1. მუ რე ართ-ართ მიზეზ, მუდგაშ გურშენ შილებე იესოქ მუშ მიმაჸუნალეფ შხურს შეადარკო?

 იესოქ მუშ დო მოწაფეეფიშ ურთიერთობა ჭყიშ დო შხურეფიშ ურთიერთობას შეადარ (იოან. 10:14). თენა სწორ შედარება რე, მუშენდა შხურ იჩინენს მუშ ჭყიშის დო ურჩქილე თიშ ხონარს. ართ ტურისტიქ თენა მუშ თოლით ძირჷ. თინა იჩიებ: „შხურეფშა სურათეფიშ გინოღალა მოკოდეს, ათეშენ ხოლოშა ქუმურთუმდესკონ, უძახუდით თინეფს, მარა მუთუნქ ვა გომირთეს, მუშენდა ვა ჩინებულენდეს ჩქინ ხონარს. უკულ ახალგაზრდა ჭყიშიქ ქუმორთჷ, ქუდუძახ თინეფს დო შხურქ ხოლო ქეკაჸუნ“.

2, 3. ა) მუჭო ოძირანა იესოშ მიმაჸუნალეფ, ნამდა ურჩქილენა თიშ ხონარს? ბ) მუს გუვარჩიენთ თე დო უკულიან სტატიას?

² ტურისტიშ თე შემთხვევა გუმოშინანა იესოშ სიტყვეფს, ნამუთ მუშ შხურეფიშ, მოწაფეეფიშ, გურშენ თქუ. „თინეფ ქიმირჩქილუანა ჩქიმ ხონარს“ (იოან. 10:16). მარა იესო ზეცას რე. მუჭო შემლებნა ფთქუათ, ნამდა ვარჩქილეთ თიშ ხონარს? თეშ ოკეთებელო მთავარ საშვალება თიშ გურაფეფიშ გიმორნაფა რე (მათ. 7:24, 25).

³ თე დო უკულიან სტატიას იესოშ ნამთინე გურაფას გუვარჩიენთ. მაგალთო, იესო ოგურუანდჷ, მუ ოკო ვაკეთათ დო მუშ კეთებას ოკო ეუჩილითუათ დუდ. პირველ რიგის გუვარჩიენთ ჟირ საკითხის, მუდგაშ კეთებას დუდ ოკო ეუჩილითუათ.

4. მუჭოთ ლუკაშ 12:29-შე იძირე, მუქ შილებე ოწუხებელ გომრჩქინან?

⁴ წეკითხით ლუკაშ 12:29. იესოქ ელუჩ მუშ მიმაჸუნალეფს, ნამდა მეტო ვეწუხესკო მატერიალურ საჭიროებეფშენ.  ჩქი მიჩქუნა, ნამდა იესოშ რჩევეფ ირო ბრძნულ დო სწორ რე, ათეშენ მოკონა, მივაჸუნათ თის, მარა მინშა თენა რთულ რე. მუშენ?

5. მუშენ შილებე ნამთინე წუხენდას მატერიალურ საჭიროებეფიშ გურშენ?

 ⁵ ნამთინე შილებე წუხენდას მატერიალურ საჭიროებეფიშ გურშენ, მუნერით რე ოჭკუმალ, მიკაქუნალ დო დუდიშგითაფორაფალ. თინეფ შილებე ცხოვრენდან თიცალ ქიანას, სოდეთ გლახა ეკონომიკურ მდგომარეობა რე დო ძნელ აფდან ფარაშ შიბა ოჯახიშ ეიოჯუმალარო. ვარდა შილებე ოჯახშა ფარაშ მინმაღალარქ დოღურას დო ოჯახიქ ფინანსურ მოხვარაშ უმშო ქუდოსქიდას. ნამთინექ კოვიდ-19 პანდემიაშ გურშენ სამუშა მიოდინუ (ეკლ. 9:11). თეცალ სიტუაციას ჩქი ხოლო ქუვორეთ-და, მუჭო შემლებნა მივაჸუნათ იესოშ მითითებას დო მეტო ვებწუხათ?

6. გეჭარით, მუქ აღოლ ართშა მოციქულ პეტრეს.

