DILOGNI 50
Yuwa Mbembu yi Nsungi Wumboti
“Bawu bala kuwa mbembu’ami.”—YOA. 10:16.
NKUNGA 3 Mangolo Mitu, Kivuvu Kitu, Lufiatu Luitu
MAMBU TUANLONGUKA *
1. Kibila mbi Yesu kadedikisila minlandikini miandi na mamemi?
YESU wudedikisa kikundi kaba na minlonguki miandi na kithuadi kidi, nsungi ayi mamemi. (Yoa. 10:14) Kifuani akiokio kidi beni kimboti, kibila mamemi manzabanga buboti nsungi’awu ayi bankuwanga mbembu’andi. Dibakala dimueka wuba mu viage, wumona bivisa mu mawu ayi wutuba: “Bo tumona nkangu wu mamemi, tuba tela kibila tuaba tomba kuvanga video. Vayi bawu basa kuiza ko vo tuba kibila basa tuzaba ko. Bo muana ditoko wuba nsungi’awu kavitila ayi kabatela, bawu banlandakana muna thangu.”
2-3. (a) Buidi minlandikini mi Yesu bammonisinanga ti bankuwanga mbembu’andi? (b) Mambu mbi tunkuiza mona mu dilongi adidi ayi dinkuiza?
2 Kifuani ki dibakala adiodio ki tutebula moyo mambu Yesu katuba mu matedi mamemi mandi voti—minlandikini miandi. Nandi wutuba: “Bawu bala kuwa mbembu’ami.” (Yoa. 10:16) Buidi tunkuwilanga mbembu yi Yesu widi ku diyilu? Mu kusadila mambu nandi ka tulonga mu luzingu luitu.—Matai 7:24,25.
3 Mu dilongi adidi ayi dinkuiza, tunkuiza tubila mua malongi Yesu kalonga. Dedi tunkuiza mona ti, Yesu wutulonga mambu tufueti vanga ayi mo tufueti bika kuvanga. Vayi tuemmona theti mambu nsungi wumboti ka tulonga tubika vanga.
“BIKA KUKUAZUKA BENI MU MAMBU MA KINSUNI”
4. Dedi bumonisa Luka 12:29, mbi bilenda“ku tuvanga kukuazuka”?
4 Tanga Luka 12:29. Yesu wukindisa minlandikini miandi “babika kukuazuka beni” mu zitsatu ziawu zi kinsuni. Tuzebi ti dilongi adiodio Yesu kavana, didi di nduenga ayi disulama. Befu tuntombanga kusadila dilongi adiodio, vayi khumbu zinkaka, tummonanga phasi kuvanga mawu. Kibila mbi?
5. Kibila mbi bankaka balenda kuazukila beni mu zitsatu ziawu zi kinsuni?
5 Bawombo balenda kuazuka mu zitsatu ziawu zi kinsuni, dedi—bidia, mimvuatu, ayi vama va kukala. Ḿba banzingilanga ku tsi yidi beni phasi kubaka zimbongo zifuana muingi kuzingisila dikanda, ove kisalu kiaba sadisanga dikanda kubaka bu kuzingila kifua ayi mvandi ḿba bawombo baba botula mu kisalu mu kibila ki kivunga ki COVID-19. (Mpovi. 9:11) Boti mu mambu amomo muidi mu kuviokila, buidi mulenda landikinina dilongi Yesu kavana di kukhambu kuazuka beni?
Muingi tubika sinda mu kukuazukila ngolo matedi zitsatu zi kinsunyi, buboti beni tufiatila kuidi Yave (Tala lutangu 6-8) *
6. Sudikisa mambu mvuala Petelo kamonikina.
6 Khumbu yimueka, mvuala Petelo ayi bapostolo bankaka baba mu dikumbi ku ḿbu wu Ngalili bo kivuka kitona. Bo bamona Yesu kudiata va mbata nlangu, Petelo wutuba: “A Mfumu, boti ngiewu, buna thumisa, mo yiza vo widi ayi yidiata va mbata nlangu.” Bosi Yesu wunkamba: “Yiza.” Petelo wubasika mu dikumbi, “wudiata va mbata nlangu ayi wuyenda vaba Yesu.” Tala mambu mamonika. “Bo Petelo kasikika thalu mu kivuka, nandi wuyiza ba beni boma ayi wutona kusinda, bosi wutenduka: ‘A Mfumu, phukisa!’” Yesu wunonuna koku ayi wumvukisa. Bukiedika, mvuala Petelo wununga kudiata va mbata nlangu bo kasikika thalu’andi kuidi Yesu. Vayi bo kasikika thalu’andi mu kivuka, diawu kabela mu boma, ayi wutona kusinda.—Matai 14:24-31.
