1. ¿Andisï Jesúsi uandapi eskaksï imeeri chúxapaticha ísïiska komueska karichicha?

JESÚSI uandaspti eskaksï ima ísï mítperaska imeeri chúxapaticha jingoni, ísï eskaksï karichicha na sési mítperajka imeeri karichi eranguti jingoni (Juanu 10:14). Ka i ambe ísïisti, jimbokaksï karichicha mítesïnga né enga eranguajka ka kurhajchasïndiksï imani. Kʼuiripu ma exespti eska i ambe ísïiska. Ima uandantaspti: “Uékasïreengachi grabariuani máru karichichani, peruchi no úspka úni eskajtsïni andarhierapiringa, jimbokajtsïni no míchakuspka. Jimajkani, jurhaspti tumbi sapichu ma enga imeechani eranguauenga, ueenaspti uandajpaani ka imaksï jirejiresï chúxapaspti”.

2, 3. a) ¿Nénaksï xarhatasïni Jesúsiri chúxapaticha eskaksï kurhajchasïnga imani? b) ¿Ambechi exeni jaua ini jorhenguarhikua ka máteru jorhenguarhikua jimbo?

² Ambe enga ima acheeti nitamakuarhipka, miátantasïndijtsïni ambe enga Jesúsi uandapka eskaksï úpiringa imeeri karichicha, engaksï jindeeka imeeri chúxapaticha. Uandaspti: “Kurhauatiksï juchiiti uandakuani” (Juanu 10:16). Joperu Jesúsi auandarhu jarhasti. Ísï jimbo, ¿nénachi uaa kurhajchani? Ma ambe engachi uaaka úni, jindeesti ísï úni eskajtsïni ima na jorhendaka (Mat. 7:24, 25).

³ Ini jorhengua jimbo ka máteru jimbo, exenchi jauaka máru ambe enga Jesúsi jorhentpipka. Eskachi na exeni jauaka, Jesúsijtsïni jorhendasti ambe engachi jatsika para úni ka máru ambe engachi no jatsika para úni. Orheta, ju je tsimani ambe exeni engajtsïni sánderu ambakiti karichi eranguti arhijka eskachi no jatsiska para úni.

4. Eska na arhijka Lukasʌ 12:29, ¿ambe uaa úni eskachi ‘iatiru jaakuarhini jauaka’?

⁴ (Arhinta je Lukasʌ 12:29). Jesúsi arhiaspti imeeri chúxapatichani eskaksï no ‘iatiru jaakuarhini japiringa’ imani ambe jimbo engaksï pauani pauani uétarhinchajka. Ka míteskachi eska i ambakiti konseju máeska ka eskajtsïni marhuachesïnga. Nájkirukachi uéjka ísï úni, ménisï úkua jukasïndi. ¿Andi?

5. ¿Ambe jimboksï máru erachicha kánikua uandanhiasïni?

 ⁵ Jamberiksï uánikua erachicha kánikua uandanhiajti paraksï jatsini tʼirekua, xukuparhakua ka nani irekani. Jamberijtsï jimeesïsï irekaka enga no fásiliika ánchikuarhita ma jatsini ka ini ambe jimbojtsï úkua jukanchani chaari familiani kéndani. O ima enga ánchikuarhienga para familiani kéndani, jamberi uarhinia ka ísï jimbo, nóteruksï jatsinia para ima ambe engaksï uétarhinchajka. Ka i pandemia COVID-19, ústi eskaksï uánikuecha nóteru jatsiakia ánchikuarhita ka sentabu (Ecl. 9:11). Engachi i jásï ambe nitamakuarhika o máteru ambe, ¿nénachi uaa no xáni uandanhiani jarhani eska Jesúsi na uandapka?

