1-2. (a) Paretta aha do na dilehon tu tolu apostel ni Jesus, jala boha do tanggapan ni nasida? (b) Aha do na lao tabahas di artikel on?

DUNG Paskah taon 32 M, mandapot parnidaan ma Apostel Petrus, si Jakobus, dohot si Johannes. Tikki i, di sada dolok na timbo do nasida rap dohot Jesus. Olo do ra Dolok Hermon i. Dung i muba ma rupa ni Jesus diida nasida. “Diida nasida ma marsinondang bohina songon mataniari jala pakkeanna pe massai bottar.” (Mat. 17:1-4) Di ujung ni parnidaan i, dibege nasida ma soara ni Debata mandok, “On do Anakku, haholongakki, las situtu do rohakku mangida ibana. Tangihon hamu ma ibana.” (Mat. 17:5) Jala diulahon apostel na tolu i do paretta ni Jahowa i, ditangihon nasida do soara ni Jesus. Pasti lomo do rohatta naeng maniru nasida.

² Di artikel sebelumna, nungnga tabahas akka ulaon na so boi be taulahon. Jala saonari tabahas ma ulaon na ikkon taulahon.

3. Menurut Mateus 7:13, 14, aha do na ikkon tapillit?

³ Jaha Mateus 7:13, 14. Didok Jesus di ayat i adong dua gerbang na berbeda na menuju dua dalan na berbeda, i ma dalan na “bidang” dohot dalan na “maol” didalani. Dang adong dalan na patoluhon. Jadi ikkon tapillit do dalan na dia na ikkon tadalani. On ma keputusan na paling penting na ikkon tabahen di ngolutta. Alana holan sada do dalan na marujung tu hangoluan na saleleng ni lelengna.

4. Songon dia do dalan na “bidang” i?

 ⁴ Saonari tabahas ma jo taringot dalan na bidang i. Godang do halak na mamillit dalan na “bidang” ala mura mandalani i. Dang diboto nasida Sibolis do na mamboan akka halak tu dalan i, jala tu hamatean do ujung ni dalan on. (1 Kor. 6:9, 10; 1 Joh. 5:19) Lungun do rohatta ala godang halak na mamillit tetap di dalan i, jala mangihutton na diulahon akka halak di dalan i.

5. Aha do na ikkon taulahon asa boi mardalan di dalan tu hangoluan i?

⁵ Adong do dalan na berbeda sian dalan na “bidang” i, i ma dalan na soppit na “maol” didalani. Jala didok Jesus holan otik do halak na mardalan disi. Boasa? Alana godang do akka panurirang palsu na mangajarhon na so sittong. Alani i ma dipaingot Jesus akka siseanna asa manat tu nasida. (Mat. 7:15) Saonari pe godang do halak na kecewa tu godang agama na mangakku mangajarhon na sittong. Gabe bingung ma nasida jala dang olo be mangalului dalan tu hangoluan i. Alai sebenarna boi do dapot ni nasida dalan i. Jesus mandok, “Molo diihutton hamu hatakku, tutu ma hamu akka siseanku. Botoonmuna ma hasittongan jala paluaon ni hasittongan i ma hamu.” (Joh. 8:31, 32) Las do rohanami ala dang diihutton hamu godang halak. Dilului hamu do ajaran na sittong. Ringgas do hamu mamparsiajari Bibel, gabe diboto hamu ma aha na dipangido Debata sian hamu. Jala ditangihon hamu do ajaran ni Jesus. Asing ni i, ditinggalhon hamu do agama na so sittong dohot akka perayaan na adong hubunganna tu agama na so sittong i. Memang dang sai mura mambahen akka perubahan i. Dang sai mura mangulahon na dipangido Jahowa jala maninggalhon kebiasaan na so sadalan tu lomo ni rohana. (Mat. 10:34-36) Alai ala holong rohamuna tu Jahowa jala lomo rohamuna naeng mambahen las rohana, berupaya do hamu mangulahon i. Pasti las do roha ni Jahowa mangida hamu!​—Poda 27:11.

