1, 2. 1) Pedro, Santiago ca Juan, ¿chem dungu feipingei ñi femal engün? 2) ¿Chem inaduamaiñ feitachi papeltun mu?

DEU RUPALU ti Pascua 32 tripantu meu, Pedro, Santiago ca Juan perumefingün quiñe afmatun dungu. Quiñe fütra huincul mu, fei engün pefingün ñi calerumetun tañi ad ta Jesús. Biblia feipi Jesús tañi “ange alofi antü reque, ca tañi tacuhun rume lingari pire reque” (Mat. 17:1-4). Fei allcürumeingün quiñe dungun cüpalu huenu mu, Chau Dios llemai. Feipi: “Fei tüfa iñche tañi saquin Fotüm, iñche tañi dulliel. Allcütuñmafimün ñi dungu” (Mat. 17:5). Feitachi cüla apostol inaquefingün Jesús tañi feipin. Iñchiñ ca femngechi femaiñ.

² Rupachi papeltun mu, quimiyiñ quiñeque dungu taiñ femnoal femngechi taiñ allcütuafiel Jesús ñi feipin. Feita mu, inaduamaiñ epu dungu Jesús feipieiñmu taiñ femal.

3. ¿Chem mülei taiñ femal iñchiñ? (Mateo 7:13, 14).

³ (Papeltunge Mateo 7:13, 14). Jesús feipi ñi mülen epu puerta. Caque quiñeque puerta niei quiñe rüpü: tati alü rupachi rüpü ca ti pichi rupachi rüpü. Ngehuelai chem rüpü no rume, feitachi epu rüpü müten. Iñchiñ mülei taiñ dullial chem rüpü taiñ inayal. Quiñe  cüme rüpü müten mülefui, feimu cüme dulliliyiñ afnoachi mongen nieafuiñ.

4. ¿Chem piafuiñ ti alü rupachi rüpü mu?

⁴ Ti alü rupachi rüpü mu fentren che miyauquei, cüdaungelai ñi inangeal. Fentren che miyauquelu am, caquelu che inayentuqueyu feimu famentuuquelai tüfachi huesa rüpü mu. Huelu ngüneduamquelaingün rume Satanás tañi raquiduameleteu ñi inayal tüfachi rüpü. Tüfachi rüpü yequefi ta che tañi apümcangeal engün (1 Cor. 6:9, 10; 1 Juan 5:19).

5. Quiñeque che, ¿chumingün tañi conpual ti pichi rupachi rüpü mu?

⁵ Ti pichi rupachi rüpü mu, pichin che conpuquei. ¿Chumngelu? Jesús feipi mülei fentren coila quimeltufe (Mat. 7:15). Famülque mu, rume fentren religion mülei. “Iñchiñ quimeltuqueiñ ti rüf dungu” piqueingün. Fentren religion mülelu am, tati pu che hueluraquiduamcülei, yafüluuquelai rume tañi quintual ti pichi rupachi rüpü. Cüdaungelu rume, pu che peafui tüfachi cüme rüpü. Feimu Jesús feipi: ‘Inaniefilmün iñche ñi dungu, rüf dungu meu eimün iñche ñi pu discipulongeimün. Quimafimün tati rüf dungu, fei ti rüfngechi dungu lifrecünutuaimünmeu’ (Juan 8:31, 32). Huelu eimi yafüluhuimi tami quintual ti rüf dungu. ¿Chumimi? Eluhuimi tami papeltual Biblia, fei tami quimal Jehová tañi huercün dungu ca Jesús tañi quimeltun. Por ejemplo, quimürpuimi Jehová feipieimu tami famentuafiel ñi quimeltuqueel tati coilaque religion ca tami connoal chem fiesta rume nüucülelu coilaque religion mu. Ca quimürpuimi, quiñeque mu, cüdautuafuimi tami inayal Jehová tañi feipin. Ca cüdautuafuimi tami elcünual huesaque huimtun ñi ayüquenoel Jehová (Mat. 10:34-36). Huelu fente tami piuqueyefiel ta Jehová, cüme elcünutuimi tami mongen. ¡Müna cümei tami femün! ¿Ayüucülenoafulu ta Jehová eimi mu? (Prov. 27:11).

