1. Mang reb i fan ni taarebrogonnag Jesus pi gachalpen ko saf?

I TAAREBROGONNAG Jesus e tha’ u thilrad pi gachalpen ko tha’ u thilin be’ ni ma gafaliy e saf nge pi saf rok. (John 10:14, 15) Ba puluw e re n’ey. Ya manang e pi saf e en ma gafaliyrad ma yad ma motoyil ngak. Ireray e n’en ni guy be’ ni ma milekag. I gaar: “Gamad baadag ni nggu feked yaan bogi saf ma gamad guy rogon ni ngar bad ngomad. Machane dar bad ngomad ya dar nanged lammad. Machane nap’an ni yib bochi pagel ni ma gafaliyrad i piningrad, mar leked ni ka chingiyal’ nem.”

2-3. (a) Uw rogon ni ma dag pi gachalpen Jesus ni yad ma motoyil ngak? (b) Mang e gad ra weliy ko re article ney nge bin migid?

² N’en ni buch rok facha’ ni ma milekag e be puguran ngodad e n’en ni yog Jesus u murung’agen pi gachalpen ni kan taareb rogonnagrad ko saf. I gaar: “Bay ra metelgad nga lungug.” (John 10:16) Machane Jesus e bay u tharmiy. Ere uw rogon ni ngad motoyilgad ngak? Gad ma motoyil ngak u nap’an ni gad ra rin’ e tin ke yog ni ngad rin’ed.​—Matt. 7:24, 25.

³ Gad ra weliy ko re article ney nge bin migid boch ban’en ni fil Jesus. Gad ra guy ni fil Jesus ni bay boch ban’en nsusun e ngad talgad ndab kud rin’ed ma bay boch nsusun e ngad rin’ed. Machane som’on e ngad weliyed l’agruw ban’en ni ke yog faen nib fel’ rogon ni ma gafaliy e saf ni ngad talgad i rin’.

4. Mang e rayog ni nge k’aring e ‘magafan’’ ngodad nrogon ni bay ko Luke 12:29?

⁴ Mu beeg e Luke 12:29. I yog Jesus ngak pi gachalpen ‘ndabi magafan’rad’ ko tin nib t’uf ko par rorad. Gad manang ni fonow ni ma pi’ Jesus e gubin ngiyal’ nib puluw ma bay e gonop riy. Ere gad baadag ni ngad folgad riy, machane yu ngiyal’ e ba mo’maw’ ni ngad rin’ed e re n’ey. Mang fan?

5. Mang fan ni bay boch e girdi’ nrayog ni nge magafan’rad nga rogon ni ngar yognaged e ggan, nge mad, nge bang ni ngar pared riy?

  ⁵ Boch e girdi’ e ma magafan’rad nga rogon ni ngar yognaged e ggan, nge mad, nge bang ni ngar pared riy. Rayog ni yad be par u reb e nam nib gafgow e girdi’ riy mab mo’maw’ ni ngan pirieg e maruwel riy. Ku rayog nib mo’maw’ ni ngar yognaged e salpiy nib gaman ni ngar ayuweged e tabinaw rorad. Fa reb e rayog ni ke yim’ e en ma yognag e salpiy nga lan e tabinaw, ere dariy e salpiy ni nge fek fare tabinaw e tin nib t’uf rorad riy. Maku reb e, rayog ni boor e girdi’ ndakuriy e maruwel rorad ara gin nge yag e salpiy riy ngorad ni bochan fare m’ar ni COVID-19. (Ekl. 9:11) Faanra ke buch reb e pi n’ey rodad ara yugu boch e magawon, ma uw rogon ni ngad folgad ko n’en ni yog Jesus ni aram e ngad talgad ndab ki magafan’dad?