6. Ma xanhari, ¿ambe úkuarhinchaspi apostoli Pedru?

⁶ Ma xanhari, apostoli Pedru ka máteru apostolicha, engaksï marirhu japka jini mari de Galilea jiáni enga uinhamu tarhiani japka, exesptiksï Jesúsini itsïrhisï xanharapani jarhani. Pedru kurhakuspti: “Tata, engari tʼueka, ióarhireni parakeni nirani andarhierani itsïrhisï xanharaparini”. Enga Jesúsi arhipka “¡Ju!”, Pedru kétsespti barkurhu ka niraspti Jesúsini andarhierani itsïrhisï xanharaparini. Joperu chéspti enga exepka na enga xáni uinhamu tarhiani japka ka jimboka ueenaspka inchameni, uinhachaspti: “¡Tata, pʼímantareni!”. Jesúsi “ióxurhantaspti” ka pʼímantaspti. Enga Pedru Jesúsinku eraani japka, úspti itsïrhisï xanharani nájkiruka uinhamu  tarhiani japka, peru enga ueenapka exeni na enga xáni uinhamu tarhiani japka chéspti ka ueenaspti inchameni (Mat. 14:24-31, TNM).

7. ¿Ambejtsïni jorhendasïni Pedrueri ejemplu?

⁷ Inde ambe jingoni enga apostoli Pedru nitamakuarhipka, ambakiti ambejtsïni jorhendasïndi. Enga Pedru kétsepka barkurhu ka ueenani itsïrhisï xanharani no eratsespti eska chépiringa ka inchameni. Ima uékasïreendi niárani jima enga Jesúsi japka, peru no úspti ísï úni jimboka chéspka enga xáni uinhamu tarhiani japka. Ísïisti, juchachi no úsïnga itsïrhisï xanharani, peruchi jatsiska para mintsikani Tata Diosïni parachi úni orhepani uérakuani uandanhiatechani. Engachi nóteru eratseni jauakia ambe enga xáni úkia Tata Diosï Jeoba juchantsïni jimbo ka ambe engajtsïni ima aiachini jaka, ueenakachi nóteru xáni mintsikania Tata Diosï Jeobani. Na uéjki járhati uandanhiatechanchi jatsiani, ju je seguirini mintsikani eskajtsïni Tata Diosï Jeoba uaaka jarhuatani. ¿Nénachi uaa ísï úni?

8. ¿Ambejtsïni jarhuataa parachi no xáni uandanhiani imani ambe jimbo engachi xáni uétarhinchajka?

⁸ Ambe ma engajtsïni jarhuataaka, jindeesti mintsikani Tata Diosï Jeobani enbesi de uandanhiani jarhani. Ju je miáni eska juchaari Taati enga xáni uékpitiika aiachisïngajtsïni eska engachi mintsikaska imajtsïni iámindu ambe íntskuaka ambe engachi xáni uétarhinchajka (Mat. 6:32, 33). Jimboka desde iónisï ísï úskia (Deut. 8:4, 15, 16; Sal. 37:25). Enga Tata Diosï Jeoba kuidariuajka pájaruechani ka tsïtsïkichani, nóchi jatsika para uandanhiani ambechi tʼirea o ambechi xukuparhaa (Mat. 6:26-30; Filip. 4:6, 7). Ísï eska uékperakua na újka eskaksï taaticha íntsauaka uájpeechani ambe engaksï xáni uétarhinchajka, májkueni uékperakua úsïndi eska juchaari Taati auandaru anapu, íntsauaka imeeri marhuarichani iámindu ambe engaksï uétarhinchajka. Ísïisti, uaakachi seguru jarhani eskajtsïni Tata Diosï Jeoba méntkisï kuidariuaka.

9. ¿Ambejtsï jorhenguarhisïni chá ini ambe jingoni enga i temungurhiri nitamakuarhipka?