⁶ ართშა პეტრექ დო შხვა მოციქულეფქ ნავით გალილეაშ ზღვას ქარბორიას ქუმოხვადეს. მუჟამსით ქოძირეს იესო, ნამუთ წყარს მიშჷ, პეტრექ დუძახ: „უფალ, თენა დასურო სი ქორექ-და, ქომზოჯ, კუჩხით მოლაფრთე წყარს დო სქანდა ქუმოფრთე“. თიშ უკულ, მუთ იესოქ უწუ, „ქუმორთ!“, პეტრექ გეგნორთჷ ნავშე დო „წყარს ჟი კუჩხით მიდართჷ იესოჸურე“. ყურადღება ქიმიაქცით, მუქ მოხვად უკულ: პეტრე «ქარბორიაქ დაშქურინუ, ნწყუალა ქიდიჭყჷ დო ქიმიოღვარუ: „უფალ, ქიმმეხვარ!“». იესოქ ხე ქიმეთხჷ დო გინასქილიდუ თინა. ყურადღება ქიმიაქცით, სოიშახ პეტრე იესოს მიოჯინედ, წყარს მიშჷ, მარა, მუჟამსით ყურადღება ქარბორიაშა გეგნიღ, დოშქურდჷ, ეჭვის ქინოლ დო ნწყუალა ქიდიჭყჷ (მათ. 14:24—31).

7. მუშ გურაფა შემლებნა პეტრეშ მაგალითშე?

 ⁷ მუჟამსით პეტრექ ნავშე გინორთჷ, თინა ვა ფიქრენდჷ, ნამდა დოშქურდუდ დო დინწყუდ. თის ოკოდ, იესოშახ ქიმურთუმუდკო. მარა გაჭყორდჷ, ნამდა მთავარ ყურადღება მიზანშა აფუდკო გინოღალირ. მუჭოთ პეტრეს ოსაჭირუდ რწმენა წყარს გილაულარო, თეშ ჩქი მოსაჭირნა რწმენა პრობლემეფიშ გარზებელო. მთავარ ყურადღებას იეჰოვაშა დო თიშ დუნაპირებუეფშა ვეგნიბღანთ-და, ჭიე-ჭიეთ ჩქი ხოლო სულიერო დიმნწყუთ. მუდგანერ სიმბოლურ ქარბორიაქ ვეგმოტირხანინ, მთელ ყურადღება იეჰოვაშა დო თიშ ძალაშა ოკო მაფდან გინოღალირ. მუჭო შემლებნა თეშ კეთება?

8. მუ მიმეხვარებნა, ზედმეტო ვებწუხათ მატერიალურ საჭიროებეფშე?

⁸ წუხებაშ მანგიორო იეჰოვაშა მენდება ჯგირობუას მომღანა. ქიგიშინით, ჩქინ მოჸოროფე მუმა, იეჰოვა, პირობას მარზენა, ნამდა ქიზრუნენს ჩქინ მატერიალურ საჭიროებეფშე, მუჟამსით სულიერს პირველ ადგილს ქიგვორინუანთ (მათ. 6:32, 33). თინა ამდღარშახ სრულყოფილო ასრულენს თე დუნაპირებუს (კან. 8:4, 15, 16; ფსალმ. 37:25). იეჰოვა ჩიტეფშე დო ყვავილეფშე ქოზრუნენს-და, მუშო ოკო რაგად, ვამღუნა წუხებაშ მიზეზ, მუშენდა თინა ქიზრუნენს ჩქინ ოჭკუმალ დო მიკაქუნალშე (მათ. 6:26—30; ფილ. 4:6, 7). მუჭოთ მშობელს გინაჭყვიდირაფუანს ჸოროფა, ქიზრუნას სქუალეფიშ მატერიალურ საჭიროებეფშე, თეშ ჩქინ ზეციერ მუმას ჸოროფა გინაჭყვიდირაფუანს, ქიზრუნას მუშ ხალხიშ მატერიალურ საჭიროებეფშე. ჩქი შემლებნა დარწმუნებულ ვორდათ, ნამდა იეჰოვა ვამმარკენა ყურადღებას!

9. მუშ გურაფა შემლებნა ართ წყვილიშ მაგალითშე?

