintu bibili byaalandile Yesu nangue basambi bakue bapalile kukita.