1. Иисус өөреникчилерин хойларга чүге дөмейлээн?

 ИИСУС бодун кадарчыга, а өөреникчилерин хойларга дөмейлээн (Ин. 10:14). Ол дыка-ла таарымчалыг үлегер-чижек-тир. Чүге дизе хойлар бодунуң кадарчызын билир база ооң үнүн таныыр боор. Бир аян-чорукчу мынча деп үлешкен: «Бис хойларны чурукка тырттырып алыр дээш кыйгырарывыска, олар келбээн, чүге дээрге олар бистиң үнүвүстү танывас болган. А кажан бичии кадарчы оол маңнап келгеш, оларны кый дээрге, олар ооң соондан эдерип чорупканнар».

2, 3. а) Иисустуң эдерикчилери ооң сөзүн канчаар дыңнап болур? б) Бо болгаш дараазында статьяга чүнү сайгарар бис?

² Аян-чорукчунуң чугаазындан Иисустуң: «[Хойлар] база-ла Мээң үнүмнү дыңнаар» дээн сөстериниң утказын билип алыры белен боор (Ин. 10:16). Моон алгаш көөрге, Иисустуң өөреникчилери Дээргизиниң сөстерин дыңнаар ужурлуг. Ынчалза-даа Иисус ам дээрлерде болгай. Ооң үнүн канчаар дыңнап база аңаа харыылап болур бис? Бир аргазы дээрге Иисустуң чүү чүвеге өөредип турганын шинчилеп база ону бодунуң чуртталгазынга ажыглаары-дыр (Мф. 7:24, 25).

³ Бо болгаш дараазында статьяга Иисустуң, «ачылыг кадарчының», чамдык өөредиглерин сайгарар бис. Ол бистиң чүнү кылыр-кылбас ужурлуувусту чугаалаан. А бо статьяга чүнү кылып болбазывыстың дугайында Иисустуң чүү дээнин көрүптээлиңер.

4. Кижи чүү дээш дүвүреп болур? (Лука 12:29.)

⁴ Номчуптуңар: Лука 12:29. Иисус бодунуң эдерикчилерин материалдыг хереглелдер дээш сагыш човавас кылдыр оттуруп турган. Иисустуң сүмелери биске кезээде ажык-дузаны  эккээр. Ынчалза-даа дүвүрелдер дөмей-ле турар. Чүге?

5. Чамдык улус хүн бүрүде хереглелдери дээш чүге сагыш човап турар?

 ⁵ Бир кижи өг-бүлезиниң кедер хеви, чиир аъш-чеми база чурттаар бажың-балгады дээш сагыш човап турар. А өске улус ядыы чурттарда чурттап чоруур болгаш, оларга акша ажылдап алыры берге. Азы чамдык улустуң өг-бүлезин азырап турган кижизи чок апарган чадавас. COVID-19 дээш ажылы база чурттаар акшазы чок арткан улус база бар (Эккл. 9:11). Бир эвес бис база ындыг бергелерге таваржып турар болзувусса, Иисустуң «сагыш човаваңар» деп айтыышкынын канчаар сагып болур бис?

6. Пётр элчин-биле бир катап чүү болган?

⁶ Бир катап Пётр болгаш өске элчиннер Галилея хөлге эжиндирип чорда, дыка улуг хат-шуурган көдүрлүп келген. Оон олар суг кырлап кел чыдар Иисусту көрүп кааннар. Пётр Иисуска: «Дээрги, бо Силер болзуңарза, меңээ база Силерже суг кырлап чеде бээрин дужаап көрүңерем» — деп чугаалаан. Иисус: «Бээр кел!» — дээн соонда, «Пётр хемеден дүшкеш, Иисусче углай суг кырлап базыпкан». Ооң соонда чүү болган? Пётр хаттың күштелгенин көргеш, коргуксап, сугже дүжүп эгелээш: «Дээрги, мени камгалаңар!» — деп алгырыпкан. Иисус ол дораан холун сунгаш, Пётрну тудуп алган. Эскерип көрүңер даан, кажан Пётрнуң кичээнгейи Иисуска турган өйде, ол аажок улуг чалгыгларга кылаштап шыдапкан, а кичээнгейин өскээр, хат-шуурганче, углапкаш, ол кортканындан сугга дүжүп эгелээн (Мф. 14:24—31).

7. Пётр-биле болган таварылга бисти чүү чүвеге өөредип турар?