6. Mu weliy ban’en ni buch rok apostal Peter.

⁶ Immoy bayay ni bay apostal Peter nge yugu boch e apostal u bbowoch u lan e Lipath nu Galile u nap’an ni ke yib bangi lang, ma nap’an nra sapgad mar guyed Jesus ni be yib ngorad u daken e ran. Ere gaar Peter: “Somol, faanra ri gur, me ere mog ngog nggub ngom nga daken e ran.” Tomuren ni yog Jesus ni nge ‘yan’ ngak, ma aram me chuw u lan fare bowoch nge “yan ngak Jesus u daken e ran.” Mu tay fanam i yan ko n’en ni buch nga tomuren. “Faani guy gelngin e nifeng me rus, ma aram me nguchur nga ar. Me pong ni ba ga’ laman ni gaar, ‘Somol, mu ayuwegneg!’” Ma aram me k’iyag Jesus pa’ nge ayuweg. Ba ga’ fan ndab da paged talin ni n’umngin nap’an ni par Peter ni be sap ngak Jesus, me yag ni nge yan u daken e ran. Machane nap’an ni guy gelngin e nifeng, ma aram me yib e marus ngak me tabab ni nge nguchur nga ar.​—Matt. 14:24-31.

7. Mang e rayog ni ngad filed ko n’en ni buch rok Peter?

 ⁷ Rayog ni ngad filed ban’en ko n’en ni buch rok Peter. Nap’an ni chuw u lan fare bowoch nge yan u daken e ran ma de lemnag nra rus ko fagi lang me nguchur nga ar. Baadag ni nge yan u daken e ran nge taw ngak Jesus. Machane de yag ni nge yiluy e changar rok ngak Jesus. Ngiyal’ ney e dabiyog ni nga darod u daken e ran, machane gad ma mada’nag e magawon ni ma skengnag e michan’ rodad. Ere faanra da talgad ndab ki pagan’dad ngak Jehovah nge tin ke micheg, ma rayog ni nge war e michan’ rodad mad paged gadad ko magafan’ rodad. Demtrug e re miti magawon nra yib ngodad, ma thingari pagan’dad ngak Jehovah nge gelngin nrayog ni nge ayuwegdad. Ere uw rogon ni ngad rin’ed e re n’ey?

8. Mang e ra ayuwegdad ni nge dabi pag rogon ni nge magafan’dad ko tin nib t’uf ko par rodad?

⁸ Ba t’uf ni nge pagan’dad ngak Jehovah ko bin ni nge magafan’dad ko magawon rodad. Dab da paged talin ni ke micheg Jehovah ni Chitamangidad nra pi’ e tin nib t’uf ko par rodad ni faan gad ra m’oneg u lan e yafos rodad. (Matt. 6:32, 33) Gad manang ni gubin ngiyal’ ni ma tay u gil’ e tin ke micheg. (Deut. 8:4, 15, 16; Ps. 37:25) Ere faanra ma pi’ Jehovah e tin nib t’uf ko arche’ nge floras, me ere dariy rogon ni nge magafan’dad ko n’en ni ngad ked ara ngad chuwgad ngay! (Matt. 6:26-30; Fil. 4:6, 7) T’ufeg e ma k’aring e Chitamangidad ni bay u tharmiy ni nge pi’ e tin nib t’uf ko girdi’ rok ni bod rogon e gallabthir ni yad ma pi’ e tin nib t’uf rok pi fakrad ni bochan e yad ba t’uf rorad. Arrogon, rayog ni nge pagan’dad ngay nra ayuwegdad Jehovah ko tin nib t’uf rodad!

