1. Малы Иисус дышетскисьёссэ ыжъёсын ӵошатӥз?

 ИИСУС дышетскисьёсыныз кусыпъёссэ ӵошатӥз соин, кыӵе кусыпъёсыз луо ыж возьмасьлэн ыжъёсыныз (Иоанн 10:14). Та туж тупась ӵошатон. Ыжъёс возьмасьсэс котьку тодмало но пумитаз куара сёто. Тае возьмато одӥг пиосмуртлэн кылъёсыз но: «Милям потэ вал ыжъёсты туспуктэммы. Ми соосты ӧтимы, но соос милесьтым ӧз кылзӥське, малы ке шуоно милям куараосмы соослы тодмо ӧй вал. Соку лыктӥз пичи пияш, кудӥз соосты возьма вал. Со ыжъёссэ ӧтиз но, соос соку ик со сьӧры мынӥзы».

2, 3. а) Кызьы Иисуслэн дышетскисьёсыз солэсь куаразэ кылыны быгато? б) Мае ми эскеромы та но вуоно статьяосын?

² Та пиосмуртлэн верамез тодамы вайытэ Иисуслэсь дышетскисьёсыз сярысь кылъёссэ: «[Ыжъёс] Мынэсьтым куараме кылозы» (Иоанн 10:16). Озьыен, Христослэн дышетскисьёсыз солэсь куаразэ кылыны кулэ. Но Иисус али инмын бере, кызьы ми быгатӥськомы солэсь куаразэ кылыны но солы вазиськыны? Ми Иисуслэсь куаразэ кылӥськомы, солэсь дышетонъёссэ эскерыса но соосты улонамы пыртыса (Матф. 7:24, 25).

³ Та но вуоно статьяосын ми эскеромы Иисуслэсь, «ӟеч ыж возьмасьлэсь», куд-ог дышетонъёссэ. Со вераз со сярысь, мар кароно ӧвӧл, озьы ик со сярысь, мар милемлы карыны кулэ. Та статьяын ми эскеромы Иисуслэсь кык косонзэ со сярысь, мар милемлы кароно ӧвӧл.

4. Мар сярысь ми сюлмаськыны быгатӥськомы, Лукалэсь 12:29 верамъя?

⁴ Лыдӟе Лукалэсь 12:29. Иисус дышетскисьёсызлы вераз, улон понна кулэез сярысь медаз сюлмаське шуыса. Иисуслэн визь-кенешъёсыз милемлы котьку но пайда ваё. Но куддыръя сюлмаськытэк улыны капчи ӧвӧл. Малы?

5. Малы куд-огъёсыз улон понна самой кулэез сярысь сюлмасько?

 ⁵ Кин ке но сюлмаське, аслаз но семьяезлэн сиён-юонэз, дӥськутэз но улон интыез мед луоз шуыса. Куд-огъёсыз куанер шаерын уло но коньдонзэс самой кулэезлы но мырдэм тырмыто. Мукетъёсыз COVID-19 пандемия сэрен ужзэс ыштӥзы но коньдонтэк кылизы. Нош куд-ог семьяос сюдӥсьсэс-вордӥсьсэс ыштӥзы (Екк. 9:11). Ми но та выллем югдуръёсын пумиськимы ке, мар юрттоз милемлы Иисуслэсь кылзӥськыны но сюлмаськытэк улыны?

6. Мар огпол луиз апостол Пётрен?

⁶ Огпол, Пётр но мукет апостолъёс Галилей зарезь вылтӥ пыжен мыныку, кужмо сильтӧл ӝутскиз. Малпамтэ шорысь соос адӟизы Иисусэз, кудӥз соос доры ву вылтӥ мынэ вал. Пётр вераз: «Кузё-Инмаре! Тон ке со, ву вылтӥ Тон доры лыктыны кос монэ». Иисус шуиз: «Лыкты». Пётр «пыжысь потӥз но ву вылтӥ мынӥз». Мар луиз собере? Пётр, «кужмо тӧлэз адӟыса, кышкатскиз, выйыны кутскиз но черетскиз: „Кузё-Инмаре! Уть монэ“». Иисус кизэ мычиз но Пётрез кырмиз. Висъялэ саклыктэс: куке Пётр Иисус шоры учкиз, со быгатӥз бадӟым тулкымъёс вылтӥ мыныны. Нош куке со тӧл шоры учкиз, со кышкатскиз но выйыны кутскиз (Матф. 14:24—31).

