1. ¿Bin yuʼun la yal te Jesús te pajalik sok tuminchijetik te jnopojeletik?

TE Jesús la spajbey skʼoplal te bin-utʼil la yil sba sok te jnopojeletik yuʼun, jich kʼoem bitʼil jtul jkanantuminchij sok te tuminchijetik yuʼun (Juan 10:14). Yuʼun-nix jich-a te bitʼil la spajbey skʼoplal, melel te tuminchijetik ya snaʼbeyik sba te jkanan yuʼunik sok ya yaʼiybeyik skʼop. Jich la sta ta ilel jtul turista. Jich la yal: «La jkʼantik te nopol ya jlokʼestik ta foto te tuminchijetik, pero maba ya xnoptsajik ta jtojoltik, melel maʼyuk yaʼiyojik te jkʼoptike. Pero ta patil, tal jtul chʼin kerem, jaʼ te machʼa ya skanantay te tuminchijetik. Pero kʼalal jajch ta yikʼel te tuminchijetik oranax talik, melel ya snaʼbeyik sba te skʼope».

2, 3. 1) ¿Bin-utʼil ya yakʼik ta ilel te jnopojeletik te ya yaʼiybeyik skʼop te Jesús? 2) ¿Bin ya kilbeytik skʼoplal ta artículo ini sok ta yan?

² Te bin kʼot ta stojol te turista-abi, ya yakʼ xjul ta koʼtantik te bin la yal te Jesús te ya spasik te tuminchijetik, te jaʼik te jnopojeletik. Jich la yal: «Ya me yaʼiybonic jcʼop» (Juan 10:16). Pero te Jesús ay ta chʼulchan. Jich yuʼun, ¿bin-utʼil-a te ya kaʼiybeytik te skʼope? Jaʼ te ya jpas ta jkuxlejaltik te bin la yakʼ ta nopel (Mat. 7:24, 25).

³ Ta artículo ini sok ta yan, ya kiltik cheʼoxeb te bin la yakʼ ta nopel te Jesús. Ya kiltik te bin la yal te Jesús te ya skʼan ya kijkitaytik spasel sok bintik-a te ya skʼan ya jpastike. Sbabial, ya kiltik chaʼchajp te bin la yal te lekil jkanantuminchij te ya skʼan ya kijkitaytik spasel.

4. Jich bitʼil ya yal te Lucas 12:29, ¿bin-a te ya yakʼ jmel koʼtantik «ta snaʼulanel»?

⁴ (Kʼopona Lucas 12:29). Te Jesús la yalbey te jnopojeletik  te manchuk ya smel yoʼtanik «ta snaʼulanel» te bin ya xtuun yuʼunik ta jujun kʼajkʼale. Ya jnaʼtik te ya xtuun kuʼuntik ta ora ini te bin la yale. Manchukme ya jkʼan ya jchʼuuntik spasel. ¿Bin yuʼun te ay wokol ya kaʼiytike?

5. ¿Bin yuʼun ya smel yoʼtan chaʼoxtul hermanoetik?

 ⁵ Ayniwan chaʼoxtul hermanoetik ya smel yoʼtanik te bitʼil ya staik te sweʼel yuchʼelik, te skʼuʼ spakʼik sok te banti ya xnainik. Repentaniwan te nación te banti yakat ta kuxinel maniwan ayuk bayal takʼin. Wokolniwan ya awaʼiy stael atakʼin yuʼun ya amakʼlin-a te afamilia. Lajniwan te machʼa ya sle te takʼin ta familia, jich yuʼun maʼyuk stakʼinik yuʼun ya sleik te bin ya xtuun yuʼunik. Jaʼnix jich ta swenta te COVID-19, ayniwan machʼatik maʼyuk yaʼtelik sok maʼyuk bin-utʼil ya staik te stakʼinik (Ecl. 9:11). Teme ay jich kʼaxem ta jtojoltike, ¿bin-utʼil ya skoltayotik te bin la yal te Jesús te manchuk ya jmel koʼtantik?

