1-2. (a) Gin ango ma kiciko lukwena adek pa Yecu me timone, dok gin gudok iye nining? (b) Gin ango ma wabinyamo i pwony man?

I NGE Kwer me Kato me mwaka 32 K.M., lukwena Petero, Yakobo, ki Jon guneno ginanyuta mo me aura adada. Kom Yecu olokke ma gineno i kare ma gitye i wi got mo mabor adada, ma nen calo obedo bad Got Kermon. Baibul waco ni, “Wange oryeny calo ceng, ginarukane odoko tar ma wil calo dero ceng.” (Mat. 17:1-4) Ma ginanyuta man cok tum, lukwena magi guwinyo ka Lubanga waco ni: “Man aye Woda ma amaro; wuwinye.” (Mat. 17:5) Lukwena adek-ki gunyuto ki i kit ma gukwo kwede i nge gin mutimme man ni gubedo luwiny bot Yecu. Wamito ni walub lanengi.

² I pwony ma okato-ni, wapwonyo ni winyo dwan Yecu tyen lokke ni wajuk timo jami mogo. I pwony man, wabinyamo jami aryo ma Yecu owaco ni omyero watimgi.

3. Ma lubbe ki Matayo 7:13, 14, omyero watim gin ango?

³ Kwan Matayo 7:13, 14. Nen ni Yecu otito ni tye doggola aryo mapatpat ma tero dano i yo aryo mapatpat bene, yo acel “lac” ki yo mukene-ni “ding.” Pe tye yo mo me adek. Wan aye omyero wayer piwa kenwa yo mene ma wabiwot iye. Man aye obedo tam ma pire tek loyo ma wabimokone pien genwa me nongo kwo ma pe tum jenge iye.

4. Yo ‘malac-ci’ tye nining?

⁴ Omyero wiwa opo i kom apokapoka ma tye i kin yo  aryo-ni. Jo mapol gitye ka wot i yo ‘malac’ pien wot iye yot. Ki cwercwiny madit, jo mapol giyero me medde ki wot i yo man dok gilubo mere kor lwak. Pe giniang ni Catan Larac aye tye ka bito dano me wot i yo man, dok yo man tero dano i to.—1 Kor. 6:9, 10; 1 Jon 5:19.

5. Gin ango ma jo mukene gutimo me nongo yo ‘mading’ ki me cako wot iye?

⁵ Ka kiporo yo ‘malac’ ki yo mukene-ni, ci inongo ni yo me aryo-ni “ding” dok Yecu owaco ni jo manok keken aye gitye ka wot iye. Pingo? I tyeng ma lubo meno, Yecu ociko lulub kore i kom lunebi ma lugoba. (Mat. 7:15) Tye dini alip mapol, dok polgi giwaco ni gipwonyo lok ada. Pien dini tye mapol, jo mapol bene wigi tye ma onywene dok cwinygi otur adada, pi meno pe dong giyelle me yenyo yo ma tero dano i kwo. Ento yo man twero nonge. Yecu owaco ni: “Ka wumoko i lokka, ci wun lupwonnyena adada; miyo wubingeyo lok me ada, lok me ada bigonyowu.” (Jon 8:31, 32) Tye me yomcwiny adada ni in pe ilubo mere kor lwak, me ka meno, iyenyo ada. Icako kwano Lok pa Lubanga i yo matut wek ipwony gin ma en mito ki botwa, dok iwinyo pwony pa Yecu. I kin jami mukene mapol, ipwonyo ni Jehovah mito ni wakwer pwony pa dini goba dok wajuk kwero kwer ma kubbe ki dini goba. Ipwonyo bene ni timo alokaloka i kwoni wek iyom cwiny Jehovah pe yot. (Mat. 10:34-36) Nen calo pe obedo yot boti me timo alokaloka. Ento imedde ki tute me timo alokaloka magi pien imaro Woru me polo dok imito nongo cwakke. Cwinye pud dong yom i komi ya!—Car. 27:11.

6. Ma lubbe ki Jabuli 119:9, 10, 45, 133, gin ango ma twero konyowa me medde ki wot i yo man mading-ngi?

⁶ Ka dong wacako wot i yo mading-ngi, gin ango ma bikonyowa me medde ki wot iye? Nen kong lapor man. I lobe mukene, kiketo cel i teng gudi ma tye i kor got. Cel man gengo lutic ki gudi wek pe guo cok ki teng got dok pe gupot piny. Pe tye ngat mo ma twero waco ni cel man rac pien tye ka gengogi ki poto piny wek giwanne nyo bene gito! Rwom me kwo ma atir ma Jehovah oketo i Baibul tye calo cel meno. Rwom me kwo ma atir pa Jehovah konyowa me medde ki wot i yo mading-ngi.—Kwan Jabuli 119:9, 10, 45, 133.