7. Кыӵе пайда милемлы вайыны быгатэ Пётрен луэм учыр?

 ⁷ Пётрен луэм учыр милемлы пайда вайыны быгатэ. Куке со пыжысь потӥз но Иисус доры ву вылтӥ мынӥз, со ӧз малпа, сильтӧллэсь кышкалоз но выйыны кутскоз шуыса. Но жаляса верано луэ, Пётр Иисус шоры учкемысь дугдӥз. Милемлы ву вылтӥ ветлоно уз луы ке но, ми пумиськыны быгатӥськомы шуг-секытъёсын, кудъёсыз осконмес эскерозы. Иеговалы но солэн кылсётонъёсызлы интые, ми малы ке мукетызлы саклыкмес висъямы ке, осконмы лябӟыны быгатоз. Кыӵе гинэ шуг-секытъёсын ми медам пумиське, юн осконо, Иегова ми сярысь сюлмаськоз шуыса. Ойдолэ та сярысь пыр-почгес вераськомы.

8. Мар юрттоз милемлы улон понна кулэез сярысь мултэс сюлмаськытэк улыны?

⁸ Иеговалы оскон юрттэ сюлмаськытэк улыны. Инмысь Атаймы кылзэ сётэ: солы ужан-тыршон улонамы нырысетӥ интыын луиз ке, со милемлы улон понна ваньзэ кулэзэ сётоз (Матф. 6:32, 33). Та сярысь вунэтоно ӧвӧл! Иегова сётэм кылзэ котьку но быдэстэ (К. Зак. 8:4, 15, 16; Пс. 36:25). Со сяна, Инмар тылобурдоосты сюдэ но бусы турынэз чебер дӥся бере, ми сярысь но со уз сюлмаськы-а? (Матф. 6:26—30; Флп. 4:6, 7). Анай-атайёс, нылпиоссэс яратыса, соослы ваньзэ кулэзэ сёто. Озьы ик инмысь Атаймы но, милемыз яратыса, милемлы улон понна ваньзэ кулэзэ сётэ. Соин ик ми оскыны быгатӥськомы, Иегова милемыз уз кельты шуыса!

9. Мае возьмато одӥг кузпалъёсын луэм учыръёс?

⁹ Тани учыр, кудӥз туж умой возьматэ, Иегова милемлы улон понна ваньзэ кулэзэ сётыны быгатэ шуыса. Со луиз кузпалъёсын, кудъёсыз пионеръёс луыса ужало-тыршо. Огпол соос вуж машинаенызы пумиськонэ вайизы сузэръёсты, кудъёсыз беженецъёслэн лагерязы улӥзы. Эксэйлык юртозь быдэс час мыноно вал. Агай вера: «Пумиськон бере ми со сузэръёсты ас дорамы куное ӧтимы, но собере гинэ ми валамы, соосты куноян понна, милям номырмы ӧвӧл шуыса». Мар луиз собере? «Дорамы вуыса, ми адӟимы, пырон дорын сиён-юонэн кык бадӟым пакет сылэ шуыса. Ми али ке но ум тодӥське, кин соосты вайиз. Озьы Иегова ми сярысь сюлмаськиз». Нош кӧня ке дыр ортчыса, соослэн машиназы сӧриськиз. Со соослы ужан-тыршон понна туж кулэ вал. Нош сое тупатыны соослэн коньдонзы ӧй вал. Та кузпалъёс машиназэс мастерское нуизы валан понна, кӧня коньдон кулэ луоз сое тупатыны. Малпамтэ шорысь кыӵе ке пиосмурт лыктӥз но юаз: «Кинлэн та машинаез?» Агай вераз, та машина солэн но сое тупатоно шуыса. Пиосмурт шуиз: «Кышноелэн таӵе машина басьтэмез потэ, ӵапак сыӵе буёло. Со сӧриськемын ке но, мон сое басьто. Кӧняен вузалод?» Вузам коньдон агайлы тырмиз мукет машина басьтыны. Агай йылпумъя: «Валэктонэз но ӧвӧл ини, макем ми шумпотӥмы со ӝытэ. Ми оскимы, сое Иегова милемлы кузьмаз шуыса».

10. Кызьы Псалтирь 36:5 юрттоз милемлы улон понна кулэез сярысь сюлмаськытэк улыны?