6. Chola kaʼiytik te bin kʼax ta stojol te jpuk-kʼop Pedro.

⁶ Ta jun buelta, kʼalal ayik ta barco te jpuk-kʼop Pedro sok te jnopojeletik ta mar yuʼun Galilea, la yilik te Jesús te yak ta beel ta ba jaʼ. Te Pedro jich la yal: «Cajwal, teme haʼate, hala mandar yuʼun ya xtalon ta ba haʼ ta banti ayat». Te Jesús jich la yal: «Laʼ [...]. Hich locʼ ta barco te Pedro, hahch ta behel ta ba haʼ, toj bahel ta banti ay te Jesús. Pero cʼalal la yil te tulan icʼ, xiw yuʼun, hich hahch ta mulel cohel ta haʼ, hahch ta aw: ¡Cajwal, coltayawon!». «La shach scʼab te Jesús» sok la skoltay. Te Pedro juʼ sbeel ta ba jaʼ ta swenta te la stʼojan sit ta stojol te Jesús, manchukme ay tulan yikʼal jaʼal; pero kʼalal jaʼ la yil te  tulan yikʼal jaʼal, uʼuntayot yuʼun te xiwel sok jajch ta mulel kʼoel (Mat. 14:24-31).

7. ¿Bin ya yakʼ jnoptik te ejemplo yuʼun te Pedro?

⁷ Te bin kʼax ta stojol te jpuk-kʼop Pedro, ay bin ya yakʼ jnoptik. Kʼalal lokʼ ta barco sok jajch ta beel ta ba jaʼ, maba la snop te ay bin ya xchʼaytesbot yoʼtan sok te ya xmul kʼoel. Te bin snopoj-ae, jaʼ te ya xkʼot ta banti ay te Jesús, pero maba juʼ yuʼun, melel la yil te tulan yikʼal jaʼal. Te joʼotike ma xjuʼ ya xbeenotik ta ba jaʼ, pero ya jsitintaytik wokoliletik te ya xpasot ta prueba te schʼuunel koʼtantik. Teme maba ya kakʼ jsitik ta stojol te Jehová sok te bin jamal yaloj ya spase, jich kʼoem te ya xjajchotik ta mulel kʼoel ta swenta te schʼuunel koʼtantik. Chikan biluk wokolil ya xtal ta jtojoltik, jaʼuk ya jtʼojan jsitik ta stojol te Jehová sok te bin-utʼil ya skoltayotik. ¿Bin-utʼil ya xjuʼ ya jpastik-abi?

8. ¿Bin ya skoltayotik yuʼun manchuk ya jmel koʼtantik ta swenta te bin ya xtuun kuʼuntik?

⁸ Te bin ya skoltayotik kʼalal ya jmel koʼtantik, jaʼ te ya smukʼulin koʼtantik te Jehová. Ayuk ta koʼtantik, teme jaʼ nail ya kakʼ ta jkuxlejaltik te skʼanojel yoʼtan te jTatik te ay ta chʼulchan, jamal yaloj te ya yakʼbotik te bin ya xtuun kuʼuntik ta jujun kʼajkʼal (Mat. 6:32, 33). Spisil-ora skʼotesoj ta pasel te bin yaloj ta jamal (Deut. 8:4, 15, 16; Sal. 37:25). Teme ya skanantay Jehová te jaʼmal mutetik sok te nichimetik, jaʼnix jich ya jnaʼtik ta lek te ya yakʼbotik te jweʼel kuchʼeltik sok te jkʼuʼ jpakʼtike (Mat. 6:26-30; Filip. 4:6, 7). Te skʼuxul yoʼtan te meʼil tatiletik, jaʼ ya xtijbot yoʼtanik ta yakʼbeyel te yal snichʼnabik te bin ya xtuun yuʼunik, jaʼnix jich te skʼuxul yoʼtan te jTatik ta chʼulchan, jaʼ ya xtijbot yoʼtan ta yakʼbeyel te bin ya xtuun yuʼun te j-abatetik. Jich yuʼun, seguro ayotik te ya skanantayotik te Jehová.

9. ¿Bin ya anop ta swenta te bin kʼax ta stojol te hermano sok te yiname?