7. Mbi tulenda longuka mu kifuani ki mvuala Petelo?
7 Mvuala Petelo bo kabasika mu dikumbi wudiata va mbata nlangu, ayi kasa ta ko mana ti wunkuiza vuvuka ayi kusinda. Nandi kaba tomba kudiata va mbata nlangu nati kuvitila vaba Mfumu’andi. Vayi kasa nunga ko kuvanga mawu. Bubu tulendi nunga ko kudiata va mbata nlangu, vayi tunkindamanga bo bantota kiminu kitu. Befu kumanga sikika thalu mu Yave ayi mu zikhanu ziandi, tulenda tona kusinda mu kiphevi. Diawu boso kua bubela zithotolo tulenda viokila mu luzingu, tufueti tatamana kusikika thalu mu Yave ayi lulendu kadi lu ku tusadisa. Buidi tulenda vangila mawu?
8. Mbi bilenda tusadisa kubika tsikika beni thalu mu zitsatu zitu zi kinsuni?
8 Befu kukuna lufiatu ayi kubika kuazuka beni tuala baka ndandu. Tebuka moyo ti Tat’itu yi luzolo Yave, wukanikisa kukieba zitsatu zitu zi kinsuni befu kutula mambu ma kiphevi va theti mu luzingu luitu. (Matai 6:32, 33) Ayi binongo bi Kibibila bimmonisa buidi Yave kandukisilanga zikhanu ziandi. (Deute. 8:4, 15, 16 Minku. 37:25) Boti Yave wundikilanga zinuni, ayi wunkiebanga biteka, ba lufiatu ti nandi wunkuiza tuvana biuma bi kudia ayi bi kuvuata! (Matai 6:26-30; Fili. 4:6, 7) Dedi bo luzolo lumvanganga matata kukieba zitsatu zi bana bawu, luzolo lu Tat’itu yi diyilu lukumvanganga kakieba zitsatu zi kinsuni zi dikabu diandi. Bukiedika tulenda ba lufiatu ti Yave wunkuiza tukieba!
9. Mbi ngie belonguka mu kifuani ki bakuela abobo?
9 Tala kivisa mu phila Yave kankiebilanga zitsatu zitu zi kinsuni. Khomba mueka widi mu kisalu ki thangu ka thangu ayi nkazi’andi, badiata kilokula kimueka mu dikalu muingi kue landa zikhomba batina mvita muingi benda mu lukutukunu. Nnuni wutuba: “Bo lukutukunu lumana, tutumisa zikhomba beni ku nzo muingi badia yitu, vayi tuvisa ti tuisa ba ko ni kiuma ki kuba vana. Mbi bawu bavanga? Khomba beni wubue tuba: “Bo tuvitila ku nzo, tuyenda kue bata zitsaku wadi zi bidia va muelu nzo’itu. Tusa zaba ko nani wutubikila biawu. “Yave wutukieba.” Bo vavioka mua thangu, dikalu diaba ku basadisanga mu kisalu ki kusamuna divavuka, ayi basa ba ko zimbongo muingi ku divangisa. Diawu ba dibikila ku oficina. Dibakala dimueka bo kamona dikalu beni wuyuvula: “Nani vuidi dikalu adiodio?” Khomba wutuba ti diba diandi ayi waba tomba kuvangisa diawu. Dibakala beni wunkamba: “Disi ko diambu diphasi! Nkazi’ama wuntomba ntindu dikalu adiodio. Wulenda kutsumbisa diawu?” Khomba wuvutuka ku nzo na zimbongo zifuana muingi kusumbila dikalu dinkaka. Bosi nandi wutuba: “Wulenda yindula mabanza mitu kutsuka kilumbu kinani! Befu tuzaba ti mambu amomo masa monikina ko mu kinzimbukila. Vayi “Yave nandi wu tusadisa.”
10. Buidi lutangu lu Minkunga 37:5 lu tukindisila tubika kuazuka beni mu zitsatu zi kinsuni?
10 Befu kukuwa nsungi wumboti ayi kubika kuazuka beni mu zitsatu zitu, tulenda ba lufiatu ti Yave wala tuvana bio tuntomba. (Tanga Minkunga 37:5; 1 Pete. 5:7) Tala mambu tube tubila mu lutangu 5. Nati avava, tuma mona ti Yave kalenda sadila mfumu dikanda ove mfumu kisalu muingi ku tusadisa kudukisa zitsatu zitu zi kadika lumbu. Boti mfumu dikanda kasi bue nunga ko kudukisa zitsatu zi dikanda, voti babe tubotula mu kisalu, tulenda ba lufiatu ti Yave wala tukieba mu ziphila zinkaka. Buabu tuemmona dilongi dinkaka nsungi wumboti ka tukamba tubika vanga.
