1. ¿Tuku xlakata Jesús wa pi kstalaninanin xtachuna la borregos?

JESÚS tamalakxtumilh la xkatalalin xtamakgalhtawakgen xtachuna la chatum mapuchwayanina kalikatsini xborregos (Juan 10:14). Uma xlikana xlakata borregos lakgapaskgo xmapuchwayaninakan chu lakgankgo akxni katasani. Chatum tiku paxialhnan ktanu tanu kachikinin, akxilhli uma. Xla wa: «Xakkamaxtuniputunaw video borregos chu kkatasaniw xlakata natalakatsuwikgo, pero ni kinkastalanikgon xlakata ni xlakgapaskgo kintachuwinkan, alistalh milh chatum aktsu kgawasa tiku xmapuchwayaninakan xwanit, chu akxni xla chuwinalh tunkun stalanikgolh».

2, 3. 1) ¿La limasiyakgo xtamakgalhtawakgen Jesús pi kgaxmatkgo xtachuwin? 2) ¿Tuku naʼakxilhaw kʼuma artículo chu nema aku mima?

² Tuku akgspulalh uma chixku kinkamalakapastakayan tuku wa Jesús pi xʼamakgo tlawakgo xborregos, uma wamputun xtamakgalhtawakgen. Wa: «Nakgaxmatkgo kintachuwin» (Juan 10:16). Pero Jesús wi kʼakgapun. Wa xlakata, ¿la tlan nakgaxmatniyaw? Pulaktum wa akxni tlawayaw tuku xla kinkamasiyanin (Mat. 7:24, 25).

³ Kʼuma artículo chu nema aku mima, tlakg nalichuwinanaw makgapitsi tuku masiyalh Jesús. Chuna la naʼakxilhaw, Jesús kinkamasiyanin pi wi tuku nialh kilitlawatkan chu wi tuku kilitlawatkan. Pulana kalichuwinaw pulaktiy tuku xatlan mapuchwayanina kinkawaniyan pi nialh kilitlawatkan.

4. Chuna la wan Lucas 12:29, ¿tuku max natlawa pi “lu nalakgaputsayaw”?

⁴ (Kalikgalhtawakga Lucas 12:29). Jesús kawanilh xtamakgalhtawakgen pi “nialh xlilakgaputsakgolh” xlakata naputsakgo tuku namaklakaskinkgo chu katsiyaw pi uma tastakyaw ankgalhin lu makgtayanan. Chu maski kgalhakgaxmatputunaw, lakgachunin tuwa makgkatsiyaw. ¿Tuku xlakata?

5. ¿Tuku lu lilakgaputsakgo makgapitsi natalan?

 ⁵ Max makgapitsi natalan lu lilakgaputsakgo xlakata nakgalhikgo liwat, lhakgat chu anta niku natawilakgo. Max anta kxkachikinkan ni anan lhuwa tumin. Max tuwa kakitaxtuni natlajakgo tumin xlakata nakuentajtlawakgo xfamiliaskan. O max tiku xmasta tumin kfamilia nilha chu amakgapitsi nialh kaʼakchani xtuminkan. Chu xlakata tajatat COVID-19 lhuwa makgatsankgakgonit xtaskujutkan (Ecl. 9:11). Komo chuna titaxtumaw, ¿la tlan nastalaniyaw xtastakyaw Jesús xlakata nialh nalilakgaputsayaw?

6. Kalichuwinanti tuku akgspulalh apóstol Pedro akgtum kilhtamaku.

⁶ Akgtum kilhtamaku, akxni lu tliwakga xʼunama anta kpupunu xalak Galilea, apóstol Pedro chu amakgapitsi apóstoles xtajumakgo kʼakgtum barco chu akxilhkgolh la Jesús xtlawama kxkgalhni chuchut. Pedro wa: «Malana, komo xlikana wix, kakintasanipi xlakata naklakganachan kxkgalhni chuchut». Jesús wanilh: «¡Katat!», «Pedro takutli kbarco chu lakgalh Jesús kxkgalhni chuchut. Pero akxni akxilhli tliwakga un, tsukulh pekuan. Chu akxni tsukulh lakgtsankga kchuchut, pixlanka wa: “¡Malana, kakilakgmaxtu!”». Jesús «stonkgli xmakan» chu lakgmaxtulh. Kaʼakxilhwi pi Pedro tlan tlawalh kxkgalhni chuchut maski tliwakga xʼunama akxni lakglakalh Jesús; pero akxni  akxilhli la tliwakga xʼunama makgatlajalh tapekua chu tsukulh lakgtsankga kchuchut (Mat. 14:24-31).

7. ¿Tuku kinkamasiyaniyan xliʼakxilhtit Pedro?

