1, 2. а) Исанын үч һәварисинә һансы әмр верилмишди вә онлар буна неҹә һај вердиләр? б) Бу мәгаләдә нә һагда данышаҹағыг?

 ЕРАМЫЗЫН 32-ҹи илинин Пасха бајрамындан сонра һәвари Бутрус, Јагуб вә Јәһја мөһтәшәм бир ҝөрүнтүнүн шаһиди олмушдулар. Онлар уҹа бир дағда, еһтимал ки, Һәрмун дағында оларкән Исанын ҝөркәминин дәјишдијини ҝөрмүшдүләр. «Онун үзү ҝүнәш кими шәфәг сачды вә палтары ағаппаг олуб пар-пар парылдады» (Мәт. 17:1—4). Бу ҝөрүнтүнүн сонуна јахын һәвариләр Аллаһын сәсини ешитдиләр: «Бу, Мәним севимли Оғлумдур. Мән ондан чох разыјам. Она гулаг асын» (Мәт. 17:5). Бу үч һәвари сүрдүкләри һәјатла Исанын сәсинә гулаг асдыгларыны ҝөстәрдиләр. Биз онлардан нүмунә ҝөтүрмәк истәјирик.

² Өтән мәгаләдән өјрәндик ки, Исанын сәсинә гулаг асдығымызы ҝөстәрмәк үчүн нәләри етмәмәлијик. Бу мәгаләдән исә өјрәнәҹәјик ки, һансы ики шеји етмәлијик.

3. Мәтта 7:13, 14 ајәләринә әсасән, биз нә етмәлијик?

³ Мәтта 7:13, 14 ајәләрини охујун. Диггәт јетирин ки, Иса ики фәргли гапыдан данышыр вә бу гапылар ики фәргли јола апарыр — ҝениш јола вә енсиз јола. Үчүнҹү јол јохдур. Биз һансы јолла ҝедәҹәјимизә гәрар вермәлијик. Бу, һәјатда вердијимиз ән ваҹиб гәрардыр. Бундан бизим әбәди ҝәләҹәјимиз асылыдыр.

4. Ҝениш јол неҹә бир јолдур?

 ⁴ Биз бу ики јол арасындакы фәрги унутмамалыјыг. Ҝениш јолда чох адам вар, чүнки бу јол раһатдыр. Тәәссүфләр олсун ки, чохлары бу јолда галмаға гәрар верир вә бу јолда ҝедән күтләнин ардынҹа ҝедирләр. Онлар баша дүшмүр ки, бу јолла ҝетмәләрини истәјән Шејтандыр вә онун јолунун сону өлүмдүр (1 Кор. 6:9, 10; 1 Јәһ. 5:19).

5. Бәзиләри енсиз јолу тапмаг вә бу јолда јеримәјә башламаг үчүн һансы чәтинликләрдән кечибләр?

⁵ Ҝениш јолдан фәрли олараг, диҝәр јол енсиздир вә Иса демишди ки, бу јолу чох аз адам тапаҹаг. Нәјә ҝөрә? Мараглыдыр ки, нөвбәти ајәдә Иса давамчыларыны јаланчы пејғәмбәрләр барәдә хәбәрдар едир (Мәт. 7:15). Бәзи һесабламалара әсасән, минләрлә дин вар. Онларын әксәријјәти һәгигәти өјрәтдијини иддиа едир. Динләрин бу гәдәр чохлуғу милјонларла инсаны мәјус едир вә ја чашбаш гојур. Буна ҝөрә дә онлар һәјата ҝедән јолу һеч ахтармаға да ҹәһд етмирләр. Амма бу јолу тапмаг олар. Иса демишди: «Әҝәр мәним сөзләримә даима әмәл етсәниз, демәли, сиз, һәгигәтән, мәним шаҝирдләримсиниз. Сиз һәгигәти дәрк едәҹәксиниз вә һәгигәт сизи азад едәҹәк» (Јәһ. 8:31, 32). Нә јахшы ки сиз чохлуғун ардынҹа ҝетмәмисиниз! Әксинә, һәгигәти ахтармысыныз. Аллаһын Кәламыны арашдырыб, Онун бујругларыны өјрәнмисиниз. Исанын өјрәтдикләринә гулаг асмысыныз. Диҝәр шејләрлә јанашы өјрәнмисиниз ки, Јеһова јалан дини тәлимләри рәдд етмәјинизи, бүтпәрәст бајрамлары гејд етмәмәјинизи истәјир. Һәмчинин өјрәнмисиниз ки, Јеһованын бујругларына әмәл етмәк, Онун бәјәнмәдији ишләрдән узаг дурмаг чәтин ола биләр (Мәт. 10:34—36). Ола билсин, сизин үчүн лазыми дәјишикликләр етмәк асан олмајыб, амма Јеһованы севдијиниз үчүн вә Онун рәғбәтини газанмаг истәдијиниз үчүн сиз дәјишмәјә давам етдиниз. Тәсәввүр етмәк олар, Јеһова сиздән неҹә разыдыр! (Мәс. 27:11).