“BIKA KUFUNDISA”
Kumanga tsikika to thalu mu zikhadulu zimbi kulenda tusadisa tubika fundisa bankaka (Tala lutangu 11, 14-16) *
11. Kifu mbi Yesu ka tukandimina mu Matai 7:1, 2? Vayi kibila mbi didi diambu diphasi kuvanga mawu?
11 Tanga Matai 7:1, 2. Yesu wuzaba ti batu baba kuwa dilongi diandi, baba batu ba masumu ayi khumbu zinkaka balenda sikika thalu mu zinzimbala zi bankaka. Nandi wutuba: “Bika kufundisa.” Diawu tufueti vanga mangolo muingi tubika fundisa zikhomba zitu kibila befu boso tusumuka. Vayi befu kubakula ti tuidi kifu beni, mbi tufueti vanga? Sadila dilondi di Yesu ayi vanga mangolo muingi wubika kifu akiokio.
12-13. Buidi kuyindula phila Yave katadila Ntinu Davidi kulenda tusadisila tubika fundisa bankaka?
12 Befu tulenda baka ndandu mu kulandakana kifuani ki Yave. Nandi wunsikikanga thalu mu mamboti mitu. Tala mambu kavanga bo Ntinu Davidi kavola masumu mangolo. Theti Davidi wuvanga kitsuza na Bata Seba ayi wutuma bavondisa nnuni’andi. (2 Samu. 11:2-4, 14, 15, 24) Mu kibila akiokio, Davidi wutuadisa ziphasi kuidi naveka, dikanda diandi ayi mvandi kuidi bakazi bandi bankaka. (2 Samu. 12:10, 11) Khumbu yinkaka, Davidi kasa monisa ko lufiatu mu Yave bo katuma kutanga thalu yi masodi ku Isaeli, mambu Yave kakhambu kuntuma. Nandi kavangila mawu mu lunyemu ayi mu lufiatu kaba mu masodi mandi. Mambu mbi mamonika? Mu kibila akiokio, kuyisa fua 70.000 di basi Isaeli mu kimbevu!—2 Samu. 24:1-4, 10-15
13 Boti ngie wuba ku Isaeli mu thangu beni, khanu buidi wutadila Davidi? Ngie khanu wuyindula ti busa fuana ko Yave kammonisa kiadi? Vayi Yave wuyindula lukuikumunu lu Davidi ayi bo kayongina mu bukiedika masumu mandi, diawu Yave kanlemvukila. Yave wuzaba ti Davidi waba kunzolanga beni ayi waba tomba kuvanga mambu masulama. Tumvutula beni matondo kuidi Yave bo kansikikanga thalu mu zikhadulu zitu zimboti.—1 Minti. 9:4; 1 Lusa. 29:10, 17.
14. Mbi bilenda sadisa Baklisto kubika fundisanga bankaka?
14 Boti Yave kasikikanga ko to thalu mu zinzimbala zitu, buna befu mvitu tulendi tsikikanga ko to thalu’itu mu zinzimbala zi bankaka. Vayi mutu widi buboti mu kiphevi kheti wummonanga zinzimbala aziozio, nandi wuntatamananga kusala mu kithuadi na bankaka. Dimanya di thalu dedi diamante, boti ba disukudiabu ko, dimonikinanga ko dimboti. Vayi mutu widi luzabu zebi ti ba ku disukula, diala ba luvalu luwombo. Diawu, dedi Yave ayi Yesu tulendi sikikanga ko to thalu mu zinzimbala zi bankaka vayi mu zikhadulu ziawu zimboti.
15. Buidi kuyindula mu mambu batu bamviokila malenda kutu sadisila tubika ku bafundisa?
15 Kubika kuandi to kusikikanga mayindu mu zikhadulu zimboti zi bankaka, mbi binkaka tufueti vanga muingi tubika ku bafundisa? Meka kuyindula nzingulu’awu. Tala kifuani akiki. Kilumbu kimueka ku tempelo, Yesu wumona mfuizi wuba kiphumbulu kutula zimbongo wadi zi bisengu zikhambu ba beni luvalu mu zikasu zi tempelo. Yesu kasa yindula ko: “Kibila mbi kamvanina to zimbongo aziozio?” Yesu kasa sikika ko mayindu mu thalu yi zimbongo mfuizi kavana, vayi nandi wumona kibila kavanina ziawu, mambu kaba viokila ayi wuntonda mu mawu.—Luka 21:1-4.