⁷ Пётр-биле болган таварылгада биске база кичээл бар. Кажан ол хемеден дүшкеш,  сугга Иисусче углай кылаштапкаш, күштүг хатты көргеш, дүжүп эгелээр мен деп, ол бодавайн турган. Ынчалза-даа, харааданчыг чүүл, Пётр чардыга берген. Бис, Пётр дег, суг кырынга кылаштавас-даа болзувусса, бүзүреливисти хынаар улуг шенелделерге таваржып болур бис. Бир эвес кичээнгейивисти Иеговадан болгаш Ооң аазаашкыннарындан өскээр углаптар болзувусса, бүзүреливис шуут кошкап каар. Чуртталгавыска хат-шуурган дег, кандыг-даа улуг бергелерге таварышкаш, Иегова бис дээш сагыш човаар деп чигзинмес ужурлуг бис. Ооң дугайында тодаргай чугаалажыптаалыңар.

8. Акша-төгерик дээш эмин эрттир дүвүревезинге биске чүү дузалаар?

⁸ Дүвүрээриниң орнунга, Иеговага бүзүрээр болзувусса эки. Дээрде Адавыс аазап турар: бир эвес бистиң чуртталгавыска бирги черге Иегованың ажыл-херээ турар болза, Ол бистиң материалдыг хереглелдеривисти хандырар (Мф. 6:32, 33). Ооң дугайында утпас болзувусса эки! Иегова Бодунуң аазаашкыннарын кезээде күүседип чоруур (Ы. х. к. 8:4, 15, 16; Ыд. ыр. 36:25). База бир чугула чүүл: Иегова куштарны ашкарып-чемгерип, база чараш кылдыр «оът-сигенни безин... хепкерер болганда», Ол бистиң дугайывыста чүге сагыш човавас деп? (Мф. 6:26—30; Флп. 4:6, 7). Ада-иелер ажы-төлүнге ынак болгаш, оларның шупту хереглелдерин хандырып турары дег, дээрде Адавыс база биске ынак болгаш, материалдыг хереглелдеривис дээш сагыш човап турар. Ийе, Иегова бисти кажан-даа кагбас деп бүзүрээр шупту чылдагааннарывыс бар!

9. Бир өг-бүле-биле болган таварылгалар чүнү бадыткап турар?

⁹ Иегова бистиң хереглелдеривис дээш сагыш човап шыдаар деп көргүскен бир чижекти көрүптээлиңер. Ол таварылга эгелекчилеп турар өг-бүле-биле болган. Бир катап олар эрги машиназынга дескеннер лагеринде чурттап турар угбаларны Хурал залынче чедирип чорааннар. Ол лагерь Хурал залындан бир шак ырак черде турган. Акывыс үлешкен: «Ужуражылга соонда бис ол угбаларны кежээки чемче чалап алган бис. Оон оларга салыптар чемивис безин чок болгай деп сактып келген бис». Оон чүү болган? Акывыс улаштыр үлешкен: «Бажыңывысче чедип кээривиске, эжик аксында долу аъш-чемниг ийи улуг пакет турган! Бис ону кым эккелгенин ам-даа билбес бис. Шак ынчаар Иегова бис дээш сагыш човаан». А элээн үе эрткенде, ол өг-бүлениң бараалгалга ажыглап турган машиназы үрелип калган. Ынчалза-даа ону кылдырар акшазы чок турган. Оон олар машиназын кылдыртырга, каш акша боорун билип алыр дээш, ону автомастерскаяже эккелген. Аңаа бир эр кижи кылаштап келгеш: «Бо кымның машиназы чүвел?» — деп айтырган. Акывыс: «Мээң машинам-дыр. Ол үрелип каан» — дээрге, ол эр кижи: «Үрелик-даа болза, ажырбас. Мээң кадайым шак-ла мындыг машиналыг болуксап турар. Өңү база ол-дур. Каш акшага садар сен?» — деп айтырган. Акывыс ол машиназын садыпкаш, чаа машина садып алган. Сөөлүнде акывыс мынча деп түңнээн: «Ол кежээ чүнү миннип турганывысты чугаалаары безин берге. Ол дээрге анаа душ бооп таварылга эвес, а Иеговадан белек-тир деп чигзинмес-тир бис».

10. Ырлар 36:5 акша-көпеек дээш сагыш човавазынга биске канчаар дузалап болур?

