1. Die yen sa nẹrhẹ Jesu reyọ idibo rọyen vwo dje igodẹ?

JESU vwẹ oyerinkugbe rọyen vẹ ọ rẹ idibo rọyen vwo dje oyerinkugbe rọ herọ vwẹ uvwre rẹ osuigodẹ vẹ igodẹ rọyen. (Jọn 10:14) Udje yena nabọ shamu dẹn. Igodẹ na riẹn urhuru rẹ osuigodẹ na, ọtiọyena kẹ ayen kerhọ rọyen. Ọshare ọvo rọ je mrẹ emu ọtiọyen wan jovwore da ta: “Avwanre guọnọ reyọ ifoto rẹ igodẹ evo, ọtiọyena, avwanre da davwẹngba rere igodẹ na vwo sikẹrẹ avwanre. Ẹkẹvuọvo, ayen rhọvwen bru avwanre rhe-e kidie ayen riẹn urhuru rẹ avwanre-e. Vwẹ etiyin na, omotete ọvo rọ dia osuigodẹ na da rhe, ugege ro ghwe vwo se ayen, ayen da djẹ nene.”

2-3. (a) Idjerhe vọ yen idibo ri Jesu se vwo djephia nẹ ayen kerhọ rẹ urhuru rọyen? (b) Die yen e che yono vwẹ uyono nana vẹ ọ rọ cha na?

² Oborẹ ọshare yena mrẹre na nẹrhẹ avwanre karophiyọ oborẹ Jesu ta kpahen igodẹ rọyen, kọyen idibo rọyen. Ọ tare nẹ, “ayen ki nyo urhuru mẹ.” (Jọn 10:16) Ẹkẹvuọvo, Jesu hẹ obodjuvwu. Mavọ kọyen a sa vwọ tanẹ e nyo urhuru rọyen? Idjerhe ọghanghanre ọvo ra sa vwọ tanẹ e nyo urhuru rẹ onini rẹ avwanre na yen, siẹrẹ a da vwẹ iyono rọyen vwọba akpọ yerẹn.—Mat. 7:24, 25.

³ Vwẹ uyono nana vẹ ọ rọ vwọ kpahọn, a cha ta ota kpahen iyono ri Jesu evo. Kirobo ra cha mrẹ, Jesu yono avwanre kpahen erọnvwọn evo ro fori nẹ e ru vẹ e ra kẹnoma kẹ. Ẹsosuọ, a cha ta ota kpahen erọnvwọn ivẹ kiriguo rẹ osuigodẹ esiri na yono avwanre nẹ a kẹnoma kẹ.

4. Vwo nene obo rehẹ Luk 12:29, die yen sa so ẹnwan?

⁴ Se Luk 12:29. Jesu vwẹ uchebro vwọ kẹ idibo rọyen  nẹ ayen “ro ẹnwa-an,” kọyen ẹnwan rẹ ekuakua rẹ akpeyeren. Avwanre riẹnre nẹ ọkieje yen uchebro ri Jesu vwọ gba je vọn vẹ aghwanre. Avwanre guọnọ vwẹ ayen vwo ruiruo, ẹkẹvuọvo, vwẹ ọkievo, a sa mrẹ bẹnbẹn re vwo ru ọtiọyen. Diesorọ?

5. Die yen sa nẹrhẹ ihwo evo ro ẹnwan kpahen ekuakua rẹ akpeyeren?

 ⁵ Ihwo evo ro ẹnwan kpahen ekuakua rẹ akpeyeren kerẹ emu, iwun kugbe asan ra dia. Ọ sa dianẹ uwenre ganre vwẹ ẹkuotọ rẹ ayen dia. Ọ sa bẹn vwọ kẹ ayen rẹ ayen vwọ mrẹ igho ro te vwọ vwẹrote orua rayen. Yẹrẹ, ọ je sa dianẹ ohwo rẹ obọ yovwinrin rọ vwẹrote orua na ghwure, ọtiọyena, orua na rhe vwo ọchuko vuọvo-o. Ọ sa dianẹ ọga ri COVID-19 nẹrhẹ iruo rẹ ihwo evo va ayen abọ re. (Aghwo. 9:11) Ọ da dianẹ wo hirharokuẹ evo usun rẹ egbabọse nana re keri na yẹrẹ efa, komavọ wo se vwo ru nene odjekẹ ri Jesu rọ tare nẹ a ro ẹnwa-an?