6. ¿Chem quelluafeiñmu taiñ famtripanoal ti pichi rupachi rüpü mu? (Salmo 119:9, 10, 45, 133).

⁶ ¿Chem quelluafeiñmu taiñ famentuunoal ti pichi rupachi rüpü mu? Raquiduamnge tüfa. Quiñeque huincul mu, inafül carretera elcünungequei quiñeque malal. Femngechi tati auto ca ti che ñi famentuunoal ti rüpü meu fei ñi ütrüfnagnoal. Pu che illcuquelai tañi mülen tüfachi malal. “Müna catrütueneu tañi manejayal” piquelaingün. ¿Chem adentulei tüfachi malal? Jehová tañi ngülam. Tüfa quelluqueiñmu taiñ famentuunoal ti pichi rupachi rüpü mu (papeltunge Salmo 119:9, 10, 45, 133).

7. Eimi hueche, ¿chem mülei tami raquiduamal ti pichi rupachi rüpü mu?

⁷ Eimi hueche, raquiduamqueimi chi Jehová tañi ngülam catrütuqueimu tami femal quiñeque dungu. Femngechi ayüquei Huecüfü tami raquiduamal. Quisu ayüquei tami ngüneduamafiel ñi cüme rupaquen tati pu che miyauquelu tüfachi alü rupachi rüpü mu. Eimi peafuimi tami pu compañ colegio mu cam tati pu che tripalu internet mu, fei “rume ayüucüleingün” piafuimi. Huecüfü ayüquei tami raquiduamal tami müte  cüme rupaquenon fei engün reque. Cafei Huecüfü cüpa raquiduameleimu inafilmi Chau Dios ñi ngülam, rüf ayüucülelayaimi. * Huelu loncontucunge, pu che inaniefilu ti alü rupachi rüpü mu, apümcangeai. Huecüfü ayüquelai pu che ñi quimal tüfa. Huelu Jehová femngechi femquelai. Quisu quimeltueimu inaniefilmi ti pichi rupachi rüpü, rumel mongeleaimi ca rüf ayüucüleaimi (Sal. 37:29; Is. 35:5, 6; 65:21-23).

8. Pu hueche, ¿chem quimürpuafui ñi femün ta Olaf?

⁸ Peaiñ ñi rupan quiñe hueche peñi, Olaf pingelu. * Tañi pu compañ colegio mu, ngüchaltucueyu tañi conal huesaque cudumuhun mu. Fei ti hueche feipifi tañi pu compañ ñi inaquefiel Biblia ñi ngülam, feimu conlayafui huesaque  dungu mu. Tañi pu domo compañ allcülu tüfa ñi feipin ti hueche, doi ngüchaltucungei tañi conal huesaque cudumuhun mu. Huelu ti hueche femlai. Tañi pu quimeltufe ca feipiquefeyu ñi amual ta universidad, femngechi ñi doi yamngeal ca ñi doi plata nieal. “Femnolmi, nielayaimi quiñe cüme cüdau ca ayüuduamcülelayaimi” pingequefui. ¿Chumi Olaf tañi chaftuafiel feichi dungu? Quisu feipi: “Quintun cümeque hueni trahunche mu, quisu engün tañi familia reque mülefui. Cafei, doi cüme ngüneduamfiñ chem pilen ta Biblia. Doi ngüneduamfilu iñche chem pilen Biblia, doi quimtucuquen tañi nieel ti rüf dungu, fei eluhun tañi fautizahual”.

9. ¿Chumaiñ taiñ famtripanoal ti pichi rupachi rüpü mu?

⁹ Huecüfü ayüniei taiñ inayal ti alü rupachi rüpü, femngechi taiñ apümcangeal (Mat. 7:13). ¿Chumafuiñ taiñ famtripanoal ti pichi rupachi rüpü mu? Allcütuñmayafiyiñ Jesús tañi dungun ca raquiduamaiñ fente taiñ cuñiutucuqueteu inayal tüfachi cüme rüpü. Ca peaiñ cangelu dungu taiñ feipieteu Jesús taiñ femal iñchiñ.