7. Jo matino myero gunen yo mading nining?

⁷ Wun jo matino, tika i kare mogo wuwinyo calo rwom me kwo ma atir pa Jehovah diyowu? Meno aye gin ma Catan mito ni wutam. En mito ni wuket cwinywu i kom jami ma jo ma gitye ka wot i yo malac gitye ka timo pien nen calo gitye ka bango raa. Catan twero tic ki jami ma lutino kwan luwotwu gitimo i cukul nyo jami ma wuneno i Intanet wek wuwiny calo wutye ka keng kwo maber. Catan mito ni wutam ni rwom me kwo ma atir pa Jehovah tye ka gengowu ki camo kwo kit ma wumito. * Ento wiwu myero opo i kom lok man: Catan pe mito ni jo ma gitye ka wot i yone gunen ka ma yo meno biterogi iye. Ento ki tungcel, Jehovah mito ni wunge kit ma kwowu  bibedo mamwonya kwede ka wumedde ki bedo i yo ma tero dano i kwo.—Jab. 37:29; Ic. 35:5, 6; 65:21-23.

8. Gin ango ma jo matino gitwero pwonyo ki i lanen pa Olaf?

⁸ Nen kong gin ma itwero pwonyo ki i gin mutimme i kwo pa omego mo matidi ma nyinge Olaf. * Lutino kwan luwote gubedo ka keto lyeto i kome me donyo i tim tarwang. I kare ma en otittigi ni Lucaden pa Jehovah gikwo ma lubbe ki rwom me kwo ma atir ma tye i Baibul, anyira mogo i kilacine guketo tek me bite wek obut kwedgi. Ento Olaf ocung matek pi gin ma atir. Dok man pe obedo atematema acel keken ma en okato ki iye. Olaf owaco ni: “Lupwonyena gubedo ka bita ni acit i univaciti pien biweko dano gibiwora. Guwacca ni ka pe atimo meno, ci pe abinongo tic maber nyo yomcwiny i kwona.” Gin ango ma okonyo Olaf me kwero atematema magi? En otito ni: “Adongo wat macok adada ki jo  me kacokkewa. Gin gudoko calo jo me gangwa. Acako bene keto cwinya i kwano Baibul. Ma amedde ki kwano Baibul i yo matut, amoko ni atye i ada. Macalo adwogine, amoko tamma me tic pi Jehovah.”

9. Gin ango ma omyero jo ma gimito medde ki wot i yo mading-ngi gutim?

⁹ Catan mito ni ijuk lubo yo ma tero dano i kwo. En mito ni icit ilub kor lwak ma gitye ka wot i yo malac “ma tero dano i to.” (Mat. 7:13) Kadi bed kit meno, wan wabimedde ki wot i yo mading ka wamedde ki winyo lok pa Yecu kun waneno yo man calo gin ma tye ka gwokowa. Kong dong wanenu gin mo mukene ma Yecu owaco ni omyero watim.

10. Ma lubbe ki Matayo 5:23, 24, Yecu owaco ni watim gin ango?

¹⁰ Kwan Matayo 5:23, 24. I tyeng man, Yecu oloko i kom gin mo ma onongo pire tek adada bot Lujudaya ma onongo gitye ka winyo lokke. Go kong ngat mo ma tye i ot pa Lubanga dok tye atera me miyo leene me atyera bot lalamdog. Ka i cawa meno wiye opo ni wat i kin en ki omine pe tye maber, omyero en owek gityere ci ‘odok cen.’ Pingo? Gin ango ma onongo pire tek loyo miyo gityer bot Jehovah? Yecu owaco ka maleng ni: “Mukwongo kong wumer wuribbe ki omeru.”

11. Gin ango ma Yakobo otimo me yubo wat i kin en ki Ecau?

¹¹ Watwero nongo pwony ma pire tek adada madok i kom yubo wat ka wanyamo gin mutimme i kwo pa Yakobo. I nge kare ma Yakobo oweko lobo ma kinywale iye pi mwaki 20, Lubanga owacce ni en odok cen kunu. (Acak. 31:11, 13, 38) Ento peko mo onongo tye. Ominne madit, Ecau, onongo yam mito neke woko. (Acak. 27:41) “Lworo omako Yakobo matek, kome bene oryangnge woko” ni nen calo ominne pud tye ki kiniga i kome. (Acak. 32:7) Gin ango ma Yakobo otimo me yubo wat ki ominne? Mukwongo, en olego ki cwinye ducu bot Jehovah i kom lok meno. Ci en ocwalo mot madit adada bot Ecau. (Acak. 32:9-15) Dok i kare ma en oneno Ecau, Yakobo onyuto woro bot Ecau. En oryebbe piny i nyim Ecau pe kicel nyo kiryo keken, ento tyen abiro kulu! Yakobo onongo mwol dok onyuto woro bot Ecau ci oyubo wat ki ominne.—Acak. 33:3, 4.

12. Gin ango ma watwero pwonyo ki i lanen pa Yakobo?

¹² Wanongo pwony ma pire tek adada ki i kit ma Yakobo oyubbe dok orwatte ki ominne Ecau. Ki mwolo madit, Yakobo olego Jehovah pi kony. Dok en otimo gin ma olego pire-ni ki timo jami ma weko rwattene ki omine nyako nyige. I kare ma omege aryo-ni gurwatte, Yakobo pe otele ki Ecau i kom anga ma labal. Yub pa Yakobo onongo tye me yubo wat i kin en ki ominne. Watwero lubo lanen pa Yakobo nining?