6. Djisẹ rẹ obo re phia kẹ Pita?

⁶ O vwo ọkiọvo rẹ Pita vẹ idibo efa vwọ hẹ okọ vwẹ uheruvie rẹ abadi ri Galili, ọke rẹ ogiribo vwo djuẹ, ayen da mrẹ Jesu rọ yan vwẹ enu rẹ abadi na. Pita da ta: “Ọrovwohwo, ọ da dia owẹ, gbe jẹn uvwe yan bru we rhe vwẹ enu rẹ ame na.” Jesu da kpahen kẹ nẹ, “mọ,” Pita de wontọ nẹ okọ na, ọ da yan “vwẹ enu rẹ ame na, kpo asan ri Jesu epha.” Jokaphiyọ obo re rhe phia. “Ọke rọ vwọ mrẹ abadi rọ họnra kugbe odju ro djuẹ, oshọ de muo: ko divwẹ, o de bunu nẹ, Ọrovwohwo sivwi uvwe.” Jesu da rionbọ phia vwọ kparọ, o de sivwon. Ọ ghanre mamọ ra vwọ mrẹvughe nẹ ọmọke rẹ Pita vwọ tẹnrovi Jesu na yan ọ sa vwọ yan  vwẹ enu rẹ abadi rọ họnra na. Ẹkẹvuọvo, ghwe vwo nẹ ọke rọ vwo tẹnrovi ogiribo na nu, oshọ de rhi muo, ko divwẹn.—Mat. 14:24-31.

7. Die yen se yono vwo nẹ udje ri Pita rhe?

⁷ E se yono nẹ udje ri Pita rhe. Ọke rẹ Pita vwo wontọ nẹ okọ na, o rhẹro rọyen nẹ emu ọvo che mu ẹwẹn rọyen vwo nẹ oborẹ ọyen tẹnrovi ọyen de divwi-in. Ọ guọnọ yan vwẹ enu rẹ ame na rhi te asan rẹ onini rọyen hepha. Ẹkẹvuọvo, ẹwẹn rọyen bo vwo nẹ obo rọ tẹnrovi na. Vwọrẹ uyota, avwanre cha sa yan vwẹ enu rẹ ame-e, jẹ avwanre hirharokuẹ ẹdia sansan re sa davwen esegbuyota rẹ avwanre ni. A rha tẹnrovi Jihova vẹ ive rọye-en, esegbuyota rẹ avwanre se dogho, e se she divwin fikirẹ ẹnwan. O toro oka rẹ ebẹnbẹn rẹ avwanre hirharokuẹ vwẹ akpeyere-en, ofori nẹ a tẹnrovi Jihova vẹ ẹgba ro vwori rọ sa vwọ chọn avwanre uko. Mavọ yen se vwo ru ọtiọyen.

8. Die yen sa chọn avwanre uko vwọ kẹnoma kẹ ẹnwan rẹ ọkamuka kpahen ekuakua rẹ akpeyeren?

⁸ A cha mrẹ erere siẹrẹ a da vwẹroso Jihova ukperẹ ra vwọ ro ẹnwan. Karophiyọ nẹ Jihova rọ dia Ọsẹ ro vwo ẹguọnọ kẹ avwanre imuẹro nẹ ọyen cha vwẹrote ọdavwẹ avwanre siẹrẹ e de phi oyerinkugbe avwanre vẹ ọrọyen phiyọ ẹdia rẹsosuọ. (Mat. 6:32, 33) Iyẹnrẹn djerephia nẹ Jihova ruẹ ive rọyen eje gba. (Urhi 8:4, 15, 16; Une 37:25) Ọ da dianẹ Jihova vwẹrote ephran kugbe idodo na, kọyen o re fo ra vwọ ro ẹnwan kpahen obo ra re yẹrẹ obo re kuphiyọ-ọ! (Mat. 6:26-30; Fil. 4:6, 7) Kirobo rẹ ẹguọnọ muẹ ọsẹ vẹ oni vwọ vwẹrote ọdavwẹ rẹ emọ rayen ye, ọtiọyen ẹguọnọ ji muẹ Ọsẹ avwanre rọhẹ obodjuvwu vwọ vwẹrote ọdavwẹ rẹ ihwo rọyen. E, e se vwo imuẹro nẹ Jihova cha vwẹrote avwanre!