6. Зәбур 119:9, 10, 45, 133 ајәләринә әсасән, енсиз јолда галмағымыза нә көмәк едә биләр?

⁶ Енсиз јолла сәфәрә чыхандан сонра бу јолда галмаға сизә нә көмәк едә биләр? Ҝәлин бир нүмунәјә бахаг. Енсиз дағ јолунун кәнарына мәһәҹҹәр чәкилир. О, сүрүҹүнү вә онун машыныны горумаг үчүндүр. Мәһәҹҹәрин сајәсиндә сүрүҹү јолун кәнарына јахынлашмыр вә ја јолдан чыхмыр. Чәтин ки һансыса сүрүҹү бу мәһәҹҹәрин чәкилдијинә ҝөрә ҝилејләнсин, онун һәрәкәтини мәһдудлашдырдығыны десин. Аллаһын Кәламындакы гајда-ганунлар да бу мәһәҹҹәрә бәнзәјир. Бу гајда-ганунлар бизә енсиз јолда галмаға көмәк едир. (Зәбур 119:9, 10, 45, 133 ајәләрини охујун.)

7. Јеһова ҝәнҹләрин енсиз јола неҹә бахмасыны истәјир?

⁷ Әзиз ҝәнҹләр, бәзән сизә елә ҝәлирми ки, Јеһованын јолунда чох гадағалар вар, истәдијинизи едә билмирсиниз? Шејтан да елә бу ҹүр дүшүнмәјинизи истәјир. О истәјир ки, сиз ҝениш јолда јеријәнләрә бахыб, онларын неҹә әјләнҹәли вахт кечирдијини дүшүнәсиниз. Бунун үчүн о, мәктәб јолдашларыныздан, интернетдә ҝөрдүкләриниздән истифадә едә биләр. Сиздә белә фикир ојада биләр ки, сиз һәјатдакы мараглы шејләрдән мәһрумсунуз. Шејтанын мәгсәди одур ки, Јеһованын гајда-ганунларынын сизә һәјатдан там зөвг алмаға  мане олдуғуну дүшүнәсиниз *. Бир шеји јадда сахлајын, Шејтан истәмир ки, онун јолунда јеријәнләр бу јолун онлары һара апардығыны дүшүнсүнләр. Јеһова исә әксинә, истәјир биләсиниз ки, һәјата апаран јолда јеријәнләри гаршыда неҹә ҝөзәл һәјат ҝөзләјир (Зәб. 37:29; Әшј. 35:5, 6; 65:21—23).

8. Ҝәнҹләр Олафын нүмунәсиндән нә өјрәнә биләр?

⁸ Ҝәлин ҝөрәк Олаф адлы бир ҝәнҹ гардашдан нә өјрәнирик *. Синиф јолдашлары она тәзјиг ҝөстәрирди ки, киминләсә ҹинси мүнасибәтдә олсун. Олаф онлара изаһ етди ки, Јеһованын Шаһидидир вә јүксәк әхлаг нормаларына ујғун јашајыр. Онда бәзи гызлар сөзләшдиләр ки, ким ону јолдан чыхараҹаг вә онунла ҹинси мүнасибәтдә олаҹаг. Гызлар нә гәдәр ҹәһд етсәләр дә, Олаф мөһкәм дајанды. Амма бу, Олафын үзләшдији јеҝанә сынаг дејилди. Олаф дејир: «Мүәллимләрим мәни инандырмаға чалышырдылар ки, мүтләг али тәһсил алмалыјам, онда һамы мәнә һөрмәтлә јанашаҹаг. Тәһсил алмасам, ҝәлирли ишим, јахшы ҝүзәраным олмајаҹаг». Олафа бу ҹүр тәзјигләрә јенилмәмәјә нә көмәк етди? О дејир: «Баҹы-гардашларла чох јахын мүнасибәтим вар иди. Онлар мәним үчүн санки бир аилә иди. Бундан әлавә, Мүгәддәс Китабы даһа ҹидди мүталиә етмәјә башладым. Нә гәдәр дәриндән мүталиә едирдимсә, һәгигәтдә олдуғума бир о гәдәр дә әмин олурдум. Бүтүн бунларын сајәсиндә вәфтиз олунмаға гәти гәрар вердим».

9. Енсиз јолда галмаг үчүн нә етмәк лазымдыр?