¹⁰ Ми кылзӥськиськомы ке Иисуслэн «эн но сюлмаське» косонэзлэсь, ми юн оскыны быгатӥськомы, Иегова милемыз уз кельты шуыса (лыдӟе Псалтирез 36:5; 1 Пётр 5:7). Ойдолэ нош ик вераськомы шуг-секытъёс сярысь, кудъёсыз гожтэмын вал  5-тӥ абзацын. Тӥляд семьяды сюдӥсьтэк-вордӥсьтэк кылиз ке яке тӥ уждэс ыштӥды ке, со уг возьматы, Иегова улон понна  кулэзэ тӥледлы сётыны уз быгаты шуыса. Табере, куке тӥ сюдӥсьтэс-вордӥсьтэс яке уждэс ыштӥды, Иегова, тӥ сярысь сюлмаськон понна, мукет амал шедьтоз. Одно ик шедьтоз! Азьланяз ми эскеромы, мар эшшо кароно ӧвӧл, «ӟеч ыж возьмасьлэн» верамезъя.

11. Матфейлэсь 7:1, 2 лыдэ басьтыса, мар эшшо кароно ӧвӧл но малы со куддыръя секыт?

¹¹ Лыдӟе Матфейлэсь 7:1, 2. Иисус вала вал, кылзӥсьёсыз тырбыдэстэмесь но соослэн мукетъёссэ пыкылон сямзы вань шуыса. Соин ик со соослы вераз: «Судить эн каре». Зэм но, ми тыршиськомы вын-агайёсмес но сузэр-апайёсмес пыкылытэк улыны. Но ми сьӧлыко адямиос. Мар кароно, милям выльысь но выльысь мукетъёссэ пыкылон сяммы потэ ке? Иисусэз кылзэ но вань кужмысьтыды тырше та сямдэс быдтыны.

12, 13. Кыӵе пайда ваёз, малпаськимы ке со сярысь, кызьы Иегова учкиз Давид шоры?

¹² Иеговалэн примерез милемыз тросэзлы дышетыны быгатэ. Нырысь ик, со умой сямъёсмылы саклыксэ висъя. Тае адӟыны луэ Давид эксэйлэн учырысьтыз. Со кӧня ке пол туж зол янгышаз. Кылсярысь, со Вирсавияез аслыз кышнолы басьтӥз но лэсьтӥз озьы, солэсь картсэ мед виёзы шуыса (2 Экс. 11:2—4, 14, 15, 24). Та туж бадӟым курадӟон вайиз Давидлы но, семьяезлы но, озьы ик кышноосызлы но (2 Экс. 12:10, 11). Мукет дыръя Давид Иеговалы быдэсак ӧз оскиськы. Со ужпум кутӥз израиль ожгарчиосты лыдъяны, Инмар сое ӧз косы ке но. Давид сое вылтӥяськеменыз яке ожгарчиосыз вылэ оскиськеменыз лэсьтӥз, вылды. Солэн янгышаменыз сэрен израиль калык пӧлын 70 000 мурт сьӧдчерлэсь кулӥз! (2 Экс. 24:1—4, 10—15).

¹³ Тӥ Израильын со вакытэ улысалды ке, мар тӥ малпасалды Давид сярысь? Малпасалды-а тӥ, Иегова сое гажаны-жаляны кулэ шуыса? Нош Иегова Давид шоры ӵапак озьы учкиз. Малы? Со лыдэ басьтӥз, Давид солы трос аръёс ӵоже оскымон ужаз-тыршиз но вань сюлмысьтыз ӧпкелиз шуыса. Соин ик Иегова Давидлэсь та секыт сьӧлыкъёссэ простить кариз. Иегова тодӥз: Давид сое туж яратэ но солэн шонер ужъёс лэсьтэмез потэ. Туж шумпотоно тодыны, Иегова милесьтым нырысь ик умойзэ адӟе шуыса! (3 Экс. 9:4; 1 Пар. 29:10, 17).

14. Мар юрттоз христианъёслы мукетъёссэ судить карытэк улыны?

¹⁴ Иегова уг возьма, адямиос сьӧлыкатэк улозы шуыса. Соин ик милемлы но мукетъёсыз шоры озьы ик учконо но соослэсь умойзэ адӟыны тыршоно. Зэмзэ вераса, туж капчи мукетъёсызлэсь тырмымтэоссэс адӟыны но соосты пыкылыны. Но адями, кудӥз Иеговалэсь адӟем каре, адямиослэн тырмымтэоссылы саклыксэ уг висъя но соосын тупаса улэ. Гранить карымтэ алмаз туж ик чебер уг адӟиськы. Но тодӥсь мурт сое тодмалоз. Со адӟе, кыӵе чебер бриллиант со луоз гранить но шлифовать карем бере. Соин ик, Иегова но Иисус сямен, ойдолэ адямиосты вылтуссыя судить ум каре но умой сямъёссылы саклыкмес висъяломы.