⁷ Tuku akgspulalh Pedro wi tuku kinkamasiyaniyan. Akxni takutli kbarco chu tsukulh tlawan kxkgalhni chuchut, ni lakpuwa pi xʼama lakgtsankga kchuchut. Xla xchamputun asta niku xya Jesús, pero nichuna tlawalh xlakata tsukulh akxilha la tliwakga xʼunama. Xlikana, akinin nila tlawanaw kxkgalhni chuchut, pero na titaxtuyaw taʼakglhuwit nema liʼakxilha kintakanajlakan. Komo nialh wa akxilhaw Jehová chu xtamalaknun natsukuyaw taxlajwaniyaw kkintakanajlakan. Kaxatukawa taʼakglhuwit nema nakinkalakgchinan, chuntiya wa kaʼakxilhwi Jehová chu la tlan nakinkamakgtayayan. ¿La tlan chuna natlawayaw?

8. ¿Tuku nakinkamakgtayayan xlakata ni lu nalilakgaputsayaw tuku maklakaskinaw?

⁸ Pulaktum tuku nakinkamakgtayayan xlakata nialh lu nalakgaputsayaw wa pi nalipawanaw Jehová. Kalakapastakwi pi xapaxkina kinTlatkan kinkamalaknuniyan pi komo wa pulana wiliyaw xla nakinkamaxkiyan tuku maklakaskinaw (Mat. 6:32, 33). Xla ankgalhin makgantaxtinit uma (Deut. 8:4, 15, 16; Sal. 37:25). Komo Jehová kakuentajtlawa tsiktsi chu xanat, ni kililakgaputsatkan xlakata tuku naliwayanaw o tuku nalilhakgananaw (Mat. 6:26-30; Filip. 4:6, 7). Chuna la tapaxkit tlawa pi natlatni nakamaxkikgo xkamanan tuku maklakaskinkgo, tapaxkit na natlawa pi kinTlatkan xalak akgapun nakamaxki tuku maklakaskinkgo xlakskujnin. Chuna, liwana kakatsiw pi Jehová nakinkakuentajtlawayan.

9. ¿Tuku katsiniya xlakata tuku akgspulalh akgtum tamakgaxtokgat?

⁹ Kalichuwinaw tuku masiya pi Jehová tlan masta tuku maklakaskinaw. Akgtum tamakgaxtokgat nema skujnanimakgo Jehová putum kilhtamaku alh liwaka akgtum hora kxalakgwan xputlawkan xlakata naʼankgo katiyakgo natalan lakpuskatin tiku xlamakgo kʼakgtum campo de refugiados xlakata xkalinkgolh ktamakxtumit. Tala wa: «Akxni sputli tamakxtumit, kkawaniw natalan pi tlan xakkaw kchiki xlakata akxtum xakwayaw, pero alistalh klakapastakwi pi nitu xakkgalhiyaw». ¿Tuku xʼamakgo tlawakgo? Tala wampa: «Akxni kchaw kchiki, anta kmalakcha xwilakgolh akgtiy laklanka bolsas niku xtajumakgo lhuwa liwat. Ni xakkatsiyaw tiku xlinkgonit. Jehová kinkakuentajtlawan». Titaxtulh kilhtamaku, xputlawkan uma tamakgaxtokgat lakxlalh. Xlimaklakaskinkgo xlakata naʼankgo lichuwinankgo Dios, pero ni xkaʼakchani tumin xlakata xmakaxtlawinankgolh. Wa xlakata, linkgolh kʼakgtum taller xlakata xkawanika la xlilhuwa xkamatajika komo xkakaxtlawanika. Chu chalh chatum chixku tiku kgalhskininalh tiku xla xwanit uma putlaw. Tala wa pi xla xwanit chu xtalakaskin pi xkaxtlawaka. Chixku kgalhtinalh: «Nitu wamputun. Kimpuskat lakaskin akgtum putlaw la uma. ¿La xlilhuwa tumin limastaya?». Tumin nema listalh xputlaw, akchanilh xlakata tlan xtamawalh atanu. Tala wa: «Akxni sputli uma kilhtamaku, lu xakpaxuwamaw. Xakkatsiyaw pi uma chuna xlanit xlakata wa Jehová tiku kinkamakgtayayan».

10. ¿La kinkamakgtayayan tuku wan Salmo 37:5 xlakata nialh nalilakgaputsayaw tuku maklakaskinaw?