9. Die yen wo se yono vwo nẹ udje rẹ aye gbe ọshare ọvo?

⁹ Roro kpahen udje ọvo ro dje oborẹ Jihova vwọ vwẹrote ọdavwẹ rẹ avwanre. Aye gbe ọshare ọvo re ga kerẹ ekobaro ọkieje gua imoto rẹ awanre rayen vrẹ unọke ọvo re mu iniovo eya evo rehẹ ọko rẹ oja ayen se vwo kpo uyono kugbe. Oniọvo na da ta: “Uyono na vwo kuphiyọ nu, avwanre de durhie iniọvọ na re uwevwin rẹ avwanre vwọ kẹ udemu, jẹ avwanre vwo durhie ayen nu, avwanre da rhe karophiyọ nẹ obo ra cha vwọ ghọ ayen herọ-ọ.” Kidie yen ayen che ru? Oniọvo ọshare na da je ta: “Avwanre vwo te uwevwin, avwanre da mrẹ ekpu rẹ emu ivẹ re mu phiyọ anurhoro rẹ avwanre. Avwanre vughe ohwo ro mu ayen phiyọ-ọ. Jihova vwẹrote avwanre.” Ọkiọvo ri vwo te, imoto rayen de miovwin. Imoto na yen ayen vwọba ruiruo rẹ aghwoghwo na, jẹ ayen vwo igho rẹ ayen cha vwọ rhuẹrẹ-ẹ. Imoto na je vwọ hẹ asan ra da cha rhuẹrẹ, ọshare ọvo da rhe etiyin, ọ da nọ: “Ono yen vwo imoto yena?” Oniọvo na da kpahen kẹ nẹ ọyen vworo, nẹ ọyen guọnọ rhuẹrẹ. Ọshare na da kpahen: “Ọyena tori-i. Aye mẹ guọnọ oka rẹ imoto nana ro ji vwo ikọlọ nana. Bro wọ sa shẹ?” Ọshare na da hwa igho kẹ oniọvo na ro tere vwọ dẹ imoto ọfa. Oniọvo na da ta: “Oma vwerhen avwanre mamọ vwẹ ẹdẹ yena. Avwanre riẹnre nẹ ọ dia ọnana gheghe phia-a. Jihova yen chọn avwanre uko na.”

10. Idjerhe vọ yen Une Rẹ Ejiro 37:5 vwo jiro kẹ avwanre nẹ a kẹnoma kẹ ẹnwan rẹ ekuakua rẹ akpeyeren?

¹⁰ A da kerhọ vwọ kẹ osuigodẹ esiri na  je dobọ rẹ ẹnwan rẹ ọkamuka kpahen ekuakua rẹ akpeyeren ji, imuẹro herọ nẹ Jihova cha kẹ avwanre oborẹ avwanre guọnọre. (Se Une Rẹ Ejiro 37:5; 1 Pita 5:7) Roro kpahen ẹdia re djunute vwẹ  ẹkorota rẹ iyorin na. Rhi duvwun ọke nana, ọ sa dianẹ Jihova vwẹ ọgbuyovwin rẹ orua ọvo yẹrẹ ọga rẹ avwanre vwẹ iruo vwọ vwẹrote ọdavwẹ ri kẹdẹ kẹdẹ rẹ avwanre re. Ọ da dianẹ ọgbuyovwin rẹ orua na re se ruẹ ọtiọyen enẹna-a yẹrẹ iruo rẹ avwanre va avwanre abọ, Jihova cha vwẹrote avwanre vwẹ idjerhe ọfa. Ọyena mu avwanre ẹro dẹn. E gbe jẹ a ta ota kpahen emu ọfa rẹ osuigodẹ esiri na bro avwanre uche nẹ a kẹnoma kẹ.

11. Kirobo rehẹ Matiu 7:1, 2 die yen Jesu vuẹ avwanre nẹ a kẹnoma kẹ, diesorọ ọnana vwọ bẹn?

¹¹ Se Matiu 7:1, 2. Jesu riẹnre nẹ ihwo re kerhọ rọyen re dia ihwo re gbare-e sa tẹnrovi oruchọ rẹ ihwo efa, jokaphiyọ obo rọ tare: “Ovwan gu ẹdjọ rẹ ohwo-o.” Avwanre sa davwẹngba ra vwọ kẹnoma kẹ uruemu re vwo guẹ iniọvo rẹ avwanre. Ẹkẹvuọvo avwanre gbare-e. Ka da mrẹvughe nẹ ọkiọvo a tẹnroviẹ oruchọ rẹ ihwo efa vwo, die kọyen ru? Gba kerhọ rẹ Jesu wọ davwẹngba mamọ vwọ kẹnoma kẹ iguegun.

12-13. Mavọ yen ẹro rẹ Jihova vwo ni Ovie Devid sa vwọ chọn avwanre uko vwọ kẹnoma kẹ iguegun?