9. Mang e rayog ni ngad filed ko n’en ni buch rok ba wu’ i mabgol?

⁹ Mu lemnag ban’en ni buch ni be dag rogon nrayog ni nge ayuwegdad Jehovah ko tin nib t’uf ko par rodad. Bay ba wu’ i mabgol ni yow ma pigpig u polo’ e tayim rorow nranow u ba karrow rorow ni ke n’uw nap’an nib pag reb e awa nga bangi ban’en ni ma par e girdi’ riy ni kar milgad ko nam rorad ni ngar fekew bogi walag nib pin ni ngar uned ko muulung. I yog fare walag ni pumoon ni gaar: “Tomuren e muulung ma gamow pining fapi walag nib pin nga tabinaw romow ni nggu abichgad, machane me yib ngan’mow ndariy ban’en ni nggu piew ni ngar ked.” Ere mang e buch? I ulul fare walag ngay ni gaar: “Nap’an nug tawgad nga tabinaw ma bay l’agruw birif i ggan u langan e mab romow. Dag nangew ko mini’ e ke yib i tay ngaram. I ayuwegmad Jehovah e rofen nem.” Boch nga tomuren me kireb e karrow ko fa wu’ i mabgol. Ba t’uf e karrow rorow ko machib, machane dariy e salpiy rorow ni ngan fal’eg e re karrow nem. Yugu aram rogon mar fekew nga bang ni yima mangongol karrow riy ni ngar guyew ko in puluwon ni ngan ngongliy. Machane me yib be’ nib pumoon me fith ni gaar: “Mini’ e fen e re karrow ney?” Me yog fare walag ni pumoon ni ir e karrow rok nib t’uf ni ngan ngongliy. Me gaar fare pumoon: “Dariy fan, ya baadag e ppin rog ni nge fanay reb e karrow ni bod e binir maku taareb raen. In puluwon ni ga baadag ni nggu pi’ ngom?” Ere chuw’iy fare pumoon fare karrow rok fare walag ma salpiy ni pi’ riy ngak e ba gaman nrayog ni ngki chuw’iy reb e karrow ngay. I gaar fare walag, “Rug felfelan’gow e rofen nem, ya gu nangew ni Jehovah e ke ayuwegmow.”

10. Uw rogon ni be pi’ e Psalm 37:5 e athamgil nga lanin’dad ndab ki magafan’dad ko tin nib t’uf ko par rodad?

¹⁰ Faan gad ra motoyil ngak faen nib fel’ rogon ni ma gafaliy e saf ma dabki magafan’dad nib pag rogon ko tin nib t’uf ko par rodad, ma aram e rayog ni nge pagan’dad nra pi’ Jehovah e tin nib t’uf rodad. (Mu beeg e Psalm 37:5; 1 Pet. 5:7) Am lemnag fapi magawon ni kan weliy murung’agen ko  paragraph 5. Rayog ni  kab kafram i yib ni be fanay Jehovah be’ ni lolugen e tabinaw ara be’ ni gad be maruwel rok ni nge pi’ e tin nib t’uf rodad u reb e rran ngu reb. Ere faanra dabkiyog ni nge pi’ e en lolugen e tabinaw e tin nib t’uf ko tabinaw ara kad talgad ko maruwel, mab mudugil ni bay boch e kanawo’ nra ayuwegdad Jehovah riy. Ere chiney e ngkud weliyed ban’en ni be yog faen nib fel’ rogon ni ma gafaliy e saf ni ngad talgad i rin’.

11. Mang e yog Jesus ni ngad talgad i rin’ nrogon ni bay ko Matthew 7:1, 2? Mang fan nrayog ni nge mo’maw’ e re n’ey ngodad?

¹¹ Mu beeg e Matthew 7:1, 2. Manang Jesus ndawori flont e girdi’ mab ga’ ni yad ma sap nga thibngin yugu boch e girdi’. Aram fan ni gaar: “Dab mu turguyed [“Mu talgad i turguy,” NW] e kireb nga daken e girdi’.” Rayog ni gad ma guy rogon ndab kud dugliyed rarogon e pi walag u wan’dad, machane yu ngiyal’ e ba mo’maw’ ya dawor da flontgad. Ere faanra gad be guy ni bay yu ngiyal’ ni gad ma sap nga thibngin yugu boch e girdi’, ma mang e susun ni ngad rin’ed? Mmotoyil ngak Jesus, mag athamgil u rogon nrayog rom ndab kum dugliy rarogon yugu boch e girdi’ u wan’um.

12-13. Faan gad ra lemnag rogon David ni Pilung u wan’ Jehovah, ma uw rogon nra ayuwegdad ni ngad talgad i dugliy rarogon yugu boch e girdi’ u wan’dad?