10. Ñi feipin Mateo 5:23, 24, ¿chem feipieiñmu Jesús taiñ femal?

¹⁰ (Papeltunge Mateo 5:23, 24). Tüfa mu, Jesús nütramcai tati pu israelita yelu tañi chalintucun tañi cüla fiesta mu. Raquiduamnge. Cuifi mu, quiñe israelche yeafui tañi chalintucun ti ngillatuhue meu. Huelu epe puule ñi chalintucuafiel ti sacerdote mu, acordarumeafui quiñe che tañi lladcütunieteu. Fei, ¿chem mülefui ñi femal? Mülefui tañi elcünual ñi chalintucun fei ñi amual ñi cümelcautual feiti che engu. Tüfa doi falin-ngefui.

11. ¿Chumi Jacob ñi cümelcautual tañi peñi engu?

¹¹ Ngüneduamaiñ ñi rupan ta Jacob. Jacob 20 tripantu yenielu tañi mülenon ñi mapu mu, Jehová feipieyu tañi huiñotual (Gén. 31:11, 13, 38). Huelu tañi peñi Esaú ayüfui tañi langümaeteu (Gén. 27:41). Müna llicalepelafui ta Jacob. Ramtuuquefui chi: “¿Petu üdeniecapelaeneu tañi peñi?” (Gén. 32:7). ¿Chem dungu femi Jacob tañi cümelcautual tañi peñi engu? Hunelu mu, llellipufi Jehová. Fei hula, huercülelfi quiñe falin regalo (Gén. 32:9-15). Cafei chaf trahuluulu engu, Jacob regle rupa lucutunagi Esaú mu. Femngechi pengelelfi tañi yamniefiel. Femngechi mu, Jacob ñom piuque mu cümelcautui tañi peñi engu (Gén. 33:3, 4).

12. ¿Chem quimeltuafeiñmu Jacob ñi femün?

¹² ¿Chem quimeltun entuafuiñ Jacob tañi femün mu? Hunelu mu, feipifi Jehová ñom piuque mu tañi quelluaeteu. Epu, deu llellipufilu Jehová, Jacob femi tañi feipifiel, femngechi ñi cümelcautual tañi peñi engu. Ca cüla, Jacob feipilafi tañi peñi “eimi ta huelulcahuimi”. Doi mai, cüme nütramcafi ñi cümelcautual engu. ¿Chumngechi inahuentuafuiñ ta Jacob? Peafiyiñ.

13, 14. Huesa duamelfiliyiñ quiñe peñi cam quiñe lamngen, ¿chem mülei taiñ femal?

¹³ Iñchiñ taiñ amuleal tüfachi pichi rupachi rüpü mu, mülei taiñ cümelcaucüleal taiñ pu peñi ca pu lamngen iñchiñ  (Rom. 12:18). Feimu, huesa duamelfiliyiñ quiñe peñi cam quiñe lamngen, ¿chem mülefui taiñ femal? Jacob reque, mülei ñi llellipuafiel ta Jehová taiñ quelluaeteu, femngechi taiñ cümelcautual ti peñi cam ti lamngen iñchiñ.

¹⁴ Cafei, mülei taiñ ngüneduamuhual. Ramtuhuafuiñ: “¿Ñom piuque mu eluucülen tañi feipial: ‘Huesa femfun. ¿Cümelcautuafuyu? Perdonayafen’? Fei iñche hunecünuli tañi cümelcautual tañi peñi cam lamngen iñchiu, ¿chum duamafui Jehová ca Jesús?”. Tüfachi dungu quelluaiñmu taiñ allcütuafiel Jesús ñi dungu ca taiñ ñom piuque mu cümelcautual pu peñi ca pu lamngen iñchiñ. Jacob tañi femün inayentufiliyiñ, müna quelluaiñmeu.

