1. Ngei Djesu akaezanisa afundi ake ne mabira?

DJESU akaezanisa ushamwari waainga nawo ne afundi ake ne rudo riri pakati pe muushi ne mabira ake. (Ju. 10:14) Izvi zvino musoro. Ngekuti bira rinonyasa kuziya izwi re muushi waro. Kuita hingana mabira afundi anonyasa kuziya izwi re muushi wawo. Muvhakaci umweni wakanyasa kuzviona zveciitika, iyena unoti: “Takaedza zviri zvese kuti mabira amweni agume padhuze kuti tiabvise vhidhiyo asi awona aazi kutikhwederera padhuze. Asi pakandoguma mudjaha umweni waiusha mabira aya, paakatanga kudainza, mabira ese akatanga kumuteera.”

2-3. (a) Ateeri a Djesu anopangidza kudini kuti arikupurutana izwi ra Djesu? (b) Ticafundei mu fundo ne inoteera?

² Experiencia iyi inotiedzurira masoko akabhuya Djesu ku afundi ake. Ayena akati: “Anopurutana izwi rangu.” (Ju. 10:16) Asi tingapurutana kudini izwi ra Djesu zvaari kudenga? Tinopurutana izwi re muushi wedu kana tikaseenzesa zvaakatifundisa mu upenyu wedu.—Mt. 7:24, 25.

³ Mu fundo ino ne inoteera, ticafunda zviro zvakafundiswa na Djesu. Hingana zvaticaona Djesu akareketa zviro zvatisikadikani kuita uye ne zviro zvatinodikana kuita. Ticatanga kureketa zviro zviiri zvakareketwa ne muushi wedu akanaka zvatinodikana kuima kuita.

4. Maererano na Ruka 12:29, zvinyi zvingaita kuti tinyanye “kudzirhya mwoyo”?

⁴ Erengai Ruka 12:29. Djesu akabvunza ateeri ake kuti aidikana “kuima kudzirhya mwoyo” nge ndaa ye zviro zvekurarama nazvo. Tinoziya kuti mazano a Djesu akatinakira nguwa  dzese. Ndiyo ndaa, tinodikana kuwaseenzesa mu upenyu wedu. Asi nguwa dzimweni zvingatishuphira kuzviita. Asi ngei?

5. Ngei anhu akawanda ecinetseka kuti aone zviro zvekurarama nazvo?

 ⁵ Anhu akawanda anodzirhya mwoyo ne zviro zve zuwa ne zuwa, zvakadai hingana zvekurhya, zvekupfeka uye nepokugara. Anhu amweni anorarama mu nyika ino urombo wakanyanyisa maningi uye inoshupha kuona mabasa. Mugariro wakadaro unoshupha kuti akwanise kuriritira mhuri dzawo. Uye nguwa dzimweni musoro we mhuri kana akafa, zvingaita kuti mhuri inetseke ne zviro zvekurarama nazvo. Uye nge ndaa ye nhenda ye COVID-19, anhu akawanda akaruza mabasa awo zveciita kuti anhu akawanda akonerhwe mare yekudziriritira. (Mup. 9:11) Kana mecisongana ne mugariro we zviro wakadaro munodikana kuitei kuti muteere zano ra Djesu uye muime kudzirhya mwoyo?

6. Panganidzai zvakaitika na Pedru paainga ri mu bahari reku Garirea.

⁶ Pa nguwa imweni muphostori Pedru ne aphostori amweni ainga ari pakati pe dutu mu Bahari re Garirea paakaona Djesu ecihamba pamusoro pe mvura. Pedru wakati: “Tenzi kana muri imwimwi, ndibvunzei kuti ndiwiye kamuri ndecihamba pamusoro pe mvura.” Djesu akati “uya,” Pedru wakabuda mubharko uye “wakahamba pamusoro pe mvura ecienda kuna Djesu.” Asi onai zvakazoitika. “Eciringira dutu, wakatya. Paakatanga kundondomera, wakakhuwa ne izwi guru eciti: ‘Tenzi ndiponesei’” Djesu akabata nyara ya Pedru kuti asandondomere. Zvinoshamisa kuona kuti Pedru wakakwanisa basi kuhamba pa musoro pa nguwa yainga  akanangira Djesu. Asi paakandoringira dutu, wakatya uye ondondomera.—Mt. 14:24-31.