¹² Faan gad ra fal’eg i lemnag e n’en ke rin’ Jehovah ma ra yib angin ngodad. Jehovah e ma yaliy fel’ngin e girdi’. Am lemnag e n’en ni rin’ u nap’an ni rin’ David ni Pilung reb e denen nib ubchiya’. Ra parew Bathsheba ni gathi leengin, ngemu’ miki yan u thaan figirngin ni ngan li’ nge yim’. (2 Sam. 11:2-4, 14, 15, 24) Bochan e n’en ni rin’ David, me yib wenegan ngak nge chon e tabinaw rok ni kub muun e tin ka bay i leengin ngay. (2 Sam. 12:10, 11) Ku bay bayay nde pagan’ ngak Jehovah u nap’an ni yog ni ngan theeg urngin e salthaw u Israel, ma re n’ey e dawori yog Jehovah ngak ni nge rin’. Sana rayog ni rin’ e re n’ey ni bochan e be uf nga urngin e salthaw rok ma be lemnag ni yad e yad ra ayuweg yu Israel ndabi buch ban’en rorad. Ere mang e buch? Sogonap’an 70,000 e girdi’ nra m’ad ko m’ar ni yib nga daken yu Israel!​—2 Sam. 24:1-4, 10-15.

¹³ Faanra um moy u Israel e ngiyal’ nem, ma uw rogon ni ga ra lemnag David? Gur, ga ra lemnag ndariy tapgin ni nge dag Jehovah e runguy ngak? Gathi aram rogon ni lemnag Jehovah, ya lemnag rogon ni i par David nib yul’yul’ u n’umngin nap’an e yafos rok nge rogon ni ke kalngan’ ko kireb rok. Ere aram fan ni n’ag fan e gal denen nib ubchiya’ ney ni rin’ David. Manang Jehovah nrib t’uf rok David ma baadag ni nge rin’ e tin nib fel’. Ere ku arrogodad ni gad ba felfelan’ ni ma yaliy Jehovah fel’ngidad nge tin nib fel’ ni gad ma rin’.​—1 Ki. 9:4; 1 Kron. 29:10, 17.

14. Mang reb e ban’en ni be ayuweg e piin Kristiano ni nge dab kur dugliyed rarogon yugu boch e girdi’ u wan’rad?

¹⁴ Bochan nder ma lemnag Jehovah ni urngin ban’en ni ngad rin’ed ndab da olobochgad, me ere susun ni ku arrogodad ndab da lemnaged ni urngin ban’en ni nge rin’ yugu boch e girdi’ mab fel’ rogon ndab ra olobochgad, ma ngkud yaliyed fel’ngirad. Ba ga’ nib mom ni ngad guyed thibngin yugu boch e girdi’ ma kub mom ni ngaud gathibthibnaged e girdi’. Machane be’ ni ma folwok rok Jehovah e ba fel’ rogon ni yad ma rin’ yugu boch e girdi’ ban’en u taabang ni yugu aram rogon ni manang e meewar rorad. Ba diamond ndawor ni fal’eg rogon e ba kireb yaan, machane be’ nib gonop e manang nu tomuren ni yira th’ab ngan fal’eg yaan ma ra yan i par ni kari fel’ yaan. Ere susun e ngaud yaliyed fel’ngin yugu  boch e girdi’ ni bod ni ma rin’ Jehovah nge Jesus ko bin ni ngaud pared ni gad be yaliy e pi meewar rorad.

15. Faan gad ra lemnag e n’en be buch rok yugu boch e girdi’, ma uw rogon nra ayuwegdad ndab da gathibthibnaged yad?

¹⁵ Mang e ku ra ayuwegdad ni ngad yaliyed fel’ngin yugu boch e girdi’ ma dab da gathibthibnaged yad? Ngad guyed rogon ni ngad lemnaged e n’en be buch rorad. Am lemnag e re n’ey ni buch. Immoy reb e rran ni bay Jesus u tempel me guy be’ nib pin nib gafgow ya ke yim’ figirngin ni ke yib i yon’ l’agruw chi kobre’ nrow nib achig nga lan tafen e salpiy u tempel. De fith Jesus ni gaar: “Mang fan nde yon’ e salpiy ni boor?” Ya n’en ni rin’ e lemnag fan ni ke rin’ e re n’em nge n’en ke buch rok me yog fel’ngin e tin ke rin’.​—Luke 21:1-4.