 ⁹ Шејтанын арзусу одур ки, сиз һәјата апаран јолдан чыхасыныз вә чохлуға гошулуб, «мәһвә апаран» ҝениш јолла ҝедәсиниз (Мәт. 7:13). Амма әҝәр сиз даим Исанын сөзүнә гулаг ассаныз вә енсиз јола мүдафиә кими јанашсаныз, бу јолдан сапмајаҹагсыныз. Инди исә ҝәлин ҝөрәк Иса Мәсиһ бизә башга нә етмәји бујуруб.

10. Мәтта 5:23, 24 ајәләринә әсасән, Иса бизә нә етмәји бујуруб?

¹⁰ Мәтта 5:23, 24 ајәләрини охујун. Бурада Иса Мәсиһ она гулаг асан јәһудиләр үчүн әһәмијјәт дашыјан бир мәсәләјә тохунур. Тәсәввүр един ки, кимсә мәбәдә ҝәлиб вә һејван гурбанлығыны каһинә вермәк үзрәдир. Әҝәр һәмин ан јадына дүшсә ки, кимсә ондан инҹијиб бәхшишини елә орадаҹа гојуб ҝетмәли иди. Ҝөрәсән, нәјә ҝөрә? Ахы Јеһоваја гурбан ҝәтирмәкдән даһа өнәмли нә ола биләрди? Иса Мәсиһ ачыг-ајдын демишди: «Әввәлҹә ҝет онунла барыш» (Мәт. 5:23, 24).

11. Јагуб гардашы илә барышмаг үчүн нәләр етди?

¹¹ Һәзрәти Јагубун һәјатында баш верән бир һадисәдән диндашымызла барышмагла бағлы чох шеј өјрәнә биләрик. Јагуб тәхминән ијирми ил иди ки, ата јурдундан узагда јашајырды. Даһа сонра Јеһова деди ки, ора гајытсын (Јар. 31:11, 13, 38). Амма бир проблем вар иди. Јагубун бөјүк гардашы Ејс ону өлдүрмәк нијјәтиндә иди (Јар. 27:41). Јагубу горху бүрүмүшдү, о, тәшвиш ичиндә иди. Фикирләширди ки, бәлкә, гардашы һәлә дә она кин бәсләјир? (Јар. 32:7). Бәс о, гардашы илә арасындакы мүнасибәти дүзәлтмәк үчүн нә етди? Әввәла, бу барәдә Јеһоваја һәрарәтлә дуа етди. Сонра Ејсә чохлу бәхшишләр ҝөндәрди. (Јар. 32:9—15). Нәһајәт, онунла ҝөрүшәндә она бөјүк һөрмәт ҝөстәрди. Онун гаршысында бир дәфә јох, ики дәфә јох, дүз једди дәфә тәзим етди! Тәвазөкар вә һөрмәтҹил даврандығы үчүн Јагуб гардашы илә мүнасибәтләрини дүзәлтди (Јар. 33:3, 4).

12. Јагубдан нә өјрәнирик?

¹² Јагубун Ејслә ҝөрүшә неҹә һазырлашмасындан, она неҹә јахынлашмасындан ваҹиб шеј өјрәнирик. Јагуб тәвазөкарлыгла Јеһовадан көмәк истәди. Сонра дуасына ујғун давранды, гардашынын көнлүнү алмаг үчүн мүәјјән шејләр етди. Онунла ҝөрүшәндә исә кимин һаглы олдуғуна ҝөрә мүбаһисә етмәди. Онун мәгсәди гардашы илә барышмаг иди. Јагубун нүмунәсини неҹә изләјә биләрик?

13, 14. Диндашымызын хәтринә дәјмишиксә, нә етмәлијик?

¹³ Һәјата апаран јолда јеријән бизләр диндашларымызла јахшы мүнасибәтдә олмаға  чалышырыг (Ром. 12:18). Бәс әҝәр билириксә ки, диндашымыз биздән инҹијиб, нә етмәлијик? Јагуб кими, Јеһоваја үрәкдән дуа етмәлијик. Ондан хаһиш едә биләрик ки, диндашымызла барышмағымыза көмәк етсин.

¹⁴ Һәмчинин биз өзүмүзү дә тәһлил етмәлијик. Белә бир суалын үзәриндә дүшүнә биләрик: «Мән гүруруму гурбан вермәјә, тәвазөкарлыг ҝөстәриб үзр истәмәјә вә диндашымла барышмаға һазырам? Јеһова вә Иса Мәсиһ ҝөрсә ки, мән барышмаг үчүн илк аддымы атдым, һансы һиссләри кечирәр?» Бу суаллара вердијимиз ҹаваб бизә көмәк едәҹәк ки, Исанын дедикләринә гулаг асаг вә диндашымызла тәвазөкарлыгла сөһбәт едиб, барышмаға чалышаг. Беләликлә дә биз Јагубун нүмунәсини изләмиш олаҹағыг.