6. Menurut Psalmen 119:9, 10, 45, 133, boha do carana asa toktong hita mardalan di dalan tu hangoluan i?

⁶ Boha ma carana asa toktong hita mardalan di dalan tu hangoluan i? Parrohahon ma perumpamaan on. Di piga-piga negara, molo adong dalan di dolok-dolok, biasana dibahen do pagar pengaman di pinggir ni dalan i. Bermanfaat hian do pagar pengaman i, asa unang adong kendaraan na madabu tu jurang. Dang mungkin adong halak na keberatan ala adong pagar pengaman i disi. Jala dang mungkin dokkonon ni nasida gabe dang boi nasida bebas mengendarai mobil alani i. Dos songon pagar pengaman i ma akka standar ni Jahowa na adong di Bibel, i do na mangurupi hita asa toktong mardalan di dalan tu hangoluan.​—Jaha Psalmen 119:9, 10, 45, 133.

7. Boha do seharusna perasaan ni akka na poso mardalan di dalan tu hangoluan i?

⁷ Hamu akka na poso, hea do dihilala hamu terlalu membatasi aturan ni Jahowa i? Las do roha ni Sibolis molo songon i na dihilala hamu. Las do rohana molo dihilala hamu ussonang ngolu ni halak na mardalan di dalan na bidang i. Las do rohana molo gabe dihilala hamu dang sonang ngolumuna, molo dibandingkon tu akka dongan sasikkolamuna dohot akka halak na diida hamu di internet. * Alai ingot ma on: Tipuan do i sude. Godang pe halak mardalan sian i ala so diboto halak i do tudia ujung ni dalan i. Alai molo Jahowa takkas  do dipaboa Ibana tu hamu, gabe sonang do ngolumuna molo tetap hamu di dalan na tu hangoluan i.​—Ps. 37:29; Jes. 35:5, 6; 65:21-23.

8. Aha ma na boi diparsiajari akka na poso sian pengalaman ni si Orlando?

⁸ Taida ma pengalaman ni sahalak doli-doli na margoar si Orlando. * Sai dipaksa dongan sakalasna do ibana asa mangulahon seks na so patut. Jadi dipaboa ibana ma na Saksi Jahowa ibana jala sai diihutton ibana do standar ni Debata na adong di Bibel. Hea do martaru akka borua di kalasna lao mangajak ibana mangulahon seks. Alai dang adong halak i na marhasil. Dang holan i tekanan na dihilala ibana di sikkolana. Didok si Orlando ma muse, “Sai disuru gurukku do au kuliah asa sangap au diida halak, asa boi dapottu karejo na denggan, jala asa boi sonang ngolukku.” Alai ditolak si Orlando do i. Aha do na mambahen ibana sanggup manolak i? Didok ibana, “Berusaha ma au asa lam kompak dohot akka dongan di huria, gabe hira keluargakku ma nasida. Jala lam bagas ma muse huparsiajari Bibel. Hasilna,  gabe lam pos ma rohakku mangihutton ajaran na sittong na adong di Bibel i. Jala gabe bertekad ma au asa setia manomba Jahowa.”

9. Aha do na ikkon taulahon asa toktong hita boi mardalan di dalan tu hangoluan i?

⁹ Ingot ma, sai berusaha do Sibolis manggoda hamu asa kaluar sian dalan na tu hangoluan i. Lomo do rohana molo diihutton hamu pangalaho ni godang halak na mardalan di dalan na bidang i, na marujung tu “hamagoan”. (Mat. 7:13) Alai molo torus tatangihon hata ni Jesus jala taanggap dalan na maol i songon sada perlindungan, boi ma hita tetap mardalan disi. Saonari taida ma muse aha dope na ikkon taulahon.