7. Tinofundei ne zvakaitika na Pedru?

⁷ Tinokwanisa kufunda ciro cinokosha pane zvakaitika na Pedru. Pedru paakabuda mubharko otanga kuhamba pamusoro pe mvura, aazi kutomborangarira kuti waizowarairhwa otanga kundondomera. Pedru waida kuguma kuna Djesu ecihamba pamusoro pe mvura. Asi wakaarairhwa otanga kunangira dutu. Kuita hinga Pedru waidikana kugara ne kutenda kuti akwanise kuhamba pamusoro pe mvura, susu tinodikanawo kugara ne kutenda kuti tikwanisane ne zvinetso zvedu. Kana tikasama kukanda ndangariro dzedu pana Djehovha ne zvipikirhwa zvake, tinopedzesera taakundondomera. Ndiyo ndaa, tinodikana kukanda ndangariro dzedu pana Djehovha togonda kuti acatibetsera pa zvinetso zvedu. Asi tingazviita kudini?

8. Ngei tisikadikani kunetseka nge zviro zve zuwa ne zuwa?

⁸ Panokudzirhya mwoyo nge matambudziko edu, tinodikana kugonda Djehovha. Edzurirai kuti Baba edu ane rudo Djehovha anotigondesa kuti acatipasa zviro zvatinoda zve zuwa ne zuwa kana tikakanda zviro zvekunamata pa mbuto yekutanga. (Mt. 6:32, 33) Nguwa dzese Djehovha anodzadzisa zvaanopikira. (Dhe. 8:4, 15, 16; Pis. 37:25) Kana Djehovha eciriritira shiri ne maruwa tingagonda kuti ayena acatiriritirawo pa zviro zvatinoda! (Mt. 6:26-30; Afi. 4:6, 7) Atidikani kudzirhya mwoyo nge ndaa yazvo. Kuita hinga abereki anoriritira ana awo pa zviro zvaanoda, Baba edu e kudenga ane rudo nesu acatiriritira pa zviro zvatinoda zvekurarama nazvo!

9. Mungafundei ne zvakaitika ne kazado iyi?

⁹ Onai muezaniso unopangidza kuti Djehovha anokwanisa kutiriritira pazviro zvatinoda. Kazado imweni inoseenza mu nguwa yakadzara, yakatekenya karu ke nguwa 1 yecienda kotora hanzvadzi dzimweni dzainga ku mbuto inoraramira anhu anotiza hondo. Aiyatwara kuti aende ku misangano. Hama iyona yakati: “Mumasure me musangano takapika hanzvadzi idzona kuti tirhye pamwepo, pedzepo takaona kuti tainga tisina ciro cekuapasa.” Kazado iyi yaizoitei? Hama iyona inopanganidza yeciti: “Petakahwirira ku nyumba, takagumira zvimabudu zviiri zvakadzara ne zvekurhya zviri pa musuo we nyumba. Dakara nyamasi atizii kuti ndiyani akazviunzisa. Zvezvirokwazvo Djehovha akatiriritira.” Paapapera nguwa, karu yawo yakagudjuka. Karu iyona yaiabetsera basa rekuparidzira, asi ainga asina mare yekuigadzirisa. Karu peyainga iri ku ofisina, pakaguma mwanarume umweni wakabvunzisa kuti: “Ndiyani muridzi we karu iyi?” Hama iya yakadaira yeciti ngeyangu, asi inodikana kugadziriswa. Mwanarume uya wakati: “Usanetseke, ngekuti mukadzi wangu urikupvsaka karu yakadai. Urikuda kunditengesera ne marei?” Hameyo yakagara ne mare inokwana kutengazve karu imweni: “Atikwanisi kupanganidza kupfara ketakaita pa zuwa irona. Zviro izvona azvizi kundoitikawo hazvo basi. Yainga iri nyara ya Djehovha.”

