1. Khu ginani Jesu a nga fananisa valandreyi vaye ni dzinvuta?

JESU fananiside wupari a nga ba ari nawo ni valandreyi vaye ni edzi muhavisi a pharago khidzo dzinvuta dzaye. (Joh. 10:14) Si ngu pwala gu fananisa silo sesi kholu nvuta yi ngu muti muhavisi wayo nigu yi ngu gira satshavbo yi embedwago khu muhavisi wayo. Muendri moyo a si wonide isoso na si gu girega. Uye a di khuye: “Ethu hi di gu vbweta gu dusa dzifoto ni dzinvuta nyo khaguri, nigu hi di gu vbweta gu dzi gira dzi hidzimeya vbafuvbi gwathu, ganiolu idzo kha dza hidzimeya kholu dzi di si mati malito yathu. Gi di vboha gikhwatana gi nga ba giri muhavisi wadzo. Khu gu basi a dzi rana idzo dzi di mu landra.”

2-3. (a) Valandreyi va Jesu va gu yeyedza kharini gu khavo va ngu engisa lito laye? (b) Ginani hi na bhulago khigyo avba nya ndrima yeyi ni ndrima yi landreyago?

² Giyeyedzo gegi gya gu hi dundrugisa malito ya Jesu maningano ni dzinvuta dzaye mwendro vapizane vaye. Uye a di khuye idzo “dzi napwa lito langu.” (Joh. 10:16) Ganiolu, Jesu womo ndzadzini. Hi nga si kodza kharini gu engisa lito laye? Ha gu engisa lito laye tepo hi girago esi a hi hevbudzago. — Mat. 7:24, 25.

³ Ga ndrima yeyi ni eyi yi landreyago hi na bhula khu sihevbudzo nyo khaguri sa Jesu. Kha nga hi na si wonago, Jesu a hi hevbudzide silo nyo khaguri hi gu mba yela gu gira ni esi hi yedego gu gira. Gu pheya hi na wona silo sivili esi muhavisi nya wadi a hi embedego gu khuye kha hi yeli gu gira.

4. Guya khu Luka 12:29, ginani gi nga hi girago hi “garadzega”?

⁴ Leri Luka 12:29. Jesu a di dundrugisa valandreyi vaye gu khuye va di yede gu ema gu “garadzega” khu silo sa nyamani.  Hi ngu dziti gu khethu wusingalagadzi wa Jesu tepo yatshavbo khwadi nigu wu lulamide. Hi ngu dzina gu thumisa wusingalagadzi wowu, ganiolu dzimbe dzitepo si nga hi garadzeya ngudzu gu gira isoso. Khu ginani?

5. Khu ginani adzina vambe va garadzegago khu silo sa nyamani?

 ⁵ Vambe adzina va nga garadzega khedzi va nga manago khidzo guhodza, sombo nyo ambale ni wulanga nyo khale. Avo adzina va gu vbanya ga litigo li tadego khu wusiwana si garadzago gu mana thumo. Adzina si nga va garadzeya gu mana thumo gasi gu khataleya ndranga yawe, mwendro oyu a nga ba a khataleya ndranga adzina fude. Khu kharato, ndranga kha yi si kodzi gu mana dzitsapawu gasi gu renga esi si vbwetegago. Nigu nya vangi adzina va luzide mithumo yawe khu kotani nya tungu wowu nya COVID-19. (Muh. 9:11) Abari gu ha gu tshangana ni sigaradzo sesi mwendro simbe hi nga landrisa kharini gileletelo gya Jesu maningano ni gu ema gu garadzega.