⁹ გუვარჩუათ მაგალით, სოვრეშეთ იძირე, მუჭო შეულებ იეჰოვას იზრუნას ჩქინ მატერიალურ საჭიროებეფშე. ჩილ დო ქომონჯ, ნამუთ სრულ დროთ მსახურენდეს, საათშე მეტ ხანს მიშეს მუნეფიშ ჯვეშ მანქანათ ლტოლვილეფიშ დასახლებაშა, ნამდა დალეფ კრებაშ შეხვალამაშა მიდეჸუნესკო. კრებაქ გეთუნ, თინეფ სადილშა ქუდაპატიჟეს, მარა უკულ ქუგაშინეს, ნამდა ჸუდეს მუთუნ ვა უღდეს თინეფიშ მიკაღალარ. ჯიმა იშინანს: „ჸუდეშა ქიმეფრთითინ, კარწკუმა ოჭკუმალით ეფშა ჟირ დიდ სუმკაქ ქუდოფხვადეს. ვა მიჩქუდეს, თენა მიქ აკეთ, მარა იეჰოვაშ ხე არგამათ ქობძირით“. ჭიჭე ხანიშ უკულ თინეფიშ მანქანაქ გილელ. თე მანქანა მსახურებაშო ოსაჭირდეს, მარა ფარა ვა უღდეს თიშ ოკეთებელო. თინეფქ მანქანა პროფილაქტიკაშა ქიმიჸონეს, ნამდა ქიგეგესკო, მუ იღირუაფუდ თიშ კეთება. თექ ართ კოჩიქ ქუმორთჷ დო იკითხჷ: „მიშ რე თე მანქანა?“. ჯიმაქ უწუ, ნამდა თენა მუშ მანქანა რდჷ დო ოკეთებელ აფუდ. თე კოჩიქ უპასუხ: „ჩქიმ ოსურს ზუსტას ათეცალ მანქანა ოკო დო ზუსტას თე ფერიშ. ვა უღჷ მნიშვნელობა, ოკეთებელ რენ; მუშა მოპჸიდენქ?“. თე კოჩიქ ჯიმას თისხი ფარა გინუგ, ნამდა შხვა მანქანა აჸიდირედ. თე ჯიმა იჩიებ: „ნინათ ვა მარაგადე, მუს ბგინაფლენდით თიმ დღას; ჩქი მიჩქუდეს, ნამდა თენა შემთხვევით ვა მოხვალამე, თენა იეჰოვაშ მოხვარა რდჷ“.

10. მუჭო ელამჩანა ფსალმუნიშ 37:5, ვებწუხათ მატერიალურ საჭიროებეფშე?

¹⁰ მუჟამსით ურჩქილეთ ჩქინ ჯგირ ჭყიშის დო ზედმეტო ვა ბწუხენთ მატერიალურ საჭიროებეფშე, შემლებნა დარწმუნებულ ვორდათ, ნამდა იეჰოვა ქიზრუნენს ჩქინდე (წეკითხით ფსალმუნიშ 37:5; 1 პეტ. 5:7). დეფიფქრათ მა- 5 აბზაცის მოშინაფილ სირთულეეფშენ. შილებე იეჰოვა აიშახ ოჯახიშ დუდიშ ვარდა დამსაქმებელიშ საშვალებათ ზრუნენდკო ჩქინ ირდღაშიან საჭიროებეფშე, მარა  ოჯახიშ დუდის თეშ კეთება ასე ვეშულებ ვარდა სამუშა მივოდინეთ-და, იეჰოვა შხვა შარას დოგორუნს ჩქინ მახვარებელო, თინა აუცილებერო ქელამდირთუნა. მორთ ასე გუვარჩუათ ხოლო ართ საკითხ, მუდგაშ კეთებას დუდ ოკო ეუჩილითუათ.

11. მუჭოთ მათეშ 7:1, 2-ს ჭარჷ, მუშ მეტება მიზოჯეს იესოქ დო მუშენ შილებე თენა ჩქინო რთულ რდას?

¹¹ წეკითხით მათეშ 7:1, 2. იესოს უჩქუდ, ნამდა ადამიანეფ არასრულყოფილეფ რენა დო ხშირას აკრიტიკენა შხვეფს, ათეშენ თიქ თქუ: „მეტო ვა გასამართლათ“. ჩქი შილებე ვოცადუდათ, ვაგვასამართლათ თანამორწმუნე, მარა არასრულყოფილებაშ გურშენ, თენა ირო ვა რე ადვილ. თეშ პრობლემა ქომღუნან-და, მუ ოკო ვაკეთათ? საჭირო რე, ურჩქილათ იესოს დო მონდომა ვადვარკათ, ნამდა მივოტუათ შხვეფიშ გასამართლება.

12, 13. მუჭო მოხვარნა მეფე დავითიშ მიმართ იეჰოვაშ დამოკიდებულებაშე ჯგირო დაფიქრება, მეტო ვაგვასამართლათ შხვეფ?