10. Tecirangarira Pisarema 37:5 tingagara ne rugondo ripi?

¹⁰ Kana tikapeta masimba kuti tizwire masoko akabhuya na Djesu e kusama kudzirhya mwoyo nge zviro zvekurarama nazvo Djehovha acatibetsera ne zvese zvatinoda. (Erengai Pisarema 37:5; 1Pe. 5:7) Edzai kurangarira zvinetso zvatafunda pa  ndima ye ci 5. Zvingaita kuti dakara nyamasi Djehovha arikuseenzesa imwe nhengo ye mhuri yenyu kuti amupase zvekurhya. Pamweni munobasa  riri kumubetsera kuti muriritire mhuri yenyu. Hino kana mukaruza basa, kana munhu arikumupasa zvekurhya akaima kumubetsera Djehovha acarumbwa ecimuriritira ne mishobo yakasiyana-siyana. Tingagara necokwadi cekuti acazviita. Parizvino ngationei ciro cimweni cakareketwa na Djesu catisikadinai kuita.

11. Mateu 7:1, 2, Djesu akati tinodikana kuima kuitei, uye ngei zvisipi nyore nguwa dzimweni?

¹¹ Erengai Mateu 7:1, 2. Djesu aiziya kuti anhu aazi kukwana, aona ano musambo wekukanga ndangariro dzawo pa zviro zvakashata zvinoizwa ne amweni. Ndiyo ndaa ayena akati: “Imai kutonga amweni.” Tinopeta masimba kuti tisatonge hama dzedu. Asi zvinotsukwarisa kuti pamweni paya atikwanisi kuita izvona ngekusama kukwana. Tinodikana kuitei kana tikaona kuti tinomusambo wekutonga amweni? Tinodikana kupurutana izwi ra Djesu, toima kutonga amweni.

12-13. Muezaniso wa Djehovha ungatibetsera kudini kuti tisatonge amweni?

¹² Tinobetsereka patinorangarira muezaniso wa Djehovha. Ayena anokanda ndangariro dzake pa zviro zvakanaka zvinoizwa ne anhu. Tinozviona nge mabatiro aakaita Mambo Dhavhidhi, mwanarume wakaita zvishaishi zvakakura. Nge muezaniso iyena wakaita useki na Bhati-sebha, uye wakauraisa mwamuna wake. (2Sa. 11:2-4, 14, 15, 24) Dhavhidhi ne mhuri yake akanetseka kubatanidzawo akadzi ake amweni. (2Sa. 12:10, 11) Pa nguwa imweni Dhavhidhi wakaita zviro zvimweni zvaaiga asikazi kubvunzwa na Djehovha kuti aite. Wakaita kuti masurudado ese ainga mu Israeri aerengwe. Izvi zvakapangidza kuti wainga asikagondi na Djehovha. Bhaibheri aribhuyi kuti wakazviitirei. Pamweni wakazviita nge kudzikudza uye kugonda ayahondo ake ainga akawanda! Nge ndaa yazvo Djehovha akaunzisa nhenda ikauraya anhu 70 000!—2Sa. 24:1-4, 10-15.

¹³ Kudai mainga muriyo meciona zvese izvi maizorangarirei nge zva Dhavhidhi? Maizorangarira kuti Dhavhidhi waisisira kuphanicwa here? Asi Djehovha ainga asikaoni kudaro. Djehovha airangarira zviro zvese zvakanaka zvainga zvaizwa na Dhavhidhi uye kucinyuka kaainga aita. Ndiyo ndaa, Djehovha akasanangura kurekerera zvishaishi zvese zva Dhavhidhi. Ayena aizia kuti Djehovha aimuda, uye kuti aida kuita zviro zvakanaka. Tinotenda Djehovha ngekukanda ndangariro dzake pa zviro zvakanaka zvatinoita.—1Mad. 9:4; 1Mak 29:10, 17.

14. Cinyi cicatibetsera kuti tiime kutonga amweni?

¹⁴ Kana Djehovha asikaetseri kuti tigare anhu akakwana isusu atidikani kuetsera kuti hama dzedu dzigare anhu akakwana. Zviri nyore kuona zvishaishi zve amweni. Asi munhu anoteedzera Djehovha unopeta masimba kuti apindirane ne amweni pasinei ne zvishaishi zvawo. Dhiamanti risati ragadzirhwa rinonga rakashata, asi munhu unorizia unoziya kuti mumasure mekugadzirhwa ricarungama uye ricakosha maningi. Tinodikana kuita hingana Djehovha na Djesu, pane basi kunangira hope ye munhu, tinodikana kunagira mawara akanaka e munhu iyena.