¹² A sa mrẹ erere siẹrẹ e de yono kpahen udje ri Jihova. Erhuvwu rẹ ihwo efa yen ọ tẹnroviẹ. Avwanre mrẹ ọnana vughe womarẹ obo ro nene Ovie Devid yerin wan ọke ro vwo ru imwemwu ra ghẹmrẹ. Kerẹ udje, ọ vẹ Batsheba gbe ọfanrhiẹn ọ da tobọ hwe ọshare rọyen. (2 Sam. 11:2-4, 14, 15, 24) Oborẹ Devid ruru na so ọmiaovwẹ kẹ orua rọyen eje tobọ te eya rọyen efa. (2 Sam. 12:10, 11) Vwẹ ọke ọfa, Devid je vwẹroso Jihova-a kidie o re kere isodje rẹ Izrẹl jẹ Jihova vuẹrẹ nẹ o ru ọtiọye-en, ọ sa dianẹ omaephuo yen sorọ ro vwo ru ọnana yẹrẹ kidie nẹ ọ vwẹroso unuofovwin rọyen ukperẹ ukẹcha ri Jihova. Die yen nẹ obuko ọnana rhe? Ihwo rẹ Izrẹl ri bun te omarẹ 70,000 yen ọga hweri!—2 Sam. 24:1-4, 10-15.

¹³ Ọ da dianẹ wọ dia Izrẹl vwẹ ọke yena, ẹro vọ yen wo rhe vwo nẹ Devid? Wo rhe no nẹ o fo ohwo ri Jihova vwo ghovwo-o? Jihova niro ọtiọye-en. Ọ tẹnrovi evun-ẹfuọn ri Devid kugbe okurhẹriẹ ro nẹ otọ rẹ udu rọyen rhe. Fikirẹ ọtiọyena, Jihova da vwẹ oruchọ ri rọyen vwo ghovwo. Jihova riẹnre nẹ o vwo ẹguọnọ rọyen mamọ, o ji vwo owenvwe ro vwo ru obo ri yovwinrin. Oma rha vwerhen owẹ nẹ erhuvwu rẹ avwanre yen Ọghẹnẹ tẹnroviẹ?—1 Ivie 9:4; 1 Ikun 29:10, 17.

14. Die yen chọn Inenikristi vwọ kẹnoma kẹ iguegun?

¹⁴ Jihova tẹnroviẹ echobọ rẹ avwanre-e kidie ọ riẹnre nẹ avwanre gbare-e, ọtiọyena o ji fo nẹ a tẹnrovi erhuvwu rẹ ihwo efa ukperẹ echobọ rayen. O krẹ avwanre ke mrẹ echobọ rẹ ihwo efa je vwẹ ayen vwo guẹdjọ-ọ. Ẹkẹvuọvo ohwo rọ vẹ Jihova vwo uvi rẹ oyerinkugbe nene ihwo efa yerẹn vwevwerhen ọ da tobọ dianẹ ọ mrẹ echobọ vwẹ oma rayen. Diamond ra je hworhẹ-ẹ ghwe faro-o, ẹkẹvuọvo ohwo rọ nabọ riẹn ọghanrovwẹ rọyen tẹnroviẹ obo ro gbe te-e, ukperẹ ọtiọyen, ọ tẹnroviẹ oborẹ ọ cha ghanre te siẹrẹ a da hworhẹ nu. Kerẹ Jihova vẹ Jesu, e jẹ avwanre tẹnrovi erhuvwu rẹ ihwo efa ukperẹ echobọ rayen.

15. Mavọ yen e vwo vughe ẹdia rẹ ihwo hepha sa vwọ chọn avwanre uko re vwo jẹ brokpakpa brorhiẹn hwe ayen?

 ¹⁵ Vwọ vrẹ a vwọ tẹnrovi erhuvwu ri ihwo efa, die yen sa chọn avwanre uko re vwo jẹ brokpakpa brorhiẹn hwe ihwo efa? Vwẹ ẹwẹn vwo roro oborẹ ayen hirharokuẹ vwẹ akpeyeren. Roro kpahen udje nana. Ẹdẹ ọvo Jesu vwọ hẹ uwevwin rẹ ẹga na, ọ da kparo mrẹ ayeuku ọvo ro phiẹ anini ivẹ yen ekpeti rẹ utoro na. Ọ nama tanẹ, “diesorọ o rhe phiyọ bun vrẹ ọtiọye-en?” Ukperẹ Jesu vwọ tẹnrovi uchunu rẹ igho rẹ ayeuku nana phi phiyọ, ọ da tẹnrovi ẹdia rọ hepha vẹ obo ri muro vwo ru utoro na, o de jiro vwọ kẹ ẹgbaẹdavwọ rọyena.—Luk 21:1-4.