¹² ჩქი ჯგირობუას მომღანა იეჰოვაშ მაგალითშე ჯგირო დაფიქრება. თის ადამიანიშ დადებით მხარეეფშა გინუღ ყურადღება. თენა იძირე მეფე დავითიშ მაგალითშე, ნამდგაქ მუსხირენშა სერიოზულო დაშუ; მაგალთო, თიქ იმრუშ ბათ-შებაწკუმა დო თიშ ქომონჯ ხოლო დაჸვილაფუ (2 სამ. 11:2—4, 14, 15, 24). შედეგო დავითიქ გურჭუა ხვალე მუშ დუდის ვარინ, მუშ ოჯახის ხოლო მიორინუ, თინეფ შქას მუშ ოსურეფს (2 სამ. 12:10, 11). შხვა შემთხვევას დავითიქ ვეგმირჩქინ იეჰოვაშ მიმართ სრულ ნდობა დო ჯარიშ უკანონო აღრიცხვა ზოჯჷ. დავითის თენა შილებე სიამაყექ დო მუშ ჯარიშ სიდიდაშა დაიმენდებაქ ოკეთებაფუკო. მუქ მაჸუნ თეს შედეგო? სოდგარენ 70 000 ისრაელ ჭირქ გოჭყვიდ (2 სამ. 24:1—4, 10—15).

¹³ თიმ დროს ისრაელს ქოცხოვრენდითკონ, მუს იფიქრენდით დავითიშ გურშენ? ხომ ვა გასამართლენდით თის დო ხომ ვა თქუანდით, ნამდა ვა რდჷ იეჰოვაშ ჭყოლოფაშ ღირს? იეჰოვას თაშ ვა უკეთებ. თიქ ყურადღება თიშა გეგნიღ, მუჭო გიმირჩქინანდჷ დავით ართგურობას მთელ ცხოვრებას დო მუზმათ ნარღენდჷ დაშებულს. შედეგო იეჰოვაქ ქაპატუ დავითის თე სერიოზულ ცოდვეფ. ღორონთის უჩქუდ, ნამდა დავითის მანგარო უჸორდჷ თინა დო ოკოდ სწორას მოქციება. მარდულობაშ გრძნობას ვაირჩქინანანო თინა, ნამდა ღორონთ ჩქინ დადებით მხარეეფს ოკვირ? (1 მეფ. 9:4; 1 მატ. 29:10, 17).

14. მუნერ აზროვნება მეხვარებ ქრისტიანეფს, მეტო ვა გასამართლან შხვეფ?

¹⁴ იეჰოვა არასრულყოფილ ადამიანეფს ქოღებულენს-და, მუშო ოკო რაგად, ჩქი ხოლო ოკო მიბღათ ართიან დო ართიანიშ ჯგირ მხარეეფშა გეგნიბღათ ყურადღება. მუჭოთ წესინ, ადვილ რე შხვეფიშ არასრულყოფილებაშ ძირაფა დო გაკრიტიკება. სულიერო მოწიფულ პიროვნება ხოლო შილებე ორწყედას თე არასრულყოფილებას, მარა თენა ვაცილ შხვეფწკუმა ურთიერთობას. დამუშებულ ვა რენ ფერ ბრილიანტ შილებე უსქვამურ რდას, მარა მიდგას თიშ ფას უჩქჷ, ორწყე, მუზმათ ძვირფას იჸუაფ თე ბრილიანტ გასუფთება დო დამუშებაშ უკულ. იეჰოვა დო იესოცალო, ჩქი ხოლო მთავარ ყურადღება შხვეფიშ არასრულყოფილებაშა ვარინ, თინეფიშ ჯგირ თვისებეფშა ოკო გეგნიბღათ.

15. მუჭო შილებე შხვეფიშ მდგომარეობაშე დაფიქრებაქ მიმეხვარან, ვაგვაკრიტიკათ თინეფ?

¹⁵ ხოლო მუ მიმეხვარებნა, ვაგვაკრიტიკათ შხვეფ? ქეცადით, წერმიდგინათ, მუნერ ცხოვრება უღნა თინეფს. გუვარჩუათ ართ მაგალით. ართშა იესოქ ტაძარს გაჭირებულ ქომონჯღურელ ოსურ ძირჷ,  ნამდგაქ შესაწირავეფიშ ყუთის ჟირ ჭიჭეფასიან მონეტა ინაჸათ. იესოს ვა უკითხირ, მუშენ ვენაჸათ თიქ უმოს. თის შესაწირავიშ რაოდენობაშა ვეგნუღალ ყურადღება; იესოქ ქოძირ თე ოსურკოჩიშ მოტივეფ, მდგომარეობა დო ქაცქუ, მუთ შეულებუდუნ თიშ კეთებაშენ (ლუკ. 21:1—4).