15. Ефеслиләрә 4:2, 3 ајәләриндәки принсипә әмәл етмәк диндашымызла барышмаға неҹә көмәк едә биләр?

¹⁵ Тәсәввүр един, Јагуб гардашы илә ҝөрүшән вахт гүрурлу давранса иди, нә оларды? Вәзијјәт тамамилә башга ҹүр битәрди. Биз диндашымызла арамыздакы анлашылмазлыг вә ја һәр һансы инҹиклик һаггында данышанда буну тәвазөкарлыгла етмәлијик. (Ефеслиләрә 4:2, 3 ајәләрини охујун.) Мәсәлләр 18:19 ајәсиндә дејилир: «Инҹик гардашын көнлүнү алмаг истеһкамлы шәһәри алмагдан чәтиндир, елә чәкишмәләр вар ки, гала гапысынын рәзәси кимидир». Тәвазөкарлыгла үзр истәмәк көмәк едәҹәк ки, гала гапысындан ичәри дахил олаг, јәни диндашымызла барышаг.

16. Нәјә фикир вермәлијик вә нәјә ҝөрә?

¹⁶ Диндашымызла данышаркән нә дедијимизә вә неҹә дедијимизә дә фикир вермәлијик. Онунла данышмаға өзүмүзү һазыр биләндә мәгсәдимиз онун үрәјиндәки инҹиклији чыхармаг олмалыдыр. Ола биләр, о, әввәл-әввәл елә сөзләр десин ки, буну ешитмәк адама хош олмасын. Бу заман еһтијатлы олмасаг, асанлыгла өзүмүздән чыха биләрик вә ја өзүмүзә бәраәт газандырмаға башлаја биләрик. Бу, нә дәрәҹәдә јахшы олар? Мәҝәр бу сөһбәтин ахыры сүлһлә битәр? Әлбәттә ки, хејр. Јадда сахлајын ки, диндашынызла араныздакы мүнасибәтләри бәрпа етмәк кимин һаглы олдуғуну сүбут етмәкдән даһа өнәмлидир (1 Кор. 6:7).

17. Жилбердән нә өјрәндиниз?

 ¹⁷ Жилбер адлы бир гардаш сүлһпәрвәр олмаг үчүн чох чалышыб. О дејир: «Аилә үзвүмлә арамда чох бөјүк проблем вар иди вә ики илдән чох мән ҹәһд етдим ки, онунла сәмими вә сакит тәрздә данышыб, мүнасибәтләримизи јахшылашдыраг». Жилбер даһа нә едирди? «Онунла данышмаздан өнҹә Јеһоваја дуа едирдим вә онун дејәҹәји истәнилән аҹы сөзләрә өзүмү һазырлајырдым, һәмчинин бағышламаға да һазыр олмалы идим. Баша дүшдүм ки, өзүмүн һаглы олдуғуму сүбут етмәјә чалышмамалыјам. Мәним вәзифәм онунла барышмагдыр». Бунун нәтиҹәси нә олду? Жилбер дејир: «Инди гәлбим раһатдыр. Чүнки бүтүн аилә үзвләримлә меһрибан мүнасибәтим вар».

18, 19. Киминсә хәтринә дәјмишиксә, нә етмәлијик вә нәјә ҝөрә?

¹⁸ Әҝәр диндашынызын хәтринә дәјдијинизи билирсинизсә, нә етмәлисиниз? Исанын бујруғуна ујғун давранараг онунла барышын. Бу мәсәлә барәдә Јеһоваја дуа един. Сүлһ јаратмаг үчүн Ондан мүгәддәс руһ диләјин. Белә етсәниз, хошбәхт олаҹагсыныз вә бир даһа сүбут едәҹәксиниз ки, Исанын сәсинә гулаг асырсыныз (Мәт. 5:9).

¹⁹ Биз чох миннәтдарыг ки, Јеһова «јығынҹағын башы» олан Иса Мәсиһ васитәсилә бизә јол ҝөстәрир (Ефес. 5:23). Һәвари Бутрус, Јагуб вә Јәһја кими, ҝәлин Иса Мәсиһә гулаг асмаға гәти гәрарлы олаг (Мәт. 17:5). Арашдырдығымыз кими, биз буну биздән инҹијән диндашымызла барышмагла едә биләрик. Белә етсәк вә әбәди һәјата апаран енсиз јолдан чыхмасаг, биз инди бол-бол немәтләр алаҹағыг, ҝәләҹәкдә исә бизи сонсуз хошбәхтлик ҝөзләјир.