15. Ngei kuzwisisa zviri kuitika mu upenyu we munhu zvingabetsa kuti tisatonge amweni?

¹⁵ Cinyizve cicatibetsera kuti tisatonge uye tisashore amweni? Edzai kurangarira upenyu we munhuwo. Onai muezaniso unoteera. Zuwa rimweni Djesu akaona mufirhakadzi ecikanda zvimare zviiri zvisikakhoshi mu tempro. Ayena aazi kudzibvunzisa kuti: “Ngei  mwanakadzi uyu aazi kupasa yakawanda?” Pane kuti agare ecirangarira zvaakapasa, Djesu akaona zvainga zviri mu mwoyo make.—Ru. 21:1-4.

16. Zvakaitika kuna Veronica zvinotifundisei?

¹⁶ Experiensia ye hanzvadzi unozwi Veronica icatibetsera kuona kuti zvinokosha kuzwisisa zvirikuitika mu upenyu we munhu. Iyona yaipinda mu ungano mainga ne hanzvadzi imweni yairera mwana wayo yega. Veronica wakati: “Zvaaita hingana wainga asikanyanyi kupinda misangano ne kubuda mu basa rekuparidzira. Nge ndaa yazvo, ndainga ndisikaaoni nge mwazvo. Zuwa rimweni ndakabuda nayo mu basa rekuparidzira, uye yakatanga kundibvunza kunoshupha kurera oga mwana wawo unocinetso ce uthongo. Iyona yaipeta masimba kuti aone zvekudziriritira zvekurarama nazvo uye zveku mwiya. Nguwa dzimweni, nge ndaa ye cinetso ce uthongo ce mwana wawo, awona aienda koopinda misangano ne ungano imweni.” Pakupedzesera Veronica wakati: “Ndainga ndisati ndazwisisa mushuphire waiita upenyu wawo. Zvino ndaakureremedza maningi hanzvadzi iyi nge zvese zvainoita kuti iseenzere Djehovha.”

17. Tiyago 2:8 inotibvunza kuti tiitei uye tingazviita kudini?

¹⁷ Cinyi catingaita kana tikaona kuti tatonga hama kana hanzvadzi? Tinodikana kuedzurira kuti tinodikana kuda hama dzedu.  (Erengai Tiyago 2:8.) Tingaitawo munamato kuna Djehovha, tecikumbira kuti tiime kutonga amweni. Zvinokosha kuedzurira kuti tinodikana kuita dii redu, ngekutora nguwa kuti tishamwaridzane ne munhu wetashora. Kana tikadaro ticanyasa kumuziya. Tingamupikawo kuti tibude tese mu basa rekuparidzira kana kurhya tese. Patinonyasa kuziya hama dzedu tinoedza kuteedzera muezaniso wa Djehovha na Djesu ngekukanda ndangariro dzedu pa zviro zvakanaka zvaanoita. Kana tikadaro tinonga tecipurutana izwi re muushi wedu Djesu, akatibvunza kuti tiime kutonga amweni.

18. Tingapangidza kudini kuti tirikupurutana izwi re muushi wedu Djesu?

¹⁸ Kuita hinga mabira anopurutana izwi re muushi wawo, isusu tinopurutana izwi ra Djesu. Kana tikaita zviri zvese kuti tisadzirhye mwoyo nge zviro zvatinoda zvekurarama nazvo uye kuima kutonga amweni Djehovha na Djesu acatikomborera. Tese isusu “cikwata cidoko” kana “mabira amweni,” tinodikana kurumbwa tecipurutana uye kuteerera izwi re muushi wedu akanaka. (Ru. 12:32; Ju. 10:11, 14, 16) Mu fundo inoteera, ticaona zviro zviiri zvakabhuiwa na Djesu zvatinodikana kuita.