15. Малы малпаськоно со сярысь, маин адямиос пумиськоно луо?

¹⁵ Мар эшшо юрттоз на милемлы мукетъёсызлэсь укыр троссэ возьматэк улыны? Малпаське, маин соос пумиськоно луо. Ойдолэ тодамы ваёмы Иисуслэн улонысьтыз одӥг учырез. Храмын пукыкуз, со адӟиз  куанер палкышноез, кудӥз коньдон тырон шыкысэ кык векчи коньдон понӥз. Иисус ӧз вера: «Малы сыӵе ӧжыт?» Со саклыксэ ӧз висъя, кӧня та кышномурт понӥз. Иисус малпаськиз, малы со озьы лэсьтӥз но кызьы со улэ. Соин ик Иисус та кышномуртэз шырыт луэмез понна ушъяз (Лука 21:1—4).

16. Малы дышетэ учыр, кудӥз сярысь вераз Вероника?

¹⁶ Адямиослэсь югдурзэс лыдэ басьтоно шуыса, возьматэ Вероникалэн учырез. Солэн кенешаз вал сузэр, кудӥз одӥгназ пизэ будэтӥз. Вероника вера: «Мон малпай, соос кенешлэсь пумиськонъёссэ ӵем кельтыло но Иеговалы ӧжыт ужало-тыршо шуыса. Соин ик соос сярысь мон умойтэм малпай. Но огпол мон со сузэрен ӵош тодытыны мынӥ. Со вераз, пиезлэн аутизм висёнэз вань шуыса. Солы туж секыт вал ке но, со вань кужмысьтыз тыршиз пичи семьяез сярысь сюлмаськыны но пиезлы юрттыны Иеговаез яратыны. Со сяна, мон тодӥ, куддыръя пиезлэн висёнэз сэрен, соос мукет кенешлэн пумиськонъёсаз ветлоно луо шуыса». Тани кыӵе йылпумъян лэсьтэ Вероника: «Мон ӧй но малпа, макем секыт со сузэрлы. Табере мон туж дунъясько но гажасько со сузэрез, малы ке шуоно Иегова понна со туж трос лэсьтэ!»

17. Кыӵе закон гожтэмын Иаковлэн 2:8 но кызьы ми сое быдэсъяны быгатӥськомы?

¹⁷ Мар кароно, ми шӧдӥмы ке, кыӵе ке вын-агаез яке сузэр-апаез пыкылӥськомы  шуыса? Тодамы возёно: матысьёсмес яратыны ми понна — закон. (Лыдӟе Иаковлэсь 2:8.) Со сяна, милемлы Иеговалэсь туж куроно кужым, мукетъёссэ судить медам каре шуыса. Милям вань сюлмысьтымы потэ ке адямиез судить каремысь дугдэммы, соку ми тыршомы соин тросгес дырмес ортчытъяны но умойгес тодматскыны. Кылсярысь, ми быгатӥськомы сое ӧтьыны ӵош тодытыны яке ӵош сиськыны. Ойдолэ адӟем каромы Иеговалэсь но Иисуслэсь: адямиослэсь умойзэ адӟомы. Озьы ми возьматомы, кылзӥськиськомы шуыса «ӟеч ыж возьмасьлэн» таӵе косонэзлэсь: «Судить эн каре».

18. Кызьы ми возьматомы, «ӟеч ыж возьмасьлэсь» кылзӥськомы шуыса?

¹⁸ Ыжъёс возьмасьсылэсь куаразэ кылзо, нош зэмос христианъёс Иисуслэсь куаразэ кылзо. Ми тыршиськомы ке улон понна кулэез сярысь сюлмаськытэк но мукетъёссэ судить карытэк улыны, Иегова но Иисус милемлы одно ик юрттозы. Пыриськомы-а ми «пичи уллё» яке «мукет ыжъёс» пӧлы, ойдолэ азьланяз но «ӟеч ыж возьмасьлэсь» куаразэ кылзомы но солэсь кылзӥськомы (Лука 12:32; Иоанн 10:11, 14, 16). Вуоно статьяын ми эскеромы Иисуслэсь кык косонзэ со сярысь, мар карыны кулэ солэн дышетскисьёсызлы.