6. Tshamuseya esi si dugeledego mupostoli Pedro ga tepo nyo khaguri.

⁶ Ga tepo nyo khaguri, mupostoli Pedro ni vambe vapostoli va diri ngalavani ga yiphwa ya Ghalileya na gu girega phuvbo nya yikhongolo tepo va nga wona Jesu na gu gimbiya vbatshani nya mati. Pedro a di khuye: “Wa gu ba uri uwe Pfhumu, nyi rane nyita iyo gwago khu vbatshani nya mati.” Hwane nya gu ba Jesu a mu embede gu khuye “delu,” Pedro a di duga khu ngalavani “a yela Jesu, na gu gimbiya khu vbatshani nya mati.” Wona esi si nga dugeleya khu gu landreya. “Tepo a nga khedza, a wona gu khuye phuvbo yikhongolo, a di thava. Tepo a nga pheya gu dzama, a di womba huwa, khuye: ‘Pfhumu, nyi vbulugise!’” Jesu a di thawuludza libogo laye a mu mola a bwe a mu vbulugisa. Si na ni lisima gu dundruga gu khethu Pedro a si  kodzide gu gimbiya vbatshani nya mati tepo a nga ba a simama gu khedza Jesu. Ganiolu, tepo Pedro a nga khedza phuvbo nya yikhongolo uye a dipwa hwanga a bwe a kanakana, khu kharato a pheya gu dzama. — Mat. 14:24-31

7. Ginani hi nga gi hevbulago khu giyeyedzo gya Pedro?

⁷ Hi nga hevbula gilogyo avba nya giyeyedzo gya Pedro. Tepo Pedro a nga duga khu ngalavani a bwe a gimbiya khu vbatshani nya mati, kha dundrugeya gu khuye a di hadzi thava phuvbo yile nya yikhongolo a bwe a pheya gu dzama. Uye a di gu vbweta gu simama gu gimbiya khu vbatshani nya mati kala aya manana ni Jesu. Ganiolu, wulangani nyo vege gupima avba ga Jesu, uye a di thava phuvbo nya yikhongolo. Muhuno, hi yede gu manega ni gukhodwa gasi hi timiseya sigaradzo, gu fana ni Pedro a nga ba a yede gu manega ni gu khodwa gasi a a gimbiya vbatshani nya mati. Ha gu mba vega gupima avba ga Jehovha ni ga situmbiso saye, gukhodwa gwathu gu na vbola, nga khatshi ha gu dzama omu nya sigaradzo sathu. Ambari ha gu tshangana ni sigaradzo nya sikhongolo, hi yede gu simama gu vega gupima gwathu avba ga Jehovha ni ga edzi a hi phasago khidzo. Hi nga gira kharini isoso?

8. Ginani gi nga hi phasago gu potsa gu garadzega ngudzu khu silo sa nyamani?

⁸ Hi na wuyedwa ngudzu ha gu tumba Jehovha ha gu ba hi emisana ni sigaradzo. Dundruga gu khuwe Papayi wathu nya lihaladzo, Jehovha, a gu tumbisa gu khuye a na hi khataleya khu nyamani ha gu thangisa silo sa liphuvboni. (Mat. 6:32, 33) Uye tepo yatshavbo a ngu tadzisa gitumbiso gegi. (Dhet. 8:4, 15, 16; Ndzi. 37:25) Abari gu Jehovha a ngu khataleya sinyoni ni sifilori, khu lisine kha hi yeli gu garadzega khu silo nyo hodze mwendro nyo ambale! (Mat. 6:26-30; Filp. 4:6, 7) Kha nga olu lihaladzo li kutsago vavelegi gu ninga sanana sawe esi si si vbwetago, lihaladzo la gu kutsa Papayi wathu wa ndzadzini gu khataleya vathu khu nyamani. Khu lisine, hi nga tiyisega gu khethu Jehovha a na hi khataleya.