¹⁰ Бир эвес Иисустуң “Сагыш човаваңар” дээн сөстерин дыңнаар болзувусса, Иегова бис дээш сагыш човаар деп чигзинмейн барып болур бис (номчуптуңар: Ырлар 36:5; 1 Пет. 5:7).  Беш дугаар абзацта бижип каан бергелерни сайгарыптаалыңар. Бир эвес өг-бүлеңерни азырап турган кижи чок апарган болза азы силерни ажылыңардан үндүрүпкен болза, Иегова силерниң хереглелдериңер  дээш сагыш човап шыдавас апарган дивээни ол-дур. Ол силер дээш сагыш човаар өске арганы албан тып алыр. Канчап-даа тып алыр! Оон ыңай чүнү кылып болбазывыстың дугайында «ачылыг кадарчывыстың» чүү дээнин көрүптээлиңер.

11. Матфей 7:1, 2-ден алырга, чүнү кылырын соксадыр ужурлуг бис база ону кылыры чүге берге бооп болур?

¹¹ Номчуптуңар: Матфей 7:1, 2. Иисус ооң дыңнакчылары тергиин эвес база өскелерниң четпес талаларын эскерер сундулуг деп билип турган. Ынчангаш ол: «Кымны-даа шиитпеңер» — деп чугаалаан. Бис акы-угбаларывысты шүгүмчүлээр дээш кыспайн турар бис. Ынчалза-даа бачыттыг болгай бис. Үе-үе болгаш, улусту шиидип турар болзувусса, канчаар? Иисуска дыңнангыр болуп, ол багай шынардан адырлып алыр дээш, бар шаавыс-биле кызар болзувусса эки.

12, 13. Иегованың Давидке хамаарылгазының дугайында боданыры чүге ажыктыг?

¹² Бис Иегованың чижээнден дыка хөйнү өөренип ап болур бис. Ол бир дугаарында кижилерниң эки талаларын көрүп турар. Давидтиң чижээ ону бадыткап турар. Давид элээн каш аар бачыттарны кылган. Чижээ, ол Вирсавия-биле самыырап, безин ооң ашаан өлүртүп каан (2 Хаан. 11:2—4, 14, 15, 24). Ооң кылган херектери чүгле бодунга эвес, а өг-бүлезинге база кадайларынга дыка багай салдарны чедирген (2 Хаан. 12:10, 11). Өске бир байдалда Давидтиң Иеговага бүзүрели чедишпейн барган. Ол Иегованың чөпшээрели чокка Израильде дайынчыларның чизезин кылган. Ол үеде Давид улуургай бергеш азы бодунуң аг-шерииниң хөйүнге эмин эрттир идегей бергеш турган чадавас. Ооң частырыының хайындан 70000 израильчилер хамчык аарыгдан чок апарган! (2 Хаан. 24:1—4, 10—15).

¹³ Бир эвес силер ол үеде Израильге чурттап турган болзуңарза, Давидтиң дугайында чүү деп бодаар силер? Давид Иегованың өршээлинге төлеп чок деп санаар силер бе? Ынчалза-даа Иегова ону төлептиг деп санаан. Чүге? Чүге дээрге Ол Давидтиң хөй чылдар дургузунда шынчы бараалгап чораанын утпаан база ооң шын сеткилинден буруузунуп турганын көрүп турган. Ынчангаш Иегова Давидтиң кылган аар бачыттарын өршээпкен. Давид Аңаа дыка ынак база шын алдынарын күзеп турар деп, Бурган билир турган. Иегова эң бир дугаарында бистиң эки талаларывысты эскерип турар деп билири дыка өөрүнчүг-дүр! (1 Хаан. 9:4; 1 Чыл. 29:10, 17).

14. Өскелерни шиитпезинге биске чүү дузалап болур?

¹⁴ Иегова кижилерден тергиин чорукту манавайн турар болганда, бис база бот-боттарывыстың эки талаларывысты эскерерин кызар болзувусса эки. Биске өскелерниң багай талаларын эскерери белен. Ынчалза-даа Иегованы өттүнерин кызып чоруур кижи өскелерниң частырыгларынче кичээнгей салбас база улустар-биле эки хамаарылгалыг боор. Сиилбиттинмээн алмазты көөрге, шоолуг эвес боор. Ынчалза-даа алмазты кылайтыр хоюглаан соонда, ооң кайы хире чараш бриллиант апаарын ону сайгарар кижи билир боор. Ынчангаш бис база, Иегова биле Иисус ышкаш, улустуң эки шынарларын эскерер дээш кызаалыңар.