10. Menurut Mateus 5:23, 24, aha do didok Jesus na ikkon taulahon?

¹⁰ Jaha Mateus 5:23, 24. Di ayat i, dipaboa Jesus do taringot ulaon na massai penting di halak Jahudi. Ikkon dilean nasida do pelean tikki mangulahon i. Bayakkon ma adong sasahalak naung rade mangalehon sada binatang tu malim lao gabe peleanna. Alai toppu ma diingot ibana sahalak donganna na marsogo ni roha tu ibana. Ikkon ditinggalhon ibana do peleanna i jala “lao” mangalului donganna i. Boasa? Alana adong do na lebih penting na ikkon diulahon ibana sebelum mangalehon peleanna tu Jahowa. Didok Jesus, “Lao ma ho mardame dohot donganmi.”

11. Aha do na diulahon si Jakkob asa boi mardame dohot si Esau?

¹¹ Sian na masa di ngolu ni si Jakkob, boi ma tadapot parsiajaran na denggan taringot songon dia carana mardame tu na asing. Hira-hira 20 taon dung lao si Jakkob maninggalhon huta hatubuanna, disuru Debata ma sada suru-suruan makkatai tu si Jakkob, lao manuru ibana mulak muse tu huta hatubuanna i. (1 Mus. 31:11, 13, 38) Pasti dang mura di si Jakkob mangulahon paretta ni Jahowa i. Alana, diingot ibana do sogo hian roha ni si Esau abangna i tu ibana jala naeng dipamate do ibana. (1 Mus. 27:41) Gabe “mabiar situtu ma si Jakkob jala marsak” mamikkiri atik na muruk dope abangna i manang na dang. (1 Mus. 32:7) Attong aha ma na diulahon si Jakkob asa boi ibana mardame tu abangna i? Parjolo ditangiakkon ibana ma parsoalanna i tu Jahowa. Dung i dikirim ibana ma godang hadiah tu si Esau. (1 Mus. 32:9-15) Jala tikki pajuppang ibana dohot si Esau, marsomba ma ibana tu jolo ni si Esau. Dang holan dua hali, alai sappe pitu hali! On patuduhon na diargai ibana do si Esau. Ala serep roha ni si Jakkob jala dipatudu ibana na diargai ibana si Esau, boi ma nasida mardame.​—1 Mus. 33:3, 4.

12. Aha do na boi taparsiajari sian sitiruon na dibahen si Jakkob?

¹² Adong do na diulahon si Jakkob sebelum pajuppang ibana dohot abangna si Esau. Serep do roha ni si Jakkob mangido asa diurupi Jahowa ibana. Jala sadalan do na diulahon ibana tu isi ni tangiangna i. Dibahen ibana do nasa gogona asa boi mardame dohot abangna i. Jala tikki pajuppang ibana dohot si Esau, dang olo ibana mambahas ise do na sittong dohot na sala. Alana tujuan ni si Jakkob, asa boi do ibana mardame dohot abangna i. Boha do caratta maniru na dibahen si Jakkob on?

13-14. Molo taboto haccit roha ni donganta tu hita, aha ma na ikkon taulahon?

¹³ Asa boi hita torus mardalan di dalan na tu hangoluan i, ikkon marsada do hita dohot akka donganta. (Rom 12:18) Aha ma na ikkon taulahon molo taboto adong donganta na haccit rohana tu hita? Tatiru ma si Jakkob. Tatangiakkon ma parsoalanta i tu Jahowa.  Tapangido ma asa dipalambok Ibana roha ni donganta i, asa boi hita mardame muse dohot donganta i.

¹⁴ Asing ni i, porlu do tasukkun muse diritta, ‘Molo dung pajuppang au dohot ibana, olo do au na parjolo minta maaf? Boha do perasaan ni Jahowa dohot Jesus molo hubahen songon i?’ Porlu do tarimangi i asa lam pos rohatta mardame dohot donganta i. Molo tabahen songon i, berarti nga tatangihon be soara ni Jesus, jala nungnga tatiru be si Jakkob.