9. Ginani u nga gi hevbulago khu matshango ya patwa nyo khaguri?

⁹ Wona matshango nyo khaguri ma yeyedzago edzi Jehovha a nga hi khataleyago khidzo khu nyamani. Patwa nyo khaguri wu nga ba wu romo thumoni nya tepo yatshavbo, wu di gu gimbiya gipimo nya ora khu movha yawo ya gale gasi wuya dzega vandriyathu nyo khaguri nya vanyamayi va nga ba va vbanya ga wulanga nya wuthavelo (centro de refugiados,) va ya va dzega va hongola navo mitshanganoni. Ndriyathu nya mwama a gu tshamuseya gu khuye: “Hwane nya mitshangano hi di konvhidhari vandriyathu vava nya vanyamayi gasi hi ya hodza gilogyo. Ganiolu, khavbovbo hi di tugula gu khethu hi mwalo guhodza nyo va ninge.” Ginani patwa wowu wu nga gira? Ndriyathu nya mwama a gu simama khuye: “Tepo hi nga vboha gaya hi di khingwa khu dzipasta dzimbili nya dzikhongolo nyo tale khu silo nyo hodze avba nya lidimba lathu. Kha ha nga ba hi muti oyu a nga ta dzi vega vbale. Jehovha hi khatalede.” Khu gu gimbiya nya tepo movha ya patwa wule yi di ghoheka. Avo va di gu yi vbweta ngudzu gasi gu hongola khiyo thumoni nyo tshumayele, ganiolu va diri mwalo dzitsapawu nya gu yi lungisise. Uye a di dzega movha a hongola nayo ga ofisina ya vbafuvbiyana vbale gasi gu ya ti gu khuye a na livba kharini gasi gu yi lungisisa. Khavbovbo, a dita mwama nyo khaguri a ta wudzisa gu khuye: “Khya mani movha yeyi?” Ndriyathu a di ganeya gu khuye khyaye nigu ya gu vbweta gu lungiswa. Mwama wule a di hlamula gu khuye: “Igyogyo khandri gigaradzo. Mwangadzi wangu a gu vbweta movha nya nga eyi, nya kori yeyi kamo. Wa gu vbweta gu khuwe nyi gu livba kharini?” Ndriyathu a di rengiseya mwama wule movha yaye khu dzitsapawu  nyo eneye gu renga yimbe movha. Uye wari khuye: “Hi di tsakide ngudzu litshigu lile. Hi di gu dziti gu khethu esi khandri si di kotsanisa, gu diri giphaso gya Jehovha.”

10. Giphaso muni egi Ndzimo 37:5 a hi ningago maningano ni gu mba garadzega khu silo sa nyamani?

¹⁰ Ha gu engisa lito la muhavisi nya wadi hi bwe hi ema gu garadzega khu silo sa nyamani, hi nga tiyisega gu khethu Jehovha a na hi khateleya. (Leri Ndzimo 37:5; 1 Ped. 5:7) Dundrugeya khu sigaradzo si khumbugidwego ga  ndrimana 5. Kala matshiguni yathu, Jehovha a nga thumisa hungo nya ndranga mwendro patrawu gasi hi gu phasa gu mana silo nyo dzi vbanyise. Abari gu hungo nya ndranga mwalo gambe makodzelo nyo gire isoso mwendro hi luzide thumo, Jehovha a na hi khataleya khu ndziya nyo khaguri. Hi nga tiyisega khu isoso. Olu hongoleni hi wona gimbe gilo egi muhavisi nya wadi a hi embeyago gu khuye kha hi yeli gu gira.

11. Guya khu Matewu 7:1, 2, ginani egi Jesu a hi embedego gu khuye kha hi yeli gu gira nigu khu ginani si nga garadzago?

¹¹ Leri Matewu 7:1, 2. Jesu a di gu dziti gu khuye vathu kha va vbeleya, ni gu tepo yatshavbo va gu vega gupima avba nya sihoso sa vambe. Wona esi a ganedego: “Mu nga lamuli vakwanu.” Ethu adzina hi nga zama gu mba lamula vandriyathu, ganiolu hatshavbo kha ha vbeleya. Ha gu wona gu khethu dzimbe dzitepo hi ngu lamula vambe, ginani hi yedego gu gira? Engisa Jesu nigu dzi garadzeye gu mba lamula vambe.