15. Ñi feipin Efesios 4:2, 3, ¿chumngechi quelluafeiñmu taiñ cümelcautual pu peñi ca pu lamngen iñchiñ?

¹⁵ Jacob illcunquechi amufule ca feipifile ta Esaú “eimi huesalcaimi, iñche no”, ¿chem rupayafui? Rume huesa tripayafui ñi dungu. Iñchiñ ayüliyiñ taiñ cümelcautual quiñe peñi cam quiñe lamngen iñchiñ, ñom piuque mu nütramcayafiyiñ (papeltunge Efesios 4:2, 3). Proverbios 18:19 pengeli quiñe peñi cam quiñe lamngen illculele, müna cüdaungeafui ñi nütramcangeal. Ñom piuque mu “perdonaen” pifiliyiñ, feimu eluhuafui ñi nütramcayal fei taiñ cümelcautual.

16. ¿Ca chem mu mülei taiñ raquiduamal? ¿Chumngelu?

¹⁶ ¿Ca chem femafuiñ? Mülei taiñ cüme raquiduamal chem piafiel taiñ peñi cam taiñ lamngen ca chumngechi taiñ feipiafiel. Pepicaucüleliyiñ, mülei taiñ fülmayafiel ca cüme nütramcayafiel, femngechi taiñ huiño cümelcaucületual. Ellaca mu, ti peñi cam ti lamngen huesa entuafui chi ñi dungu. Femle, illcufemlayaiñ, ngüfeñpeulayaiñ rume. Femfuliyiñ, doi huesacünuafuiñ ca cümelcautulayafuiñ. Loncontucuaiñ: falilai ñi quimngeal inei ñi huesalcan. Doi falin-ngei taiñ cümelcautual taiñ pu peñi ca pu lamngen iñchiñ (1 Cor. 6:7).

17. Gilberto ñi femün, ¿chem quimeltueimu eimi?

¹⁷ Ngüneduamaiñ ñi femün quiñe peñi, Gilberto pingelu. Fei eluhui tañi cümelcautual tañi ñahue engu. Taiñ  peñi feipi: “Rume huesa dungu niefuyu tañi ñahue iñchiu. Doi epu tripantu mu yafüluhun ñi cüme nütramcayafiel tañi ñahue ñom piuque mu, tayu ca huiño cümelcaucületual”. ¿Ca chem chumi taiñ peñi? “Petu ñi dungunofiel tañi ñahue, llellipuquefiñ Jehová ñi illcufemnoal huesa pielimu. Mülefui ñi perdonayafiel. Quimürpun ñi feipinoal ‘iñche ñi dungu fali’, doi mai ñi eluucüleal tayu cümelcautual”. ¿Chum tripai ñi femün? Taiñ peñi feipi: “Feula com cüme yeucülen tañi pu che iñchiñ”.

18, 19. Huesa duamelfiliyiñ quiñe che, ¿chem chumaiñ? ¿Chumngelu?

¹⁸ Huesa duamelfiliyiñ quiñe lamngen cam peñi, ¿chem mülei taiñ femal? Mülei taiñ feyentuafiel Jesús ñi huercün dungu taiñ cümelcaucületual. Feipiafiyiñ Jehová tüfachi dungu taiñ eluaeteu tañi nehuen, femngechi quelluaiñmu taiñ cüme yeucületual. Femliyiñ, ayüucüleaiñ ca pengelaiñ taiñ allcütuquefiel Jesús (Mat. 5:9).

¹⁹ Jehová, piuqueyen mu, adnieiñmeu Jesús ñi lonconiefiel ti trahunche. ¡Müna mañumniefiyiñ! (Efes. 5:23). Pedro, Santiago ca Juan fei engün reque eluucüleaiñ ñi allcütuafiel Jesús (Mat. 17:5). Quimürpuiñ allcütufiliyiñ Jesús, cümelcautuaiñ taiñ peñi ca lamngen iñchiñ taiñ huesa duamelquefiel. Fei amuleliyiñ pichi rupachi rüpü mu, feula nieaiñ fentren cümelcan, ca cüpalechi antü rumel nieaiñ ayühun.