⁹ Kiltik jun experiencia te ya yakʼ ta ilel te ya yakʼbotik te Jehová te bin ya xtuun kuʼuntik ta jujun kʼajkʼal. Te hermano sok te yinam te ya x-abatinik ta tiempo completo, beenik jun ora ta spokoʼ carroik yuʼun ya xbajt staik tal te hermanaetik te ayik te banti ya yichʼik akʼel te machʼatik lokʼemik tal ta slumalik, yuʼun la yikʼik bael ta tsoblej. Te hermano jich la yal: «Te kʼalal lajix koʼtantik ta tsoblej-a, la kalbeytik te hermanaetik te ya kikʼtik bael ta jnatik, yuʼun ya xweʼotik sok. Pero ta patil, jul ta koʼtantik te maʼyuk bin ay kuʼuntik». ¿Bin la spasik? Te hermano jich ya yalxan: «Kʼalal kʼootik ta jnatik, ay cheb mukʼul bolsa ta tiʼnail te nojel ta weʼelil. Ma jnaʼtik machʼa la yijkitay tey-a. Jaʼ la skanantayotik te Jehová». Cheʼoxeb kʼajkʼal ta patil, tsʼilaj scarro te hermano. Ya xtuun yuʼunik ta scholel skʼop Dios, pero maʼyuk stakʼinik yuʼun ya yakʼik ta chajpanel. Yuʼun ya snaʼik jayeb stojol ya xlokʼ ta chajpanel-a, la yotsesik ta taller. Tey-abi, tal jtul winik ta sjojkʼoyel machʼa yuʼun, te hermano la yal te jaʼ yuʼun te carro sok te ya skʼan chajpanel. Te winik jich la yal: «Maʼyuk skʼoplal. Te kinam jich ya smulan te carro ini. ¿Jayeb stojol ya awal?». Te hermano toyol tojbot te scarro yuʼun ya sman yan. Jich la yal: «Yan-nax la kaʼiy jbatik yuʼun te bin kʼot ta pasel ta kʼajkʼal-abi. Jnaʼojtik te ma jichuknax kʼot ta pasel, jaʼ la skoltayotik te Jehová».

10. Ta swenta te bin ya yal Salmo 37:5, ¿bin-utʼil ya skoltayotik yuʼun ma jmel koʼtantik ta swenta te bin ya xtuun kuʼuntik?

¹⁰ Kʼalal ya kaʼiybeytik skʼop te jkanantuminchij te jaʼ te Jehová, maba ya jmel koʼtantik ta swenta te bin ya xtuun kuʼuntik, kʼoem ta koʼtantik te jaʼ ya skoltayotik  (kʼopona Salmo 37:5; 1 Ped. 5:7). Jnop kaʼiytik te wokoliletik la kalbeytik skʼoplal ta  párrafo 5. Te Jehová jaʼniwan stuuntesoj te jolal ta familia o te jpatrontik, yuʼun ya skoltayotik ta stael te bin ya xtuun kuʼuntik ta jujun kʼajkʼal. Teme te jolal ta familia ma xjuʼ ya yakʼbotik te bin ya xtuun kuʼuntik o maʼyuk kaʼteltik, te Jehová jaʼ ya skoltayotik ta stael te bin ya xtuun kuʼuntik. Yananix skoltayotik-a. Jaʼnix jich ya kiltik te bin ya yalbotik te jkanantuminchij te bin ma skʼan ya jpastike.

11. Jich bitʼil ya yal te Mateo 7:1, 2, ¿bin la yal te Jesús te manchuk jichuk ya jpastik, sok bin yuʼun te ay wokol ya kaʼiytik spasel?

¹¹ (Kʼopona Mateo 7:1, 2). Te Jesús snaʼoj te jmulawilotik sok jaʼ ya kiltik te banti ya xchʼay te yantike. Jaʼ yuʼun jich la yal: «Ma me xawilbeyic yaʼtel yan». Manchukme ya jpastik tulan yuʼun ma jaʼuk ya kiltik te banti ya xchʼay te hermanoetik, pero ma spisiluk-ora ya xjuʼ kuʼuntik. ¿Bin ya jpastik teme ay jichotike? Jchʼam kaʼiytik te skʼop te Jesús sok jpastik tulan te lekuk te bin ya jnoptik ta stojol te yantike.