16. Die yen wo se yono vwo nẹ udje ri Veronica rhe?

¹⁶ E se vwo ẹruọ rẹ obo rọ ghanre te re vwo roro kpahen oborẹ ohwo hirharokuẹ vwẹ akpeyeren siẹrẹ a da fuẹrẹn udje ri Veronica. Oniọvo aye ọvo rẹ ọyen ọvo vwẹrote ọmọ rọyen hẹ ukoko rọ da ga, Veronica da ta: “Ọ họhọre nẹ ayen ghwe muomaphiyọ owian rẹ ukoko na-a. Ọnana da nẹrhẹ me vwẹ ẹro ọchọchọ vwo ni ayen. Ọke vwọ yanran na, mẹ vẹ oni na da wian vwẹ iruo aghwoghwo na. Ọ da vuẹ vwẹ ebẹnbẹn ro hirharokuẹ, ọ vuẹ vwẹ nẹ ọmọ rọyen vwo ọga rẹ afọnre. Ọ davwẹngba rọyen eje rere ọ sa vwọ vwẹrote ọdavwẹ rayen ji vwo omamọ rẹ oyerikugbe vẹ Jihova. Ọkievo  fikirẹ ọga rẹ ọmọ rọyen na, ko kuomaba ukoko efa ruẹ uyono.” Veronica da je ta: “Me nama riẹn nẹ ọna ebẹnbẹn ọvo ro hirharokuẹ jovwo-o, enẹna ki mi dje ọdavwaro ji muọghọ vwọ kẹ oniọvo nana fikirẹ obo ro ruẹ eje rọ sa vwọ ga Jihova.”

17. Die yen Jems 2:8 vuẹ avwanre nẹ e ru, kẹ mavọ yen e se vwo ruo?

¹⁷ Die yen ofori nẹ avwanre ru, e de no so nẹ avwanre brokpakpa brorhiẹn hwe oniọvo avwanre ọvo? Ofori nẹ a karophiyọ nẹ e dje ẹguọnọ kẹ iniọvo rẹ avwanre. (Se Jems 2:8.) O ji fo nẹ a nẹrhovwo rhe Jihova nẹ ọ chọn avwanre uko vwọ kẹnoma vwọ kẹ iguegun. A sa davwẹngba vwo ru nene ẹrhovwo ra nẹrhe na womarẹ a vẹ ohwo re brokpakpa brorhiẹn hwe jovwo na vwọ ghwọrọ ọke kuẹgbe. Ọyena cha chọn avwanre uko vwo vughe fiotọ. A sa vuẹ nẹ o nene avwanre yan vwẹ iruo rẹ aghwoghwo na yẹrẹ tobọ durhie vwo kpo emuọre. E vwo vughe iniọvo avwanre phiyọ ye kẹ a sa tẹnrovi asan rẹ iniọvo rẹ avwanre de ruẹ yovwẹn ọtiobo ri Jihova vẹ Jesu ruẹ. E de ruẹ ọtiọyen je djephia nẹ avwanre nyo urhurhu rẹ osuigodẹ esiri na rọ tare nẹ kenoma kẹ iguegun.

18. Mavọ yen e se vwo djephia nẹ avwanre kerhọ rẹ urhurhu rẹ osuigodẹ esiri na?

¹⁸ Kirobo rẹ igodẹ nyo urhurhu rẹ osuigodẹ rayen ye, ọtiọyen idibo rẹ Jesu ji nyo urhurhu rọyen. Avwanre da davwẹngba vwọ kẹnoma kẹ udubruvwe kugbe ẹnwan rẹ akpeyeren je kẹnoma kẹ iguegun, Jihova vẹ Jesu che bruba ẹgbaẹdavwọn rẹ avwanre. Te ọdianẹ avwanre hẹ ẹbẹre ọvo rẹ “imigegede” na yẹrẹ usun rẹ “igodẹ efa” na, e jẹ avwanre vwẹ ọkineje vwọ kerhọ rẹ osuigodẹ rẹ esiri na. (Luk 12:32; Jọn 10:11, 14, 16) Vwẹ uyono rọ vwọ kpahen ọnana, e che yono kpahen erọnvwọn ivẹ ri Jesu vuẹ idibo rọyen nẹ ayen ru.