⁹ Ju je exeni eksperiensia ma enga xarhatajka eskajtsïni Tata Diosï Jeoba úsïnga íntskuni ambe engachi xáni uétarhinchajka. Temungurhiri ma enga tiempu kompletueri marhuani jaka, imeecheri karru jingonksï jukari ma ora niraspti paraksï pirenchichani máru paani tánguarhikuarhu, pirenchichaksï jima irekaspti nani engaksï kʼuiripuecha kuájchakukuarhijka. Erachi uandantaspti: “Enga na kʼamarhupkia tánguarhikua, arhiaspkachi pirenchichani eskaksï nipiringa juchaari kʼumanchikuarhu paraksï arhani ambe ma. Peruchi miántaspka eskachi no ma ambe jatsispka para íntsaani”. ¿Ambeksï úpirini? Erachi seguirisïndi uandantani: “Engachi niántapkia, tsimani kʼérati bolsechaksï jarhaspti puertarhu tʼirekua jingoni. Nóchi mítespka néjtsïni páchiaspi. Tata Diosï Jeobajtsïni kuidarispti”. Ísï tátsekua, i temungurhiriri karru xerekuarhespti ka ini karrunksï úrasïreendi para nirani aianhpini, peruksï no jatsispti sentabu paraksï jatsirkuarhintani. Ka taierirhuksï páspti paraksï kurhanguarhini náksï xáni jimbo jatsikuantapirini. Jiájkani, acheeti ma kurhanguarhispti, ¿neeriski i karru? Erachi arhispti eska imeerispka, joperu eska xerekuarhetixapka. Ka acheeti arhispti: “No arhiati juchiiti uarhiiti meru i jásï ka i jásï kolori ma jirinhaxati, ¿nárini xáni jimbo atarachintaa?”. Ka erachi xáni jimbo atarakuntaspti acheetini na enga xáni jimbo piántapiringa máteru karruni. Uandaspti: “Kánikuachi sési pʼikuarheraspka ima jurhiatikua. Mítespkachi eska no ískusï ísï úkuarhipka ima ambe. Tata Diosï Jeobajtsïni jarhuataspti”.

10. ¿Nénajtsïni jarhuatasïni uandakuecha engaksï Salmo 37:5 jimbo jaka parachi no xáni uandanhiani imani ambe jimbo engachi uétarhinchajka?

¹⁰ Engachi kurhajchajka sánderu ambakiti karichi erangutini ka nóchi jukari uandanhiani imani ambe jimbo engachi uétarhinchajka, uaakachi seguru jarhani eskajtsïni Tata Diosï  Jeoba íntskuaka ambe engachi xáni uétarhinchajka (arhinta je Salmo 37:5; 1 Ped. 5:7). Ju je eratseantani imani uandanhiatechani engachi  párrafu 5 jimbo uandaaka. Jamberi Tata Diosï Jeoba familieri orhejtsïkutini o patronini ma úrani jati parajtsïni íntskuni ambe engachi xáni uétarhinchajka pauani pauani. Joperu enga familieri orhejtsïkuti nóteru újkia kéndani imeeri familiani o nóteru jatsinia ánchikuarhita, Tata Diosï Jeoba míteati néna engajtsïni íntskuaka ambe engachi uétarhinchajka. Ka ísï uaati. Iásï ju je exeni ambe engajtsïni sánderu ambakiti karichi eranguti arhijka eskachi no uaaka.

11. Eska na arhijka Mateu 7:1, 2, ¿ambe uandaspi Jesúsi eskachi no jámapiringa úni ka andisï úpirini úkua jukani?

¹¹ (Arhinta je Mateu 7:1, 2). Jesúsi mítespti eskachi kʼuiripuecha no perfektueska ka eskachi sánderu imani ambe exesïnga engaksï máteruecha no sési újka. Jimbosï uandapti: “Asï jáma je jusgarpini”. Ka nájkirukachi jánguarhintajka no jusgariuani erachichani, ménisïchi no úsïnga ísï úni. Peru engachi ísï úska, ¿ambechi uaa úni? Kurhajchani Jesúsini ka jánguarhintani nóteru jusgarpinia.

12, 13. ¿Nénajtsïni jarhuatasïni ima ambe enga Tata Diosï Jeoba újka parachi no jusgariuani máteruechani?