12-13. Giyeyedzo gya Jehovha gya gu hi phasa kharini gu mba lamula vambe?

¹² Hi nga phasega khu gu dundrugeya giyeyedzo gya Jehovha. Uye a gu vega gupima avba nya silo nya sadi esi vathu va girago. Dundrugeya khesi Jehovha a giridego tepo Pfhumu Dhavhidhe a nga gira sihoso nya sikhongolo. Khu giyeyedzo, uye giride wubhayi ni Bheti-Sebha a bwe a ruma gu khuye mwama waye a songwa. (2 Sam. 11:2-4, 14, 15, 24) Khu kotani nya esi Dhavhidhe a giridego, uye ni vandrangani gwaye va tshanisekide gu pata ni vagadzi vaye. (2 Sam. 12:10, 11) Ga yimbe tepo Dhavhidhe kha tumba Jehovha tepo a nga gira giloveya ga libuthu la Israyeli nya mba rumwa khu Jehovha. Dhavhidhe adzina giride esi khu kotani nya gudzikhusedze ni gu tumba libuthu nya masotshwa yaye. Si reside handro muni isoso? Tanga nya 70 000 Vaisrayeli va fude khu tungu. — 2 Sam. 24:1-4, 10-15.

¹³ Nari khatshi u di gu vbanya Israyeli, u di hadzi mu wona kharini Dhavhidhe? Ina u di hadzi pimisa gu khuwe kha yedwi gu divaledwa khu Jehovha? Jehovha kha pimisa kharato. Uye vegide gupima avba nya silo nya sadi esi Dhavhidhe a giridego ndrani nya womi waye ni olu a dzi layidego. Khu kharato, Jehovha a divalede Dhavhidhe ga sihoso a giridego. Jehovha a di gu dziti gu khuye Dhavhidhe a ngu mu haladza ngudzu, nigu a ngu dzina ngudzu gu gira silo nya sadi. Hi ngu bonga ngudzu Jehovha kholu a vegago gupima avba nya makhalelo yathu nya yadi ni ga mavbanyelo yathu. — 1 Dzipf. 9:4; 1 Dzik. 29:10, 17.

14. Ginani gi nga phasago Makristo gu mba lamula vambe?

¹⁴ Jehovha kha vireyi gu khuye vathu va vbeleya, ni gu anethu kha hi yeli gu vireya gu khethu vambe va vbeleya. Hi yede gu vega gupima avba nya silo nya sadi va girago. Gutala nya dzitepo si ngu vbevbuga gu wona sihoso sa vambe hi bwe hi va lamula. Ganiolu, muthu a pimedzeyago Jehovha a ngu thumisana gwadi ni vambe ambari na gu wona sihoso sawe. Dhiyamanti nya gu yi si gu liparwi yi vivbide ngudzu, ganiolu muthu nya guti a ngu dziti gu khuye iyo yi na mbura kamo ngudzu ya gu liparwi yi  bwe yi handzwa gwadi. Gu fana ni Jehovha ni Jesu, ethu kha hi yeli gu vega gupima avba nya sihoso sa vathu, ganiolu ga makhalelo yawe nya yadi.

15. Khu ginani gu dundrugeya khedzi womi nya vathu wu khadego khidzo si na hi phasago gu mba va lamula?

¹⁵ Wulangani nyo vege basi gupima avba nya makhalelo nya yadi ya vambe, ginani gambe gi nga hi phasago gu mba lamula vambe? Zama gu dundrugeya khedzi womi wawe wu khadego khidzo. Wona giyeyedzo gegi. Litshigu limwedo Jesu na gu romo tempeleni, a di wona noni mweyo nya gisiwana na yi gu theya singerengere sivili nya mba phasa gilo omu nya khofre. Uye kha wudzisa gu khuye: “Khu ginani yi nga mba theya dzitsapawu nya dzingi?” Jesu a di gu dziti gu khuye khu ginani noni yile yi nga theya sitsapawana sile ni edzi womi wayo wu nga ba wu khade khidzo. Khu kharato, a di yi zundza kholu yi giridego satshavbo yi nga si kodza. — Luka 21:1-4.