16. Mbi ngie wulenda longuka mu mambu yaya Veronica katuba?
16 Muingi kuvisa nkinza wu kuyindula mambu bankaka badi mu kuviokila, tala mambu yaya Veronica kaviokila. Mu kimvuka nandi kadi muidi khomba yinkieto wunkiebanga muan’andi naveka. Yaya Veronica wutuba: ‘Yaba kuba tadilanga mu phila yi khambu fuana kibila bawu babasa kivananga ko beni mu mambu ma kimvuka. Vayi kilumbu kimueka yibasika yandi mu kisalu ki kusamuna, nandi wutsudikisa mambu baba viokila. Bosi yivisa ti nandi waba vanga mambu moso kannunga muingi kukieba zitsatu ziawu zi kinsunyi ayi zi kiphevi. Ayi yivisa ti mu kibila ki buvinya bu muan’andi, diawu khumbu zinkaka kabe landikininanga zikhututunu mu kimvuka kinkaka.” Yaya Veronica wubue tuba: “Minu yabasa visanga ko ziphasi kaba viokila. Buabu yimvuanga nkinza ayi yinkinzikanga khomba beni mu mamoso kamvanga muingi kusadila Yave.”
17. Mbi Yakobi 2:8 yi tukindisa kuvanga, ayi buidi tulenda vangila mawu?
17 Mbi tufueti vanga befu kubakula ti tuentona kufundisa khomba? Nkinza kutebukanga moyo ti tufueti zola zikhomba zitu. (Tanga Yakobi 2:8.) Mvandi tufueti sambila kuidi Yave muingi ka tusadisa tubika bue fundisa bankaka. Ayi muingi tumonisa ti tutidi kusadila mambu tube dinda mu sambu, tufueti tuama ntuala muingi kukoluka na khomba beni. Mawu mala tusadisa kunzaba buboti. Mvandi tulenda dinda muingi tusala yandi mu kisalu ki kusamuna voti kudia yandi. Bo tumvanga mangolo ma kuzaba buboti khomba, befu tuidi mu kulandakana kifuani ki Yave ayi Yesu bammonanga mamboti madi mu bankaka. Ayi mu phila ayoyo, tuidi mu kumonisa ti tunlandakana nsua wu nsungi wumboti mu matedi kubika fundisa bankaka.
18. Buidi tulenda monisina ti tuidi mu kukuwa mbembu yi nsungi wumboti?
18 Dedi bo mamemi bankuwilanga mbembu yi nsungi’awu, minlandikini mi Yesu mvandi bafueti kuwa mbembu’andi. Befu kuvanga mangolo muingi tubika kuazuka beni mu kibila ki zitsatu zi kinsunyi ayi kubika fundisanga bankaka, Yave ayi Yesu bala sakumuna mangolo tumvanga. Kuba kuandi ti tuidi mu “nkangu wuluelu” voti “nkangu wunneni” tulenda tatamana kukuwa ayi kutumukina mbembu yi nsungi wumboti. (Luka 12:32; Yoa. 10:11, 14, 16) Mu dilongi dinkuiza, tuala tubila mambu muadi mankinza Yesu kakamba minlandikini miandi batatamana kuvanga.
NKUNGA 101 Tusala mu Kithuadi na Zikhomba
^ Lut. 5 Bo Yesu katuba ti mameme mandi bala kuwa mbembu’andi, nandi waba tomba kutuba ti milandikini miandi bala kuwa malongi mandi, ayi bala sadila mawu mu luzingu luawu. Mu dilongi adidi,tuinkuiza tubila malongi muadi mankinza: Kubika kuazuka beni mu zitsatu zi kinsuni ayi kubika fundisa bankaka. Mvandi tunkuiza mona, buidi tulenda sadila malongi amomo.
^ Lut. 51 MAMBU MADI MU ZIFIKULA: Khomba ba bembotula mu kisalu ayi kasiedi ko zimbongo muingi kukiebila dikanda, mvandi kafueti tomba nzo yinkaka. Na kukuazukila ngolo mu mambu amomo, kifusa kiandi mu mbuongimini yi Nzambi kilenda dekuka.
^ Lut. 53 MAMBU MADI MU ZIFIKULA: Khomba kasa vitila ko mu thangu mu lukutukunu. Vayi nandi wummonisa zikhadulu zimboti bo kamvana kimbangi, kambuela mioko kuidi khomba ma nuna ayi bo kansala muingi kudiodisa Nzo yi Kintinu.