¹² Marhuachesïndijtsïni Tata Diosï Jeobaeri ejempluni eratsentani, jimboka ima, imani ambe exesïnga máteruecheri ambe engaksï sési újka. Ísï úspti rei Dabidi jingoni, enga ménisï kánikua no sési ambe úpka. Ima ísku jándikua ambe niátaspti Bat-Seba jingoni ka asta úspti eskaksï uándikupiringa acheeti jémbani (2 Sam. 11:2-4, 14, 15, 24). Ini ambe jimbo, no solu imajku no sési úkuarhinchaspti, ístu no sési úkuspti imeeri familiani ka máteru imeeri uarhiiti jémbechani (2 Sam. 12:10, 11). Máteru xanhari, no xarhataspti eska mintsikasïreenga Tata Diosï Jeobani, jimboka sensu ma úspka enga no Tata Diosï arhipka eska úpiringa para Israeli anapu ejersituni miiuni, jamberi kʼéramakuarhini japti jimboka kʼéspka imeeri ejersitu. ¿Ka ambe úkuarhispi? Eskaksï 70,000 israelitecha uarhispka pʼamenchakua ma jimbo (2 Sam. 24:1-4, 10-15).

¹³ Engachi Israeli irekani japiringa imani jurhiatikuecha jimbo, ¿ambechi eratsepirini Dabidiri ambe? ¿Jusgaripirinchi ka arhini eska no jukanchaspka eska Tata Diosï pʼamojkupiringa? Tata Diosï Jeoba no ísï eratsespti. Sánderu sési, exespti eska Dabidi méntkisï kurhajchaspka imani ka eska mintsita jingoni móantaspkia. Jimbosï puákuntapti imeeri pekaduechani. Mítespti eska Dabidi kánikua xénchasïreenga imani ka eska uékasïreenga imani ambe úni enga sési jaka. ¿A no eskachi agradesidu jarhaska Tata Diosï jingoni enga imani ambe exejka engachi sési újka? (1 Rey. 9:4; 1 Crón. 29:10, 17).

14. ¿Ambe jarhuataaski máru erachichani paraksï nóteru jusgariuania máteruechani?

¹⁴ Enga Tata Diosï Jeoba kurhangukuajka kʼuiripuechani engaksï no perfektueka, juchajtuchi jatsiska para májkueni úni máteruecha jingoni ka imani ambe exeni engaksï sési újka. No úkua jukasti imani ambe exeni engaksï máteruecha no sési újka ka arhinchaani. Peru ima enga jánguarhintajka ísï úni eska Tata Diosï Jeoba, úsïndi sési pájperani máteruecha jingoni nájkiruka mítejka eskaksï máteruecha no úsïnga iámindu ambe sési úni. Diamanti ma enga nótki sési jájkunhantajka no sési xarharasïndi, peru kʼuiripu jánhasti ma no indeni ambejku exesïndi ka mítesti na enga xarharaaka diamanti enga sési jájkunhantaakia. Májkueni eska Tata Diosï Jeoba ka Jesúsi, jatsiskachi para sési járhati kualidadichani exekuani kʼuiripuechani ka no imani ambejku engaksï xarhatajka.

15. Engachi eratsentajka na engaksï nitamakuarhini jarhajka máteruecha, ¿nénajtsïni jarhuataa no jusgarpini?

¹⁵ Engachi jánguarhintaakia ambakiti ambe exekuani máteruechani, ¿ambeterujtsïni jarhuataa parachi no jusgarpini? Jánguarhintani  eranhaskani na engaksï irekuarhika. Ju je exeni ejemplu ma. Ma jurhiatikua enga Jesúsi templurhu japka, exespti uarhiitini ma enga tsimani moneda sapirhati jatsiraapka jima engaksï jatsireenga sentabu. Ima no kurhamarhispti andisï xántku jatsirapi. Enbesi de eratseni jarhani andisï xántku jatsirapi, Jesúsi exespti na enga nitamakuarhini japka ka andisï íntspipi sentabu ka sési jásï ambe uandaspti imani ambe jimbo enga úpka (Luk. 21:1-4).