16. Ginani u nga gi hevbulago khu matshango ya Veronica?

¹⁶ Matshango ya Veronica ma ngu hi phasa gu wona lisima nya gu dundrugeye khu edzi womi nya vathu wu khadego khidzo. Ga libandla a nga ba a romo, gu diri ni mamayi moyo a nga ba a khala enga ni gyanana gyaye. Veronica wari khuye: “Si di gu gira gu khatshi avo kha va manegi ngudzu mitshanganoni ni thumoni nyo tshumayele. Khu kotani nya isoso nyi di gu va wona khu ndziya nya mba yadi. Ganiolu, litshigu  limwedo nyi di hongola thumoni nyo tshumayele ni mamayi wakona. Uye a di nyi embeya gu khuye gyanana gyaye gi na ni madwali nya mapimo. Uye a di gu gira satshavbo a nga ba a si kodza gasi a dzi khataleya khu nyamani ni gu tiyisa wupari waye ni Jehovha. Khu kotani nya mawugelo ya gyanana gyaye, dzimbe dzitepo si di gu lomba gu a ya wona mitshangano ga limbe libandla.” Veronica a gu hegisa khu gu khuye: “Nyi di si dziti gu kheni womi waye kha wu vbevbugi. Olu nyi ngu haladza ni gu ninga githawo ndriyathu yoyu khu satshavbo a si girago gasi gu thumeya Jehovha.”

17. Ginani egi Jakobe 2:8 a hi kutsago gu gira nigu hi nga gira kharini isoso?

¹⁷ Ginani hi yedego gu gira ha gu tugula gu khethu hi ngu lamula ndriyathu? Hi yede gu dundruga gu khethu hi yede gu haladza vandriyathu. (Leri Jakobe 2:8.) Hi yede gambe gu gombeya ga Jehovha na si gu khugeya monyoni, hi mu lomba gu khethu a hi phasa gu ema gu lamula vambe. Hwane nya nombelo, hi nga gira gipandre gyathu khu gu hi hidzimeleya muthu hi nga ba hi mu lamula hi ya bhula naye. Isoso adzina si na hi phasa gu muti gwadi. Adzina hi nga mu konvhidhari gasi hi ya thuma naye thumoni nyo tshumayele mwendro gu hodza naye gilogyo. Tepo hi yago hi muti gwadi ndriyathu, hi yede gu pimedzeya giyeyedzo gya Jehovha ni Jesu, khu gu hi vega gupima avba nya silo nya sadi a girago. Khu ndziya yeyi, hi na yeyedza gu khethu ha gu engisa gileletelo gya muhavisi nya wadi nya gu khigyo hi nga lamuli vakwanu.

18. Hi nga yeyedza kharini gu khethu hi ngu engisa lito la muhavisi nya wadi?

¹⁸ Gufana ni nvuta yi engisago lito la muhavisi wayo, valandreyi va Jesu va ngu engisa lito laye. Ha gu dzi garadzeya gu mba garadzega khu silo sa nyamani hi bwe hi ema gu lamula vakwanu, Jehovha ni Jesu va na kategisa mizamo yathu. Gani ha gu gira gipandre nya “tshambi dugwana” mwendro nya “dzimbe dzinvuta,” hongoleni hi simama gu engisa lito la muhavisi nya wadi. (Luka 12:32; Joh. 10:11, 14, 16) Ga ndrima yi landreyago hi na bhula khu silo sivili esi Jesu a embedego valandreyi vaye gu khuye va di yede gu gira.