16. მუშ გურაფა შემლებნა ვერონიკაშ შემთხვევაშე?

¹⁶ მუშენ რე მნიშვნელოვან შხვეფიშ მდგომარეობაშე დაფიქრება? თეს ქობძირუნთ ვერონიკაშ შემთხვევაშე. კრებას, სოდეთ ვერონიკა მსახურენდჷ, რდეს ხვალახე დიდა დო თიშ სქუა. ვერონიკა იჩიებ: „ფიფქრენდჷ, ნამდა თინეფ სრულას ვა ღებულენდეს მონაწილებას კრებაშ საქმეეფს. თენა ვა მობწონდჷ, მარა ართშა მსახურებაშა მიდაფრთჷ თე დიდაწკუმა ართო. თიქ მეჩუ, მუ სირთულეეფს ხვადუდ, მუშენდა აუტიზმით დალახებურ სქუა ჸუნდჷ. თინა ირფელს ორთუდ, ნამდა ქიზრუნკო მუნეფიშ ფიზიკურ დო სულიერ საჭიროებეფშო. სქუაშ ლახალაშ გურშენ თე და მინშა შხვა კრებას ოსწრუდ. ვა მიჩქუდ, თეცალ სერიოზულ პრობლემეფ უღუდუნ. ასე მანგარო ვაფასენქ დო პატის ფცენქ თის თი ირფელიშ გურშენ, მუდგას იეჰოვაშ მსახურებაშო ორთჷ“.

17. მუს ელამჩანა იაკობიშ 2:8 დო მუჭო შემლებნა თეშ კეთება?

¹⁷ მუ ოკო ვაკეთათ, მუჟამსით გურს გოუჩანთ, ნამდა ვაკრიტიკენთ თანამორწმუნეს?  ვაგმოჭყორდან, ჩქი ოკო მიჸორდან და დო ჯიმალეფ (წეკითხით იაკობიშ 2:8). თეს გეძინელ, მთელ გურით ქიბლოცათ დო ქოფთხუათ იეჰოვას, ქიმმეხვარან თე გლახა ჩვევაშ მეტებას. ლოცვეფიშ შესაბამისო მიფქციებუთ, მუჟამსით დროს გეგმურთუნთ თე პიროვნებაწკუმა ურთიერთობას. თენა საშვალებას ქომჩანა, უჯგუშო გეფჩინებაფუათ თინა. შემლებნა სადილშა ქუდვაპატიჟათ ვარდა ფთხუათ, მსახურებაშა მიდმაჸუნან. მუჟამსით უჯგუშო გეფჩინებაფუანთ ჩქინ თანამორწმუნეს, შემალებენა მივაჸუნათ იეჰოვაშ დო იესოშ მაგალითის დო თიშ ჯგირ მხარეეფშა გეგნიბღათ ყურადღება. თეშნერო ქუვოძირანთ, ნამდა ურჩქილეთ ჩქინ ჯგირ ჭყიშის, ნამდგაქ მიზოჯეს: „მეტო ვა გასამართლათ“.

18. მუჭო შემლებნა ვოძირათ, ნამდა ურჩქილეთ ჩქინ ჯგირ ჭყიშიშ ხონარს?

¹⁸ მუჭოთ შხურეფ ურჩქილენა მუნეფიშ ჭყიშიშ ხონარს, თეშ იესოშ მიმაჸუნალეფ ურჩქილენა თიშ ხონარს. მუჟამსით ქივეცადებუთ, ზედმეტო ვებწუხათ ჩქინ მატერიალურ საჭიროებეფშე დო მივოტუათ შხვეფიშ გასამართლება, იეჰოვა დო იესო აკურთხენა ჩქინ მონდომას. ზეცას ცხოვრებაშ იმენდ მიღნა დოვარ დედამიწას, მორთ ვემვოტუათ ჩქინ ჯგირ ჭყიშიშ მორჩქილაფა (ლუკ. 12:32; იოან. 10:11, 14, 16). ანწიან სტატიას გუვარჩიენთ ჟირ საკითხის, ნამუთ იესოქ უწუ მუშ მიმაჸუნალეფს, ნამდა ოკო აკეთან.