16. Mang e rayog ni ngam fil ko n’en ni buch rok Veronica?

¹⁶ N’en ni buch rok Veronica e be dag feni ga’ fan ni ngad lemnaged e n’en be buch u lan e yafos rok yugu boch e girdi’. Re ulung ni baaram ni ma un ngay e bay ba matin riy ndariy figirngin ma bay bochi pagel ni fak. I gaar Veronica: “Bod ndarur unew ko muulung nge machib ni gubin ngiyal’. Bochan e re n’ey, ma aram mu ug lemnag boch ban’en u rarogorow nde puluw. Machane faani reb e rran ma gamow machib fare matin u taabang, ma aram me yog ngog ni bay ba mit e m’ar ko fare pagel ni fak. Ma be athamgil u rogon nrayog rok ni nge yognag  e tin nib t’uf ko par rorow nge tirok Got ban’en. Bochan rogon e m’ar ko re pagel ni fak nem, ma aram fan ni bay yu ngiyal’ ni ma yan i un ko muulung ni ma tay yugu reb e ulung.” I yog Veronica ni gaar: “Da ug nang gelngin e magawon ni i yan u fithik’. Ere chiney e kari t’uf e re walag ney rog ma gu be tayfan ko tin be rin’ ni fan ko pigpig rok ngak Jehovah.”

17. Mang e be yog e James 2:8 ni ngad rin’ed, ma uw rogon ni ngad rin’ed e re n’ey?

¹⁷ Mang e susun ni ngad rin’ed ni faanra kad nanged ni gad be dugliy rarogon reb e walag u wan’dad? Thingar dab da paged talin nib t’uf ni ngad t’ufeged pi walagdad. (Mu beeg e James 2:8.) Ma susun e ngkud pared ni gad be meybil ngak Jehovah ni nge ayuwegdad ndab kud dugliyed rarogon yugu boch e girdi’ u wan’dad. Ku rayog ni ngad ngongolgad nib puluw ko n’en gad be yibilay ni aram e ngad guyed rogon ni ngad rin’ed facha’ boch ban’en u taabang. Re n’ey e ra ayuwegdad ni ngad nanged rarogon facha’. Ere rayog ni ngad pininged ni nge un ngodad ko machib ara ngad abichgad u taabang. Nap’an ni gad ra nang walagdad nib fel’ rogon, ma rayog ni ngad guyed rogon ni ngad folwokgad rok Jehovah nge Jesus ni aram e ngad sapgad nga fel’ngin. Gad ra rin’ e re n’ey, ma aram e gad be dag ni gad be fol ko n’en ni yog faen nib fel’ rogon ni ma gafaliy e saf ni aram e ngad talgad i dugliy rarogon yugu boch e girdi’ u wan’dad.

18. Uw rogon ni ngad daged ni gad be motoyil ngak faen nib fel’ rogon ni ma gafaliy e saf?

¹⁸ Pi gachalpen Jesus e yad ma motoyil ngak ni bod rogon e saf ni yad ma motoyil nga lungun e en ma gafaliyrad. Faan gad ra guy rogon ni nge dabki magafan’dad ko tin nib t’uf ko par rodad ma dab kud dugliyed rarogon yugu boch e girdi’ u wan’dad, ma aram e ra tow’athnagdad Jehovah nge Jesus. Demtrug ko gad bang ko ‘fachi ulung’ ara gad ba muun nga “yugu boch e saf,” ma ngad ululgad ni ngad motoyilgad ngak faen nib fel’ rogon ni ma gafaliy e saf ma gad fol rok. (Luke 12:32; John 10:11, 14, 16) Bin migid e article e gad ra weliy riy l’agruw ban’en ni yog Jesus ngak pi gachalpen nsusun e ngar rin’ed.