15. Tikki naeng mardame hita dohot donganta, boha do carana menerappon prinsip di Epesus 4:2, 3?

¹⁵ Bayakkon ma molo ginjang roha ni si Jakkob jala diparsoalhon ibana muse tu si Esau ise na sittong dohot na sala, pasti gabe marbada do nasida ujungna. Jadi asa boi hita mardame dohot donganta, ikkon tapatuduhon do serep ni roha. (Jaha Epesus 4:2, 3.) Poda 18:19 mandok, “Ummaol do mambahen mulak roha ni dongan na haccit rohana sian apala manaluhon kota na marbenteng, jala adong do parbadaan na posi na dos songon palang ni gerbang ni kota na maol bukkaon.” Molo serep do rohatta jala olo hita minta maaf tu donganta i, bisa jadi tarbukka do rohana lao mardame dohot hita.

16. Tikki naeng mardame hita dohot donganta, aha dope muse na ikkon tapikkirhon? Jala boasa porlu tapikkiri i?

¹⁶ Ikkon tapikkirhon do muse aha na lao dokkonotta tu donganta i jala boha carana mandokkon i. Molo nungnga siap hita, tajuppangi ma ibana jala denggan ma hita makkatai tu donganta i. Tujuanna asa boi denggan muse hubunganmuna. Tikki makkatai hamu tu ibana, olo do ra didokkon ibana akka hata na mambahen haccit rohamuna. Molo songon i na masa, olo do ra gabe tersinggung hamu. Alai unang ma pittor muruk hamu manang gabe membela diri. Alana molo dibahen hamu songon i, pasti dang boi hamu mardame. Ingot ma, uppetting do mardame dohot donganta sian apala mambuktihon ise na sittong dohot ise na sala.​—1 Kor. 6:7.

17. Aha ma na boi diparsiajari hamu sian pengalaman ni si Gilbert?

¹⁷ Saonari taparrohahon ma pengalaman ni si Gilbert. Berupaya do ibana asa boi mardame muse dohot boruna. Didok ibana, “Adong masalahku dohot borukku. Saleleng dua taon, sai berusaha do au padenggatton hubunganku tu ibana. Lambok do au makkatai.” Aha ma muse na diulahon si Gilbert? “Sebelum makkatai au tu ibana, martangiang ma au tu Jahowa. Huparade ma rohakku, asa unang  gabe muruk au molo so denggan hatana tu au. Berusaha do au asa dang membela diri, ala tujuanku naeng mardame dohot ibana do.” Aha ma hasilna? Didok si Gilbert, “Saonari, tenang ma pikkiranku ala nga mardame be au muse dohot borukki.”

18-19. Molo adong dongan na haccit rohana tu hita, aha ma na ikkon taulahon? Jala boasa ikkon taulahon i?

¹⁸ Jadi aha ma na ikkon diulahon hamu molo adong donganmuna na haccit rohana tu hamu? Ihutton ma cara na dipaboa Jesus lao mardame. Paboa ma parsoalanmuna i tu Jahowa di tangiangmuna. Jala pangido ma asa diurupi tondi parbadia hamu lao mardame dohot donganmuna i. Molo diulahon hamu i, boi ma gabe las rohamuna jala boi ma dipatudu hamu na ditangihon hamu do soara ni Jesus.​—Mat. 5:9.

¹⁹ Mandok mauliate do hita tu Jahowa ala dilehon Ibana petunjuk tu hita marhite Jesus Kristus, i ma “ulu ni huria”. (Eps. 5:23) Bertekad ma hita ‘manangihon ibana’, songon na dibahen Apostel Petrus, si Jakobus, dohot si Johannes. (Mat. 17:5) Carana, molo adong donganta na haccit rohana tu hita, berusaha ma hita asa boi mardame dohot ibana. Molo taulahon i jala torus hita mardalan di dalan tu hangoluan i, gabe las ma rohatta saonari sahat tu saleleng ni lelengna.