13-14. Ka wacwero cwiny laye lawotwa mo, ngo ma omyero watim?

¹³ Ka wamito medde ki wot i yo ma tero dano i kwo, ci omyero wabed ki wat maber ki omege ki lumege. (Rom. 12:18) Gin ango ma omyero watim ka waniang ni wacwero cwiny laye lawotwa mo? Calo Yakobo, omyero waleg Jehovah ki cwinywa ducu. Watwero lega ni  ogo laane i kom tutewa me yubo wat i kinwa ki ominwa nyo laminwa.

¹⁴ Omyero wakwany kare me ngine kekenwa. Watwero pennye kekenwa ki lapeny magi ni: ‘Tika atye atera me waco ni abalo kun akwayo kica ki mwolo, wek ayub wat i kinwa? Jehovah ki Yecu gibiwinyo nining ka an aye akwongo kwanyo kare me yubo wat ki omera nyo lamera?’ Lagamwa pi lapeny magi twero tugo cwinywa me winyo lok pa Yecu kun ki mwolo wakwanyo kare me rwatte ki laye lawotwa wek wayub wat i kinwa. Ka watimo meno, ci nongo watye ka lubo lanen pa Yakobo.

15. Keto i tic cik ma iye lac ma tye i Jo Epeco 4:2, 3 twero konyowa nining me yubo wat i kinwa?

¹⁵ Tam kong i kom gin ma onongo twero timme ka onongo Yakobo otemo laro lok ki Ecau i kom anga ma obedo labalo! Rwattegi man onongo bigik marac adada. Ka wacito bot ominwa me yubo wat kwede, omyero wabed ki cwiny me mwolo. (Kwan Jo Epeco 4:2, 3.) Carolok 18:19 (NWT) waco ni: “Omeru ma itimo bal i kome yubo wat kwede tek loyo cel me gang matek, dok daa mogo tye calo nyonyo doggola me gang.” Omego ma kicwero cwinye bedo calo “nyonyo doggola me gang.” Ka wakwayo kica bote, man twero weko en bedo atera me yubo wat kwedwa.

16. Gin ango mukene ma omyero watam iye, dok pingo?

¹⁶ Mitte bene ni watam matut i kom gin ma wabiwaco bot ominwa ki kit ma wabiwaco kwede. Ka dong watye atera, ci omyero warwatte ki ngat ma cwinye tye ka cwer-ni ki miti me yubo wat i kinwa odoco. I acakkine, en twero waco jami ma cwero cwinywa. Twero bedo yot piwa me keco nyo gengo ngewa, ento timo meno pe kelo kuc. Wi opo ni yubo wat ki utmegini pire tek loyo moko anga ma labal ki anga ma pe labal.—1 Kor. 6:7.

17. Gin ango ma itwero pwonyo ki i lanen pa Gilbert?

¹⁷ Omego mo ma nyinge Gilbert otute matek adada me bedo ngat ma yubo wat. En otito ni: “Onongo atye i pekki mapol i kin an ki nyara. Pi mwaki makato aryo kulu, atute matek me nyamo lok ki nyara i yo me mwolo wek wayub wat i kinwa odoco.” Ngo mukene ma Gilbert otimo?  “Kare ducu ma onongo kong peya aloko kwede, onongo alego dok apoyo wiya ni omyero kiniga pe omaka ka nyara owaco gin mo marac bota. Onongo mitte ni abed atera me timo kica. Apwonyo ni omyero pe abed ka laro lok me moko ni pe atimo gin mo marac dok aniang ni ticca obedo me yubo wat i kinwa.” Adwogine obedo nining? Gilbert owaco ni: “I kare-ni, atye ki wic ma opye mot pien atye ki wat maber ki jo me ganga ducu.”

18-19. Ka wacwero cwiny ngat mo, omyero watute me timo gin ango dok pingo?

¹⁸ Myero imok tammi me timo gin ango ka iniang ni icwero cwiny Lakricitayo lawoti mo? Lub tira ma Yecu omiyo me yubo wat i kinwu. Leg bot Jehovah i kom lok meno, dok ijenge i kom cwiny mere maleng wek okonyi iyub wat. Ka itimo meno, ibibedo ki yomcwiny, dok ibinyuto ni itye ka winyo lok pa Yecu.—Mat. 5:9.

¹⁹ Watye ki pwoc madit adada ni Jehovah miniwa tira me mar kun tiyo ki “lawi lwak muye en,” Yecu Kricito. (Ep. 5:23) Dong walego ni wan ducu wamoku tamwa me ‘winye,’ kit macalo lukwena Petero, Yakobo, ki Jon, gutimo kwede. (Mat. 17:5) Wanyamo kit ma watwero timo kwede meno ka wayubo wat i kinwa ki Lakricitayo ma wacwero cwinye. Ka watimo meno kun wamedde ki wot i yo mading ma tero dano i kwo, wabinongo mot mapol i kare-ni ki i kare me anyim.