16. ¿Ambeksïni jorhendasïni i ambe enga Verónica nitamakuarhipka?

¹⁶ Ambe enga Verónica nitamakuarhipka, xarhatachesïndijtsïni eska jukaparhakueska eranhaskani na engaksï irekuarhini jarhajka máteruecha. Imeeri kúnguarhikuarhu, pirenchi ma jarhaspti enga imeeri uájpa jingontku irekapka. Verónica uandantasïndi: “Ísï exesïreenga enajkiksï no sáni jarhuajpeni kúnguarhikuarhu, jimbosïni no sési ambe eratsenga imeecheri ambe. Peru, ma jurhiatikua imani pirenchi jingoni uéraspka aianhpini. Ka aiangusptireni na enga xáni uánikua uandanhiatechani jatsiapka jimboka uájpa pʼamenchakua ma kámasïreenga enga arhinhajka autismo. Kánikua jánguarhintasïreendi para íntskuni uájpani ambe enga xáni ima uétarhincheenga ka ístu paraka sési japiringa Tata Diosï Jeoba jingoni. Ménisï uájpeeri pʼamenchakua jimbo, máteru kúnguarhikua jingoni nirasïreendi tánguarhini”. Verónica seguirisïndi uandantani: “No méni eranhaskaxapka na enga xáni uánikua uandanhiatechani jatsiapka. Iásï jukaparharasïngia ambe enga xáni újka pirenchi para Tata Diosï Jeobani marhuakuni”.

17. ¿Náki juramukua jarhaski Santiagu 2:8 jimbo ka nénachi uaa ísï úni?

 ¹⁷ ¿Ambechi jatsipirini para úni engachi kuenta íntskukuarheska eskachi jusgarixaka erachini ma? Ju je miáni eskachi jatsiska para xénchaani juchaari erachichani (arhinta je Santiagu 2:8). Ístu, uaakachi kómarhini Tata Diosï Jeobani ka arhini eskajtsïni jarhuataaka parachi nóteru jusgarinia. Ka ísïchi uaaka úni eskachi na kurhajkuarhika kómarhikua jimbo ka niranchi uandontskuarheni erachi jingoni. Jamberichi ísï niáraka sánderu sési míteni erachini. Ístuchi uaaka pʼímarhini parachi márku aianhpini o tʼireni. Engachi sánderu sési míteni jauaka erachini, májkuenchi úni jauaka eska Tata Diosï ka Jesúsi, jánguarhintani imani ambe exekuni enga sési újka. Engachi ísï úska kurhajchanchi jauaka sánderu ambakiti karichi erangutiri juramukuani enga uandajka asï jáma je jusgarpini.

18. ¿Nénachi xarhatasïni eskachi ísï úsïnga ambe engajtsïni sánderu ambakiti karichi eranguti arhijka?

¹⁸ Ísï eskaksï karichicha na kurhajchajka imeeri erangutini enga ima uandajpaajka, Jesúsiri chúxapatichachi ísï úsïnga ambe engajtsïni ima arhijka. Engachi jánguarhintaska no xáni uandanhiani imani ambe jimbo engachi uétarhinchajka ka no jusgariuani máteruechani, Tata Diosï Jeoba ka Jesúsijtsïni újchakuraati. Ju je iáminduecha seguirini jarhani ísï úni eskajtsïni na arhijka sánderu ambakiti karichi eranguti, nájkirukachi “namunitu karichicha” o “máteru karichicha” jingoni kuenta úkuarhijka (Luk. 12:32; Juanu 10:11, 14, 16). Máteru jorhenguarhikua jimbo, exeakachi tsimani ambe enga Jesúsi uandapka engaksï imeeri chúxapaticha jatsika para úni.