12, 13. ¿Bin-utʼil ya skoltayotik te ejemplo yuʼun te Jehová te manchuk jaʼ ya kiltik te banti ya xchʼay te yantik?

¹² Teme ya jnopilan ta koʼtantik te ejemplo yuʼun te Jehová ay bin lek ya xlokʼ kuʼuntik-a, melel jaʼ ya yil te lekil talelil yuʼun te ants winiketik. Jich la spas ta stojol te ajwalil David, manchukme bayal buelta ay bin ma lek la spas. Jich bitʼil la spas mulil sok te Bat-Seba, sok la yakʼbey ta milel te smamalale (2 Sam. 11:2-4, 14, 15, 24). Ma jaʼuknax la sta swokol yuʼun, jaʼnix jich la yakʼbey swokol te sfamilia sok te yantik yiname (2 Sam. 12:10, 11). Jaʼnix jich ma la smukʼulin yoʼtan te Jehová, kʼalal la yakʼ ta ajtayel te soldadoetik ta Israel. Jaʼniwan la stoy sba yuʼun te bitʼil ay bayal soldadoetik ta swenta. ¿Bin kʼot ta lokʼel? Jaʼ te lajik 70 mil ta tul israeletik ta skaj tulan chamel (2 Sam. 24:1-4, 10-15).

¹³ Te ayukotik ta Israel ta skʼajkʼalel-abi, ¿bin la jnoptik ta stojol te David te jichuke? ¿Jaʼbal bajt ta koʼtantik ta yilel te bin ma lek la spas sok laniwan kaltik te ma snujpʼuk te naʼbot yoʼbolil sba yuʼun te Diose? Te Jehová ma jichuk la snop stukel. Jaʼ bajt ta yoʼtan yilel te jun yoʼtan yakʼoj sba te David sok te sujtesojix yoʼtane. Jaʼ yuʼun la spasbey perdón te mulil la spase. Te Jehová snaʼoj te kʼux aʼiybil yuʼun te David sok jaʼ ya skʼan ya spas te bin lek. ¿Mabal yakuk kalbeytik wokol te Jehová te jaʼ ya yil te bintik lek ya jpastik? (1 Rey. 9:4; 1 Crón. 29:10, 17).

14. ¿Bin koltayel jtaojtik yuʼun ma jaʼuk ya xbajt ta koʼtantik yilel te banti ya xchʼay te yantik?

¹⁴ Teme kʼoem ta yoʼtan Jehová te jmulawilotik, jichnix ya skʼan ya jpastik-euk kʼalal jaʼ ya kiltik te bintik lek ya spas te yantike. Oranax ya kiltik te banti ya xchʼay te yantik sok te ay bin ma lek ya kaltik. Pero te machʼa ya skʼayinbey stalel te Jehová, lek ya yil sba sok te yantik, manchukme ya snaʼ te ay banti ya xchʼay-euke. Te diamante ton te ma juxbiluk ma lek ta ilel, te machʼa ay spʼijil ma jaʼuknax ya xbajt ta yoʼtan te bin ya yil sok snaʼoj te bin yilel ya xkʼot te kʼalal juxbilix-ae. Jich bitʼil ya spas te Jehová sok te Jesús, ma jaʼuknax ya xbajt ta koʼtantik te bin ya jtatik ta ilel, jaʼ ya skʼan ya kiltik te slekil talel te ants winiketik.

15. Kʼalal ya kiltik te bin yilel skuxlejal te yantik, ¿bin-utʼil ya skoltayotik yuʼun lek te bin ya jnoptik ta stojolike?

¹⁵ Te bitʼil jaʼ ya xbajt ta koʼtantik yilel te slekil talel te yantike, ¿bin ya skoltayotik  yuʼun lek te bin ya jnoptik ta stojolik? Jaʼ te kʼalal ya jnop ta koʼtantik bin yilel te skuxlejalik. Kiltik junuk ejemplo. Ta jun buelta, te Jesús la yil jtul meʼba ants ta templo te yak ta yotsesel chaʼsejp takʼin ta yawil majtan takʼin. Maba la sjojkʼoy bin yuʼun te ma bayaluk la yakʼ. Ma jaʼuk bajt ta yoʼtan yilel te jayeb takʼin la yakʼ, jaʼ la yichʼ ta wenta te bin yuʼun la yakʼ sok te bin yilel skuxlejal, jaʼ yuʼun la yutsilkʼoptay ta swenta te bin la spase (Luc. 21:1-4).