¹⁰ Akxni kgaxmatniyaw xatlan mapuchwayanina chu nialh lu lilakgaputsayaw tuku maklakaskinaw, liwana nakatsiyaw pi Jehová nakinkamaxkiyan tuku namaklakaskinaw (kalikgalhtawakga Salmo 37:5; 1 Ped. 5:7). Kalilakpuwaw tuku tuwa titaxtukan nema lichuwinaw  kpárrafo 5. Max asta la uku Jehová maklakaskinit tiku pulalin kifamiliajkan o malana tiku taskujaw xlakata nakinkamaxkiyan tuku maklakaskinaw chali chali. Chu komo tiku  pulalin familia nialhla lin kchiki tuku maklakaskinaw o makgatsankganitaw kintaskujutkan, Jehová wi tuku natlawa xlakata nakinkamaxkiyan tuku maklakaskinaw. Xlikana pi chuna natlawa. La uku kalichuwinaw atanu tuku xatlan mapuchwayanina kinkawaniyan pi nialh kilitlawatkan.

11. Chuna la wan Mateo 7:1, 2, ¿tuku wa Jesús pi nialh kilitlawatkan, chu tuku xlakata max tuwa namakgkatsiyaw?

¹¹ (Kalikgalhtawakga Mateo 7:1, 2). Jesús xkatsi pi xlakata latamanin makglakgalhinanin lismaniyaw kaʼakxilhniyaw amakgapitsin tuku nitlan tlawakgo. Wa xlakata wa: «Nialh kalakputsanantit». Chu maski liskujaw xlakata nialh nakalakputsananiyaw amakgapitsi natalan, min kilhtamaku chuna tlawayaw. ¿Tuku tlan natlawayaw xlakata uma? Nakgaxmatniyaw Jesús chu naliskujaw xlakata nialh nalakputsananaw.

12, 13. ¿La kinkamakgtayayan xliʼakxilhtit Jehová nialh nakalakputsananiyaw amakgapitsin?

¹² Nakinkamakgtayayan nalilakpuwanaw xliʼakxilhtit Jehová, xlakata xla akxilha laktlan tayat nema kgalhikgo amakgapitsin. Chuna likatsinilh mapakgsina David, tiku tlawalh laklanka talakgalhin. Akgtum liʼakxilhtit, tatlawalh talakgxtumit nema ni xlitatlawat Bat-Seba chu asta mamakgnininalh xchixku (2 Sam. 11:2-4, 14, 15, 24). Xlakata uma, ni kajwatiya xʼakstu tlawanika tuku nitlan, na tlawanilh tuku nitlan xfamilia chu amakgapitsi xlakpuskatin (2 Sam. 12:10, 11). Atanu kilhtamaku ni limasiyalh pi xlipawan Jehová xliputum xnaku akxni maputlakgeninalh putum soldados xalak Israel. Max tatlankit tlawalh pi xkalipawa ksoldados. ¿Tuku kitaxtulh? Nikgolh 70,000 israelitas kaj xlakata akgtum tajatat (2 Sam. 24:1-4, 10-15).

¹³ Komo anta xtilatamaw kʼIsrael ama kilhtamaku, ¿la xtilakpuwaniw David? ¿Xtilakputsananiw chu xtilakpuwaw pi ni xlakgchan pi Dios xlimasiyanilh talakgalhaman? Jehová nichuna lakpuwa. Wata wa lilakpuwa pi David ni xmakgxtakgnit putum kxlatamat chu xlikana nitlan xlimakgkatsi xtalakgalhin. Wa xlakata tapatilh laklanka xtalakgalhin. Xkatsi pi David lu xpaxki chu xtlawaputun tuku tlan. ¿Ni xlikana pi lu paxtikatsiniyaw Dios xlakata akxilha laktlan tayat nema kgalhiyaw? (1 Rey. 9:4; 1 Crón. 29:10, 17).

14. ¿Tuku kamakgtayanit makgapitsi natalan xlakata nialh nakalakputsananikgo amakgapitsin?

¹⁴ Komo Jehová kaʼakgatekgsni xamakglakgalhinanin latamanin, akinin na kiliʼakgatekgsnitkan amakgapitsin chu kiliʼakxilhatkan laktlan tayat nema kgalhikgo. Ni tuwa kitaxtu naʼakxilhaw tuku nitlan tlawakgo amakgapitsin chu nitlan nakalichuwinanaw. Pero tiku stalani xliʼakxilhtit Jehová tlan katalalin amakgapitsin maski katsi tuku nitlan tlawakgo. Akgtum diamante nitlan tasiya akxni nina makxakakanit, pero tiku skgalala ni kajwatiya akxilha chuna la tasiya, wata katsi pi lu stlan natasiya akxni namakxakakan chu lhuwa xtapalh nakgalhi. Xtachuna la Jehová chu Jesús, ni kajwatiya kiliʼakxilhatkan chuna la tasiyakgo, wata kiliʼakxilhatkan laktlan tayat nema kgalhikgo latamanin.