15. Өске улустуң байдалының дугайында бодаары чүге чугула?

¹⁵ Өске улустан хөйнү манавазынга биске чүү дузалаар? Оларның кандыг бергелерге таваржып чоруурун боданып көрүңер. Иисустуң чуртталгазынга болган бир таварылганы сактып кээлиңер. Бурганның өргээзинге ийи эң үүрмек чоос салып чыткан ядыы дулгуяк кадайны ол көрүп каан.  Ынчалза-даа: «Өргүлүң чүге ындыг эвээжил?» — деп, ол айтырбаан. Иисус херээжен кижиниң каш акша салганынче эвес, а ооң хөөнүнче болгаш байдалынче кичээнгей салган. Ынчангаш Иисус ооң беримчелиг чоруу дээш ону мактаан (Лк. 21:1—4).

16. Верониканың чугаалаан таварылгазындан чүнү билип алдыңар?

¹⁶ Өскелерниң байдалының дугайында боданыры кайы хире чугула дээрзин Верониканың чугаалаан сөстеринден көрүп болур бис. Ооң чыыжынга оглун чааскаан кижизидип чоруур бир угбавыс турган. Вероника ажыы-биле мынча деп үлешкен: «Оларны чыыштарже шоолуг келбес база Иеговага чүткүлдүг бараалгавайн турар ышкаш кылдыр көрүп турган мен. Ынчангаш оларның дугайында багай кылдыр бодап эгелээн мен. Бир катап ол угбай-биле кады суртаалдап чорупкан мен. Ол аутизм-биле аарып турар оглун канчаар азырап турарын чугаалаан. Аңаа берге-даа болза, оглу Иеговага ынак апарзын дээш, ол шыдаар-ла шаа-биле кызып чоруур болган. Оон аңгыда, оглунуң аарыы дээш олар чамдыкта өске чыыштарже барып турганнар». Ынчан Вероника мындыг түңнелге келген: «Ол угбавыстың кайы хире берге байдалга турганын билбейн турган мен. Мен ам ол угбайны дыка үнелеп, хүндүлээр мен, чүге дизе ол Иеговага бараалгаар дээш, дыка хөй күжениишкиннерни үндүрүп турар болгай!»

17. Иаков 2:8-те кандыг хоойлуну бижээн база ону канчаар күүседип болур бис?

 ¹⁷ Бир-ле акывысты азы угбавысты шүгүмчүлеп турарывысты эскерип каан болзувусса, канчаар? Чанывыста кижиге ынак болуру дээрге хоойлу деп утпас болзувусса эки. (Номчуптуңар: Иаков 2:8.) Оон аңгыда, улусту шиидер чаңдан адырлып алыр дээш, Иеговадан катап-катап дилээр ужурлуг бис. Бис ону сеткиливистен күзеп турар болзувусса, ол акывыс азы угбавыс-биле чоок билчип алыр дээш, ооң-биле хөй үени эрттирер бис. Чижээ, ону суртаалче азы дүштеки чемче чалап болур бис. Иегова биле Иисусту өттүнүп, улустуң эки шынарларын эскерер дээш кызып көрээлиңер. Шак ынчаар бис «ачылыг кадарчының»: «Кымны-даа шиитпеңер» дээн айтыышкынынга шыңгыы хамаарылгавысты көргүзер бис.

18. «Ачылыг кадарчыга» дыңнангырывысты канчаар көргүзер бис?

¹⁸ Хойлар бодунуң кадарчызының үнүн таныыр, а алыс шын христианнар Иисустуң чугаазын эдерер. Бир эвес бис хүн бүрүде хереглелдеривистиң дугайында эмин эрттир дүвүревес дээш база улусту шиитпес дээш кызып чоруур болзувусса, Иегова биле Иисус биске албан дузалаар. «Бичежек коданга-даа» азы «өске хойларга-даа» хамааржыр болзувусса, «ачылыг кадарчывыстың» үнүн дыңнап, аңаа чагыртып чоруулуңар (Лк. 12:32; Ин. 10:11, 14, 16). Дараазында статьяга Иисустуң өске ийи айтыышкынын көөр бис. Оон чүнү кылыр ужурлуувусту билип алыр бис.