16. ¿Bin ya yakʼbat anop te bin kʼax ta stojol te Verónica?

¹⁶ Te bin kʼax ta stojol te Verónica, ya yakʼ kiltik te mukʼ skʼoplal te ya jnaʼtik stojol bin-utʼil ay skuxlejal te yantike. Ta congregación te banti aye, ay jtul hermana te stukel yak ta skanantayel te skerem. Te Verónica, jich ya yal: «Ya kil te skomoj sbaik ta spasel te aʼtelil ta congregación, jaʼ yuʼun ma lek te bin la jnop ta stojolik. Pero ta jun kʼajkʼal lokʼon ta scholel skʼop Dios sok te hermana. La scholbon kaʼiy te bayal swokol ta skaj te ma lek ay te skerem te tsakbil ta chamel te autismo sbiil. Jaʼ ya xbajt ta yoʼtan yakʼbeyel te bintik ya xtuun yuʼun sok te lekuk ay ta stojol te Jehová. Ta skaj te ma lek ay te skerem, ay baeltik ya xbajt ta tsoblej ta yan congregación». Te Verónica, jich ya yalxan: «Maʼyuk talem ta koʼtan-a te tulan te bin yak ta kʼaxel ta skuxlejal. Ta ora ini, mukʼ skʼoplal ta koʼtan sok ya kichʼ ta mukʼ ta swenta te bintik ya spas ta abatinel ta stojol te Jehová».

17. ¿Bin mantalil ya jtatik ta Santiago 2:8, sok bin-utʼil ya jchʼuuntik spasel?

 ¹⁷ ¿Bin ya jpastik kʼalal ay bin ma lek ya jnoptik ta stojol jtul hermano? Ayuk ta koʼtantik te ya skʼan te kʼuxuk ta koʼtantik te kermanotaktik (kʼopona Santiago 2:8). Jaʼnix jich, ya skʼan ya jkʼopontik te Jehová sok ya kalbeytik te yakuk skoltayotik yuʼun lek te bin ya jnoptik ta stojol te yantik. Sok jichuk ya jpastik te bitʼil la jkʼanbeytik ta oración te Jehová, kʼalal ya xbajt jkʼopontik te hermano. Jichniwan ya jnaʼbeytik sba ta lek-a. Jaʼnix jich ya xjuʼ ya kikʼtik ta scholel skʼop Dios o ta weʼel. Kʼalal ya jnaʼbeytik sba ta lek te hermano, jich ya jtʼuntik te ejemplo yuʼun te Jehová sok te Jesús te ya kiltik te lekil talelil ay yuʼun. Jich ya kakʼtik ta ilel te ya jchʼuuntik spasel te mantal la yal te lekil jkanantuminchij, jaʼ te lekuk te bin ya jnoptik ta stojol te yantike.

18. ¿Bin-utʼil ya kakʼtik ta ilel te ya kaʼiybeytik skʼop te lekil jkanantuminchij?

¹⁸ Jich bitʼil te tuminchijetik ya yaʼiybeyik skʼop te jkanan yuʼunik, jaʼnix jich te jnopojeletik ya yaʼiybeyik skʼop te Jesús. Teme ya jpastik tulan te manchuk ya jmel koʼtantik yuʼun te bintik ya xtuun kuʼuntik sok te lekuk te bin ya jnoptik ta stojol te yantik, jich ya yakʼbotik bendición te Jehová sok te Jesús. Chikan teme ochem jkʼoplaltik ta «tut jtsohb» tuminchijetik o ta «yantic tuminchijetic», jpisiltik ya kaʼiybeytik skʼop sok ya jchʼuuntik spasel te bin ya yal te lekil jkanantuminchij kuʼuntik (Luc. 12:32; Juan 10:11, 14, 16). Ta yan artículo, ya kilbeytik skʼoplal chaʼchajp te bin la yal te Jesús te ya skʼan ya jpastik te jnopojelotik yuʼun.