15. ¿Tuku xlakata akxni lilakpuwanaw tuku max titaxtumakgo amakgapitsin kinkamakgtayayan ni palha nakalakputsananiyaw?

¹⁵ Lu tlan pi naʼakxilhaw laktlan tayat nema kgalhikgo amakgapitsin, pero ¿tuku atanu nakinkamakgtayayan ni palha nakalakputsananiyaw? Nalilakpuwanaw la max wi xlatamatkan, kalichuwinaw akgtum liʼakxilhtit. Akgtum kilhtamaku, akxni Jesús xwi ktemplo, akxilhli chatum puskat tiku xninita xchixku chu ni lhuwa tuku xkgalhi mujulh okgxtiy laktsu tumin nema ni lhuwa xtapalh xwankgonit, anta niku xmujukan tumin ktemplo. Xla  ni kgalhskininalh tuku xlakata ni tlakg lhuwa xmujunit. Ni wa akxilhli la xlilhuwa tumin xmujunit, wata kuentajtlawalh tuku xlakata chuna xtlawanit chu tuku xtitaxtuma, chu lu tlan lichuwinalh xlakata xtlawanit putum tuku xmatlani (Luc. 21:1-4).

16. ¿Tuku masiyaniyan tuku titaxtulh Verónica?

¹⁶ Tuku titaxtulh Verónica kinkamasiyaniyan pi lu xlakaskinka nalilakpuwanaw la max wi xlatamatkan amakgapitsin. Kxcongregación xwi chatum tse tiku xʼakstu xmakgastakma xkgawasa. Verónica wan: «Xaklakpuwan pi ni lhuwa tuku xtlawamakgo kcongregación chu wa xlakata nitlan tuku xakkalakpuwani. Pero akgtum kilhtamaku akxtum ktaʼalh talichuwinan Dios uma tala. Kilitachuwinalh putum tuku tuwa xtitaxtuma xlakata xkgawasa xkgalhi akgtum tajatat kxtalakapastakni. Lu lhuwa kilhtamaku xlimaxtu xlakata xmaxkilh tuku xmaklakaskin chu tuku xla xtakanajla. Xmin kilhtamaku, xlakata xkgawasa xtatatla xliʼanat xwanit ktamakxtumit kʼatanu congregación». Verónica wan: «Nikxni klakpuwa pi lu tuwa xwanit xlatamat. Xlakata putum tuku tlawa xlakata naskujnani Jehová, la uku tlakg xlakaskinka kakxilha chu tlakg kmaxki kakni».

17. ¿Tuku kinkalimapakgsiyan Santiago 2:8, chu la tlan nakgalhakgaxmataw?

¹⁷ ¿Tuku kilitlawatkan komo akxilhaw pi lakputsananimaw chatum tala? Kalakapastakwi pi kilipaxkitkan kinatalankan (kalikgalhtawakga Santiago 2:8). Nachuna, kilitlawanitkan  oración Jehová chu kilitasaskinitkan pi kakinkamakgtayan xlakata nialh nalakputsananaw. Chu tlan namakgantaxtiyaw tuku skinitaw kkioracioneskan komo akinin natsukuyaw tachuwinanaw uma tala. Uma max nakinkamaxkiyan talakaskin pi nalakgapasaw. Na tlan nawaniyaw pi akxtum natalichuwinanaw Dios o pi natawayanaw. Akxni tlakg nalakgapastilhayaw kintalakan, tlan nastalaniyaw xliʼakxilhtit Jehová chu Jesús chu wa naʼakxilhaw laktlan tayat nema kgalhi. Chuna nalimasiyayaw pi kgalhakgaxmatmaw xlimapakgsin xatlan mapuchwayanina: pi nialh nakalakputsananiyaw amakgapitsin.

18. ¿La limasiyayaw pi kgaxmataw xtachuwin xatlan mapuchwayanina?

¹⁸ Xtachuna la borregos kgaxmatkgo xtachuwin xmapuchwayaninakan, xtamakgalhtawakgen Jesús kgaxmataw xtachuwin. Komo liskujaw xlakata nialh lu nalilakgaputsayaw tuku maklakaskinaw chu nialh nakalakputsananiyaw amakgapitsin, Jehová chu Jesús nakinkasikulunatlawayan. Komo tapakgsiyaw kʼgrupo xla «ni xalhuwa borregos» o kʼgrupo xla «amakgapitsi borregos», putum akinin chuntiya kakgaxmatniw chu kakgalhakgaxmatwi xtachuwin xatlan kimapuchwayaninakan (Luc. 12:32; Juan 10:11, 14, 16). Kʼartículo nema aku mima, naʼakxilhaw pulaktiy tuku Jesús wa pi kilitlawatkan xtamakgalhtawakgen.